Православный Календарь » Каноны » Канон мученицам Вере, Надежде, Любови и матери их Софии

Канон мученицам Вере, Надежде, Любови и матери их Софии

глас 1

Мученицы Вера, Надежда, Любовь и матерь их София

Творение Феофаново

Пе́снь 1.

Ирмо́с: Твоя́ победи́тельная десни́ца боголе́пно в кре́пости просла́вися. Та́ бо, Безсме́ртне, я́ко всемогу́щая, проти́вныя сотре́, изра́ильтяном пу́ть глубины́ новосоде́лавшая.

Преми́рныя Твоея́, Христе́, и несказа́нныя прему́дрости осия́ние да́руй мне́, Влады́ко, благоле́пныя и благосла́вныя Твоея́ му́ченицы, я́ко да воспою́ Софи́ина прозябе́ния.

Нарица́ние Твое́ я́ве жи́тельством, богому́драя, украси́ся: всю́ бо проводи́ла еси́ жи́знь твою́ прему́дрости жела́нием, сла́вная Софи́е, му́дрости осия́вшися благода́тию.

Тво́й всеблаже́нный пло́д, Пребоже́ственныя Тро́ицы коли́чеством украша́емь, страда́льчески за О́ную подвиза́ся, всему́драя Софи́е, Прему́дрости Боже́ственныя тезоимени́тая.

Те́ло и ду́шу доброде́тельми очи́стивше, де́вы отрокови́цы три́ Тебе́ приведо́шася, му́ченически, у́мному Жениху́ Христу́, Ве́ра с Наде́ждею, и Любо́вь сла́вная.

Богоро́дичен: Ве́сь зра́к мо́й прии́м, И́же во зра́це Бо́жии пре́жде зри́мь, всего́ обнови́, в Твое́м чре́ве боголе́пно всели́вся, Пречи́стая. Те́мже Богоро́дицу, ве́рнии Тя́ вси́ сла́вим.

Пе́снь 3.

Ирмо́с: Еди́не Ве́дый челове́ческаго существа́ не́мощь и ми́лостивно в не вообра́жся, препоя́ши мя́ с высоты́ си́лою, е́же вопи́ти Тебе́, Святы́й: одушевле́нный Хра́ме неизрече́нныя сла́вы Твоея́, Человеколю́бче.

Гла́са послу́шавше Христо́ва, зову́ща к безсме́ртней и безстра́стней жи́зни, после́доваша венцено́сицы де́вы и му́ченицы, е́же вопи́ти Тебе́, Святы́й: Хра́ме одушевле́нный пречи́стыя сла́вы Твоея́, Человеколю́бче.

Кре́пость дарова́ Христо́с, стоя́щим пред суди́щем му́ченически ва́м, я́ко обеща́ся, и богодохнове́нныя му́дрости испо́лни, и све́тлы показа́ победоно́сныя му́ченицы, де́вства сия́юща благода́тию.

Притупи́сте у́м вра́жий де́вы великохва́льный и того́ горды́ню низложи́сте, великому́дренно подви́гшеся, и пре́жде хва́лящагося истреби́ти мо́ре тече́ньми крове́й потопи́сте.

Му́дрости вы́шния Христо́вы бога́тно насы́тившеся, избра́нныя му́дрости и благоу́мныя, дще́ри три́ посрами́ша му́чащих свере́пства и неи́стовство неде́ржное, вити́йствующе Боже́ственная уче́ния.

Богоро́дичен: Святы́х Свята́го Христа́ свя́то породила́ еси́, Святы́ни свято́е селе́ние, во святы́х почива́ющаго, Ему́же вопие́м: свя́т хра́м одушевле́нный неизрече́нныя сла́вы Твоея́, Человеколю́бче.

Седа́лен, гла́с 1.

А́гницы слове́сныя А́гнца и Па́стыря, огню́ и лю́тым му́кам пре́дани бы́сте и яви́стеся А́нгелом равноче́стни. Те́м вси́ свяще́нную ва́шу па́мять пра́зднуем в весе́лии се́рдца, де́вы богому́дрыя.

Пе́снь 4.

Ирмо́с: Го́ру Тя́ Благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Укре́пльшеся Боже́ственною благода́тию, добропобе́дныя, Ве́ра, Любо́вь и Наде́жда мучи́телей преще́ния му́жественно посрами́ша, огне́м всесожега́емы, всему́дрыя, и Жениху́ Христу́ приводи́мы.

Возмого́ша, Креста́ всеору́жием огради́вшеся, Ве́ра, Любо́вь и Наде́жда муче́ний благомо́щно ра́ны стерпе́ти, святы́я, да́же до крове́й крепча́йше ко греху́ проти́вльшеся.

Свещи́ тричи́сленныя му́дрости сия́ющия, Ве́ра, Любо́вь и Наде́жда, Тро́ицы просвеще́ньми я́ве блиста́ющияся, пресве́тло Це́ркви просвеща́ют, ко спасе́нию на́шему и защище́нию.

Богоро́дичен: Святы́х Свята́я Богоро́дице Всепе́тая, ожида́ние язы́ков и спасе́ние ве́рных, из Тебе́ возсия́ Изба́витель и Жизнода́вец, и Госпо́дь во спасе́ние на́с, пою́щих Тя́.

Пе́снь 5.

Ирмо́с: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ богоразу́мия правосла́вно пою́щих Тя́.

Терпе́нием мудрова́ний му́ки подъе́мляху, и му́дрости су́щия в Бо́зе, глаго́люще та́йны, держа́щаго посрами́ша три́ де́вы богоно́сныя, ве́рою и естество́м связу́емы.

Ра́дуется прама́ти, ви́дящи побежда́ема льсти́ваго, из Еде́ма дре́вле изгна́вшаго сию́, жена́ми богому́дрыми, Наде́ждею, Ве́рою и Любо́вию, Софи́и рожде́ньми.

Ядови́таго мучи́телева ласка́ния избего́ша, и муче́ний я́звы во́льне претерпе́ша честны́я отрокови́цы, Твое́ю любо́вию уя́звльшеся, Христе́, и Боже́ственным Твои́м раче́нием.

Богоро́дичен: Веселя́тся Небе́сныя Си́лы ви́дяще Тя́, ра́дуются с ни́ми челове́ков состоя́ния: Рождество́м бо соедини́шася Твои́м, Де́во Богоро́дице, Его́же досто́йно сла́вим.

Пе́снь 6.

Ирмо́с: Обы́де на́с после́дняя бе́здна, не́сть избавля́яй, вмени́хомся я́ко о́вцы заколе́ния, спаси́ лю́ди Твоя́, Бо́же на́ш: Ты́ бо кре́пость немощству́ющих и исправле́ние.

Ра́дующеся, во Твои́, Влады́ко, пречи́стыя дла́ни возложи́ша наде́жды отрокови́цы три́, Тро́ицы коли́чеством и число́м почте́нныя и похваля́емыя.

Светя́щеся де́вства добро́тами, му́ченическими увязе́ньми украси́шася, и вене́ц сугу́б свы́ше досто́йне прия́ша от Христа́ Жизнода́вца и Всеще́драго.

Приведо́шася, Влады́ко, в хра́м Тво́й, все́х ца́рствующаго, де́вственная сокро́вища честна́, приобщи́тися Ца́рствию Твоему́: Ты́ бо те́х и све́т еси́, и весе́лие.

Богоро́дичен: Ра́дуются о Тебе́, Де́во Пречи́стая, ро́да на́шего пра́отцы, Еде́м восприе́мше Тобо́ю, его́же преступле́нием погуби́ша: Ты́ бо Чи́ста и пре́жде Рождества́, и по Рождестве́ еси́.

Конда́к, гла́с 1.

Софи́и честны́я свяще́ннейшия ве́тви Ве́ра и Наде́жда, и Любо́вь показа́вшеся, му́дрость обуи́ша е́ллинскую благода́тию, и пострада́вше, и победоно́сицы яви́вшеся, венце́м нетле́нным от все́х Влады́ки Христа́ увязо́шася.

Пе́снь 7.

Ирмо́с: Тебе́ у́мную, Богоро́дице, пе́щь разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́ во чре́ве Твое́м всеце́л, хва́льный отце́в Бо́г и препросла́влен.

Трисия́нною еди́нства благода́тию озаря́еми я́ве, де́вы де́монское разруши́ша тьмонеи́стовство, Све́т Триипоста́сный богосло́вяще и пою́ще: хва́льный отце́в Бо́г и препросла́влен.

На небесе́х черто́ги иму́ще, свещено́сныя ду́ши, со А́нгелы ве́село ны́не ликовству́ете, сла́ву присносу́щную зря́ще и глаго́люще: хва́льный отце́в Бо́г и препросла́влен.

Терпели́во, я́ко о́троцы, противле́ние показа́вше, о́гнь попра́ша му́жественно: те́х бо равночи́сленныя ра́зум равноста́тный богоно́сныя стяжа́ша, хва́льнаго отце́в при́сно Бо́га и препросла́вленнаго.

Богоро́дичен: Дае́ши, Чи́стая, оставле́ние прегреше́ний воспева́ющим Тя́ ве́рно, избавля́ющи напа́стей и вся́каго обстоя́ния: Тя́ бо ны́не стяжа́хом прибе́жище, Богоневе́стная, я́ко хва́льнаго отце́в Бо́га рука́ми носи́вшая.

Пе́снь 8.

Ирмо́с: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Де́вы богосве́тлыя, Ве́ра, Наде́жда, Любо́вь, добро́тою благоче́стия чисте́е зла́та блеща́хуся, глаго́люще: благослови́те вся́ дела́ Госпо́дня, Го́спода, по́йте и превозноси́те во вся́ ве́ки.

Сия́ющия и светови́дныя муче́нием проявле́нно бы́вшия де́вы, ве́рнии, воспои́м, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Враче́вств струю́ оби́льно, дово́льно и бога́тно ра́ки страстоте́рпиц источа́ют при́сно, ве́рою зову́щим: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Богоро́дичен: Земля́ свята́я была́ еси́, Чи́стая, жизноно́сный Кла́с ро́ждшая, присносу́щныя жи́зни Хода́тая, Христа́, Ему́же вси́ зове́м: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Пе́снь 9.

Ирмо́с: О́браз чи́стаго Рождества́ Твоего́ огнепали́мая купина́ показа́ неопа́льная, и ны́не на на́с напа́стей свире́пеющую угаси́ти мо́лимся пе́щь, да Тя́, Богоро́дице, непреста́нно велича́ем.

Све́том Трисия́нным исполня́еми и сия́ния Боже́ственнаго ны́не насыща́ющеся, купноиме́нныя доброде́телей и тождеиме́нныя любве́, наде́жди, и ве́ры, наде́ждею и любо́вию ны́ и ве́рою утверди́те.

Да вы́шняя Кре́пость ны́не укроти́т обдержа́щую бу́рю е́реси, о страстоте́рпицы непобеди́мыя, и пода́ст ве́рным единоу́мие, проси́те, мо́лим непреста́нно, доброде́вы.

Но́щь жития́ всему́дрыя, преше́дше, де́нь постиго́сте невече́рний, му́ченически веселя́щеся и де́вственно хва́лящеся благода́тию, и Боже́ственнаго Ца́рствия нетле́ннаго сподобля́емы.

Богоро́дичен: О, ка́ко Де́ва роди́ присносу́щее Сло́во и Ипоста́сное, Сия́ние О́тчия Ипоста́си, на́шего Благоде́теля и Го́спода, из Нея́ вопло́щшася, Его́же досто́йно велича́ем.