Аще же душа принесет дар жертву Господу, мука пшенична да будет дар его, и да возлиет на ню елей, и возложит на ню ливан: жертва есть:

и да принесет ю к сыном Аароним жерцем, и возмет от нея полну горсть муки пшеничны с елеем и весь ливан ея, и да возложит жрец память ея на олтарь: жертва воня благоухания Господу:

и останок от жертвы Аарону и сыном его: святое святых от жертв Господних.

Аще же принесет дар жертву печену в пещи от муки пшеничны, хлебы пресны спряжены с елеем и опресноки помазаны елеем.

Аще же жертва от сковрады дар твой, мука пшенична смешена со елеем, пресна да будут:

И всяк дар жертвы вашея солию да осолится: да не отставите соли завета Господня от жертв ваших, во всяком даре вашем да принесете Господу Богу вашему соль.

Аще же принесеши жертву от начатков жит Господу, новы спряжены зелены класы истлачены Господу, и принесеши жертву от начатков жит:

и да возлиеши на ню елей, и да возложиши на ню ливан: жертва есть:

и да вознесет жрец память ея от спряженых с елеем, и весь ливан ея: принос есть Господу.