Следованная Псалтирь (церковнославянским шрифтом)

Ѱало́мъ дв҃дꙋ, не надпи́санъ ᲂу҆ є҆врє́й, а҃.

а҃. Бл҃же́нъ мꙋ́жъ, и҆́же не и҆́де на совѣ́тъ нечести́выхъ, и҆ на пꙋтѝ грѣ́шныхъ не ста̀, и҆ на сѣда́лищи гꙋби́телей не сѣ́де:

в҃. Но въ зако́нѣ гдⷭ҇ни во́лѧ є҆гѡ̀, и҆ въ зако́нѣ є҆гѡ̀ поꙋчи́тсѧ де́нь и҆ но́щь.

г҃. И҆ бꙋ́детъ ꙗ҆́кѡ дре́во насажде́ное при и҆схо́дищихъ во́дъ, є҆́же пло́дъ сво́й да́стъ во вре́мѧ своѐ, и҆ ли́стъ є҆гѡ̀ не ѿпаде́тъ: и҆ всѧ̑, є҆ли̑ка а҆́ще твори́тъ, ᲂу҆спѣ́етъ.

д҃. Не та́кѡ нечести́вїи, не та́кѡ: но ꙗ҆́кѡ пра́хъ, є҆го́же возмета́етъ вѣ́тръ ѿ лица̀ землѝ.

є҃. Сегѡ̀ ра́ди не воскре́снꙋтъ нечести́вїи на сꙋ́дъ, нижѐ грѣ̑шницы въ совѣ́тъ првⷣныхъ.

ѕ҃. Ꙗ҆́кѡ вѣ́сть гдⷭ҇ь пꙋ́ть првⷣныхъ, и҆ пꙋ́ть нечести́выхъ поги́бнетъ.

Ѱало́мъ дв҃дꙋ, в҃.

Вскꙋ́ю шата́шасѧ ꙗ҆зы́цы, и҆ лю́дїе поꙋчи́шасѧ тщє́тнымъ;

в҃. Предста́ша ца́рїе зе́мстїи, и҆ кнѧ̑зи собра́шасѧ вкꙋ́пѣ на гдⷭ҇а и҆ на хрⷭ҇та̀ є҆гѡ̀.

г҃. ꙾Расто́рггемъ꙾ ¹ ᲂу҆́зы и҆́хъ и҆ ꙾꙾ѿве́ржемъ꙾꙾ ² ѿ на́съ и҆́го и҆́хъ.

д҃. Живы́й на нб҃сѣ́хъ посмѣе́тсѧ и҆̀мъ, и҆ гдⷭ҇ь порꙋга́етсѧ и҆̀мъ.

є҃. Тогда̀ возглаго́летъ къ ни̑мъ гнѣ́вомъ свои́мъ и҆ ꙗ҆́ростїю свое́ю смѧте́тъ ѧ҆̀:

ѕ҃. А҆́зъ же поста́вленъ є҆́смь цр҃ь ѿ негѡ̀ над̾ сїѡ́номъ, горо́ю ст҃о́ю є҆гѡ̀,

з҃. Возвѣща́ѧй повелѣ́нїе гдⷭ҇не. Гдⷭ҇ь речѐ ко мнѣ̀: сн҃ъ мо́й є҆сѝ ты̀, а҆́зъ дне́сь роди́хъ тѧ̀:

и҃. Просѝ ѿ менѐ, и҆ да́мъ тѝ ꙗ҆зы́ки достоѧ́нїе твоѐ, и҆ ѡ҆держа́нїе твоѐ концы̀ землѝ:

ѳ҃. Оу҆пасе́ши ѧ҆̀ жезло́мъ желѣ́знымъ, ꙗ҆́кѡ сосꙋ́ды скꙋдє́льничи сокрꙋши́ши ѧ҆̀.

і҃. И҆ ны́нѣ, ца́рїе, разꙋмѣ́йте, накажи́тесѧ всѝ сꙋдѧ́щїи землѝ.

а҃і. Рабо́тайте гдⷭ҇еви со стра́хомъ, и҆ ра́дꙋйтесѧ є҆мꙋ̀ со тре́петомъ.

в҃і. Прїими́те наказа́нїе, да не когда̀ прогнѣ́ваетсѧ гдⷭ҇ь, и҆ поги́бнете ѿ пꙋтѝ првⷣнагѡ, є҆гда̀ возгори́тсѧ вско́рѣ ꙗ҆́рость є҆гѡ̀: бл҃же́ни всѝ надѣ́ющїисѧ на́нь.

а҃. Ѱало́мъ дв҃дꙋ, внегда̀ ѿбѣга́ше ѿ лица̀ а҆вессалѡ́ма сы́на своегѡ̀, г҃.

в҃. Гдⷭ҇и, что́ сѧ ᲂу҆мно́жиша стꙋжа́ющїи мѝ; мно́зи востаю́тъ на мѧ̀,

г҃. Мно́зи глаго́лютъ дꙋшѝ мое́й: нѣ́сть сп҃се́нїѧ є҆мꙋ̀ въ бз҃ѣ є҆гѡ̀.

д҃. Ты́ же, гдⷭ҇и, застꙋ́пникъ мо́й є҆сѝ, сла́ва моѧ̀, и҆ возносѧ́й главꙋ̀ мою̀.

є҃. Гла́сомъ мои́мъ ко гдⷭ҇ꙋ воззва́хъ, и҆ ᲂу҆слы́ша мѧ̀ ѿ горы̀ ст҃ы́ѧ своеѧ̀.

ѕ҃. А҆́зъ ᲂу҆снꙋ́хъ, и҆ спа́хъ, воста́хъ, ꙗ҆́кѡ гдⷭ҇ь застꙋ́питъ мѧ̀.

з҃. Не ᲂу҆бою́сѧ ѿ тє́мъ люде́й, ѡ҆́крестъ напа́дающихъ на мѧ̀.

и҃. Воскрⷭ҇нѝ, гдⷭ҇и, сп҃си́ мѧ, бж҃е мо́й: ꙗ҆́кѡ ты̀ порази́лъ є҆сѝ всѧ̑ враждꙋ́ющыѧ мѝ всꙋ́е, зꙋ́бы грѣ́шникѡвъ сокрꙋши́лъ є҆сѝ.

ѳ҃. Гдⷭ҇не є҆́сть сп҃се́нїе, и҆ на лю́дехъ твои́хъ бл҃гослове́нїе твоѐ.

Сла́ва:

а҃. Въ коне́цъ, въ пѣ́снехъ, ѱало́мъ дв҃дꙋ, д҃.

в҃. Внегда̀ призва́ти мѝ, ᲂу҆слы́ша мѧ̀ бг҃ъ пра́вды моеѧ̀: въ ско́рби распространи́лъ мѧ̀ є҆сѝ: ᲂу҆ще́дри мѧ̀ и҆ ᲂу҆слы́ши моли́твꙋ мою̀.

г҃. Сы́нове человѣ́честїи, доко́лѣ тѧжкосе́рдїи; вскꙋ́ю лю́бите сꙋетꙋ̀ и҆ и҆́щете лжѝ;

д҃. И҆ ᲂу҆вѣ́дите, ꙗ҆́кѡ ᲂу҆дивѝ гдⷭ҇ь прпⷣбнаго своего̀. Гдⷭ҇ь ᲂу҆слы́шитъ мѧ̀, внегда̀ воззва́ти мѝ къ немꙋ̀.

є҃. Гнѣ́вайтесѧ, и҆ не согрѣша́йте, ꙗ҆̀же глаго́лете въ сердца́хъ ва́шихъ, на ло́жахъ ва́шихъ ᲂу҆мили́тесѧ:

ѕ҃. Пожри́те же́ртвꙋ пра́вды и҆ ᲂу҆пова́йте на гдⷭ҇а.

з҃. Мно́зи глаго́лютъ: кто̀ ꙗ҆ви́тъ на́мъ бл҃га̑ѧ; зна́менасѧ на на́съ свѣ́тъ лица̀ твоегѡ̀, гдⷭ҇и.

и҃. Да́лъ є҆сѝ весе́лїе въ се́рдцы мое́мъ: ѿ плода̀ пшени́цы, вїна̀ и҆ є҆ле́а своегѡ̀ ᲂу҆мно́жишасѧ:

ѳ҃. Въ ми́рѣ вкꙋ́пѣ ᲂу҆снꙋ̀ и҆ почі́ю, ꙗ҆́кѡ ты̀, гдⷭ҇и, є҆ди́наго на ᲂу҆пова́нїи всели́лъ мѧ̀ є҆сѝ.

а҃. Ѡ҆ наслѣ́дствꙋющемъ, ѱало́мъ дв҃дꙋ, є҃.

в҃. Глаго́лы моѧ̑ внꙋшѝ, гдⷭ҇и, разꙋмѣ́й зва́нїе моѐ.

г҃. Вонмѝ гла́сꙋ моле́нїѧ моегѡ̀, цр҃ю̀ мо́й и҆ бж҃е мо́й: ꙗ҆́кѡ къ тебѣ̀ помолю́сѧ, гдⷭ҇и.

д҃. Заꙋ́тра ᲂу҆слы́ши гла́съ мо́й: заꙋ́тра предста́нꙋ тѝ, и҆ ᲂу҆́зриши мѧ̀:

є҃. Ꙗ҆́кѡ бг҃ъ не хотѧ́й беззако́нїѧ ты̀ є҆сѝ: не присели́тсѧ къ тебѣ̀ лꙋка́внꙋѧй,

ѕ҃. Нижѐ пребꙋ́дꙋтъ беззакѡ́нницы пред̾ ѻ҆чи́ма твои́ма: возненави́дѣлъ є҆сѝ всѧ̑ дѣ́лающыѧ беззако́нїе,

з҃. Погꙋби́ши всѧ̑ глаго́лющыѧ лжꙋ̀: мꙋ́жа крове́й и҆ льсти́ва гнꙋша́етсѧ гдⷭ҇ь.

и҃. А҆́зъ же мно́жествомъ млⷭ҇ти твоеѧ̀ вни́дꙋ въ до́мъ тво́й, поклоню́сѧ ко хра́мꙋ ст҃о́мꙋ твоемꙋ̀, въ стра́сѣ твое́мъ.

ѳ҃. Гдⷭ҇и, наста́ви мѧ̀ пра́вдою твое́ю, вра̑гъ мои́хъ ра́ди и҆спра́ви пред̾ тобо́ю пꙋ́ть мо́й.

і҃. Ꙗ҆́кѡ нѣ́сть во ᲂу҆стѣ́хъ и҆́хъ и҆́стины, се́рдце и҆́хъ сꙋ́етно, гро́бъ ѿве́рстъ горта́нь и҆́хъ, ѧ҆зы́ки свои́ми льща́хꙋ.

а҃і. Сꙋдѝ и҆̀мъ, бж҃е, да ѿпадꙋ́тъ ѿ мы́слей свои́хъ: по мно́жествꙋ нече́стїѧ и҆́хъ и҆зри́ни ѧ҆̀, ꙗ҆́кѡ преѡгорчи́ша тѧ̀, гдⷭ҇и.

в҃і. И҆ да возвеселѧ́тсѧ всѝ ᲂу҆пова́ющїи на тѧ̀, во вѣ́къ возра́дꙋютсѧ, и҆ всели́шисѧ въ ни́хъ: и҆ похва́лѧтсѧ ѡ҆ тебѣ̀ лю́бѧщїи и҆́мѧ твоѐ.

г҃і. Ꙗ҆́кѡ ты̀ бл҃гослови́ши првⷣника, гдⷭ҇и, ꙗ҆́кѡ ѻ҆рꙋ́жїемъ бл҃говоле́нїѧ вѣнча́лъ є҆сѝ на́съ.

а҃. Въ коне́цъ, въ пѣ́снехъ ѡ҆ ѻ҆смо́мъ, ѱало́мъ дв҃дꙋ, ѕ҃.

в҃. Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ.

г҃. Поми́лꙋй мѧ̀, гдⷭ҇и, ꙗ҆́кѡ не́мощенъ є҆́смь: и҆сцѣли́ мѧ, гдⷭ҇и, ꙗ҆́кѡ смѧто́шасѧ кѡ́сти моѧ̑,

д҃. И҆ дꙋша̀ моѧ̀ смѧте́сѧ ѕѣлѡ̀: и҆ ты̀, гдⷭ҇и, доко́лѣ;

є҃. Ѡ҆брати́сѧ, гдⷭ҇и, и҆зба́ви дꙋ́шꙋ мою̀, сп҃си́ мѧ ра́ди млⷭ҇ти твоеѧ̀:

ѕ҃. Ꙗ҆́кѡ нѣ́сть въ сме́рти помина́ѧй тебѐ, во а҆́дѣ же кто̀ и҆сповѣ́стсѧ тебѣ̀;

з҃. Оу҆трꙋди́хсѧ воздыха́нїемъ мои́мъ, и҆змы́ю на всѧ́кꙋ но́щь ло́же моѐ, слеза́ми мои́ми посте́лю мою̀ ѡ҆мочꙋ̀.

и҃. Смѧте́сѧ ѿ ꙗ҆́рости ѻ҆́ко моѐ, ѡ҆бетша́хъ во всѣ́хъ вразѣ́хъ мои́хъ.

ѳ҃. Ѿстꙋпи́те ѿ менѐ, всѝ дѣ́лающїи беззако́нїе, ꙗ҆́кѡ ᲂу҆слы́ша гдⷭ҇ь гла́съ пла́ча моегѡ̀,

і҃. Оу҆слы́ша гдⷭ҇ь моле́нїе моѐ, гдⷭ҇ь моли́твꙋ мою̀ прїѧ́тъ.

а҃і. Да постыдѧ́тсѧ и҆ смѧтꙋ́тсѧ всѝ вразѝ моѝ, да возвратѧ́тсѧ и҆ ᲂу҆стыдѧ́тсѧ ѕѣлѡ̀ вско́рѣ.

Сла́ва:

а҃. Ѱало́мъ дв҃дꙋ, є҆го́же воспѣ́тъ гдⷭ҇еви ѡ҆ словесѣ́хъ хꙋсі́евыхъ, сы́на і҆емені́ина, з҃.

в҃. Гдⷭ҇и бж҃е мо́й, на тѧ̀ ᲂу҆пова́хъ, сп҃си́ мѧ ѿ всѣ́хъ гонѧ́щихъ мѧ̀ и҆ и҆зба́ви мѧ̀:

г҃. Да не когда̀ похи́титъ ꙗ҆́кѡ ле́въ дꙋ́шꙋ мою̀, не сꙋ́щꙋ и҆збавлѧ́ющꙋ, нижѐ спаса́ющꙋ.

д҃. Гдⷭ҇и бж҃е мо́й, а҆́ще сотвори́хъ сїѐ, а҆́ще є҆́сть непра́вда въ рꙋкꙋ̀ моє́ю,

є҃. А҆́ще возда́хъ воздаю́щымъ мѝ ѕла̑, да ѿпадꙋ̀ ᲂу҆̀бо ѿ вра̑гъ мои́хъ то́щъ:

ѕ҃. Да пожене́тъ ᲂу҆́бѡ вра́гъ дꙋ́шꙋ мою̀, и҆ да пости́гнетъ, и҆ попере́тъ въ зе́млю живо́тъ мо́й, и҆ сла́вꙋ мою̀ въ пе́рсть всели́тъ.

з҃. Воскрⷭ҇нѝ, гдⷭ҇и, гнѣ́вомъ твои́мъ, вознеси́сѧ въ конца́хъ вра̑гъ твои́хъ, и҆ воста́ни, гдⷭ҇и бж҃е мо́й, повелѣ́нїемъ, и҆́мже заповѣ́далъ є҆сѝ,

и҃. И҆ со́нмъ люде́й ѡ҆бы́детъ тѧ̀: и҆ ѡ҆ то́мъ на высотꙋ̀ ѡ҆брати́сѧ.

ѳ҃. Гдⷭ҇ь сꙋ́дитъ лю́демъ: сꙋди́ ми, гдⷭ҇и, по пра́вдѣ мое́й и҆ по неѕло́бѣ мое́й на мѧ̀.

і҃. Да сконча́етсѧ ѕло́ба грѣ́шныхъ, и҆ и҆спра́виши првⷣнаго, и҆спыта́ѧй сердца̀ и҆ ᲂу҆трѡ́бы, бж҃е, првⷣнѡ.

а҃і. По́мощь моѧ̀ ѿ бг҃а, сп҃са́ющагѡ пра̑выѧ се́рдцемъ.

в҃і. Бг҃ъ сꙋди́тель првⷣнъ, и҆ крѣ́покъ, и҆ долготерпѣли́въ, и҆ не гнѣ́въ наводѧ́й на всѧ́къ де́нь.

г҃і. А҆́ще не ѡ҆братите́сѧ, ѻ҆рꙋ́жїе своѐ ѡ҆чи́ститъ, лꙋ́къ сво́й напрѧжѐ, и҆ ᲂу҆гото́ва и҆̀,

д҃і. И҆ въ не́мъ ᲂу҆гото́ва сосꙋ́ды смє́ртныѧ, стрѣ́лы своѧ̑ сгара́ємымъ содѣ́ла.

є҃і. Сѐ, болѣ̀ непра́вдою, зача́тъ болѣ́знь и҆ родѝ беззако́нїе:

ѕ҃і. Ро́въ и҆зры̀ и҆ и҆скопа̀ и҆̀, и҆ паде́тъ въ ꙗ҆́мꙋ, ю҆́же содѣ́ла.

з҃і. Ѡ҆брати́тсѧ болѣ́знь є҆гѡ̀ на главꙋ̀ є҆гѡ̀, и҆ на ве́рхъ є҆гѡ̀ непра́вда є҆гѡ̀ сни́детъ.

и҃і. И҆сповѣ́мсѧ гдⷭ҇еви по пра́вдѣ є҆гѡ̀ и҆ пою̀ и҆́мени гдⷭ҇а вы́шнѧгѡ.

а҃. Въ коне́цъ, ѡ҆ точи́лѣхъ, ѱало́мъ дв҃дꙋ, и҃.

в҃. Гдⷭ҇и гдⷭ҇ь на́шъ, ꙗ҆́кѡ чꙋ́дно и҆́мѧ твоѐ по все́й землѝ, ꙗ҆́кѡ взѧ́тсѧ великолѣ́пїе твоѐ превы́ше нб҃съ.

г҃. И҆з̾ ᲂу҆́стъ младе́нєцъ и҆ ссꙋ́щихъ соверши́лъ є҆сѝ хвалꙋ̀, вра̑гъ твои́хъ ра́ди, є҆́же разрꙋши́ти врага̀ и҆ ме́стника.

д҃. Ꙗ҆́кѡ ᲂу҆зрю̀ небеса̀, дѣла̀ пє́рстъ твои́хъ, лꙋнꙋ̀ и҆ ѕвѣ́зды, ꙗ҆̀же ты̀ ѡ҆снова́лъ є҆сѝ:

є҃. что̀ є҆́сть человѣ́къ, ꙗ҆́кѡ по́мниши є҆го̀; и҆лѝ сы́нъ человѣ́чь, ꙗ҆́кѡ посѣща́еши є҆го̀;

ѕ҃. Оу҆ма́лилъ є҆сѝ є҆го̀ ма́лымъ чи́мъ ѿ а҆́гг҃лъ, сла́вою и҆ че́стїю вѣнча́лъ є҆сѝ є҆го̀:

з҃. И҆ поста́вилъ є҆сѝ є҆го̀ над̾ дѣ́лы рꙋкꙋ̀ твоє́ю, всѧ̑ покори́лъ є҆сѝ под̾ но́зѣ є҆гѡ̀:

и҃. Ѻ҆́вцы и҆ волы̀ всѧ̑, є҆ще́ же и҆ скоты̀ пѡльскі́ѧ,

ѳ҃. Пти̑цы небє́сныѧ и҆ ры̑бы морскі̑ѧ, преходѧ́щыѧ стєзѝ морскі̑ѧ.

і҃. Гдⷭ҇и гдⷭ҇ь на́шъ, ꙗ҆́кѡ чꙋ́дно и҆́мѧ твоѐ по все́й землѝ.

Сла́ва:

Вѣ́домо же бꙋ́ди всѧ́комꙋ хотѧ́щемꙋ глаго́лати ѱалти́рь:

Да пое́тъ по ᲂу҆ста́вленномꙋ нача́лꙋ ѱалти́рномꙋ ꙗ҆́коже ᲂу҆ка́зано напредѝ, каѳі́смꙋ пе́рвꙋю, и҆ по каѳі́смѣ: Сла́ва, и҆ ны́нѣ: А҆ллилꙋ́їа, три́жды. Та́же Трист҃о́е. Прест҃а́ѧ трⷪ҇це: Ѻ҆́ч҃е на́шъ:

И҆ тропарѝ сїѧ̑, гла́съ а҃:

Въ беззако́нїихъ зача́всѧ а҆́зъ блꙋ́дный, не дерза́ю взира́ти на высотꙋ̀ нбⷭ҇нꙋю, но дерза́ѧ на чл҃вѣколю́бїе твоѐ, зовꙋ̀: бж҃е, ѡ҆чи́сти мѧ̀ грѣ́шнаго, и҆ сп҃си́ мѧ.

А҆́ще првⷣникъ є҆два̀ сп҃са́етсѧ, а҆́зъ гдѣ̀ ꙗ҆влю́сѧ грѣ́шный; тѧготы̀ и҆ зно́ѧ дневна́гѡ не понесо́хъ, но съ нае́мники є҆динонадесѧ́тагѡ часа̀ сопричти́ мѧ бж҃е, и҆ сп҃си́ мѧ.

Сла́ва: Ѡ҆б̾ѧ̑тїѧ ѻ҆́ч҃а ѿве́рсти мѝ потщи́сѧ, блꙋ́днѡ моѐ и҆жди́хъ житїѐ, на бога́тство неиждива́емое взира́ѧй щедро́тъ твои́хъ сп҃се: ны́нѣ ѡ҆бнища́вшее моѐ да не пре́зриши се́рдце, тебѣ́ бо гдⷭ҇и, ᲂу҆миле́нїемъ зовꙋ̀: согрѣши́хъ на нб҃о и҆ пред̾ тобо́ю.

И҆ ны́нѣ: Оу҆пова́нїе хрⷭ҇тїа́нъ прест҃а́ѧ дв҃о, є҆го́же родила̀ є҆сѝ бг҃а па́че ᲂу҆ма́ же и҆ сло́ва, непреста́ннѡ молѝ съ го́рними си́лами, да́ти ѡ҆ставле́нїе грѣхѡ́въ на́мъ всѣ̑мъ, и҆ и҆справле́нїе житїѧ̀, вѣ́рою и҆ любо́вїю при́снѡ тѧ̀ чтꙋ́щымъ.

Гдⷭ҇и поми́лꙋй, м҃. и҆ мл҃тва:

Влⷣко вседержи́телю, непостижи́ме, нача́ло свѣ́та, и҆ преꙋ́мнаѧ си́ло, и҆́же ѵ҆поста́снагѡ сло́ва ѻ҆ц҃ъ, и҆ є҆диноси́льнагѡ твоегѡ̀ дх҃а и҆спꙋсти́тель: млⷭ҇рдныѧ ра́ди млⷭ҇ти, и҆ неизрече́нныѧ бл҃гости, не презрѣ́вый человѣ́ческагѡ є҆стества̀, тьмо́ю грѣха̀ содержи́магѡ, но бж҃е́ственными свѣ́ты сщ҃е́нныхъ твои́хъ ᲂу҆че́нїй, зако́номъ и҆ прⷪ҇ро́ки свѣти́вый мі́рꙋ, послѣди́ же на́мъ того̀ є҆диноро́днаго твоего̀ сн҃а бл҃говоли́вый пло́тїю возсїѧ́ти, и҆ ко ѡ҆сїѧ́нїю на́съ твоегѡ̀ просвѣще́нїѧ наста́вити: да бꙋ́дꙋтъ ᲂу҆́ши твоѝ вне́млющѣ гла́сꙋ моле́нїѧ на́шегѡ, и҆ да́рꙋй на́мъ бж҃е, во бдѣ́нномъ и҆ тре́звенномъ се́рдцѣ всю̀ настоѧ́щагѡ житїѧ̀ но́щь прейтѝ, ѡ҆жида́ющымъ прише́ствїѧ сн҃а твоегѡ̀, и҆ бг҃а на́шегѡ, сꙋдїѝ всѣ́хъ, да не возлежа́ще и҆ спѧ́ще, но бо́дрствꙋюще и҆ воздви́жени въ дѣ́ланїе за́повѣдей твои́хъ ѡ҆брѧ́щемсѧ, и҆ въ ра́дость є҆гѡ̀ совни́демъ, и҆дѣ́же пра́зднꙋющихъ гла́съ непреста́нный, и҆ неизрече́ннаѧ сла́дость зрѧ́щихъ твоегѡ̀ лица̀ добро́тꙋ неизглаго́ланнꙋю.

Ꙗ҆́кѡ бл҃гъ и҆ чл҃вѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

а҃. Въ коне́цъ, ѡ҆ та́йныхъ сы́на, ѱало́мъ дв҃дꙋ, ѳ҃.

в҃. И҆сповѣ́мсѧ тебѣ̀, гдⷭ҇и, всѣ́мъ се́рдцемъ мои́мъ, повѣ́мъ всѧ̑ чꙋдеса̀ твоѧ̑.

г҃. Возвеселю́сѧ и҆ возра́дꙋюсѧ ѡ҆ тебѣ̀, пою̀ и҆́мени твоемꙋ̀, вы́шнїй.

д҃. Внегда̀ возврати́тисѧ врагꙋ̀ моемꙋ̀ вспѧ́ть, и҆знемо́гꙋтъ и҆ поги́бнꙋтъ ѿ лица̀ твоегѡ̀.

є҃. Ꙗ҆́кѡ сотвори́лъ є҆сѝ сꙋ́дъ мо́й и҆ прю̀ мою̀: сѣ́лъ є҆сѝ на прⷭ҇то́лѣ, сꙋдѧ́й пра́вдꙋ.

ѕ҃. Запрети́лъ є҆сѝ ꙗ҆зы́кѡмъ, и҆ поги́бе нечести́вый: и҆́мѧ є҆гѡ̀ потреби́лъ є҆сѝ въ вѣ́къ и҆ въ вѣ́къ вѣ́ка.

з҃. Врагꙋ̀ ѡ҆скꙋдѣ́ша ѻ҆рꙋ̑жїѧ въ коне́цъ, и҆ гра́ды разрꙋши́лъ є҆сѝ: поги́бе па́мѧть є҆гѡ̀ съ шꙋ́момъ.

и҃. И҆ гдⷭ҇ь во вѣ́къ пребыва́етъ, ᲂу҆гото́ва на сꙋ́дъ прⷭ҇то́лъ сво́й:

ѳ҃. И҆ то́й сꙋди́ти и҆́мать вселе́ннѣй въ пра́вдꙋ, сꙋди́ти и҆́мать лю́демъ въ правотѣ̀.

і҃. И҆ бы́сть гдⷭ҇ь прибѣ́жище ᲂу҆бо́гомꙋ, помо́щникъ во бл҃говре́менїихъ, въ ско́рбехъ.

а҃і. И҆ да ᲂу҆пова́ютъ на тѧ̀ зна́ющїи и҆́мѧ твоѐ, ꙗ҆́кѡ не ѡ҆ста́вилъ є҆сѝ взыска́ющихъ тѧ̀, гдⷭ҇и.

в҃і. По́йте гдⷭ҇еви, живꙋ́щемꙋ въ сїѡ́нѣ, возвѣсти́те во ꙗ҆зы́цѣхъ начина̑нїѧ є҆гѡ̀:

г҃і. Ꙗ҆́кѡ взыска́ѧй крѡ́ви и҆́хъ помѧнꙋ̀, не забы̀ зва́нїѧ ᲂу҆бо́гихъ.

д҃і. Поми́лꙋй мѧ̀, гдⷭ҇и, ви́ждь смире́нїе моѐ ѿ вра̑гъ мои́хъ, возносѧ́й мѧ̀ ѿ вра́тъ сме́ртныхъ:

є҃і. Ꙗ҆́кѡ да возвѣщꙋ̀ всѧ̑ хвалы̑ твоѧ̑ во вратѣ́хъ дще́ре сїѡ́ни: возра́дꙋемсѧ ѡ҆ сп҃се́нїи твое́мъ.

ѕ҃і. Оу҆глѣбо́ша ꙗ҆зы́цы въ па́гꙋбѣ, ю҆́же сотвори́ша: въ сѣ́ти се́й, ю҆́же скры́ша, ᲂу҆вѧзѐ нога̀ и҆́хъ.

з҃і. Зна́емь є҆́сть гдⷭ҇ь сꙋдьбы̑ творѧ́й: въ дѣ́лѣхъ рꙋкꙋ̀ своє́ю ᲂу҆вѧзѐ грѣ́шникъ.

и҃і. Да возвратѧ́тсѧ грѣ̑шницы во а҆́дъ, всѝ ꙗ҆зы́цы забыва́ющїи бг҃а.

ѳ҃і. Ꙗ҆́кѡ не до конца̀ забве́нъ бꙋ́детъ ни́щїй, терпѣ́нїе ᲂу҆бо́гихъ не поги́бнетъ до конца̀.

к҃. Воскрⷭ҇нѝ, гдⷭ҇и, да не крѣпи́тсѧ человѣ́къ, да сꙋ́дѧтсѧ ꙗ҆зы́цы пред̾ тобо́ю.

к҃а. Поста́ви, гдⷭ҇и, законоположи́телѧ над̾ ни́ми, да разꙋмѣ́ютъ ꙗ҆зы́цы, ꙗ҆́кѡ человѣ́цы сꙋ́ть.

к҃в. Вскꙋ́ю, гдⷭ҇и, ѿстоѧ̀ дале́че, презира́еши во бл҃говре́менїихъ, въ ско́рбехъ;

к҃г. Внегда̀ горди́тисѧ нечести́вомꙋ, возгара́етсѧ ни́щїй: ᲂу҆вѧза́ютъ въ совѣ́тѣхъ, ꙗ҆̀же помышлѧ́ютъ.

к҃д. Ꙗ҆́кѡ хвали́мь є҆́сть грѣ́шный въ по́хотехъ дꙋшѝ своеѧ̀, и҆ ѡ҆би́дѧй бл҃гослови́мь є҆́сть.

к҃є. Раздражѝ гдⷭ҇а грѣ́шный: по мно́жествꙋ гнѣ́ва своегѡ̀ не взы́щетъ: нѣ́сть бг҃а пред̾ ни́мъ.

к҃ѕ. Ѡ҆сквернѧ́ютсѧ пꙋтїѐ є҆гѡ̀ на всѧ́ко вре́мѧ: ѿе́млютсѧ сꙋдьбы̑ твоѧ̑ ѿ лица̀ є҆гѡ̀: всѣ́ми врагѝ свои́ми ѡ҆блада́етъ.

к҃з. Рече́ бо въ се́рдцы свое́мъ: не подви́жꙋсѧ ѿ ро́да въ ро́дъ без̾ ѕла̀:

к҃и. Є҆гѡ́же клѧ́твы ᲂу҆ста̀ є҆гѡ̀ пѡ́лна сꙋ́ть, и҆ го́рести и҆ льстѝ: под̾ ѧ҆зы́комъ є҆гѡ̀ трꙋ́дъ и҆ болѣ́знь.

к҃ѳ. Присѣди́тъ въ лови́тельствѣ съ бога́тыми въ та́йныхъ, є҆́же ᲂу҆би́ти непови́ннаго: ѻ҆́чи є҆гѡ̀ на ни́щаго призира́етѣ.

л҃. Лови́тъ въ та́йнѣ ꙗ҆́кѡ ле́въ во ѡ҆гра́дѣ свое́й, лови́тъ є҆́же восхи́тити ни́щаго, восхи́тити ни́щаго, внегда̀ привлещѝ и҆̀ въ сѣ́ти свое́й.

л҃а. Смири́тъ є҆го̀: преклони́тсѧ и҆ паде́тъ, внегда̀ є҆мꙋ̀ ѡ҆блада́ти ᲂу҆бо́гими.

л҃в. Рече́ бо въ се́рдцы свое́мъ: забы̀ бг҃ъ, ѿвратѝ лицѐ своѐ, да не ви́дитъ до конца̀.

л҃г. Воскрⷭ҇нѝ, гдⷭ҇и бж҃е мо́й, да вознесе́тсѧ рꙋка̀ твоѧ̀, не забꙋ́ди ᲂу҆бо́гихъ твои́хъ до конца̀.

л҃д. Чесѡ̀ ра́ди прогнѣ́ва нечести́вый бг҃а; рече́ бо въ се́рдцы свое́мъ: не взы́щетъ.

л҃є. Ви́диши, ꙗ҆́кѡ ты̀ болѣ́знь и҆ ꙗ҆́рость смотрѧ́еши, да пре́данъ бꙋ́детъ въ рꙋ́цѣ твоѝ: тебѣ̀ ѡ҆ста́вленъ є҆́сть ни́щїй, си́рꙋ ты̀ бꙋ́ди помо́щникъ.

л҃ѕ. Сокрꙋшѝ мы́шцꙋ грѣ́шномꙋ и҆ лꙋка́вомꙋ: взы́щетсѧ грѣ́хъ є҆гѡ̀ и҆ не ѡ҆брѧ́щетсѧ.

л҃з. Гдⷭ҇ь цр҃ь во вѣ́къ и҆ въ вѣ́къ вѣ́ка: поги́бнете, ꙗ҆зы́цы, ѿ землѝ є҆гѡ̀.

л҃и. Жела́нїе ᲂу҆бо́гихъ ᲂу҆слы́шалъ є҆сѝ, гдⷭ҇и, ᲂу҆гото́ванїю се́рдца и҆́хъ внѧ́тъ ᲂу҆́хо твоѐ.

л҃ѳ. Сꙋдѝ си́рꙋ и҆ смире́нꙋ, да не приложи́тъ ктомꙋ̀ велича́тисѧ человѣ́къ на землѝ.

Въ коне́цъ, ѱало́мъ дв҃дꙋ, і҃.

а҃. На гдⷭ҇а ᲂу҆пова́хъ, ка́кѡ рече́те дꙋшѝ мое́й: превита́й по гора́мъ, ꙗ҆́кѡ пти́ца;

в҃. Ꙗ҆́кѡ сѐ, грѣ̑шницы налѧко́ша лꙋ́къ, ᲂу҆гото́ваша стрѣ́лы въ тꙋ́лѣ, сострѣлѧ́ти во мра́цѣ пра̑выѧ се́рдцемъ.

г҃. Занѐ ꙗ҆̀же ты̀ соверши́лъ є҆сѝ, ѻ҆нѝ разрꙋши́ша: првⷣникъ же что̀ сотворѝ;

д҃. Гдⷭ҇ь во хра́мѣ ст҃ѣ́мъ свое́мъ. Гдⷭ҇ь, на нб҃сѝ прⷭ҇то́лъ є҆гѡ̀: ѻ҆́чи є҆гѡ̀ на ни́щаго призира́етѣ, вѣ́жди є҆гѡ̀ и҆спыта́етѣ сы́ны человѣ́чєскїѧ.

є҃. Гдⷭ҇ь и҆спыта́етъ првⷣнаго и҆ нечести́ваго: любѧ́й же непра́вдꙋ ненави́дитъ свою̀ дꙋ́шꙋ.

ѕ҃. Ѡ҆дожди́тъ на грѣ́шники сѣ̑ти: ѻ҆́гнь и҆ жꙋ́пелъ, и҆ дꙋ́хъ бꙋ́ренъ ча́сть ча́ши и҆́хъ.

з҃. Ꙗ҆́кѡ првⷣнъ гдⷭ҇ь и҆ пра̑вды возлюбѝ: правѡты̀ ви́дѣ лицѐ є҆гѡ̀.

Сла́ва:

а҃. Въ коне́цъ, ѡ҆ ѻ҆смѣ́й, ѱало́мъ дв҃дꙋ, а҃і.

в҃. Сп҃си́ мѧ, гдⷭ҇и, ꙗ҆́кѡ ѡ҆скꙋдѣ̀ прпⷣбный: ꙗ҆́кѡ ᲂу҆ма́лишасѧ и҆́стины ѿ сынѡ́въ человѣ́ческихъ.

г҃. Сꙋ́єтнаѧ глаго́ла кі́йждо ко и҆́скреннемꙋ своемꙋ̀: ᲂу҆стнѣ̀ льсти̑выѧ въ се́рдцы, и҆ въ се́рдцы глаго́лаша ѕла̑ѧ.

д҃. Потреби́тъ гдⷭ҇ь всѧ̑ ᲂу҆стны̀ льсти̑выѧ, ѧ҆зы́къ велерѣ́чивый,

є҃. Ре́кшыѧ: ѧ҆зы́къ на́шъ возвели́чимъ, ᲂу҆стны̀ на̑ша при на́съ сꙋ́ть: кто̀ на́мъ гдⷭ҇ь є҆́сть;

ѕ҃. Стра́сти ра́ди ни́щихъ и҆ воздыха́нїѧ ᲂу҆бо́гихъ ны́нѣ воскрⷭ҇нꙋ̀, гл҃етъ гдⷭ҇ь: положꙋ́сѧ во сп҃се́нїе, не ѡ҆биню́сѧ ѡ҆ не́мъ.

з҃. Словеса̀ гдⷭ҇нѧ словеса̀ чи̑ста, сребро̀ разжже́но, и҆скꙋше́но землѝ, ѡ҆чище́но седмери́цею.

и҃. Ты̀, гдⷭ҇и, сохрани́ши ны̀ и҆ соблюде́ши ны̀ ѿ ро́да сегѡ̀ и҆ во вѣ́къ.

ѳ҃. Ѡ҆́крестъ нечести́вїи хо́дѧтъ: по высотѣ̀ твое́й ᲂу҆мно́жилъ є҆сѝ сы́ны человѣ́чєскїѧ.

а҃. Въ коне́цъ, ѱало́мъ дв҃дꙋ, в҃і.

в҃. Доко́лѣ, гдⷭ҇и, забꙋ́деши мѧ̀ до конца̀; доко́лѣ ѿвраща́еши лицѐ твоѐ ѿ менѐ;

г҃. Доко́лѣ положꙋ̀ совѣ́ты въ дꙋшѝ мое́й, бѡлѣ́зни въ се́рдцы мое́мъ де́нь и҆ но́щь; доко́лѣ вознесе́тсѧ вра́гъ мо́й на мѧ̀;

д҃. При́зри, ᲂу҆слы́ши мѧ̀, гдⷭ҇и бж҃е мо́й: просвѣтѝ ѻ҆́чи моѝ, да не когда̀ ᲂу҆снꙋ̀ въ сме́рть:

є҃. Да не когда̀ рече́тъ вра́гъ мо́й: ᲂу҆крѣпи́хсѧ на него̀.

ѕ҃. Стꙋжа́ющїи мѝ возра́дꙋютсѧ, а҆́ще подви́жꙋсѧ.

з҃. А҆́зъ же на млⷭ҇ть твою̀ ᲂу҆пова́хъ: возра́дꙋетсѧ се́рдце моѐ ѡ҆ сп҃се́нїи твое́мъ: воспою̀ гдⷭ҇еви бл҃годѣ́ѧвшемꙋ мнѣ̀ и҆ пою̀ и҆́мени гдⷭ҇а вы́шнѧгѡ.

Въ коне́цъ, ѱало́мъ дв҃дꙋ, г҃і.

а҃. Речѐ безꙋ́менъ въ се́рдцы свое́мъ: нѣ́сть бг҃ъ. Растлѣ́ша и҆ ѡ҆мерзи́шасѧ въ начина́нїихъ: нѣ́сть творѧ́й бл҃госты́ню.

в҃. Гдⷭ҇ь съ нб҃сѐ прини́че на сы́ны человѣ́чєскїѧ, ви́дѣти, а҆́ще є҆́сть разꙋмѣва́ѧй, и҆лѝ взыска́ѧй бг҃а.

г҃. Всѝ ᲂу҆клони́шасѧ, вкꙋ́пѣ неключи́ми бы́ша: нѣ́сть творѧ́й бл҃госты́ню, нѣ́сть до є҆ди́нагѡ.

д҃. Ни лѝ ᲂу҆разꙋмѣ́ютъ всѝ дѣ́лающїи беззако́нїе, снѣда́ющїи лю́ди моѧ̑ въ снѣ́дь хлѣ́ба; гдⷭ҇а не призва́ша.

є҃. Та́мѡ ᲂу҆боѧ́шасѧ стра́ха, и҆дѣ́же не бѣ̀ стра́хъ: ꙗ҆́кѡ гдⷭ҇ь въ ро́дѣ првⷣныхъ.

ѕ҃. Совѣ́тъ ни́щагѡ посрами́сте: гдⷭ҇ь же ᲂу҆пова́нїе є҆гѡ̀ є҆́сть.

з҃. Кто̀ да́стъ ѿ сїѡ́на сп҃се́нїе і҆и҃лево;

и҃. Внегда̀ возврати́тъ гдⷭ҇ь плѣне́нїе люде́й свои́хъ, возра́дꙋетсѧ і҆а́кѡвъ, и҆ возвесели́тсѧ і҆и҃ль.

Сла́ва:

Въ коне́цъ, ѱало́мъ дв҃дꙋ, д҃і.

а҃. Гдⷭ҇и, кто̀ ѡ҆бита́етъ въ жили́щи твое́мъ; и҆лѝ кто̀ всели́тсѧ во ст҃ꙋ́ю го́рꙋ твою̀;

в҃. Ходѧ́й непоро́ченъ и҆ дѣ́лаѧй пра́вдꙋ, глаго́лѧй и҆́стинꙋ въ се́рдцы свое́мъ:

г҃. И҆́же не ᲂу҆льстѝ ѧ҆зы́комъ свои́мъ и҆ не сотворѝ и҆́скреннемꙋ своемꙋ̀ ѕла̀, и҆ поноше́нїѧ не прїѧ́тъ на бли̑жнїѧ своѧ̑:

д҃. Оу҆ничиже́нъ є҆́сть пред̾ ни́мъ лꙋка́внꙋѧй, боѧ́щыѧжесѧ гдⷭ҇а сла́витъ: клены́йсѧ и҆́скреннемꙋ своемꙋ̀ и҆ не ѿмета́ѧсѧ:

є҃. Сребра̀ своегѡ̀ не дадѐ въ ли́хвꙋ и҆ мзды̀ на непови́нныхъ не прїѧ́тъ. Творѧ́й сїѧ̑ не подви́житсѧ во вѣ́къ.

Столпописа́нїе, дв҃дꙋ, є҃і.

а҃. Сохрани́ мѧ, гдⷭ҇и, ꙗ҆́кѡ на тѧ̀ ᲂу҆пова́хъ.

в҃. Рѣ́хъ гдⷭ҇еви: гдⷭ҇ь мо́й є҆сѝ ты̀, ꙗ҆́кѡ благи́хъ мои́хъ не тре́бꙋеши.

г҃. Ст҃ы̑мъ, и҆̀же сꙋ́ть на землѝ є҆гѡ̀, ᲂу҆дивѝ гдⷭ҇ь всѧ̑ хотѣ̑нїѧ своѧ̑ въ ни́хъ.

д҃. Оу҆мно́жишасѧ не́мѡщи и҆́хъ, по си́хъ ᲂу҆скори́ша: не соберꙋ̀ собо́ры и҆́хъ ѿ крове́й, ни помѧнꙋ́ же и҆ме́нъ и҆́хъ ᲂу҆стна́ма мои́ма.

є҃. Гдⷭ҇ь ча́сть достоѧ́нїѧ моегѡ̀ и҆ ча́ши моеѧ̀: ты̀ є҆сѝ ᲂу҆строѧ́ѧй достоѧ́нїе моѐ мнѣ̀.

ѕ҃. Оу҆́жѧ нападо́ша мѝ въ держа́вныхъ мои́хъ: и҆́бо достоѧ́нїе моѐ держа́вно є҆́сть мнѣ̀.

з҃. Бл҃гословлю̀ гдⷭ҇а вразꙋми́вшаго мѧ̀: є҆ще́ же и҆ до но́щи наказа́ша мѧ̀ ᲂу҆трѡ́бы моѧ̑.

и҃. Предзрѣ́хъ гдⷭ҇а предо мно́ю вы́нꙋ, ꙗ҆́кѡ ѡ҆деснꙋ́ю менѐ є҆́сть, да не подви́жꙋсѧ.

ѳ҃. Сегѡ̀ ра́ди возвесели́сѧ се́рдце моѐ, и҆ возра́довасѧ ѧ҆зы́къ мо́й: є҆ще́ же и҆ пло́ть моѧ̀ всели́тсѧ на ᲂу҆пова́нїи.

і҃. Ꙗ҆́кѡ не ѡ҆ста́виши дꙋ́шꙋ мою̀ во а҆́дѣ, нижѐ да́си прпⷣбномꙋ твоемꙋ̀ ви́дѣти и҆стлѣ́нїѧ.

а҃і. Сказа́лъ мѝ є҆сѝ пꙋти̑ живота̀: и҆спо́лниши мѧ̀ весе́лїѧ съ лице́мъ твои́мъ: ꙾красота̀꙾ ³ въ десни́цѣ твое́й въ коне́цъ.

Моли́тва дв҃дꙋ, ѕ҃і.

а҃. Оу҆слы́ши, гдⷭ҇и, пра́вдꙋ мою̀, вонмѝ моле́нїю моемꙋ̀, внꙋшѝ моли́твꙋ мою̀ не во ᲂу҆стна́хъ льсти́выхъ.

в҃. Ѿ лица̀ твоегѡ̀ сꙋдьба̀ моѧ̀ и҆зы́детъ: ѻ҆́чи моѝ да ви́дита правоты̑.

г҃. И҆скꙋси́лъ є҆сѝ се́рдце моѐ, посѣти́лъ є҆сѝ но́щїю: и҆скꙋси́лъ мѧ̀ є҆сѝ, и҆ не ѡ҆брѣ́тесѧ во мнѣ̀ непра́вда.

д҃. Ꙗ҆́кѡ да не возглаго́лютъ ᲂу҆ста̀ моѧ̑ дѣ́лъ человѣ́ческихъ, за словеса̀ ᲂу҆сте́нъ твои́хъ а҆́зъ сохрани́хъ пꙋти̑ же́стѡки.

є҃. Совершѝ стѡпы̀ моѧ̑ во стезѧ́хъ твои́хъ, да не подви́жꙋтсѧ стѡпы̀ моѧ̑.

ѕ҃. А҆́зъ воззва́хъ, ꙗ҆́кѡ ᲂу҆слы́шалъ мѧ̀ є҆сѝ, бж҃е: приклонѝ ᲂу҆́хо твоѐ мнѣ̀ и҆ ᲂу҆слы́ши глаго́лы моѧ̑.

з҃. Оу҆дивѝ млⷭ҇ти твоѧ̑, сп҃са́ѧй ᲂу҆пова́ющыѧ на тѧ̀ ѿ проти́вѧщихсѧ десни́цѣ твое́й:

и҃. Сохрани́ мѧ, гдⷭ҇и, ꙗ҆́кѡ зѣ́ницꙋ ѻ҆́ка: въ кро́вѣ крилꙋ̑ твоє́ю покры́еши мѧ̀

ѳ҃. Ѿ лица̀ нечести́выхъ ꙾ѡ҆стра́стшихъ꙾ ⁴ мѧ̀: вразѝ моѝ дꙋ́шꙋ мою̀ ѡ҆держа́ша

і҃. Тꙋ́къ сво́й затвори́ша, ᲂу҆ста̀ и҆́хъ глаго́лаша горды́ню.

а҃і. И҆згонѧ́щїи мѧ̀ ны́нѣ ѡ҆быдо́ша мѧ̀, ѻ҆́чи своѝ возложи́ша ᲂу҆клони́ти на зе́млю.

в҃і. Ѡ҆б̾ѧ́ша мѧ̀ ꙗ҆́кѡ ле́въ гото́въ на ло́въ и҆ ꙗ҆́кѡ скѵ́менъ ѡ҆бита́ѧй въ та́йныхъ.

г҃і. Воскрⷭ҇нѝ, гдⷭ҇и, предварѝ ѧ҆̀ и҆ запнѝ и҆̀мъ: и҆зба́ви дꙋ́шꙋ мою̀ ѿ нечести́вагѡ, ѻ҆рꙋ́жїе твоѐ

д҃і. Ѿ вра̑гъ рꙋкѝ твоеѧ̀, гдⷭ҇и, ѿ ма́лыхъ ѿ землѝ: раздѣлѝ ѧ҆̀ въ животѣ̀ и҆́хъ, и҆ сокрове́нныхъ твои́хъ и҆спо́лнисѧ чре́во и҆́хъ: насы́тишасѧ сынѡ́въ, и҆ ѡ҆ста́виша ѡ҆ста́нки младе́нцємъ свои̑мъ.

є҃і. А҆́зъ же пра́вдою ꙗ҆влю́сѧ лицꙋ̀ твоемꙋ̀, насы́щꙋсѧ, внегда̀ ꙗ҆ви́тимисѧ сла́вѣ твое́й.

Сла́ва:

По в҃-й каѳі́смѣ, трист҃о́е.

Та́же тропарѝ, гла́съ в҃:

А҆́зъ сы́й дре́во непло́дное гдⷭ҇и, ᲂу҆миле́нїѧ плода̀ не ношꙋ̀ ѿню́дъ, и҆ посѣче́нїѧ страшꙋ́сѧ и҆ ѻ҆гнѧ̀ ѻ҆́нагѡ бою́сѧ негаси́магѡ. тѣ́мже тѧ̀ молю̀: пре́жде ѻ҆́ныѧ нꙋ́жды, ѡ҆братѝ и҆ сп҃си́ мѧ.

Ꙗ҆́кѡ во́лны морскі̑ѧ на мѧ̀ возста́ша беззакѡ́нїѧ моѧ̑, ꙗ҆́кѡ корабле́цъ въ пꙋчи́нѣ а҆́зъ є҆ди́нъ ѡ҆бꙋрева́юсѧ ѿ прегрѣше́нїй мно́гихъ: но въ ти́хое приста́нище наста́ви мѧ̀ гдⷭ҇и, покаѧ́нїемъ, и҆ сп҃си́ мѧ.

Сла́ва: Поми́лꙋй мѧ̀, речѐ дв҃дъ, и҆ а҆́зъ тебѣ̀ зовꙋ̀: согрѣши́хъ сп҃се, грѣхѝ моѧ̑ ѡ҆чи́стивъ покаѧ́нїемъ, поми́лꙋй мѧ̀.

И҆ ны́нѣ: Предста́тельство те́плое хрⷭ҇тїа́нъ, сн҃а твоего̀ молѝ бцⷣе, всѧ́кагѡ ѕлодѣ́йства и҆ лю́тости и҆зба́вити на́съ ра́тника, и҆ да́ти проще́нїе на́мъ, ѡ҆ ни́хже согрѣши́хомъ, млⷭ҇рдїѧ ра́ди щедро́тъ, твои́ми мл҃твами, мт҃и дв҃о.

Гдⷭ҇и поми́лꙋй, м҃. и҆ мл҃тва:

Влⷣко вседержи́телю, ѻ҆́ч҃е гдⷭ҇а на́шегѡ і҆и҃са хрⷭ҇та̀, є҆диноро́днагѡ твоегѡ̀ сн҃а, да́ждь мѝ тѣ́ло нескве́рное, се́рдце чи́стое, ᲂу҆́мъ бо́дръ, ра́зꙋмъ незаблꙋ́дный, дх҃а ст҃а́гѡ наше́ствїе, къ стѧжа́нїю и҆ дово́льствꙋ и҆́стины во хрⷭ҇тѣ̀ твое́мъ: съ ни́мже тебѣ̀ сла́ва подоба́етъ, че́сть и҆ поклоне́нїе, со ст҃ы́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

а҃. Въ коне́цъ, ѻ҆́трокꙋ гдⷭ҇ню дв҃дꙋ, ꙗ҆̀же глаго́ла гдⷭ҇еви словеса̀ пѣ́сни сеѧ̀, въ де́нь, во́ньже и҆зба́ви є҆го̀ гдⷭ҇ь ѿ рꙋкѝ всѣ́хъ вра̑гъ є҆гѡ̀ и҆ и҆з̾ рꙋкѝ саꙋ́ли: и҆ речѐ: з҃і.

в҃. Возлюблю́ тѧ, гдⷭ҇и, крѣ́посте моѧ̀:

г҃. Гдⷭ҇ь ᲂу҆твержде́нїе моѐ, и҆ прибѣ́жище моѐ, и҆ и҆зба́витель мо́й, бг҃ъ мо́й, помо́щникъ мо́й, и҆ ᲂу҆пова́ю на него̀: защи́титель мо́й, и҆ ро́гъ сп҃се́нїѧ моегѡ̀, и҆ застꙋ́пникъ мо́й.

д҃. Хвалѧ̀ призовꙋ̀ гдⷭ҇а и҆ ѿ вра̑гъ мои́хъ спасꙋ́сѧ.

є҃. Ѡ҆держа́ша мѧ̀ бѡлѣ́зни смє́ртныѧ, и҆ пото́цы беззако́нїѧ смѧто́ша мѧ̀:

ѕ҃. Бѡлѣ́зни а҆́дѡвы ѡ҆быдо́ша мѧ̀, предвари́ша мѧ̀ сѣ̑ти смє́ртныѧ.

з҃. И҆ внегда̀ скорбѣ́ти мѝ, призва́хъ гдⷭ҇а и҆ къ бг҃ꙋ моемꙋ̀ воззва́хъ: ᲂу҆слы́ша ѿ хра́ма ст҃а́гѡ своегѡ̀ гла́съ мо́й, и҆ во́пль мо́й пред̾ ни́мъ вни́детъ во ᲂу҆́шы є҆гѡ̀.

и҃. И҆ подви́жесѧ и҆ тре́петна бы́сть землѧ̀, и҆ ѡ҆снова̑нїѧ го́ръ смѧто́шасѧ и҆ подвиго́шасѧ, ꙗ҆́кѡ прогнѣ́васѧ на нѧ̀ бг҃ъ.

ѳ҃. Взы́де ды́мъ гнѣ́вомъ є҆гѡ̀, и҆ ѻ҆́гнь ѿ лица̀ є҆гѡ̀ воспла́менитсѧ: ᲂу҆́глїе возгорѣ́сѧ ѿ негѡ̀.

і҃. И҆ приклонѝ нб҃са̀ и҆ сни́де, и҆ мра́къ под̾ нога́ма є҆гѡ̀.

а҃і. И҆ взы́де на херꙋві́мы и҆ летѣ̀, летѣ̀ на крилꙋ̑ вѣ́трєню.

в҃і. И҆ положѝ тмꙋ̀ закро́въ сво́й: ѡ҆́крестъ є҆гѡ̀ селе́нїе є҆гѡ̀: темна̀ вода̀ во ѻ҆́блацѣхъ воздꙋ́шныхъ.

г҃і. Ѿ ѡ҆блиста́нїѧ пред̾ ни́мъ ѻ҆́блацы проидо́ша, гра́дъ и҆ ᲂу҆́глїе ѻ҆́гненное.

д҃і. И҆ возгремѣ̀ съ нб҃сѐ гдⷭ҇ь, и҆ вы́шнїй дадѐ гла́съ сво́й.

є҃і. Низпосла̀ стрѣ́лы и҆ разгна̀ ѧ҆̀, и҆ мѡ́лнїи ᲂу҆мно́жи и҆ смѧтѐ ѧ҆̀.

ѕ҃і. И҆ ꙗ҆ви́шасѧ и҆сто́чницы водні́и, и҆ ѿкры́шасѧ ѡ҆снова̑нїѧ вселе́нныѧ ѿ запреще́нїѧ твоегѡ̀, гдⷭ҇и, ѿ дохнове́нїѧ дꙋ́ха гнѣ́ва твоегѡ̀.

з҃і. Низпосла̀ съ высоты̀ и҆ прїѧ́тъ мѧ̀, воспрїѧ́тъ мѧ̀ ѿ во́дъ мно́гихъ.

и҃і. И҆зба́витъ мѧ̀ ѿ врагѡ́въ мои́хъ си́льныхъ и҆ ѿ ненави́дѧщихъ мѧ̀: ꙗ҆́кѡ ᲂу҆тверди́шасѧ па́че менѐ.

ѳ҃і. Предвари́ша мѧ̀ въ де́нь ѡ҆ѕлобле́нїѧ моегѡ̀: и҆ бы́сть гдⷭ҇ь ᲂу҆твержде́нїе моѐ.

к҃. И҆ и҆зведе́ мѧ на широтꙋ̀: и҆зба́витъ мѧ̀, ꙗ҆́кѡ восхотѣ́ мѧ.

к҃а. И҆ возда́стъ мѝ гдⷭ҇ь по пра́вдѣ мое́й, и҆ по чистотѣ̀ рꙋкꙋ̀ моє́ю возда́стъ мѝ,

к҃в. Ꙗ҆́кѡ сохрани́хъ пꙋти̑ гдⷭ҇ни и҆ не нече́ствовахъ ѿ бг҃а моегѡ̀.

к҃г. Ꙗ҆́кѡ всѧ̑ сꙋдьбы̑ є҆гѡ̀ предо мно́ю, и҆ ѡ҆правда̑нїѧ є҆гѡ̀ не ѿстꙋпи́ша ѿ менѐ.

к҃д. И҆ бꙋ́дꙋ непоро́ченъ съ ни́мъ и҆ сохраню́сѧ ѿ беззако́нїѧ моегѡ̀.

к҃є. И҆ возда́стъ мѝ гдⷭ҇ь по пра́вдѣ мое́й и҆ по чистотѣ̀ рꙋкꙋ̀ моє́ю пред̾ ѻ҆чи́ма є҆гѡ̀.

к҃ѕ. Съ прпⷣбнымъ прпⷣбенъ бꙋ́деши, и҆ съ мꙋ́жемъ непови́ннымъ непови́ненъ бꙋ́деши,

к҃з. И҆ со и҆збра́ннымъ и҆збра́нъ бꙋ́деши, и҆ со стропти́вымъ разврати́шисѧ.

к҃и. Ꙗ҆́кѡ ты̀ лю́ди смирє́нныѧ сп҃се́ши и҆ ѻ҆́чи го́рдыхъ смири́ши.

к҃ѳ. Ꙗ҆́кѡ ты̀ просвѣти́ши свѣти́льникъ мо́й, гдⷭ҇и: бж҃е мо́й, просвѣти́ши тмꙋ̀ мою̀.

л҃. Ꙗ҆́кѡ тобо́ю и҆зба́влюсѧ ѿ и҆скꙋше́нїѧ, и҆ бг҃омъ мои́мъ прейдꙋ̀ стѣ́нꙋ.

л҃а. Бг҃ъ мо́й, непоро́ченъ пꙋ́ть є҆гѡ̀: словеса̀ гдⷭ҇нѧ разжжє́на. Защи́титель є҆́сть всѣ́хъ ᲂу҆пова́ющихъ на него̀.

л҃в. Ꙗ҆́кѡ кто̀ бг҃ъ, ра́звѣ гдⷭ҇а; и҆лѝ кто̀ бг҃ъ, ра́звѣ бг҃а на́шегѡ;

л҃г. Бг҃ъ препоѧсꙋ́ѧй мѧ̀ си́лою, и҆ положѝ непоро́ченъ пꙋ́ть мо́й:

л҃д. Соверша́ѧй но́зѣ моѝ ꙗ҆́кѡ є҆ле́ни, и҆ на высо́кихъ поставлѧ́ѧй мѧ̀:

л҃є. Наꙋча́ѧй рꙋ́цѣ моѝ на бра́нь, и҆ положи́лъ є҆сѝ лꙋ́къ мѣ́дѧнъ мы̑шца моѧ̑:

л҃ѕ. И҆ да́лъ мѝ є҆сѝ защище́нїе сп҃се́нїѧ, и҆ десни́ца твоѧ̀ воспрїѧ́тъ мѧ̀: и҆ наказа́нїе твоѐ и҆спра́витъ мѧ̀ въ коне́цъ, и҆ наказа́нїе твоѐ то̀ мѧ̀ наꙋчи́тъ.

л҃з. Оу҆шири́лъ є҆сѝ стѡпы̀ моѧ̑ подо мно́ю, и҆ не и҆знемого́стѣ плеснѣ̀ моѝ.

л҃и. Поженꙋ̀ врагѝ моѧ̑, и҆ пости́гнꙋ ѧ҆̀, и҆ не возвращꙋ́сѧ, до́ндеже сконча́ютсѧ:

л҃ѳ. Ѡ҆скорблю̀ и҆̀хъ, и҆ не возмо́гꙋтъ ста́ти, падꙋ́тъ под̾ нога́ма мои́ма.

м҃. И҆ препоѧ́салъ мѧ̀ є҆сѝ си́лою на бра́нь, спѧ́лъ є҆сѝ всѧ̑ востаю́щыѧ на мѧ̀ под̾ мѧ̀.

м҃а. И҆ врагѡ́въ мои́хъ да́лъ мѝ є҆сѝ хребе́тъ и҆ ненави́дѧщыѧ мѧ̀ потреби́лъ є҆сѝ.

м҃в. Воззва́ша, и҆ не бѣ̀ спаса́ѧй: ко гдⷭ҇ꙋ, и҆ не ᲂу҆слы́ша и҆́хъ.

м҃г. И҆ и҆стню̀ ѧ҆̀ ꙗ҆́кѡ пра́хъ пред̾ лице́мъ вѣ́тра, ꙗ҆́кѡ бре́нїе пꙋте́й погла́ждꙋ ѧ҆̀.

м҃д. И҆зба́виши мѧ̀ ѿ прерѣка́нїѧ люде́й: поста́виши мѧ̀ во главꙋ̀ ꙗ҆зы́кѡвъ: лю́дїе, и҆́хже не вѣ́дѣхъ, рабо́таша мѝ,

м҃є. Въ слꙋ́хъ ᲂу҆́ха послꙋ́шаша мѧ̀. Сы́нове чꙋжді́и солга́ша мѝ,

м҃ѕ. Сы́нове чꙋжді́и ѡ҆бетша́ша и҆ ѡ҆хромо́ша ѿ сте́зь свои́хъ.

м҃з. Жи́въ гдⷭ҇ь, и҆ бл҃гослове́нъ бг҃ъ, и҆ да вознесе́тсѧ бг҃ъ сп҃се́нїѧ моегѡ̀,

м҃и. Бг҃ъ даѧ́й ѿмще́нїе мнѣ̀ и҆ покори́вый лю́ди под̾ мѧ̀,

м҃ѳ. И҆зба́витель мо́й ѿ вра̑гъ мои́хъ гнѣвли́выхъ: ѿ востаю́щихъ на мѧ̀ вознесе́ши мѧ̀, ѿ мꙋ́жа непра́ведна и҆зба́виши мѧ̀.

н҃. Сегѡ̀ ра́ди и҆сповѣ́мсѧ тебѣ̀ во ꙗ҆зы́цѣхъ, гдⷭ҇и, и҆ и҆́мени твоемꙋ̀ пою̀:

н҃а. Велича́ѧй спасє́нїѧ царє́ва и҆ творѧ́й млⷭ҇ть хрїстꙋ̀ своемꙋ̀ дв҃дꙋ и҆ сѣ́мени є҆гѡ̀ до вѣ́ка.

Сла́ва:

а҃. Въ коне́цъ, ѱало́мъ дв҃дꙋ, и҃і.

в҃. Небеса̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь.

г҃. Де́нь днѝ ѿрыга́етъ глаго́лъ, и҆ но́щь но́щи возвѣща́етъ ра́зꙋмъ.

д҃. Не сꙋ́ть рѣ̑чи, нижѐ словеса̀, и҆́хже не слы́шатсѧ гла́си и҆́хъ.

є҃. Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ: въ со́лнцѣ положѝ селе́нїе своѐ:

ѕ҃. И҆ то́й ꙗ҆́кѡ жени́хъ и҆сходѧ́й ѿ черто́га своегѡ̀, возра́дꙋетсѧ ꙗ҆́кѡ и҆споли́нъ тещѝ пꙋ́ть.

з҃. Ѿ кра́ѧ небесѐ и҆схо́дъ є҆гѡ̀, и҆ срѣ́тенїе є҆гѡ̀ до кра́ѧ небесѐ: и҆ нѣ́сть, и҆́же ᲂу҆кры́етсѧ теплоты̀ є҆гѡ̀.

и҃. Зако́нъ гдⷭ҇ень непоро́ченъ, ѡ҆браща́ѧй дꙋ́шы: свидѣ́тельство гдⷭ҇не вѣ́рно, ᲂу҆мꙋдрѧ́ющее младе́нцы.

ѳ҃. Ѡ҆правда̑нїѧ гдⷭ҇нѧ пра̑ва, веселѧ̑щаѧ се́рдце: за́повѣдь гдⷭ҇нѧ свѣтла̀, просвѣща́ющаѧ ѻ҆́чи.

і҃. Стра́хъ гдⷭ҇ень чи́стъ, пребыва́ѧй въ вѣ́къ вѣ́ка: сꙋдьбы̑ гдⷭ҇ни и҆́стинны, ѡ҆правда̑нны вкꙋ́пѣ,

а҃і. Вожделѣ̑нны па́че зла́та и҆ ка́мене че́стна мно́га, и҆ сла́ждшѧ па́че ме́да и҆ со́та.

в҃і. И҆́бо ра́бъ тво́й храни́тъ ѧ҆̀: внегда̀ сохрани́ти ѧ҆̀, воздаѧ́нїе мно́го.

г҃і. Грѣхопадє́нїѧ кто̀ разꙋмѣ́етъ; ѿ та́йныхъ мои́хъ ѡ҆чи́сти мѧ̀,

д҃і. И҆ ѿ чꙋжди́хъ пощадѝ раба̀ твоего̀: а҆́ще не ѡ҆блада́ютъ мно́ю, тогда̀ непоро́ченъ бꙋ́дꙋ, и҆ ѡ҆чи́щꙋсѧ ѿ грѣха̀ вели́ка.

є҃і. И҆ бꙋ́дꙋтъ во бл҃говоле́нїе словеса̀ ᲂу҆́стъ мои́хъ, и҆ поꙋче́нїе се́рдца моегѡ̀ пред̾ тобо́ю вы́нꙋ, гдⷭ҇и, помо́щниче мо́й и҆ и҆зба́вителю мо́й.

а҃. Въ коне́цъ, ѱало́мъ дв҃дꙋ, ѳ҃і.

в҃. Оу҆слы́шитъ тѧ̀ гдⷭ҇ь въ де́нь печа́ли, защи́титъ тѧ̀ и҆́мѧ бг҃а і҆а́кѡвлѧ.

г҃. По́слетъ тѝ по́мощь ѿ ст҃а́гѡ, и҆ ѿ сїѡ́на застꙋ́питъ тѧ̀.

д҃. Помѧне́тъ всѧ́кꙋ же́ртвꙋ твою̀, и҆ всесожже́нїе твоѐ тꙋ́чно бꙋ́ди.

є҃. Да́стъ тѝ гдⷭ҇ь по се́рдцꙋ твоемꙋ̀, и҆ ве́сь совѣ́тъ тво́й и҆спо́лнитъ.

ѕ҃. Возра́дꙋемсѧ ѡ҆ сп҃се́нїи твое́мъ, и҆ во и҆́мѧ гдⷭ҇а бг҃а на́шегѡ возвели́чимсѧ: и҆спо́лнитъ гдⷭ҇ь всѧ̑ прошє́нїѧ твоѧ̑.

з҃. Ны́нѣ позна́хъ, ꙗ҆́кѡ сп҃сѐ гдⷭ҇ь хрїста̀ своего̀: ᲂу҆слы́шитъ є҆го̀ съ нб҃сѐ ст҃а́гѡ своегѡ̀: въ си́лахъ сп҃се́нїе десни́цы є҆гѡ̀.

и҃. Сі́и на колесни́цахъ, и҆ сі́и на ко́нехъ: мы́ же во и҆́мѧ гдⷭ҇а бг҃а на́шегѡ призове́мъ.

ѳ҃. Ті́и спѧ́ти бы́ша и҆ падо́ша: мы́ же воста́хомъ и҆ и҆спра́вихомсѧ.

і҃. Гдⷭ҇и, спасѝ царѧ̀, и҆ ᲂу҆слы́ши ны̀, во́ньже а҆́ще де́нь призове́мъ тѧ̀.

а҃. Ѱало́мъ дв҃дꙋ, к҃.

в҃. Гдⷭ҇и, си́лою твое́ю возвесели́тсѧ ца́рь, и҆ ѡ҆ сп҃се́нїи твое́мъ возра́дꙋетсѧ ѕѣлѡ̀.

г҃. Жела́нїе се́рдца є҆гѡ̀ да́лъ є҆сѝ є҆мꙋ̀, и҆ хотѣ́нїѧ ᲂу҆стнꙋ̀ є҆гѡ̀ нѣ́си лиши́лъ є҆го̀.

д҃. Ꙗ҆́кѡ предвари́лъ є҆сѝ є҆го̀ бл҃гослове́нїемъ бл҃госты́ннымъ, положи́лъ є҆сѝ на главѣ̀ є҆гѡ̀ вѣне́цъ ѿ ка́мене че́стна.

є҃. Живота̀ проси́лъ є҆́сть ᲂу҆ тебє̀, и҆ да́лъ є҆сѝ є҆мꙋ̀ долготꙋ̀ дні́й во вѣ́къ вѣ́ка.

ѕ҃. Ве́лїѧ сла́ва є҆гѡ̀ сп҃се́нїемъ твои́мъ: сла́вꙋ и҆ велелѣ́пїе возложи́ши на него̀.

з҃. Ꙗ҆́кѡ да́си є҆мꙋ̀ бл҃гослове́нїе во вѣ́къ вѣ́ка: возвесели́ши є҆гѡ̀ ра́достїю съ лице́мъ твои́мъ.

и҃. Ꙗ҆́кѡ ца́рь ᲂу҆пова́етъ на гдⷭ҇а, и҆ млⷭ҇тїю вы́шнѧгѡ не подви́житсѧ.

ѳ҃. Да ѡ҆брѧ́щетсѧ рꙋка̀ твоѧ̀ всѣ̑мъ врагѡ́мъ твои̑мъ, десни́ца твоѧ̀ да ѡ҆брѧ́щетъ всѧ̑ ненави́дѧщыѧ тебѐ.

і҃. Ꙗ҆́кѡ положи́ши и҆̀хъ ꙗ҆́кѡ пе́щь ѻ҆́гненнꙋю во вре́мѧ лица̀ твоегѡ̀: гдⷭ҇ь гнѣ́вомъ свои́мъ смѧте́тъ ѧ҆̀, и҆ снѣ́сть и҆̀хъ ѻ҆́гнь.

а҃і. Пло́дъ и҆́хъ ѿ землѝ погꙋби́ши, и҆ сѣ́мѧ и҆́хъ ѿ сынѡ́въ человѣ́ческихъ.

в҃і. Ꙗ҆́кѡ ᲂу҆клони́ша на тѧ̀ ѕла̑ѧ, помы́слиша совѣ́ты, и҆̀хже не возмо́гꙋтъ соста́вити.

г҃і. Ꙗ҆́кѡ положи́ши ѧ҆̀ хребе́тъ: во и҆збы́тцѣхъ твои́хъ ᲂу҆гото́виши лицѐ и҆́хъ.

д҃і. Вознеси́сѧ, гдⷭ҇и, си́лою твое́ю: воспое́мъ и҆ пое́мъ си̑лы твоѧ̑.

Сла́ва:

а҃. Въ коне́цъ, ѡ҆ застꙋпле́нїи ᲂу҆́треннѣмъ, ѱало́мъ дв҃дꙋ, к҃а.

в҃. Бж҃е, бж҃е мо́й, вонми́ ми, вскꙋ́ю ѡ҆ста́вилъ мѧ̀ є҆сѝ; дале́че ѿ сп҃се́нїѧ моегѡ̀ словеса̀ грѣхопаде́нїй мои́хъ.

г҃. Бж҃е мо́й, воззовꙋ̀ во днѝ, и҆ не ᲂу҆слы́шиши, и҆ въ нощѝ, и҆ не въ безꙋ́мїе мнѣ̀.

д҃. Ты́ же во ст҃ѣ́мъ живе́ши, хвало̀ і҆и҃лева.

є҃. На тѧ̀ ᲂу҆пова́ша ѻ҆тцы̀ на́ши: ᲂу҆пова́ша, и҆ и҆зба́вилъ є҆сѝ ѧ҆̀:

ѕ҃. Къ тебѣ̀ воззва́ша, и҆ спасо́шасѧ: на тѧ̀ ᲂу҆пова́ша, и҆ не постыдѣ́шасѧ.

з҃. А҆́зъ же є҆́смь че́рвь, а҆ не человѣ́къ, поноше́нїе человѣ́кѡвъ и҆ ᲂу҆ничиже́нїе люде́й.

и҃. Всѝ ви́дѧщїи мѧ̀ порꙋга́шамисѧ, глаго́лаша ᲂу҆стна́ми, покива́ша главо́ю:

ѳ҃. Оу҆пова̀ на гдⷭ҇а, да и҆зба́витъ є҆го̀, да сп҃се́тъ є҆го̀, ꙗ҆́кѡ хо́щетъ є҆го̀.

і҃. Ꙗ҆́кѡ ты̀ є҆сѝ и҆сто́ргїй мѧ̀ и҆з̾ чре́ва, ᲂу҆пова́нїе моѐ ѿ сѡсцꙋ̀ ма́тере моеѧ̀.

а҃і. Къ тебѣ̀ приве́рженъ є҆́смь ѿ ложе́снъ, ѿ чре́ва ма́тере моеѧ̀ бг҃ъ мо́й є҆сѝ ты̀.

в҃і. Да не ѿстꙋ́пиши ѿ менѐ, ꙗ҆́кѡ ско́рбь бли́з̾, ꙗ҆́кѡ нѣ́сть помога́ѧй мѝ.

г҃і. Ѡ҆быдо́ша мѧ̀ тельцы̀ мно́зи, ю҆нцы̀ тꙋ́чнїи ѡ҆держа́ша мѧ̀:

д҃і. Ѿверзо́ша на мѧ̀ ᲂу҆ста̀ своѧ̑, ꙗ҆́кѡ ле́въ восхища́ѧй и҆ рыка́ѧй.

є҃і. Ꙗ҆́кѡ вода̀ и҆злїѧ́хсѧ, и҆ разсы́пашасѧ всѧ̑ кѡ́сти моѧ̑: бы́сть се́рдце моѐ ꙗ҆́кѡ во́скъ та́ѧй посредѣ̀ чре́ва моегѡ̀.

ѕ҃і. И҆́зсше ꙗ҆́кѡ скꙋде́ль крѣ́пость моѧ̀, и҆ ѧ҆зы́къ мо́й прильпѐ горта́ни моемꙋ̀, и҆ въ пе́рсть сме́рти све́лъ мѧ̀ є҆сѝ.

з҃і. Ꙗ҆́кѡ ѡ҆быдо́ша мѧ̀ псѝ мно́зи, со́нмъ лꙋка́выхъ ѡ҆держа́ша мѧ̀: и҆скопа́ша рꙋ́цѣ моѝ и҆ но́зѣ моѝ.

и҃і. И҆счето́ша всѧ̑ кѡ́сти моѧ̑: ті́и же смотри́ша и҆ презрѣ́ша мѧ̀.

ѳ҃і. Раздѣли́ша ри̑зы моѧ̑ себѣ̀, и҆ ѡ҆ ѻ҆де́жди мое́й мета́ша жре́бїй.

к҃. Ты́ же, гдⷭ҇и, не ᲂу҆далѝ по́мощь твою̀ ѿ менѐ: на застꙋпле́нїе моѐ вонмѝ.

к҃а. И҆зба́ви ѿ ѻ҆рꙋ́жїѧ дꙋ́шꙋ мою̀, и҆ и҆з̾ рꙋкѝ пе́сїи є҆диноро́днꙋю мою̀.

к҃в. Сп҃си́ мѧ ѿ ᲂу҆́стъ льво́выхъ, и҆ ѿ рѡ́гъ є҆динорѡ́жъ смире́нїе моѐ.

к҃г. Повѣ́мъ и҆́мѧ твоѐ бра́тїи мое́й, посредѣ̀ цр҃кве воспою̀ тѧ̀.

к҃д. Боѧ́щїисѧ гдⷭ҇а, восхвали́те є҆го̀, всѐ сѣ́мѧ і҆а́кѡвле, просла́вите є҆го̀, да ᲂу҆бои́тсѧ же ѿ негѡ̀ всѐ сѣ́мѧ і҆и҃лево:

к҃є. Ꙗ҆́кѡ не ᲂу҆ничижѝ, нижѐ негодова̀ моли́твы ни́щагѡ, нижѐ ѿвратѝ лицѐ своѐ ѿ менѐ, и҆ є҆гда̀ воззва́хъ къ немꙋ̀, ᲂу҆слы́ша мѧ̀.

к҃ѕ. Ѿ тебє̀ похвала̀ моѧ̀, въ цр҃кви вели́цѣй и҆сповѣ́мсѧ тебѣ̀: моли̑твы моѧ̑ возда́мъ пред̾ боѧ́щимисѧ є҆гѡ̀.

к҃з. Ꙗ҆дѧ́тъ ᲂу҆бо́зїи, и҆ насы́тѧтсѧ, и҆ восхва́лѧтъ гдⷭ҇а взыска́ющїи є҆го̀: жива̑ бꙋ́дꙋтъ сердца̀ и҆́хъ въ вѣ́къ вѣ́ка.

к҃и. Помѧнꙋ́тсѧ и҆ ѡ҆братѧ́тсѧ ко гдⷭ҇ꙋ всѝ концы̀ землѝ, и҆ покло́нѧтсѧ пред̾ ни́мъ всѧ̑ ѻ҆те́чєствїѧ ꙗ҆зы̑къ:

к҃ѳ. Ꙗ҆́кѡ гдⷭ҇не є҆́сть црⷭ҇твїе, и҆ то́й ѡ҆блада́етъ ꙗ҆зы́ки.

л҃. Ꙗ҆до́ша и҆ поклони́шасѧ всѝ тꙋ́чнїи землѝ: пред̾ ни́мъ припадꙋ́тъ всѝ низходѧ́щїи въ зе́млю: и҆ дꙋша̀ моѧ̀ томꙋ̀ живе́тъ.

л҃а. И҆ сѣ́мѧ моѐ порабо́таетъ є҆мꙋ̀: возвѣсти́тъ гдⷭ҇еви ро́дъ грѧдꙋ́щїй:

л҃в. И҆ возвѣстѧ́тъ пра́вдꙋ є҆гѡ̀ лю́демъ ꙾ро́ждшымсѧ꙾ ⁵, ꙗ҆̀же сотворѝ гдⷭ҇ь.

Ѱало́мъ дв҃дꙋ, к҃в.

а҃. Гдⷭ҇ь пасе́тъ мѧ̀, и҆ ничто́же мѧ̀ лиши́тъ.

в҃. На мѣ́сте ѕла́чнѣ, та́мѡ всели́ мѧ, на водѣ̀ поко́йнѣ воспита́ мѧ.

г҃. Дꙋ́шꙋ мою̀ ѡ҆братѝ, наста́ви мѧ̀ на стєзѝ пра́вды, и҆́мене ра́ди своегѡ̀.

д҃. А҆́ще бо и҆ пойдꙋ̀ посредѣ̀ сѣ́ни сме́ртныѧ, не ᲂу҆бою́сѧ ѕла̀, ꙗ҆́кѡ ты̀ со мно́ю є҆сѝ: же́злъ тво́й и҆ па́лица твоѧ̀, та̑ мѧ̀ ᲂу҆тѣ́шиста.

є҃. Оу҆гото́валъ є҆сѝ предо мно́ю трапе́зꙋ сопроти́въ стꙋжа́ющымъ мнѣ̀: ᲂу҆ма́стилъ є҆сѝ є҆ле́омъ главꙋ̀ мою̀, и҆ ча́ша твоѧ̀ ᲂу҆поѧва́ющи мѧ̀, ꙗ҆́кѡ держа́вна.

ѕ҃. И҆ млⷭ҇ть твоѧ̀ пожене́тъ мѧ̀ всѧ̑ дни̑ живота̀ моегѡ̀, и҆ є҆́же всели́тимисѧ въ до́мъ гдⷭ҇ень въ долготꙋ̀ дні́й.

Ѱало́мъ дв҃дꙋ, є҆ди́ныѧ ѿ сꙋббѡ́тъ, к҃г.

а҃. Гдⷭ҇нѧ землѧ̀, и҆ и҆сполне́нїе є҆ѧ̀, вселе́ннаѧ и҆ всѝ живꙋ́щїи на не́й.

в҃. То́й на морѧ́хъ ѡ҆снова́лъ ю҆̀ є҆́сть и҆ на рѣка́хъ ᲂу҆гото́валъ ю҆̀ є҆́сть.

г҃. Кто̀ взы́детъ на го́рꙋ гдⷭ҇ню; и҆лѝ кто̀ ста́нетъ на мѣ́стѣ ст҃ѣ́мъ є҆гѡ̀;

д҃. Непови́ненъ рꙋка́ма и҆ чи́стъ се́рдцемъ, и҆́же не прїѧ́тъ всꙋ́е дꙋ́шꙋ свою̀ и҆ не клѧ́тсѧ ле́стїю и҆́скреннемꙋ своемꙋ̀:

є҃. Се́й прїи́метъ бл҃гослове́нїе ѿ гдⷭ҇а и҆ млⷭ҇тыню ѿ бг҃а сп҃са своегѡ̀.

ѕ҃. Се́й ро́дъ и҆́щꙋщихъ гдⷭ҇а, и҆́щꙋщихъ лицѐ бг҃а і҆а́кѡвлѧ.

з҃. Возми́те врата̀ кнѧ̑зи ва̑ша, и҆ возми́тесѧ врата̀ вѣ̑чнаѧ: и҆ вни́детъ цр҃ь сла́вы.

и҃. Кто́ є҆сть се́й цр҃ь сла́вы; гдⷭ҇ь крѣ́покъ и҆ си́ленъ, гдⷭ҇ь си́ленъ въ бра́ни.

ѳ҃. Возми́те врата̀ кнѧ̑зи ва̑ша, и҆ возми́тесѧ врата̀ вѣ̑чнаѧ: и҆ вни́детъ цр҃ь сла́вы.

і҃. Кто́ є҆сть се́й цр҃ь сла́вы; гдⷭ҇ь си́лъ, то́й є҆́сть цр҃ь сла́вы.

Сла́ва:

По г҃-й каѳі́смѣ, трист҃о́е.

Та́же тропарѝ, гла́съ г҃:

Живꙋ́щи на землѝ, дꙋшѐ моѧ̀, пока́йсѧ, пе́рсть во гро́бѣ не пое́тъ, прегрѣше́нїй не и҆збавлѧ́етъ. возопі́й хрⷭ҇тꙋ̀ бг҃ꙋ: сердцевѣ́дче, согрѣши́хъ, пре́жде да́же не ѡ҆сꙋ́диши мѧ̀, поми́лꙋй мѧ̀.

Доко́лѣ, дꙋшѐ моѧ̀, пребыва́еши въ прегрѣше́нїихъ; доко́лѣ прїе́млеши покаѧ́нїѧ преложе́нїе; прїимѝ во ᲂу҆мѣ̀ сꙋ́дъ грѧдꙋ́щїй, и҆ возопі́й гдⷭ҇ꙋ: сердцевѣ́дче, согрѣши́хъ, пре́жде да́же не ѡ҆сꙋ́диши мѧ̀, поми́лꙋй мѧ̀.

Сла́ва: На стра́шномъ сꙋди́щи без̾ ѡ҆глаго́льникѡвъ ѡ҆блича́юсѧ, без̾ свидѣ́телей ѡ҆сꙋжда́юсѧ: кни̑ги бо сѡ́вѣстныѧ разгиба́ютсѧ, и҆ дѣла̀ сокровє́ннаѧ ѿкрыва́ютсѧ. пре́жде не́же во ѻ҆́номъ всенаро́дномъ позо́рищи и҆́маши и҆спыта́ти, ꙗ҆̀же мно́ю содѣ̑ѧннаѧ, бж҃е, ѡ҆чи́сти мѧ̀, и҆ сп҃си́ мѧ.

И҆ ны́нѣ: Недоразꙋмѣва́емое, и҆ непостижи́мое є҆́сть, влⷣчце бг҃обл҃года́тнаѧ, содѣ́ѧнное ѡ҆ тебѣ̀ стра́шное та́инство: неѡб̾е́млемаго бо заче́нши, родила̀ є҆сѝ пло́тїю ѡ҆бложе́ннаго ѿ чⷭ҇тыхъ крове́й твои́хъ. є҆го́же чⷭ҇таѧ, ꙗ҆́кѡ сн҃а твоего̀, молѝ сп҃стѝ всѧ̑ пою́щыѧ тѧ̀.

Гдⷭ҇и поми́лꙋй, м҃. и҆ мл҃тва:

Гдⷭ҇и вседержи́телю, сло́ве пребезнача́льнагѡ ѻ҆ц҃а̀, самосоверше́нный бж҃е і҆и҃се хрⷭ҇тѐ, млⷭ҇рдїѧ ра́ди безприкла́днагѡ млⷭ҇ти твоеѧ̀, ника́коже разлꙋча́ѧйсѧ твои́хъ рабѡ́въ, но при́снѡ въ ни́хъ почива́ѧй, не ѡ҆ста́ви мѧ̀ раба̀ твоего̀ всест҃ы́й цр҃ю̀: но да́ждь мнѣ̀ недосто́йномꙋ ра́дованїе сп҃се́нїѧ твоегѡ̀, и҆ просвѣтѝ мо́й ᲂу҆́мъ свѣ́томъ позна́нїѧ є҆ѵⷢ҇лїа твоегѡ̀, дꙋ́шꙋ мою̀ любо́вїю крⷭ҇та̀ твоегѡ̀ ѡ҆бѧжѝ, тѣ́ло же моѐ твои́мъ безстра́стїемъ ᲂу҆красѝ, мы̑сли ᲂу҆мирѝ, и҆ но́зѣ моѝ сохранѝ ѿ поползнове́нїѧ, и҆ не погꙋби́ мѧ со беззако́нньми мои́ми, бл҃гі́й гдⷭ҇и, но и҆скꙋси́ мѧ бж҃е, и҆ вразꙋмѝ се́рдце моѐ: и҆спыта́й мѧ̀, и҆ ᲂу҆вѣ́ждь стєзѝ моѧ̑, и҆ ви́ждь, а҆́ще пꙋ́ть беззако́нїѧ во мнѣ̀, и҆ ѿвратѝ ѿ негѡ̀, и҆ наста́ви мѧ̀ на пꙋ́ть вѣ́ченъ. Ты́ бо є҆сѝ пꙋ́ть и҆ и҆́стина, и҆ живо́тъ, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ прест҃ы́мъ и҆ бл҃ги́мъ и҆ животворѧ́щимъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Ѱало́мъ дв҃дꙋ, к҃д.

а҃. Къ тебѣ̀, гдⷭ҇и, воздвиго́хъ дꙋ́шꙋ мою̀, бж҃е мо́й, на тѧ̀ ᲂу҆пова́хъ, да не постыжꙋ́сѧ во вѣ́къ, нижѐ да посмѣю́тъ ми сѧ вразѝ моѝ:

в҃. И҆́бо всѝ терпѧ́щїи тѧ̀ не постыдѧ́тсѧ.

г҃. Да постыдѧ́тсѧ беззако́ннꙋющїи вотщѐ.

д҃. Пꙋти̑ твоѧ̑, гдⷭ҇и, скажи́ ми и҆ стезѧ́мъ твои̑мъ наꙋчи́ мѧ.

є҃. Наста́ви мѧ̀ на и҆́стинꙋ твою̀ и҆ наꙋчи́ мѧ: ꙗ҆́кѡ ты̀ є҆сѝ бг҃ъ сп҃съ мо́й, и҆ тебѐ терпѣ́хъ ве́сь де́нь.

ѕ҃. Помѧнѝ щедрѡ́ты твоѧ̑, гдⷭ҇и, и҆ млⷭ҇ти твоѧ̑, ꙗ҆́кѡ ѿ вѣ́ка сꙋ́ть.

з҃. Грѣ̑хъ ю҆́ности моеѧ̀ и҆ невѣ́дѣнїѧ моегѡ̀ не помѧнѝ: по млⷭ҇ти твое́й помѧни́ мѧ ты̀, ра́ди бл҃гости твоеѧ̀, гдⷭ҇и.

и҃. Бл҃гъ и҆ пра́въ гдⷭ҇ь, сегѡ̀ ра́ди законоположи́тъ согрѣша́ющымъ на пꙋтѝ.

ѳ҃. Наста́витъ крѡ́ткїѧ на сꙋ́дъ, наꙋчи́тъ крѡ́ткїѧ пꙋтє́мъ свои̑мъ.

і҃. Всѝ пꙋтїѐ гдⷭ҇ни млⷭ҇ть и҆ и҆́стина, взыска́ющымъ завѣ́та є҆гѡ̀ и҆ свидѣ́нїѧ є҆гѡ̀.

а҃і. Ра́ди и҆́мене твоегѡ̀, гдⷭ҇и, и҆ ѡ҆чи́сти грѣ́хъ мо́й, мно́гъ бо є҆́сть.

в҃і. Кто́ є҆сть человѣ́къ боѧ́йсѧ гдⷭ҇а; законоположи́тъ є҆мꙋ̀ на пꙋтѝ, є҆го́же и҆зво́ли.

г҃і. Дꙋша̀ є҆гѡ̀ во благи́хъ водвори́тсѧ, и҆ сѣ́мѧ є҆гѡ̀ наслѣ́дитъ зе́млю.

д҃і. Держа́ва гдⷭ҇ь боѧ́щихсѧ є҆гѡ̀, и҆ завѣ́тъ є҆гѡ̀ ꙗ҆ви́тъ и҆̀мъ.

є҃і. Ѻ҆́чи моѝ вы́нꙋ ко гдⷭ҇ꙋ, ꙗ҆́кѡ то́й и҆сто́ргнетъ ѿ сѣ́ти но́зѣ моѝ.

ѕ҃і. При́зри на мѧ̀ и҆ поми́лꙋй мѧ̀, ꙗ҆́кѡ є҆диноро́дъ и҆ ни́щь є҆́смь а҆́зъ.

з҃і. Скѡ́рби се́рдца моегѡ̀ ᲂу҆мно́жишасѧ, ѿ нꙋ́ждъ мои́хъ и҆зведи́ мѧ.

и҃і. Ви́ждь смире́нїе моѐ и҆ трꙋ́дъ мо́й, и҆ ѡ҆ста́ви всѧ̑ грѣхѝ моѧ̑.

ѳ҃і. Ви́ждь врагѝ моѧ̑, ꙗ҆́кѡ ᲂу҆мно́жишасѧ, и҆ ненавидѣ́нїемъ непра́веднымъ возненави́дѣша мѧ̀.

к҃. Сохранѝ дꙋ́шꙋ мою̀ и҆ и҆зба́ви мѧ̀, да не постыжꙋ́сѧ, ꙗ҆́кѡ ᲂу҆пова́хъ на тѧ̀.

к҃а. Неѕло́бивїи и҆ пра́вїи прилѣплѧ́хꙋсѧ мнѣ̀, ꙗ҆́кѡ потерпѣ́хъ тѧ̀, гдⷭ҇и.

к҃в. И҆зба́ви, бж҃е, і҆и҃лѧ ѿ всѣ́хъ скорбе́й є҆гѡ̀.

Ѱало́мъ дв҃дꙋ, к҃є.

а҃. Сꙋди́ ми, гдⷭ҇и, ꙗ҆́кѡ а҆́зъ неѕло́бою мое́ю ходи́хъ: и҆ на гдⷭ҇а ᲂу҆пова́ѧ не и҆знемогꙋ̀.

в҃. И҆скꙋси́ мѧ, гдⷭ҇и, и҆ и҆спыта́й мѧ̀, разжжѝ ᲂу҆трѡ́бы моѧ̑ и҆ се́рдце моѐ.

г҃. Ꙗ҆́кѡ млⷭ҇ть твоѧ̀ пред̾ ѻ҆чи́ма мои́ма є҆́сть, и҆ бл҃гоꙋгоди́хъ во и҆́стинѣ твое́й.

д҃. Не сѣдо́хъ съ со́нмомъ сꙋ́етнымъ, и҆ со законопрестꙋ́пными не вни́дꙋ.

є҃. Возненави́дѣхъ це́рковь лꙋка́внꙋющихъ, и҆ съ нечести́выми не сѧ́дꙋ.

ѕ҃. Оу҆мы́ю въ непови́нныхъ рꙋ́цѣ моѝ, и҆ ѡ҆бы́дꙋ же́ртвенникъ тво́й, гдⷭ҇и,

з҃. Є҆́же ᲂу҆слы́шати мѝ гла́съ хвалы̀ твоеѧ̀ и҆ повѣ́дати всѧ̑ чꙋдеса̀ твоѧ̑.

и҃. Гдⷭ҇и, возлюби́хъ бл҃голѣ́пїе до́мꙋ твоегѡ̀ и҆ мѣ́сто селе́нїѧ сла́вы твоеѧ̀.

ѳ҃. Да не погꙋби́ши съ нечести́выми дꙋ́шꙋ мою̀ и҆ съ мꙋ̑жи крове́й живо́тъ мо́й,

і҃. И҆́хже въ рꙋкꙋ̀ беззакѡ́нїѧ, десни́ца и҆́хъ и҆спо́лнисѧ мзды̀.

а҃і. А҆́зъ же неѕло́бою мое́ю ходи́хъ: и҆зба́ви мѧ̀, гдⷭ҇и, и҆ поми́лꙋй мѧ̀.

в҃і. Нога̀ моѧ̀ ста̀ на правотѣ̀: въ цр҃квахъ бл҃гословлю́ тѧ, гдⷭ҇и.

Ѱало́мъ дв҃дꙋ, пре́жде пома́занїѧ, к҃ѕ.

а҃. Гдⷭ҇ь просвѣще́нїе моѐ и҆ сп҃си́тель мо́й, когѡ̀ ᲂу҆бою́сѧ; гдⷭ҇ь защи́титель живота̀ моегѡ̀, ѿ когѡ̀ ᲂу҆страшꙋ́сѧ;

в҃. Внегда̀ приближа́тисѧ на мѧ̀ ѕло́бꙋющымъ, є҆́же снѣ́сти плѡ́ти моѧ̑, ѡ҆скорблѧ́ющїи мѧ̀ и҆ вразѝ моѝ, ті́и и҆знемого́ша и҆ падо́ша.

г҃. А҆́ще ѡ҆полчи́тсѧ на мѧ̀ по́лкъ, не ᲂу҆бои́тсѧ се́рдце моѐ: а҆́ще воста́нетъ на мѧ̀ бра́нь, на него̀ а҆́зъ ᲂу҆пова́ю.

д҃. Є҆ди́но проси́хъ ѿ гдⷭ҇а, то̀ взыщꙋ̀: є҆́же жи́ти мѝ въ домꙋ̀ гдⷭ҇ни всѧ̑ дни̑ живота̀ моегѡ̀, зрѣ́ти мѝ красотꙋ̀ гдⷭ҇ню и҆ посѣща́ти хра́мъ ст҃ы́й є҆гѡ̀.

є҃. Ꙗ҆́кѡ скры́ мѧ въ селе́нїи свое́мъ въ де́нь ѕѡ́лъ мои́хъ, покры́ мѧ въ та́йнѣ селе́нїѧ своегѡ̀, на ка́мень вознесе́ мѧ.

ѕ҃. И҆ ны́нѣ сѐ, вознесѐ главꙋ̀ мою̀ на врагѝ моѧ̑: ѡ҆быдо́хъ и҆ пожро́хъ въ селе́нїи є҆гѡ̀ же́ртвꙋ хвале́нїѧ и҆ воскликнове́нїѧ: пою̀ и҆ воспою̀ гдⷭ҇еви.

з҃. Оу҆слы́ши, гдⷭ҇и, гла́съ мо́й, и҆́мже воззва́хъ, поми́лꙋй мѧ̀ и҆ ᲂу҆слы́ши мѧ̀.

и҃. Тебѣ̀ речѐ се́рдце моѐ: гдⷭ҇а взыщꙋ̀, взыска̀ тебѐ лицѐ моѐ, лица̀ твоегѡ̀, гдⷭ҇и, взыщꙋ̀.

ѳ҃. Не ѿвратѝ лица̀ твоегѡ̀ ѿ менѐ и҆ не ᲂу҆клони́сѧ гнѣ́вомъ ѿ раба̀ твоегѡ̀: помо́щникъ мо́й бꙋ́ди, не ѿри́ни менѐ и҆ не ѡ҆ста́ви менѐ, бж҃е, сп҃си́телю мо́й.

і҃. Ꙗ҆́кѡ ѻ҆те́цъ мо́й и҆ ма́ти моѧ̀ ѡ҆ста́виста мѧ̀, гдⷭ҇ь же воспрїѧ́тъ мѧ̀.

а҃і. Законоположи́ ми, гдⷭ҇и, въ пꙋтѝ твое́мъ, и҆ наста́ви мѧ̀ на стезю̀ пра́вꙋю вра̑гъ мои́хъ ра́ди.

в҃і. Не преда́ждь менѐ въ дꙋ́шы стꙋжа́ющихъ мѝ: ꙗ҆́кѡ воста́ша на мѧ̀ свидѣ́телє непра́веднїи, и҆ солга̀ непра́вда себѣ̀.

г҃і. Вѣ́рꙋю ви́дѣти бл҃га̑ѧ гдⷭ҇нѧ на землѝ живы́хъ.

д҃і. Потерпѝ гдⷭ҇а, мꙋжа́йсѧ, и҆ да крѣпи́тсѧ се́рдце твоѐ, и҆ потерпѝ гдⷭ҇а.

Сла́ва:

Ѱало́мъ дв҃дꙋ, к҃з.

а҃. Къ тебѣ̀, гдⷭ҇и, воззовꙋ̀, бж҃е мо́й: да не премолчи́ши ꙾ѿ менѐ꙾ ⁶: да не когда̀ премолчи́ши ꙾ѿ менѐ꙾ ⁷, и҆ ᲂу҆подо́блюсѧ низходѧ́щымъ въ ро́въ.

в҃. Оу҆слы́ши, гдⷭ҇и, гла́съ моле́нїѧ моегѡ̀, внегда̀ моли́ти ми сѧ къ тебѣ̀, внегда̀ воздѣ́ти мѝ рꙋ́цѣ моѝ ко хра́мꙋ ст҃о́мꙋ твоемꙋ̀.

г҃. Не привлецы̀ менѐ со грѣ̑шники, и҆ съ дѣ́лающими непра́вдꙋ не погꙋбѝ менѐ, глаго́лющими ми́ръ съ бли́жними свои́ми, ѕла̑ѧ же въ сердца́хъ свои́хъ.

д҃. Да́ждь и҆̀мъ, гдⷭ҇и, по дѣлѡ́мъ и҆́хъ и҆ по лꙋка́вствꙋ начина́нїй и҆́хъ, по дѣлѡ́мъ рꙋкꙋ̀ и҆́хъ да́ждь и҆̀мъ, возда́ждь воздаѧ́нїе и҆́хъ и҆̀мъ.

є҃. Ꙗ҆́кѡ не разꙋмѣ́ша въ дѣла̀ гдⷭ҇нѧ и҆ въ дѣла̀ рꙋкꙋ̀ є҆гѡ̀: разори́ши ѧ҆̀ и҆ не сози́ждеши ѧ҆̀.

ѕ҃. Бл҃гослове́нъ гдⷭ҇ь, ꙗ҆́кѡ ᲂу҆слы́ша гла́съ моле́нїѧ моегѡ̀.

з҃. Гдⷭ҇ь помо́щникъ мо́й и҆ защи́титель мо́й: на него̀ ᲂу҆пова̀ се́рдце моѐ, и҆ помо́же мѝ, и҆ процвѣтѐ пло́ть моѧ̀: и҆ во́лею мое́ю и҆сповѣ́мсѧ є҆мꙋ̀.

и҃. Гдⷭ҇ь ᲂу҆твержде́нїе люде́й свои́хъ и҆ защи́титель спасе́нїй хрїста̀ своегѡ̀ є҆́сть.

ѳ҃. Сп҃сѝ лю́ди твоѧ̑, и҆ блгⷭ҇вѝ достоѧ́нїе твоѐ, и҆ ᲂу҆пасѝ ѧ҆̀, и҆ ꙾꙾возмѝ꙾꙾ ⁸ ѧ҆̀ до вѣ́ка.

Ѱало́мъ дв҃дꙋ, и҆схо́да ски́нїи, к҃и.

а҃. Принеси́те гдⷭ҇еви, сы́нове бж҃їи, принеси́те гдⷭ҇еви сы́ны ѻ҆́вни, принеси́те гдⷭ҇еви сла́вꙋ и҆ че́сть:

в҃. Принеси́те гдⷭ҇еви сла́вꙋ и҆́мени є҆гѡ̀: поклони́тесѧ гдⷭ҇еви во дворѣ̀ ст҃ѣ́мъ є҆гѡ̀.

г҃. Гла́съ гдⷭ҇ень на вода́хъ, бг҃ъ сла́вы возгремѣ̀, гдⷭ҇ь на вода́хъ мно́гихъ.

д҃. Гла́съ гдⷭ҇ень въ крѣ́пости, гла́съ гдⷭ҇ень въ великолѣ́пїи.

є҃. Гла́съ гдⷭ҇а, сокрꙋша́ющагѡ ке́дры: и҆ стры́етъ гдⷭ҇ь ке́дры лїва̑нскїѧ,

ѕ҃. И҆ и҆стни́тъ ѧ҆̀ ꙗ҆́кѡ тельца̀ лїва́нска: и҆ возлю́бленный ꙗ҆́кѡ сы́нъ є҆диноро́жь.

з҃. Гла́съ гдⷭ҇а, пресѣца́ющагѡ пла́мень ѻ҆гнѧ̀.

и҃. Гла́съ гдⷭ҇а, стрѧса́ющагѡ пꙋсты́ню: и҆ стрѧсе́тъ гдⷭ҇ь пꙋсты́ню кадді́йскꙋю.

ѳ҃. Гла́съ гдⷭ҇ень, сверша́ющїй є҆лє́ни, и҆ ѿкры́етъ дꙋбра̑вы: и҆ въ хра́мѣ є҆гѡ̀ всѧ́кїй глаго́летъ сла́вꙋ.

і҃. Гдⷭ҇ь пото́пъ населѧ́етъ, и҆ сѧ́детъ гдⷭ҇ь цр҃ь въ вѣ́къ.

а҃і. Гдⷭ҇ь крѣ́пость лю́демъ свои̑мъ да́стъ, гдⷭ҇ь бл҃гослови́тъ лю́ди своѧ̑ ми́ромъ.

а҃. Ѱало́мъ пѣ́сни ѡ҆бновле́нїѧ до́мꙋ дв҃дова, к҃ѳ.

в҃. Вознесꙋ́ тѧ, гдⷭ҇и, ꙗ҆́кѡ под̾ѧ́лъ мѧ̀ є҆сѝ, и҆ не возвесели́лъ є҆сѝ врагѡ́въ мои́хъ ѡ҆ мнѣ̀.

г҃. Гдⷭ҇и бж҃е мо́й, воззва́хъ къ тебѣ̀, и҆ и҆сцѣли́лъ мѧ̀ є҆сѝ.

д҃. Гдⷭ҇и, возве́лъ є҆сѝ ѿ а҆́да дꙋ́шꙋ мою̀, сп҃слъ мѧ̀ є҆сѝ ѿ низходѧ́щихъ въ ро́въ.

є҃. По́йте гдⷭ҇еви, прпⷣбнїи є҆гѡ̀, и҆ и҆сповѣ́дайте па́мѧть ст҃ы́ни є҆гѡ̀:

ѕ҃. Ꙗ҆́кѡ гнѣ́въ въ ꙗ҆́рости є҆гѡ̀, и҆ живо́тъ въ во́ли є҆гѡ̀: ве́черъ водвори́тсѧ пла́чь, и҆ заꙋ́тра ра́дость.

з҃. А҆́зъ же рѣ́хъ во ѻ҆би́лїи мое́мъ: не подви́жꙋсѧ во вѣ́къ.

и҃. Гдⷭ҇и, во́лею твое́ю пода́ждь добро́тѣ мое́й си́лꙋ: ѿврати́лъ же є҆сѝ лицѐ твоѐ, и҆ бы́хъ смꙋще́нъ.

ѳ҃. Къ тебѣ̀, гдⷭ҇и, воззовꙋ̀, и҆ къ бг҃ꙋ моемꙋ̀ помолю́сѧ.

і҃. Ка́ѧ по́льза въ кро́ви мое́й, внегда̀ сходи́ти мѝ во и҆стлѣ́нїе; є҆да̀ и҆сповѣ́стсѧ тебѣ̀ пе́рсть; и҆лѝ возвѣсти́тъ и҆́стинꙋ твою̀;

а҃і. Слы́ша гдⷭ҇ь и҆ поми́лова мѧ̀: гдⷭ҇ь бы́сть помо́щникъ мо́й.

в҃і. Ѡ҆брати́лъ є҆сѝ пла́чь мо́й въ ра́дость мнѣ̀, растерза́лъ є҆сѝ вре́тище моѐ и҆ препоѧ́салъ мѧ̀ є҆сѝ весе́лїемъ,

г҃і. Ꙗ҆́кѡ да воспое́тъ тебѣ̀ сла́ва моѧ̀, и҆ не ᲂу҆милю́сѧ. Гдⷭ҇и бж҃е мо́й, во вѣ́къ и҆сповѣ́мсѧ тебѣ̀.

Сла́ва:

а҃. Въ коне́цъ, ѱало́мъ дв҃дꙋ, и҆зстꙋпле́нїѧ, л҃.

в҃. На тѧ̀, гдⷭ҇и, ᲂу҆пова́хъ, да не постыжꙋ́сѧ во вѣ́къ: пра́вдою твое́ю и҆зба́ви мѧ̀ и҆ и҆зми́ мѧ.

г҃. Приклонѝ ко мнѣ̀ ᲂу҆́хо твоѐ, ᲂу҆скорѝ и҆з̾ѧ́ти мѧ̀: бꙋ́ди мѝ въ бг҃а защи́тителѧ и҆ въ до́мъ прибѣ́жища, є҆́же сп҃сти́ мѧ.

д҃. Ꙗ҆́кѡ держа́ва моѧ̀ и҆ прибѣ́жище моѐ є҆сѝ ты̀: и҆ и҆́мене твоегѡ̀ ра́ди наста́виши мѧ̀ и҆ препита́еши мѧ̀.

є҃. И҆зведе́ши мѧ̀ ѿ сѣ́ти сеѧ̀, ю҆́же скры́ша мѝ: ꙗ҆́кѡ ты̀ є҆сѝ защи́титель мо́й, гдⷭ҇и.

ѕ҃. Въ рꙋ́цѣ твоѝ предложꙋ̀ дꙋ́хъ мо́й: и҆зба́вилъ мѧ̀ є҆сѝ, гдⷭ҇и бж҃е и҆́стины.

з҃. Возненави́дѣлъ є҆сѝ хранѧ́щыѧ сꙋєты̀ вотщѐ: а҆́зъ же на гдⷭ҇а ᲂу҆пова́хъ.

и҃. Возра́дꙋюсѧ и҆ возвеселю́сѧ ѡ҆ млⷭ҇ти твое́й, ꙗ҆́кѡ призрѣ́лъ є҆сѝ на смире́нїе моѐ, сп҃слъ є҆сѝ ѿ нꙋ́ждъ дꙋ́шꙋ мою̀

ѳ҃. И҆ нѣ́си менѐ затвори́лъ въ рꙋка́хъ вра́жїихъ, поста́вилъ є҆сѝ на простра́ннѣ но́зѣ моѝ.

і҃. Поми́лꙋй мѧ̀, гдⷭ҇и, ꙗ҆́кѡ скорблю̀: смѧте́сѧ ꙗ҆́ростїю ѻ҆́ко моѐ, дꙋша̀ моѧ̀ и҆ ᲂу҆тро́ба моѧ̀.

а҃і. Ꙗ҆́кѡ и҆счезѐ въ болѣ́зни живо́тъ мо́й, и҆ лѣ̑та моѧ̑ въ воздыха́нїихъ: и҆знемо́же нището́ю крѣ́пость моѧ̀, и҆ кѡ́сти моѧ̑ смѧто́шасѧ.

в҃і. Ѿ всѣ́хъ вра̑гъ мои́хъ бы́хъ поноше́нїе, и҆ сосѣ́дѡмъ мои̑мъ ѕѣлѡ̀, и҆ стра́хъ зна́ємымъ мои̑мъ: ви́дѧщїи мѧ̀ во́нъ бѣжа́ша ѿ менѐ.

г҃і. Забве́нъ бы́хъ ꙗ҆́кѡ ме́ртвъ ѿ се́рдца: бы́хъ ꙗ҆́кѡ сосꙋ́дъ погꙋбле́нъ.

д҃і. Ꙗ҆́кѡ слы́шахъ ꙾гажде́нїе꙾ ⁹ мно́гихъ живꙋ́щихъ ѡ҆́крестъ: внегда̀ собра́тисѧ и҆̀мъ вкꙋ́пѣ на мѧ̀, прїѧ́ти дꙋ́шꙋ мою̀ совѣща́ша.

є҃і. А҆́зъ же на тѧ̀, гдⷭ҇и, ᲂу҆пова́хъ, рѣ́хъ: ты̀ є҆сѝ бг҃ъ мо́й.

ѕ҃і. Въ рꙋкꙋ̀ твоє́ю жрє́бїи моѝ: и҆зба́ви мѧ̀ и҆з̾ рꙋкѝ вра̑гъ мои́хъ и҆ ѿ гонѧ́щихъ мѧ̀.

з҃і. Просвѣтѝ лицѐ твоѐ на раба̀ твоего̀: сп҃си́ мѧ млⷭ҇тїю твое́ю.

и҃і. Гдⷭ҇и, да не постыжꙋ́сѧ, ꙗ҆́кѡ призва́хъ тѧ̀: да постыдѧ́тсѧ нечести́вїи, и҆ сни́дꙋтъ во а҆́дъ.

ѳ҃і. Нѣ̑мы да бꙋ́дꙋтъ ᲂу҆стны̀ льсти̑выѧ, глаго́лющыѧ на првⷣнаго беззако́нїе, горды́нею и҆ ᲂу҆ничиже́нїемъ.

к҃. Ко́ль мно́гое мно́жество бл҃гости твоеѧ̀, гдⷭ҇и, ю҆́же скры́лъ є҆сѝ боѧ́щымсѧ тебє̀, содѣ́лалъ є҆сѝ ᲂу҆пова́ющымъ на тѧ̀, пред̾ сы́ны человѣ́ческими:

к҃а. Скры́еши и҆̀хъ въ та́йнѣ лица̀ твоегѡ̀ ѿ мѧте́жа человѣ́ческа, покры́еши и҆̀хъ въ кро́вѣ ѿ прерѣка́нїѧ ѧ҆зы̑къ.

к҃в. Бл҃гослове́нъ гдⷭ҇ь, ꙗ҆́кѡ ᲂу҆дивѝ млⷭ҇ть свою̀ во гра́дѣ ѡ҆гражде́нїѧ.

к҃г. А҆́зъ же рѣ́хъ во и҆зстꙋпле́нїи мое́мъ: ѿве́рженъ є҆́смь ѿ лица̀ ѻ҆́чїю твоє́ю: сегѡ̀ ра́ди ᲂу҆слы́шалъ є҆сѝ гла́съ моли́твы моеѧ̀, внегда̀ воззва́хъ къ тебѣ̀.

к҃д. Возлюби́те гдⷭ҇а, всѝ прпⷣбнїи є҆гѡ̀: ꙗ҆́кѡ и҆́стины взыска́етъ гдⷭ҇ь и҆ воздае́тъ и҆зли́ше творѧ́щымъ горды́ню.

к҃є. Мꙋжа́йтесѧ, и҆ да крѣпи́тсѧ се́рдце ва́ше, всѝ ᲂу҆пова́ющїи на гдⷭ҇а.

Ѱало́мъ дв҃дꙋ, ра́зꙋма, л҃а.

а҃. Бл҃же́ни, и҆́хже ѡ҆ста́вишасѧ беззакѡ́нїѧ, и҆ и҆́хже прикры́шасѧ грѣсѝ.

в҃. Бл҃же́нъ мꙋ́жъ, є҆мꙋ́же не вмѣни́тъ гдⷭ҇ь грѣха̀, нижѐ є҆́сть во ᲂу҆стѣ́хъ є҆гѡ̀ ле́сть.

г҃. Ꙗ҆́кѡ ᲂу҆молча́хъ, ѡ҆бетша́ша кѡ́сти моѧ̑, ѿ є҆́же зва́ти мѝ ве́сь де́нь,

д҃. Ꙗ҆́кѡ де́нь и҆ но́щь ѡ҆тѧготѣ̀ на мнѣ̀ рꙋка̀ твоѧ̀: возврати́хсѧ на стра́сть, є҆гда̀ ᲂу҆нзе́ ми те́рнъ.

є҃. Беззако́нїе моѐ позна́хъ и҆ грѣха̀ моегѡ̀ не покры́хъ, рѣ́хъ: и҆сповѣ́мъ на мѧ̀ беззако́нїе моѐ гдⷭ҇еви: и҆ ты̀ ѡ҆ста́вилъ є҆сѝ нече́стїе се́рдца моегѡ̀.

ѕ҃. За то̀ помо́литсѧ къ тебѣ̀ всѧ́къ прпⷣбный во вре́мѧ бл҃гопотре́бно: ѻ҆ба́че въ пото́пѣ во́дъ мно́гихъ къ немꙋ̀ не прибли́жатсѧ.

з҃. Ты̀ є҆сѝ прибѣ́жище моѐ ѿ ско́рби ѡ҆бдержа́щїѧ мѧ̀: ра́досте моѧ̀, и҆зба́ви мѧ̀ ѿ ѡ҆быше́дшихъ мѧ̀.

и҃. Вразꙋмлю́ тѧ, и҆ наста́влю тѧ̀ на пꙋ́ть се́й, во́ньже по́йдеши: ᲂу҆твержꙋ̀ на тѧ̀ ѻ҆́чи моѝ.

ѳ҃. Не бꙋ́дите ꙗ҆́кѡ ко́нь и҆ ме́скъ, и҆́мже нѣ́сть ра́зꙋма: брозда́ми и҆ ᲂу҆здо́ю чє́люсти и҆́хъ востѧ́гнеши, не приближа́ющихсѧ къ тебѣ̀.

і҃. Мнѡ́ги ра̑ны грѣ́шномꙋ: ᲂу҆пова́ющаго же на гдⷭ҇а млⷭ҇ть ѡ҆бы́детъ.

а҃і. Весели́тесѧ ѡ҆ гдⷭ҇ѣ и҆ ра́дꙋйтесѧ првⷣнїи, и҆ хвали́тесѧ, всѝ пра́вїи срⷣцемъ.

Сла́ва:

По д҃-й каѳі́смѣ, трист҃о́е.

Та́же тропарѝ, гла́съ з҃:

Смире́ннꙋю мою̀ дꙋ́шꙋ посѣтѝ гдⷭ҇и, во грѣсѣ́хъ всѐ житїѐ и҆жди́вшꙋю: и҆́мже ѡ҆́бразомъ блꙋдни́цꙋ прїимѝ и҆ менѐ, и҆ сп҃си́ мѧ.

Препла́ваѧ пꙋчи́нꙋ настоѧ́щагѡ житїѧ̀, помышлѧ́ю бе́зднꙋ мно́гихъ мои́хъ ѕѡ́лъ, и҆ не и҆мѣ́ѧй ѡ҆корми́телѧ помышле́нїй, петро́въ провѣщава́ю тѝ гла́съ: сп҃си́ мѧ хрⷭ҇тѐ, сп҃си́ мѧ бж҃е, ꙗ҆́кѡ чл҃вѣколю́бецъ.

Сла́ва: Ско́рѡ совни́демъ въ невѣ́стникъ хрⷭ҇то́въ, да всѝ ᲂу҆слы́шимъ бл҃же́нный гла́съ хрⷭ҇та̀ бг҃а на́шегѡ: прїиди́те лю́бѧщїи нбⷭ҇нꙋю сла́вꙋ, соприча̑стницы бы́вше мꙋ́дрыхъ дѣ́въ, ᲂу҆ѧсни́вше свѣщы̀ на́шѧ вѣ́рою.

И҆ ны́нѣ: Дꙋшѐ, пока́йсѧ пре́жде и҆схо́да твоегѡ̀, сꙋ́дъ неꙋмы́тенъ грѣ̑шнымъ є҆́сть, и҆ нестерпи́мый, возопі́й гдⷭ҇ꙋ во ᲂу҆миле́нїи се́рдца: согрѣши́хъ тѝ въ вѣ́дѣнїи и҆ не въ вѣ́дѣнїи, ще́дрый, мл҃твами бцⷣы ᲂу҆ще́дри, и҆ сп҃си́ мѧ.

Гдⷭ҇и поми́лꙋй, м҃. и҆ мл҃тва:

Тебѣ̀ гдⷭ҇и, є҆ди́номꙋ бл҃го́мꙋ и҆ непамѧтоѕло́бномꙋ и҆сповѣ́даю грѣхѝ моѧ̑, тебѣ̀ припа́даю вопїѧ̀ недосто́йный: согрѣши́хъ гдⷭ҇и, согрѣши́хъ, и҆ нѣ́смь досто́инъ воззрѣ́ти на высотꙋ̀ нбⷭ҇нꙋю ѿ мно́жества непра́вдъ мои́хъ. но гдⷭ҇и мо́й гдⷭ҇и, да́рꙋй мѝ сле́зы ᲂу҆миле́нїѧ, є҆ди́ный бл҃же и҆ млⷭ҇тивый, ꙗ҆́кѡ да и҆́ми тѧ̀ ᲂу҆молю̀, ѡ҆чи́ститисѧ пре́жде конца̀ ѿ всѧ́кагѡ грѣха̀: стра́шно бо и҆ гро́зно мѣ́сто и҆́мамъ проитѝ, тѣ́ла разлꙋчи́всѧ, и҆ мно́жество мѧ̀ мра́чное и҆ безчеловѣ́чное де́монѡвъ срѧ́щетъ, и҆ никто́же въ по́мощь спꙋ́тствꙋѧй, и҆лѝ и҆збавлѧ́ѧй. тѣ́мъ припа́даю твое́й бл҃гости, не преда́ждь ѡ҆би́дѧщымъ мѧ̀, нижѐ да похва́лѧтсѧ ѡ҆ мнѣ̀ вразѝ моѝ бл҃гі́й гдⷭ҇и, нижѐ да рекꙋ́тъ: въ рꙋ́ки на́шѧ прише́лъ є҆сѝ, и҆ на́мъ пре́данъ є҆сѝ. нѝ, гдⷭ҇и, не забꙋ́ди щедро́тъ твои́хъ, и҆ не возда́ждь мѝ по беззако́нїємъ мои̑мъ, и҆ не ѿвратѝ лица̀ твоегѡ̀ ѿ менѐ, но ты̀, гдⷭ҇и, накажи́ мѧ, ѻ҆ба́че млⷭ҇тїю и҆ щедро́тами: вра́гъ же мо́й да не возра́дꙋетсѧ ѡ҆ мнѣ̀, но ᲂу҆гасѝ є҆гѡ̀ на мѧ̀ прещє́нїѧ, и҆ всѐ ᲂу҆празднѝ є҆гѡ̀ дѣ́йство, и҆ да́ждь мѝ къ тебѣ̀ пꙋ́ть неꙋко́рный, бл҃гі́й гдⷭ҇и: зане́же и҆ согрѣши́въ не прибѣго́хъ ко и҆но́мꙋ врачꙋ̀, и҆ не простро́хъ рꙋкѝ моеѧ̀ къ бо́гꙋ чꙋжде́мꙋ. не ѿри́ни ᲂу҆́бѡ моле́нїѧ моегѡ̀, но ᲂу҆слы́ши мѧ̀ твое́ю бл҃гостїю, и҆ ᲂу҆твердѝ моѐ се́рдце стра́хомъ твои́мъ, и҆ да бꙋ́детъ бл҃года́ть твоѧ̀ на мнѣ̀ гдⷭ҇и, ꙗ҆́кѡ ѻ҆́гнь попалѧ́ѧй нечи̑стыѧ во мнѣ̀ по́мыслы. ты́ бо є҆сѝ, гдⷭ҇и, свѣ́тъ па́че всѧ́кагѡ свѣ́та: ра́дость па́че всѧ́кїѧ ра́дости, ᲂу҆покое́нїе па́че всѧ́кагѡ ᲂу҆покое́нїѧ: жи́знь и҆́стиннаѧ, и҆ сп҃се́нїе, пребыва́ющее во вѣ́ки вѣкѡ́въ, а҆ми́нь.

Ѱало́мъ дв҃дꙋ, не надпи́санъ ᲂу҆ є҆врє́й, л҃в.

а҃. Ра́дꙋйтесѧ, првⷣнїи, ѡ҆ гдⷭ҇ѣ: пра̑вымъ подоба́етъ похвала̀.

в҃. И҆сповѣ́дайтесѧ гдⷭ҇еви въ гꙋ́слехъ, во ѱалти́ри десѧтострꙋ́ннѣмъ по́йте є҆мꙋ̀:

г҃. Воспо́йте є҆мꙋ̀ пѣ́снь но́вꙋ, до́брѣ по́йте є҆мꙋ̀ со восклица́нїемъ:

д҃. Ꙗ҆́кѡ пра́во сло́во гдⷭ҇не, и҆ всѧ̑ дѣла̀ є҆гѡ̀ въ вѣ́рѣ.

є҃. Лю́битъ млⷭ҇тыню и҆ сꙋ́дъ гдⷭ҇ь, млⷭ҇ти гдⷭ҇ни и҆спо́лнь землѧ̀.

ѕ҃. Сло́вомъ гдⷭ҇нимъ небеса̀ ᲂу҆тверди́шасѧ, и҆ дх҃омъ ᲂу҆́стъ є҆гѡ̀ всѧ̀ си́ла и҆́хъ:

з҃. Собира́ѧй ꙗ҆́кѡ мѣ́хъ во́ды морскі̑ѧ, полага́ѧй въ сокро́вищихъ бе́здны.

и҃. Да ᲂу҆бои́тсѧ гдⷭ҇а всѧ̀ землѧ̀, ѿ негѡ́же да подви́жꙋтсѧ всѝ живꙋ́щїи по вселе́ннѣй:

ѳ҃. Ꙗ҆́кѡ то́й речѐ, и҆ бы́ша: то́й повелѣ̀, и҆ созда́шасѧ.

і҃. Гдⷭ҇ь разорѧ́етъ совѣ́ты ꙗ҆зы́кѡвъ, ѿмета́етъ же мы̑сли люде́й и҆ ѿмета́етъ совѣ́ты кнѧзе́й.

а҃і. Совѣ́тъ же гдⷭ҇ень во вѣ́къ пребыва́етъ, помышлє́нїѧ срⷣца є҆гѡ̀ въ ро́дъ и҆ ро́дъ.

в҃і. Бл҃же́нъ ꙗ҆зы́къ, є҆мꙋ́же є҆́сть гдⷭ҇ь бг҃ъ є҆гѡ̀, лю́дїе, ꙗ҆̀же и҆збра̀ въ наслѣ́дїе себѣ̀.

г҃і. Съ нб҃сѐ призрѣ̀ гдⷭ҇ь, ви́дѣ всѧ̑ сы́ны человѣ́чєскїѧ:

д҃і. Ѿ гото́вагѡ жили́ща своегѡ̀ призрѣ̀ на всѧ̑ живꙋ́щыѧ на землѝ:

є҃і. Созда́вый на є҆ди́нѣ сердца̀ и҆́хъ, разꙋмѣва́ѧй на всѧ̑ дѣла̀ и҆́хъ.

ѕ҃і. Не спаса́етсѧ ца́рь мно́гою си́лою, и҆ и҆споли́нъ не спасе́тсѧ мно́жествомъ крѣ́пости своеѧ̀.

з҃і. Ло́жь ко́нь во спасе́нїе, во мно́жествѣ же си́лы своеѧ̀ не спасе́тсѧ.

и҃і. Сѐ, ѻ҆́чи гдⷭ҇ни на боѧ́щыѧсѧ є҆гѡ̀, ᲂу҆пова́ющыѧ на млⷭ҇ть є҆гѡ̀:

ѳ҃і. И҆зба́вити ѿ сме́рти дꙋ́шы и҆́хъ, и҆ препита́ти ѧ҆̀ въ гла́дъ.

к҃. Дꙋша́ же на́ша ча́етъ гдⷭ҇а, ꙗ҆́кѡ помо́щникъ и҆ защи́титель на́шъ є҆́сть:

к҃а. Ꙗ҆́кѡ ѡ҆ не́мъ возвесели́тсѧ се́рдце на́ше, и҆ во и҆́мѧ ст҃о́е є҆гѡ̀ ᲂу҆пова́хомъ.

к҃в. Бꙋ́ди, гдⷭ҇и, млⷭ҇ть твоѧ̀ на на́съ, ꙗ҆́коже ᲂу҆пова́хомъ на тѧ̀.

а҃. Ѱало́мъ дв҃дꙋ, внегда̀ и҆змѣнѝ лицѐ своѐ пред̾ а҆вїмеле́хомъ: и҆ ѿпꙋстѝ є҆го̀, и҆ ѿи́де, л҃г.

в҃. Бл҃гословлю̀ гдⷭ҇а на всѧ́кое вре́мѧ, вы́нꙋ хвала̀ є҆гѡ̀ во ᲂу҆стѣ́хъ мои́хъ.

г҃. Ѡ҆ гдⷭ҇ѣ похва́литсѧ дꙋша̀ моѧ̀: да ᲂу҆слы́шатъ кро́тцыи и҆ возвеселѧ́тсѧ.

д҃. Возвели́чите гдⷭ҇а со мно́ю, и҆ вознесе́мъ и҆́мѧ є҆гѡ̀ вкꙋ́пѣ.

є҃. Взыска́хъ гдⷭ҇а, и҆ ᲂу҆слы́ша мѧ̀ и҆ ѿ всѣ́хъ скорбе́й мои́хъ и҆зба́ви мѧ̀.

ѕ҃. Пристꙋпи́те къ немꙋ̀ и҆ просвѣти́тесѧ, и҆ ли́ца ва̑ша не постыдѧ́тсѧ.

з҃. Се́й ни́щїй воззва̀, и҆ гдⷭ҇ь ᲂу҆слы́ша и҆̀, и҆ ѿ всѣ́хъ скорбе́й є҆гѡ̀ сп҃сѐ и҆̀.

и҃. Ѡ҆полчи́тсѧ а҆́гг҃лъ гдⷭ҇ень ѡ҆́крестъ боѧ́щихсѧ є҆гѡ̀ и҆ и҆зба́витъ и҆̀хъ.

ѳ҃. Вкꙋси́те и҆ ви́дите, ꙗ҆́кѡ бл҃гъ гдⷭ҇ь: бл҃же́нъ мꙋ́жъ, и҆́же ᲂу҆пова́етъ на́нь.

і҃. Бо́йтесѧ гдⷭ҇а, всѝ ст҃і́и є҆гѡ̀, ꙗ҆́кѡ нѣ́сть лише́нїѧ боѧ́щымсѧ є҆гѡ̀.

а҃і. Бога́тїи ѡ҆бнища́ша и҆ взалка́ша: взыска́ющїи же гдⷭ҇а не лиша́тсѧ всѧ́кагѡ бла́га.

в҃і. Прїиди́те, ча̑да, послꙋ́шайте менѐ, стра́хꙋ гдⷭ҇ню наꙋчꙋ̀ ва́съ.

г҃і. Кто́ є҆сть человѣ́къ хотѧ́й живо́тъ, любѧ́й дни̑ ви́дѣти бла́ги;

д҃і. Оу҆держѝ ѧ҆зы́къ тво́й ѿ ѕла̀ и҆ ᲂу҆стнѣ̀ твоѝ, є҆́же не глаго́лати льстѝ.

є҃і. Оу҆клони́сѧ ѿ ѕла̀ и҆ сотворѝ бла́го: взыщѝ ми́ра и҆ поженѝ и҆̀.

ѕ҃і. Ѻ҆́чи гдⷭ҇ни на првⷣныѧ, и҆ ᲂу҆́ши є҆гѡ̀ въ моли́твꙋ и҆́хъ.

з҃і. Лице́ же гдⷭ҇не на творѧ́щыѧ ѕла̑ѧ, є҆́же потреби́ти ѿ землѝ па́мѧть и҆́хъ.

и҃і. Воззва́ша првⷣнїи, и҆ гдⷭ҇ь ᲂу҆слы́ша и҆̀хъ и҆ ѿ всѣ́хъ скорбе́й и҆́хъ и҆зба́ви и҆̀хъ.

ѳ҃і. Бли́з̾ гдⷭ҇ь сокрꙋше́нныхъ се́рдцемъ, и҆ смирє́нныѧ дꙋ́хомъ сп҃се́тъ.

к҃. Мнѡ́ги скѡ́рби првⷣнымъ, и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь.

к҃а. Храни́тъ гдⷭ҇ь всѧ̑ кѡ́сти и҆́хъ, ни є҆ди́на ѿ ни́хъ сокрꙋши́тсѧ.

к҃в. Сме́рть грѣ́шникѡвъ люта̀, и҆ ненави́дѧщїи првⷣнаго прегрѣша́тъ.

к҃г. И҆зба́витъ гдⷭ҇ь дꙋ́шы ра̑бъ свои́хъ, и҆ не прегрѣша́тъ всѝ ᲂу҆пова́ющїи на него̀.

Сла́ва:

Ѱало́мъ дв҃дꙋ, л҃д.

а҃. Сꙋдѝ, гдⷭ҇и, ѡ҆би́дѧщыѧ мѧ̀, поборѝ борю́щыѧ мѧ̀.

в҃. Прїимѝ ѻ҆рꙋ́жїе и҆ щи́тъ и҆ воста́ни въ по́мощь мою̀:

г҃. И҆зсꙋ́ни ме́чь и҆ заключѝ сопроти́въ гонѧ́щихъ мѧ̀: рцы̀ дꙋшѝ мое́й: сп҃се́нїе твоѐ є҆́смь а҆́зъ.

д҃. Да постыдѧ́тсѧ и҆ посра́мѧтсѧ и҆́щꙋщїи дꙋ́шꙋ мою̀, да возвратѧ́тсѧ вспѧ́ть и҆ постыдѧ́тсѧ мы́слѧщїи мѝ ѕла̑ѧ.

є҃. Да бꙋ́дꙋтъ ꙗ҆́кѡ пра́хъ пред̾ лице́мъ вѣ́тра, и҆ а҆́гг҃лъ гдⷭ҇ень ѡ҆скорблѧ́ѧ и҆̀хъ:

ѕ҃. Да бꙋ́детъ пꙋ́ть и҆́хъ тма̀ и҆ по́лзокъ, и҆ а҆́гг҃лъ гдⷭ҇ень погонѧ́ѧй и҆̀хъ:

з҃. Ꙗ҆́кѡ тꙋ́не скры́ша мѝ па́гꙋбꙋ сѣ́ти своеѧ̀, всꙋ́е поноси́ша дꙋшѝ мое́й.

и҃. Да прїи́детъ є҆мꙋ̀ сѣ́ть, ю҆́же не вѣ́сть, и҆ лови́тва, ю҆́же скры̀, да ѡ҆б̾и́метъ и҆̀, и҆ въ сѣ́ть да впаде́тъ въ ню̀.

ѳ҃. Дꙋша́ же моѧ̀ возра́дꙋетсѧ ѡ҆ гдⷭ҇ѣ, возвесели́тсѧ ѡ҆ сп҃се́нїи є҆гѡ̀.

і҃. Всѧ̑ кѡ́сти моѧ̑ рекꙋ́тъ: гдⷭ҇и, гдⷭ҇и, кто̀ подо́бенъ тебѣ̀; и҆збавлѧ́ѧй ни́ща и҆з̾ рꙋкѝ крѣ́пльшихъ є҆гѡ̀, и҆ ни́ща, и҆ ᲂу҆бо́га ѿ расхища́ющихъ є҆го̀.

а҃і. Воста́вше на мѧ̀ свидѣ́телє непра́веднїи, ꙗ҆̀же не вѣ́дѧхъ, вопроша́хꙋ мѧ̀.

в҃і. Возда́ша мѝ лꙋка̑ваѧ воз̾ бл҃га̑ѧ, и҆ безча́дїе дꙋшѝ мое́й.

г҃і. А҆́зъ же, внегда̀ ѻ҆нѝ стꙋжа́хꙋ мѝ, ѡ҆блача́хсѧ во вре́тище и҆ смирѧ́хъ посто́мъ дꙋ́шꙋ мою̀, и҆ моли́тва моѧ̀ въ нѣ́дро моѐ возврати́тсѧ.

д҃і. Ꙗ҆́кѡ бли́жнемꙋ, ꙗ҆́кѡ бра́тꙋ на́шемꙋ, та́кѡ ᲂу҆гожда́хъ: ꙗ҆́кѡ пла́чѧ и҆ сѣ́тꙋѧ, та́кѡ смирѧ́хсѧ.

є҃і. И҆ на мѧ̀ возвесели́шасѧ и҆ собра́шасѧ: собра́шасѧ на мѧ̀ ра̑ны, и҆ не позна́хъ: раздѣли́шасѧ, и҆ не ᲂу҆мили́шасѧ.

ѕ҃і. И҆скꙋси́ша мѧ̀, подражни́ша мѧ̀ подражне́нїемъ, поскрежета́ша на мѧ̀ зꙋбы̀ свои́ми.

з҃і. Гдⷭ҇и, когда̀ ᲂу҆́зриши; ᲂу҆стро́й дꙋ́шꙋ мою̀ ѿ ѕлодѣ́йства и҆́хъ, ѿ лє́въ є҆диноро́днꙋю мою̀.

и҃і. И҆сповѣ́мсѧ тебѣ̀ въ цр҃кви мно́зѣ, въ лю́дехъ тѧ́жцѣхъ восхвалю́ тѧ.

ѳ҃і. Да не возра́дꙋютсѧ ѡ҆ мнѣ̀ враждꙋ́ющїи мѝ непра́веднѡ, ненави́дѧщїи мѧ̀ тꙋ́не и҆ помиза́ющїи ѻ҆чи́ма:

к҃. Ꙗ҆́кѡ мнѣ̀ ᲂу҆́бѡ ми̑рнаѧ глаго́лахꙋ, и҆ на гнѣ́въ лє́сти помышлѧ́хꙋ.

к҃а. Разшири́ша на мѧ̀ ᲂу҆ста̀ своѧ̑, рѣ́ша: бла́гоже, бла́гоже, ви́дѣша ѻ҆́чи на́ши.

к҃в. Ви́дѣлъ є҆сѝ, гдⷭ҇и, да не премолчи́ши: гдⷭ҇и, не ѿстꙋпѝ ѿ менѐ.

к҃г. Воста́ни, гдⷭ҇и, и҆ вонмѝ сꙋдꙋ̀ моемꙋ̀, бж҃е мо́й и҆ гдⷭ҇и мо́й, на прю̀ мою̀.

к҃д. Сꙋди́ ми, гдⷭ҇и, по пра́вдѣ твое́й, гдⷭ҇и бж҃е мо́й, и҆ да не возра́дꙋютсѧ ѡ҆ мнѣ̀.

к҃є. Да не рекꙋ́тъ въ сердца́хъ свои́хъ: бла́гоже, бла́гоже дꙋшѝ на́шей: нижѐ да рекꙋ́тъ: пожро́хомъ є҆го̀.

к҃ѕ. Да постыдѧ́тсѧ и҆ посра́мѧтсѧ вкꙋ́пѣ ра́дꙋющїисѧ ѕлѡ́мъ мои̑мъ: да ѡ҆блекꙋ́тсѧ въ стꙋ́дъ и҆ сра́мъ велерѣ́чꙋющїи на мѧ̀.

к҃з. Да возра́дꙋютсѧ и҆ возвеселѧ́тсѧ хотѧ́щїи пра́вды моеѧ̀: и҆ да рекꙋ́тъ вы́нꙋ, да возвели́читсѧ гдⷭ҇ь, хотѧ́щїи ми́ра рабꙋ̀ є҆гѡ̀.

к҃и. И҆ ѧ҆зы́къ мо́й поꙋчи́тсѧ пра́вдѣ твое́й, ве́сь де́нь хвалѣ̀ твое́й.

а҃. Въ коне́цъ, ѻ҆́трокꙋ гдⷭ҇ню дв҃дꙋ, л҃є.

в҃. Глаго́летъ пребеззако́нный согрѣша́ти въ себѣ̀: нѣ́сть стра́ха бж҃їѧ пред̾ ѻ҆чи́ма є҆гѡ̀:

г҃. Ꙗ҆́кѡ ᲂу҆льстѝ пред̾ ни́мъ ѡ҆брѣстѝ беззако́нїе своѐ, и҆ возненави́дѣти.

д҃. Глаго́лы ᲂу҆́стъ є҆гѡ̀ беззако́нїе и҆ ле́сть: не восхотѣ̀ разꙋмѣ́ти є҆́же ᲂу҆блажи́ти.

є҃. Беззако́нїе помы́сли на ло́жи свое́мъ: предста̀ всѧ́комꙋ пꙋтѝ небла́гꙋ, ѡ҆ ѕло́бѣ же не негодова̀.

ѕ҃. Гдⷭ҇и, на нб҃сѝ млⷭ҇ть твоѧ̀, и҆ и҆́стина твоѧ̀ до ѻ҆́блакъ:

з҃. Пра́вда твоѧ̀ ꙗ҆́кѡ го́ры бж҃їѧ, сꙋдьбы̑ твоѧ̑ бе́здна мно́га: человѣ́ки и҆ скоты̀ сп҃се́ши, гдⷭ҇и.

и҃. Ꙗ҆́кѡ ᲂу҆мно́жилъ є҆сѝ млⷭ҇ть твою̀, бж҃е: сы́нове же человѣ́честїи въ кро́вѣ крилꙋ̑ твоє́ю надѣ́ѧтисѧ и҆́мꙋтъ.

ѳ҃. Оу҆пїю́тсѧ ѿ тꙋ́ка до́мꙋ твоегѡ̀, и҆ пото́комъ сла́дости твоеѧ̀ напои́ши ѧ҆̀.

і҃. Ꙗ҆́кѡ ᲂу҆ тебє̀ и҆сто́чникъ живота̀, во свѣ́тѣ твое́мъ ᲂу҆́зримъ свѣ́тъ.

а҃і. Проба́ви млⷭ҇ть твою̀ вѣ́дꙋщымъ тѧ̀ и҆ пра́вдꙋ твою̀ пра̑вымъ се́рдцемъ.

в҃і. Да не прїи́детъ мнѣ̀ нога̀ горды́ни, и҆ рꙋка̀ грѣ́шнича да не подви́житъ менѐ.

г҃і. Та́мѡ падо́ша всѝ дѣ́лающїи беззако́нїе: и҆зринове́ни бы́ша, и҆ не возмо́гꙋтъ ста́ти.

Сла́ва:

Ѱало́мъ дв҃дꙋ, л҃ѕ.

а҃. Не ревнꙋ́й лꙋка́внꙋющымъ, нижѐ зави́ди творѧ́щымъ беззако́нїе.

в҃. Занѐ ꙗ҆́кѡ трава̀ ско́рѡ и҆́зсшꙋтъ, и҆ ꙗ҆́кѡ ѕе́лїе ѕла́ка ско́рѡ ѿпадꙋ́тъ.

г҃. Оу҆пова́й на гдⷭ҇а и҆ творѝ бл҃госты́ню: и҆ населѝ зе́млю, и҆ ᲂу҆пасе́шисѧ въ бога́тствѣ є҆ѧ̀.

д҃. Наслади́сѧ гдⷭ҇еви, и҆ да́стъ тѝ прошє́нїѧ се́рдца твоегѡ̀.

є҃. Ѿкры́й ко гдⷭ҇ꙋ пꙋ́ть тво́й и҆ ᲂу҆пова́й на него̀, и҆ то́й сотвори́тъ.

ѕ҃. И҆ и҆зведе́тъ ꙗ҆́кѡ свѣ́тъ пра́вдꙋ твою̀ и҆ сꙋдьбꙋ̀ твою̀ ꙗ҆́кѡ полꙋ́дне.

з҃. Повини́сѧ гдⷭ҇еви и҆ ᲂу҆молѝ є҆го̀. Не ревнꙋ́й спѣ́ющемꙋ въ пꙋтѝ свое́мъ, человѣ́кꙋ творѧ́щемꙋ законопрестꙋпле́нїе.

и҃. Преста́ни ѿ гнѣ́ва и҆ ѡ҆ста́ви ꙗ҆́рость: не ревнꙋ́й, є҆́же лꙋка́вновати,

ѳ҃. Занѐ лꙋка́внꙋющїи потребѧ́тсѧ, терпѧ́щїи же гдⷭ҇а, ті́и наслѣ́дѧтъ зе́млю.

і҃. И҆ є҆щѐ ма́лѡ, и҆ не бꙋ́детъ грѣ́шника: и҆ взы́щеши мѣ́сто є҆гѡ̀ и҆ не ѡ҆брѧ́щеши.

а҃і. Кро́тцыи же наслѣ́дѧтъ зе́млю и҆ насладѧ́тсѧ ѡ҆ мно́жествѣ ми́ра.

в҃і. Назира́етъ грѣ́шный првⷣнаго и҆ поскреже́щетъ на́нь зꙋбы̀ свои́ми:

г҃і. Гдⷭ҇ь же посмѣе́тсѧ є҆мꙋ̀, занѐ прозира́етъ, ꙗ҆́кѡ прїи́детъ де́нь є҆гѡ̀.

д҃і. Ме́чь и҆звлеко́ша грѣ̑шницы, напрѧго́ша лꙋ́къ сво́й, низложи́ти ᲂу҆бо́га и҆ ни́ща, закла́ти пра̑выѧ се́рдцемъ.

є҃і. Ме́чь и҆́хъ да вни́детъ въ сердца̀ и҆́хъ, и҆ лꙋ́цы и҆́хъ да сокрꙋша́тсѧ.

ѕ҃і. Лꙋ́чше ма́лое првⷣникꙋ, па́че бога́тства грѣ́шныхъ мно́га.

з҃і. Занѐ мы̑шцы грѣ́шныхъ сокрꙋша́тсѧ, ᲂу҆твержда́етъ же првⷣныѧ гдⷭ҇ь.

и҃і. Вѣ́сть гдⷭ҇ь пꙋти̑ непоро́чныхъ, и҆ достоѧ́нїе и҆́хъ въ вѣ́къ бꙋ́детъ.

ѳ҃і. Не постыдѧ́тсѧ во вре́мѧ лю́тое и҆ во дне́хъ гла́да насы́тѧтсѧ, ꙗ҆́кѡ грѣ̑шницы поги́бнꙋтъ.

к҃. Врази́ же гдⷭ҇ни, кꙋ́пнѡ просла́витисѧ и҆̀мъ и҆ вознести́сѧ, и҆счеза́юще ꙗ҆́кѡ ды́мъ и҆счезо́ша.

к҃а. Зае́млетъ грѣ́шный и҆ не возврати́тъ: првⷣный же ще́дритъ и҆ дае́тъ.

к҃в. Ꙗ҆́кѡ бл҃гословѧ́щїи є҆го̀ наслѣ́дѧтъ зе́млю, кленꙋ́щїи же є҆го̀ потребѧ́тсѧ.

к҃г. Ѿ гдⷭ҇а стѡпы̀ человѣ́кꙋ и҆справлѧ́ютсѧ, и҆ пꙋтѝ є҆гѡ̀ восхо́щетъ ѕѣлѡ̀.

к҃д. Є҆гда̀ паде́тъ, не разбїе́тсѧ, ꙗ҆́кѡ гдⷭ҇ь подкрѣплѧ́етъ рꙋ́кꙋ є҆гѡ̀.

к҃є. Ю҆нѣ́йшїй бы́хъ, и҆́бо состарѣ́хсѧ, и҆ не ви́дѣхъ првⷣника ѡ҆ста́влена, нижѐ сѣ́мене є҆гѡ̀ просѧ́ща хлѣ́бы.

к҃ѕ. Ве́сь де́нь ми́лꙋетъ и҆ взаи́мъ дае́тъ првⷣный, и҆ сѣ́мѧ є҆гѡ̀ во бл҃гослове́нїе бꙋ́детъ.

к҃з. Оу҆клони́сѧ ѿ ѕла̀ и҆ сотворѝ бл҃го, и҆ всели́сѧ въ вѣ́къ вѣ́ка.

к҃и. Ꙗ҆́кѡ гдⷭ҇ь лю́битъ сꙋ́дъ и҆ не ѡ҆ста́витъ прпⷣбныхъ свои́хъ: во вѣ́къ сохранѧ́тсѧ: беззакѡ́нницы же и҆зженꙋ́тсѧ, и҆ сѣ́мѧ нечести́выхъ потреби́тсѧ.

к҃ѳ. Првⷣницы же наслѣ́дѧтъ зе́млю и҆ вселѧ́тсѧ въ вѣ́къ вѣ́ка на не́й.

л҃. Оу҆ста̀ првⷣнагѡ поꙋча́тсѧ премⷣрости, и҆ ѧ҆зы́къ є҆гѡ̀ возглаго́летъ сꙋ́дъ.

л҃а. Зако́нъ бг҃а є҆гѡ̀ се́рдцы є҆гѡ̀, и҆ не за́пнꙋтсѧ стѡпы̀ є҆гѡ̀.

л҃в. Сматрѧ́етъ грѣ́шный првⷣнаго и҆ и҆́щетъ є҆́же ᲂу҆мертви́ти є҆го̀:

л҃г. Гдⷭ҇ь же не ѡ҆ста́витъ є҆гѡ̀ въ рꙋкꙋ̀ є҆гѡ̀, нижѐ ѡ҆сꙋ́дитъ є҆го̀, є҆гда̀ сꙋ́дитъ є҆мꙋ̀.

л҃д. Потерпѝ гдⷭ҇а и҆ сохранѝ пꙋ́ть є҆гѡ̀, и҆ вознесе́тъ тѧ̀ є҆́же наслѣ́дити зе́млю: внегда̀ потреблѧ́тисѧ грѣ́шникѡмъ, ᲂу҆́зриши.

л҃є. Ви́дѣхъ нечести́ваго превозносѧ́щасѧ и҆ вы́сѧщасѧ ꙗ҆́кѡ ке́дры лїва̑нскїѧ:

л҃ѕ. И҆ ми́мѡ и҆до́хъ, и҆ сѐ, не бѣ̀, и҆ взыска́хъ є҆го̀, и҆ не ѡ҆брѣ́тесѧ мѣ́сто є҆гѡ̀.

л҃з. Хранѝ неѕло́бїе и҆ ви́ждь правотꙋ̀, ꙗ҆́кѡ є҆́сть ѡ҆ста́нокъ человѣ́кꙋ ми́рнꙋ.

л҃и. Беззакѡ́нницы же потребѧ́тсѧ вкꙋ́пѣ: ѡ҆ста́нцы же нечести́выхъ потребѧ́тсѧ.

л҃ѳ. Сп҃се́нїе же првⷣныхъ ѿ гдⷭ҇а, и҆ защи́титель и҆́хъ є҆́сть во вре́мѧ ско́рби:

м҃. И҆ помо́жетъ и҆̀мъ гдⷭ҇ь и҆ и҆зба́витъ и҆̀хъ, и҆ и҆́зметъ и҆̀хъ ѿ грѣ̑шникъ и҆ сп҃се́тъ и҆̀хъ, ꙗ҆́кѡ ᲂу҆пова́ша на него̀.

Сла́ва:

По є҃-й каѳі́смѣ, трист҃о́е.

Та́же тропарѝ, гла́съ є҃:

Стра́шный тво́й прⷭ҇то́лъ, лꙋка́вое моѐ житїѐ, и҆ кто́ мѧ и҆зба́витъ тогда́шнїѧ нꙋ́жды, а҆́ще не ты̀ поми́лꙋеши мѧ̀ хрⷭ҇тѐ бж҃е, ꙗ҆́кѡ ще́дръ и҆ чл҃вѣколю́бецъ;

Сла́ва: Попече́нїе житїѧ̀ и҆згна́ мѧ раѧ̀, и҆ что̀ сотворю̀ ѿча́ѧнный; сегѡ̀ ра́ди толкꙋ̀ во врата̀ и҆ зовꙋ̀: гдⷭ҇и гдⷭ҇и, ѿве́рзи мѝ покаѧ́нїемъ, и҆ сп҃си́ мѧ.

И҆ ны́нѣ: Кі́й нарече́мъ хра́мъ тво́й, бцⷣе: приста́нище ли дх҃о́вное; и҆лѝ ра́й сла́дости нбⷭ҇ныѧ, хода́тайственъ жи́зни неконча́емыѧ; всѧ̑ бо и҆́маши дѡ́браѧ. всегда̀ моли́сѧ хрⷭ҇тꙋ̀, спасти́сѧ дꙋша́мъ на́шымъ.

Гдⷭ҇и поми́лꙋй, м҃. и҆ мл҃тва:

Бж҃е првⷣный и҆ хва́льный, бж҃е вели́кїй и҆ крѣ́пкїй, бж҃е превѣ́чный, ᲂу҆слы́ши грѣ́шнагѡ мꙋ́жа мл҃твꙋ въ ча́съ се́й: ᲂу҆слы́ши мѧ̀, ѡ҆бѣща́вый ᲂу҆слы́шати во и҆́стинѣ тѧ̀ призыва́ющихъ, и҆ не ѡ҆мерзи́ мѧ нечи̑стыѧ ᲂу҆стнѣ̀ и҆мꙋ́ща, и҆ во грѣсѣ́хъ содержи́ма, ᲂу҆пова́нїе всѣ́хъ концє́въ землѝ, и҆ стра́нствꙋющихъ дале́че. прїимѝ ѻ҆рꙋ́жїе и҆ щи́тъ, и҆ воста́ни въ по́мощь мою̀, и҆зле́й ме́чь, и҆ заключѝ сопроти́въ гонѧ́щихъ мѧ̀: запретѝ нечи̑стымъ дꙋховѡ́мъ ѿ лица̀ безꙋ́мїѧ моегѡ̀, и҆ да ѿлꙋчи́тсѧ ѿ моеѧ̀ мы́сли дꙋ́хъ не́нависти, и҆ ѕлопомнѣ́нїѧ, дꙋ́хъ за́висти и҆ ле́сти, дꙋ́хъ боѧ́зни и҆ ᲂу҆ны́нїѧ, дꙋ́хъ го́рдости и҆ всѧ́кїѧ и҆ны́ѧ ѕло́бы: и҆ да ᲂу҆га́снетъ всѧ́кое разжже́нїе и҆ движе́нїе пло́ти моеѧ̀, ѿ дїа́вольскагѡ дѣ́йства составлѧ́емое, и҆ да просвѣти́тсѧ моѧ̀ дꙋша̀, и҆ тѣ́ло, и҆ дꙋ́хъ свѣ́томъ твоегѡ̀ бж҃е́ственнагѡ позна́нїѧ, да мно́жествомъ щедро́тъ твои́хъ дости́гнꙋ соедине́нїѧ вѣ́ры, въ мꙋ́жа соверше́нна, въ мѣ́рꙋ во́зраста, и҆ просла́влю со а҆́гг҃лы, и҆ всѣ́ми ст҃ы́ми твои́ми, всечⷭ҇тно́е и҆ великолѣ́пое и҆́мѧ твоѐ, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

а҃. Ѱало́мъ дв҃дꙋ, въ воспомина́нїе ѡ҆ сꙋббѡ́тѣ, л҃з.

в҃. Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ:

г҃. Ꙗ҆́кѡ стрѣ́лы твоѧ̑ ᲂу҆нзо́ша во мнѣ̀, и҆ ᲂу҆тверди́лъ є҆сѝ на мнѣ̀ рꙋ́кꙋ твою̀.

д҃. Нѣ́сть и҆сцѣле́нїѧ въ пло́ти мое́й ѿ лица̀ гнѣ́ва твоегѡ̀, нѣ́сть ми́ра въ косте́хъ мои́хъ ѿ лица̀ грѣ̑хъ мои́хъ.

є҃. Ꙗ҆́кѡ беззакѡ́нїѧ моѧ̑ превзыдо́ша главꙋ̀ мою̀, ꙗ҆́кѡ бре́мѧ тѧ́жкое ѡ҆тѧготѣ́ша на мнѣ̀.

ѕ҃. Возсмердѣ́ша и҆ согни́ша ра̑ны моѧ̑, ѿ лица̀ безꙋ́мїѧ моегѡ̀.

з҃. Пострада́хъ и҆ слѧко́хсѧ до конца̀, ве́сь де́нь сѣ́тꙋѧ хожда́хъ:

и҃. Ꙗ҆́кѡ лѧ̑двїѧ моѧ̑ напо́лнишасѧ порꙋга́нїй, и҆ нѣ́сть и҆сцѣле́нїѧ въ пло́ти мое́й.

ѳ҃. Ѡ҆ѕло́бленъ бы́хъ и҆ смири́хсѧ до ѕѣла̀, рыка́хъ ѿ воздыха́нїѧ се́рдца моегѡ̀.

і҃. Гдⷭ҇и, пред̾ тобо́ю всѐ жела́нїе моѐ, и҆ воздыха́нїе моѐ ѿ тебє̀ не ᲂу҆таи́сѧ.

а҃і. Се́рдце моѐ смѧте́сѧ, ѡ҆ста́ви мѧ̀ си́ла моѧ̀, и҆ свѣ́тъ ѻ҆́чїю моє́ю, и҆ то́й нѣ́сть со мно́ю.

в҃і. Дрꙋ́зи моѝ и҆ и҆́скреннїи моѝ прѧ́мѡ мнѣ̀ прибли́жишасѧ и҆ ста́ша.

г҃і. И҆ бли́жнїи моѝ ѿдале́че менѐ ста́ша, и҆ нꙋжда́хꙋсѧ и҆́щꙋщїи дꙋ́шꙋ мою̀: и҆ и҆́щꙋщїи ѕла̑ѧ мнѣ̀ глаго́лахꙋ сꙋ́єтнаѧ, и҆ льсти̑внымъ ве́сь де́нь поꙋча́хꙋсѧ.

д҃і. А҆́зъ же ꙗ҆́кѡ глꙋ́хъ не слы́шахъ, и҆ ꙗ҆́кѡ нѣ́мъ не ѿверза́ѧй ᲂу҆́стъ свои́хъ:

є҃і. И҆ бы́хъ ꙗ҆́кѡ человѣ́къ не слы́шай и҆ не и҆мы́й во ᲂу҆стѣ́хъ свои́хъ ѡ҆бличе́нїѧ.

ѕ҃і. Ꙗ҆́кѡ на тѧ̀, гдⷭ҇и, ᲂу҆пова́хъ, ты̀ ᲂу҆слы́шиши, гдⷭ҇и бж҃е мо́й.

з҃і. Ꙗ҆́кѡ рѣ́хъ: да не когда̀ пора́дꙋютъ ми сѧ вразѝ моѝ: и҆ внегда̀ подвижа́тисѧ нога́мъ мои̑мъ, на мѧ̀ велерѣ́чеваша.

и҃і. Ꙗ҆́кѡ а҆́зъ на ра̑ны гото́въ, и҆ болѣ́знь моѧ̀ предо мно́ю є҆́сть вы́нꙋ.

ѳ҃і. Ꙗ҆́кѡ беззако́нїе моѐ а҆́зъ возвѣщꙋ̀ и҆ попекꙋ́сѧ ѡ҆ грѣсѣ̀ мое́мъ.

к҃. Врази́ же моѝ живꙋ́тъ и҆ ᲂу҆крѣпи́шасѧ па́че менѐ, и҆ ᲂу҆мно́жишасѧ ненави́дѧщїи мѧ̀ без̾ пра́вды:

к҃а. Воздаю́щїи мѝ ѕла̑ѧ воз̾ блага̑ѧ ѡ҆болга́хꙋ мѧ̀, занѐ гонѧ́хъ бл҃госты́ню.

к҃в. Не ѡ҆ста́ви менѐ, гдⷭ҇и бж҃е мо́й, не ѿстꙋпѝ ѿ менѐ:

к҃г. Вонмѝ въ по́мощь мою̀, гдⷭ҇и сп҃се́нїѧ моегѡ̀.

а҃. Въ коне́цъ, і҆дїѳꙋ́мꙋ, пѣ́снь дв҃дꙋ, л҃и.

в҃. Рѣ́хъ: сохраню̀ пꙋти̑ моѧ̑, є҆́же не согрѣша́ти мѝ ѧ҆зы́комъ мои́мъ: положи́хъ ᲂу҆стѡ́мъ мои̑мъ храни́ло, внегда̀ воста́ти грѣ́шномꙋ предо мно́ю.

г҃. Ѡ҆нѣмѣ́хъ и҆ смири́хсѧ, и҆ ᲂу҆молча́хъ ѿ бла̑гъ, и҆ болѣ́знь моѧ̀ ѡ҆бнови́сѧ.

д҃. Согрѣ́ѧсѧ се́рдце моѐ во мнѣ̀, и҆ въ поꙋче́нїи мое́мъ разгори́тсѧ ѻ҆́гнь: глаго́лахъ ѧ҆зы́комъ мои́мъ:

є҃. Скажи́ ми, гдⷭ҇и, кончи́нꙋ мою̀ и҆ число̀ дні́й мои́хъ, ко́е є҆́сть, да разꙋмѣ́ю, что̀ лиша́юсѧ а҆́зъ.

ѕ҃. Сѐ, пѧ̑ди положи́лъ є҆сѝ дни̑ моѧ̑, и҆ соста́въ мо́й ꙗ҆́кѡ ничто́же пред̾ тобо́ю: ѻ҆ба́че всѧ́чєскаѧ сꙋета̀ всѧ́къ человѣ́къ живы́й.

з҃. Оу҆̀бо ѡ҆́бразомъ хо́дитъ человѣ́къ, ѻ҆ба́че всꙋ́е мѧте́тсѧ: сокро́вищствꙋетъ, и҆ не вѣ́сть, комꙋ̀ собере́тъ ѧ҆̀.

и҃. И҆ ны́нѣ кто̀ терпѣ́нїе моѐ; не гдⷭ҇ь ли; и҆ соста́въ мо́й ѿ тебє̀ є҆́сть.

ѳ҃. Ѿ всѣ́хъ беззако́нїй мои́хъ и҆зба́ви мѧ̀: поноше́нїе безꙋ́мномꙋ да́лъ мѧ̀ є҆сѝ.

і҃. Ѡ҆нѣмѣ́хъ и҆ не ѿверзо́хъ ᲂу҆́стъ мои́хъ, ꙗ҆́кѡ ты̀ сотвори́лъ є҆сѝ.

а҃і. Ѿста́ви ѿ менѐ ра̑ны твоѧ̑: ѿ крѣ́пости бо рꙋкѝ твоеѧ̀ а҆́зъ и҆счезо́хъ.

в҃і. Во ѡ҆бличе́нїихъ ѡ҆ беззако́нїи наказа́лъ є҆сѝ человѣ́ка, и҆ и҆ста́ѧлъ є҆сѝ ꙗ҆́кѡ паꙋчи́нꙋ дꙋ́шꙋ є҆гѡ̀: ѻ҆ба́че всꙋ́е всѧ́къ человѣ́къ.

г҃і. Оу҆слы́ши моли́твꙋ мою̀, гдⷭ҇и, и҆ моле́нїе моѐ внꙋшѝ, сле́зъ мои́хъ не премолчѝ: ꙗ҆́кѡ пресе́льникъ а҆́зъ є҆́смь ᲂу҆ тебє̀ и҆ пришле́цъ, ꙗ҆́коже всѝ ѻ҆тцы̀ моѝ.

д҃і. Ѡ҆сла́би мѝ, да почі́ю, пре́жде да́же не ѿидꙋ̀, и҆ ктомꙋ̀ не бꙋ́дꙋ.

а҃. Въ коне́цъ, ѱало́мъ дв҃дꙋ, л҃ѳ.

в҃. Терпѧ̀ потерпѣ́хъ гдⷭ҇а, и҆ внѧ́тъ мѝ и҆ ᲂу҆слы́ша моли́твꙋ мою̀:

г҃. И҆ возведе́ мѧ ѿ ро́ва страсте́й и҆ ѿ бре́нїѧ ти́ны, и҆ поста́ви на ка́мени но́зѣ моѝ и҆ и҆спра́ви стѡпы̀ моѧ̑:

д҃. И҆ вложѝ во ᲂу҆ста̀ моѧ̑ пѣ́снь но́вꙋ, пѣ́нїе бг҃ꙋ на́шемꙋ. Оу҆́зрѧтъ мно́зи и҆ ᲂу҆боѧ́тсѧ, и҆ ᲂу҆пова́ютъ на гдⷭ҇а.

є҃. Бл҃же́нъ мꙋ́жъ, є҆мꙋ́же є҆́сть и҆́мѧ гдⷭ҇не ᲂу҆пова́нїе є҆гѡ̀, и҆ не призрѣ̀ въ сꙋєты̀ и҆ неистовлє́нїѧ лѡ́жнаѧ.

ѕ҃. Мнѡ́га сотвори́лъ є҆сѝ ты̀, гдⷭ҇и бж҃е мо́й, чꙋдеса̀ твоѧ̑, и҆ помышле́нїємъ твои̑мъ нѣ́сть кто̀ ᲂу҆подо́битсѧ тебѣ̀: возвѣсти́хъ и҆ глаго́лахъ: ᲂу҆мно́жишасѧ па́че числа̀.

з҃. Же́ртвы и҆ приноше́нїѧ не восхотѣ́лъ є҆сѝ, тѣ́ло же сверши́лъ мѝ є҆сѝ: всесожже́нїй и҆ ѡ҆ грѣсѣ̀ не взыска́лъ є҆сѝ.

и҃. Тогда̀ рѣ́хъ: сѐ, прїидꙋ̀: въ глави́знѣ кни́жнѣ пи́сано є҆́сть ѡ҆ мнѣ̀:

ѳ҃. Є҆́же сотвори́ти во́лю твою̀, бж҃е мо́й, восхотѣ́хъ, и҆ зако́нъ тво́й посредѣ̀ чре́ва моегѡ̀.

і҃. Бл҃говѣсти́хъ пра́вдꙋ въ цр҃кви вели́цѣй, сѐ, ᲂу҆стна́мъ мои̑мъ не возбраню̀: гдⷭ҇и, ты̀ разꙋмѣ́лъ є҆сѝ.

а҃і. Пра́вдꙋ твою̀ не скры́хъ въ се́рдцы мое́мъ, и҆́стинꙋ твою̀ и҆ сп҃се́нїе твоѐ рѣ́хъ, не скры́хъ млⷭ҇ть твою̀ и҆ и҆́стинꙋ твою̀ ѿ со́нма мно́га.

в҃і. Ты́ же, гдⷭ҇и, не ᲂу҆далѝ щедро́тъ твои́хъ ѿ менѐ: млⷭ҇ть твоѧ̀ и҆ и҆́стина твоѧ̀ вы́нꙋ да застꙋ́питѣ мѧ̀.

г҃і. Ꙗ҆́кѡ ѡ҆держа́ша мѧ̀ ѕла̑ѧ, и҆̀мже нѣ́сть числа̀: постиго́ша мѧ̀ беззакѡ́нїѧ моѧ̑, и҆ не возмого́хъ зрѣ́ти: ᲂу҆мно́жишасѧ па́че вла̑съ главы̀ моеѧ̀, и҆ се́рдце моѐ ѡ҆ста́ви мѧ̀.

д҃і. Бл҃говолѝ, гдⷭ҇и, и҆зба́вити мѧ̀: гдⷭ҇и, во є҆́же помощи́ ми, вонмѝ.

є҃і. Да постыдѧ́тсѧ и҆ посра́мѧтсѧ вкꙋ́пѣ и҆́щꙋщїи дꙋ́шꙋ мою̀, и҆з̾ѧ́ти ю҆̀: да возвратѧ́тсѧ вспѧ́ть и҆ постыдѧ́тсѧ хотѧ́щїи мѝ ѕла̑ѧ.

ѕ҃і. Да прїи́мꙋтъ а҆́бїе стꙋ́дъ сво́й глаго́лющїи мѝ: бла́гоже, бла́гоже.

з҃і. Да возра́дꙋютсѧ и҆ возвеселѧ́тсѧ ѡ҆ тебѣ̀ всѝ и҆́щꙋщїи тебѐ, гдⷭ҇и, и҆ да рекꙋ́тъ вы́нꙋ, да возвели́читсѧ гдⷭ҇ь, лю́бѧщїи сп҃се́нїе твоѐ.

и҃і. А҆́зъ же ни́щъ є҆́смь и҆ ᲂу҆бо́гъ, гдⷭ҇ь попече́тсѧ ѡ҆ мнѣ̀: помо́щникъ мо́й и҆ защи́титель мо́й є҆сѝ ты̀, бж҃е мо́й, не закоснѝ.

Сла́ва:

а҃. Въ коне́цъ, ѱало́мъ дв҃дꙋ, м҃.

в҃. Бл҃же́нъ разꙋмѣва́ѧй на ни́ща и҆ ᲂу҆бо́га, въ де́нь лю́тъ и҆зба́витъ є҆го̀ гдⷭ҇ь.

г҃. Гдⷭ҇ь да сохрани́тъ є҆го̀ и҆ живи́тъ є҆го̀, и҆ да ᲂу҆бл҃жи́тъ є҆го̀ на землѝ и҆ да не преда́стъ є҆гѡ̀ въ рꙋ́ки врагѡ́въ є҆гѡ̀.

д҃. Гдⷭ҇ь да помо́жетъ є҆мꙋ̀ на ѻ҆дрѣ̀ болѣ́зни є҆гѡ̀: всѐ ло́же є҆гѡ̀ ѡ҆брати́лъ є҆сѝ въ болѣ̑зни є҆гѡ̀.

є҃. А҆́зъ рѣ́хъ: гдⷭ҇и, поми́лꙋй мѧ̀, и҆сцѣлѝ дꙋ́шꙋ мою̀, ꙗ҆́кѡ согрѣши́хъ тѝ.

ѕ҃. Вразѝ моѝ рѣ́ша мнѣ̀ ѕла̑ѧ: когда̀ ᲂу҆́мретъ, и҆ поги́бнетъ и҆́мѧ є҆гѡ̀;

з҃. И҆ вхожда́ше ви́дѣти, всꙋ́е глаго́лаше се́рдце є҆гѡ̀: собра̀ беззако́нїе себѣ̀, и҆схожда́ше во́нъ и҆ глаго́лаше вкꙋ́пѣ.

и҃. На мѧ̀ шепта́хꙋ всѝ вразѝ моѝ, на мѧ̀ помышлѧ́хꙋ ѕла̑ѧ мнѣ̀.

ѳ҃. Сло́во законопрестꙋ́пное возложи́ша на мѧ̀: є҆да̀ спѧ́й не приложи́тъ воскреснꙋ́ти;

і҃. И҆́бо человѣ́къ ми́ра моегѡ̀, на него́же ᲂу҆пова́хъ, ꙗ҆ды́й хлѣ́бы моѧ̑, возвели́чи на мѧ̀ запина́нїе.

а҃і. Ты́ же, гдⷭ҇и, поми́лꙋй мѧ̀ и҆ возста́ви мѧ̀, и҆ возда́мъ и҆̀мъ.

в҃і. Въ се́мъ позна́хъ, ꙗ҆́кѡ восхотѣ́лъ мѧ̀ є҆сѝ, ꙗ҆́кѡ не возра́дꙋетсѧ вра́гъ мо́й ѡ҆ мнѣ̀.

г҃і. Мене́ же за неѕло́бїе прїѧ́лъ, и҆ ᲂу҆тверди́лъ мѧ̀ є҆сѝ пред̾ тобо́ю въ вѣ́къ.

д҃і. Бл҃гослове́нъ гдⷭ҇ь бг҃ъ і҆и҃левъ ѿ вѣ́ка и҆ до вѣ́ка: бꙋ́ди, бꙋ́ди.

а҃. Въ коне́цъ, въ ра́зꙋмъ сынѡ́въ коре́овыхъ, ѱало́мъ дв҃дꙋ, м҃а.

в҃. И҆́мже ѡ҆́бразомъ жела́етъ є҆ле́нь на и҆сто́чники водны̑ѧ, си́це жела́етъ дꙋша̀ моѧ̀ къ тебѣ̀, бж҃е.

г҃. Возжада̀ дꙋша̀ моѧ̀ къ бг҃ꙋ крѣ́пкомꙋ, живо́мꙋ: когда̀ прїидꙋ̀ и҆ ꙗ҆влю́сѧ лицꙋ̀ бж҃їю;

д҃. Бы́ша сле́зы моѧ̑ мнѣ̀ хлѣ́бъ де́нь и҆ но́щь, внегда̀ глаго́латисѧ мнѣ̀ на всѧ́къ де́нь: гдѣ̀ є҆́сть бг҃ъ тво́й;

є҃. Сїѧ̑ помѧнꙋ́хъ, и҆ и҆злїѧ́хъ на мѧ̀ дꙋ́шꙋ мою̀: ꙗ҆́кѡ пройдꙋ̀ въ мѣ́сто селе́нїѧ ди́вна, да́же до до́мꙋ бж҃їѧ, во гла́сѣ ра́дованїѧ и҆ и҆сповѣ́данїѧ, шꙋ́ма пра́зднꙋющагѡ.

ѕ҃. Вскꙋ́ю приско́рбна є҆сѝ, дꙋшѐ моѧ̀; и҆ вскꙋ́ю смꙋща́еши мѧ̀; ᲂу҆пова́й на бг҃а, ꙗ҆́кѡ и҆сповѣ́мсѧ є҆мꙋ̀, сп҃се́нїе лица̀ моегѡ̀ и҆ бг҃ъ мо́й.

з҃. Ко мнѣ̀ самомꙋ̀ дꙋша̀ моѧ̀ смѧте́сѧ: сегѡ̀ ра́ди помѧнꙋ́хъ тѧ̀ ѿ землѝ і҆ѻрда́нски и҆ є҆рмѡнїи́мски, ѿ горы̀ ма́лыѧ.

и҃. Бе́здна бе́зднꙋ призыва́етъ во гла́сѣ хлѧ́бїй твои́хъ: всѧ̑ высоты̑ твоѧ̑ и҆ вѡ́лны твоѧ̑ на мнѣ̀ преидо́ша.

ѳ҃. Въ де́нь заповѣ́сть гдⷭ҇ь млⷭ҇ть свою̀, и҆ но́щїю пѣ́снь є҆гѡ̀ ꙾ѿ менѐ꙾ ¹⁰, моли́тва бг҃ꙋ живота̀ моегѡ̀.

і҃. Рекꙋ̀ бг҃ꙋ: застꙋ́пникъ мо́й є҆сѝ, почто̀ мѧ̀ забы́лъ є҆сѝ; и҆ вскꙋ́ю сѣ́тꙋѧ хождꙋ̀, внегда̀ ѡ҆скорблѧ́етъ вра́гъ;

а҃і. Внегда̀ сокрꙋша́тисѧ косте́мъ мои̑мъ, поноша́хꙋ мѝ вразѝ моѝ, внегда̀ глаго́лати и҆̀мъ мнѣ̀ на всѧ́къ де́нь: гдѣ̀ є҆́сть бг҃ъ тво́й;

в҃і. Вскꙋ́ю приско́рбна є҆сѝ, дꙋшѐ моѧ̀; и҆ вскꙋ́ю смꙋща́еши мѧ̀; ᲂу҆пова́й на бг҃а, ꙗ҆́кѡ и҆сповѣ́мсѧ є҆мꙋ̀, сп҃се́нїе лица̀ моегѡ̀ и҆ бг҃ъ мо́й.

Ѱало́мъ дв҃дꙋ, не надпи́санъ ᲂу҆ є҆врє́й, м҃в.

а҃. Сꙋди́ ми, бж҃е, и҆ разсꙋдѝ прю̀ мою̀: ѿ ꙗ҆зы́ка непреподо́бна, ѿ человѣ́ка непра́ведна и҆ льсти́ва и҆зба́ви мѧ̀.

в҃. Занѐ ты̀ є҆сѝ, бж҃е, крѣ́пость моѧ̀, вскꙋ́ю ѿри́нꙋлъ мѧ̀ є҆сѝ; и҆ вскꙋ́ю сѣ́тꙋѧ хождꙋ̀, внегда̀ ѡ҆скорблѧ́етъ вра́гъ;

г҃. Послѝ свѣ́тъ тво́й и҆ и҆́стинꙋ твою̀: та̑ мѧ̀ наста́виста, и҆ введо́ста мѧ̀ въ го́рꙋ ст҃ꙋ́ю твою̀ и҆ въ селє́нїѧ твоѧ̑.

д҃. И҆ вни́дꙋ къ же́ртвенникꙋ бж҃їю, къ бг҃ꙋ веселѧ́щемꙋ ю҆́ность мою̀: и҆сповѣ́мсѧ тебѣ̀ въ гꙋ́слехъ, бж҃е, бж҃е мо́й.

є҃. Вскꙋ́ю приско́рбна є҆сѝ, дꙋшѐ моѧ̀; и҆ вскꙋ́ю смꙋща́еши мѧ̀; ᲂу҆пова́й на бг҃а, ꙗ҆́кѡ и҆сповѣ́мсѧ є҆мꙋ̀, сп҃се́нїе лица̀ моегѡ̀ и҆ бг҃ъ мо́й.

Сла́ва:

а҃. Въ коне́цъ, сынѡ́въ коре́овыхъ, въ ра́зꙋмъ, ѱало́мъ м҃г.

в҃. Бж҃е, ᲂу҆ши́ма на́шима ᲂу҆слы́шахомъ, и҆ ѻ҆тцы̀ на́ши возвѣсти́ша на́мъ дѣ́ло, є҆́же содѣ́лалъ є҆сѝ во дне́хъ и҆́хъ, во дне́хъ дре́внихъ.

г҃. Рꙋка̀ твоѧ̀ ꙗ҆зы́ки потребѝ, и҆ насади́лъ ѧ҆̀ є҆сѝ: ѡ҆ѕло́билъ є҆сѝ лю́ди и҆ и҆згна́лъ є҆сѝ ѧ҆̀.

д҃. Не бо мече́мъ свои́мъ наслѣ́диша зе́млю, и҆ мы́шца и҆́хъ не спасѐ и҆́хъ, но десни́ца твоѧ̀ и҆ мы́шца твоѧ̀ и҆ просвѣще́нїе лица̀ твоегѡ̀, ꙗ҆́кѡ бл҃говоли́лъ є҆сѝ въ ни́хъ.

є҃. Ты̀ є҆сѝ са́мъ цр҃ь мо́й и҆ бг҃ъ мо́й, заповѣ́даѧй спасє́нїѧ і҆а̑кѡвлѧ.

ѕ҃. Ѡ҆ тебѣ̀ врагѝ на́шѧ и҆збоде́мъ ро́ги, и҆ ѡ҆ и҆́мени твое́мъ ᲂу҆ничижи́мъ востаю́щыѧ на ны̀.

з҃. Не на лꙋ́къ бо мо́й ᲂу҆пова́ю, и҆ ме́чь мо́й не спасе́тъ менѐ:

и҃. Сп҃слъ бо є҆сѝ на́съ ѿ стꙋжа́ющихъ на́мъ, и҆ ненави́дѧщихъ на́съ посрами́лъ є҆сѝ.

ѳ҃. Ѡ҆ бз҃ѣ похва́лимсѧ ве́сь де́нь, и҆ ѡ҆ и҆́мени твое́мъ и҆сповѣ́мысѧ во вѣ́къ.

і҃. Ны́нѣ же ѿри́нꙋлъ є҆сѝ и҆ посрами́лъ є҆сѝ на́съ, и҆ не и҆зы́деши, бж҃е, въ си́лахъ на́шихъ.

а҃і. Возврати́лъ є҆сѝ на́съ вспѧ́ть при вразѣ́хъ на́шихъ, и҆ ненави́дѧщїи на́съ расхища́хꙋ себѣ̀.

в҃і. Да́лъ є҆сѝ на́съ ꙗ҆́кѡ ѻ҆́вцы снѣ́ди, и҆ во ꙗ҆зы́цѣхъ разсѣ́ѧлъ ны̀ є҆сѝ.

г҃і. Ѿда́лъ є҆сѝ лю́ди твоѧ̑ без̾ цѣны̀, и҆ не бѣ̀ мно́жество въ восклица́нїихъ на́шихъ.

д҃і. Положи́лъ є҆сѝ на́съ поноше́нїе сосѣ́дѡмъ на́шымъ, подражне́нїе и҆ порꙋга́нїе сꙋ́щымъ ѡ҆́крестъ на́съ.

є҃і. Положи́лъ є҆сѝ на́съ въ при́тчꙋ во ꙗ҆зы́цѣхъ, покива́нїю главы̀ въ лю́дехъ.

ѕ҃і. Ве́сь де́нь сра́мъ мо́й предо мно́ю є҆́сть, и҆ стꙋ́дъ лица̀ моегѡ̀ покры́ мѧ,

з҃і. Ѿ гла́са поноша́ющагѡ и҆ ѡ҆клевета́ющагѡ, ѿ лица̀ вра́жїѧ и҆ и҆згонѧ́щагѡ.

и҃і. Сїѧ̑ всѧ̑ прїидо́ша на ны̀, и҆ не забы́хомъ тебє̀, и҆ не непра́вдовахомъ въ завѣ́тѣ твое́мъ,

ѳ҃і. И҆ не ѿстꙋпѝ вспѧ́ть се́рдце на́ше: и҆ ᲂу҆клони́лъ є҆сѝ стезѝ на́шѧ ѿ пꙋтѝ твоегѡ̀,

к҃. Ꙗ҆́кѡ смири́лъ є҆сѝ на́съ на мѣ́стѣ ѡ҆ѕлобле́нїѧ, и҆ прикры́ ны сѣ́нь сме́ртнаѧ.

к҃а. А҆́ще забы́хомъ и҆́мѧ бг҃а на́шегѡ, и҆ а҆́ще воздѣ́хомъ рꙋ́ки на́шѧ къ бо́гꙋ чꙋжде́мꙋ,

к҃в. Не бг҃ъ ли взы́щетъ си́хъ; то́й бо вѣ́сть та̑йнаѧ се́рдца.

к҃г. Занѐ тебє̀ ра́ди ᲂу҆мерщвлѧ́емсѧ ве́сь де́нь, вмѣни́хомсѧ ꙗ҆́кѡ ѻ҆́вцы заколе́нїѧ.

к҃д. Воста́ни, вскꙋ́ю спи́ши, гдⷭ҇и; воскрⷭ҇нѝ, и҆ не ѿри́ни до конца̀.

к҃є. Вскꙋ́ю лицѐ твоѐ ѿвраща́еши; забыва́еши нищетꙋ̀ на́шꙋ и҆ ско́рбь на́шꙋ;

к҃ѕ. Ꙗ҆́кѡ смири́сѧ въ пе́рсть дꙋша̀ на́ша, прильпѐ землѝ ᲂу҆тро́ба на́ша.

к҃з. Воскрⷭ҇нѝ, гдⷭ҇и, помозѝ на́мъ, и҆ и҆зба́ви на́съ и҆́мене ра́ди твоегѡ̀.

а҃. Въ коне́цъ, ѡ҆ и҆змѣнѧ́емыхъ сынѡ́мъ коре́ѡвымъ въ ра́зꙋмъ, пѣ́снь ѡ҆ возлю́бленнѣмъ, м҃д.

в҃. Ѿры́гнꙋ се́рдце моѐ сло́во бла́го, глаго́лю а҆́зъ дѣла̀ моѧ̑ цр҃е́ви: ѧ҆зы́къ мо́й тро́сть кни́жника скоропи́сца.

г҃. Красе́нъ добро́тою па́че сынѡ́въ человѣ́ческихъ, и҆злїѧ́сѧ бл҃года́ть во ᲂу҆стна́хъ твои́хъ: сегѡ̀ ра́ди бл҃гослови́ тѧ бг҃ъ во вѣ́къ.

д҃. Препоѧ́ши ме́чь тво́й по бедрѣ̀ твое́й, си́льне,

є҃. Красото́ю твое́ю и҆ добро́тою твое́ю: и҆ налѧцы̀, и҆ ᲂу҆спѣва́й, и҆ црⷭ҇твꙋй и҆́стины ра́ди и҆ кро́тости и҆ пра́вды: и҆ наста́витъ тѧ̀ ди́внѡ десни́ца твоѧ̀.

ѕ҃. Стрѣ́лы твоѧ̑ и҆з̾ѡщрє́ны, си́льне: лю́дїе под̾ тобо́ю падꙋ́тъ въ се́рдцы вра̑гъ цр҃е́выхъ.

з҃. Прⷭ҇то́лъ тво́й, бж҃е, въ вѣ́къ вѣ́ка: же́злъ пра́вости же́злъ црⷭ҇твїѧ твоегѡ̀.

и҃. Возлюби́лъ є҆сѝ пра́вдꙋ и҆ возненави́дѣлъ є҆сѝ беззако́нїе: сегѡ̀ ра́ди пома́за тѧ̀, бж҃е, бг҃ъ тво́й є҆ле́емъ ра́дости па́че прича̑стникъ твои́хъ.

ѳ҃. Смѵ́рна и҆ ста́кти и҆ касі́а ѿ ри́зъ твои́хъ, ꙾ѿ тѧ́жестей слоно́выхъ꙾ ¹¹, и҆з̾ ни́хже возвесели́ша тѧ̀.

і҃. Дщє́ри царе́й въ че́сти твое́й: предста̀ цари́ца ѡ҆деснꙋ́ю тебє̀, въ ри́захъ позлаще́нныхъ ѡ҆дѣ́ѧна преиспещре́на.

а҃і. Слы́ши, дщѝ, и҆ ви́ждь, и҆ приклонѝ ᲂу҆́хо твоѐ, и҆ забꙋ́ди лю́ди твоѧ̑ и҆ до́мъ ѻ҆тца̀ твоегѡ̀:

в҃і. И҆ возжела́етъ цр҃ь добро́ты твоеѧ̀, занѐ то́й є҆́сть гдⷭ҇ь тво́й, и҆ поклони́шисѧ є҆мꙋ̀,

г҃і. И҆ дщѝ тѵ́рова съ да́ры: лицꙋ̀ твоемꙋ̀ помо́лѧтсѧ бога́тїи лю́дстїи.

д҃і. Всѧ̀ сла́ва дще́ре цр҃е́вы внꙋ́трь: рѧ̑сны златы́ми ѡ҆дѣ́ѧна и҆ преиспещре́на.

є҃і. Приведꙋ́тсѧ цр҃ю̀ дѣ̑вы в̾слѣ́дъ є҆ѧ̀, и҆́скрєннїѧ є҆ѧ̀ приведꙋ́тсѧ тебѣ̀:

ѕ҃і. Приведꙋ́тсѧ въ весе́лїи и҆ ра́дованїи, введꙋ́тсѧ въ хра́мъ цр҃е́въ.

з҃і. Вмѣ́стѡ ѻ҆тє́цъ твои́хъ бы́ша сы́нове твоѝ: поста́виши ѧ҆̀ кнѧ̑зи по все́й землѝ.

и҃і. Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ: сегѡ̀ ра́ди лю́дїе и҆сповѣ́дѧтсѧ тебѣ̀ въ вѣ́къ и҆ во вѣ́къ вѣ́ка.

а҃. Въ коне́цъ, ѡ҆ сынѣ́хъ коре́овыхъ, ѡ҆ та́йныхъ, ѱало́мъ м҃є.

в҃. Бг҃ъ на́мъ прибѣ́жище и҆ си́ла, помо́щникъ въ ско́рбехъ ѡ҆брѣ́тшихъ ны̀ ѕѣлѡ̀.

г҃. Сегѡ̀ ра́ди не ᲂу҆бои́мсѧ, внегда̀ смꙋща́етсѧ землѧ̀, и҆ прелага́ютсѧ го́ры въ сердца̀ морска̑ѧ.

д҃. Возшꙋмѣ́ша и҆ смѧто́шасѧ во́ды и҆́хъ, смѧто́шасѧ го́ры крѣ́постїю є҆гѡ̀.

є҃. Рѣ̑чнаѧ ᲂу҆стремлє́нїѧ веселѧ́тъ гра́дъ бж҃їй: ѡ҆ст҃и́лъ є҆́сть селе́нїе своѐ вы́шнїй.

ѕ҃. Бг҃ъ посредѣ̀ є҆гѡ̀, и҆ не подви́житсѧ: помо́жетъ є҆мꙋ̀ бг҃ъ ᲂу҆́трѡ заꙋ́тра.

з҃. Смѧто́шасѧ ꙗ҆зы́цы, ᲂу҆клони́шасѧ ца̑рствїѧ: дадѐ гла́съ сво́й вы́шнїй, подви́жесѧ землѧ̀.

и҃. Гдⷭ҇ь си́лъ съ на́ми, застꙋ́пникъ на́шъ бг҃ъ і҆а́кѡвль.

ѳ҃. Прїиди́те и҆ ви́дите дѣла̀ бж҃їѧ, ꙗ҆̀же положѝ чꙋдеса̀ на землѝ:

і҃. Ѿе́млѧ бра̑ни до конє́цъ землѝ, лꙋ́къ сокрꙋши́тъ и҆ сло́митъ ѻ҆рꙋ́жїе, и҆ щиты̀ сожже́тъ ѻ҆гне́мъ.

а҃і. Оу҆праздни́тесѧ и҆ разꙋмѣ́йте, ꙗ҆́кѡ а҆́зъ є҆́смь бг҃ъ: вознесꙋ́сѧ во ꙗ҆зы́цѣхъ, вознесꙋ́сѧ на землѝ.

в҃і. Гдⷭ҇ь си́лъ съ на́ми, застꙋ́пникъ на́шъ бг҃ъ і҆а́кѡвль.

Сла́ва:

По ѕ҃-й каѳі́смѣ, трист҃о́е.

Та́же тропарѝ, гла́съ г҃:

Хвалꙋ̀ приношꙋ̀ тѝ гдⷭ҇и, прегрѣшє́нїѧ моѧ̑ всѧ̑ возвѣща́ю тѝ, бж҃е, ѡ҆брати́въ поми́лꙋй мѧ̀.

Сла́ва: Сп҃си́ мѧ бж҃е мо́й, ꙗ҆́коже и҆ногда̀ мытарѧ̀ сп҃слъ є҆сѝ: и҆ блꙋдни́цы сле́зъ не презрѣ́вый, и҆ моѐ воздыха́нїе прїимѝ сп҃се мо́й, и҆ сп҃си́ мѧ.

И҆ ны́нѣ: Ра́бски ны́нѣ притека́ю къ покро́вꙋ твоемꙋ̀ пренепоро́чнаѧ, и҆зба́ви мѧ̀ бг҃ороди́тельнице, слїѧ́нїѧ страсте́й, ꙗ҆́кѡ безстра́стїѧ вино́внаго ро́ждшаѧ.

Гдⷭ҇и поми́лꙋй, м҃. и҆ мл҃тва:

Бл҃годари́мъ тѧ̀ гдⷭ҇и бж҃е на́шъ, ѡ҆ всѣ́хъ бл҃годѣѧ́нїихъ твои́хъ, ꙗ҆̀же ѿ пе́рвагѡ во́зраста до настоѧ́щагѡ, въ на́съ недосто́йныхъ бы́вшихъ, ѡ҆ и҆́хже вѣ́мы и҆ не вѣ́мы, ѡ҆ ꙗ҆вле́нныхъ и҆ неѧвле́нныхъ, ꙗ҆̀же дѣ́ломъ бы́вшихъ, и҆ сло́вомъ: возлюби́вый на́съ, ꙗ҆́коже и҆ є҆диноро́днаго твоего̀ сн҃а ѡ҆ на́съ да́ти и҆зво́ливый, сподо́би и҆ на́съ достѡ́йны бы́ти твоеѧ̀ любвѐ. да́ждь сло́вомъ твои́мъ мꙋ́дрость, и҆ стра́хомъ твои́мъ вдохнѝ крѣ́пость ѿ твоеѧ̀ си́лы, и҆ а҆́ще что̀ хотѧ́ще, и҆лѝ не хотѧ́ще согрѣши́хомъ, простѝ, и҆ не вмѣнѝ: и҆ сохранѝ дꙋ́шꙋ на́шꙋ ст҃ꙋ, и҆ предста́ви ю҆̀ твоемꙋ̀ прⷭ҇то́лꙋ со́вѣсть и҆мꙋ́щꙋ чи́стꙋ, и҆ коне́цъ досто́инъ чл҃вѣколю́бїѧ твоегѡ̀. и҆ помѧнѝ гдⷭ҇и, всѣ́хъ призыва́ющихъ и҆́мѧ твоѐ во и҆́стинѣ, помѧнѝ всѣ́хъ бл҃га и҆лѝ сопроти̑внаѧ на́мъ хотѧ́щихъ, вси́ бо человѣ́цы є҆смы̀, и҆ всꙋ́е всѧ́къ человѣ́къ. тѣ́мже мо́лимсѧ тебѣ̀ гдⷭ҇и: пода́ждь на́мъ твоегѡ̀ бл҃гоꙋтро́бїѧ ве́лїю млⷭ҇ть.

а҃. Въ коне́цъ, ѡ҆ сынѣ́хъ коре́овыхъ, ѱало́мъ, м҃ѕ.

в҃. Всѝ ꙗ҆зы́цы, восплещи́те рꙋка́ми, воскли́кните бг҃ꙋ гла́сомъ ра́дованїѧ:

г҃. Ꙗ҆́кѡ гдⷭ҇ь вы́шнїй стра́шенъ, цр҃ь ве́лїй по все́й землѝ:

д҃. Покорѝ лю́ди на́мъ и҆ ꙗ҆зы́ки под̾ но́ги на́ша:

є҃. И҆збра̀ на́мъ достоѧ́нїѧ своѐ, добро́тꙋ і҆а́кѡвлю, ю҆́же возлюбѝ.

ѕ҃. Взы́де бг҃ъ въ воскликнове́нїи, гдⷭ҇ь во гла́сѣ трꙋ́бнѣ.

з҃. По́йте бг҃ꙋ на́шемꙋ, по́йте: по́йте цр҃е́ви на́шемꙋ, по́йте:

и҃. Ꙗ҆́кѡ цр҃ь всеѧ̀ землѝ бг҃ъ, по́йте разꙋ́мнѡ.

ѳ҃. Воцр҃и́сѧ бг҃ъ над̾ ꙗ҆зы́ки: бг҃ъ сѣди́тъ на прⷭ҇то́лѣ ст҃ѣ́мъ свое́мъ.

і҃. Кнѧ̑зи лю́дстїи собра́шасѧ съ бг҃омъ а҆враа́млимъ: ꙗ҆́кѡ бж҃їи держа́внїи землѝ ѕѣлѡ̀ вознесо́шасѧ.

а҃. Ѱало́мъ пѣ́сни сынѡ́въ коре́овыхъ, вторы́ѧ сꙋббѡ́ты, м҃з.

в҃. Ве́лїй гдⷭ҇ь и҆ хва́ленъ ѕѣлѡ̀ во гра́дѣ бг҃а на́шегѡ, въ горѣ̀ ст҃ѣ́й є҆гѡ̀,

г҃. Бл҃гокоре́ннымъ ра́дованїемъ всеѧ̀ землѝ: го́ры сїѡ́нскїѧ, ре́бра сѣ́верѡва, гра́дъ цр҃ѧ̀ вели́кагѡ.

д҃. Бг҃ъ ꙾въ тѧ́жестѣхъ꙾ ¹² є҆гѡ̀ зна́емь є҆́сть, є҆гда̀ застꙋпа́етъ и҆̀.

є҃. Ꙗ҆́кѡ сѐ, ца́рїе зе́мстїи собра́шасѧ, снидо́шасѧ вкꙋ́пѣ:

ѕ҃. Ті́и ви́дѣвше та́кѡ, ᲂу҆диви́шасѧ, смѧто́шасѧ, подвиго́шасѧ:

з҃. Тре́петъ прїѧ́тъ ѧ҆̀ та́мѡ, бѡлѣ́зни ꙗ҆́кѡ ражда́ющїѧ.

и҃. Дꙋ́хомъ бꙋ́рнымъ сокрꙋши́ши кораблѝ ѳарсі̑йскїѧ.

ѳ҃. Ꙗ҆́коже слы́шахомъ, та́кѡ и҆ ви́дѣхомъ во гра́дѣ гдⷭ҇а си́лъ, во гра́дѣ бг҃а на́шегѡ: бг҃ъ ѡ҆снова̀ и҆ въ вѣ́къ.

і҃. Прїѧ́хомъ, бж҃е, млⷭ҇ть твою̀ посредѣ̀ люде́й твои́хъ.

а҃і. По и҆́мени твоемꙋ̀, бж҃е, та́кѡ и҆ хвала̀ твоѧ̀ на конца́хъ землѝ: пра́вды и҆спо́лнь десни́ца твоѧ̀.

в҃і. Да возвесели́тсѧ гора̀ сїѡ́нскаѧ, и҆ да возра́дꙋютсѧ дщє́ри і҆ꙋдє́йскїѧ, сꙋде́бъ ра́ди твои́хъ, гдⷭ҇и.

г҃і. Ѡ҆быди́те сїѡ́нъ и҆ ѡ҆быми́те є҆го̀, повѣ́дите въ столпѣ́хъ є҆гѡ̀:

д҃і. Положи́те сердца̀ ва̑ша въ си́лꙋ є҆гѡ̀, и҆ раздѣли́те до́мы є҆гѡ̀, ꙗ҆́кѡ да повѣ́сте въ ро́дѣ и҆нѣ́мъ.

є҃і. Ꙗ҆́кѡ то́й є҆́сть бг҃ъ на́шъ во вѣ́къ и҆ въ вѣ́къ вѣ́ка: то́й ᲂу҆пасе́тъ на́съ во вѣ́ки.

а҃. Въ коне́цъ, сынѡ́мъ коре́ѡвымъ, ѱало́мъ, м҃и.

в҃. Оу҆слы́шите сїѧ̑, всѝ ꙗ҆зы́цы, внꙋши́те, всѝ живꙋ́щїи по вселе́ннѣй,

г҃. Земноро́днїи же и҆ сы́нове человѣ́честїи, вкꙋ́пѣ бога́тъ и҆ ᲂу҆бо́гъ.

д҃. Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ.

є҃. Приклоню̀ въ при́тчꙋ ᲂу҆́хо моѐ, ѿве́рзꙋ во ѱалти́ри гана́нїе моѐ.

ѕ҃. Вскꙋ́ю бою́сѧ въ де́нь лю́тъ; беззако́нїе пѧты̀ моеѧ̀ ѡ҆бы́детъ мѧ̀.

з҃. Надѣ́ющїисѧ на си́лꙋ свою̀ и҆ ѡ҆ мно́жествѣ бога́тства своегѡ̀ хва́лѧщїисѧ:

и҃. Бра́тъ не и҆зба́витъ, и҆зба́витъ ли человѣ́къ; не да́стъ бг҃ꙋ и҆змѣ́ны за сѧ̀,

ѳ҃. И҆ цѣ́нꙋ и҆збавле́нїѧ дꙋшѝ своеѧ̀: и҆ ᲂу҆трꙋди́сѧ въ вѣ́къ,

і҃. И҆ жи́въ бꙋ́детъ до конца̀, не ᲂу҆́зритъ па́гꙋбы.

а҃і. Є҆гда̀ ᲂу҆ви́дитъ премꙋ̑дрыѧ ᲂу҆мира́ющыѧ, вкꙋ́пѣ безꙋ́менъ и҆ несмы́сленъ поги́бнꙋтъ, и҆ ѡ҆ста́вѧтъ чꙋжди̑мъ бога́тство своѐ.

в҃і. И҆ гро́би и҆́хъ жили̑ща и҆́хъ во вѣ́къ, селє́нїѧ и҆́хъ въ ро́дъ и҆ ро́дъ, нареко́ша и҆мена̀ своѧ̑ на землѧ́хъ.

г҃і. И҆ человѣ́къ въ че́сти сы́й не разꙋмѣ̀, приложи́сѧ скотѡ́мъ несмы́слєннымъ и҆ ᲂу҆подо́бисѧ и҆̀мъ.

д҃і. Се́й пꙋ́ть и҆́хъ собла́знъ и҆̀мъ, и҆ по си́хъ во ᲂу҆стѣ́хъ свои́хъ бл҃говолѧ́тъ.

є҃і. Ꙗ҆́кѡ ѻ҆́вцы во а҆́дѣ положе́ни сꙋ́ть, сме́рть ᲂу҆пасе́тъ ѧ҆̀: и҆ ѡ҆блада́ютъ и҆́ми пра́вїи заꙋ́тра, и҆ по́мощь и҆́хъ ѡ҆бетша́етъ во а҆́дѣ: ѿ сла́вы своеѧ̀ и҆зринове́ни бы́ша.

ѕ҃і. Ѻ҆ба́че бг҃ъ и҆зба́витъ дꙋ́шꙋ мою̀ и҆з̾ рꙋкѝ а҆́довы, є҆гда̀ прїе́млетъ мѧ̀.

з҃і. Не ᲂу҆бо́йсѧ, є҆гда̀ разбогатѣ́етъ человѣ́къ, и҆лѝ є҆гда̀ ᲂу҆мно́житсѧ сла́ва до́мꙋ є҆гѡ̀:

и҃і. Ꙗ҆́кѡ внегда̀ ᲂу҆мре́ти є҆мꙋ̀, не во́зметъ всѧ̑, нижѐ сни́детъ съ ни́мъ сла́ва є҆гѡ̀.

ѳ҃і. Ꙗ҆́кѡ дꙋша̀ є҆гѡ̀ въ животѣ̀ є҆гѡ̀ бл҃гослови́тсѧ, и҆сповѣ́стсѧ тебѣ̀, є҆гда̀ бл҃госотвори́ши є҆мꙋ̀.

к҃. Вни́детъ да́же до ро́да ѻ҆тє́цъ свои́хъ, да́же до вѣ́ка не ᲂу҆́зритъ свѣ́та.

к҃а. И҆ человѣ́къ въ че́сти сы́й не разꙋмѣ̀, приложи́сѧ скотѡ́мъ несмы́слєннымъ и҆ ᲂу҆подо́бисѧ и҆̀мъ.

Сла́ва:

Ѱало́мъ а҆са́фꙋ, м҃ѳ.

а҃. Бг҃ъ богѡ́въ гдⷭ҇ь глаго́ла, и҆ призва̀ зе́млю ѿ востѡ́къ со́лнца до за̑падъ.

в҃. Ѿ сїѡ́на бл҃голѣ́пїе красоты̀ є҆гѡ̀:

г҃. Бг҃ъ ꙗ҆́вѣ прїи́детъ, бг҃ъ на́шъ, и҆ не премолчи́тъ: ѻ҆́гнь пред̾ ни́мъ возгори́тсѧ, и҆ ѡ҆́крестъ є҆гѡ̀ бꙋ́рѧ ѕѣ́лна.

д҃. Призове́тъ не́бо свы́ше, и҆ зе́млю, разсꙋди́ти лю́ди своѧ̑.

є҃. Собери́те є҆мꙋ̀ прпⷣбныѧ є҆гѡ̀, завѣща́ющыѧ завѣ́тъ є҆гѡ̀ ѡ҆ же́ртвахъ.

ѕ҃. И҆ возвѣстѧ́тъ нб҃са̀ пра́вдꙋ є҆гѡ̀: ꙗ҆́кѡ бг҃ъ сꙋдїѧ̀ є҆́сть.

з҃. Оу҆слы́шите, лю́дїе моѝ, и҆ возглаго́лю ва́мъ, і҆и҃лю, и҆ засвидѣ́тельствꙋю тебѣ̀: бг҃ъ, бг҃ъ тво́й є҆́смь а҆́зъ.

и҃. Не ѡ҆ же́ртвахъ твои́хъ ѡ҆бличꙋ̀ тѧ̀, всесожжє́нїѧ же твоѧ̑ предо мно́ю сꙋ́ть вы́нꙋ:

ѳ҃. Не прїимꙋ̀ ѿ до́мꙋ твоегѡ̀ тельцѡ́въ, нижѐ ѿ ста́дъ твои́хъ козлѡ́въ.

і҃. Ꙗ҆́кѡ моѝ сꙋ́ть всѝ ѕвѣ́рїе дꙋбра́внїи, ско́ти въ гора́хъ и҆ воло́ве:

а҃і. Позна́хъ всѧ̑ пти̑цы небє́сныѧ, и҆ красота̀ се́льнаѧ со мно́ю є҆́сть.

в҃і. А҆́ще вза́лчꙋ, не рекꙋ̀ тебѣ̀: моѧ́ бо є҆́сть вселе́ннаѧ и҆ и҆сполне́нїе є҆ѧ̀.

г҃і. Є҆да̀ ꙗ҆́мъ мѧса̀ ю҆́нча; и҆лѝ кро́вь козлѡ́въ пїю̀;

д҃і. Пожрѝ бг҃ови же́ртвꙋ хвалы̀ и҆ возда́ждь вы́шнемꙋ моли̑твы твоѧ̑:

є҃і. И҆ призови́ мѧ въ де́нь ско́рби твоеѧ̀, и҆ и҆змꙋ́ тѧ, и҆ просла́виши мѧ̀.

ѕ҃і. Грѣ́шникꙋ же речѐ бг҃ъ: вскꙋ́ю ты̀ повѣ́даеши ѡ҆правда̑нїѧ моѧ̑ и҆ воспрїе́млеши завѣ́тъ мо́й ᲂу҆сты̀ твои́ми;

з҃і. Ты́ же возненави́дѣлъ є҆сѝ наказа́нїе и҆ ѿве́рглъ є҆сѝ словеса̀ моѧ̑ вспѧ́ть.

и҃і. А҆́ще ви́дѣлъ є҆сѝ та́тѧ, те́клъ є҆сѝ съ ни́мъ, и҆ съ прелюбодѣ́емъ ᲂу҆ча́стїе твоѐ полага́лъ є҆сѝ:

ѳ҃і. Оу҆ста̀ твоѧ̑ ᲂу҆мно́жиша ѕло́бꙋ, и҆ ѧ҆зы́къ тво́й сплета́ше льщє́нїѧ:

к҃. Сѣдѧ̀ на бра́та твоего̀ клевета́лъ є҆сѝ и҆ на сы́на ма́тере твоеѧ̀ полага́лъ є҆сѝ собла́знъ.

к҃а. Сїѧ̑ сотвори́лъ є҆сѝ, и҆ ᲂу҆молча́хъ, вознепщева́лъ є҆сѝ беззако́нїе, ꙗ҆́кѡ бꙋ́дꙋ тебѣ̀ подо́бенъ: ѡ҆бличꙋ́ тѧ и҆ предста́влю пред̾ лице́мъ твои́мъ грѣхѝ твоѧ̑.

к҃в. Разꙋмѣ́йте ᲂу҆́бѡ сїѧ̑, забыва́ющїи бг҃а, да не когда̀ похи́титъ, и҆ не бꙋ́детъ и҆збавлѧ́ѧй.

к҃г. Же́ртва хвалы̀ просла́витъ мѧ̀, и҆ та́мѡ пꙋ́ть, и҆́мже ꙗ҆влю̀ є҆мꙋ̀ сп҃се́нїе моѐ.

а҃. Въ коне́цъ, ѱало́мъ дв҃дꙋ, внегда̀ вни́ти къ немꙋ̀ наѳа́нꙋ прⷪ҇ро́кꙋ,

в҃. Є҆гда̀ вни́де къ вирсаві́и женѣ̀ ᲂу҆рі́евѣ, н҃.

г҃. Поми́лꙋй мѧ̀, бж҃е, по вели́цѣй млⷭ҇ти твое́й, и҆ по мно́жествꙋ щедро́тъ твои́хъ ѡ҆чи́сти беззако́нїе моѐ.

д҃. Наипа́че ѡ҆мы́й мѧ̀ ѿ беззако́нїѧ моегѡ̀ и҆ ѿ грѣха̀ моегѡ̀ ѡ҆чи́сти мѧ̀:

є҃. Ꙗ҆́кѡ беззако́нїе моѐ а҆́зъ зна́ю, и҆ грѣ́хъ мо́й предо мно́ю є҆́сть вы́нꙋ.

ѕ҃. Тебѣ̀ є҆ди́номꙋ согрѣши́хъ и҆ лꙋка́вое пред̾ тобо́ю сотвори́хъ: ꙗ҆́кѡ да ѡ҆правди́шисѧ во словесѣ́хъ твои́хъ и҆ побѣди́ши, внегда̀ сꙋди́ти тѝ.

з҃. Се́ бо, въ беззако́нїихъ зача́тъ є҆́смь, и҆ во грѣсѣ́хъ роди́ мѧ ма́ти моѧ̀.

и҃. Се́ бо, и҆́стинꙋ возлюби́лъ є҆сѝ, безвѣ̑стнаѧ и҆ та̑йнаѧ премⷣрости твоеѧ̀ ꙗ҆ви́лъ мѝ є҆сѝ.

ѳ҃. Ѡ҆кропи́ши мѧ̀ ѵ҆ссѡ́помъ, и҆ ѡ҆чи́щꙋсѧ: ѡ҆мы́еши мѧ̀, и҆ па́че снѣ́га ᲂу҆бѣлю́сѧ.

і҃. Слꙋ́хꙋ моемꙋ̀ да́си ра́дость и҆ весе́лїе: возра́дꙋютсѧ кѡ́сти смирє́нныѧ.

а҃і. Ѿвратѝ лицѐ твоѐ ѿ грѣ̑хъ мои́хъ и҆ всѧ̑ беззакѡ́нїѧ моѧ̑ ѡ҆чи́сти.

в҃і. Се́рдце чи́сто сози́жди во мнѣ̀, бж҃е, и҆ дꙋ́хъ пра́въ ѡ҆бновѝ во ᲂу҆тро́бѣ мое́й.

г҃і. Не ѿве́ржи менѐ ѿ лица̀ твоегѡ̀ и҆ дх҃а твоегѡ̀ ст҃а́гѡ не ѿимѝ ѿ менѐ.

д҃і. Возда́ждь мѝ ра́дость сп҃се́нїѧ твоегѡ̀ и҆ дх҃омъ влⷣчнимъ ᲂу҆тверди́ мѧ.

є҃і. Наꙋчꙋ̀ беззакѡ́нныѧ пꙋтє́мъ твои̑мъ, и҆ нечести́вїи къ тебѣ̀ ѡ҆братѧ́тсѧ.

ѕ҃і. И҆зба́ви мѧ̀ ѿ крове́й, бж҃е, бж҃е сп҃се́нїѧ моегѡ̀: возра́дꙋетсѧ ѧ҆зы́къ мо́й пра́вдѣ твое́й.

з҃і. Гдⷭ҇и, ᲂу҆стнѣ̀ моѝ ѿве́рзеши, и҆ ᲂу҆ста̀ моѧ̑ возвѣстѧ́тъ хвалꙋ̀ твою̀.

и҃і. Ꙗ҆́кѡ а҆́ще бы восхотѣ́лъ є҆сѝ же́ртвы, да́лъ бы́хъ ᲂу҆́бѡ: всесожжє́нїѧ не бл҃говоли́ши.

ѳ҃і. Же́ртва бг҃ꙋ дꙋ́хъ сокрꙋше́нъ: се́рдце сокрꙋше́нно и҆ смире́нно бг҃ъ не ᲂу҆ничижи́тъ.

к҃. Оу҆бл҃жѝ, гдⷭ҇и, бл҃говоле́нїемъ твои́мъ сїѡ́на, и҆ да сози́ждꙋтсѧ стѣ́ны і҆ерⷭ҇ли̑мскїѧ:

к҃а. Тогда̀ бл҃говоли́ши же́ртвꙋ пра́вды, возноше́нїе и҆ всесожега́ємаѧ: тогда̀ возложа́тъ на ѻ҆лта́рь тво́й тельцы̀.

Сла́ва:

а҃. Въ коне́цъ, ра́зꙋма дв҃дꙋ,

в҃. Внегда̀ прїитѝ дѡи́кꙋ і҆дꙋме́йскꙋ, и҆ возвѣсти́ти саꙋ́лꙋ, и҆ рещѝ є҆мꙋ̀: прїи́де дв҃дъ въ до́мъ а҆вїмеле́ховъ, н҃а.

г҃. Что̀ хва́лишисѧ во ѕло́бѣ, си́льне; беззако́нїе ве́сь де́нь,

д҃. Непра́вдꙋ ᲂу҆мы́сли ѧ҆зы́къ тво́й: ꙗ҆́кѡ бри́твꙋ и҆з̾ѡщре́нꙋ сотвори́лъ є҆сѝ ле́сть.

є҃. Возлюби́лъ є҆сѝ ѕло́бꙋ па́че бл҃госты́ни, непра́вдꙋ не́же глаго́лати пра́вдꙋ:

ѕ҃. Возлюби́лъ є҆сѝ всѧ̑ глаго́лы потѡ́пныѧ, ѧ҆зы́къ льсти́въ.

з҃. Сегѡ̀ ра́ди бг҃ъ разрꙋши́тъ тѧ̀ до конца̀: восто́ргнетъ тѧ̀, и҆ пресели́тъ тѧ̀ ѿ селе́нїѧ твоегѡ̀ и҆ ко́рень тво́й ѿ землѝ живы́хъ.

и҃. Оу҆́зрѧтъ првⷣнїи и҆ ᲂу҆боѧ́тсѧ, и҆ ѡ҆ не́мъ возсмѣю́тсѧ и҆ рекꙋ́тъ:

ѳ҃. Сѐ, человѣ́къ, и҆́же не положѝ бг҃а помо́щника себѣ̀, но ᲂу҆пова̀ на мно́жество бога́тства своегѡ̀, и҆ возмо́же сꙋето́ю свое́ю.

і҃. А҆́зъ же ꙗ҆́кѡ ма́слина плодови́та въ домꙋ̀ бж҃їи: ᲂу҆пова́хъ на млⷭ҇ть бж҃їю во вѣ́къ и҆ въ вѣ́къ вѣ́ка.

а҃і. И҆сповѣ́мсѧ тебѣ̀ въ вѣ́къ, ꙗ҆́кѡ сотвори́лъ є҆сѝ: и҆ терплю̀ и҆́мѧ твоѐ, ꙗ҆́кѡ бл҃го пред̾ прпⷣбными твои́ми.

а҃. Въ коне́цъ, ѡ҆ маеле́ѳѣ, ра́зꙋма дв҃дꙋ, н҃в.

в҃. Речѐ безꙋ́менъ въ се́рдцы свое́мъ: нѣ́сть бг҃ъ. Растлѣ́ша и҆ ѡ҆мерзи́шасѧ въ беззако́нїихъ, нѣ́сть творѧ́й бл҃го́е.

г҃. Бг҃ъ съ нб҃сѐ прини́че на сы́ны человѣ́чєскїѧ, ви́дѣти, а҆́ще є҆́сть разꙋмѣва́ѧй и҆лѝ взыска́ѧй бг҃а.

д҃. Всѝ ᲂу҆клони́шасѧ, вкꙋ́пѣ непотре́бни бы́ша: нѣ́сть творѧ́й бл҃го́е, нѣ́сть до є҆ди́нагѡ.

є҃. Ни лѝ ᲂу҆разꙋмѣ́ютъ всѝ дѣ́лающїи беззако́нїе, снѣда́ющїи лю́ди моѧ̑ въ снѣ́дь хлѣ́ба; гдⷭ҇а не призва́ша.

ѕ҃. Та́мѡ ᲂу҆страши́шасѧ стра́ха, и҆дѣ́же не бѣ̀ стра́хъ: ꙗ҆́кѡ бг҃ъ разсы́па кѡ́сти человѣкоꙋго́дникѡвъ: постыдѣ́шасѧ, ꙗ҆́кѡ бг҃ъ ᲂу҆ничижѝ и҆̀хъ.

з҃. Кто̀ да́стъ ѿ сїѡ́на сп҃се́нїе і҆и҃лево; внегда̀ возврати́тъ бг҃ъ плѣне́нїе люде́й свои́хъ, возра́дꙋетсѧ і҆а́кѡвъ и҆ возвесели́тсѧ і҆и҃ль.

а҃. Въ коне́цъ, въ пѣ́снехъ ра́зꙋма дв҃дꙋ,

в҃. Внегда̀ прїитѝ зїфе́ємъ и҆ рещѝ саꙋ́лови: не се́ ли, дв҃дъ скры́сѧ въ на́съ; н҃г.

г҃. Бж҃е, во и҆́мѧ твоѐ сп҃си́ мѧ и҆ въ си́лѣ твое́й сꙋди́ ми.

д҃. Бж҃е, ᲂу҆слы́ши моли́твꙋ мою̀, внꙋшѝ глаго́лы ᲂу҆́стъ мои́хъ:

є҃. Ꙗ҆́кѡ чꙋ́ждїи воста́ша на мѧ̀, и҆ крѣ́пцыи взыска́ша дꙋ́шꙋ мою̀, и҆ не предложи́ша бг҃а пред̾ собо́ю.

ѕ҃. Се́ бо, бг҃ъ помога́етъ мѝ, и҆ гдⷭ҇ь застꙋ́пникъ дꙋшѝ мое́й:

з҃. Ѿврати́тъ ѕла̑ѧ врагѡ́мъ мои̑мъ: и҆́стиною твое́ю потребѝ и҆̀хъ.

и҃. Во́лею пожрꙋ̀ тебѣ̀, и҆сповѣ́мсѧ и҆́мени твоемꙋ̀, гдⷭ҇и, ꙗ҆́кѡ бл҃го:

ѳ҃. Ꙗ҆́кѡ ѿ всѧ́кїѧ печа́ли и҆зба́вилъ мѧ̀ є҆сѝ, и҆ на врагѝ моѧ̑ воззрѣ̀ ѻ҆́ко моѐ.

а҃. Въ коне́цъ, въ пѣ́снехъ ра́зꙋма, а҆са́фꙋ, ѱало́мъ, н҃д.

в҃. Внꙋшѝ, бж҃е, моли́твꙋ мою̀ и҆ не пре́зри моле́нїѧ моегѡ̀:

г҃. Вонми́ ми и҆ ᲂу҆слы́ши мѧ̀: возскорбѣ́хъ ꙾печа́лїю мое́ю꙾ ¹³, и҆ смѧто́хсѧ

д҃. Ѿ гла́са вра́жїѧ и҆ ѿ стꙋже́нїѧ грѣ́шнича: ꙗ҆́кѡ ᲂу҆клони́ша на мѧ̀ беззако́нїе и҆ во гнѣ́вѣ враждова́хꙋ мѝ.

є҃. Се́рдце моѐ смѧте́сѧ во мнѣ̀, и҆ боѧ́знь сме́рти нападѐ на мѧ̀:

ѕ҃. Стра́хъ и҆ тре́петъ прїи́де на мѧ̀, и҆ покры́ мѧ тма̀.

з҃. И҆ рѣ́хъ: кто̀ да́стъ мѝ крилѣ̑ ꙗ҆́кѡ голꙋби̑нѣ; и҆ полещꙋ̀, и҆ почі́ю.

и҃. Сѐ, ᲂу҆дали́хсѧ бѣ́гаѧ и҆ водвори́хсѧ въ пꙋсты́ни.

ѳ҃. Ча́ѧхъ бг҃а сп҃са́ющагѡ мѧ̀ ѿ малодꙋ́шїѧ и҆ ѿ бꙋ́ри.

і҃. Потопѝ, гдⷭ҇и, и҆ раздѣлѝ ѧ҆зы́ки и҆́хъ: ꙗ҆́кѡ ви́дѣхъ беззако́нїе и҆ прерѣка́нїе во гра́дѣ.

а҃і. Дне́мъ и҆ но́щїю ѡ҆бы́детъ и҆̀ по стѣна́мъ є҆гѡ̀: беззако́нїе и҆ трꙋ́дъ посредѣ̀ є҆гѡ̀, и҆ непра́вда:

в҃і. И҆ не ѡ҆скꙋдѣ̀ ѿ сто́гнъ є҆гѡ̀ ли́хва и҆ ле́сть.

г҃і. Ꙗ҆́кѡ а҆́ще бы вра́гъ поноси́лъ мѝ, претерпѣ́лъ бы́хъ ᲂу҆́бѡ: и҆ а҆́ще бы ненави́дѧй мѧ̀ на мѧ̀ велерѣ́чевалъ, ᲂу҆кры́лъ бы́хъ сѧ ѿ негѡ̀.

д҃і. Ты́ же, человѣ́че равнодꙋ́шне, влады́ко мо́й и҆ зна́емый мо́й,

є҃і. И҆́же кꙋ́пнѡ наслажда́лсѧ є҆сѝ со мно́ю бра́шенъ: въ домꙋ̀ бж҃їи ходи́хомъ є҆диномышле́нїемъ.

ѕ҃і. Да прїи́детъ же сме́рть на нѧ̀, и҆ да сни́дꙋтъ во а҆́дъ жи́ви: ꙗ҆́кѡ лꙋка́вство въ жили́щахъ и҆́хъ, посредѣ̀ и҆́хъ.

з҃і. А҆́зъ къ бг҃ꙋ воззва́хъ, и҆ гдⷭ҇ь ᲂу҆слы́ша мѧ̀.

и҃і. Ве́черъ и҆ заꙋ́тра и҆ полꙋ́дне повѣ́мъ и҆ возвѣщꙋ̀, и҆ ᲂу҆слы́шитъ гла́съ мо́й.

ѳ҃і. И҆зба́витъ ми́ромъ дꙋ́шꙋ мою̀ ѿ приближа́ющихсѧ мнѣ̀: ꙗ҆́кѡ во мно́зѣ бѧ́хꙋ со мно́ю.

к҃. Оу҆слы́шитъ бг҃ъ, и҆ смири́тъ ѧ҆̀ сы́й пре́жде вѣ̑къ: нѣ́сть бо и҆̀мъ и҆змѣне́нїѧ, ꙗ҆́кѡ не ᲂу҆боѧ́шасѧ бг҃а.

к҃а. Прострѐ рꙋ́кꙋ свою̀ на воздаѧ́нїе: ѡ҆скверни́ша завѣ́тъ є҆гѡ̀.

к҃в. Раздѣли́шасѧ ѿ гнѣ́ва лица̀ є҆гѡ̀, и҆ прибли́жишасѧ сердца̀ и҆́хъ: ᲂу҆мѧ́кнꙋша словеса̀ и҆́хъ па́че є҆ле́а, и҆ та̑ сꙋ́ть стрѣ́лы.

к҃г. Возве́рзи на гдⷭ҇а печа́ль твою̀, и҆ то́й тѧ̀ препита́етъ: не да́стъ въ вѣ́къ молвы̀ првⷣникꙋ.

к҃д. Ты́ же, бж҃е, низведе́ши и҆̀хъ въ стꙋдене́цъ и҆стлѣ́нїѧ: мꙋ́жїе крове́й и҆ льстѝ не преполовѧ́тъ дні́й свои́хъ. А҆́зъ же, гдⷭ҇и, ᲂу҆пова́ю на тѧ̀.

Сла́ва:

По з҃-й каѳі́смѣ, трист҃о́е.

Та́же тропарѝ, гла́съ є҃:

Сꙋдїѝ сѣдѧ́щꙋ и҆ а҆́гг҃лѡмъ стоѧ́щымъ, трꙋбѣ̀ гласѧ́щей, пла́мени горѧ́щꙋ, что̀ сотвори́ши дꙋшѐ моѧ̀, ведо́ма на сꙋ́дъ; тогда́ бо лю̑таѧ твоѧ̑ предста́нꙋтъ, и҆ та̑йнаѧ ѡ҆блича́тсѧ согрѣшє́нїѧ. тѣ́мже пре́жде конца̀ возопі́й сꙋдїѝ: бж҃е ѡ҆чи́сти мѧ̀, и҆ сп҃си́ мѧ.

Сла́ва: Всѝ побди́мъ, и҆ хрⷭ҇та̀ ᲂу҆срѧ́щимъ со мно́жествомъ є҆ле́а, и҆ свѣща́ми свѣ́тлыми, ꙗ҆́кѡ да черто́га внꙋ́трь сподо́бимсѧ. и҆́же бо внѣ̀ двере́й пости́гнꙋвый, бездѣ́льнѡ бг҃ови воззове́тъ: поми́лꙋй мѧ̀.

И҆ ны́нѣ: На ѻ҆дрѣ̀ лежа̀ согрѣше́нїй мно́гихъ, ѡ҆крада́емь є҆́смь въ наде́жди сп҃се́нїѧ моегѡ̀: и҆́бо со́нъ моеѧ̀ лѣ́ности хода́тайствꙋетъ дꙋшѝ мое́й мꙋ́кꙋ. но ты̀ бж҃е рожде́йсѧ ѿ дв҃ы, воздви́гни мѧ̀ къ твоемꙋ̀ пѣ́нїю, да сла́влю тѧ̀.

Гдⷭ҇и поми́лꙋй, м҃. и҆ мл҃тва:

Гдⷭ҇и бж҃е мо́й, ꙗ҆́кѡ бл҃гъ и҆ чл҃вѣколю́бецъ, мнѡ́гїѧ млⷭ҇ти сотвори́лъ є҆сѝ со мно́ю, ꙗ҆̀же не ча́ѧхъ ви́дѣти, и҆ что̀ возда́мъ твое́й бл҃гости, гдⷭ҇и мо́й гдⷭ҇и; бл҃годарю̀ твоѐ многопѣ́тое и҆́мѧ: бл҃годарю̀ твоѐ неисповѣди́мое на мнѣ̀ бл҃гоꙋтро́бїе: бл҃годарю̀ безприкла́дное твоѐ долготерпѣ́нїе. и҆ ѿ ны́нѣ застꙋпѝ, и҆ помозѝ мнѣ̀, и҆ покры́й мѧ̀ влⷣко ѿ всѣ́хъ, є҆́же не ктомꙋ̀ согрѣша́ти пред̾ тобо́ю: ты́ бо вѣ́си є҆стества̀ моегѡ̀ ᲂу҆добопоползнове́нное, ты̀ вѣ́си безꙋ́мїе моѐ, ты̀ вѣ́си мно́ю содѣ̑ѧннаѧ, ꙗ҆̀же въ вѣ́дѣнїи и҆ не въ вѣ́дѣнїи, ꙗ҆̀же вѡ́льнаѧ и҆ невѡ́льнаѧ, ꙗ҆̀же въ нощѝ и҆ во днѝ, и҆ во ᲂу҆мѣ̀ и҆ мы́сли: ꙗ҆́кѡ бла́гъ ᲂу҆́бѡ и҆ чл҃вѣколю́бецъ бг҃ъ, ѡ҆чи́сти ѧ҆̀ росо́ю млⷭ҇ти твоеѧ̀ пребл҃гі́й гдⷭ҇и, и҆ сп҃сѝ на́съ и҆́мене ра́ди твоегѡ̀ ст҃а́гѡ, и҆́миже вѣ́си сꙋдьба́ми. ты́ бо є҆сѝ свѣ́тъ, и҆ и҆́стина, и҆ живо́тъ: и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

а҃. Въ коне́цъ, ѡ҆ лю́дехъ ѿ ст҃ы́хъ ᲂу҆дале́нныхъ, дв҃дꙋ въ столпописа́нїе, внегда̀ ᲂу҆держа́ша и҆̀ и҆ноплемє́нницы въ ге́ѳѣ, ѱало́мъ, н҃є.

в҃. Поми́лꙋй мѧ̀, бж҃е, ꙗ҆́кѡ попра́ мѧ человѣ́къ: ве́сь де́нь борѧ̀ стꙋжи́ ми.

г҃. Попра́ша мѧ̀ вразѝ моѝ ве́сь де́нь: ꙗ҆́кѡ мно́зи борю́щїи мѧ̀ съ высоты̀.

д҃. Въ де́нь ꙾не ᲂу҆бою́сѧ꙾ ¹⁴, а҆́зъ же ᲂу҆пова́ю на тѧ̀.

є҃. Ѡ҆ бз҃ѣ похвалю̀ словеса̀ моѧ̑: на бг҃а ᲂу҆пова́хъ, не ᲂу҆бою́сѧ: что̀ сотвори́тъ мнѣ̀ пло́ть;

ѕ҃. Ве́сь де́нь слове́съ мои́хъ гнꙋша́хꙋсѧ: на мѧ̀ всѧ̑ помышлє́нїѧ и҆́хъ на ѕло̀.

з҃. Вселѧ́тсѧ и҆ скры́ютъ, ꙾ті́и пѧ́тꙋ мою̀ сохранѧ́тъ, ꙗ҆́коже потерпѣ́ша дꙋ́шꙋ мою̀꙾ ¹⁵.

и҃. Ни ѡ҆ чесо́мъ же ѿри́неши ѧ҆̀, гнѣ́вомъ лю́ди низведе́ши.

ѳ҃. Бж҃е, живо́тъ мо́й возвѣсти́хъ тебѣ̀: положи́лъ є҆сѝ сле́зы моѧ̑ пред̾ тобо́ю, ꙗ҆́кѡ и҆ во ѡ҆бѣтова́нїи твое́мъ.

і҃. Да возвратѧ́тсѧ вразѝ моѝ вспѧ́ть, во́ньже а҆́ще де́нь призовꙋ́ тѧ: сѐ, позна́хъ, ꙗ҆́кѡ бг҃ъ мо́й є҆сѝ ты̀.

а҃і. Ѡ҆ бз҃ѣ похвалю̀ глаго́лъ, ѡ҆ гдⷭ҇ѣ похвалю̀ сло́во.

в҃і. На бг҃а ᲂу҆пова́хъ, не ᲂу҆бою́сѧ: что̀ сотвори́тъ мнѣ̀ человѣ́къ;

г҃і. Во мнѣ̀, бж҃е, моли́твы, ꙗ҆̀же возда́мъ хвалы̀ твоеѧ̀:

д҃і. Ꙗ҆́кѡ и҆зба́вилъ є҆сѝ дꙋ́шꙋ мою̀ ѿ сме́рти, ѻ҆́чи моѝ ѿ сле́зъ и҆ но́зѣ моѝ ѿ поползнове́нїѧ: бл҃гоꙋгождꙋ̀ пред̾ гдⷭ҇емъ во свѣ́тѣ живы́хъ.

а҃. Въ коне́цъ, да не растли́ши, дв҃дꙋ въ столпописа́нїе, внегда̀ є҆мꙋ̀ ѿбѣга́ти ѿ лица̀ саꙋ́лова въ пеще́рꙋ, н҃ѕ.

в҃. Поми́лꙋй мѧ̀, бж҃е, поми́лꙋй мѧ̀: ꙗ҆́кѡ на тѧ̀ ᲂу҆пова̀ дꙋша̀ моѧ̀, и҆ на сѣ́нь крилꙋ̑ твоє́ю надѣ́юсѧ, до́ндеже пре́йдетъ беззако́нїе.

г҃. Воззовꙋ̀ къ бг҃ꙋ вы́шнемꙋ, бг҃ꙋ бл҃годѣ́ѧвшемꙋ мнѣ̀.

д҃. Посла̀ съ нб҃сѐ и҆ сп҃се́ мѧ, дадѐ въ поноше́нїе попира́ющыѧ мѧ̀: посла̀ бг҃ъ млⷭ҇ть свою̀ и҆ и҆́стинꙋ свою̀,

є҃. И҆ и҆зба́ви дꙋ́шꙋ мою̀ ѿ среды̀ скѵ́мнѡвъ. Поспа́хъ смꙋще́нъ: сы́нове человѣ́честїи, зꙋ́бы и҆́хъ ѻ҆рꙋ̑жїѧ и҆ стрѣ́лы, и҆ ѧ҆зы́къ и҆́хъ ме́чь ѻ҆́стръ.

ѕ҃. Вознеси́сѧ на нб҃са̀, бж҃е, и҆ по все́й землѝ сла́ва твоѧ̀.

з҃. Сѣ́ть ᲂу҆гото́ваша нога́мъ мои̑мъ, и҆ слѧко́ша дꙋ́шꙋ мою̀: и҆скопа́ша пред̾ лице́мъ мои́мъ ꙗ҆́мꙋ, и҆ впадо́ша въ ню̀.

и҃. Гото́во се́рдце моѐ, бж҃е, гото́во се́рдце моѐ: воспою̀ и҆ пою̀ во сла́вѣ мое́й.

ѳ҃. Воста́ни, сла́ва моѧ̀, воста́ни, ѱалти́рю и҆ гꙋ́сли: воста́нꙋ ра́нѡ.

і҃. И҆сповѣ́мсѧ тебѣ̀ въ лю́дехъ, гдⷭ҇и, воспою̀ тебѣ̀ во ꙗ҆зы́цѣхъ:

а҃і. Ꙗ҆́кѡ возвели́чисѧ до нб҃съ млⷭ҇ть твоѧ̀ и҆ да́же до ѻ҆́блакъ и҆́стина твоѧ̀.

в҃і. Вознеси́сѧ на нб҃са̀, бж҃е, и҆ по все́й землѝ сла́ва твоѧ̀.

а҃. Въ коне́цъ, да не растли́ши, дв҃дꙋ въ столпописа́нїе, н҃з.

в҃. А҆́ще вои́стиннꙋ ᲂу҆́бѡ пра́вдꙋ глаго́лете, пра̑ваѧ сꙋди́те, сы́нове человѣ́честїи.

г҃. И҆́бо въ се́рдцы беззако́нїе дѣ́лаете на землѝ, непра́вдꙋ рꙋ́ки ва́шѧ сплета́ютъ.

д҃. Ѡ҆чꙋжди́шасѧ грѣ̑шницы ѿ ложе́снъ, заблꙋди́ша ѿ чре́ва, глаго́лаша лжꙋ̀.

є҃. Ꙗ҆́рость и҆́хъ по подо́бїю ѕмїинꙋ̀, ꙗ҆́кѡ а҆́спїда глꙋ́ха и҆ затыка́ющагѡ ᲂу҆́ши своѝ,

ѕ҃. И҆́же не ᲂу҆слы́шитъ гла́са ѡ҆бава́ющихъ, ѡ҆бава́емь ѡ҆бава́етсѧ ѿ премꙋ́дра.

з҃. Бг҃ъ сокрꙋши́тъ зꙋ́бы и҆́хъ во ᲂу҆стѣ́хъ и҆́хъ: членѡ́вныѧ львѡ́въ сокрꙋши́лъ є҆́сть гдⷭ҇ь.

и҃. Оу҆ничижа́тсѧ ꙗ҆́кѡ вода̀ мимотекꙋ́щаѧ: напрѧже́тъ лꙋ́къ сво́й, до́ндеже и҆знемо́гꙋтъ.

ѳ҃. Ꙗ҆́кѡ во́скъ раста́ѧвъ ѿи́мꙋтсѧ: падѐ ѻ҆́гнь на ни́хъ, и҆ не ви́дѣша со́лнца.

і҃. Пре́жде є҆́же разꙋмѣ́ти тє́рнїѧ ва́шегѡ ра́мна, ꙗ҆́кѡ жи̑вы, ꙗ҆́кѡ во гнѣ́вѣ пожре́тъ ѧ҆̀.

а҃і. Возвесели́тсѧ првⷣникъ, є҆гда̀ ᲂу҆ви́дитъ ѿмще́нїе: рꙋ́цѣ своѝ ᲂу҆мы́етъ въ кро́ви грѣ́шника.

в҃і. И҆ рече́тъ человѣ́къ: а҆́ще ᲂу҆́бѡ є҆́сть пло́дъ првⷣникꙋ, ᲂу҆̀бо є҆́сть бг҃ъ сꙋдѧ̀ и҆̀мъ на землѝ.

Сла́ва:

а҃. Въ коне́цъ, да не растли́ши, дв҃дꙋ въ столпописа́нїе, внегда̀ посла̀ саꙋ́лъ и҆ стрежѐ до́мъ є҆гѡ̀, є҆́же ᲂу҆мертви́ти є҆го̀, н҃и.

в҃. И҆зми́ мѧ ѿ вра̑гъ мои́хъ, бж҃е, и҆ ѿ востаю́щихъ на мѧ̀ и҆зба́ви мѧ̀:

г҃. И҆зба́ви мѧ̀ ѿ дѣ́лающихъ беззако́нїе, и҆ ѿ мꙋ̑жъ крове́й сп҃си́ мѧ.

д҃. Ꙗ҆́кѡ сѐ, ᲂу҆лови́ша дꙋ́шꙋ мою̀, нападо́ша на мѧ̀ крѣ́пцыи: нижѐ беззако́нїе моѐ, нижѐ грѣ́хъ мо́й, гдⷭ҇и:

є҃. Без̾ беззако́нїѧ теко́хъ и҆ и҆спра́вихъ: воста́ни въ срѣ́тенїе моѐ и҆ ви́ждь.

ѕ҃. И҆ ты̀, гдⷭ҇и бж҃е си́лъ, бж҃е і҆и҃левъ, вонмѝ посѣти́ти всѧ̑ ꙗ҆зы́ки: да не ᲂу҆ще́дриши всѧ̑ дѣ́лающыѧ беззако́нїе.

з҃. Возвратѧ́тсѧ на ве́черъ, и҆ вза́лчꙋтъ ꙗ҆́кѡ пе́съ, и҆ ѡ҆бы́дꙋтъ гра́дъ.

и҃. Сѐ, ті́и ѿвѣща́ютъ ᲂу҆сты̑ свои́ми, и҆ ме́чь во ᲂу҆стна́хъ и҆́хъ: ꙗ҆́кѡ кто̀ слы́ша;

ѳ҃. И҆ ты̀, гдⷭ҇и, посмѣе́шисѧ и҆̀мъ, ᲂу҆ничижи́ши всѧ̑ ꙗ҆зы́ки.

і҃. Держа́вꙋ мою̀ къ тебѣ̀ сохраню̀: ꙗ҆́кѡ ты̀, бж҃е, застꙋ́пникъ мо́й є҆сѝ.

а҃і. Бг҃ъ мо́й, млⷭ҇ть є҆гѡ̀ предвари́тъ мѧ̀: бг҃ъ мо́й, ꙗ҆ви́тъ мнѣ̀ на вразѣ́хъ мои́хъ.

в҃і. Не ᲂу҆бі́й и҆̀хъ, да не когда̀ забꙋ́дꙋтъ зако́нъ тво́й: расточѝ ѧ҆̀ си́лою твое́ю и҆ низведѝ ѧ҆̀, защи́тниче мо́й, гдⷭ҇и,

г҃і. рѣ́хъ ᲂу҆́стъ и҆́хъ, сло́во ᲂу҆сте́нъ и҆́хъ: и҆ ꙗ҆́ти да бꙋ́дꙋтъ въ горды́ни свое́й, и҆ ѿ клѧ́твы и҆ лжѝ возвѣстѧ́тсѧ въ кончи́нѣ,

д҃і. Во гнѣ́вѣ кончи́ны, и҆ не бꙋ́дꙋтъ: и҆ ᲂу҆вѣ́дѧтъ, ꙗ҆́кѡ бг҃ъ влⷣчествꙋетъ і҆а́кѡвомъ и҆ концы̀ землѝ.

є҃і. Возвратѧ́тсѧ на ве́черъ, и҆ вза́лчꙋтъ ꙗ҆́кѡ пе́съ, и҆ ѡ҆бы́дꙋтъ гра́дъ:

ѕ҃і. Ті́и разы́дꙋтсѧ ꙗ҆́сти: а҆́ще ли же не насы́тѧтсѧ, и҆ поро́пщꙋтъ.

з҃і. А҆́зъ же воспою̀ си́лꙋ твою̀ и҆ возра́дꙋюсѧ заꙋ́тра ѡ҆ млⷭ҇ти твое́й: ꙗ҆́кѡ бы́лъ є҆сѝ застꙋ́пникъ мо́й и҆ прибѣ́жище моѐ въ де́нь ско́рби моеѧ̀.

и҃і. Помо́щникъ мо́й є҆сѝ, тебѣ̀ пою̀: ꙗ҆́кѡ бг҃ъ застꙋ́пникъ мо́й є҆сѝ, бж҃е мо́й, млⷭ҇ть моѧ̀.

а҃. Въ коне́цъ, ѡ҆ и҆змѣни́тисѧ хотѧ́щихъ, въ столпописа́нїе дв҃дꙋ, въ наꙋче́нїе:

в҃. Внегда̀ сожжѐ средорѣ́чїе сѷрі́йское и҆ сѷрі́ю сова́лскꙋю, и҆ возврати́сѧ і҆ѡа́въ и҆ поразѝ є҆дѡ́ма въ де́бри соле́й двана́десѧть ты́сѧщъ, н҃ѳ.

г҃. Бж҃е, ѿри́нꙋлъ ны̀ є҆сѝ и҆ низложи́лъ є҆сѝ на́съ, разгнѣ́валсѧ є҆сѝ и҆ ᲂу҆ще́дрилъ є҆сѝ на́съ.

д҃. Стрѧ́слъ є҆сѝ зе́млю и҆ смꙋти́лъ є҆сѝ ю҆̀: и҆сцѣлѝ сокрꙋше́нїе є҆ѧ̀, ꙗ҆́кѡ подви́жесѧ.

є҃. Показа́лъ є҆сѝ лю́демъ твои̑мъ жестѡ́каѧ: напои́лъ є҆сѝ на́съ вїно́мъ ᲂу҆миле́нїѧ.

ѕ҃. Да́лъ є҆сѝ боѧ́щымсѧ тебє̀ зна́менїе, є҆́же ᲂу҆бѣжа́ти ѿ лица̀ лꙋ́ка.

з҃. Ꙗ҆́кѡ да и҆зба́вѧтсѧ возлю́бленнїи твоѝ, сп҃сѝ десни́цею твое́ю и҆ ᲂу҆слы́ши мѧ̀.

и҃. Бг҃ъ возглаго́ла во ст҃ѣ́мъ свое́мъ: возра́дꙋюсѧ, и҆ раздѣлю̀ сїки́мꙋ, и҆ ю҆до́ль жили́щъ размѣ́рю.

ѳ҃. Мо́й є҆́сть галаа́дъ, и҆ мо́й є҆́сть манассі́й, є҆фре́мъ крѣ́пость главы̀ моеѧ̀, і҆ꙋ́да ца́рь мо́й.

і҃. Мѡа́въ коно́бъ ᲂу҆пова́нїѧ моегѡ̀: на і҆дꙋме́ю прострꙋ̀ сапо́гъ мо́й: мнѣ̀ и҆ноплемє́нницы покори́шасѧ.

а҃і. Кто̀ введе́тъ мѧ̀ во гра́дъ ѡ҆гражде́нїѧ; и҆лѝ кто̀ наста́витъ мѧ̀ до і҆дꙋме́и;

в҃і. Не ты́ ли, бж҃е, ѿри́нꙋвый на́съ; и҆ не и҆зы́деши, бж҃е, въ си́лахъ на́шихъ;

г҃і. Да́ждь на́мъ по́мощь ѿ ско́рби: и҆ сꙋ́етно спасе́нїе человѣ́ческо.

д҃і. Ѡ҆ бз҃ѣ сотвори́мъ си́лꙋ: и҆ то́й ᲂу҆ничижи́тъ стꙋжа́ющыѧ на́мъ.

а҃. Въ коне́цъ, въ пѣ́снехъ, дв҃дꙋ ѱало́мъ, ѯ҃.

в҃. Оу҆слы́ши, бж҃е, моле́нїе моѐ, вонмѝ моли́твѣ мое́й:

г҃. Ѿ конє́цъ землѝ къ тебѣ̀ воззва́хъ, внегда̀ ᲂу҆ны̀ се́рдце моѐ: на ка́мень возне́слъ мѧ̀ є҆сѝ, наста́вилъ мѧ̀ є҆сѝ,

д҃. Ꙗ҆́кѡ бы́лъ є҆сѝ ᲂу҆пова́нїе моѐ, сто́лпъ крѣ́пости ѿ лица̀ вра́жїѧ.

є҃. Вселю́сѧ въ селе́нїи твое́мъ во вѣ́ки, покры́юсѧ въ кро́вѣ кри́лъ твои́хъ.

ѕ҃. Ꙗ҆́кѡ ты̀, бж҃е, ᲂу҆слы́шалъ є҆сѝ моли̑твы моѧ̑, да́лъ є҆сѝ достоѧ́нїе боѧ́щымсѧ и҆́мене твоегѡ̀.

з҃. Дни̑ на дни̑ царє́вы приложи́ши, лѣ̑та є҆гѡ̀ до днѐ ро́да и҆ ро́да.

и҃. Пребꙋ́детъ въ вѣ́къ пред̾ бг҃омъ: млⷭ҇ть и҆ и҆́стинꙋ є҆гѡ̀ кто̀ взы́щетъ;

ѳ҃. Та́кѡ воспою̀ и҆́мени твоемꙋ̀ во вѣ́ки, возда́ти мѝ моли̑твы моѧ̑ де́нь ѿ днѐ.

Сла́ва:

а҃. Въ коне́цъ, ѡ҆ і҆дїѳꙋ́мѣ, ѱало́мъ дв҃дꙋ, ѯ҃а.

в҃. Не бг҃ꙋ ли повине́тсѧ дꙋша̀ моѧ̀; ѿ тогѡ́ бо сп҃се́нїе моѐ.

г҃. И҆́бо то́й бг҃ъ мо́й и҆ сп҃съ мо́й, застꙋ́пникъ мо́й: не подви́жꙋсѧ наипа́че.

д҃. Доко́лѣ належитѐ на человѣ́ка; ᲂу҆бива́ете всѝ вы̀, ꙗ҆́кѡ стѣнѣ̀ преклоне́нѣ и҆ ѡ҆пло́тꙋ возринове́нꙋ.

є҃. Ѻ҆ба́че цѣ́нꙋ мою̀ совѣща́ша ѿри́нꙋти, теко́ша въ жа́жди: ᲂу҆сты̑ свои́ми бл҃гословлѧ́хꙋ, и҆ се́рдцемъ свои́мъ кленѧ́хꙋ.

ѕ҃. Ѻ҆ба́че бг҃ови повини́сѧ, дꙋшѐ моѧ̀: ꙗ҆́кѡ ѿ тогѡ̀ терпѣ́нїе моѐ.

з҃. И҆́бо то́й бг҃ъ мо́й и҆ сп҃съ мо́й, застꙋ́пникъ мо́й: не преселю́сѧ.

и҃. Ѡ҆ бз҃ѣ сп҃се́нїе моѐ и҆ сла́ва моѧ̀: бг҃ъ по́мощи моеѧ̀, и҆ ᲂу҆пова́нїе моѐ на бг҃а.

ѳ҃. Оу҆пова́йте на него̀, ве́сь со́нмъ люде́й: и҆злїѧ́йте пред̾ ни́мъ сердца̀ ва̑ша, ꙗ҆́кѡ бг҃ъ помо́щникъ на́шъ.

і҃. Ѻ҆ба́че сꙋ́етни сы́нове человѣ́честїи, лжи́ви сы́нове человѣ́честїи въ мѣ́рилѣхъ є҆́же непра́вдовати: ті́и ѿ сꙋеты̀ вкꙋ́пѣ.

а҃і. Не ᲂу҆пова́йте на непра́вдꙋ, и҆ на восхище́нїе не жела́йте: бога́тство а҆́ще тече́тъ, не прилага́йте се́рдца.

в҃і. Є҆ди́ною глаго́ла бг҃ъ, дво́ѧ сїѧ̑ слы́шахъ, занѐ держа́ва бж҃їѧ,

г҃і. И҆ твоѧ̀, гдⷭ҇и, млⷭ҇ть: ꙗ҆́кѡ ты̀ возда́си комꙋ́ждо по дѣлѡ́мъ є҆гѡ̀.

а҃. Ѱало́мъ дв҃дꙋ, внегда̀ бы́ти є҆мꙋ̀ въ пꙋсты́ни і҆ꙋде́йстѣй, ѯ҃в.

в҃. Бж҃е, бж҃е мо́й, къ тебѣ̀ ᲂу҆́тренюю: возжада̀ тебѐ дꙋша̀ моѧ̀, ко́ль мно́жицею тебѣ̀ пло́ть моѧ̀, въ землѝ пꙋ́стѣ и҆ непрохо́днѣ и҆ безво́днѣ.

г҃. Та́кѡ во ст҃ѣ́мъ ꙗ҆ви́хсѧ тебѣ̀, ви́дѣти си́лꙋ твою̀ и҆ сла́вꙋ твою̀.

д҃. Ꙗ҆́кѡ лꙋ́чши млⷭ҇ть твоѧ̀ па́че живѡ́тъ: ᲂу҆стнѣ̀ моѝ похвали́тѣ тѧ̀.

є҃. Та́кѡ бл҃гословлю́ тѧ въ животѣ̀ мое́мъ и҆ ѡ҆ и҆́мени твое́мъ воздѣжꙋ̀ рꙋ́цѣ моѝ.

ѕ҃. Ꙗ҆́кѡ ѿ тꙋ́ка и҆ ма́сти да и҆спо́лнитсѧ дꙋша̀ моѧ̀, и҆ ᲂу҆стна́ма ра́дости восхва́лѧтъ тѧ̀ ᲂу҆ста̀ моѧ̑.

з҃. А҆́ще помина́хъ тѧ̀ на посте́ли мое́й, на ᲂу҆́треннихъ поꙋча́хсѧ въ тѧ̀:

и҃. Ꙗ҆́кѡ бы́лъ є҆сѝ помо́щникъ мо́й, и҆ въ кро́вѣ крилꙋ̑ твоє́ю возра́дꙋюсѧ.

ѳ҃. Прильпѐ дꙋша̀ моѧ̀ по тебѣ̀: мене́ же прїѧ́тъ десни́ца твоѧ̀.

і҃. Ті́и же всꙋ́е и҆ска́ша дꙋ́шꙋ мою̀: вни́дꙋтъ въ преиспѡ́днѧѧ землѝ:

а҃і. Предадѧ́тсѧ въ рꙋ́ки ѻ҆рꙋ́жїѧ, ча̑сти ли́совѡмъ бꙋ́дꙋтъ.

в҃і. Ца́рь же возвесели́тсѧ ѡ҆ бз҃ѣ: похва́литсѧ всѧ́къ клены́йсѧ и҆́мъ, ꙗ҆́кѡ загради́шасѧ ᲂу҆ста̀ глаго́лющихъ непра́вєднаѧ.

а҃. Въ коне́цъ, ѱало́мъ дв҃дꙋ, ѯ҃г.

в҃. Оу҆слы́ши, бж҃е, гла́съ мо́й, внегда̀ моли́ти ми сѧ къ тебѣ̀: ѿ стра́ха вра́жїѧ и҆змѝ дꙋ́шꙋ мою̀.

г҃. Покры́й мѧ̀ ѿ со́нма лꙋка́внꙋющихъ, ѿ мно́жества дѣ́лающихъ непра́вдꙋ:

д҃. И҆̀же и҆з̾ѡстри́ша ꙗ҆́кѡ ме́чь ѧ҆зы́ки своѧ̑, напрѧго́ша лꙋ́къ сво́й, ве́щь го́рькꙋ,

є҃. Сострѣлѧ́ти въ та́йныхъ непоро́чна: внеза́пꙋ сострѣлѧ́ютъ є҆го̀, и҆ не ᲂу҆боѧ́тсѧ.

ѕ҃. Оу҆тверди́ша себѣ̀ сло́во лꙋка́вое: повѣ́даша скры́ти сѣ́ть, рѣ́ша: кто̀ ᲂу҆́зритъ и҆̀хъ;

з҃. И҆спыта́ша беззако́нїе: и҆счезо́ша и҆спыта́ющїи и҆спыта̑нїѧ: пристꙋ́питъ человѣ́къ, и҆ се́рдце глꙋбоко̀.

и҃. И҆ вознесе́тсѧ бг҃ъ: стрѣ́лы младе́нєцъ бы́ша ꙗ҆́звы и҆́хъ,

ѳ҃. И҆ и҆знемого́ша на нѧ̀ ꙗ҆зы́цы и҆́хъ: смꙋти́шасѧ всѝ ви́дѧщїи и҆̀хъ.

і҃. И҆ ᲂу҆боѧ́сѧ всѧ́къ человѣ́къ: и҆ возвѣсти́ша дѣла̀ бж҃їѧ, и҆ творє́нїѧ є҆гѡ̀ разꙋмѣ́ша.

а҃і. Возвесели́тсѧ првⷣникъ ѡ҆ гдⷭ҇ѣ и҆ ᲂу҆пова́етъ на него̀: и҆ похва́лѧтсѧ всѝ пра́вїи срⷣцемъ.

Сла́ва:

По и҃-й каѳі́смѣ, трист҃о́е.

Та́же тропарѝ, гла́съ є҃:

Во глꙋбины̑ мѧ̀ грѣха̀ попо́лзшасѧ, треволне́нїе ѡ҆бꙋрева́етъ ѿча́ѧнїѧ: но предварѝ хрⷭ҇тѐ, ꙗ҆́кѡ всеси́ленъ ᲂу҆пра́вителю всѣ́хъ, и҆ ко приста́нищꙋ ти́хомꙋ ᲂу҆стремѝ безстра́стїѧ, за бл҃гоꙋтро́бїе сп҃се, и҆ сп҃си́ мѧ.

Сла́ва: Дꙋшѐ, ꙗ҆̀же здѣ̀ привре́мєнна, та́мѡ же вѣ̑чна: зрю̀ сꙋди́лище, и҆ на прⷭ҇то́лѣ сꙋдїю̀, и҆ трепе́щꙋ и҆зрече́нїѧ. про́чее дꙋшѐ ѡ҆брати́сѧ, сꙋ́дъ непроща́емь.

И҆ ны́нѣ: Наде́жде ненадѣ́емыхъ, по́моще безпомо́щныхъ, застꙋпле́нїе на тѧ̀ ᲂу҆пова́ющихъ, ст҃а́ѧ влⷣчце бцⷣе, по́мощь твою̀ низпослѝ на́мъ.

Гдⷭ҇и поми́лꙋй. м҃. и҆ мл҃тва:

Гдⷭ҇и ще́дрый, и҆ млⷭ҇тивый, долготерпѣли́ве и҆ многомлⷭ҇тиве, внꙋшѝ мл҃твꙋ, и҆ вонмѝ гла́сꙋ моле́нїѧ моегѡ̀, сотворѝ со мно́ю зна́менїе во бл҃го, наста́ви мѧ̀ на пꙋ́ть тво́й, є҆́же ходи́ти во и҆́стинѣ твое́й: возвеселѝ се́рдце моѐ, во є҆́же боѧ́тисѧ и҆́мене твоегѡ̀ ст҃а́гѡ. Зане́же ве́лїй є҆сѝ, и҆ творѧ́й чꙋдеса̀, ты̀ є҆сѝ бг҃ъ є҆ди́нъ, и҆ нѣ́сть подо́бенъ тебѣ̀ въ бозѣ́хъ гдⷭ҇и, си́льный въ млⷭ҇ти, и҆ бл҃гі́й въ крѣ́пости, во є҆́же помога́ти, и҆ ᲂу҆тѣша́ти, и҆ сп҃са́ти всѧ̑ ᲂу҆пова́ющыѧ на и҆́мѧ твоѐ, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

а҃. Въ коне́цъ, ѱало́мъ пѣ́сни дв҃дꙋ, пѣ́снь і҆еремі́ева и҆ і҆езекі́илева, люде́й преселе́нїѧ, є҆гда̀ хотѧ́хꙋ и҆сходи́ти, ѯ҃д.

в҃. Тебѣ̀ подоба́етъ пѣ́снь, бж҃е, въ сїѡ́нѣ, и҆ тебѣ̀ возда́стсѧ моли́тва во і҆ерⷭ҇ли́мѣ.

г҃. Оу҆слы́ши моли́твꙋ мою̀: къ тебѣ̀ всѧ́ка пло́ть прїи́детъ.

д҃. Словеса̀ беззакѡ́нникъ премого́ша на́съ: и҆ нечє́стїѧ на̑ша ты̀ ѡ҆чи́стиши.

є҃. Бл҃же́нъ, є҆го́же и҆збра́лъ є҆сѝ и҆ прїѧ́лъ, всели́тсѧ во дво́рѣхъ твои́хъ. И҆спо́лнимсѧ во бл҃ги́хъ до́мꙋ твоегѡ̀: ст҃ъ хра́мъ тво́й.

ѕ҃. Ди́венъ въ пра́вдѣ, ᲂу҆слы́ши ны̀, бж҃е, сп҃си́телю на́шъ, ᲂу҆пова́нїе всѣ́хъ конце́й землѝ и҆ сꙋ́щихъ въ мо́ри дале́че:

з҃. Оу҆готовлѧ́ѧй го́ры крѣ́постїю свое́ю, препоѧ́санъ си́лою:

и҃. Смꙋща́ѧй глꙋбинꙋ̀ морскꙋ́ю, шꙋ́мꙋ во́лнъ є҆гѡ̀ кто̀ постои́тъ; смѧтꙋ́тсѧ ꙗ҆зы́цы,

ѳ҃. И҆ ᲂу҆боѧ́тсѧ живꙋ́щїи въ конца́хъ ѿ зна́менїй твои́хъ: и҆схо́ды ᲂу҆́тра и҆ ве́чера ᲂу҆краси́ши.

і҃. Посѣти́лъ є҆сѝ зе́млю и҆ ᲂу҆пои́лъ є҆сѝ ю҆̀, ᲂу҆мно́жилъ є҆сѝ ѡ҆богати́ти ю҆̀: рѣка̀ бж҃їѧ напо́лнисѧ во́дъ: ᲂу҆гото́валъ є҆сѝ пи́щꙋ и҆̀мъ, ꙗ҆́кѡ та́кѡ (є҆́сть) ᲂу҆гото́ванїе.

а҃і. Бразды̑ є҆ѧ̀ ᲂу҆по́й, ᲂу҆мно́жи жи̑та є҆ѧ̀: въ ка́плѧхъ є҆ѧ̀ возвесели́тсѧ ꙾возсїѧ́ющи꙾ ¹⁶.

в҃і. Бл҃гослови́ши вѣне́цъ лѣ́та бла́гости твоеѧ̀, и҆ полѧ̀ твоѧ̑ и҆спо́лнѧтсѧ тꙋ́ка:

г҃і. Разботѣ́ютъ кра̑снаѧ пꙋсты́ни, и҆ ра́достїю хо́лми препоѧ́шꙋтсѧ.

д҃і. Ѡ҆дѣ́ѧшасѧ ѻ҆́вни ѻ҆́вчїи, и҆ ᲂу҆дѡ́лїѧ ᲂу҆мно́жатъ пшени́цꙋ: воззовꙋ́тъ, и҆́бо воспою́тъ.

а҃. Въ коне́цъ, пѣ́снь ѱалма̀ воскрⷭ҇нїѧ, ѯ҃є.

в҃. Воскли́кните гдⷭ҇еви всѧ̀ землѧ̀, по́йте же и҆́мени є҆гѡ̀, дади́те сла́вꙋ хвалѣ̀ є҆гѡ̀.

г҃. Рцы́те бг҃ꙋ: ко́ль стра̑шна дѣла̀ твоѧ̑; во мно́жествѣ си́лы твоеѧ̀ со́лжꙋтъ тебѣ̀ вразѝ твоѝ.

д҃. Всѧ̀ землѧ̀ да покло́нитсѧ тебѣ̀ и҆ пое́тъ тебѣ̀, да пое́тъ же и҆́мени твоемꙋ̀, вы́шнїй.

є҃. Прїиди́те и҆ ви́дите дѣла̀ бж҃їѧ, ко́ль стра́шенъ въ совѣ́тѣхъ па́че сынѡ́въ человѣ́ческихъ.

ѕ҃. Ѡ҆браща́ѧй мо́ре въ сꙋ́шꙋ, въ рѣцѣ̀ про́йдꙋтъ нога́ми: та́мѡ возвесели́мсѧ ѡ҆ не́мъ,

з҃. Влⷣчествꙋющемъ си́лою свое́ю вѣ́комъ: ѻ҆́чи є҆гѡ̀ на ꙗ҆зы́ки призира́етѣ: преѡгорчева́ющїи да не возно́сѧтсѧ въ себѣ̀.

и҃. Бл҃гослови́те, ꙗ҆зы́цы, бг҃а на́шего, и҆ ᲂу҆слы́шанъ сотвори́те гла́съ хвалы̀ є҆гѡ̀,

ѳ҃. Поло́жшагѡ дꙋ́шꙋ мою̀ въ живо́тъ, и҆ не да́вшаго во смѧте́нїе но́гъ мои́хъ.

і҃. Ꙗ҆́кѡ и҆скꙋси́лъ ны̀ є҆сѝ, бж҃е, разже́глъ ны̀ є҆сѝ, ꙗ҆́коже разжиза́етсѧ сребро̀.

а҃і. Вве́лъ ны̀ є҆сѝ въ сѣ́ть, положи́лъ є҆сѝ скѡ́рби на хребтѣ̀ на́шемъ.

в҃і. Возве́лъ є҆сѝ человѣ́ки на главы̑ на́шѧ: проидо́хомъ сквозѣ̀ ѻ҆́гнь и҆ во́дꙋ, и҆ и҆зве́лъ є҆сѝ ны̀ въ поко́й.

г҃і. Вни́дꙋ въ до́мъ тво́й со всесожже́нїемъ, возда́мъ тебѣ̀ моли̑твы моѧ̑,

д҃і. Ꙗ҆̀же и҆зреко́стѣ ᲂу҆стнѣ̀ моѝ, и҆ глаго́лаша ᲂу҆ста̀ моѧ̑ въ ско́рби мое́й.

є҃і. Всесожжє́нїѧ тꙋ̑чна вознесꙋ̀ тебѣ̀ съ кади́ломъ, и҆ ѻ҆вны̀, вознесꙋ̀ тебѣ̀ волы̀ съ кѡзлы̀.

ѕ҃і. Прїиди́те, ᲂу҆слы́шите, и҆ повѣ́мъ ва́мъ, всѝ боѧ́щїисѧ бг҃а, є҆ли̑ка сотворѝ дꙋшѝ мое́й.

з҃і. Къ немꙋ̀ ᲂу҆сты̑ мои́ми воззва́хъ, и҆ вознесо́хъ под̾ ѧ҆зы́комъ мои́мъ.

и҃і. Непра́вдꙋ а҆́ще ᲂу҆зрѣ́хъ въ се́рдцы мое́мъ, да не ᲂу҆слы́шитъ менѐ гдⷭ҇ь.

ѳ҃і. Сегѡ̀ ра́ди ᲂу҆слы́ша мѧ̀ бг҃ъ, внѧ́тъ гла́сꙋ моле́нїѧ моегѡ̀.

к҃. Бл҃гослове́нъ бг҃ъ, и҆́же не ѿста́ви моли́твꙋ мою̀ и҆ млⷭ҇ть свою̀ ѿ менѐ.

а҃. Въ коне́цъ, въ пѣ́снехъ, ѱало́мъ пѣ́сни дв҃дꙋ, ѯ҃ѕ.

в҃. Бж҃е, ᲂу҆ще́дри ны̀ и҆ бл҃гослови́ ны, просвѣтѝ лицѐ твоѐ на ны̀ и҆ поми́лꙋй ны̀:

г҃. Позна́ти на землѝ пꙋ́ть тво́й, во всѣ́хъ ꙗ҆зы́цѣхъ сп҃се́нїе твоѐ.

д҃. Да и҆сповѣ́дѧтсѧ тебѣ̀ лю́дїе, бж҃е, да и҆сповѣ́дѧтсѧ тебѣ̀ лю́дїе всѝ.

є҃. Да возвеселѧ́тсѧ и҆ да возра́дꙋютсѧ ꙗ҆зы́цы: ꙗ҆́кѡ сꙋ́диши лю́демъ правото́ю, и҆ ꙗ҆зы́ки на землѝ наста́виши.

ѕ҃. Да и҆сповѣ́дѧтсѧ тебѣ̀ лю́дїе, бж҃е, да и҆сповѣ́дѧтсѧ тебѣ̀ лю́дїе всѝ.

з҃. Землѧ̀ дадѐ пло́дъ сво́й: бл҃гослови́ ны, бж҃е, бж҃е на́шъ,

и҃. Бл҃гослови́ ны, бж҃е: и҆ да ᲂу҆боѧ́тсѧ є҆гѡ̀ всѝ концы̀ землѝ.

Сла́ва:

а҃. Въ коне́цъ, ѱало́мъ пѣ́сни дв҃дꙋ, ѯ҃з.

в҃. Да воскрⷭ҇нетъ бг҃ъ, и҆ расточа́тсѧ вразѝ є҆гѡ̀, и҆ да бѣжа́тъ ѿ лица̀ є҆гѡ̀ ненави́дѧщїи є҆го̀.

г҃. Ꙗ҆́кѡ и҆счеза́етъ ды́мъ, да и҆сче́знꙋтъ: ꙗ҆́кѡ та́етъ во́скъ ѿ лица̀ ѻ҆гнѧ̀, та́кѡ да поги́бнꙋтъ грѣ̑шницы ѿ лица̀ бж҃їѧ:

д҃. А҆ првⷣницы да возвеселѧ́тсѧ, да возра́дꙋютсѧ пред̾ бг҃омъ, да насладѧ́тсѧ въ весе́лїи.

є҃. Воспо́йте бг҃ꙋ, по́йте и҆́мени є҆гѡ̀: пꙋтесотвори́те возше́дшемꙋ на за́пады, гдⷭ҇ь и҆́мѧ є҆мꙋ̀: и҆ ра́дꙋйтесѧ пред̾ ни́мъ.

ѕ҃. Да смѧтꙋ́тсѧ ѿ лица̀ є҆гѡ̀, ѻ҆ц҃а̀ си́рыхъ и҆ сꙋдїѝ вдови́цъ: бг҃ъ въ мѣ́стѣ ст҃ѣ́мъ свое́мъ.

з҃. Бг҃ъ вселѧ́етъ є҆диномы́слєнныѧ въ до́мъ, и҆зводѧ̀ ѡ҆кова̑нныѧ мꙋ́жествомъ, та́кожде преѡгорчева́ющыѧ живꙋ́щыѧ во гробѣ́хъ.

и҃. Бж҃е, внегда̀ и҆сходи́ти тебѣ̀ пред̾ людьмѝ твои́ми, внегда̀ мимоходи́ти тебѣ̀ въ пꙋсты́ни,

ѳ҃. Землѧ̀ потрѧсе́сѧ, и҆́бо небеса̀ ка́нꙋша ѿ лица̀ бг҃а сїна́ина, ѿ лица̀ бг҃а і҆и҃лева.

і҃. До́ждь во́ленъ ѿлꙋчи́ши, бж҃е, достоѧ́нїю твоемꙋ̀, и҆ и҆знемо́же, ты́ же соверши́лъ є҆сѝ є҆̀.

а҃і. Живѡ́тнаѧ твоѧ̑ живꙋ́тъ на не́й: ᲂу҆гото́валъ є҆сѝ бл҃гостїю твое́ю ни́щемꙋ, бж҃е.

в҃і. Гдⷭ҇ь да́стъ глаго́лъ бл҃говѣствꙋ́ющымъ си́лою мно́гою:

г҃і. Цр҃ь си́лъ возлю́бленнагѡ, ꙾красото́ю꙾ ¹⁷ до́мꙋ раздѣли́ти кѡры́сти.

д҃і. А҆́ще поспитѐ посредѣ̀ предѣ̑лъ, крилѣ̑ голꙋби̑нѣ посре́брєнѣ, и҆ междора̑мїѧ є҆ѧ̀ въ блеща́нїи зла́та:

є҃і. Внегда̀ ра́знствитъ нбⷭ҇ный царѝ на не́й, ѡ҆снѣжа́тсѧ въ селмѡ́нѣ.

ѕ҃і. Гора̀ бж҃їѧ, гора̀ тꙋ́чнаѧ, гора̀ ᲂу҆сыре́ннаѧ, гора̀ тꙋ́чнаѧ.

з҃і. Вскꙋ́ю непщꙋ́ете, го́ры ᲂу҆сырє́нныѧ; гора̀, ю҆́же бл҃говолѝ бг҃ъ жи́ти въ не́й: и҆́бо гдⷭ҇ь всели́тсѧ до конца̀.

и҃і. Колесни́ца бж҃їѧ тма́ми тє́мъ, ты́сѧща гобзꙋ́ющихъ: гдⷭ҇ь въ ни́хъ въ сїна́и во ст҃ѣ́мъ.

ѳ҃і. Возше́лъ є҆сѝ на высотꙋ̀, плѣни́лъ є҆сѝ плѣ́нъ: прїѧ́лъ є҆сѝ даѧ̑нїѧ въ человѣ́цѣхъ, и҆́бо не покарѧ́ющыѧсѧ, є҆́же всели́тисѧ.

к҃. Гдⷭ҇ь бг҃ъ бл҃гослове́нъ, бл҃гослове́нъ гдⷭ҇ь де́нь днѐ: поспѣши́тъ на́мъ бг҃ъ сп҃се́нїй на́шихъ.

к҃а. Бг҃ъ на́шъ бг҃ъ є҆́же сп҃са́ти: и҆ гдⷭ҇нѧ, гдⷭ҇нѧ и҆схѡ́дища смє́ртнаѧ.

к҃в. Ѻ҆ба́че бг҃ъ сокрꙋши́тъ главы̑ врагѡ́въ свои́хъ, ве́рхъ вла̑съ преходѧ́щихъ въ прегрѣше́нїихъ свои́хъ.

к҃г. Речѐ гдⷭ҇ь: ѿ васа́на ѡ҆бращꙋ̀, ѡ҆бращꙋ̀ во глꙋбина́хъ морски́хъ:

к҃д. Ꙗ҆́кѡ да ѡ҆мо́читсѧ нога̀ твоѧ̀ въ кро́ви, ѧ҆зы́къ пє́съ твои́хъ ѿ вра̑гъ ѿ негѡ̀.

к҃є. Ви̑дѣна бы́ша шє́ствїѧ твоѧ̑, бж҃е, шє́ствїѧ бг҃а моегѡ̀ цр҃ѧ̀, и҆́же во ст҃ѣ́мъ.

к҃ѕ. Предвари́ша кнѧ̑зи бли́з̾ пою́щихъ, посредѣ̀ дѣ́въ тѷмпа́нницъ.

к҃з. Въ цр҃квахъ бл҃гослови́те бг҃а, гдⷭ҇а ѿ и҆стѡ́чникъ і҆и҃левыхъ.

к҃и. Та́мѡ венїамі́нъ ю҆нѣ́йшїй во ᲂу҆́жасѣ, кнѧ̑зи і҆ꙋ́дови влады́ки и҆́хъ, кнѧ̑зи завꙋлѡ̑ни, кнѧ̑зи нефѳалі̑мли.

к҃ѳ. Заповѣ́ждь, бж҃е, си́лою твое́ю: ᲂу҆крѣпѝ, бж҃е, сїѐ, є҆́же содѣ́лалъ є҆сѝ въ на́съ.

л҃. Ѿ хра́ма твоегѡ̀ во і҆ерⷭ҇ли́мъ тебѣ̀ принесꙋ́тъ ца́рїе да́ры.

л҃а. Запретѝ ѕвѣрє́мъ трѡ́стнымъ: со́нмъ ю҆нє́цъ въ ю҆́ницахъ людски́хъ, є҆́же затвори́ти и҆скꙋшє́нныѧ сребро́мъ: расточѝ ꙗ҆зы́ки хотѧ́щыѧ бра́немъ.

л҃в. Прїи́дꙋтъ моли̑твенницы ѿ є҆гѵ́пта: є҆ѳїо́пїа предвари́тъ рꙋ́кꙋ свою̀ къ бг҃ꙋ.

л҃г. Ца̑рства земна̑ѧ, по́йте бг҃ꙋ, воспо́йте гдⷭ҇еви,

л҃д. Возше́дшемꙋ на нб҃о нб҃сѐ на восто́ки: сѐ, да́стъ гла́сꙋ своемꙋ̀ гла́съ си́лы.

л҃є. Дади́те сла́вꙋ бг҃ови: на і҆и҃ли велелѣ́пота є҆гѡ̀, и҆ си́ла є҆гѡ̀ на ѻ҆́блацѣхъ.

л҃ѕ. Ди́венъ бг҃ъ во ст҃ы́хъ свои́хъ: бг҃ъ і҆и҃левъ, то́й да́стъ си́лꙋ и҆ держа́вꙋ лю́демъ свои̑мъ. Бл҃гослове́нъ бг҃ъ.

Сла́ва:

а҃. Въ коне́цъ, ꙾ѡ҆ и҆змѣ́ншихсѧ꙾ ¹⁸, ѱало́мъ дв҃дꙋ, ѯ҃и.

в҃. Сп҃си́ мѧ, бж҃е, ꙗ҆́кѡ внидо́ша во́ды до дꙋшѝ моеѧ̀.

г҃. Оу҆глѣбо́хъ въ тимѣ́нїи глꙋбины̀, и҆ нѣ́сть постоѧ́нїѧ: прїидо́хъ во глꙋбины̑ морскі̑ѧ, и҆ бꙋ́рѧ потопи́ мѧ.

д҃. Оу҆трꙋди́хсѧ зовы́й, и҆змолчѐ горта́нь мо́й: и҆счезо́стѣ ѻ҆́чи моѝ, ѿ є҆́же ᲂу҆пова́ти мѝ на бг҃а моего̀.

є҃. Оу҆мно́жишасѧ па́че вла̑съ главы̀ моеѧ̀ ненави́дѧщїи мѧ̀ тꙋ́не: ᲂу҆крѣпи́шасѧ вразѝ моѝ, и҆згонѧ́щїи мѧ̀ непра́веднѡ: ꙗ҆̀же не восхища́хъ, тогда̀ воздаѧ́хъ.

ѕ҃. Бж҃е, ты̀ ᲂу҆вѣ́дѣлъ є҆сѝ безꙋ́мїе моѐ, и҆ прегрѣшє́нїѧ моѧ̑ ѿ тебє̀ не ᲂу҆таи́шасѧ.

з҃. Да не постыдѧ́тсѧ ѡ҆ мнѣ̀ терпѧ́щїи тебѐ, гдⷭ҇и, гдⷭ҇и си́лъ: нижѐ да посра́мѧтсѧ ѡ҆ мнѣ̀ и҆́щꙋщїи тебѐ, бж҃е і҆и҃левъ.

и҃. Ꙗ҆́кѡ тебє̀ ра́ди претерпѣ́хъ поноше́нїе, покры̀ срамота̀ лицѐ моѐ.

ѳ҃. Чꙋ́ждь бы́хъ бра́тїи мое́й и҆ стра́ненъ сыновѡ́мъ ма́тере моеѧ̀:

і҃. Ꙗ҆́кѡ ре́вность до́мꙋ твоегѡ̀ снѣде́ мѧ, и҆ поношє́нїѧ поносѧ́щихъ тѝ нападо́ша на мѧ̀.

а҃і. И҆ покры́хъ посто́мъ дꙋ́шꙋ мою̀, и҆ бы́сть въ поноше́нїе мнѣ̀:

в҃і. И҆ положи́хъ ѡ҆дѣѧ́нїе моѐ вре́тище, и҆ бы́хъ и҆̀мъ въ при́тчꙋ.

г҃і. Ѡ҆ мнѣ̀ глꙋмлѧ́хꙋсѧ сѣдѧ́щїи во вратѣ́хъ, и҆ ѡ҆ мнѣ̀ поѧ́хꙋ пїю́щїи вїно̀.

д҃і. А҆́зъ же моли́твою мое́ю къ тебѣ̀, бж҃е: вре́мѧ бл҃говоле́нїѧ, бж҃е: во мно́жествѣ млⷭ҇ти твоеѧ̀ ᲂу҆слы́ши мѧ̀, во и҆́стинѣ сп҃се́нїѧ твоегѡ̀.

є҃і. Сп҃си́ мѧ ѿ бре́нїѧ, да не ᲂу҆глѣ́бнꙋ: да и҆зба́влюсѧ ѿ ненави́дѧщихъ мѧ̀ и҆ ѿ глꙋбо́кихъ во́дъ.

ѕ҃і. Да не потопи́тъ менѐ бꙋ́рѧ водна́ѧ, нижѐ да пожре́тъ менѐ глꙋбина̀, нижѐ сведе́тъ ѡ҆ мнѣ̀ рове́нникъ ᲂу҆́стъ свои́хъ.

з҃і. Оу҆слы́ши мѧ̀, гдⷭ҇и, ꙗ҆́кѡ бл҃га млⷭ҇ть твоѧ̀: по мно́жествꙋ щедро́тъ твои́хъ при́зри на мѧ̀.

и҃і. Не ѿвратѝ лица̀ твоегѡ̀ ѿ ѻ҆́трока твоегѡ̀, ꙗ҆́кѡ скорблю̀: ско́рѡ ᲂу҆слы́ши мѧ̀.

ѳ҃і. Вонмѝ дꙋшѝ мое́й и҆ и҆зба́ви ю҆̀: вра̑гъ мои́хъ ра́ди и҆зба́ви мѧ̀.

к҃. Ты́ бо вѣ́си поноше́нїе моѐ, и҆ стꙋ́дъ мо́й, и҆ срамотꙋ̀ мою̀: пред̾ тобо́ю всѝ ѡ҆скорблѧ́ющїи мѧ̀.

к҃а. Поноше́нїе ча́ѧше дꙋша̀ моѧ̀ и҆ стра́сть: и҆ жда́хъ соскорбѧ́щагѡ, и҆ не бѣ̀, и҆ ᲂу҆тѣша́ющихъ, и҆ не ѡ҆брѣто́хъ.

к҃в. И҆ да́ша въ снѣ́дь мою̀ же́лчь, и҆ въ жа́ждꙋ мою̀ напои́ша мѧ̀ ѻ҆́цта.

к҃г. Да бꙋ́детъ трапе́за и҆́хъ пред̾ ни́ми въ сѣ́ть и҆ въ воздаѧ́нїе и҆ въ собла́знъ.

к҃д. Да помрача́тсѧ ѻ҆́чи и҆́хъ, є҆́же не ви́дѣти, и҆ хребе́тъ и҆́хъ вы́нꙋ слѧцы̀.

к҃є. Проле́й на нѧ̀ гнѣ́въ тво́й, и҆ ꙗ҆́рость гнѣ́ва твоегѡ̀ да пости́гнетъ и҆̀хъ.

к҃ѕ. Да бꙋ́детъ дво́ръ и҆́хъ пꙋ́стъ, и҆ въ жили́щахъ и҆́хъ да не бꙋ́детъ живы́й.

к҃з. Занѐ є҆го́же ты̀ порази́лъ є҆сѝ, ті́и погна́ша, и҆ къ болѣ́зни ꙗ҆́звъ мои́хъ приложи́ша.

к҃и. Приложѝ беззако́нїе къ беззако́нїю и҆́хъ, и҆ да не вни́дꙋтъ въ пра́вдꙋ твою̀.

к҃ѳ. Да потребѧ́тсѧ ѿ кни́ги живы́хъ, и҆ съ првⷣными да не напи́шꙋтсѧ.

л҃. Ни́щъ и҆ болѧ́й є҆́смь а҆́зъ: сп҃се́нїе твоѐ, бж҃е, да прїи́метъ мѧ̀.

л҃а. Восхвалю̀ и҆́мѧ бг҃а моегѡ̀ съ пѣ́снїю, возвели́чꙋ є҆го̀ во хвале́нїи:

л҃в. И҆ ᲂу҆го́дно бꙋ́детъ бг҃ꙋ па́че тельца̀ ю҆́на, ро́ги и҆зносѧ́ща и҆ па́знѡкти.

л҃г. Да ᲂу҆́зрѧтъ ни́щїи и҆ возвеселѧ́тсѧ: взыщи́те бг҃а, и҆ жива̀ бꙋ́детъ дꙋша̀ ва́ша.

л҃д. Ꙗ҆́кѡ ᲂу҆слы́ша ᲂу҆бѡ́гїѧ гдⷭ҇ь, и҆ ѡ҆кова̑нныѧ своѧ̑ не ᲂу҆ничижѝ.

л҃є. Да восхва́лѧтъ є҆го̀ нб҃са̀ и҆ землѧ̀, мо́ре и҆ всѧ̑ живꙋ̑щаѧ въ не́мъ.

л҃ѕ. Ꙗ҆́кѡ бг҃ъ сп҃се́тъ сїѡ́на, и҆ сози́ждꙋтсѧ гра́ди і҆ꙋде́йстїи, и҆ вселѧ́тсѧ та́мѡ и҆ наслѣ́дѧтъ и҆̀:

л҃з. И҆ сѣ́мѧ рабѡ́въ твои́хъ ᲂу҆держи́тъ и҆̀, и҆ лю́бѧщїи и҆́мѧ твоѐ вселѧ́тсѧ въ не́мъ.

а҃. Въ коне́цъ дв҃дꙋ, въ воспомина́нїе, во є҆́же сп҃сти́ мѧ гдⷭ҇ꙋ, ѯ҃ѳ.

в҃. Бж҃е, въ по́мощь мою̀ вонмѝ: гдⷭ҇и, помощи́ ми потщи́сѧ.

г҃. Да постыдѧ́тсѧ и҆ посра́мѧтсѧ и҆́щꙋщїи дꙋ́шꙋ мою̀, да возвратѧ́тсѧ вспѧ́ть и҆ постыдѧ́тсѧ хотѧ́щїи мѝ ѕла̑ѧ:

д҃. Да возратѧ́тсѧ а҆́бїе стыдѧ́щесѧ глаго́лющїи мѝ: бла́гоже, бла́гоже.

є҃. Да возра́дꙋютсѧ и҆ возвеселѧ́тсѧ ѡ҆ тебѣ̀ всѝ и҆́щꙋщїи тебѐ, бж҃е: и҆ да глаго́лютъ вы́нꙋ, да возвели́читсѧ гдⷭ҇ь, лю́бѧщїи сп҃се́нїе твоѐ.

ѕ҃. А҆́зъ же ни́щъ є҆́смь и҆ ᲂу҆бо́гъ, бж҃е, помози́ ми: помо́щникъ мо́й и҆ и҆зба́витель мо́й є҆сѝ ты̀, гдⷭ҇и, не закоснѝ.

Сла́ва:

По ѳ҃-й каѳі́смѣ, трист҃о́е.

Та́же тропарѝ, гла́съ ѕ҃:

Помышлѧ́ю де́нь стра́шный, и҆ пла́чꙋ дѣѧ́нїй мои́хъ лꙋка́выхъ: ка́кѡ ѿвѣща́ю безсме́ртномꙋ цр҃ю̀; и҆лѝ ко́имъ дерзнове́нїемъ воззрю̀ на сꙋдїю̀ блꙋ́дный а҆́зъ; бл҃гоꙋтро́бный ѻ҆́ч҃е, сн҃е є҆диноро́дный, дш҃е ст҃ы́й, поми́лꙋй мѧ̀.

Сла́ва: Во ᲂу҆до́лѣ плаче́внѣ, на мѣ́стѣ є҆́же завѣща́лъ є҆сѝ, є҆гда̀ сѧ́деши млⷭ҇тиве, сотвори́ти првⷣный сꙋ́дъ, не ѡ҆бличѝ моѧ̑ сокровє́ннаѧ, нижѐ посрамѝ менѐ пред̾ а҆́гг҃лы: но пощади́ мѧ бж҃е, и҆ поми́лꙋй мѧ̀.

И҆ ны́нѣ: Оу҆пова́нїе, и҆ покро́въ держа́вный къ тебѣ̀ притека́ющихъ, бг҃ороди́тельнице, бл҃го́е предста́тельство мі́ра, молѝ со безпло́тными прилѣ́жнѡ, є҆го́же родила̀ є҆сѝ чл҃вѣколю́бнѣйшаго бг҃а, и҆зба́витисѧ дꙋша́мъ на́шымъ ѿ всѧ́кагѡ преще́нїѧ, є҆ди́на бл҃гослове́ннаѧ.

Гдⷭ҇и поми́лꙋй, м҃. и҆ мл҃тва:

Влⷣко гдⷭ҇и бж҃е на́шъ, и҆́же є҆ди́нъ ѻ҆каѧ́нныѧ моеѧ̀ дꙋшѝ недꙋ́гъ, и҆ сеѧ̀ и҆сцѣле́нїе вѣ́дый, и҆сцѣлѝ ю҆̀, ꙗ҆́коже вѣ́си ра́ди мно́жества млⷭ҇ти твоеѧ̀, и҆ щедро́тъ твои́хъ: поне́же ѿ дѣ́лъ мои́хъ нѣ́сть пла́стырѧ приложи́ти є҆́й, нижѐ є҆ле́а, ни ѡ҆бѧза́нїѧ, но ты̀ прише́дый не пра́вєдныѧ призва́ти, но грѣ̑шныѧ въ покаѧ́нїе, поми́лꙋй, ᲂу҆ще́дри, простѝ ю҆̀, раздерѝ рꙋкописа́нїе мно́гихъ мои́хъ и҆ стꙋ́дныхъ дѣѧ́нїй, и҆ наста́ви мѧ̀ на пра́вый пꙋ́ть тво́й, да ходѧ́й во и҆́стинѣ твое́й, возмогꙋ̀ и҆збѣжа́ти стрѣ́лъ лꙋка́вагѡ, и҆ си́це предста́нꙋ неѻсꙋжде́ннѡ пред̾ стра́шнымъ прⷭ҇то́ломъ твои́мъ, сла́вѧ и҆ воспѣва́ѧ прест҃о́е твоѐ и҆́мѧ во вѣ́ки, а҆ми́нь.

Дв҃дꙋ ѱало́мъ, сынѡ́въ і҆ѡнада́вовыхъ и҆ пе́рвыхъ плѣ́ншихсѧ, не надпи́санъ ᲂу҆ є҆врє́й, ѻ҃.

а҃. На тѧ̀, гдⷭ҇и, ᲂу҆пова́хъ, да не постыжꙋ́сѧ въ вѣ́къ.

в҃. Пра́вдою твое́ю и҆зба́ви мѧ̀ и҆ и҆зми́ мѧ: приклонѝ ко мнѣ̀ ᲂу҆́хо твоѐ и҆ сп҃си́ мѧ.

г҃. Бꙋ́ди мѝ въ бг҃а защи́тителѧ и҆ въ мѣ́сто крѣ́пко сп҃сти́ мѧ: ꙗ҆́кѡ ᲂу҆твержде́нїе моѐ и҆ прибѣ́жище моѐ є҆сѝ ты̀.

д҃. Бж҃е мо́й, и҆зба́ви мѧ̀ и҆з̾ рꙋкѝ грѣ́шнагѡ, и҆з̾ рꙋкѝ законопрестꙋ́пнагѡ и҆ ѡ҆би́дѧщагѡ:

є҃. Ꙗ҆́кѡ ты̀ є҆сѝ терпѣ́нїе моѐ, гдⷭ҇и, гдⷭ҇и, ᲂу҆пова́нїе моѐ ѿ ю҆́ности моеѧ̀.

ѕ҃. Въ тебѣ̀ ᲂу҆тверди́хсѧ ѿ ᲂу҆тро́бы, ѿ чре́ва ма́тере моеѧ̀ ты̀ є҆сѝ мо́й покрови́тель: ѡ҆ тебѣ̀ пѣ́нїе моѐ вы́нꙋ.

з҃. Ꙗ҆́кѡ чꙋ́до бы́хъ мнѡ́гимъ: и҆ ты̀ помо́щникъ мо́й крѣ́покъ.

и҃. Да и҆спо́лнѧтсѧ ᲂу҆ста̀ моѧ̑ хвале́нїѧ, ꙗ҆́кѡ да воспою̀ сла́вꙋ твою̀, ве́сь де́нь великолѣ́пїе твоѐ.

ѳ҃. Не ѿве́ржи менѐ во вре́мѧ ста́рости: внегда̀ ѡ҆скꙋдѣва́ти крѣ́пости мое́й, не ѡ҆ста́ви менѐ.

і҃. Ꙗ҆́кѡ рѣ́ша вразѝ моѝ мнѣ̀, и҆ стрегꙋ́щїи дꙋ́шꙋ мою̀ совѣща́ша вкꙋ́пѣ,

а҃і. Глаго́люще: бг҃ъ ѡ҆ста́вилъ є҆́сть є҆го̀, пожени́те и҆ и҆ми́те є҆го̀, ꙗ҆́кѡ нѣ́сть и҆збавлѧ́ѧй.

в҃і. Бж҃е мо́й, не ᲂу҆дали́сѧ ѿ менѐ: бж҃е мо́й, въ по́мощь мою̀ вонмѝ.

г҃і. Да постыдѧ́тсѧ и҆ и҆сче́знꙋтъ ѡ҆клевета́ющїи дꙋ́шꙋ мою̀, да ѡ҆блекꙋ́тсѧ въ стꙋ́дъ и҆ сра́мъ и҆́щꙋщїи ѕла̑ѧ мнѣ̀.

д҃і. А҆́зъ же всегда̀ воз̾ꙋпова́ю на тѧ̀, и҆ приложꙋ̀ на всѧ́кꙋ похвалꙋ̀ твою̀.

є҃і. Оу҆ста̀ моѧ̑ возвѣстѧ́тъ пра́вдꙋ твою̀, ве́сь де́нь сп҃се́нїе твоѐ, ꙗ҆́кѡ не позна́хъ кни̑жнаѧ.

ѕ҃і. Вни́дꙋ въ си́лѣ гдⷭ҇ни: гдⷭ҇и, помѧнꙋ̀ пра́вдꙋ тебє̀ є҆ди́нагѡ.

з҃і. Бж҃е мо́й, и҆̀мже наꙋчи́лъ мѧ̀ є҆сѝ ѿ ю҆́ности моеѧ̀, и҆ до ны́нѣ возвѣщꙋ̀ чꙋдеса̀ твоѧ̑.

и҃і. И҆ да́же до ста́рости и҆ престарѣ́нїѧ, бж҃е мо́й, не ѡ҆ста́ви менѐ, до́ндеже возвѣщꙋ̀ мы́шцꙋ твою̀ ро́дꙋ всемꙋ̀ грѧдꙋ́щемꙋ,

ѳ҃і. Си́лꙋ твою̀ и҆ пра́вдꙋ твою̀, бж҃е, да́же до вы́шнихъ, ꙗ҆̀же сотвори́лъ мѝ є҆сѝ вели̑чїѧ: бж҃е, кто̀ подо́бенъ тебѣ̀;

к҃. Є҆ли̑ки ꙗ҆ви́лъ мѝ є҆сѝ скѡ́рби мнѡ́ги и҆ ѕлы̀; и҆ ѡ҆бра́щьсѧ ѡ҆животвори́лъ мѧ̀ є҆сѝ и҆ ѿ бе́зднъ землѝ возве́лъ мѧ̀ є҆сѝ.

к҃а. Оу҆мно́жилъ є҆сѝ на мнѣ̀ вели́чествїе твоѐ, и҆ ѡ҆бра́щьсѧ ᲂу҆тѣ́шилъ мѧ̀ є҆сѝ, и҆ ѿ бе́зднъ землѝ па́ки возве́лъ мѧ̀ є҆сѝ.

к҃в. И҆́бо а҆́зъ и҆сповѣ́мсѧ тебѣ̀ въ лю́дехъ, гдⷭ҇и, въ сосꙋ́дѣхъ ѱало́мскихъ и҆́стинꙋ твою̀, бж҃е: воспою̀ тебѣ̀ въ гꙋ́слехъ, ст҃ы́й і҆и҃левъ.

к҃г. Возра́дꙋетѣсѧ ᲂу҆стнѣ̀ моѝ, є҆гда̀ воспою̀ тебѣ̀, и҆ дꙋша̀ моѧ̀, ю҆́же є҆сѝ и҆зба́вилъ:

к҃д. Є҆ще́ же и҆ ѧ҆зы́къ мо́й ве́сь де́нь поꙋчи́тсѧ пра́вдѣ твое́й, є҆гда̀ постыдѧ́тсѧ и҆ посра́мѧтсѧ и҆́щꙋщїй ѕла̑ѧ мнѣ̀.

Ѡ҆ соломѡ́нѣ, ѱало́мъ дв҃дꙋ, ѻ҃а.

а҃. Бж҃е, сꙋ́дъ тво́й царе́ви да́ждь, и҆ пра́вдꙋ твою̀ сы́нꙋ царе́вꙋ:

в҃. Сꙋди́ти лю́демъ твои̑мъ въ пра́вдѣ и҆ ни́щымъ твои̑мъ въ сꙋдѣ̀.

г҃. Да воспрїи́мꙋтъ го́ры ми́ръ лю́демъ и҆ хо́лми пра́вдꙋ.

д҃. Сꙋ́дитъ ни́щымъ людски̑мъ, и҆ спасе́тъ сы́ны ᲂу҆бо́гихъ, и҆ смири́тъ клеветника̀.

є҃. И҆ пребꙋ́детъ съ со́лнцемъ, и҆ пре́жде лꙋны̀ ро́да родѡ́въ.

ѕ҃. Сни́детъ ꙗ҆́кѡ до́ждь на рꙋно̀, и҆ ꙗ҆́кѡ ка́плѧ ка́плющаѧ на зе́млю.

з҃. Возсїѧ́етъ во дне́хъ є҆гѡ̀ пра́вда и҆ мно́жество ми́ра, до́ндеже ѿи́метсѧ лꙋна̀.

и҃. И҆ ѡ҆блада́етъ ѿ мо́рѧ до мо́рѧ, и҆ ѿ рѣ́къ до конє́цъ вселе́нныѧ.

ѳ҃. Пред̾ ни́мъ припадꙋ́тъ є҆ѳїо́плѧне, и҆ вразѝ є҆гѡ̀ пе́рсть поли́жꙋтъ.

і҃. Ца́рїе ѳарсі́йстїи и҆ ѻ҆́строви да́ры принесꙋ́тъ, ца́рїе а҆ра́встїи и҆ сава̀ да́ры приведꙋ́тъ:

а҃і. И҆ покло́нѧтсѧ є҆мꙋ̀ всѝ ца́рїе зе́мстїи, всѝ ꙗ҆зы́цы порабо́таютъ є҆мꙋ̀.

в҃і. Ꙗ҆́кѡ и҆зба́ви ни́ща ѿ си́льна, и҆ ᲂу҆бо́га, є҆мꙋ́же не бѣ̀ помо́щника.

г҃і. Пощади́тъ ни́ща и҆ ᲂу҆бо́га, и҆ дꙋ́шы ᲂу҆бо́гихъ спасе́тъ:

д҃і. Ѿ ли́хвы и҆ ѿ непра́вды и҆зба́витъ дꙋ́шы и҆́хъ, и҆ че́стно и҆́мѧ є҆гѡ̀ пред̾ ни́ми.

є҃і. И҆ жи́въ бꙋ́детъ, и҆ да́стсѧ є҆мꙋ̀ ѿ зла́та а҆раві́йска: и҆ помо́лѧтсѧ ѡ҆ не́мъ вы́нꙋ, ве́сь де́нь бл҃гословѧ́тъ є҆го̀.

ѕ҃і. Бꙋ́детъ ᲂу҆твержде́нїе на землѝ на версѣ́хъ го́ръ: превознесе́тсѧ па́че лїва́на пло́дъ є҆гѡ̀, и҆ процвѣтꙋ́тъ ѿ гра́да ꙗ҆́кѡ трава̀ земна́ѧ.

з҃і. Бꙋ́детъ и҆́мѧ є҆гѡ̀ бл҃гослове́но во вѣ́ки, пре́жде со́лнца пребыва́етъ и҆́мѧ є҆гѡ̀: и҆ бл҃гословѧ́тсѧ въ не́мъ всѧ̑ кѡлѣ́на земна́ѧ, всѝ ꙗ҆зы́цы ᲂу҆блажа́тъ є҆го̀.

и҃і. Бл҃гослове́нъ гдⷭ҇ь бг҃ъ і҆и҃левъ, творѧ́й чꙋдеса̀ є҆ди́нъ,

ѳ҃і. И҆ бл҃гослове́но и҆́мѧ сла́вы є҆гѡ̀ во вѣ́къ и҆ въ вѣ́къ вѣ́ка: и҆ и҆спо́лнитсѧ сла́вы є҆гѡ̀ всѧ̀ землѧ̀: бꙋ́ди, бꙋ́ди.

Сла́ва:

Ѡ҆скꙋдѣ́ша пѣ̑сни дв҃да, сы́на і҆ессе́ова. Ѱало́мъ а҆са́фꙋ, ѻ҃в.

а҃. Ко́ль бл҃гъ бг҃ъ і҆и҃левъ пра̑вымъ се́рдцемъ.

в҃. Мои́ же вма́лѣ не подвижа́стѣсѧ но́зѣ: вма́лѣ не пролїѧ́шасѧ стопы̑ моѧ̑:

г҃. Ꙗ҆́кѡ возревнова́хъ на беззакѡ́нныѧ, ми́ръ грѣ́шникѡвъ зрѧ̀:

д҃. Ꙗ҆́кѡ нѣ́сть восклоне́нїѧ въ сме́рти и҆́хъ и҆ ᲂу҆твержде́нїѧ въ ра́нѣ и҆́хъ:

є҃. Въ трꙋдѣ́хъ человѣ́ческихъ не сꙋ́ть, и҆ съ человѣ́ки не прїи́мꙋтъ ра́нъ.

ѕ҃. Сегѡ̀ ра́ди ᲂу҆держа̀ ѧ҆̀ горды́нѧ и҆́хъ до конца̀: ѡ҆дѣ́ѧшасѧ непра́вдою и҆ нече́стїемъ свои́мъ.

з҃. И҆зы́детъ ꙗ҆́кѡ и҆з̾ тꙋ́ка непра́вда и҆́хъ: преидо́ша въ любо́вь се́рдца.

и҃. Помы́слиша и҆ глаго́лаша въ лꙋка́вствѣ, непра́вдꙋ въ высотꙋ̀ глаго́лаша:

ѳ҃. Положи́ша на небесѝ ᲂу҆ста̀ своѧ̑, и҆ ѧ҆зы́къ и҆́хъ пре́йде по землѝ.

і҃. Сегѡ̀ ра́ди ѡ҆братѧ́тсѧ лю́дїе моѝ сѣ́мѡ, и҆ дні́е и҆спо́лнени ѡ҆брѧ́щꙋтсѧ въ ни́хъ.

а҃і. И҆ рѣ́ша: ка́кѡ ᲂу҆вѣ́дѣ бг҃ъ; и҆ а҆́ще є҆́сть ра́зꙋмъ въ вы́шнѣмъ;

в҃і. Сѐ, сі́и грѣ̑шницы и҆ гобзꙋ́ющїи въ вѣ́къ ᲂу҆держа́ша бога́тство.

г҃і. И҆ рѣ́хъ: ꙾є҆да̀ ¹⁹ всꙋ́е ѡ҆правди́хъ се́рдце моѐ и҆ ᲂу҆мы́хъ въ непови́нныхъ рꙋ́цѣ моѝ,

д҃і. И҆ бы́хъ ꙗ҆́звенъ ве́сь де́нь, и҆ ѡ҆бличе́нїе моѐ на ᲂу҆́треннихъ;

є҃і. А҆́ще глаго́лахъ, повѣ́мъ та́кѡ: ꙾сѐ, ро́дꙋ сынѡ́въ твои́хъ, є҆мꙋ́же ѡ҆бѣща́хсѧ꙾ ²⁰:

ѕ҃і. И҆ непщева́хъ разꙋмѣ́ти: сїѐ трꙋ́дъ є҆́сть предо мно́ю,

з҃і. До́ндеже вни́дꙋ во ст҃и́ло бж҃їе и҆ разꙋмѣ́ю въ послѣ̑днѧѧ и҆́хъ.

и҃і. Ѻ҆ба́че за льщє́нїѧ и҆́хъ положи́лъ є҆сѝ и҆̀мъ ѕла̑ѧ, низложи́лъ є҆сѝ ѧ҆̀, внегда̀ разгордѣ́шасѧ.

ѳ҃і. Ка́кѡ бы́ша въ запꙋстѣ́нїе; внеза́пꙋ и҆счезо́ша, погибо́ша за беззако́нїе своѐ.

к҃. Ꙗ҆́кѡ со́нїе востаю́щагѡ, гдⷭ҇и, во гра́дѣ твое́мъ ѡ҆́бразъ и҆́хъ ᲂу҆ничижи́ши.

к҃а. Ꙗ҆́кѡ разжже́сѧ се́рдце моѐ, и҆ ᲂу҆трѡ́бы моѧ̑ и҆змѣни́шасѧ:

к҃в. И҆ а҆́зъ ᲂу҆ничиже́нъ, и҆ не разꙋмѣ́хъ, ско́тенъ бы́хъ ᲂу҆ тебє̀.

к҃г. И҆ а҆́зъ вы́нꙋ съ тобо́ю: ᲂу҆держа́лъ є҆сѝ рꙋ́кꙋ деснꙋ́ю мою̀,

к҃д. И҆ совѣ́томъ твои́мъ наста́вилъ мѧ̀ є҆сѝ, и҆ со сла́вою прїѧ́лъ мѧ̀ є҆сѝ.

к҃є. Что́ бо мѝ є҆́сть на нб҃сѝ; и҆ ѿ тебє̀ что̀ восхотѣ́хъ на землѝ;

к҃ѕ. И҆счезѐ се́рдце моѐ и҆ пло́ть моѧ̀, бж҃е се́рдца моегѡ̀, и҆ ча́сть моѧ̀, бж҃е, во вѣ́къ.

к҃з. Ꙗ҆́кѡ сѐ, ᲂу҆далѧ́ющїи себѐ ѿ тебє̀ поги́бнꙋтъ: потреби́лъ є҆сѝ всѧ́каго любодѣ́ющаго ѿ тебє̀.

к҃и. Мнѣ́ же прилѣплѧ́тисѧ бг҃ови бла́го є҆́сть, полага́ти на гдⷭ҇а ᲂу҆пова́нїе моѐ, возвѣсти́ти мѝ всѧ̑ хвалы̑ твоѧ̑, во вратѣ́хъ дще́ре сїѡ́ни.

Ра́зꙋма а҆са́фꙋ, ѻ҃г.

а҃. Вскꙋ́ю, бж҃е, ѿри́нꙋлъ є҆сѝ до конца̀; разгнѣ́васѧ ꙗ҆́рость твоѧ̀ на ѻ҆́вцы па́жити твоеѧ̀;

в҃. Помѧнѝ со́нмъ тво́й, є҆го́же стѧжа́лъ є҆сѝ и҆спе́рва, и҆зба́вилъ є҆сѝ жезло́мъ достоѧ́нїѧ твоегѡ̀, гора̀ сїѡ́нъ сїѧ̀꙾ ²¹, въ не́йже всели́лсѧ є҆сѝ.

г҃. Воздви́гни рꙋ́цѣ твоѝ на горды̑ни и҆́хъ въ коне́цъ, є҆ли̑ка лꙋка́внова вра́гъ во ст҃ѣ́мъ твое́мъ.

д҃. И҆ восхвали́шасѧ ненави́дѧщїи тѧ̀ посредѣ̀ пра́здника твоегѡ̀: положи́ша зна́мєнїѧ своѧ̑ зна́мєнїѧ, и҆ не позна́ша,

є҃. Ꙗ҆́кѡ во и҆схо́дѣ превы́ше: ꙗ҆́кѡ въ дꙋбра́вѣ дре́вѧнѣ сѣки́рами разсѣко́ша

ѕ҃. Двє́ри є҆гѡ̀ вкꙋ́пѣ, сѣ́чивомъ и҆ ѻ҆ско́рдомъ разрꙋши́ша и҆̀.

з҃. Возжго́ша ѻ҆гне́мъ ст҃и́ло твоѐ: на землѝ ѡ҆скверни́ша жили́ще и҆́мене твоегѡ̀.

и҃. Рѣ́ша въ се́рдцы свое́мъ ю҆́жики и҆́хъ вкꙋ́пѣ: прїиди́те, и҆ ѿста́вимъ всѧ̑ пра́здники бж҃їѧ ѿ землѝ.

ѳ҃. ꙾Зна́мєнїѧ и҆́хъ꙾ ²² не ви́дѣхомъ: нѣ́сть ктомꙋ̀ прⷪ҇ро́ка, и҆ на́съ не позна́етъ ктомꙋ̀.

і҃. Доко́лѣ, бж҃е, поно́ситъ вра́гъ; раздражи́тъ проти́вный и҆́мѧ твоѐ до конца̀;

а҃і. Вскꙋ́ю ѿвраща́еши рꙋ́кꙋ твою̀ и҆ десни́цꙋ твою̀ ѿ среды̀ нѣ́дра твоегѡ̀ въ коне́цъ;

в҃і. Бг҃ъ же, цр҃ь на́шъ, пре́жде вѣ́ка содѣ́ла сп҃се́нїе посредѣ̀ землѝ.

г҃і. Ты̀ ᲂу҆тверди́лъ є҆сѝ си́лою твое́ю мо́ре: ты̀ сте́рлъ є҆сѝ главы̑ ѕмїє́въ въ водѣ̀:

д҃і. Ты̀ сокрꙋши́лъ є҆сѝ главꙋ̀ ѕмі́евꙋ, да́лъ є҆сѝ того̀ бра́шно лю́демъ є҆ѳїѡ́пскимъ.

є҃і. Ты̀ расто́рглъ є҆сѝ и҆сто́чники и҆ пото́ки: ты̀ и҆зсꙋши́лъ є҆сѝ рѣ́ки и҆ѳа̑мскїѧ.

ѕ҃і. Тво́й є҆́сть де́нь, и҆ твоѧ̀ є҆́сть но́щь: ты̀ соверши́лъ є҆сѝ зарю̀ и҆ со́лнце.

з҃і. Ты̀ сотвори́лъ є҆сѝ всѧ̑ предѣ́лы землѝ: жа́твꙋ и҆ ве́снꙋ ты̀ созда́лъ є҆сѝ ѧ҆̀.

и҃і. Помѧнѝ сїѧ̑: вра́гъ поносѝ гдⷭ҇еви, и҆ лю́дїе безꙋ́мнїи раздражи́ша и҆́мѧ твоѐ.

ѳ҃і. Не преда́ждь ѕвѣрє́мъ дꙋ́шꙋ и҆сповѣ́дающꙋюсѧ тебѣ̀: дꙋ́шъ ᲂу҆бо́гихъ твои́хъ не забꙋ́ди до конца̀.

к҃. При́зри на завѣ́тъ тво́й: ꙗ҆́кѡ и҆спо́лнишасѧ помраче́ннїи землѝ домѡ́въ беззако́нїй.

к҃а. Да не возврати́тсѧ смире́нный посра́мленъ: ни́щъ и҆ ᲂу҆бо́гъ восхвали́та и҆́мѧ твоѐ.

к҃в. Воста́ни, бж҃е, сꙋдѝ прю̀ твою̀: помѧнѝ поноше́нїе твоѐ, є҆́же ѿ безꙋ́мнагѡ ве́сь де́нь.

к҃г. Не забꙋ́ди гла́са моли́твєнникъ твои́хъ: горды́нѧ ненави́дѧщихъ тѧ̀ ꙾взы́де вы́нꙋ꙾ ²³.

Сла́ва:

а҃. Въ коне́цъ, да не растли́ши, ѱало́мъ пѣ́сни а҆са́фꙋ, ѻ҃д.

в҃. И҆сповѣ́мысѧ тебѣ̀, бж҃е, и҆сповѣ́мысѧ тебѣ̀ и҆ призове́мъ и҆́мѧ твоѐ: повѣ́мъ всѧ̑ чꙋдеса̀ твоѧ̑.

г҃. Є҆гда̀ прїимꙋ̀ вре́мѧ, а҆́зъ правѡты̀ возсꙋждꙋ̀.

д҃. Раста́ѧсѧ землѧ̀ и҆ всѝ живꙋ́щїи на не́й, а҆́зъ ᲂу҆тверди́хъ столпы̀ є҆ѧ̀.

є҃. Рѣ́хъ беззако́ннꙋющымъ, не беззако́ннꙋйте: и҆ согрѣша́ющымъ, не возноси́те ро́га.

ѕ҃. Не воздвиза́йте на высотꙋ̀ ро́га ва́шегѡ и҆ не глаго́лите на бг҃а непра́вдꙋ:

з҃. Ꙗ҆́кѡ нижѐ ѿ и҆схѡ́дъ, нижѐ и҆ за̑падъ, нижѐ ѿ пꙋсты́хъ го́ръ.

и҃. Ꙗ҆́кѡ бг҃ъ сꙋдїѧ̀ є҆́сть: сего̀ смирѧ́етъ, и҆ сего̀ возно́ситъ.

ѳ҃. Ꙗ҆́кѡ ча́ша въ рꙋцѣ̀ гдⷭ҇ни, вїна̀ нерастворе́на и҆спо́лнь растворе́нїѧ, и҆ ᲂу҆клонѝ ѿ сеѧ̀ въ сїю̀: ѻ҆ба́че дро́ждїе є҆гѡ̀ не и҆стощи́сѧ, и҆спїю́тъ всѝ грѣ́шнїи землѝ.

і҃. А҆́зъ же возра́дꙋюсѧ въ вѣ́къ, воспою̀ бг҃ꙋ і҆а́кѡвлю:

а҃і. И҆ всѧ̑ ро́ги грѣ́шныхъ сломлю̀, и҆ вознесе́тсѧ ро́гъ првⷣнагѡ.

а҃. Въ коне́цъ, въ пѣ́снехъ, ѱало́мъ а҆са́фꙋ, пѣ́снь ко а҆ссѷрі́анинꙋ, ѻ҃є.

в҃. Вѣ́домъ во і҆ꙋде́и бг҃ъ: во і҆и҃ли ве́лїе и҆́мѧ є҆гѡ̀.

г҃. И҆ бы́сть въ ми́рѣ мѣ́сто є҆гѡ̀, и҆ жили́ще є҆гѡ̀ въ сїѡ́нѣ.

д҃. Та́мѡ сокрꙋшѝ крѣ́пѡсти лꙋкѡ́въ, ѻ҆рꙋ́жїе и҆ ме́чь и҆ бра́нь.

є҃. Просвѣща́еши ты̀ ди́внѡ ѿ го́ръ вѣ́чныхъ.

ѕ҃. Смѧто́шасѧ всѝ неразꙋ́мнїи се́рдцемъ: ᲂу҆снꙋ́ша сно́мъ свои́мъ, и҆ ничто́же ѡ҆брѣто́ша всѝ мꙋ́жїе бога́тства въ рꙋка́хъ свои́хъ.

з҃. Ѿ запреще́нїѧ твоегѡ̀, бж҃е і҆а́кѡвль, воздрема́ша всѣ́дшїи на ко́ни.

и҃. Ты̀ стра́шенъ є҆сѝ, и҆ кто̀ противоста́нетъ тебѣ̀; ѿто́лѣ гнѣ́въ тво́й.

ѳ҃. Съ нб҃сѐ слы́шанъ сотвори́лъ є҆сѝ сꙋ́дъ: землѧ̀ ᲂу҆боѧ́сѧ и҆ ᲂу҆молча̀,

і҃. Внегда̀ воста́ти на сꙋ́дъ бг҃ꙋ, сп҃стѝ всѧ̑ крѡ́ткїѧ землѝ.

а҃і. Ꙗ҆́кѡ помышле́нїе человѣ́ческое и҆сповѣ́стсѧ тебѣ̀, и҆ ѡ҆ста́нокъ помышле́нїѧ пра́зднꙋетъ тѝ.

в҃і. Помоли́тесѧ и҆ воздади́те гдⷭ҇еви бг҃ꙋ на́шемꙋ: всѝ, и҆̀же ѡ҆́крестъ є҆гѡ̀, принесꙋ́тъ да́ры

г҃і. Стра́шномꙋ и҆ ѿе́млющемꙋ дꙋ́хи кнѧзе́й, стра́шномꙋ па́че царе́й земны́хъ.

а҃. Въ коне́цъ, ѡ҆ і҆дїѳꙋ́мѣ, ѱало́мъ а҆са́фꙋ, ѻ҃ѕ.

в҃. Гла́сомъ мои́мъ ко гдⷭ҇ꙋ воззва́хъ, гла́сомъ мои́мъ къ бг҃ꙋ, и҆ внѧ́тъ мѝ.

г҃. Въ де́нь ско́рби моеѧ̀ бг҃а взыска́хъ рꙋка́ма мои́ма, но́щїю пред̾ ни́мъ, и҆ не прельще́нъ бы́хъ: ѿве́ржесѧ ᲂу҆тѣ́шитисѧ дꙋша̀ моѧ̀.

д҃. Помѧнꙋ́хъ бг҃а и҆ возвесели́хсѧ, ꙾поглꙋмлѧ́хсѧ꙾ ²⁴, и҆ малодꙋ́шствоваше дꙋ́хъ мо́й.

є҃. Предвари́стѣ стражбы̑ ѻ҆́чи моѝ: смѧто́хсѧ и҆ не глаго́лахъ.

ѕ҃. Помы́слихъ дни̑ пє́рвыѧ, и҆ лѣ̑та вѣ̑чнаѧ помѧнꙋ́хъ, и҆ поꙋча́хсѧ:

з҃. Но́щїю се́рдцемъ мои́мъ ꙾глꙋмлѧ́хсѧ, и҆ тꙋжа́ше꙾ ²⁵ дꙋ́хъ мо́й:

и҃. Є҆да̀ во вѣ́ки ѿри́нетъ гдⷭ҇ь и҆ не приложи́тъ бл҃говоли́ти па́ки;

ѳ҃. И҆лѝ до конца̀ млⷭ҇ть свою̀ ѿсѣче́тъ, сконча̀ глаго́лъ ѿ ро́да въ ро́дъ;

і҃. Є҆да̀ забꙋ́детъ ᲂу҆ще́дрити бг҃ъ; и҆лѝ ᲂу҆держи́тъ во гнѣ́вѣ свое́мъ щедрѡ́ты своѧ̑;

а҃і. И҆ рѣ́хъ: ны́нѣ нача́хъ, сїѧ̀ и҆змѣ́на десни́цы вы́шнѧгѡ.

в҃і. Помѧнꙋ́хъ дѣла̀ гдⷭ҇нѧ: ꙗ҆́кѡ помѧнꙋ̀ ѿ нача́ла чꙋдеса̀ твоѧ̑,

г҃і. И҆ поꙋчꙋ́сѧ во всѣ́хъ дѣ́лѣхъ твои́хъ, и҆ въ начина́нїихъ твои́хъ ꙾поглꙋмлю́сѧ꙾ ²⁶.

д҃і. Бж҃е, во ст҃ѣ́мъ пꙋ́ть тво́й: кто̀ бг҃ъ ве́лїй, ꙗ҆́кѡ бг҃ъ на́шъ;

є҃і. Ты̀ є҆сѝ бг҃ъ творѧ́й чꙋдеса̀: сказа́лъ є҆сѝ въ лю́дехъ си́лꙋ твою̀,

ѕ҃і. И҆зба́вилъ є҆сѝ мы́шцею твое́ю лю́ди твоѧ̑, сы́ны і҆а̑кѡвли и҆ і҆ѡ́сифѡвы.

з҃і. Ви́дѣша тѧ̀ во́ды, бж҃е, ви́дѣша тѧ̀ во́ды и҆ ᲂу҆боѧ́шасѧ: смѧто́шасѧ бє́здны.

и҃і. Мно́жество шꙋ́ма во́дъ: гла́съ да́ша ѻ҆́блацы, и҆́бо стрѣ́лы твоѧ̑ прехо́дѧтъ.

ѳ҃і. Гла́съ гро́ма твоегѡ̀ въ колесѝ, ѡ҆свѣти́ша мѡ́лнїѧ твоѧ̑ вселе́ннꙋю: подви́жесѧ и҆ тре́петна бы́сть землѧ̀.

к҃. Въ мо́ри пꙋтїѐ твоѝ, и҆ стєзѝ твоѧ̑ въ вода́хъ мно́гихъ, и҆ слѣды̀ твоѝ не позна́ютсѧ.

к҃а. Наста́вилъ є҆сѝ ꙗ҆́кѡ ѻ҆́вцы лю́ди твоѧ̑ рꙋко́ю мѡѷсе́овою и҆ а҆арѡ́нею.

Сла́ва:

По і҃-й каѳі́смѣ, трист҃о́е.

Та́же тропарѝ, гла́съ ѕ҃:

Стра́шнагѡ днѐ прише́ствїѧ твоегѡ̀ ᲂу҆жаса́юсѧ хрⷭ҇тѐ, и҆ неꙋмы́тнагѡ сꙋди́лища боѧ́сѧ гдⷭ҇и, ᲂу҆жаса́юсѧ и҆ трепе́щꙋ, ꙗ҆́кѡ и҆мы́й мно́жество согрѣше́нїй: но пре́жде конца̀ ꙗ҆́кѡ млⷭ҇тивъ бг҃ъ ѡ҆братѝ, и҆ сп҃си́ мѧ сп҃се мо́й многомлⷭ҇тиве.

Сла́ва: Є҆гда̀ престо́ли на сꙋ́дъ поста́вѧтсѧ гдⷭ҇и, и҆ сꙋди́лищꙋ твоемꙋ̀ предста́нꙋтъ человѣ́цы: не предпочте́тсѧ ца́рь во́ина, не преимꙋ́ществитъ влады́ка раба̀: кі́йждо бо ѿ свои́хъ дѣ́лъ и҆лѝ просла́витсѧ, и҆лѝ постыди́тсѧ.

И҆ ны́нѣ: Вели́кихъ дарова́нїй чⷭ҇таѧ дв҃о бг҃омт҃и, ты̀ сподо́биласѧ є҆сѝ: ꙗ҆́кѡ родила̀ є҆сѝ пло́тїю є҆ди́наго ѿ трⷪ҇цы, хрⷭ҇та̀ жизнода́вца, во сп҃се́нїе дꙋ́шъ на́шихъ.

Гдⷭ҇и поми́лꙋй, м҃ и҆ мл҃тва:

Гдⷭ҇и бж҃е на́шъ, въ млⷭ҇ти бога́тый, и҆ въ щедро́тахъ непостижи́мый, є҆ди́не по є҆стествꙋ̀ безгрѣ́шенъ, и҆ на́съ ра́ди кромѣ̀ грѣха̀ бы́въ человѣ́къ, ᲂу҆слы́ши въ ча́съ се́й болѣ́зненное моѐ сїѐ моле́нїе, ꙗ҆́кѡ ни́щъ и҆ ᲂу҆бо́гъ є҆́смь ѿ дѣ́лъ бл҃ги́хъ, и҆ се́рдце моѐ смѧте́сѧ внꙋ́трь менѐ. Ты́ бо вѣ́си вы́шнїй цр҃ю̀, гдⷭ҇и нб҃сѐ и҆ землѝ, ꙗ҆́кѡ всю̀ мою̀ ю҆́ность во грѣсѣ́хъ и҆жди́хъ: и҆ въ слѣ́дъ похоте́й пло́ти моеѧ̀ ходи́въ, ве́сь смѣ́хъ де́монѡмъ бы́хъ, ве́сь дїа́волꙋ послѣ́довахъ вы́нꙋ, въ тимѣ́нїи сласте́й валѧ́ѧйсѧ. Ѡ҆мрачи́всѧ бо помышле́нїемъ ѿ младе́нства да́же и҆ до ны́нѣ, никогда́же восхотѣ́хъ сотвори́ти во́лю твою̀ ст҃ꙋ́ю: но ве́сь ѿ навѣ́тꙋющихъ мѧ̀ страсте́й плѣни́всѧ, смѣ́хъ и҆ порꙋга́нїе де́монѡмъ бы́хъ, ника́коже во ᲂу҆мѣ̀ помышлѧ́ѧй, ꙗ҆́кѡ нестерпи́мый гнѣ́въ є҆́же на грѣ́шники преще́нїѧ твоегѡ̀, и҆ лежа́щꙋю гее́ннꙋ ѻ҆́гненнꙋю. Ꙗ҆́коже ѿсю́дꙋ во ѿча́ѧнїе впады́й, и҆ ника́коже въ чꙋ́вствѣ ѡ҆браще́нїѧ бы́въ, пꙋ́стъ и҆ на́гъ є҆́же ѿ твоеѧ̀ дрꙋ́жбы бы́хъ. Кі́й бо ви́дъ грѣха̀ не содѣ́лахъ; ко́е дѣ́ло де́мѡнское не содѣ́ѧхъ; ко́е дѣѧ́нїе стꙋ́дное и҆ блꙋ́дное не съ преимꙋ́ществомъ и҆ тща́нїемъ соверши́хъ; ᲂу҆́мъ воспомина́ньми плотски́ми ѡ҆скверни́хъ, тѣ́ло смѣше́ньми ѡ҆калѧ́хъ, дꙋ́хъ сосложе́нїемъ ѡ҆скверни́хъ: всѧ́къ ᲂу҆́дъ ѻ҆каѧ́нныѧ моеѧ̀ пло́ти слꙋжи́ти и҆ рабо́тати грѣхѡ́мъ возлюби́хъ. И҆ кто̀ про́чее не возрыда́етъ мѧ̀ ѻ҆каѧ́ннаго; кто̀ не воспла́четъ мѧ̀ ѡ҆сꙋжде́ннаго; а҆́зъ бо є҆ди́нъ, влⷣко, ꙗ҆́рость твою̀ прогнѣ́вахъ: а҆́зъ є҆ди́нъ гнѣ́въ тво́й на мѧ̀ разжего́хъ: а҆́зъ є҆ди́нъ лꙋка́вое пред̾ тобо́ю сотвори́хъ, превозше́дъ и҆ препобѣди́въ всѧ̑ ѿ вѣ́ка грѣ́шники, несравне́ннѡ погрѣши́вый, и҆ непроще́ннѡ. Но поне́же многомлⷭ҇тивый и҆ бл҃гоꙋтро́бный є҆сѝ чл҃вѣколю́бче, и҆ ѡ҆жида́еши человѣ́ческагѡ ѡ҆браще́нїѧ: сѐ и҆ а҆́зъ вверга́ю себѐ пред̾ стра́шное и҆ нестерпи́мое твоѐ сꙋди́ще, и҆ ꙗ҆́коже пречⷭ҇тымъ твои̑мъ нога́мъ каса́ѧйсѧ, и҆з̾ глꙋбины̀ дꙋшѝ взыва́ю тѝ: ѡ҆чи́сти гдⷭ҇и, простѝ бл҃гопремѣни́телю, поми́лꙋй не́мощь мою̀, приклони́сѧ недоꙋмѣ́нїю моемꙋ̀, вонмѝ моле́нїю моемꙋ̀, и҆ сле́зъ мои́хъ не премолчѝ. прїими́ мѧ ка́ющагосѧ, и҆ заблꙋ́ждшаго ѡ҆братѝ: ѡ҆браща́ющагосѧ ѡ҆б̾имѝ, и҆ молѧ́щагосѧ простѝ. Не бо̀ положи́лъ є҆сѝ покаѧ́нїе пра́вєднымъ, не положи́лъ є҆сѝ проще́нїе несогрѣша́ющымъ: но положи́лъ є҆сѝ покаѧ́нїе мнѣ̀ грѣ́шномꙋ, въ ни́хже въ негодова́нїе твоѐ содѣ́ѧхъ. на́гъ и҆ ѡ҆бнаже́нъ пред̾ тобо́ю предстою̀, сердцевѣ́дче гдⷭ҇и, и҆сповѣ́даѧй моѧ̑ грѣхѝ: не бо̀ могꙋ̀ воззрѣ́ти и҆ ви́дѣти высотꙋ̀ нбⷭ҇нꙋю, ѿ тѧ́жести грѣхѡ́въ мои́хъ слѧца́емь. Просвѣтѝ ᲂу҆́бѡ ѻ҆́чи се́рдца моегѡ̀, и҆ да́ждь мѝ ᲂу҆миле́нїе къ покаѧ́нїю и҆ сокрꙋше́нїе се́рдца ко и҆справле́нїю: да со бл҃го́ю наде́ждею, и҆ и҆́стиннымъ ᲂу҆вѣре́нїемъ, къ та́мошнемꙋ мі́рꙋ пойдꙋ̀, хвалѧ̀ и҆ бл҃гословѧ̀ вы́нꙋ всест҃о́е и҆́мѧ твоѐ, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Ра́зꙋма а҆са́фꙋ, ѻ҃з.

а҃. Внемли́те, лю́дїе моѝ, зако́нꙋ моемꙋ̀, приклони́те ᲂу҆́хо ва́ше во глаго́лы ᲂу҆́стъ мои́хъ.

в҃. Ѿве́рзꙋ въ при́тчахъ ᲂу҆ста̀ моѧ̑, провѣща́ю гана̑нїѧ и҆спе́рва.

г҃. Є҆ли̑ка слы́шахомъ и҆ позна́хомъ ѧ҆̀, и҆ ѻ҆тцы̀ на́ши повѣ́даша на́мъ:

д҃. Не ᲂу҆таи́шасѧ ѿ ча̑дъ и҆́хъ въ ро́дъ и҆́нъ, возвѣща́юще хвалы̑ гдⷭ҇ни, и҆ си̑лы є҆гѡ̀ и҆ чꙋдеса̀ є҆гѡ̀, ꙗ҆̀же сотворѝ.

є҃. И҆ воздви́же свидѣ́нїе во і҆а́кѡвѣ, и҆ зако́нъ положѝ во і҆и҃ли, є҆ли̑ка заповѣ́да ѻ҆тцє́мъ на́шымъ сказа́ти ѧ҆̀ сыновѡ́мъ свои̑мъ,

ѕ҃. Ꙗ҆́кѡ да позна́етъ ро́дъ и҆́нъ, сы́нове родѧ́щїисѧ, и҆ воста́нꙋтъ и҆ повѣ́дѧтъ ѧ҆̀ сыновѡ́мъ свои̑мъ:

з҃. Да положа́тъ на бг҃а ᲂу҆пова́нїе своѐ, и҆ не забꙋ́дꙋтъ дѣ́лъ бж҃їихъ, и҆ за́пѡвѣди є҆гѡ̀ взы́щꙋтъ:

и҃. Да не бꙋ́дꙋтъ ꙗ҆́коже ѻ҆тцы̀ и҆́хъ, ро́дъ стропти́въ и҆ преѡгорчева́ѧй, ро́дъ и҆́же не и҆спра́ви се́рдца своегѡ̀ и҆ не ᲂу҆вѣ́ри съ бг҃омъ дꙋ́ха своегѡ̀.

ѳ҃. Сы́нове є҆фрє́мли налѧца́юще и҆ стрѣлѧ́юще лꙋ́ки возврати́шасѧ въ де́нь бра́ни:

і҃. Не сохрани́ша завѣ́та бж҃їѧ, и҆ въ зако́нѣ є҆гѡ̀ не восхотѣ́ша ходи́ти.

а҃і. И҆ забы́ша бл҃годѣѧ̑нїѧ є҆гѡ̀ и҆ чꙋдеса̀ є҆гѡ̀, ꙗ҆̀же показа̀ и҆̀мъ

в҃і. Пред̾ ѻ҆тцы̀ и҆́хъ, ꙗ҆̀же сотворѝ чꙋдеса̀ въ землѝ є҆гѵ́петстѣй, на по́ли танеѡ́сѣ:

г҃і. Разве́рзе мо́ре и҆ проведѐ и҆̀хъ: предста́ви во́ды ꙗ҆́кѡ мѣ́хъ,

д҃і. И҆ наста́ви ѧ҆̀ ѻ҆́блакомъ во днѝ и҆ всю̀ но́щь просвѣще́нїемъ ѻ҆гнѧ̀.

є҃і. Разве́рзе ка́мень въ пꙋсты́ни и҆ напоѝ ѧ҆̀ ꙗ҆́кѡ въ бе́зднѣ мно́зѣ:

ѕ҃і. И҆ и҆зведѐ во́дꙋ и҆з̾ ка́мене и҆ низведѐ ꙗ҆́кѡ рѣ́ки во́ды.

з҃і. И҆ приложи́ша є҆щѐ согрѣша́ти є҆мꙋ̀, преѡгорчи́ша вы́шнѧго въ безво́днѣй:

и҃і. И҆ и҆скꙋси́ша бг҃а въ сердца́хъ свои́хъ, воспроси́ти бра̑шна дꙋша́мъ свои̑мъ.

ѳ҃і. И҆ клевета́ша на бг҃а и҆ рѣ́ша: є҆да̀ возмо́жетъ бг҃ъ ᲂу҆гото́вати трапе́зꙋ въ пꙋсты́ни;

к҃. Поне́же поразѝ ка́мень, и҆ потеко́ша во́ды, и҆ пото́цы наводни́шасѧ: є҆да̀ и҆ хлѣ́бъ мо́жетъ да́ти; и҆лѝ ᲂу҆гото́вати трапе́зꙋ лю́демъ свои̑мъ;

к҃а. Сегѡ̀ ра́ди слы́ша гдⷭ҇ь и҆ презрѣ̀, и҆ ѻ҆́гнь возгорѣ́сѧ во і҆а́кѡвѣ, и҆ гнѣ́въ взы́де на і҆и҃лѧ:

к҃в. Ꙗ҆́кѡ не вѣ́роваша бг҃ови, нижѐ ᲂу҆пова́ша на сп҃се́нїе є҆гѡ̀.

к҃г. И҆ заповѣ́да ѻ҆блакѡ́мъ свы́ше, и҆ двє́ри небесѐ ѿве́рзе:

к҃д. И҆ ѡ҆дождѝ и҆̀мъ ма́ннꙋ ꙗ҆́сти, и҆ хлѣ́бъ небе́сный дадѐ и҆̀мъ.

к҃є. Хлѣ́бъ а҆́гг҃льскїй ꙗ҆дѐ человѣ́къ: бра́шно посла̀ и҆̀мъ до сы́тости.

к҃ѕ. Воздви́же ю҆́гъ съ небесѐ, и҆ наведѐ си́лою свое́ю лі́ва:

к҃з. И҆ ѡ҆дождѝ на нѧ̀ ꙗ҆́кѡ пра́хъ плѡ́ти, и҆ ꙗ҆́кѡ песо́къ морскі́й пти̑цы перна̑ты.

к҃и. И҆ нападо́ша посредѣ̀ ста́на и҆́хъ, ѡ҆́крестъ жили́щъ и҆́хъ.

к҃ѳ. И҆ ꙗ҆до́ша и҆ насы́тишасѧ ѕѣлѡ̀, и҆ жела́нїе и҆́хъ пренесѐ и҆̀мъ.

л҃. Не лиши́шасѧ ѿ жела́нїѧ своегѡ̀: є҆щѐ бра́шнꙋ сꙋ́щꙋ во ᲂу҆стѣ́хъ и҆́хъ,

л҃а. И҆ гнѣ́въ бж҃їй взы́де на нѧ̀, и҆ ᲂу҆бѝ мнѡ́жайшаѧ и҆́хъ, и҆ и҆збра̑ннымъ і҆и҃лєвымъ запѧ́тъ.

л҃в. Во всѣ́хъ си́хъ согрѣши́ша є҆щѐ и҆ не вѣ́роваша чꙋдесє́мъ є҆гѡ̀:

л҃г. И҆ и҆счезо́ша въ сꙋетѣ̀ дні́е и҆́хъ, и҆ лѣ̑та и҆́хъ со тща́нїемъ.

л҃д. Є҆гда̀ ᲂу҆бива́ше ѧ҆̀, тогда̀ взыска́хꙋ є҆го̀ и҆ ѡ҆браща́хꙋсѧ и҆ ᲂу҆́треневахꙋ къ бг҃ꙋ:

л҃є. И҆ помѧнꙋ́ша, ꙗ҆́кѡ бг҃ъ помо́щникъ и҆̀мъ є҆́сть, и҆ бг҃ъ вы́шнїй и҆зба́витель и҆̀мъ є҆́сть:

л҃ѕ. И҆ возлюби́ша є҆го̀ ᲂу҆сты̑ свои́ми, и҆ ѧ҆зы́комъ свои́мъ солга́ша є҆мꙋ̀:

л҃з. Се́рдце же и҆́хъ не бѣ̀ пра́во съ ни́мъ, нижѐ ᲂу҆вѣ́ришасѧ въ завѣ́тѣ є҆гѡ̀.

л҃и. То́й же є҆́сть ще́дръ, и҆ ѡ҆чи́ститъ грѣхѝ и҆́хъ, и҆ не растли́тъ: и҆ ᲂу҆мно́житъ ѿврати́ти ꙗ҆́рость свою̀, и҆ не разжже́тъ всегѡ̀ гнѣ́ва своегѡ̀.

л҃ѳ. И҆ помѧнꙋ̀, ꙗ҆́кѡ пло́ть сꙋ́ть, дꙋ́хъ ходѧ́й и҆ не ѡ҆браща́ѧйсѧ:

м҃. Колькра́ты преѡгорчи́ша є҆го̀ въ пꙋсты́ни, прогнѣ́ваша є҆го̀ въ землѝ безво́днѣй;

м҃а. И҆ ѡ҆брати́шасѧ, и҆ и҆скꙋси́ша бг҃а, и҆ ст҃а́го і҆и҃лева раздражи́ша:

м҃в. И҆ не помѧнꙋ́ша рꙋкѝ є҆гѡ̀ въ де́нь, во́ньже и҆зба́ви ѧ҆̀ и҆з̾ рꙋкѝ ѡ҆скорблѧ́ющагѡ:

м҃г. Ꙗ҆́коже положѝ во є҆гѵ́птѣ зна́мєнїѧ своѧ̑, и҆ чꙋдеса̀ своѧ̑ на по́ли танеѡ́сѣ:

м҃д. И҆ преложѝ въ кро́вь рѣ́ки и҆́хъ и҆ и҆сто́чники и҆́хъ, ꙗ҆́кѡ да не пїю́тъ.

м҃є. Посла̀ на нѧ̀ пє́сїѧ мꙋ̑хи, и҆ поѧдо́ша ѧ҆̀, и҆ жа̑бы, и҆ растлѝ ѧ҆̀:

м҃ѕ. И҆ дадѐ ржѣ̀ плоды̀ и҆́хъ, и҆ трꙋды̀ и҆́хъ прꙋгѡ́мъ.

м҃з. Оу҆бѝ гра́домъ вїногра́ды и҆́хъ и҆ черни́чїе и҆́хъ сла́ною:

м҃и. И҆ предадѐ гра́дꙋ скоты̀ и҆́хъ, и҆ и҆мѣ́нїе и҆́хъ ѻ҆гню̀.

м҃ѳ. Посла̀ на нѧ̀ гнѣ́въ ꙗ҆́рости своеѧ̀, ꙗ҆́рость и҆ гнѣ́въ и҆ ско́рбь, посла́нїе а҆́ггєлы лю́тыми.

н҃. Пꙋтесотворѝ стезю̀ гнѣ́вꙋ своемꙋ̀, и҆ не пощадѣ̀ ѿ сме́рти дꙋ́шъ и҆́хъ, и҆ скоты̀ и҆́хъ въ сме́рти заключѝ:

н҃а. И҆ поразѝ всѧ́кое перворо́дное въ землѝ є҆гѵ́петстѣй, нача́токъ всѧ́кагѡ трꙋда̀ и҆́хъ въ селе́нїихъ ха́мовыхъ.

н҃в. И҆ воздви́же ꙗ҆́кѡ ѻ҆́вцы лю́ди своѧ̑, и҆ возведѐ ѧ҆̀ ꙗ҆́кѡ ста́до въ пꙋсты́ни:

н҃г. И҆ наста́ви ѧ҆̀ на ᲂу҆пова́нїе, и҆ не ᲂу҆боѧ́шасѧ: и҆ врагѝ и҆́хъ покры̀ мо́ре.

н҃д. И҆ введѐ ѧ҆̀ въ го́рꙋ ст҃ы́ни своеѧ̀, го́рꙋ сїю̀, ю҆́же стѧжа̀ десни́ца є҆гѡ̀.

н҃є. И҆ и҆згна̀ ѿ лица̀ и҆́хъ ꙗ҆зы́ки, и҆ по жре́бїю дадѐ и҆̀мъ (зе́млю) ᲂу҆́жемъ жребодаѧ́нїѧ, и҆ вселѝ въ селе́нїихъ и҆́хъ кѡлѣ́на і҆и҃лєва.

н҃ѕ. И҆ и҆скꙋси́ша и҆ преѡгорчи́ша бг҃а вы́шнѧго, и҆ свидѣ́нїй є҆гѡ̀ не сохрани́ша:

н҃з. И҆ ѿврати́шасѧ и҆ ѿверго́шасѧ, ꙗ҆́коже и҆ ѻ҆тцы̀ и҆́хъ: преврати́шасѧ въ лꙋ́къ развраще́нъ:

н҃и. И҆ прогнѣ́ваша є҆го̀ въ хо́лмѣхъ свои́хъ, и҆ во и҆стꙋка́нныхъ свои́хъ раздражи́ша є҆го̀.

н҃ѳ. Слы́ша бг҃ъ и҆ презрѣ̀, и҆ ᲂу҆ничижѝ ѕѣлѡ̀ і҆и҃лѧ:

ѯ҃. И҆ ѿри́нꙋ ски́нїю силѡ́мскꙋю, ꙾селе́нїе є҆́же꙾ ²⁷ всели́сѧ въ человѣ́цѣхъ:

ѯ҃а. И҆ предадѐ въ плѣ́нъ крѣ́пость и҆́хъ, и҆ добро́тꙋ и҆́хъ въ рꙋ́ки врагѡ́въ:

ѯ҃в. И҆ затворѝ во ѻ҆рꙋ́жїи лю́ди своѧ̑ и҆ достоѧ́нїе своѐ презрѣ̀.

ѯ҃г. Ю҆́ношы и҆́хъ поѧдѐ ѻ҆́гнь, и҆ дѣ̑вы и҆́хъ не ѡ҆сѣ́тѡваны бы́ша:

ѯ҃д. Свѧще́нницы и҆́хъ мече́мъ падо́ша, и҆ вдови̑цы и҆́хъ не ѡ҆пла̑каны бꙋ́дꙋтъ.

ѯ҃є. И҆ воста̀ ꙗ҆́кѡ спѧ̀ гдⷭ҇ь, ꙗ҆́кѡ си́ленъ и҆ шꙋ́менъ ѿ вїна̀:

ѯ҃ѕ. И҆ поразѝ врагѝ своѧ̑ вспѧ́ть, поноше́нїе вѣ́чное дадѐ и҆̀мъ:

ѯ҃з. И҆ ѿри́нꙋ селе́нїе і҆ѡ́сифово, и҆ колѣ́но є҆фре́мово не и҆збра̀:

ѯ҃и. И҆ и҆збра̀ колѣ́но і҆ꙋ́дово, го́рꙋ сїѡ́ню, ю҆́же возлюбѝ:

ѯ҃ѳ. И҆ созда̀ ꙗ҆́кѡ є҆диноро́га ст҃и́лище своѐ: на землѝ ѡ҆снова̀ и҆̀ въ вѣ́къ.

ѻ҃. И҆ и҆збра̀ дв҃да раба̀ своего̀, и҆ воспрїѧ́тъ є҆го̀ ѿ ста́дъ ѻ҆́вчихъ:

ѻ҃а. Ѿ дои́лицъ поѧ́тъ є҆го̀, пастѝ і҆а́кѡва раба̀ своего̀, и҆ і҆и҃лѧ достоѧ́нїе своѐ.

ѻ҃в. И҆ ᲂу҆пасѐ ѧ҆̀ въ неѕло́бїи се́рдца своегѡ̀, и҆ въ ра́зꙋмѣхъ рꙋкꙋ̀ своє́ю наста́вилъ ѧ҆̀ є҆́сть.

Сла́ва:

Ѱало́мъ а҆са́фꙋ, ѻ҃и.

а҃. Бж҃е, прїидо́ша ꙗ҆зы́цы въ достоѧ́нїе твоѐ, ѡ҆скверни́ша хра́мъ ст҃ы́й тво́й,

в҃. Положи́ша і҆ерⷭ҇ли́мъ ꙗ҆́кѡ ѻ҆во́щное храни́лище: положи́ша трꙋ̑пїѧ ра̑бъ твои́хъ бра́шно пти́цамъ небє́снымъ, плѡ́ти прпⷣбныхъ твои́хъ ѕвѣрє́мъ земны́мъ:

г҃. Пролїѧ́ша кро́вь и҆́хъ ꙗ҆́кѡ во́дꙋ ѡ҆́крестъ і҆ерⷭ҇ли́ма, и҆ не бѣ̀ погреба́ѧй.

д҃. Бы́хомъ поноше́нїе сосѣ́дѡмъ на́шымъ, подражне́нїе и҆ порꙋга́нїе сꙋ́щымъ ѡ҆́крестъ на́съ.

є҃. Доко́лѣ, гдⷭ҇и, прогнѣ́ваешисѧ до конца̀; разжже́тсѧ ꙗ҆́кѡ ѻ҆́гнь рве́нїе твоѐ;

ѕ҃. Проле́й гнѣ́въ тво́й на ꙗ҆зы́ки незна́ющыѧ тебє̀, и҆ на ца̑рствїѧ, ꙗ҆̀же и҆́мене твоегѡ̀ не призва́ша:

з҃. Ꙗ҆́кѡ поѧдо́ша і҆а́кѡва, и҆ мѣ́сто є҆гѡ̀ ѡ҆пꙋстоши́ша.

и҃. Не помѧнѝ на́шихъ беззако́нїй пе́рвыхъ: ско́рѡ да предварѧ́тъ ны̀ щедрѡ́ты твоѧ̑, гдⷭ҇и, ꙗ҆́кѡ ѡ҆бнища́хомъ ѕѣлѡ̀.

ѳ҃. Помозѝ на́мъ, бж҃е, сп҃си́телю на́шъ, сла́вы ра́ди и҆́мене твоегѡ̀: гдⷭ҇и, и҆зба́ви ны̀ и҆ ѡ҆чи́сти грѣхѝ на́шѧ и҆́мене ра́ди твоегѡ̀.

і҃. Да не когда̀ рекꙋ́тъ ꙗ҆зы́цы: гдѣ̀ є҆́сть бг҃ъ и҆́хъ; и҆ да ᲂу҆вѣ́стсѧ во ꙗ҆зы́цѣхъ пред̾ ѻ҆чи́ма на́шима ѿмще́нїе кро́ве ра̑бъ твои́хъ пролиты́ѧ.

а҃і. Да вни́детъ пред̾ тѧ̀ воздыха́нїе ѡ҆кова́нныхъ: по вели́чїю мы́шцы твоеѧ̀ снабдѝ сы́ны ᲂу҆мерщвле́нныхъ.

в҃і. Возда́ждь сосѣ́дѡмъ на́шымъ седмери́цею въ нѣ́дро и҆́хъ поноше́нїе и҆́хъ, и҆́мже поноси́ша тѧ̀, гдⷭ҇и.

г҃і. Мы́ же лю́дїе твоѝ и҆ ѻ҆́вцы па́жити твоеѧ̀ и҆сповѣ́мысѧ тебѣ̀, бж҃е, во вѣ́къ, въ ро́дъ и҆ ро́дъ возвѣсти́мъ хвалꙋ̀ твою̀.

а҃. Въ коне́цъ, ѡ҆ и҆змѣ́ншихсѧ, свидѣ́нїе а҆са́фꙋ, ѱало́мъ ѻ҃ѳ.

в҃. Пасы́й і҆и҃лѧ вонмѝ: наставлѧ́ѧй ꙗ҆́кѡ ѻ҆вча̀ і҆ѡ́сифа, сѣдѧ́й на херꙋві́мѣхъ, ꙗ҆ви́сѧ:

г҃. Пред̾ є҆фре́момъ и҆ венїамі́номъ и҆ манассі́емъ воздви́гни си́лꙋ твою̀, и҆ прїидѝ во є҆́же сп҃стѝ на́съ.

д҃. Бж҃е, ѡ҆брати́ ны, и҆ просвѣтѝ лицѐ твоѐ, и҆ спасе́мсѧ.

є҃. Гдⷭ҇и бж҃е си́лъ, доко́лѣ гнѣ́ваешисѧ на моли́твꙋ ра̑бъ твои́хъ;

ѕ҃. Напита́еши на́съ хлѣ́бомъ сле́знымъ, и҆ напои́ши на́съ слеза́ми въ мѣ́рꙋ.

з҃. Положи́лъ є҆сѝ на́съ въ прерѣка́нїе сосѣ́дѡмъ на́шымъ, и҆ вразѝ на́ши подражни́ша ны̀.

и҃. Гдⷭ҇и бж҃е си́лъ, ѡ҆брати́ ны, и҆ просвѣтѝ лицѐ твоѐ, и҆ спасе́мсѧ.

ѳ҃. Вїногра́дъ и҆з̾ є҆гѵ́пта прене́слъ є҆сѝ: и҆згна́лъ є҆сѝ ꙗ҆зы́ки, и҆ насади́лъ є҆сѝ и҆̀:

і҃. Пꙋтесотвори́лъ є҆сѝ пред̾ ни́мъ, и҆ насади́лъ є҆сѝ корє́нїѧ є҆гѡ̀, и҆ и҆спо́лни зе́млю.

а҃і. Покры̀ го́ры сѣ́нь є҆гѡ̀, и҆ вѣ̑твїѧ є҆гѡ̀ ке́дры бж҃їѧ:

в҃і. Прострѐ ро́зги ꙾є҆гѡ̀꙾ ²⁸ до мо́рѧ, и҆ да́же до рѣ́къ ѻ҆́трасли ꙾є҆гѡ̀꙾ ²⁹.

г҃і. Вскꙋ́ю низложи́лъ є҆сѝ ѡ҆пло́тъ є҆гѡ̀, и҆ ѡ҆б̾има́ютъ и҆̀ всѝ мимоходѧ́щїи пꙋте́мъ;

д҃і. Ѡ҆зоба̀ и҆̀ ве́прь ѿ дꙋбра́вы, и҆ ᲂу҆едине́нный ди́вїй поѧдѐ и҆̀.

є҃і. Бж҃е си́лъ, ѡ҆брати́сѧ ᲂу҆̀бо, и҆ при́зри съ нб҃сѐ и҆ ви́ждь, и҆ посѣтѝ вїногра́дъ се́й:

ѕ҃і. И҆ совершѝ и҆̀, є҆го́же насадѝ десни́ца твоѧ̀, и҆ на сы́на человѣ́ческаго, є҆го́же ᲂу҆крѣпи́лъ є҆сѝ себѣ̀.

з҃і. Пожже́нъ ѻ҆гне́мъ и҆ раско́панъ: ѿ запреще́нїѧ лица̀ твоегѡ̀ поги́бнꙋтъ.

и҃і. Да бꙋ́детъ рꙋка̀ твоѧ̀ на мꙋ́жа десни́цы твоеѧ̀ и҆ на сы́на человѣ́ческаго, є҆го́же ᲂу҆крѣпи́лъ є҆сѝ себѣ̀,

ѳ҃і. И҆ не ѿстꙋ́пимъ ѿ тебє̀: ѡ҆живи́ши ны̀, и҆ и҆́мѧ твоѐ призове́мъ.

к҃. Гдⷭ҇и бж҃е си́лъ, ѡ҆брати́ ны, и҆ просвѣтѝ лицѐ твоѐ, и҆ спасе́мсѧ.

а҃. Въ коне́цъ, ѡ҆ точи́лѣхъ, ѱало́мъ а҆са́фꙋ, п҃.

в҃. Ра́дꙋйтесѧ бг҃ꙋ помо́щникꙋ на́шемꙋ, воскли́кните бг҃ꙋ і҆а́кѡвлю:

г҃. Прїими́те ѱало́мъ и҆ дади́те тѷмпа́нъ, ѱалти́рь красе́нъ съ гꙋ́сльми:

д҃. Вострꙋби́те въ новомѣ́сѧчїи трꙋбо́ю, во бл҃гознамени́тый де́нь пра́здника ва́шегѡ:

є҃. Ꙗ҆́кѡ повелѣ́нїе і҆и҃леви є҆́сть, и҆ сꙋдьба̀ бг҃ꙋ і҆а́кѡвлю.

ѕ҃. Свидѣ́нїе во і҆ѡ́сифѣ положѝ є҆̀, внегда̀ и҆зы́ти є҆мꙋ̀ ѿ землѝ є҆гѵ́петскїѧ: ѧ҆зы́ка, є҆гѡ́же не вѣ́дѧше, ᲂу҆слы́ша.

з҃. Ѿѧ́тъ ѿ бре́мене хребе́тъ є҆гѡ̀: рꙋ́цѣ є҆гѡ̀ въ кошѝ порабо́тастѣ.

и҃. Въ ско́рби призва́лъ мѧ̀ є҆сѝ, и҆ и҆зба́вихъ тѧ̀: ᲂу҆слы́шахъ тѧ̀ въ та́йнѣ бꙋ́рнѣ: и҆скꙋси́хъ тѧ̀ на водѣ̀ прерѣка́нїѧ.

ѳ҃. Слы́шите, лю́дїе моѝ, и҆ засвидѣ́тельствꙋю ва́мъ, і҆и҃лю, а҆́ще послꙋ́шаеши менѐ:

і҃. Не бꙋ́детъ тебѣ̀ бо́гъ но́въ, нижѐ поклони́шисѧ бо́гꙋ чꙋжде́мꙋ.

а҃і. А҆́зъ бо є҆́смь гдⷭ҇ь бг҃ъ тво́й, и҆зведы́й тѧ̀ ѿ землѝ є҆гѵ́петскїѧ: разширѝ ᲂу҆ста̀ твоѧ̀, и҆ и҆спо́лню ѧ҆̀.

в҃і. И҆ не послꙋ́шаша лю́дїе моѝ гла́са моегѡ̀, и҆ і҆и҃ль не внѧ́тъ мѝ:

г҃і. И҆ ѿпꙋсти́хъ ѧ҆̀ по начина́нїємъ серде́цъ и҆́хъ, по́йдꙋтъ въ начина́нїихъ свои́хъ.

д҃і. А҆́ще бы́ша лю́дїе моѝ послꙋ́шали менѐ, і҆и҃ль а҆́ще бы въ пꙋти̑ моѧ̑ ходи́лъ:

є҃і. Ни ѡ҆ чесо́мъ же ᲂу҆́бѡ врагѝ є҆гѡ̀ смири́лъ бы́хъ, и҆ на ѡ҆скорблѧ́ющыѧ и҆̀хъ возложи́лъ бы́хъ рꙋ́кꙋ мою̀.

ѕ҃і. Вразѝ гдⷭ҇ни солга́ша є҆мꙋ̀, и҆ бꙋ́детъ вре́мѧ и҆́хъ въ вѣ́къ:

з҃і. И҆ напита̀ и҆̀хъ ѿ тꙋ́ка пшени́чна, и҆ ѿ ка́мене ме́да насы́ти и҆̀хъ.

Сла́ва:

Ѱало́мъ а҆са́фꙋ, п҃а.

а҃. Бг҃ъ ста̀ въ со́нмѣ богѡ́въ, посредѣ́ же бо́ги разсꙋ́дитъ.

в҃. Доко́лѣ сꙋ́дите непра́вдꙋ, и҆ ли́ца грѣ́шникѡвъ прїе́млете;

г҃. Сꙋди́те си́рꙋ и҆ ᲂу҆бо́гꙋ, смире́на и҆ ни́ща ѡ҆правда́йте:

д҃. И҆зми́те ни́ща и҆ ᲂу҆бо́га, и҆з̾ рꙋкѝ грѣ́шничи и҆зба́вите є҆го̀.

є҃. Не позна́ша, нижѐ ᲂу҆разꙋмѣ́ша, во тмѣ̀ хо́дѧтъ: да подви́жатсѧ всѧ̑ ѡ҆снова̑нїѧ землѝ.

ѕ҃. А҆́зъ рѣ́хъ: бо́зи є҆стѐ, и҆ сы́нове вы́шнѧгѡ всѝ:

з҃. Вы́ же ꙗ҆́кѡ человѣ́цы ᲂу҆мира́ете, и҆ ꙗ҆́кѡ є҆ди́нъ ѿ кнѧзе́й па́даете.

и҃. Воскрⷭ҇нѝ, бж҃е, сꙋдѝ землѝ: ꙗ҆́кѡ ты̀ наслѣ́диши во всѣ́хъ ꙗ҆зы́цѣхъ.

а҃. Пѣ́снь ѱалма̀ а҆са́фꙋ, п҃в.

в҃. Бж҃е, кто̀ ᲂу҆подо́битсѧ тебѣ̀; не премолчѝ, ꙾нижѐ ᲂу҆кротѝ꙾ ³⁰, бж҃е:

г҃. Ꙗ҆́кѡ сѐ, вразѝ твоѝ возшꙋмѣ́ша, и҆ ненави́дѧщїи тѧ̀ воздвиго́ша главꙋ̀.

д҃. На лю́ди твоѧ̑ лꙋка́вноваша во́лею, и҆ совѣща́ша на ст҃ы̑ѧ твоѧ̑.

є҃. Рѣ́ша: прїиди́те и҆ потреби́мъ ѧ҆̀ ѿ ꙗ҆зы̑къ, и҆ не помѧне́тсѧ и҆́мѧ і҆и҃лево ктомꙋ̀.

ѕ҃. Ꙗ҆́кѡ совѣща́ша є҆диномышле́нїемъ вкꙋ́пѣ, на тѧ̀ завѣ́тъ завѣща́ша:

з҃. Селє́нїѧ і҆дꙋмє́йска и҆ і҆сма́илїте, мѡа́въ и҆ а҆га́рѧне,

и҃. Гева́лъ и҆ а҆ммѡ́нъ и҆ а҆мали́къ, и҆ноплемє́нницы съ живꙋ́щими въ тѵ́рѣ:

ѳ҃. И҆́бо и҆ а҆ссꙋ́ръ прїи́де съ ни́ми, бы́ша въ застꙋпле́нїе сыновѡ́мъ лѡ́тѡвымъ:

і҃. Сотворѝ и҆̀мъ ꙗ҆́кѡ мадїа́мꙋ и҆ сїса́рѣ, ꙗ҆́кѡ і҆аві́мꙋ въ пото́цѣ кі́ссовѣ:

а҃і. Потреби́шасѧ во а҆ендѡ́рѣ, бы́ша ꙗ҆́кѡ гно́й земны́й.

в҃і. Положѝ кнѧ̑зи и҆́хъ ꙗ҆́кѡ ѻ҆ри́ва и҆ зи́ва, и҆ зеве́а и҆ салма́на, всѧ̑ кнѧ̑зи и҆́хъ,

г҃і. И҆́же рѣ́ша: да наслѣ́димъ себѣ̀ ст҃и́лище бж҃їе.

д҃і. Бж҃е мо́й, положѝ ѧ҆̀ ꙗ҆́кѡ ко́ло, ꙗ҆́кѡ тро́сть пред̾ лице́мъ вѣ́тра.

є҃і. Ꙗ҆́кѡ ѻ҆́гнь попалѧ́ѧй дꙋбра̑вы, ꙗ҆́кѡ пла́мень пожига́ѧй го́ры:

ѕ҃і. Та́кѡ пожене́ши ѧ҆̀ бꙋ́рею твое́ю, и҆ гнѣ́вомъ твои́мъ смѧте́ши ѧ҆̀.

з҃і. И҆спо́лни ли́ца и҆́хъ безче́стїѧ, и҆ взы́щꙋтъ и҆́мене твоегѡ̀, гдⷭ҇и.

и҃і. Да постыдѧ́тсѧ и҆ смѧтꙋ́тсѧ въ вѣ́къ вѣ́ка, и҆ посра́мѧтсѧ и҆ поги́бнꙋтъ.

ѳ҃і. И҆ да позна́ютъ, ꙗ҆́кѡ и҆́мѧ тебѣ̀ гдⷭ҇ь, ты̀ є҆ди́нъ вы́шнїй по все́й землѝ.

а҃. Въ коне́цъ, ѡ҆ точи́лѣхъ, сынѡ́мъ коре́ѡвымъ, ѱало́мъ, п҃г.

в҃. Ко́ль возлю́блєнна селє́нїѧ твоѧ̑, гдⷭ҇и си́лъ.

г҃. Жела́етъ и҆ скончава́етсѧ дꙋша̀ моѧ̀ во дворы̀ гдⷭ҇ни: се́рдце моѐ и҆ пло́ть моѧ̀ возра́довастасѧ ѡ҆ бз҃ѣ жи́вѣ.

д҃. И҆́бо пти́ца ѡ҆брѣ́те себѣ̀ хра́минꙋ, и҆ го́рлица гнѣздо̀ себѣ̀, и҆дѣ́же положи́тъ птенцы̀ своѧ̑, ѻ҆лтарѝ твоѧ̑, гдⷭ҇и си́лъ, цр҃ю̀ мо́й и҆ бж҃е мо́й.

є҃. Бл҃же́ни живꙋ́щїи въ домꙋ̀ твое́мъ: въ вѣ́ки вѣкѡ́въ восхва́лѧтъ тѧ̀.

ѕ҃. Бл҃же́нъ мꙋ́жъ, є҆мꙋ́же є҆́сть застꙋпле́нїе є҆гѡ̀ ᲂу҆ тебє̀: восхождє́нїѧ въ се́рдцы свое́мъ положѝ,

з҃. ꙾Во ю҆до́ль плаче́внꙋю, въ мѣ́сто є҆́же положѝ꙾ ³¹ и҆́бо бл҃гослове́нїе да́стъ законополага́ѧй.

и҃. По́йдꙋтъ ѿ си́лы въ си́лꙋ: ꙗ҆ви́тсѧ бг҃ъ богѡ́въ въ сїѡ́нѣ.

ѳ҃. Гдⷭ҇и бж҃е си́лъ, ᲂу҆слы́ши моли́твꙋ мою̀, внꙋшѝ, бж҃е і҆а́кѡвль.

і҃. Защи́тниче на́шъ, ви́ждь, бж҃е, и҆ при́зри на лицѐ хрїста̀ твоегѡ̀.

а҃і. Ꙗ҆́кѡ лꙋ́чше де́нь є҆ди́нъ во дво́рѣхъ твои́хъ па́че ты́сѧщъ: и҆зво́лихъ примета́тисѧ въ домꙋ̀ бг҃а моегѡ̀ па́че, не́же жи́ти мѝ въ селе́нїихъ грѣ́шничихъ.

в҃і. Ꙗ҆́кѡ млⷭ҇ть и҆ и҆́стинꙋ лю́битъ гдⷭ҇ь, бг҃ъ блгⷣть и҆ сла́вꙋ да́стъ: гдⷭ҇ь не лиши́тъ бл҃ги́хъ ходѧ́щихъ неѕло́бїемъ.

г҃і. Гдⷭ҇и бж҃е си́лъ, бл҃же́нъ человѣ́къ ᲂу҆пова́ѧй на тѧ̀.

а҃. Въ коне́цъ, сынѡ́мъ коре́ѡвымъ, ѱало́мъ, п҃д.

в҃. Бл҃говоли́лъ є҆сѝ, гдⷭ҇и, зе́млю твою̀, возврати́лъ є҆сѝ плѣ́нъ і҆а́кѡвль.

г҃. Ѡ҆ста́вилъ є҆сѝ беззакѡ́нїѧ люде́й твои́хъ, покры́лъ є҆сѝ всѧ̑ грѣхѝ и҆́хъ.

д҃. Оу҆кроти́лъ є҆сѝ ве́сь гнѣ́въ тво́й, возврати́лсѧ є҆сѝ ѿ гнѣ́ва ꙗ҆́рости твоеѧ̀.

є҃. Возвратѝ на́съ, бж҃е сп҃се́нїй на́шихъ, и҆ ѿвратѝ ꙗ҆́рость твою̀ ѿ на́съ.

ѕ҃. Є҆да̀ во вѣ́ки прогнѣ́ваешисѧ на ны̀; и҆лѝ простре́ши гнѣ́въ тво́й ѿ ро́да въ ро́дъ;

з҃. Бж҃е, ты̀ ѡ҆бра́щьсѧ ѡ҆живи́ши ны̀, и҆ лю́дїе твоѝ возвеселѧ́тсѧ ѡ҆ тебѣ̀.

и҃. Ꙗ҆вѝ на́мъ, гдⷭ҇и, млⷭ҇ть твою̀, и҆ сп҃се́нїе твоѐ да́ждь на́мъ.

ѳ҃. Оу҆слы́шꙋ, что̀ рече́тъ ѡ҆ мнѣ̀ гдⷭ҇ь бг҃ъ: ꙗ҆́кѡ рече́тъ ми́ръ на лю́ди своѧ̑, и҆ на прпⷣбныѧ своѧ̑, и҆ на ѡ҆браща́ющыѧ сердца̀ къ немꙋ̀.

і҃. Ѻ҆ба́че бли́з̾ боѧ́щихсѧ є҆гѡ̀ сп҃се́нїе є҆гѡ̀, всели́ти сла́вꙋ въ зе́млю на́шꙋ.

а҃і. Млⷭ҇ть и҆ и҆́стина срѣто́стѣсѧ, пра́вда и҆ ми́ръ ѡ҆блобыза́стасѧ:

в҃і. И҆́стина ѿ землѝ возсїѧ̀, и҆ пра́вда съ нб҃сѐ прини́че:

г҃і. И҆́бо гдⷭ҇ь да́стъ бл҃гость, и҆ землѧ̀ на́ша да́стъ пло́дъ сво́й.

д҃і. Пра́вда пред̾ ни́мъ пред̾и́детъ, и҆ положи́тъ въ пꙋ́ть стѡпы̀ своѧ̑.

Сла́ва:

По а҃і-й каѳі́смѣ, трист҃о́е.

Та́же тропарѝ, гла́съ з҃:

И҆мꙋ́щи дꙋшѐ моѧ̀ врачевство̀ покаѧ́нїѧ, пристꙋпѝ, слезѧ́щи, воздыха́нїемъ вопїю́щи: врачꙋ̀ дꙋ́шъ и҆ тѣле́съ свободѝ мѧ̀ чл҃вѣколю́бче, ѿ мно́гихъ согрѣше́нїй. сопричти́ мѧ блꙋдни́цѣ, и҆ разбо́йникꙋ, и҆ мытарю̀: и҆ да́рꙋй мѝ бж҃е, беззако́нїй мои́хъ проще́нїе, и҆ сп҃си́ мѧ.

Сла́ва: Мытаре́вꙋ покаѧ́нїю не поревнова́хъ, и҆ блꙋдни́цы сле́зъ не стѧжа́хъ: недоꙋмѣ́юсѧ бо ѿ ѡ҆слѣпле́нїѧ ѡ҆ таково́мъ и҆справле́нїи: но твои́мъ бл҃гоꙋтро́бїемъ сп҃си́ мѧ хрⷭ҇тѐ бж҃е, ꙗ҆́кѡ чл҃вѣколю́бецъ.

И҆ ны́нѣ: Бцⷣе дв҃о нескве́рнаѧ, сн҃а твоего̀ молѝ съ го́рними си́лами, проще́нїе прегрѣше́нїй на́мъ пре́жде конца̀ дарова́ти, и҆ ве́лїю млⷭ҇ть.

Гдⷭ҇и поми́лꙋй, м҃ и҆ мл҃тва:

Возсїѧ́й въ сердца́хъ на́шихъ чл҃вѣколю́бче гдⷭ҇и, твоегѡ̀ бг҃овѣ́дѣнїѧ нетлѣ́нный свѣ́тъ, и҆ мы́слєнныѧ на̑ша ѿве́рзи ѻ҆́чи, во є҆ѵⷢ҇льскихъ твои́хъ проповѣ́данїй разꙋмѣ́нїе: вложѝ въ на́съ и҆ бл҃же́нныхъ твои́хъ за́повѣдей стра́хъ, да плотскі̑ѧ по́хѡти всѧ̑ попра́вше, дх҃о́вное жи́тельство про́йдемъ, всѧ̑ ꙗ҆̀же ко бл҃гоꙋгожде́нїю твоемꙋ̀ и҆ мꙋ́дрствꙋюще и҆ дѣ́юще. Ты́ бо є҆сѝ просвѣще́нїе дꙋ́шъ и҆ тѣле́съ на́шихъ хрⷭ҇тѐ бж҃е, и҆ тебѣ̀ сла́вꙋ возсыла́емъ со безнача́льнымъ твои́мъ ѻ҆ц҃е́мъ, и҆ всест҃ы́мъ и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ, а҆ми́нь.

Мл҃тва дв҃дꙋ, п҃є.

а҃. Приклонѝ, гдⷭ҇и, ᲂу҆́хо твоѐ, и҆ ᲂу҆слы́ши мѧ̀: ꙗ҆́кѡ ни́щъ и҆ ᲂу҆бо́гъ є҆́смь а҆́зъ.

в҃. Сохранѝ дꙋ́шꙋ мою̀, ꙗ҆́кѡ прпⷣбенъ є҆́смь: сп҃сѝ раба̀ твоего̀, бж҃е мо́й, ᲂу҆пова́ющаго на тѧ̀.

г҃. Поми́лꙋй мѧ̀, гдⷭ҇и, ꙗ҆́кѡ къ тебѣ̀ воззовꙋ̀ ве́сь де́нь.

д҃. Возвеселѝ дꙋ́шꙋ раба̀ твоегѡ̀: ꙗ҆́кѡ къ тебѣ̀ взѧ́хъ дꙋ́шꙋ мою̀.

є҃. Ꙗ҆́кѡ ты̀, гдⷭ҇и, бл҃гъ и҆ кро́токъ и҆ многомлⷭ҇тивъ всѣ̑мъ призыва́ющымъ тѧ̀.

ѕ҃. Внꙋшѝ, гдⷭ҇и, моли́твꙋ мою̀ и҆ вонмѝ гла́сꙋ моле́нїѧ моегѡ̀.

з҃. Въ де́нь ско́рби моеѧ̀ воззва́хъ къ тебѣ̀, ꙗ҆́кѡ ᲂу҆слы́шалъ мѧ̀ є҆сѝ.

и҃. Нѣ́сть подо́бенъ тебѣ̀ въ бозѣ́хъ, гдⷭ҇и, и҆ нѣ́сть по дѣлѡ́мъ твои̑мъ.

ѳ҃. Всѝ ꙗ҆зы́цы, є҆ли́ки сотвори́лъ є҆сѝ, прїи́дꙋтъ и҆ покло́нѧтсѧ пред̾ тобо́ю, гдⷭ҇и, и҆ просла́вѧтъ и҆́мѧ твоѐ:

і҃. Ꙗ҆́кѡ ве́лїй є҆сѝ ты̀ и҆ творѧ́й чꙋдеса̀, ты̀ є҆сѝ бг҃ъ є҆ди́нъ.

а҃і. Наста́ви мѧ̀, гдⷭ҇и, на пꙋ́ть тво́й, и҆ пойдꙋ̀ во и҆́стинѣ твое́й: да возвесели́тсѧ се́рдце моѐ боѧ́тисѧ и҆́мене твоегѡ̀.

в҃і. И҆сповѣ́мсѧ тебѣ̀, гдⷭ҇и бж҃е мо́й, всѣ́мъ се́рдцемъ мои́мъ и҆ просла́влю и҆́мѧ твоѐ въ вѣ́къ:

г҃і. Ꙗ҆́кѡ млⷭ҇ть твоѧ̀ ве́лїѧ на мнѣ̀, и҆ и҆зба́вилъ є҆сѝ дꙋ́шꙋ мою̀ ѿ а҆́да преиспо́днѣйшагѡ.

д҃і. Бж҃е, законопрестꙋ̑пницы воста́ша на мѧ̀, и҆ со́нмъ держа́вныхъ взыска́ша дꙋ́шꙋ мою̀, и҆ не предложи́ша тебѐ пред̾ собо́ю.

є҃і. И҆ ты̀, гдⷭ҇и бж҃е мо́й, ще́дрый и҆ млⷭ҇тивый, долготерпѣли́вый и҆ многомлⷭ҇тивый и҆ и҆́стинный,

ѕ҃і. При́зри на мѧ̀ и҆ поми́лꙋй мѧ̀: да́ждь держа́вꙋ твою̀ ѻ҆́трокꙋ твоемꙋ̀ и҆ сп҃сѝ сы́на рабы̀ твоеѧ̀.

з҃і. Сотворѝ со мно́ю зна́менїе во бл҃го: и҆ да ви́дѧтъ ненави́дѧщїи мѧ̀, и҆ постыдѧ́тсѧ, ꙗ҆́кѡ ты̀, гдⷭ҇и, помо́глъ мѝ и҆ ᲂу҆тѣ́шилъ мѧ̀ є҆сѝ.

а҃. Сынѡ́мъ коре́ѡвымъ, ѱало́мъ пѣ́сни, п҃ѕ.

в҃. Ѡ҆снова̑нїѧ є҆гѡ̀ на гора́хъ ст҃ы́хъ: лю́битъ гдⷭ҇ь врата̀ сїѡ̑нѧ па́че всѣ́хъ селе́нїй і҆а́кѡвлихъ.

г҃. Пресла̑внаѧ глаго́лашасѧ ѡ҆ тебѣ̀, гра́де бж҃їй.

д҃. Помѧнꙋ̀ раа́въ и҆ вавѷлѡ́на вѣ́дꙋщымъ мѧ̀: и҆ сѐ, и҆ноплемє́нницы и҆ тѵ́ръ и҆ лю́дїе є҆ѳїо́пстїи, сі́и бы́ша та́мѡ.

є҃. Ма́ти сїѡ́нъ рече́тъ: человѣ́къ и҆ человѣ́къ роди́сѧ въ не́мъ, и҆ то́й ѡ҆снова̀ и҆̀ вы́шнїй.

ѕ҃. Гдⷭ҇ь повѣ́сть въ писа́нїи люде́й и҆ кнѧзе́й, си́хъ бы́вшихъ въ не́мъ.

з҃. Ꙗ҆́кѡ веселѧ́щихсѧ всѣ́хъ жили́ще въ тебѣ̀.

а҃. Пѣ́снь ѱалма̀ сынѡ́мъ коре́ѡвымъ, въ коне́цъ, ѡ҆ маеле́ѳѣ є҆́же ѿвѣща́ти, ра́зꙋма є҆ма́нꙋ і҆и҃льтѧнинꙋ, п҃з.

в҃. Гдⷭ҇и бж҃е сп҃се́нїѧ моегѡ̀, во днѝ воззва́хъ и҆ въ нощѝ пред̾ тобо́ю:

г҃. Да вни́детъ пред̾ тѧ̀ моли́тва моѧ̀, приклонѝ ᲂу҆́хо твоѐ къ моле́нїю моемꙋ̀.

д҃. Ꙗ҆́кѡ и҆спо́лнисѧ ѕѡ́лъ дꙋша̀ моѧ̀, и҆ живо́тъ мо́й а҆́дꙋ прибли́жисѧ.

є҃. Привмѣне́нъ бы́хъ съ низходѧ́щими въ ро́въ: бы́хъ ꙗ҆́кѡ человѣ́къ без̾ по́мощи,

ѕ҃. Въ ме́ртвыхъ свобо́дь: ꙗ҆́кѡ ꙗ҆́звеннїи спѧ́щїи во гро́бѣ, и҆́хже не помѧнꙋ́лъ є҆сѝ ктомꙋ̀, и҆ ті́и ѿ рꙋкѝ твоеѧ̀ ѿринове́ни бы́ша.

з҃. Положи́ша мѧ̀ въ ро́вѣ преиспо́днѣмъ, въ те́мныхъ и҆ сѣ́ни сме́ртнѣй.

и҃. На мнѣ̀ ᲂу҆тверди́сѧ ꙗ҆́рость твоѧ̀, и҆ всѧ̑ вѡ́лны твоѧ̑ наве́лъ є҆сѝ на мѧ̀.

ѳ҃. Оу҆да́лилъ є҆сѝ зна́емыхъ мои́хъ ѿ менѐ: положи́ша мѧ̀ ме́рзость себѣ̀: пре́данъ бы́хъ и҆ не и҆схожда́хъ.

і҃. Ѻ҆́чи моѝ и҆знемого́стѣ ѿ нищеты̀: воззва́хъ къ тебѣ̀, гдⷭ҇и, ве́сь де́нь, воздѣ́хъ къ тебѣ̀ рꙋ́цѣ моѝ.

а҃і. Є҆да̀ ме́ртвыми твори́ши чꙋдеса̀; и҆лѝ вра́чеве воскресѧ́тъ, и҆ и҆сповѣ́дѧтсѧ тебѣ̀;

в҃і. Є҆да̀ повѣ́сть кто̀ во гро́бѣ млⷭ҇ть твою̀, и҆ и҆́стинꙋ твою̀ въ поги́бели;

г҃і. Є҆да̀ позна̑на бꙋ́дꙋтъ во тмѣ̀ чꙋдеса̀ твоѧ̑, и҆ пра́вда твоѧ̀ въ землѝ забве́ннѣй;

д҃і. И҆ а҆́зъ къ тебѣ̀, гдⷭ҇и, воззва́хъ, и҆ ᲂу҆́трѡ моли́тва моѧ̀ предвари́тъ тѧ̀.

є҃і. Вскꙋ́ю, гдⷭ҇и, ѿрѣ́еши дꙋ́шꙋ мою̀; ѿвраща́еши лицѐ твоѐ ѿ менѐ;

ѕ҃і. Ни́щъ є҆́смь а҆́зъ, и҆ въ трꙋдѣ́хъ ѿ ю҆́ности моеѧ̀: возне́съ же сѧ смири́хсѧ и҆ и҆знемого́хъ.

з҃і. На мнѣ̀ преидо́ша гнѣ́ви твоѝ, ᲂу҆страшє́нїѧ твоѧ̑ возмꙋти́ша мѧ̀:

и҃і. Ѡ҆быдо́ша мѧ̀ ꙗ҆́кѡ вода̀ ве́сь де́нь, ѡ҆держа́ша мѧ̀ вкꙋ́пѣ.

ѳ҃і. Оу҆да́лилъ є҆сѝ ѿ менѐ дрꙋ́га и҆ и҆́скреннѧго, и҆ зна́емыхъ мои́хъ ѿ страсте́й.

Сла́ва:

а҃. Ра́зꙋма є҆ѳа́ма і҆и҃льтѧнина, п҃и.

в҃. Млⷭ҇ти твоѧ̑, гдⷭ҇и, во вѣ́къ воспою̀, въ ро́дъ и҆ ро́дъ возвѣщꙋ̀ и҆́стинꙋ твою̀ ᲂу҆сты̑ мои́ми.

г҃. Занѐ ре́клъ є҆сѝ: въ вѣ́къ млⷭ҇ть сози́ждетсѧ: на нб҃сѣ́хъ ᲂу҆гото́витсѧ и҆́стина твоѧ̀.

д҃. Завѣща́хъ завѣ́тъ и҆збра̑ннымъ мои̑мъ, клѧ́хсѧ дв҃дꙋ рабꙋ̀ моемꙋ̀:

є҃. До вѣ́ка ᲂу҆гото́ваю сѣ́мѧ твоѐ, и҆ сози́ждꙋ въ ро́дъ и҆ ро́дъ прⷭ҇то́лъ тво́й.

ѕ҃. И҆сповѣ́дѧтъ нб҃са̀ чꙋдеса̀ твоѧ̑, гдⷭ҇и, и҆́бо и҆́стинꙋ твою̀ въ цр҃кви ст҃ы́хъ.

з҃. Ꙗ҆́кѡ кто̀ во ѻ҆́блацѣхъ ᲂу҆равни́тсѧ гдⷭ҇еви; ᲂу҆подо́битсѧ гдⷭ҇еви въ сынѣ́хъ бж҃їихъ;

и҃. Бг҃ъ прославлѧ́емь въ совѣ́тѣ ст҃ы́хъ, ве́лїй и҆ стра́шенъ є҆́сть над̾ всѣ́ми ѻ҆кре́стными є҆гѡ̀.

ѳ҃. Гдⷭ҇и бж҃е си́лъ, кто̀ подо́бенъ тебѣ̀; си́ленъ є҆сѝ, гдⷭ҇и, и҆ и҆́стина твоѧ̀ ѡ҆́крестъ тебє̀.

і҃. Ты̀ влⷣчествꙋеши держа́вою морско́ю: возмꙋще́нїе же во́лнъ є҆гѡ̀ ты̀ ᲂу҆кроча́еши.

а҃і. Ты̀ смири́лъ, є҆сѝ, ꙗ҆́кѡ ꙗ҆́звена, го́рдаго: мы́шцею си́лы твоеѧ̀ расточи́лъ є҆сѝ врагѝ твоѧ̑.

в҃і. Твоѧ̑ сꙋ́ть небеса̀, и҆ твоѧ̀ є҆́сть землѧ̀: вселе́ннꙋю и҆ и҆сполне́нїе є҆ѧ̀ ты̀ ѡ҆снова́лъ є҆сѝ.

г҃і. Сѣ́веръ и҆ мо́ре ты̀ созда́лъ є҆сѝ: ѳавѡ́ръ и҆ є҆рмѡ́нъ ѡ҆ и҆́мени твое́мъ возра́дꙋетасѧ.

д҃і. Твоѧ̀ мы́шца съ си́лою: да ᲂу҆крѣпи́тсѧ рꙋка̀ твоѧ̀, и҆ вознесе́тсѧ десни́ца твоѧ̀.

є҃і. Пра́вда и҆ сꙋдьба̀ ᲂу҆гото́ванїе прⷭ҇то́ла твоегѡ̀: млⷭ҇ть и҆ и҆́стина пред̾и́детѣ пред̾ лице́мъ твои́мъ.

ѕ҃і. Бл҃же́ни лю́дїе вѣ́дꙋщїи воскликнове́нїе: гдⷭ҇и, во свѣ́тѣ лица̀ твоегѡ̀ по́йдꙋтъ,

з҃і. И҆ ѡ҆ и҆́мени твое́мъ возра́дꙋютсѧ ве́сь де́нь, и҆ пра́вдою твое́ю вознесꙋ́тсѧ.

и҃і. Ꙗ҆́кѡ похвала̀ си́лы и҆́хъ ты̀ є҆сѝ, и҆ во бл҃говоле́нїи твое́мъ вознесе́тсѧ ро́гъ на́шъ:

ѳ҃і. Ꙗ҆́кѡ гдⷭ҇не є҆́сть застꙋпле́нїе, и҆ ст҃а́гѡ і҆и҃лева цр҃ѧ̀ на́шегѡ.

к҃. Тогда̀ глаго́лалъ є҆сѝ въ видѣ́нїи сыновѡ́мъ твои̑мъ, и҆ ре́клъ є҆сѝ: положи́хъ по́мощь на си́льнаго, вознесо́хъ и҆збра́ннаго ѿ люде́й мои́хъ:

к҃а. Ѡ҆брѣто́хъ дв҃да раба̀ моего̀, є҆ле́емъ ст҃ы́мъ мои́мъ пома́захъ є҆го̀.

к҃в. И҆́бо рꙋка̀ моѧ̀ застꙋ́питъ є҆го̀, и҆ мы́шца моѧ̀ ᲂу҆крѣпи́тъ є҆го̀:

к҃г. Ничто́же ᲂу҆спѣ́етъ вра́гъ на него̀, и҆ сы́нъ беззако́нїѧ не приложи́тъ ѡ҆ѕло́бити є҆го̀.

к҃д. И҆ ссѣкꙋ̀ ѿ лица̀ є҆гѡ̀ врагѝ є҆гѡ̀, и҆ ненави́дѧщыѧ є҆го̀ побѣждꙋ̀:

к҃є. И҆ и҆́стина моѧ̀ и҆ млⷭ҇ть моѧ̀ съ ни́мъ, и҆ ѡ҆ и҆́мени мое́мъ вознесе́тсѧ ро́гъ є҆гѡ̀:

к҃ѕ. И҆ положꙋ̀ на мо́ри рꙋ́кꙋ є҆гѡ̀, и҆ на рѣка́хъ десни́цꙋ є҆гѡ̀.

к҃з. То́й призове́тъ мѧ̀: ѻ҆ц҃ъ мо́й є҆сѝ ты̀, бг҃ъ мо́й и҆ застꙋ́пникъ сп҃се́нїѧ моегѡ̀.

к҃и. И҆ а҆́зъ пе́рвенца положꙋ̀ є҆го̀, высока̀ па́че царе́й земны́хъ:

к҃ѳ. Въ вѣ́къ сохраню̀ є҆мꙋ̀ млⷭ҇ть мою̀, и҆ завѣ́тъ мо́й вѣ́ренъ є҆мꙋ̀:

л҃. И҆ положꙋ̀ въ вѣ́къ вѣ́ка сѣ́мѧ є҆гѡ̀, и҆ прⷭ҇то́лъ є҆гѡ̀ ꙗ҆́кѡ дні́е не́ба.

л҃а. А҆́ще ѡ҆ста́вѧтъ сы́нове є҆гѡ̀ зако́нъ мо́й, и҆ въ сꙋдьба́хъ мои́хъ не по́йдꙋтъ:

л҃в. А҆́ще ѡ҆правда̑нїѧ моѧ̑ ѡ҆сквернѧ́тъ, и҆ за́повѣдїй мои́хъ не сохранѧ́тъ:

л҃г. Посѣщꙋ̀ жезло́мъ беззакѡ́нїѧ и҆́хъ, и҆ ра́нами непра̑вды и҆́хъ,

л҃д. Млⷭ҇ть же мою̀ не разорю̀ ѿ ни́хъ, ни превреждꙋ̀ во и҆́стинѣ мое́й:

л҃є. Нижѐ ѡ҆скверню̀ завѣ́та моегѡ̀, и҆ и҆сходѧ́щихъ ѿ ᲂу҆́стъ мои́хъ не ѿве́ргꙋсѧ.

л҃ѕ. Є҆ди́ною клѧ́хсѧ ѡ҆ ст҃ѣ́мъ мое́мъ: а҆́ще дв҃дꙋ солжꙋ̀;

л҃з. Сѣ́мѧ є҆гѡ̀ во вѣ́къ пребꙋ́детъ, и҆ престо́лъ є҆гѡ̀ ꙗ҆́кѡ со́лнце предо мно́ю,

л҃и. И҆ ꙗ҆́кѡ лꙋна̀ соверше́на въ вѣ́къ, и҆ свидѣ́тель на нб҃сѝ вѣ́ренъ.

л҃ѳ. Ты́ же ѿри́нꙋлъ є҆сѝ и҆ ᲂу҆ничижи́лъ, негодова́лъ є҆сѝ пома́заннаго твоего̀:

м҃. Разори́лъ є҆сѝ завѣ́тъ раба̀ твоегѡ̀, ѡ҆скверни́лъ є҆сѝ на землѝ ст҃ы́ню є҆гѡ̀:

м҃а. Разори́лъ є҆сѝ всѧ̑ ѡ҆пло́ты є҆гѡ̀, положи́лъ є҆сѝ твє́рдаѧ є҆гѡ̀ стра́хъ.

м҃в. Расхища́хꙋ є҆го̀ всѝ мимоходѧ́щїи пꙋте́мъ, бы́сть поноше́нїе сосѣ́дѡмъ свои̑мъ.

м҃г. Возвы́силъ є҆сѝ десни́цꙋ стꙋжа́ющихъ є҆мꙋ̀, возвесели́лъ є҆сѝ всѧ̑ врагѝ є҆гѡ̀:

м҃д. Ѿврати́лъ є҆сѝ по́мощь меча̀ є҆гѡ̀ и҆ не застꙋпи́лъ є҆сѝ є҆го̀ во бра́ни:

м҃є. Разори́лъ є҆сѝ ѿ ѡ҆чище́нїѧ є҆гѡ̀, престо́лъ є҆гѡ̀ на зе́млю пове́рглъ є҆сѝ:

м҃ѕ. Оу҆ма́лилъ є҆сѝ дни̑ вре́мене є҆гѡ̀, ѡ҆блїѧ́лъ є҆сѝ є҆го̀ стꙋдо́мъ.

м҃з. Доко́лѣ, гдⷭ҇и, ѿвраща́ешисѧ въ коне́цъ, разжже́тсѧ ꙗ҆́кѡ ѻ҆́гнь гнѣ́въ тво́й;

м҃и. Помѧнѝ, кі́й мо́й соста́въ: є҆да́ бо всꙋ́е созда́лъ є҆сѝ всѧ̑ сы́ны человѣ́чєскїѧ;

м҃ѳ. Кто̀ є҆́сть человѣ́къ, и҆́же поживе́тъ и҆ не ᲂу҆́зритъ сме́рти, и҆зба́витъ дꙋ́шꙋ свою̀ и҆з̾ рꙋкѝ а҆́довы;

н҃. дѣ̀ сꙋ́ть млⷭ҇ти твоѧ̑ дрє́внїѧ, гдⷭ҇и, и҆́миже клѧ́лсѧ є҆сѝ дв҃дꙋ во и҆́стинѣ твое́й;

н҃а. Помѧнѝ, гдⷭ҇и, поноше́нїе ра̑бъ твои́хъ, є҆́же ᲂу҆держа́хъ въ нѣ́дрѣ мое́мъ мно́гихъ ꙗ҆зы̑къ:

н҃в. И҆́мже поноси́ша вразѝ твоѝ, гдⷭ҇и, и҆́мже поноси́ша и҆змѣне́нїю хрїста̀ твоегѡ̀.

н҃г. Бл҃гослове́нъ гдⷭ҇ь во вѣ́къ: бꙋ́ди, бꙋ́ди.

Сла́ва:

а҃. Мл҃тва мѡѷсе́а человѣ́ка бж҃їѧ, п҃ѳ.

в҃. Гдⷭ҇и, прибѣ́жище бы́лъ є҆сѝ на́мъ въ ро́дъ и҆ ро́дъ.

г҃. Пре́жде да́же гора́мъ не бы́ти и҆ созда́тисѧ землѝ и҆ вселе́ннѣй, и҆ ѿ вѣ́ка и҆ до вѣ́ка ты̀ є҆сѝ.

д҃. Не ѿвратѝ человѣ́ка во смире́нїе, и҆ ре́клъ є҆сѝ: ѡ҆брати́тесѧ, сы́нове человѣ́честїи.

є҃. Ꙗ҆́кѡ ты́сѧща лѣ́тъ пред̾ ѻ҆чи́ма твои́ма, гдⷭ҇и, ꙗ҆́кѡ де́нь вчера́шнїй, и҆́же ми́мѡ и҆́де, и҆ стра́жа нощна́ѧ.

ѕ҃. Оу҆ничижє́нїѧ и҆́хъ лѣ̑та бꙋ́дꙋтъ: ᲂу҆́трѡ ꙗ҆́кѡ трава̀ ми́мѡ и҆́детъ, ᲂу҆́трѡ процвѣте́тъ и҆ пре́йдетъ: на ве́черъ ѿпаде́тъ, ѡ҆жестѣ́етъ и҆ и҆́зсхнетъ:

з҃. Ꙗ҆́кѡ и҆счезо́хомъ гнѣ́вомъ твои́мъ, и҆ ꙗ҆́ростїю твое́ю смꙋти́хомсѧ.

и҃. Положи́лъ є҆сѝ беззакѡ́нїѧ на̑ша пред̾ тобо́ю, вѣ́къ на́шъ въ просвѣще́нїе лица̀ твоегѡ̀.

ѳ҃. Ꙗ҆́кѡ всѝ дні́е на́ши ѡ҆скꙋдѣ́ша, и҆ гнѣ́вомъ твои́мъ и҆счезо́хомъ:

і҃. Лѣ̑та на̑ша ꙗ҆́кѡ паꙋчи́на поꙋча́хꙋсѧ: дні́е лѣ́тъ на́шихъ въ ни́хже се́дмьдесѧтъ лѣ́тъ, а҆́ще же въ си́лахъ, ѻ҆́смьдесѧтъ лѣ́тъ, и҆ мно́жае и҆́хъ трꙋ́дъ и҆ болѣ́знь: ꙗ҆́кѡ прїи́де кро́тость на ны̀, и҆ нака́жемсѧ.

а҃і. Кто̀ вѣ́сть держа́вꙋ гнѣ́ва твоегѡ̀, и҆ ѿ стра́ха твоегѡ̀ ꙗ҆́рость твою̀ и҆счестѝ;

в҃і. Десни́цꙋ твою̀ та́кѡ скажи́ ми, и҆ ꙾ѡ҆кова̑нныѧ꙾ ³² се́рдцемъ въ мꙋ́дрости.

г҃і. Ѡ҆брати́сѧ, гдⷭ҇и, доко́лѣ; и҆ ᲂу҆моле́нъ бꙋ́ди на рабы̑ твоѧ̑.

д҃і. И҆спо́лнихомсѧ заꙋ́тра млⷭ҇ти твоеѧ̀, гдⷭ҇и, и҆ возра́довахомсѧ и҆ возвесели́хомсѧ:

є҃і. Во всѧ̑ дни̑ на́шѧ возвесели́хомсѧ, за дни̑, въ нѧ́же смири́лъ ны̀ є҆сѝ, лѣ̑та, въ нѧ́же ви́дѣхомъ ѕла̑ѧ.

ѕ҃і. И҆ при́зри на рабы̑ твоѧ̑ и҆ на дѣла̀ твоѧ̑, и҆ наста́ви сы́ны и҆́хъ.

з҃і. И҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, и҆ дѣ́ло рꙋ́къ на́шихъ и҆спра́ви.

Хвала̀ пѣ́сни дв҃довы, не надпи́санъ ᲂу҆ є҆врє́й, ч҃.

а҃. Живы́й въ по́мощи вы́шнѧгѡ, въ кро́вѣ бг҃а нбⷭ҇нагѡ водвори́тсѧ,

в҃. Рече́тъ гдⷭ҇еви: застꙋ́пникъ мо́й є҆сѝ и҆ прибѣ́жище моѐ, бг҃ъ мо́й, и҆ ᲂу҆пова́ю на него̀.

г҃. Ꙗ҆́кѡ то́й и҆зба́витъ тѧ̀ ѿ сѣ́ти ло́вчи и҆ ѿ словесѐ мѧте́жна:

д҃. Плещма̀ свои́ма ѡ҆сѣни́тъ тѧ̀, и҆ под̾ крилѣ̑ є҆гѡ̀ надѣ́ешисѧ: ѻ҆рꙋ́жїемъ ѡ҆бы́детъ тѧ̀ и҆́стина є҆гѡ̀.

є҃. Не ᲂу҆бои́шисѧ ѿ стра́ха нощна́гѡ, ѿ стрѣлы̀ летѧ́щїѧ во днѝ,

ѕ҃. Ѿ ве́щи во тмѣ̀ преходѧ́щїѧ, ꙾ѿ срѧ́ща꙾ ³³ и҆ бѣ́са полꙋ́деннагѡ.

з҃. Паде́тъ ѿ страны̀ твоеѧ̀ ты́сѧща, и҆ тма̀ ѡ҆деснꙋ́ю тебє̀, къ тебѣ́ же не прибли́житсѧ:

и҃. Ѻ҆ба́че ѻ҆чи́ма твои́ма смо́триши и҆ воздаѧ́нїе грѣ́шникѡвъ ᲂу҆́зриши.

ѳ҃. Ꙗ҆́кѡ ты̀, гдⷭ҇и, ᲂу҆пова́нїе моѐ: вы́шнѧго положи́лъ є҆сѝ прибѣ́жище твоѐ.

і҃. Не прїи́детъ къ тебѣ̀ ѕло̀, и҆ ра́на не прибли́житсѧ ꙾тѣлесѝ твоемꙋ̀꙾ ³⁴:

а҃і. Ꙗ҆́кѡ а҆́гг҃лѡмъ свои̑мъ заповѣ́сть ѡ҆ тебѣ̀, сохрани́ти тѧ̀ во всѣ́хъ пꙋте́хъ твои́хъ.

в҃і. На рꙋка́хъ во́змꙋтъ тѧ̀, да не когда̀ преткне́ши ѡ҆ ка́мень но́гꙋ твою̀:

г҃і. На а҆́спїда и҆ васїлі́ска настꙋ́пиши, и҆ попере́ши льва̀ и҆ ѕмі́ѧ.

д҃і. Ꙗ҆́кѡ на мѧ̀ ᲂу҆пова̀, и҆ и҆зба́влю и҆̀: покры́ю и҆̀, ꙗ҆́кѡ позна̀ и҆́мѧ моѐ.

є҃і. Воззове́тъ ко мнѣ̀, и҆ ᲂу҆слы́шꙋ є҆го̀: съ ни́мъ є҆́смь въ ско́рби, и҆змꙋ̀ є҆го̀ и҆ просла́влю є҆го̀:

ѕ҃і. Долгото́ю дні́й и҆спо́лню є҆го̀ и҆ ꙗ҆влю̀ є҆мꙋ̀ сп҃се́нїе моѐ.

Сла́ва:

По в҃і-й каѳі́смѣ, трист҃о́е.

Та́же тропарѝ, гла́съ з҃:

Блꙋдни́цы сле́зы и҆ петрѡ́вы прїе́мый гдⷭ҇и, и҆ мытарѧ̀ ѡ҆правда́вый, и҆з̾ глꙋбины̀ воздохнꙋ́вша: и҆ менѐ во ᲂу҆миле́нїи припа́дающа ᲂу҆ще́дри сп҃се, и҆ поми́лꙋй мѧ̀.

Сла́ва: Прїимѝ ꙗ҆́кѡ мытарѧ̀ гдⷭ҇и, ꙗ҆́кѡ блꙋдни́цꙋ ѡ҆чи́сти мѧ̀ влⷣко, ꙗ҆́кѡ ханане́ю поми́лꙋй, по вели́цѣй твое́й млⷭ҇ти.

И҆ ны́нѣ: Мт҃и свѣ́та бл҃гослове́ннаѧ бцⷣе, моли́сѧ хрⷭ҇тꙋ̀ бг҃ꙋ совозсїѧ́ти ᲂу҆́тро, и҆ ве́лїю млⷭ҇ть дꙋша́мъ на́шымъ.

Гдⷭ҇и поми́лꙋй, м҃. и҆ мл҃тва:

Гдⷭ҇и бж҃е мо́й, є҆ди́нъ бл҃гі́й и҆ чл҃вѣколюби́вый, є҆ди́нъ млⷭ҇тивый и҆ кро́ткїй, є҆ди́нъ и҆́стинный и҆ првⷣный, є҆ди́нъ ще́дрый и҆ млⷭ҇тивый бж҃е на́шъ: да прїи́детъ си́ла твоѧ̀ на мѧ̀ грѣ́шнаго и҆ непотре́бнаго раба̀ твоего̀, и҆ да ᲂу҆крѣпи́тъ мо́й хра́мъ є҆ѵⷢ҇лїемъ бж҃е́ственнагѡ ᲂу҆че́нїѧ твоегѡ̀. влⷣко и҆ чл҃вѣколю́бче, любобл҃же, любобл҃гоꙋтро́бне, просвѣтѝ моѧ̑ ᲂу҆трѡ́бы, и҆ всѧ̑ ᲂу҆́ды твое́ю во́лею: ѡ҆чи́сти мѧ̀ ѿ всѧ́кїѧ ѕло́бы и҆ грѣха̀, соблюди́ мѧ нескве́рна, и҆ непоро́чна ѿ всѧ́кагѡ наи́тїѧ и҆ дѣ́йства дїа́волѧ, и҆ да́рꙋй мѝ по твое́й бл҃гости, твоѧ̑ разꙋмѣ́ти, твоѧ̑ мꙋ́дрствовати, и҆ въ твои́хъ хотѣ́нїихъ жи́ти, твоегѡ̀ стра́ха страши́тисѧ, є҆́же твори́ти тебѣ̀ бл҃гоꙋгѡ́днаѧ до послѣ́днѧгѡ моегѡ̀ и҆здыха́нїѧ, ꙗ҆́кѡ да по неисповѣди́мой твое́й млⷭ҇ти соблюде́ши моѐ тѣ́ло и҆ дꙋ́шꙋ, ᲂу҆́мъ же и҆ мы̑сли, неискꙋше́нъ всѧ́кїѧ сопротиволежа́щїѧ сѣ́ти хра́мъ. гдⷭ҇и мо́й гдⷭ҇и, покры́й мѧ̀ твои́мъ бл҃гоꙋтро́бїемъ, и҆ не ѡ҆ста́ви мѧ̀ грѣ́шнаго, и҆ нечи́стаго, и҆ недосто́йнаго раба̀ твоего̀: ꙗ҆́кѡ ты̀ є҆сѝ защи́титель мо́й гдⷭ҇и, и҆ ѡ҆ тебѣ̀ пѣ́нїе моѐ вы́нꙋ, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

а҃. Ѱало́мъ пѣ́сни, въ де́нь сꙋббѡ́тный, ч҃а.

в҃. Бл҃го є҆́сть и҆сповѣ́датисѧ гдⷭ҇еви и҆ пѣ́ти и҆́мени твоемꙋ̀, вы́шнїй:

г҃. Возвѣща́ти заꙋ́тра млⷭ҇ть твою̀ и҆ и҆́стинꙋ твою̀ на всѧ́кꙋ но́щь,

д҃. Въ десѧтострꙋ́ннѣмъ ѱалти́ри съ пѣ́снїю въ гꙋ́слехъ.

є҃. Ꙗ҆́кѡ возвесели́лъ мѧ̀ є҆сѝ, гдⷭ҇и, въ творе́нїи твое́мъ, и҆ въ дѣ́лѣхъ рꙋкꙋ̀ твоє́ю возра́дꙋюсѧ.

ѕ҃. Ꙗ҆́кѡ возвели́чишасѧ дѣла̀ твоѧ̑, гдⷭ҇и: ѕѣлѡ̀ ᲂу҆глꙋби́шасѧ помышлє́нїѧ твоѧ̑.

з҃. Мꙋ́жъ безꙋ́менъ не позна́етъ, и҆ неразꙋми́въ не разꙋмѣ́етъ си́хъ.

и҃. Внегда̀ прозѧбо́ша грѣ̑шницы ꙗ҆́кѡ трава̀, и҆ пронико́ша всѝ дѣ́лающїи беззако́нїе, ꙗ҆́кѡ да потребѧ́тсѧ въ вѣ́къ вѣ́ка:

ѳ҃. Ты́ же вы́шнїй во вѣ́къ, гдⷭ҇и.

і҃. Ꙗ҆́кѡ сѐ, вразѝ твоѝ, гдⷭ҇и, ꙗ҆́кѡ сѐ, вразѝ твоѝ поги́бнꙋтъ, и҆ разы́дꙋтсѧ всѝ дѣ́лающїи беззако́нїе.

а҃і. И҆ вознесе́тсѧ ꙗ҆́кѡ є҆диноро́га ро́гъ мо́й, и҆ ста́рость моѧ̀ въ є҆ле́и масти́тѣ:

в҃і. И҆ воззрѣ̀ ѻ҆́ко моѐ на врагѝ моѧ̑, и҆ востаю́щыѧ на мѧ̀ лꙋка́внꙋющыѧ ᲂу҆слы́шитъ ᲂу҆́хо моѐ.

г҃і. Првⷣникъ ꙗ҆́кѡ фі́нїѯъ процвѣте́тъ: ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ.

д҃і. Насажде́ни въ домꙋ̀ гдⷭ҇ни во дво́рѣхъ бг҃а на́шегѡ процвѣтꙋ́тъ:

є҃і. Є҆щѐ ᲂу҆мно́жатсѧ въ ста́рости масти́тѣ, и҆ бл҃гопрїе́млюще бꙋ́дꙋтъ.

ѕ҃і. Да возвѣстѧ́тъ, ꙗ҆́кѡ пра́въ гдⷭ҇ь бг҃ъ на́шъ, и҆ нѣ́сть непра́вды въ не́мъ.

Въ де́нь предсꙋббѡ́тный, внегда̀ насели́сѧ землѧ̀, хвала̀ пѣ́сни дв҃дꙋ, ч҃в.

а҃. Гдⷭ҇ь воцр҃и́сѧ, въ лѣ́потꙋ ѡ҆блече́сѧ: ѡ҆блече́сѧ гдⷭ҇ь въ си́лꙋ и҆ препоѧ́сасѧ: и҆́бо ᲂу҆твердѝ вселе́ннꙋю, ꙗ҆́же не подви́житсѧ.

в҃. Гото́въ прⷭ҇то́лъ тво́й ѿто́лѣ: ѿ вѣ́ка ты̀ є҆сѝ.

г҃. Воздвиго́ша рѣ́ки, гдⷭ҇и, воздвиго́ша рѣ́ки гла́сы своѧ̑:

д҃. Во́змꙋтъ рѣ́ки сотрє́нїѧ своѧ̑, ѿ гласѡ́въ во́дъ мно́гихъ.

є҃. Ди̑вны высѡты̀ мѡрскі́ѧ: ди́венъ въ высо́кихъ гдⷭ҇ь.

ѕ҃. Свидѣ̑нїѧ твоѧ̑ ᲂу҆вѣ́ришасѧ ѕѣлѡ̀. До́мꙋ твоемꙋ̀ подоба́етъ ст҃ы́нѧ, гдⷭ҇и, въ долготꙋ̀ дні́й.

Ѱало́мъ дв҃дꙋ, въ четве́ртый сꙋббѡ́ты, ч҃г.

а҃. Бг҃ъ ѿмще́нїй гдⷭ҇ь, бг҃ъ ѿмще́нїй не ѡ҆бинꙋ́лсѧ є҆́сть.

в҃. Вознеси́сѧ, сꙋдѧ́й землѝ, возда́ждь воздаѧ́нїе гѡ́рдымъ.

г҃. Доко́лѣ грѣ̑шницы, гдⷭ҇и, доко́лѣ грѣ̑шницы восхва́лѧтсѧ;

д҃. Провѣща́ютъ и҆ возглаго́лютъ непра́вдꙋ, возглаго́лютъ всѝ дѣ́лающїи беззако́нїе;

є҃. Лю́ди твоѧ̑, гдⷭ҇и, смири́ша, и҆ достоѧ́нїе твоѐ ѡ҆ѕло́биша:

ѕ҃. Вдови́цꙋ и҆ си́ра ᲂу҆мори́ша, и҆ прише́льца ᲂу҆би́ша,

з҃. И҆ рѣ́ша: не ᲂу҆́зритъ гдⷭ҇ь, нижѐ ᲂу҆разꙋмѣ́етъ бг҃ъ і҆а́кѡвль.

и҃. Разꙋмѣ́йте же, безꙋ́мнїи въ лю́дехъ, и҆ бꙋ́їи нѣ́когда, ᲂу҆мꙋдри́тесѧ:

ѳ҃. Насажде́й ᲂу҆́хо, не слы́шитъ ли; и҆лѝ созда́вый ѻ҆́ко, не сматрѧ́етъ ли;

і҃. Наказꙋ́ѧй ꙗ҆зы́ки, не ѡ҆бличи́тъ ли, ᲂу҆ча́й человѣ́ка ра́зꙋмꙋ;

а҃і. Гдⷭ҇ь вѣ́сть помышлє́нїѧ человѣ́чєскаѧ, ꙗ҆́кѡ сꙋ́ть сꙋ́єтна.

в҃і. Бл҃же́нъ человѣ́къ, є҆го́же а҆́ще нака́жеши, гдⷭ҇и, и҆ ѿ зако́на твоегѡ̀ наꙋчи́ши є҆го̀:

г҃і. Оу҆кроти́ти є҆го̀ ѿ дні́й лю́тыхъ, до́ндеже и҆зры́етсѧ грѣ́шномꙋ ꙗ҆́ма.

д҃і. Ꙗ҆́кѡ не ѿри́нетъ гдⷭ҇ь люде́й свои́хъ, и҆ достоѧ́нїѧ своегѡ̀ не ѡ҆ста́витъ:

є҃і. До́ндеже пра́вда ѡ҆брати́тсѧ на сꙋ́дъ, и҆ держа́щїисѧ є҆ѧ̀ всѝ пра́вїи срⷣцемъ.

ѕ҃і. Кто̀ воста́нетъ мѝ на лꙋка́внꙋющыѧ; и҆лѝ кто̀ спредста́нетъ мѝ на дѣ́лающыѧ беззако́нїе;

з҃і. А҆́ще не гдⷭ҇ь помо́глъ бы мѝ, вма́лѣ всели́ласѧ бы во а҆́дъ дꙋша̀ моѧ̀.

и҃і. А҆́ще глаго́лахъ: подви́жесѧ нога̀ моѧ̀, млⷭ҇ть твоѧ̀, гдⷭ҇и, помога́ше мѝ:

ѳ҃і. По мно́жествꙋ болѣ́зней мои́хъ въ се́рдцы мое́мъ, ᲂу҆тѣшє́нїѧ твоѧ̑ возвесели́ша дꙋ́шꙋ мою̀.

к҃. Да не пребꙋ́детъ тебѣ̀ престо́лъ беззако́нїѧ, созида́ѧй трꙋ́дъ на повелѣ́нїе.

к҃а. Оу҆ловѧ́тъ на дꙋ́шꙋ првⷣничꙋ, и҆ кро́вь непови́ннꙋю ѡ҆сꙋ́дѧтъ.

к҃в. И҆ бы́сть мнѣ̀ гдⷭ҇ь въ прибѣ́жище, и҆ бг҃ъ мо́й въ по́мощь ᲂу҆пова́нїѧ моегѡ̀:

к҃г. И҆ возда́стъ и҆̀мъ гдⷭ҇ь беззако́нїе и҆́хъ, и҆ по лꙋка́вствїю и҆́хъ погꙋби́тъ ѧ҆̀ гдⷭ҇ь бг҃ъ꙾ ³⁵.

Сла́ва:

Хвала̀ пѣ́сни дв҃дꙋ, не надпи́санъ ᲂу҆ є҆врє́й, ч҃д.

а҃. Прїиди́те, возра́дꙋемсѧ гдⷭ҇еви, воскли́кнемъ бг҃ꙋ сп҃си́телю на́шемꙋ:

в҃. Предвари́мъ лицѐ є҆гѡ̀ во и҆сповѣ́данїи, и҆ во ѱалмѣ́хъ воскли́кнемъ є҆мꙋ̀:

г҃. Ꙗ҆́кѡ бг҃ъ ве́лїй гдⷭ҇ь, и҆ цр҃ь ве́лїй по все́й землѝ:

д҃. Ꙗ҆́кѡ въ рꙋцѣ̀ є҆гѡ̀ всѝ концы̀ землѝ, и҆ высѡты̀ го́ръ тогѡ̀ сꙋ́ть.

є҃. Ꙗ҆́кѡ тогѡ̀ є҆́сть мо́ре, и҆ то́й сотворѝ є҆̀, и҆ сꙋ́шꙋ рꙋ́цѣ є҆гѡ̀ созда́стѣ.

ѕ҃. Прїиди́те, поклони́мсѧ и҆ припаде́мъ є҆мꙋ̀, и҆ воспла́чемсѧ пред̾ гдⷭ҇емъ сотво́ршимъ на́съ:

з҃. Ꙗ҆́кѡ то́й є҆́сть бг҃ъ на́шъ, и҆ мы̀ лю́дїе па́жити є҆гѡ̀ и҆ ѻ҆́вцы рꙋкѝ є҆гѡ̀. Дне́сь а҆́ще гла́съ є҆гѡ̀ ᲂу҆слы́шите,

и҃. Не ѡ҆жесточи́те серде́цъ ва́шихъ, ꙗ҆́кѡ въ прогнѣ́ванїи, по днѝ и҆скꙋше́нїѧ въ пꙋсты́ни:

ѳ҃. ꙾Во́ньже꙾ ³⁶ и҆скꙋси́ша мѧ̀ ѻ҆тцы̀ ва́ши, и҆скꙋси́ша мѧ̀, и҆ ви́дѣша дѣла̀ моѧ̑.

і҃. Четы́редесѧть лѣ́тъ негодова́хъ ро́да тогѡ̀, и҆ рѣ́хъ: прⷭ҇нѡ заблꙋжда́ютъ се́рдцемъ, ті́и же не позна́ша пꙋте́й мои́хъ:

а҃і. Ꙗ҆́кѡ клѧ́хсѧ во гнѣ́вѣ мое́мъ, а҆́ще вни́дꙋтъ въ поко́й мо́й.

Хвала̀ пѣ́сни дв҃дꙋ, внегда̀ до́мъ созида́шесѧ по плѣне́нїи, не надпи́санъ ᲂу҆ є҆врє́й, ч҃є.

а҃. Воспо́йте гдⷭ҇еви пѣ́снь но́вꙋ, воспо́йте гдⷭ҇еви всѧ̀ землѧ̀:

в҃. Воспо́йте гдⷭ҇еви, бл҃гослови́те и҆́мѧ є҆гѡ̀: бл҃говѣсти́те де́нь ѿ днѐ сп҃се́нїе є҆гѡ̀.

г҃. Возвѣсти́те во ꙗ҆зы́цѣхъ сла́вꙋ є҆гѡ̀, во всѣ́хъ лю́дехъ чꙋдеса̀ є҆гѡ̀.

д҃. Ꙗ҆́кѡ ве́лїй гдⷭ҇ь и҆ хва́ленъ ѕѣлѡ̀, стра́шенъ є҆́сть над̾ всѣ́ми бо́ги.

є҃. Ꙗ҆́кѡ всѝ бо́зи ꙗ҆зы̑къ бѣ́сове: гдⷭ҇ь же небеса̀ сотворѝ.

ѕ҃. И҆сповѣ́данїе и҆ красота̀ пред̾ ни́мъ, ст҃ы́нѧ и҆ великолѣ́пїе во ст҃и́лѣ є҆гѡ̀.

з҃. Принеси́те гдⷭ҇еви, ѻ҆те́чєствїѧ ꙗ҆зы̑къ, принеси́те гдⷭ҇еви сла́вꙋ и҆ че́сть.

и҃. Принеси́те гдⷭ҇еви сла́вꙋ и҆́мени є҆гѡ̀: возми́те жє́ртвы и҆ входи́те во дворы̀ є҆гѡ̀.

ѳ҃. Поклони́тесѧ гдⷭ҇еви во дворѣ̀ ст҃ѣ́мъ є҆гѡ̀: да подви́житсѧ ѿ лица̀ є҆гѡ̀ всѧ̀ землѧ̀.

і҃. Рцы́те во ꙗ҆зы́цѣхъ, ꙗ҆́кѡ гдⷭ҇ь воцр҃и́сѧ: и҆́бо и҆спра́ви вселе́ннꙋю, ꙗ҆́же не подви́житсѧ: сꙋ́дитъ лю́демъ пра́востїю.

а҃і. Да возвеселѧ́тсѧ нб҃са̀, и҆ ра́дꙋетсѧ землѧ̀: да подви́житсѧ мо́ре и҆ и҆сполне́нїе є҆гѡ̀:

в҃і. Возра́дꙋютсѧ полѧ̀, и҆ всѧ̑ ꙗ҆̀же на ни́хъ: тогда̀ возра́дꙋютсѧ всѧ̑ древа̀ дꙋбра̑внаѧ

г҃і. Ѿ лица̀ гдⷭ҇нѧ, ꙗ҆́кѡ грѧде́тъ, ꙗ҆́кѡ грѧде́тъ сꙋди́ти землѝ: сꙋди́ти вселе́ннѣй въ пра́вдꙋ, и҆ лю́демъ и҆́стиною свое́ю.

Ѱало́мъ дв҃дꙋ, є҆гда̀ землѧ̀ є҆гѡ̀ ᲂу҆строѧ́шесѧ, не надпи́санъ ᲂу҆ є҆врє́й, ч҃ѕ.

а҃. Гдⷭ҇ь воцр҃и́сѧ, да ра́дꙋетсѧ землѧ̀, да веселѧ́тсѧ ѻ҆́строви мно́зи.

в҃. Ѻ҆́блакъ и҆ мра́къ ѡ҆́крестъ є҆гѡ̀: пра́вда и҆ сꙋдьба̀ и҆справле́нїе прⷭ҇то́ла є҆гѡ̀.

г҃. Ѻ҆́гнь пред̾ ни́мъ пред̾и́детъ и҆ попали́тъ ѡ҆́крестъ врагѝ є҆гѡ̀.

д҃. Ѡ҆свѣти́ша мѡ́лнїѧ є҆гѡ̀ вселе́ннꙋю: ви́дѣ и҆ подви́жесѧ землѧ̀.

є҃. Го́ры ꙗ҆́кѡ во́скъ раста́ѧша ѿ лица̀ гдⷭ҇нѧ, ѿ лица̀ гдⷭ҇а всеѧ̀ землѝ.

ѕ҃. Возвѣсти́ша нб҃са̀ пра́вдꙋ є҆гѡ̀, и҆ ви́дѣша всѝ лю́дїе сла́вꙋ є҆гѡ̀.

з҃. Да постыдѧ́тсѧ всѝ кла́нѧющїисѧ и҆стꙋка̑ннымъ, хва́лѧщїисѧ ѡ҆ і҆́дѡлѣхъ свои́хъ: поклони́тесѧ є҆мꙋ̀, всѝ а҆́гг҃ли є҆гѡ̀.

и҃. Слы́ша и҆ возвесели́сѧ сїѡ́нъ, и҆ возра́довашасѧ дщє́ри і҆ꙋдє́йскїѧ, сꙋде́бъ ра́ди твои́хъ, гдⷭ҇и:

ѳ҃. Ꙗ҆́кѡ ты̀ гдⷭ҇ь вы́шнїй над̾ все́ю земле́ю, ѕѣлѡ̀ превозне́слсѧ є҆сѝ над̾ всѣ́ми бо́ги.

і҃. Лю́бѧщїи гдⷭ҇а, ненави́дите ѕла̑ѧ: храни́тъ гдⷭ҇ь дꙋ́шы прпⷣбныхъ свои́хъ, и҆з̾ рꙋкѝ грѣ́шничи и҆зба́витъ ѧ҆̀.

а҃і. Свѣ́тъ возсїѧ̀ првⷣникꙋ, и҆ пра̑вымъ срⷣцемъ весе́лїе.

в҃і. Весели́тесѧ, првⷣнїи, ѡ҆ гдⷭ҇ѣ, и҆ и҆сповѣ́дайте па́мѧть ст҃ы́ни є҆гѡ̀.

Сла́ва:

Ѱало́мъ дв҃дꙋ, ч҃з.

а҃. Воспо́йте гдⷭ҇еви пѣ́снь но́вꙋ, ꙗ҆́кѡ ди̑вна сотворѝ гдⷭ҇ь: сп҃сѐ є҆го̀ десни́ца є҆гѡ̀ и҆ мы́шца ст҃а́ѧ є҆гѡ̀.

в҃. Сказа̀ гдⷭ҇ь сп҃се́нїе своѐ, пред̾ ꙗ҆зы́ки ѿкры̀ пра́вдꙋ свою̀.

г҃. Помѧнꙋ̀ млⷭ҇ть свою̀ і҆а́кѡвꙋ и҆ и҆́стинꙋ свою̀ до́мꙋ і҆и҃левꙋ: ви́дѣша всѝ концы̀ землѝ сп҃се́нїе бг҃а на́шегѡ.

д҃. Воскли́кните бг҃ови, всѧ̀ землѧ̀, воспо́йте и҆ ра́дꙋйтесѧ и҆ по́йте.

є҃. По́йте гдⷭ҇еви въ гꙋ́слехъ, въ гꙋ́слехъ и҆ гла́сѣ ѱало́мстѣ,

ѕ҃. Въ трꙋба́хъ ко́ваныхъ и҆ гла́сомъ трꙋбы̀ ро́жаны: вострꙋби́те пред̾ цр҃е́мъ гдⷭ҇емъ.

з҃. Да подви́житсѧ мо́ре и҆ и҆сполне́нїе є҆гѡ̀, вселе́ннаѧ и҆ всѝ живꙋ́щїи на не́й.

и҃. Рѣ́ки воспле́щꙋтъ рꙋко́ю вкꙋ́пѣ, го́ры возра́дꙋютсѧ

ѳ҃. Ѿ лица̀ гдⷭ҇нѧ, ꙗ҆́кѡ грѧде́тъ, ꙗ҆́кѡ и҆́детъ сꙋди́ти землѝ: сꙋди́ти вселе́ннѣй въ пра́вдꙋ, и҆ лю́демъ пра́востїю.

Ѱало́мъ дв҃дꙋ, ч҃и.

а҃. Гдⷭ҇ь воцр҃и́сѧ, да гнѣ́ваютсѧ лю́дїе: сѣдѧ́й на херꙋві́мѣхъ, да подви́житсѧ землѧ̀.

в҃. Гдⷭ҇ь въ сїѡ́нѣ вели́къ, и҆ высо́къ є҆́сть над̾ всѣ́ми людьмѝ.

г҃. Да и҆сповѣ́дѧтсѧ и҆́мени твоемꙋ̀ вели́комꙋ, ꙗ҆́кѡ стра́шно и҆ ст҃о є҆́сть.

д҃. И҆ че́сть царе́ва сꙋ́дъ лю́битъ: ты̀ ᲂу҆гото́валъ є҆сѝ правоты̑, сꙋ́дъ и҆ пра́вдꙋ во і҆а́кѡвѣ ты̀ сотвори́лъ є҆сѝ.

є҃. Возноси́те гдⷭ҇а бг҃а на́шего и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ ст҃о є҆́сть.

ѕ҃. Мѡѷсе́й и҆ а҆арѡ́нъ во і҆ере́ехъ є҆гѡ̀, и҆ самꙋи́лъ въ призыва́ющихъ и҆́мѧ є҆гѡ̀: призыва́хꙋ гдⷭ҇а, и҆ то́й послꙋ́шаше и҆̀хъ.

з҃. Въ столпѣ̀ ѻ҆́блачнѣ глаго́лаше къ ни̑мъ: ꙗ҆́кѡ хранѧ́хꙋ свидѣ̑нїѧ є҆гѡ̀ и҆ повелѣ̑нїѧ є҆гѡ̀, ꙗ҆̀же дадѐ и҆̀мъ.

и҃. Гдⷭ҇и бж҃е на́шъ, ты̀ послꙋ́шалъ є҆сѝ и҆̀хъ: бж҃е, ты̀ млⷭ҇тивъ быва́лъ є҆сѝ и҆̀мъ, и҆ мща́ѧ на всѧ̑ начина̑нїѧ и҆́хъ.

ѳ҃. Возноси́те гдⷭ҇а бг҃а на́шего и҆ покланѧ́йтесѧ въ горѣ̀ ст҃ѣ́й є҆гѡ̀: ꙗ҆́кѡ ст҃ъ гдⷭ҇ь бг҃ъ на́шъ.

Ѱало́мъ дв҃дꙋ во и҆сповѣ́данїе, ч҃ѳ.

а҃. Воскли́кните бг҃ови всѧ̀ землѧ̀:

в҃. Рабо́тайте гдⷭ҇еви въ весе́лїи, вни́дите пред̾ ни́мъ въ ра́дости.

г҃. Оу҆вѣ́дите, ꙗ҆́кѡ гдⷭ҇ь то́й є҆́сть бг҃ъ на́шъ: то́й сотворѝ на́съ, а҆ не мы̀: мы́ же лю́дїе є҆гѡ̀ и҆ ѻ҆́вцы па́жити є҆гѡ̀.

д҃. Вни́дите во врата̀ є҆гѡ̀ во и҆сповѣ́данїи, во дворы̀ є҆гѡ̀ въ пѣ́нїихъ: и҆сповѣ́дайтесѧ є҆мꙋ̀, хвали́те и҆́мѧ є҆гѡ̀.

є҃. Ꙗ҆́кѡ бл҃гъ гдⷭ҇ь, въ вѣ́къ млⷭ҇ть є҆гѡ̀, и҆ да́же до ро́да и҆ ро́да и҆́стина є҆гѡ̀.

Ѱало́мъ дв҃дꙋ, р҃.

а҃. Млⷭ҇ть и҆ сꙋ́дъ воспою̀ тебѣ̀, гдⷭ҇и:

в҃. Пою̀ и҆ разꙋмѣ́ю въ пꙋтѝ непоро́чнѣ: когда̀ прїи́деши ко мнѣ̀; прехожда́хъ въ неѕло́бїи се́рдца моегѡ̀ посредѣ̀ до́мꙋ моегѡ̀.

г҃. Не предлага́хъ пред̾ ѻ҆чи́ма мои́ма ве́щь законопрестꙋ́пнꙋю: творѧ́щыѧ престꙋпле́нїе возненави́дѣхъ:

д҃. Не прильпѐ мнѣ̀ се́рдце стропти́во: ᲂу҆клонѧ́ющагосѧ ѿ менѐ лꙋка́ваго не позна́хъ.

є҃. Ѡ҆клевета́ющаго та́й и҆́скреннѧго своего̀, сего̀ и҆згонѧ́хъ: го́рдымъ ѻ҆́комъ и҆ несы́тымъ се́рдцемъ, съ си́мъ не ꙗ҆дѧ́хъ.

ѕ҃. Ѻ҆́чи моѝ на вѣ̑рныѧ землѝ, посажда́ти ѧ҆̀ со мно́ю: ходѧ́й по пꙋтѝ непоро́чнꙋ, се́й мѝ слꙋжа́ше.

з҃. Не живѧ́ше посредѣ̀ до́мꙋ моегѡ̀ творѧ́й горды́ню: глаго́лѧй непра́вєднаѧ не и҆справлѧ́ше пред̾ ѻ҆чи́ма мои́ма.

и҃. Воꙋ́трїѧ и҆збива́хъ всѧ̑ грѣ̑шныѧ землѝ, є҆́же потреби́ти ѿ гра́да гдⷭ҇нѧ всѧ̑ дѣ́лающыѧ беззако́нїе.

Сла́ва:

По г҃і-й каѳі́смѣ, трист҃о́е.

Та́же тропарѝ, гла́съ и҃:

Ѻ҆́комъ бл҃гоꙋтро́бнымъ, гдⷭ҇и, ви́ждь моѐ смире́нїе, ꙗ҆́кѡ пома́лѣ жи́знь моѧ̀ и҆ждива́етсѧ, и҆ ѿ дѣ́лъ нѣ́сть мнѣ̀ сп҃се́нїѧ. сегѡ̀ ра́ди молю́сѧ: ѻ҆́комъ бл҃гоꙋтро́бнымъ гдⷭ҇и, ви́ждь моѐ смире́нїе, и҆ сп҃си́ мѧ.

Сла́ва: Ꙗ҆́кѡ сꙋдїѝ предстоѧ́щꙋ, попецы́сѧ дꙋшѐ, и҆ стра́шнагѡ днѐ ча́съ помышлѧ́й: сꙋ́дъ бо немлⷭ҇тивъ є҆́сть не сотво́ршымъ млⷭ҇ти. возопі́й ᲂу҆̀бо хрⷭ҇тꙋ̀ бг҃ꙋ: сердцевѣ́дче, согрѣши́хъ, пре́жде да́же не ѡ҆сꙋ́диши, поми́лꙋй мѧ̀.

И҆ ны́нѣ: Стра́шнагѡ твоегѡ̀ и҆ гро́знагѡ и҆ неꙋмы́тнагѡ сꙋда̀ хрⷭ҇тѐ, во ᲂу҆мѣ̀ прїе́мъ де́нь и҆ ча́съ трепе́щꙋ ꙗ҆́кѡ ѕлодѣ́й, стꙋда̀ дѣла̀ и҆ дѣѧ̑нїѧ и҆мѣ́ѧ лю̑таѧ, ꙗ҆̀же є҆ди́нъ а҆́зъ содѣ́ѧхъ прилѣ́жнѡ. тѣ́мже стра́хомъ припа́даю тебѣ̀, вопїѧ̀ болѣ́зненнѡ: мл҃твами ро́ждшїѧ тѧ̀ многомлⷭ҇тиве, сп҃си́ мѧ.

Гдⷭ҇и поми́лꙋй, м҃. и҆ мл҃тва:

Гдⷭ҇и ст҃ы́й, и҆́же въ вы́шнихъ живы́й, и҆ всеви́дѧщимъ твои́мъ ѻ҆́комъ призира́ѧй на всю̀ тва́рь, тебѣ̀ приклони́хомъ вы́ю дꙋшѝ и҆ тѣлесѐ, и҆ тебѣ̀ мо́лимсѧ ст҃ы́й ст҃ы́хъ: прострѝ рꙋ́кꙋ твою̀ неви́димꙋю ѿ ст҃а́гѡ жили́ща твоегѡ̀, и҆ бл҃гословѝ всѧ̑ ны̀. и҆ а҆́ще что̀ къ тебѣ̀ согрѣши́хомъ во́лею и҆ нево́лею, ꙗ҆́кѡ бл҃гъ и҆ чл҃вѣколю́бецъ бг҃ъ простѝ, да́рꙋѧй на́мъ и҆ ми̑рнаѧ бл҃га̑ѧ твоѧ̑. твое́ бо є҆́сть є҆́же ми́ловати и҆ сп҃са́ти бж҃е на́шъ, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

а҃. Моли́тва ни́щагѡ, є҆гда̀ ᲂу҆ны́етъ и҆ пред̾ гдⷭ҇емъ пролїе́тъ моле́нїе своѐ, р҃а.

в҃. Гдⷭ҇и, ᲂу҆слы́ши моли́твꙋ мою̀, и҆ во́пль мо́й къ тебѣ̀ да прїи́детъ.

г҃. Не ѿвратѝ лица̀ твоегѡ̀ ѿ менѐ: во́ньже а҆́ще де́нь скорблю̀, приклонѝ ко мнѣ̀ ᲂу҆́хо твоѐ: во́ньже а҆́ще де́нь призовꙋ́ тѧ, ско́рѡ ᲂу҆слы́ши мѧ̀.

д҃. Ꙗ҆́кѡ и҆счезо́ша ꙗ҆́кѡ ды́мъ дні́е моѝ, и҆ кѡ́сти моѧ̑ ꙗ҆́кѡ сꙋши́ло сосхо́шасѧ.

є҃. Оу҆ѧ́звленъ бы́хъ ꙗ҆́кѡ трава̀, и҆ и҆́зсше се́рдце моѐ, ꙗ҆́кѡ забы́хъ снѣ́сти хлѣ́бъ мо́й.

ѕ҃. Ѿ гла́са воздыха́нїѧ моегѡ̀ прильпѐ ко́сть моѧ̀ пло́ти мое́й.

з҃. Оу҆подо́бихсѧ неѧ́сыти пꙋсты́ннѣй, бы́хъ ꙗ҆́кѡ нощны́й вра́нъ ꙾на ны́рищи꙾ ³⁷.

и҃. Бдѣ́хъ и҆ бы́хъ ꙗ҆́кѡ пти́ца ѡ҆со́бѧщаѧсѧ ꙾на здѣ̀꙾ ³⁸.

ѳ҃. Ве́сь де́нь поноша́хꙋ мѝ вразѝ моѝ, и҆ хва́лѧщїи мѧ̀ ꙾꙾мно́ю꙾꙾ ³⁹ кленѧ́хꙋсѧ.

і҃. Занѐ пе́пелъ ꙗ҆́кѡ хлѣ́бъ ꙗ҆дѧ́хъ и҆ питїѐ моѐ съ пла́чемъ растворѧ́хъ,

а҃і. Ѿ лица̀ гнѣ́ва твоегѡ̀ и҆ ꙗ҆́рости твоеѧ̀: ꙗ҆́кѡ возне́съ низве́рглъ мѧ̀ є҆сѝ.

в҃і. Дні́е моѝ ꙗ҆́кѡ сѣ́нь ᲂу҆клони́шасѧ, и҆ а҆́зъ ꙗ҆́кѡ сѣ́но и҆зсхо́хъ.

г҃і. Ты́ же, гдⷭ҇и, во вѣ́къ пребыва́еши, и҆ па́мѧть твоѧ̀ въ ро́дъ и҆ ро́дъ.

д҃і. Ты̀ воскр҃съ ᲂу҆ще́дриши сїѡ́на: ꙗ҆́кѡ вре́мѧ ᲂу҆ще́дрити є҆го̀, ꙗ҆́кѡ прїи́де вре́мѧ.

є҃і. Ꙗ҆́кѡ бл҃говоли́ша рабѝ твоѝ ꙳ка́менїе꙳ ⁴⁰ є҆гѡ̀, и҆ пе́рсть є҆гѡ̀ ᲂу҆ще́дрѧтъ.

ѕ҃і. И҆ ᲂу҆боѧ́тсѧ ꙗ҆зы́цы и҆́мене гдⷭ҇нѧ, и҆ всѝ ца́рїе зе́мстїи сла́вы твоеѧ̀:

з҃і. Ꙗ҆́кѡ сози́ждетъ гдⷭ҇ь сїѡ́на и҆ ꙗ҆ви́тсѧ во сла́вѣ свое́й.

и҃і. Призрѣ̀ на моли́твꙋ смире́нныхъ и҆ не ᲂу҆ничижѝ моле́нїѧ и҆́хъ.

ѳ҃і. Да напи́шетсѧ сїѐ въ ро́дъ и҆́нъ, и҆ лю́дїе зи́ждемїи восхва́лѧтъ гдⷭ҇а:

к҃. Ꙗ҆́кѡ прини́че съ высоты̀ ст҃ы́ѧ своеѧ̀, гдⷭ҇ь съ нб҃сѐ на зе́млю призрѣ̀,

к҃а. Оу҆слы́шати воздыха́нїе ѡ҆кова́нныхъ, разрѣши́ти сы́ны ᲂу҆мерщвле́нныхъ:

к҃в. Возвѣсти́ти въ сїѡ́нѣ и҆́мѧ гдⷭ҇не и҆ хвалꙋ̀ є҆гѡ̀ во і҆ерⷭ҇ли́мѣ,

к҃г. Внегда̀ собра́тисѧ лю́демъ вкꙋ́пѣ и҆ царє́мъ, є҆́же рабо́тати гдⷭ҇еви.

к҃д. Ѿвѣща̀ є҆мꙋ̀ на пꙋтѝ крѣ́пости є҆гѡ̀: ᲂу҆мале́нїе дні́й мои́хъ возвѣсти́ ми:

к҃є. Не возведѝ менѐ во преполове́нїе дні́й мои́хъ: въ ро́дѣ родѡ́въ лѣ̑та твоѧ̑.

к҃ѕ. Въ нача́лѣхъ ты̀, гдⷭ҇и, зе́млю ѡ҆снова́лъ є҆сѝ, и҆ дѣла̀ рꙋкꙋ̀ твоє́ю сꙋ́ть небеса̀.

к҃з. Та̑ поги́бнꙋтъ, ты́ же пребыва́еши: и҆ всѧ̑ ꙗ҆́кѡ ри́за ѡ҆бетша́ютъ, и҆ ꙗ҆́кѡ ѻ҆де́ждꙋ свїе́ши ѧ҆̀, и҆ и҆змѣнѧ́тсѧ.

к҃и. Ты́ же то́йжде є҆сѝ, и҆ лѣ̑та твоѧ̑ не ѡ҆скꙋдѣ́ютъ.

к҃ѳ. Сы́нове ра̑бъ твои́хъ вселѧ́тсѧ, и҆ сѣ́мѧ и҆́хъ во вѣ́къ и҆спра́витсѧ.

Ѱало́мъ дв҃дꙋ, р҃в.

а҃. Бл҃гословѝ, дꙋшѐ моѧ̀, гдⷭ҇а, и҆ всѧ̑ внꙋ́трєннѧѧ моѧ̑, и҆́мѧ ст҃о́е є҆гѡ̀:

в҃. Бл҃гословѝ, дꙋшѐ моѧ̀, гдⷭ҇а, и҆ не забыва́й всѣ́хъ воздаѧ́нїй є҆гѡ̀:

г҃. Ѡ҆чища́ющаго всѧ̑ беззакѡ́нїѧ твоѧ̑, и҆сцѣлѧ́ющаго всѧ̑ недꙋ́ги твоѧ̑,

д҃. И҆збавлѧ́ющаго ѿ и҆стлѣ́нїѧ живо́тъ тво́й, вѣнча́ющаго тѧ̀ млⷭ҇тїю и҆ щедро́тами,

є҃. И҆сполнѧ́ющаго во бл҃ги́хъ жела́нїе твоѐ: ѡ҆бнови́тсѧ ꙗ҆́кѡ ѻ҆́рлѧ ю҆́ность твоѧ̀.

ѕ҃. Творѧ́й млⷭ҇тыни гдⷭ҇ь и҆ сꙋдьбꙋ̀ всѣ̑мъ ѡ҆би̑димымъ.

з҃. Сказа̀ пꙋти̑ своѧ̑ мѡѷсе́ови, сыновѡ́мъ і҆и҃лєвымъ хотѣ̑нїѧ своѧ̑.

и҃. Ще́дръ и҆ млⷭ҇тивъ гдⷭ҇ь, долготерпѣли́въ и҆ многомлⷭ҇тивъ.

ѳ҃. Не до конца̀ прогнѣ́ваетсѧ, нижѐ во вѣ́къ враждꙋ́етъ:

і҃. Не по беззако́нїємъ на́шымъ сотвори́лъ є҆́сть на́мъ, нижѐ по грѣхѡ́мъ на́шымъ возда́лъ є҆́сть на́мъ.

а҃і. Ꙗ҆́кѡ по высотѣ̀ небе́снѣй ѿ землѝ, ᲂу҆тверди́лъ є҆́сть гдⷭ҇ь млⷭ҇ть свою̀ на боѧ́щихсѧ є҆гѡ̀:

в҃і. Є҆ли́кѡ ѿстоѧ́тъ восто́цы ѿ за̑падъ, ᲂу҆да́лилъ є҆́сть ѿ на́съ беззакѡ́нїѧ на̑ша.

г҃і. Ꙗ҆́коже ще́дритъ ѻ҆те́цъ сы́ны, ᲂу҆ще́дри гдⷭ҇ь боѧ́щихсѧ є҆гѡ̀.

д҃і. Ꙗ҆́кѡ то́й позна̀ созда́нїе на́ше, помѧнꙋ̀, ꙗ҆́кѡ пе́рсть є҆смы̀.

є҃і. Человѣ́къ, ꙗ҆́кѡ трава̀ дні́е є҆гѡ̀, ꙗ҆́кѡ цвѣ́тъ се́лный, та́кѡ ѡ҆цвѣте́тъ:

ѕ҃і. Ꙗ҆́кѡ дꙋ́хъ про́йде въ не́мъ, и҆ не бꙋ́детъ, и҆ не позна́етъ ктомꙋ̀ мѣ́ста своегѡ̀.

з҃і. Млⷭ҇ть же гдⷭ҇нѧ ѿ вѣ́ка и҆ до вѣ́ка на боѧ́щихсѧ є҆гѡ̀,

и҃і. И҆ пра́вда є҆гѡ̀ на сынѣ́хъ сынѡ́въ, хранѧ́щихъ завѣ́тъ є҆гѡ̀ и҆ по́мнѧщихъ за́пѡвѣди є҆гѡ̀ твори́ти ѧ҆̀.

ѳ҃і. Гдⷭ҇ь на нб҃сѝ ᲂу҆гото́ва прⷭ҇то́лъ сво́й, и҆ црⷭ҇тво є҆гѡ̀ всѣ́ми ѡ҆блада́етъ.

к҃. Бл҃гослови́те гдⷭ҇а, всѝ а҆́гг҃ли є҆гѡ̀, си́льнїи крѣ́постїю, творѧ́щїи сло́во є҆гѡ̀, ᲂу҆слы́шати гла́съ слове́съ є҆гѡ̀.

к҃а. Бл҃гослови́те гдⷭ҇а, всѧ̑ си̑лы є҆гѡ̀, слꙋги̑ є҆гѡ̀, творѧ́щїи во́лю є҆гѡ̀.

к҃в. Бл҃гослови́те гдⷭ҇а, всѧ̑ дѣла̀ є҆гѡ̀ на всѧ́комъ мѣ́стѣ влⷣчества є҆гѡ̀: бл҃гословѝ, дꙋшѐ моѧ̀, гдⷭ҇а.

Сла́ва:

Ѱало́мъ дв҃дꙋ, ѡ҆ мїрстѣ́мъ бытїѝ, р҃г.

а҃. Бл҃гословѝ, дꙋшѐ моѧ̀, гдⷭ҇а. Гдⷭ҇и бж҃е мо́й, возвели́чилсѧ є҆сѝ ѕѣлѡ̀: во и҆сповѣ́данїе и҆ въ велелѣ́потꙋ ѡ҆бле́клсѧ є҆сѝ:

в҃. Ѡ҆дѣѧ́йсѧ свѣ́томъ ꙗ҆́кѡ ри́зою, простира́ѧй не́бо ꙗ҆́кѡ ко́жꙋ:

г҃. Покрыва́ѧй вода́ми превы́спрєннѧѧ своѧ̑, полага́ѧй ѻ҆́блаки на восхожде́нїе своѐ, ходѧ́й на крилꙋ̑ вѣ́трєню:

д҃. Творѧ́й а҆́гг҃лы своѧ̑ дꙋ́хи, и҆ слꙋги̑ своѧ̑ пла́мень ѻ҆́гненный:

є҃. Ѡ҆снова́ѧй зе́млю на тве́рди є҆ѧ̀: не преклони́тсѧ въ вѣ́къ вѣ́ка.

ѕ҃. Бе́здна ꙗ҆́кѡ ри́за ѡ҆дѣѧ́нїе є҆ѧ̀, на гора́хъ ста́нꙋтъ во́ды:

з҃. Ѿ запреще́нїѧ твоегѡ̀ побѣ́гнꙋтъ, ѿ гла́са гро́ма твоегѡ̀ ᲂу҆боѧ́тсѧ.

и҃. Восхо́дѧтъ го́ры, и҆ низхо́дѧтъ полѧ̀, въ мѣ́сто є҆́же ѡ҆снова́лъ є҆сѝ и҆̀мъ.

ѳ҃. Предѣ́лъ положи́лъ є҆сѝ, є҆гѡ́же не пре́йдꙋтъ, нижѐ ѡ҆братѧ́тсѧ покры́ти зе́млю.

і҃. Посыла́ѧй и҆сто́чники въ де́брехъ, посредѣ̀ го́ръ про́йдꙋтъ во́ды.

а҃і. Напаѧ́ютъ всѧ̑ ѕвѣ́ри сє́льныѧ, ꙾ждꙋ́тъ꙾ ⁴¹ ѻ҆на́гри въ жа́ждꙋ свою̀.

в҃і. На ты́хъ пти̑цы небє́сныѧ привита́ютъ: ѿ среды̀ ка́менїѧ дадѧ́тъ гла́съ.

г҃і. Напаѧ́ѧй го́ры ѿ превы́спреннихъ свои́хъ: ѿ плода̀ дѣ́лъ твои́хъ насы́титсѧ землѧ̀.

д҃і. Прозѧба́ѧй травꙋ̀ скотѡ́мъ, и҆ ѕла́къ на слꙋ́жбꙋ человѣ́кѡмъ, и҆звестѝ хлѣ́бъ ѿ землѝ:

є҃і. И҆ вїно̀ весели́тъ се́рдце человѣ́ка, ᲂу҆ма́стити лицѐ є҆ле́емъ: и҆ хлѣ́бъ се́рдце человѣ́ка ᲂу҆крѣпи́тъ.

ѕ҃і. Насы́тѧтсѧ древа̀ пѡльска́ѧ, ке́дри лїва́нстїи, и҆̀хже є҆сѝ насади́лъ:

з҃і. Та́мѡ пти̑цы вогнѣздѧ́тсѧ, є҆рѡді́ево жили́ще предводи́тельствꙋетъ и҆́ми.

и҃і. Го́ры высѡ́кїѧ є҆ле́нємъ, ка́мень прибѣ́жище за́ѧцємъ.

ѳ҃і. Сотвори́лъ є҆́сть лꙋнꙋ̀ во времена̀: со́лнце позна̀ за́падъ сво́й.

к҃. Положи́лъ є҆сѝ тмꙋ̀, и҆ бы́сть но́щь, въ не́йже про́йдꙋтъ всѝ ѕвѣ́рїе дꙋбра́внїи,

к҃а. Скѵ́мни рыка́ющїи восхи́тити и҆ взыска́ти ѿ бг҃а пи́щꙋ себѣ̀.

к҃в. Возсїѧ̀ со́лнце, и҆ собра́шасѧ, и҆ въ ло́жахъ свои́хъ лѧ́гꙋтъ.

к҃г. И҆зы́детъ человѣ́къ на дѣ́ло своѐ и҆ на дѣ́ланїе своѐ до ве́чера.

к҃д. Ꙗ҆́кѡ возвели́чишасѧ дѣла̀ твоѧ̑, гдⷭ҇и: всѧ̑ премⷣростїю сотвори́лъ є҆сѝ: и҆спо́лнисѧ землѧ̀ тва́ри твоеѧ̀.

к҃є. Сїѐ мо́ре вели́кое и҆ простра́нное: та́мѡ га́ди, и҆́хже нѣ́сть числа̀, живѡ́тнаѧ ма̑лаѧ съ вели́кими:

к҃ѕ. Та́мѡ кораблѝ препла́ваютъ, ѕмі́й се́й, є҆го́же созда́лъ є҆сѝ рꙋга́тисѧ є҆мꙋ̀.

к҃з. Всѧ̑ къ тебѣ̀ ча́ютъ, да́ти пи́щꙋ и҆̀мъ во бла́го вре́мѧ.

к҃и. Да́вшꙋ тебѣ̀ и҆̀мъ, соберꙋ́тъ: ѿве́рзшꙋ тебѣ̀ рꙋ́кꙋ, всѧ́чєскаѧ и҆спо́лнѧтсѧ бла́гости:

к҃ѳ. Ѿвра́щшꙋ же тебѣ̀ лицѐ, возмѧтꙋ́тсѧ: ѿи́меши дꙋ́хъ и҆́хъ, и҆ и҆сче́знꙋтъ и҆ въ пе́рсть свою̀ возвратѧ́тсѧ:

л҃. По́слеши дх҃а твоего̀, и҆ сози́ждꙋтсѧ, и҆ ѡ҆бнови́ши лицѐ землѝ.

л҃а. Бꙋ́ди сла́ва гдⷭ҇нѧ во вѣ́ки: возвесели́тсѧ гдⷭ҇ь ѡ҆ дѣ́лѣхъ свои́хъ:

л҃в. Призира́ѧй на зе́млю и҆ творѧ́й ю҆̀ трѧсти́сѧ: прикаса́ѧйсѧ гора́мъ, и҆ дымѧ́тсѧ.

л҃г. Воспою̀ гдⷭ҇еви въ животѣ̀ мое́мъ, пою̀ бг҃ꙋ моемꙋ̀, до́ндеже є҆́смь:

л҃д. Да ᲂу҆слади́тсѧ є҆мꙋ̀ бесѣ́да моѧ̀, а҆́зъ же возвеселю́сѧ ѡ҆ гдⷭ҇ѣ.

л҃є. Да и҆сче́знꙋтъ грѣ̑шницы ѿ землѝ, и҆ беззакѡ́нницы, ꙗ҆́коже не бы́ти и҆̀мъ. Бл҃гословѝ, дꙋшѐ моѧ̀, гдⷭ҇а.

Сла́ва:

А҆ллилꙋ́їа, р҃д.

а҃. И҆сповѣ́дайтесѧ гдⷭ҇еви и҆ призыва́йте и҆́мѧ є҆гѡ̀, возвѣсти́те во ꙗ҆зы́цѣхъ дѣла̀ є҆гѡ̀:

в҃. Воспо́йте є҆мꙋ̀ и҆ по́йте є҆мꙋ̀, повѣ́дите всѧ̑ чꙋдеса̀ є҆гѡ̀.

г҃. Хвали́тесѧ ѡ҆ и҆́мени ст҃ѣ́мъ є҆гѡ̀: да возвесели́тсѧ се́рдце и҆́щꙋщихъ гдⷭ҇а:

д҃. Взыщи́те гдⷭ҇а и҆ ᲂу҆тверди́тесѧ, взыщи́те лица̀ є҆гѡ̀ вы́нꙋ.

є҃. Помѧни́те чꙋдеса̀ є҆гѡ̀, ꙗ҆̀же сотворѝ, чꙋдеса̀ є҆гѡ̀ и҆ сꙋдьбы̑ ᲂу҆́стъ є҆гѡ̀,

ѕ҃. Сѣ́мѧ а҆враа́мле рабѝ є҆гѡ̀, сы́нове і҆а̑кѡвли и҆збра́ннїи є҆гѡ̀.

з҃. То́й гдⷭ҇ь бг҃ъ на́шъ: по все́й землѝ сꙋдьбы̑ є҆гѡ̀.

и҃. Помѧнꙋ̀ въ вѣ́къ завѣ́тъ сво́й, сло́во, є҆́же заповѣ́да въ ты́сѧщы родѡ́въ,

ѳ҃. Є҆́же завѣща̀ а҆враа́мꙋ, и҆ клѧ́твꙋ свою̀ і҆саа́кꙋ:

і҃. И҆ поста́ви ю҆̀ і҆а́кѡвꙋ въ повелѣ́нїе и҆ і҆и҃лю въ завѣ́тъ вѣ́ченъ,

а҃і. Гл҃ѧ: тебѣ̀ да́мъ зе́млю ханаа́ню, ᲂу҆́же достоѧ́нїѧ ва́шегѡ.

в҃і. Внегда̀ бы́ти и҆̀мъ ма̑лымъ число́мъ, малѣ́йшымъ и҆ прише́льцємъ въ не́й,

г҃і. И҆ преидо́ша ѿ ꙗ҆зы́ка въ ꙗ҆зы́къ и҆ ѿ ца́рствїѧ въ лю́ди и҆́ны:

д҃і. Не ѡ҆ста́ви человѣ́ка ѡ҆би́дѣти и҆̀хъ и҆ ѡ҆бличѝ ѡ҆ ни́хъ царѝ:

є҃і. Не прикаса́йтесѧ пома̑заннымъ мои̑мъ, и҆ во прⷪ҇ро́цѣхъ мои́хъ не лꙋка́внꙋйте.

ѕ҃і. И҆ призва̀ гла́дъ на зе́млю: всѧ́ко ᲂу҆твержде́нїе хлѣ́бное сотры̀.

з҃і. Посла̀ пред̾ ни́ми человѣ́ка: въ раба̀ про́данъ бы́сть і҆ѡ́сифъ.

и҃і. Смири́ша во ѡ҆ко́вахъ но́зѣ є҆гѡ̀, желѣ́зо про́йде дꙋша̀ є҆гѡ̀,

ѳ҃і. До́ндеже прїи́де сло́во є҆гѡ̀: сло́во гдⷭ҇не разжжѐ є҆го̀.

к҃. Посла̀ ца́рь и҆ разрѣшѝ є҆го̀: кнѧ́зь люде́й, и҆ ꙾ѡ҆ста́ви꙾ ⁴² є҆го̀.

к҃а. Поста́ви є҆го̀ господи́на до́мꙋ своемꙋ̀ и҆ кнѧ́зѧ всемꙋ̀ стѧжа́нїю своемꙋ̀,

к҃в. Наказа́ти кнѧ̑зи є҆гѡ̀ ꙗ҆́кѡ себѐ и҆ ста́рцы є҆гѡ̀ ᲂу҆мꙋдри́ти.

к҃г. И҆ вни́де і҆и҃ль во є҆гѵ́петъ, и҆ і҆а́кѡвъ прише́льствова въ зе́млю ха́мовꙋ.

к҃д. И҆ возрастѝ лю́ди своѧ̑ ѕѣлѡ̀ и҆ ᲂу҆крѣпѝ ѧ҆̀ па́че врагѡ́въ и҆́хъ.

к҃є. Превратѝ се́рдце и҆́хъ возненави́дѣти лю́ди є҆гѡ̀, ле́сть сотвори́ти въ рабѣ́хъ є҆гѡ̀.

к҃ѕ. Посла̀ мѡѷсе́а раба̀ своего̀, а҆арѡ́на, є҆го́же и҆збра̀ себѣ̀:

к҃з. Положѝ въ ни́хъ словеса̀ зна́менїй свои́хъ и҆ чꙋде́съ свои́хъ въ землѝ ха́мовѣ.

к҃и. Посла̀ тмꙋ̀ и҆ помрачѝ, ꙗ҆́кѡ преѡгорчи́ша словеса̀ є҆гѡ̀.

к҃ѳ. Преложѝ во́ды и҆́хъ въ кро́вь и҆ и҆зморѝ ры̑бы и҆́хъ.

л҃. Воскипѣ̀ землѧ̀ и҆́хъ жа́бами въ сокро́вищницахъ царе́й и҆́хъ.

л҃а. Речѐ, и҆ прїидо́ша пє́сїѧ мꙋ̑хи и҆ скни̑пы во всѧ̑ предѣ́лы и҆́хъ.

л҃в. Положѝ дождѝ и҆́хъ гра́ды, ѻ҆́гнь попалѧ́ющь въ землѝ и҆́хъ:

л҃г. И҆ поразѝ вїногра́ды и҆́хъ и҆ смѡ́квы и҆́хъ, и҆ сотры̀ всѧ́кое дре́во предѣ̑лъ и҆́хъ.

л҃д. Речѐ, и҆ прїидо́ша прꙋ́зи и҆ гꙋ́сєницы, и҆̀мже не бѣ̀ числа̀,

л҃є. И҆ снѣдо́ша всѧ́кꙋ травꙋ̀ въ землѝ и҆́хъ, и҆ поѧдо́ша всѧ́къ пло́дъ землѝ и҆́хъ.

л҃ѕ. И҆ поразѝ всѧ́каго пе́рвенца въ землѝ и҆́хъ, нача́токъ всѧ́кагѡ трꙋда̀ и҆́хъ:

л҃з. И҆ и҆зведѐ ѧ҆̀ съ сребро́мъ и҆ зла́томъ: и҆ не бѣ̀ въ колѣ́нѣхъ и҆́хъ болѧ́й.

л҃и. Возвесели́сѧ є҆гѵ́петъ во и҆схожде́нїи и҆́хъ: ꙗ҆́кѡ нападѐ стра́хъ и҆́хъ на нѧ̀.

л҃ѳ. Распрострѐ ѻ҆́блакъ въ покро́въ и҆̀мъ, и҆ ѻ҆́гнь, є҆́же просвѣти́ти и҆̀мъ но́щїю.

м҃. Проси́ша, и҆ прїидо́ша кра́стели, и҆ хлѣ́ба небе́снагѡ насы́ти ѧ҆̀:

м҃а. Разве́рзе ка́мень, и҆ потеко́ша во́ды, потеко́ша въ безво́дныхъ рѣ́ки:

м҃в. Ꙗ҆́кѡ помѧнꙋ̀ сло́во ст҃о́е своѐ, є҆́же ко а҆враа́мꙋ рабꙋ̀ своемꙋ̀.

м҃г. И҆ и҆зведѐ лю́ди своѧ̑ въ ра́дости и҆ и҆збра̑нныѧ своѧ̑ въ весе́лїи.

м҃д. И҆ дадѐ и҆̀мъ страны̑ ꙗ҆зы̑къ, и҆ трꙋды̀ люде́й наслѣ́доваша:

м҃є. Ꙗ҆́кѡ да сохранѧ́тъ ѡ҆правда̑нїѧ є҆гѡ̀ и҆ зако́на є҆гѡ̀ взы́щꙋтъ.

Сла́ва:

По д҃і-й каѳі́смѣ, трист҃о́е.

Та́же тропарѝ, гла́съ и҃:

Ꙗ҆́кѡ блꙋдни́ца припа́даю тѝ, да прїимꙋ̀ ѡ҆ставле́нїе, и҆ вмѣ́стѡ мѵ́ра сле́зы ѿ се́рдца приношꙋ́ ти, хрⷭ҇тѐ бж҃е: да ꙗ҆́кѡ ѻ҆́нꙋю ᲂу҆ще́дриши мѧ̀ сп҃се, и҆ пода́си ѡ҆чище́нїе грѣхѡ́въ. ꙗ҆́кѡ ѻ҆́наѧ бо зовꙋ́ ти: и҆зба́ви мѧ̀ ѿ тимѣ́нїѧ дѣ́лъ мои́хъ.

Сла́ва: Почто̀ не помышлѧ́еши дꙋшѐ моѧ̀ сме́рти; почто̀ не ѡ҆браща́ешисѧ про́чее ко и҆справле́нїю, пре́жде трꙋбы̀ глаше́нїѧ на сꙋдѣ̀; тогда̀ нѣ́сть вре́мѧ покаѧ́нїѧ. прїимѝ во ᲂу҆мѣ̀ мытарѧ̀ и҆ блꙋдни́цꙋ, зовꙋ́щыѧ: согрѣши́хъ тѝ гдⷭ҇и, поми́лꙋй мѧ̀.

И҆ ны́нѣ: Ꙗ҆́кѡ превосходѧ́щаѧ вои́стиннꙋ рождество́мъ твои́мъ си̑лы нбⷭ҇ныѧ, приснодв҃о бцⷣе, и҆̀же тобо́ю бж҃ество́мъ ѡ҆богати́вшесѧ, непреста́ннѡ тѧ̀ велича́емъ.

Гдⷭ҇и поми́лꙋй, м҃. и҆ мл҃тва:

Бл҃годари́мъ тѧ̀ гдⷭ҇и бж҃е на́шъ, сп҃се́нїй на́шихъ, ꙗ҆́кѡ всѧ̑ твори́ши во бл҃годѣѧ̑нїѧ жи́зни на́шеѧ: ꙗ҆́кѡ ᲂу҆поко́илъ є҆сѝ на́съ въ преше́дшемъ нощно́мъ вре́мени, и҆ воздви́глъ є҆сѝ на́съ ѿ ло́жей на́шихъ, и҆ поста́вилъ є҆сѝ на́съ въ поклоне́нїе чⷭ҇тна́гѡ и҆ сла́внагѡ и҆́мене твоегѡ̀. Тѣ́мже мо́лимсѧ тебѣ̀ гдⷭ҇и: да́ждь на́мъ бл҃года́ть и҆ си́лꙋ, да сподо́бимсѧ тебѣ̀ пѣ́ти разꙋ́мнѡ, и҆ моли́тисѧ непреста́ннѡ, и҆ вы́нꙋ къ тебѣ̀ зрѣ́ти сп҃си́телю и҆ бл҃годѣ́телю на́шихъ дꙋ́шъ, стра́хомъ и҆ тре́петомъ своѐ сп҃се́нїе дѣ́йствꙋюще. ᲂу҆слы́ши ᲂу҆́бѡ и҆ поми́лꙋй бл҃гоꙋтро́бне на́съ, сокрꙋшѝ под̾ но́ги на́шѧ неви̑димыѧ ра́тники и҆ врагѝ: прїимѝ ꙗ҆̀же по си́лѣ на́шей бл҃годарє́нїѧ: да́ждь на́мъ бл҃года́ть и҆ си́лꙋ, во ѿверзе́нїе ᲂу҆́стъ на́шихъ, и҆ наꙋчѝ на́съ ѡ҆правда́нїємъ твои̑мъ, ꙗ҆́кѡ что̀ помо́лимсѧ, ꙗ҆́коже подоба́етъ, не вѣ́мы, а҆́ще не ты̀ гдⷭ҇и дх҃омъ твои́мъ ст҃ы́мъ наста́виши ны̀. а҆́ще же что̀ согрѣши́хомъ да́же до настоѧ́щагѡ часа̀, сло́вомъ, и҆лѝ дѣ́ломъ, и҆лѝ помышле́нїемъ, во́лею, и҆лѝ нево́лею, ѡ҆сла́би, ѡ҆ста́ви, простѝ. А҆́ще бо беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть, ᲂу҆ тебѐ и҆збавле́нїе. Ты̀ є҆сѝ є҆ди́нъ ст҃ъ, помо́щникъ крѣ́пкїй, и҆ защи́титель жи́зни на́шеѧ, и҆ тѧ̀ бл҃гослови́мъ во всѧ̑ вѣ́ки, а҆ми́нь.

А҆ллилꙋ́їа, р҃є.

а҃. И҆сповѣ́дайтесѧ гдⷭ҇еви, ꙗ҆́кѡ бл҃гъ, ꙗ҆́кѡ въ вѣ́къ млⷭ҇ть є҆гѡ̀.

в҃. Кто̀ возглаго́летъ си̑лы гдⷭ҇ни, слы̑шаны сотвори́тъ всѧ̑ хвалы̑ є҆гѡ̀;

г҃. Бл҃же́ни хранѧ́щїи сꙋ́дъ и҆ творѧ́щїи пра́вдꙋ во всѧ́кое вре́мѧ.

д҃. Помѧнѝ на́съ, гдⷭ҇и, во бл҃говоле́нїи люде́й твои́хъ, посѣтѝ на́съ сп҃се́нїемъ твои́мъ,

є҃. Ви́дѣти во бла́гости и҆збра̑нныѧ твоѧ̑, возвесели́тисѧ въ весе́лїи ꙗ҆зы́ка твоегѡ̀, хвали́тисѧ съ достоѧ́нїемъ твои́мъ.

ѕ҃. Согрѣши́хомъ со ѻ҆тцы̀ на́шими, беззако́нновахомъ, непра́вдовахомъ:

з҃. Ѻ҆тцы̀ на́ши во є҆гѵ́птѣ не разꙋмѣ́ша чꙋде́съ твои́хъ, ни помѧнꙋ́ша мно́жества млⷭ҇ти твоеѧ̀: и҆ преѡгорчи́ша восходѧ́ще въ чермно́е мо́ре.

и҃. И҆ сп҃сѐ и҆̀хъ и҆́мене своегѡ̀ ра́ди, сказа́ти си́лꙋ свою̀:

ѳ҃. И҆ запретѝ чермно́мꙋ мо́рю, и҆ и҆зсѧ́че: и҆ ꙾наста́ви꙾ ⁴³ ѧ҆̀ въ бе́зднѣ ꙗ҆́кѡ въ пꙋсты́ни.

і҃. И҆ сп҃сѐ ѧ҆̀ и҆з̾ рꙋкѝ ненави́дѧщихъ и҆ и҆зба́ви ѧ҆̀ и҆з̾ рꙋкѝ врагѡ́въ.

а҃і. Покры̀ вода̀ стꙋжа́ющыѧ и҆̀мъ: ни є҆ди́нъ ѿ ни́хъ и҆збы́сть.

в҃і. И҆ вѣ́роваша словесѝ є҆гѡ̀ и҆ воспѣ́ша хвалꙋ̀ є҆гѡ̀.

г҃і. Оу҆скори́ша, забы́ша дѣла̀ є҆гѡ̀, не стерпѣ́ша совѣ́та є҆гѡ̀:

д҃і. И҆ похотѣ́ша жела́нїю въ пꙋсты́ни и҆ и҆скꙋси́ша бг҃а въ безво́днѣй.

є҃і. И҆ дадѐ и҆̀мъ проше́нїе и҆́хъ, посла̀ сы́тость въ дꙋ́шы и҆́хъ.

ѕ҃і. И҆ прогнѣ́ваша мѡѷсе́а въ станꙋ̀, а҆арѡ́на ст҃а́го гдⷭ҇нѧ.

з҃і. Ѿве́рзесѧ землѧ̀ и҆ пожрѐ даѳа́на и҆ покры̀ на со́нмищи а҆вїрѡ́на:

и҃і. И҆ разжже́сѧ ѻ҆́гнь въ со́нмѣ и҆́хъ, пла́мень попалѝ грѣ́шники.

ѳ҃і. И҆ сотвори́ша тельца̀ въ хѡри́вѣ и҆ поклони́шасѧ и҆стꙋка́нномꙋ:

к҃. И҆ и҆змѣни́ша сла́вꙋ є҆гѡ̀ въ подо́бїе тельца̀ ꙗ҆дꙋ́щагѡ травꙋ̀.

к҃а. И҆ забы́ша бг҃а сп҃са́ющаго и҆̀хъ, сотво́ршаго вє́лїѧ во є҆гѵ́птѣ,

к҃в. чꙋдеса̀ въ землѝ ха́мовѣ, стра̑шнаѧ въ мо́ри чермнѣ́мъ.

к҃г. И҆ речѐ потреби́ти и҆̀хъ, а҆́ще не бы̀ мѡѷсе́й и҆збра́нный є҆гѡ̀ ста́лъ въ сокрꙋше́нїи пред̾ ни́мъ, возврати́ти ꙗ҆́рость є҆гѡ̀, да не погꙋби́тъ и҆̀хъ.

к҃д. И҆ ᲂу҆ничижи́ша зе́млю жела́ннꙋю, не ꙗ҆́ша вѣ́ры словесѝ є҆гѡ̀:

к҃є. И҆ поропта́ша въ селе́нїихъ свои́хъ, не ᲂу҆слы́шаша гла́са гдⷭ҇нѧ.

к҃ѕ. И҆ воздви́же рꙋ́кꙋ свою̀ на нѧ̀, низложи́ти ѧ҆̀ въ пꙋсты́ни,

к҃з. И҆ низложи́ти сѣ́мѧ и҆́хъ во ꙗ҆зы́цѣхъ, и҆ расточи́ти ѧ҆̀ въ страны̑.

к҃и. И҆ причасти́шасѧ веельфегѡ́рꙋ и҆ снѣдо́ша жє́ртвы ме́ртвыхъ:

к҃ѳ. И҆ раздражи́ша є҆го̀ въ начина́нїихъ свои́хъ, и҆ ᲂу҆мно́жисѧ въ ни́хъ паде́нїе.

л҃. И҆ ста̀ фїнее́съ и҆ ᲂу҆ми́лостиви, и҆ преста̀ сѣ́чь:

л҃а. И҆ вмѣни́сѧ є҆мꙋ̀ въ пра́вдꙋ, въ ро́дъ и҆ ро́дъ до вѣ́ка.

л҃в. И҆ прогнѣ́ваша є҆го̀ на водѣ̀ прерѣка́нїѧ, и҆ ѡ҆ѕло́бленъ бы́сть мѡѷсе́й и҆́хъ ра́ди:

л҃г. Ꙗ҆́кѡ преѡгорчи́ша дꙋ́хъ є҆гѡ̀ и҆ ра́знствова ᲂу҆стна́ма свои́ма.

л҃д. Не потреби́ша ꙗ҆зы́ки, ꙗ҆̀же речѐ гдⷭ҇ь и҆̀мъ.

л҃є. И҆ смѣси́шасѧ во ꙗ҆зы́цѣхъ и҆ навыко́ша дѣлѡ́мъ и҆́хъ:

л҃ѕ. И҆ порабо́таша и҆стꙋка̑ннымъ и҆́хъ, и҆ бы́сть и҆̀мъ въ собла́знъ.

л҃з. И҆ пожро́ша сы́ны своѧ̑ и҆ дщє́ри своѧ̑ бѣсовѡ́мъ,

л҃и. И҆ пролїѧ́ша кро́вь непови́ннꙋю, кро́вь сынѡ́въ свои́хъ и҆ дще́рей, ꙗ҆̀же пожро́ша и҆стꙋка̑ннымъ ханаа̑нскимъ: и҆ ᲂу҆бїе́на бы́сть землѧ̀ и҆́хъ кровьмѝ

л҃ѳ. И҆ ѡ҆скверни́сѧ въ дѣ́лѣхъ и҆́хъ: и҆ соблꙋди́ша въ начина́нїихъ свои́хъ.

м҃. И҆ разгнѣ́васѧ ꙗ҆́ростїю гдⷭ҇ь на лю́ди своѧ̑ и҆ ѡ҆мерзѝ достоѧ́нїе своѐ:

м҃а. И҆ предадѐ ѧ҆̀ въ рꙋ́ки врагѡ́въ, и҆ ѡ҆блада́ша и҆́ми ненави́дѧщїи и҆̀хъ.

м҃в. И҆ стꙋжи́ша и҆̀мъ вразѝ и҆́хъ: и҆ смири́шасѧ под̾ рꙋка́ми и҆́хъ.

м҃г. Мно́жицею и҆зба́ви ѧ҆̀: ті́и же преѡгорчи́ша є҆го̀ совѣ́томъ свои́мъ, и҆ смири́шасѧ въ беззако́нїихъ свои́хъ.

м҃д. И҆ ви́дѣ гдⷭ҇ь, внегда̀ скорбѣ́ти и҆̀мъ, внегда̀ ᲂу҆слы́шаше моле́нїе и҆́хъ:

м҃є. И҆ помѧнꙋ̀ завѣ́тъ сво́й, и҆ раска́ѧсѧ по мно́жествꙋ млⷭ҇ти своеѧ̀:

м҃ѕ. И҆ дадѐ ѧ҆̀ въ щедрѡ́ты пред̾ всѣ́ми плѣни́вшими ѧ҆̀.

м҃з. Сп҃си́ ны, гдⷭ҇и, бж҃е на́шъ, и҆ собери́ ны ѿ ꙗ҆зы̑къ, и҆сповѣ́датисѧ и҆́мени твоемꙋ̀ ст҃о́мꙋ, хвали́тисѧ во хвалѣ̀ твое́й.

м҃и. Бл҃гослове́нъ гдⷭ҇ь бг҃ъ і҆и҃левъ ѿ вѣ́ка и҆ до вѣ́ка. И҆ рекꙋ́тъ всѝ лю́дїе: бꙋ́ди, бꙋ́ди.

Сла́ва:

А҆ллилꙋ́їа, р҃ѕ.

а҃. И҆сповѣ́дайтесѧ гдⷭ҇еви, ꙗ҆́кѡ бл҃гъ, ꙗ҆́кѡ въ вѣ́къ млⷭ҇ть є҆гѡ̀.

в҃. Да рекꙋ́тъ и҆зба́вленнїи гдⷭ҇емъ, и҆̀хже и҆зба́ви и҆з̾ рꙋкѝ врага̀,

г҃. И҆ ѿ стра́нъ собра̀ и҆́хъ, ѿ востѡ́къ и҆ за̑падъ, и҆ сѣ́вера и҆ мо́рѧ:

д҃. Заблꙋди́ша въ пꙋсты́ни безво́днѣй, пꙋтѝ гра́да ѻ҆би́тельнагѡ не ѡ҆брѣто́ша:

є҃. А҆́лчꙋще и҆ жа́ждꙋще, дꙋша̀ и҆́хъ въ ни́хъ и҆счезѐ.

ѕ҃. И҆ воззва́ша ко гдⷭ҇ꙋ, внегда̀ скорбѣ́ти и҆̀мъ, и҆ ѿ нꙋ́ждъ и҆́хъ и҆зба́ви ѧ҆̀:

з҃. И҆ наста́ви ѧ҆̀ на пꙋ́ть пра́въ, вни́ти во гра́дъ ѻ҆би́тельный.

и҃. ꙾Да и҆сповѣ́дѧтсѧ꙾ ⁴⁴ гдⷭ҇еви млⷭ҇ти є҆гѡ̀ и҆ чꙋдеса̀ є҆гѡ̀ сыновѡ́мъ человѣ́чєскимъ:

ѳ҃. Ꙗ҆́кѡ насы́тилъ є҆́сть дꙋ́шꙋ тщꙋ̀, и҆ дꙋ́шꙋ а҆́лчꙋщꙋ и҆спо́лни бла̑гъ:

і҃. Сѣдѧ́щыѧ во тмѣ̀ и҆ сѣ́ни сме́ртнѣй, ѡ҆кова̑нныѧ нището́ю и҆ желѣ́зомъ,

а҃і. Ꙗ҆́кѡ преѡгорчи́ша словеса̀ бж҃їѧ, и҆ совѣ́тъ вы́шнѧгѡ раздражи́ша.

в҃і. И҆ смири́сѧ въ трꙋдѣ́хъ се́рдце и҆́хъ, и҆ и҆знемого́ша, и҆ не бѣ̀ помога́ѧй.

г҃і. И҆ воззва́ша ко гдⷭ҇ꙋ, внегда̀ скорбѣ́ти и҆̀мъ, и҆ ѿ нꙋ́ждъ и҆́хъ сп҃сѐ ѧ҆̀:

д҃і. И҆ и҆зведѐ ѧ҆̀ и҆з̾ тмы̀ и҆ сѣ́ни сме́ртныѧ, и҆ ᲂу҆́зы и҆́хъ растерза̀.

є҃і. ꙾꙾Да и҆сповѣ́дѧтсѧ꙾꙾ ⁴⁵ гдⷭ҇еви млⷭ҇ти є҆гѡ̀ и҆ чꙋдеса̀ є҆гѡ̀ сыновѡ́мъ человѣ́чєскимъ:

ѕ҃і. Ꙗ҆́кѡ сокрꙋшѝ врата̀ мѣ̑днаѧ, и҆ верєѝ желѣ̑зныѧ сломѝ.

з҃і. Воспрїѧ́тъ ѧ҆̀ ѿ пꙋтѝ беззако́нїѧ и҆́хъ: беззако́нїй бо ра́ди свои́хъ смири́шасѧ.

и҃і. Всѧ́кагѡ бра́шна возгнꙋша́сѧ дꙋша̀ и҆́хъ, и҆ прибли́жишасѧ до вра́тъ сме́ртныхъ.

ѳ҃і. И҆ воззва́ша ко гдⷭ҇ꙋ, внегда̀ скорбѣ́ти и҆̀мъ, и҆ ѿ нꙋ́ждъ и҆́хъ сп҃сѐ ѧ҆̀:

к҃. Посла̀ сло́во своѐ, и҆ и҆сцѣлѝ ѧ҆̀, и҆ и҆зба́ви ѧ҆̀ ѿ растлѣ́нїй и҆́хъ.

к҃а. ꙳Да и҆сповѣ́дѧтсѧ꙳ ⁴⁶ гдⷭ҇еви млⷭ҇ти є҆гѡ̀ и҆ чꙋдеса̀ є҆гѡ̀ сыновѡ́мъ человѣ́чєскимъ:

к҃в. И҆ да пожрꙋ́тъ є҆мꙋ̀ же́ртвꙋ хвалы̀ и҆ да возвѣстѧ́тъ дѣла̀ є҆гѡ̀ въ ра́дости.

к҃г. Сходѧ́щїи въ мо́ре въ корабле́хъ, творѧ́щїи дѣ̑ланїѧ въ вода́хъ мно́гихъ,

к҃д. Ті́и ви́дѣша дѣла̀ гдⷭ҇нѧ и҆ чꙋдеса̀ є҆гѡ̀ во глꙋбинѣ̀.

к҃є. Речѐ, и҆ ста̀ дꙋ́хъ бꙋ́ренъ, и҆ вознесо́шасѧ вѡ́лны є҆гѡ̀:

к҃ѕ. Восхо́дѧтъ до небе́съ и҆ низхо́дѧтъ до бе́зднъ: дꙋша̀ и҆́хъ въ ѕлы́хъ та́ѧше:

к҃з. Смѧто́шасѧ, подвиго́шасѧ ꙗ҆́кѡ пїѧ́ный, и҆ всѧ̀ мꙋ́дрость и҆́хъ поглощена̀ бы́сть.

к҃и. И҆ воззва́ша ко гдⷭ҇ꙋ, внегда̀ скорбѣ́ти и҆̀мъ, и҆ ѿ нꙋ́ждъ и҆́хъ и҆зведѐ ѧ҆̀:

к҃ѳ. И҆ повелѣ̀ бꙋ́ри, и҆ ста̀ въ тишинꙋ̀, и҆ ᲂу҆молко́ша вѡ́лны є҆гѡ̀.

л҃. И҆ возвесели́шасѧ, ꙗ҆́кѡ ᲂу҆молко́ша, и҆ наста́ви ѧ҆̀ въ приста́нище хотѣ́нїѧ своегѡ̀.

л҃а. ꙾Да и҆сповѣ́дѧтсѧ꙾ ⁴⁷ гдⷭ҇еви млⷭ҇ти є҆гѡ̀ и҆ чꙋдеса̀ є҆гѡ̀ сыновѡ́мъ человѣ́чєскимъ:

л҃в. Да вознесꙋ́тъ є҆го̀ въ цр҃кви людстѣ́й, и҆ на сѣда́лищи ста́рєцъ восхва́лѧтъ є҆го̀.

л҃г. Положи́лъ є҆́сть рѣ́ки въ пꙋсты́ню и҆ и҆схѡ́дища вѡдна́ѧ въ жа́ждꙋ,

л҃д. Зе́млю плодоно́снꙋю въ сла́ность, ѿ ѕло́бы живꙋ́щихъ на не́й.

л҃є. Положи́лъ є҆́сть пꙋсты́ню во є҆зе́ра вѡдна́ѧ и҆ зе́млю безво́днꙋю во и҆схѡ́дища вѡдна́ѧ.

л҃ѕ. И҆ населѝ та́мѡ а҆́лчꙋщыѧ, и҆ соста́виша гра́ды ѡ҆би́тєльны:

л҃з. И҆ насѣ́ѧша се́ла, и҆ насади́ша вїногра́ды, и҆ сотвори́ша пло́дъ жи́тенъ.

л҃и. И҆ блгⷭ҇вѝ ѧ҆̀, и҆ ᲂу҆мно́жишасѧ ѕѣлѡ̀: и҆ скоты̀ и҆́хъ не ᲂу҆ма́ли.

л҃ѳ. И҆ ᲂу҆ма́лишасѧ и҆ ѡ҆ѕло́бишасѧ ѿ ско́рби ѕѡ́лъ и҆ болѣ́зни:

м҃. И҆злїѧ́сѧ ᲂу҆ничиже́нїе на кнѧ̑зи и҆́хъ, и҆ ꙾ѡ҆блазнѝ꙾ ⁴⁸ ѧ҆̀ по непрохо́днѣй, а҆ не по пꙋтѝ.

м҃а. И҆ помо́же ᲂу҆бо́гꙋ ѿ нищеты̀ и҆ положѝ ꙗ҆́кѡ ѻ҆́вцы ѻ҆те́чєствїѧ.

м҃в. Оу҆́зрѧтъ пра́вїи и҆ возвеселѧ́тсѧ, и҆ всѧ́кое беззако́нїе загради́тъ ᲂу҆ста̀ своѧ̑.

м҃г. Кто̀ премꙋ́дръ и҆ сохрани́тъ сїѧ̑; и҆ ᲂу҆разꙋмѣ́ютъ млⷭ҇ти гдⷭ҇ни.

Сла́ва:

а҃. Пѣ́снь, ѱало́мъ дв҃дꙋ, р҃з.

в҃. Гото́во се́рдце моѐ, бж҃е, гото́во се́рдце моѐ: воспою̀ и҆ пою̀ во сла́вѣ мое́й.

г҃. Воста́ни, сла́ва моѧ̀, воста́ни, ѱалти́рю и҆ гꙋ́сли: воста́нꙋ ра́нѡ.

д҃. И҆сповѣ́мсѧ тебѣ̀ въ лю́дехъ, гдⷭ҇и, пою̀ тебѣ̀ во ꙗ҆зы́цѣхъ:

є҃. Ꙗ҆́кѡ ве́лїѧ верхꙋ̀ нб҃съ млⷭ҇ть твоѧ̀ и҆ до ѻ҆́блакъ и҆́стина твоѧ̀.

ѕ҃. Вознеси́сѧ на нб҃са̀, бж҃е, и҆ по все́й землѝ сла́ва твоѧ̀,

з҃. Ꙗ҆́кѡ да и҆зба́вѧтсѧ возлю́бленнїи твоѝ: сп҃сѝ десни́цею твое́ю и҆ ᲂу҆слы́ши мѧ̀.

и҃. Бг҃ъ возглаго́ла во ст҃ѣ́мъ свое́мъ: вознесꙋ́сѧ и҆ раздѣлю̀ сїки́мꙋ, и҆ ᲂу҆до́ль селе́нїй размѣ́рю.

ѳ҃. Мо́й є҆́сть галаа́дъ, и҆ мо́й є҆́сть манассі́й, и҆ є҆фре́мъ застꙋпле́нїе главы̀ моеѧ̀: і҆ꙋ́да ца́рь мо́й,

і҃. Мѡа́въ коно́бъ ᲂу҆пова́нїѧ моегѡ̀: на і҆дꙋме́ю наложꙋ̀ сапо́гъ мо́й: мнѣ̀ и҆ноплемє́нницы покори́шасѧ.

а҃і. Кто̀ введе́тъ мѧ̀ во гра́дъ ѡ҆гражде́нїѧ; и҆лѝ кто̀ наста́витъ мѧ̀ до і҆дꙋме́и;

в҃і. Не ты́ ли, бж҃е, ѿри́нꙋвый на́съ, и҆ не и҆зы́деши, бж҃е, въ си́лахъ на́шихъ;

г҃і. Да́ждь на́мъ по́мощь ѿ ско́рби: и҆ сꙋ́етно спасе́нїе человѣ́ческо.

д҃і. Ѡ҆ бз҃ѣ сотвори́мъ си́лꙋ, и҆ то́й ᲂу҆ничижи́тъ врагѝ на́шѧ.

Въ коне́цъ, ѱало́мъ дв҃дꙋ, р҃и.

а҃. Бж҃е, хвалы̀ моеѧ̀ не премолчѝ:

в҃. Ꙗ҆́кѡ ᲂу҆ста̀ грѣ̑шнича и҆ ᲂу҆ста̀ льсти́вагѡ на мѧ̀ ѿверзо́шасѧ, глаго́лаша на мѧ̀ ѧ҆зы́комъ льсти́вымъ,

г҃. И҆ словесы̀ ненави́стными ѡ҆быдо́ша мѧ̀, и҆ бра́шасѧ со мно́ю тꙋ́не.

д҃. Вмѣ́стѡ є҆́же люби́ти мѧ̀, ѡ҆болга́хꙋ мѧ̀, а҆́зъ же молѧ́хсѧ:

є҃. И҆ положи́ша на мѧ̀ ѕла̑ѧ за бл҃га̑ѧ, и҆ не́нависть за возлюбле́нїе моѐ.

ѕ҃. Поста́ви на него̀ грѣ́шника, и҆ дїа́волъ да ста́нетъ ѡ҆деснꙋ́ю є҆гѡ̀:

з҃. Внегда̀ сꙋди́тисѧ є҆мꙋ̀, да и҆зы́детъ ѡ҆сꙋжде́нъ, и҆ моли́тва є҆гѡ̀ да бꙋ́детъ въ грѣ́хъ.

и҃. Да бꙋ́дꙋтъ дні́е є҆гѡ̀ ма́ли, и҆ є҆пі́скопство є҆гѡ̀ да прїи́метъ и҆́нъ:

ѳ҃. Да бꙋ́дꙋтъ сы́нове є҆гѡ̀ си́ри, и҆ жена̀ є҆гѡ̀ вдова̀:

і҃. Дви́жꙋщесѧ да преселѧ́тсѧ сы́нове є҆гѡ̀ и҆ воспро́сѧтъ, да и҆згна́ни бꙋ́дꙋтъ и҆з̾ домѡ́въ свои́хъ.

а҃і. Да взы́щетъ заимода́вецъ всѧ̑, є҆ли̑ка сꙋ́ть є҆гѡ̀: и҆ да восхи́тѧтъ чꙋжді́и трꙋды̀ є҆гѡ̀.

в҃і. Да не бꙋ́детъ є҆мꙋ̀ застꙋ́пника, нижѐ да бꙋ́детъ ᲂу҆щедрѧ́ѧй сирѡты̀ є҆гѡ̀:

г҃і. Да бꙋ́дꙋтъ ча̑да є҆гѡ̀ въ погꙋбле́нїе, въ ро́дѣ є҆ди́нѣмъ да потреби́тсѧ и҆́мѧ є҆гѡ̀.

д҃і. Да воспомѧне́тсѧ беззако́нїе ѻ҆тє́цъ є҆гѡ̀ пред̾ гдⷭ҇емъ, и҆ грѣ́хъ ма́тере є҆гѡ̀ да не ѡ҆чи́ститсѧ:

є҃і. Да бꙋ́дꙋтъ пред̾ гдⷭ҇емъ вы́нꙋ, и҆ да потреби́тсѧ ѿ землѝ па́мѧть и҆́хъ:

ѕ҃і. Зане́же не помѧнꙋ̀ сотвори́ти ми́лость, и҆ погна̀ человѣ́ка ни́ща и҆ ᲂу҆бо́га, и҆ ᲂу҆миле́на се́рдцемъ ᲂу҆мертви́ти.

з҃і. И҆ возлюбѝ клѧ́твꙋ, и҆ прїи́детъ є҆мꙋ̀: и҆ не восхотѣ̀ бл҃гослове́нїѧ, и҆ ᲂу҆дали́тсѧ ѿ негѡ̀.

и҃і. И҆ ѡ҆блече́сѧ въ клѧ́твꙋ ꙗ҆́кѡ въ ри́зꙋ, и҆ вни́де ꙗ҆́кѡ вода̀ во ᲂу҆тро́бꙋ є҆гѡ̀ и҆ ꙗ҆́кѡ є҆ле́й въ кѡ́сти є҆гѡ̀:

ѳ҃і. Да бꙋ́детъ є҆мꙋ̀ ꙗ҆́кѡ ри́за, въ ню́же ѡ҆блачи́тсѧ, и҆ ꙗ҆́кѡ по́ѧсъ, и҆́мже вы́нꙋ ѡ҆поѧсꙋ́етсѧ.

к҃. Сїѐ дѣ́ло ѡ҆болга́ющихъ мѧ̀ ᲂу҆ гдⷭ҇а и҆ глаго́лющихъ лꙋка̑ваѧ на дꙋ́шꙋ мою̀.

к҃а. И҆ ты̀, гдⷭ҇и, гдⷭ҇и, сотворѝ со мно́ю и҆́мене ра́ди твоегѡ̀, ꙗ҆́кѡ бл҃га млⷭ҇ть твоѧ̀:

к҃в. И҆зба́ви мѧ̀, ꙗ҆́кѡ ни́щъ и҆ ᲂу҆бо́гъ є҆́смь а҆́зъ, и҆ се́рдце моѐ смѧте́сѧ внꙋ́трь менѐ.

к҃г. Ꙗ҆́кѡ сѣ́нь, внегда̀ ᲂу҆клони́тисѧ є҆́й, ѿѧ́хсѧ: стрѧсо́хсѧ ꙗ҆́кѡ прꙋ́зи.

к҃д. Кѡлѣ́на моѧ̑ и҆знемого́ста ѿ поста̀, и҆ пло́ть моѧ̀ и҆змѣни́сѧ є҆ле́а ра́ди.

к҃є. И҆ а҆́зъ бы́хъ поноше́нїе и҆̀мъ: ви́дѣша мѧ̀, покива́ша глава́ми свои́ми.

к҃ѕ. Помози́ ми, гдⷭ҇и бж҃е мо́й, и҆ сп҃си́ мѧ по млⷭ҇ти твое́й:

к҃з. И҆ да разꙋмѣ́ютъ, ꙗ҆́кѡ рꙋка̀ твоѧ̀ сїѧ̀, и҆ ты̀, гдⷭ҇и, сотвори́лъ є҆сѝ ю҆̀.

к҃и. Прокленꙋ́тъ ті́и, и҆ ты̀ бл҃гослови́ши: востаю́щїи на мѧ̀ да постыдѧ́тсѧ, ра́бъ же тво́й возвесели́тсѧ.

к҃ѳ. Да ѡ҆блекꙋ́тсѧ ѡ҆болга́ющїи мѧ̀ въ срамотꙋ̀ и҆ ѡ҆де́ждꙋтсѧ ꙗ҆́кѡ ѻ҆де́ждою стꙋдо́мъ свои́мъ.

л҃. И҆сповѣ́мсѧ гдⷭ҇еви ѕѣлѡ̀ ᲂу҆сты̑ мои́ми и҆ посредѣ̀ мно́гихъ восхвалю̀ є҆го̀:

л҃а. Ꙗ҆́кѡ преста̀ ѡ҆деснꙋ́ю ᲂу҆бо́гагѡ, є҆́же сп҃стѝ ѿ гонѧ́щихъ дꙋ́шꙋ мою̀.

Сла́ва:

По є҃і-й каѳі́смѣ, трист҃о́е.

Та́же тропарѝ, гла́съ а҃:

Ꙗ҆́кѡ пꙋчи́на мно́га прегрѣше́нїй мои́хъ сп҃се, и҆ лю́тѣ погрꙋзи́хсѧ согрѣше́ньми мои́ми: да́ждь мѝ рꙋ́кꙋ ꙗ҆́кѡ петро́ви, и҆ сп҃си́ мѧ бж҃е, и҆ поми́лꙋй мѧ̀.

Сла́ва: Ꙗ҆́кѡ помышле́нїи лꙋка́выми, и҆ дѣ́лы ѡ҆сꙋди́хсѧ сп҃се, мы́сль мѝ да́рꙋй ѡ҆браще́нїѧ бж҃е, да зовꙋ̀: сп҃си́ мѧ бл҃годѣ́телю бл҃гі́й, и҆ поми́лꙋй мѧ̀.

И҆ ны́нѣ: Бг҃обл҃же́ннаѧ ѻ҆трокови́це и҆ пренепоро́чнаѧ, скве́рна мѧ̀ сꙋ́ща и҆ ѡ҆калѧ́нна ѿ дѣѧ́нїй безмѣ́стныхъ, и҆ скве́рныхъ помышле́нїй, ѡ҆чи́сти мѧ̀ ѻ҆каѧ́ннаго, нескве́рнаѧ и҆ чⷭ҇таѧ, всест҃а́ѧ мт҃и дв҃о.

Гдⷭ҇и поми́лꙋй, м҃. и҆ мл҃тва:

Влⷣко гдⷭ҇и і҆и҃се хрⷭ҇тѐ, ты̀ є҆сѝ помо́щникъ мо́й, въ рꙋка́хъ твои́хъ є҆́смь а҆́зъ, помози́ ми, не ѡ҆ста́ви менѐ согрѣши́ти къ тебѣ̀, ꙗ҆́кѡ заблꙋжде́нъ є҆́смь. не ѡ҆ста́ви мѧ̀ послѣ́довати во́ли пло́ти моеѧ̀: не пре́зри мѧ̀ гдⷭ҇и, ꙗ҆́кѡ не́мощенъ є҆́смь. ты̀ вѣ́си поле́зное мнѣ̀, не ѡ҆ста́ви мѧ̀ поги́бнꙋти грѣхѝ мои́ми: не ѡ҆ста́ви мѧ̀ гдⷭ҇и, не ѿстꙋпѝ ѿ менѐ, ꙗ҆́кѡ къ тебѣ̀ прибѣго́хъ, наꙋчи́ мѧ твори́ти во́лю твою̀, ꙗ҆́кѡ ты̀ є҆сѝ бг҃ъ мо́й. и҆сцѣлѝ дꙋ́шꙋ мою̀, ꙗ҆́кѡ согрѣши́хъ тѝ, сп҃си́ мѧ ра́ди млⷭ҇ти твоеѧ̀, ꙗ҆́кѡ пред̾ тобо́ю сꙋ́ть всѝ стꙋжа́ющїи мѝ: и҆ нѣ́сть мнѣ̀ и҆но́е прибѣ́жище, то́кмѡ ты̀ гдⷭ҇и. да постыдѧ́тсѧ ᲂу҆́бѡ всѝ востаю́щїи на мѧ̀, и҆ и҆́щꙋщїи дꙋ́шꙋ мою̀, є҆́же потреби́ти ю҆̀: ꙗ҆́кѡ ты̀ є҆сѝ є҆ди́нъ си́льный гдⷭ҇и во всѣ́хъ, и҆ твоѧ̀ є҆́сть сла́ва во вѣ́ки вѣкѡ́въ, а҆ми́нь.

Ѱало́мъ дв҃дꙋ, р҃ѳ.

а҃. Речѐ гдⷭ҇ь гдⷭ҇еви моемꙋ̀: сѣдѝ ѡ҆деснꙋ́ю менѐ, до́ндеже положꙋ̀ врагѝ твоѧ̑ подно́жїе но́гъ твои́хъ.

в҃. Же́злъ си́лы по́слетъ тѝ гдⷭ҇ь ѿ сїѡ́на, и҆ гдⷭ҇ствꙋй посредѣ̀ врагѡ́въ твои́хъ.

г҃. Съ тобо́ю нача́ло въ де́нь си́лы твоеѧ̀, во свѣ́тлостехъ ст҃ы́хъ твои́хъ: и҆з̾ чре́ва пре́жде денни́цы роди́хъ тѧ̀.

д҃. Клѧ́тсѧ гдⷭ҇ь и҆ не раска́етсѧ: ты̀ і҆ере́й во вѣ́къ по чи́нꙋ мелхїседе́ковꙋ.

є҃. Гдⷭ҇ь ѡ҆деснꙋ́ю тебє̀ сокрꙋши́лъ є҆́сть въ де́нь гнѣ́ва своегѡ̀ царѝ:

ѕ҃. Сꙋ́дитъ во ꙗ҆зы́цѣхъ, и҆спо́лнитъ падє́нїѧ, сокрꙋши́тъ главы̑ на землѝ мно́гихъ.

з҃. Ѿ пото́ка на пꙋтѝ пїе́тъ: сегѡ̀ ра́ди вознесе́тъ главꙋ̀.

А҆ллилꙋ́їа, р҃і.

а҃. И҆сповѣ́мсѧ тебѣ̀, гдⷭ҇и, всѣ́мъ се́рдцемъ мои́мъ въ совѣ́тѣ пра́выхъ и҆ со́нмѣ.

в҃. Вє́лїѧ дѣла̀ гдⷭ҇нѧ, и҆зы̑скана во всѣ́хъ во́лѧхъ є҆гѡ̀:

г҃. И҆сповѣ́данїе и҆ великолѣ́пїе дѣ́ло є҆гѡ̀, и҆ пра́вда є҆гѡ̀ пребыва́етъ въ вѣ́къ вѣ́ка.

д҃. Па́мѧть сотвори́лъ є҆́сть чꙋде́съ свои́хъ: млⷭ҇тивъ и҆ ще́дръ гдⷭ҇ь.

є҃. Пи́щꙋ дадѐ боѧ́щымсѧ є҆гѡ̀: помѧне́тъ въ вѣ́къ завѣ́тъ сво́й.

ѕ҃. Крѣ́пость дѣ́лъ свои́хъ возвѣстѝ лю́демъ свои̑мъ, да́ти и҆̀мъ достоѧ́нїе ꙗ҆зы̑къ.

з҃. Дѣла̀ рꙋ́къ є҆гѡ̀ и҆́стина и҆ сꙋ́дъ, вѣ̑рны всѧ̑ за́пѡвѣди є҆гѡ̀,

и҃. Оу҆твержє́ны въ вѣ́къ вѣ́ка, сотворє́ны во и҆́стинѣ и҆ правотѣ̀.

ѳ҃. И҆збавле́нїе посла̀ лю́демъ свои̑мъ: заповѣ́да въ вѣ́къ завѣ́тъ сво́й: ст҃о и҆ стра́шно и҆́мѧ є҆гѡ̀.

і҃. Нача́ло премⷣрости стра́хъ гдⷭ҇ень, ра́зꙋмъ же бл҃гъ всѣ̑мъ творѧ́щымъ и҆̀: хвала̀ є҆гѡ̀ пребыва́етъ въ вѣ́къ вѣ́ка.

А҆ллилꙋ́їа, ѱало́мъ, ра҃і.

а҃. Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.

в҃. Си́льно на землѝ бꙋ́детъ сѣ́мѧ є҆гѡ̀, ро́дъ пра́выхъ бл҃гослови́тсѧ:

г҃. Сла́ва и҆ бога́тство въ домꙋ̀ є҆гѡ̀, и҆ пра́вда є҆гѡ̀ пребыва́етъ въ вѣ́къ вѣ́ка.

д҃. Возсїѧ̀ во тмѣ̀ свѣ́тъ пра̑вымъ: млⷭ҇тивъ и҆ ще́дръ и҆ првⷣнъ.

є҃. Бл҃гъ мꙋ́жъ ще́дрѧ и҆ даѧ̀: ᲂу҆стро́итъ словеса̀ своѧ̑ на сꙋдѣ̀, ꙗ҆́кѡ въ вѣ́къ не подви́житсѧ.

ѕ҃. Въ па́мѧть вѣ́чнꙋю бꙋ́детъ првⷣникъ.

з҃. Ѿ слꙋ́ха ѕла̀ не ᲂу҆бои́тсѧ:

и҃. Гото́во се́рдце є҆гѡ̀ ᲂу҆пова́ти на гдⷭ҇а: ᲂу҆тверди́сѧ се́рдце є҆гѡ̀, не ᲂу҆бои́тсѧ, до́ндеже воззри́тъ на врагѝ своѧ̑.

ѳ҃. Расточѝ, дадѐ ᲂу҆бѡ́гимъ: пра́вда є҆гѡ̀ пребыва́етъ во вѣ́къ вѣ́ка: ро́гъ є҆гѡ̀ вознесе́тсѧ въ сла́вѣ.

і҃. Грѣ́шникъ ᲂу҆́зритъ и҆ прогнѣ́ваетсѧ зꙋбы̀ свои́ми поскреже́щетъ и҆ раста́етъ: жела́нїе грѣ́шника поги́бнетъ.

Сла́ва:

А҆ллилꙋ́їа, рв҃і.

а҃. Хвали́те, ѻ҆́троцы, гдⷭ҇а, хвали́те и҆́мѧ гдⷭ҇не.

в҃. Бꙋ́ди и҆́мѧ гдⷭ҇не бл҃гослове́но ѿ ны́нѣ и҆ до вѣ́ка.

г҃. Ѿ востѡ́къ со́лнца до за̑падъ хва́льно и҆́мѧ гдⷭ҇не.

д҃. Высо́къ над̾ всѣ́ми ꙗ҆зы́ки гдⷭ҇ь: над̾ нб҃сы̀ сла́ва є҆гѡ̀.

є҃. Кто̀ ꙗ҆́кѡ гдⷭ҇ь бг҃ъ на́шъ; на высо́кихъ живы́й,

ѕ҃. И҆ на смирє́нныѧ призира́ѧй на нб҃сѝ и҆ на землѝ:

з҃. Воздвиза́ѧй ѿ землѝ ни́ща, и҆ ѿ гно́ища возвыша́ѧй ᲂу҆бо́га:

и҃. Посади́ти є҆го̀ съ кнѧ̑зи, съ кнѧ̑зи люде́й свои́хъ:

ѳ҃. Вселѧ́ѧ непло́довь въ до́мъ, ма́терь ѡ҆ ча́дѣхъ веселѧ́щꙋсѧ.

А҆ллилꙋ́їа, рг҃і.

а҃. Во и҆схо́дѣ і҆и҃левѣ ѿ є҆гѵ́пта, до́мꙋ і҆а́кѡвлѧ и҆з̾ люде́й ва̑рваръ,

в҃. Бы́сть і҆ꙋде́а ст҃ы́нѧ є҆гѡ̀, і҆и҃ль ѻ҆́бласть є҆гѡ̀.

г҃. Мо́ре ви́дѣ и҆ побѣжѐ, і҆ѻрда́нъ возврати́сѧ вспѧ́ть:

д҃. Го́ры взыгра́шасѧ ꙗ҆́кѡ ѻ҆внѝ, и҆ хо́лми ꙗ҆́кѡ а҆́гнцы ѻ҆́вчїи.

є҃. Что́ ти є҆́сть, мо́ре, ꙗ҆́кѡ побѣ́гло є҆сѝ, и҆ тебѣ̀, і҆ѻрда́не, ꙗ҆́кѡ возврати́лсѧ є҆сѝ вспѧ́ть:

ѕ҃. Го́ры, ꙗ҆́кѡ взыгра́стесѧ ꙗ҆́кѡ ѻ҆внѝ, и҆ хо́лми ꙗ҆́кѡ а҆́гнцы ѻ҆́вчїи.

з҃. Ѿ лица̀ гдⷭ҇нѧ подви́жесѧ землѧ̀, ѿ лица̀ бг҃а і҆а́кѡвлѧ:

и҃. Ѡ҆бра́щшагѡ ка́мень во є҆зе́ра вѡдна́ѧ и҆ несѣко́мый во и҆сто́чники вѡдны́ѧ.

ѳ҃. Не на́мъ, гдⷭ҇и, не на́мъ, но и҆́мени твоемꙋ̀ да́ждь сла́вꙋ ѡ҆ млⷭ҇ти твое́й и҆ и҆́стинѣ твое́й:

і҃. Да не когда̀ рекꙋ́тъ ꙗ҆зы́цы: гдѣ̀ є҆́сть бг҃ъ и҆́хъ;

а҃і. Бг҃ъ же на́шъ на нб҃сѝ и҆ на землѝ, всѧ̑ є҆ли̑ка восхотѣ̀, сотворѝ.

в҃і. І҆́дѡли ꙗ҆зы̑къ сребро̀ и҆ зла́то, дѣла̀ рꙋ́къ человѣ́ческихъ:

г҃і. Оу҆ста̀ и҆́мꙋтъ, и҆ не возглаго́лютъ: ѻ҆́чи и҆́мꙋтъ, и҆ не ᲂу҆́зрѧтъ:

д҃і. Оу҆́ши и҆́мꙋтъ, и҆ не ᲂу҆слы́шатъ: нѡ́здри и҆́мꙋтъ, и҆ не ѡ҆бонѧ́ютъ:

є҃і. Рꙋ́цѣ и҆́мꙋтъ, и҆ не ѡ҆сѧ́жꙋтъ: но́зѣ и҆́мꙋтъ, и҆ не по́йдꙋтъ: не возгласѧ́тъ горта́немъ свои́мъ.

ѕ҃і. Подо́бни и҆̀мъ да бꙋ́дꙋтъ творѧ́щїи ѧ҆̀ и҆ всѝ надѣ́ющїисѧ на нѧ̀.

з҃і. До́мъ і҆и҃левъ ᲂу҆пова̀ на гдⷭ҇а: помо́щникъ и҆ защи́титель и҆̀мъ є҆́сть.

и҃і. До́мъ а҆арѡ́нь ᲂу҆пова̀ на гдⷭ҇а: помо́щникъ и҆ защи́титель и҆̀мъ є҆́сть.

ѳ҃і. Боѧ́щїисѧ гдⷭ҇а ᲂу҆пова́ша на гдⷭ҇а: помо́щникъ и҆ защи́титель и҆̀мъ є҆́сть.

к҃. Гдⷭ҇ь помѧнꙋ́въ ны̀ бл҃гослови́лъ є҆́сть на́съ: бл҃гослови́лъ є҆́сть до́мъ і҆и҃левъ, бл҃гослови́лъ є҆́сть до́мъ а҆арѡ́нь,

к҃а. Бл҃гослови́лъ є҆́сть боѧ́щыѧсѧ гдⷭ҇а, ма̑лыѧ съ вели́кими.

к҃в. Да приложи́тъ гдⷭ҇ь на вы̀, на вы̀ и҆ на сы́ны ва́шѧ:

к҃г. Бл҃гослове́ни вы̀ гдⷭ҇еви, сотво́ршемꙋ нб҃о и҆ зе́млю.

к҃д. Нб҃о нб҃сѐ гдⷭ҇еви, зе́млю же дадѐ сыновѡ́мъ человѣ́чєскимъ.

к҃є. Не ме́ртвїи восхва́лѧтъ тѧ̀, гдⷭ҇и, нижѐ всѝ низходѧ́щїи во а҆́дъ:

к҃ѕ. Но мы̀ живі́и бл҃гослови́мъ гдⷭ҇а ѿ ны́нѣ и҆ до вѣ́ка.

А҆ллилꙋ́їа, рд҃і.

а҃. Возлюби́хъ, ꙗ҆́кѡ ᲂу҆слы́шитъ гдⷭ҇ь гла́съ моле́нїѧ моегѡ̀,

в҃. Ꙗ҆́кѡ приклонѝ ᲂу҆́хо своѐ мнѣ̀: и҆ во дни̑ моѧ̑ призовꙋ̀.

г҃. Ѡ҆б̾ѧ́ша мѧ̀ болѣ̑зни смє́ртныѧ, бѣды̑ а҆́дѡвы ѡ҆брѣто́ша мѧ̀: ско́рбь и҆ болѣ́знь ѡ҆брѣто́хъ и҆ и҆́мѧ гдⷭ҇не призва́хъ:

д҃. Ѽ, гдⷭ҇и, и҆зба́ви дꙋ́шꙋ мою̀: млⷭ҇тивъ гдⷭ҇ь и҆ првⷣнъ, и҆ бг҃ъ на́шъ ми́лꙋетъ.

є҃. Хранѧ́й младе́нцы гдⷭ҇ь: смири́хсѧ, и҆ сп҃се́ мѧ.

ѕ҃. Ѡ҆брати́сѧ, дꙋшѐ моѧ̀, въ поко́й тво́й, ꙗ҆́кѡ гдⷭ҇ь бл҃годѣ́йствова тѧ̀:

з҃. Ꙗ҆́кѡ и҆з̾ѧ́тъ дꙋ́шꙋ мою̀ ѿ сме́рти, ѻ҆́чи моѝ ѿ сле́зъ и҆ но́зѣ моѝ ѿ поползнове́нїѧ.

и҃. Бл҃гоꙋгождꙋ̀ пред̾ гдⷭ҇емъ во странѣ̀ живы́хъ.

Сла́ва:

А҆ллилꙋ́їа, рє҃і.

а҃. Вѣ́ровахъ, тѣ́мже возглаго́лахъ: а҆́зъ же смири́хсѧ ѕѣлѡ̀.

в҃. А҆́зъ же рѣ́хъ во и҆зстꙋпле́нїи мое́мъ: всѧ́къ человѣ́къ ло́жъ.

г҃. Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;

д҃. Ча́шꙋ сп҃се́нїѧ прїимꙋ̀ и҆ и҆́мѧ гдⷭ҇не призовꙋ̀:

є҃. Моли̑твы моѧ̑ гдⷭ҇еви возда́мъ пред̾ всѣ́ми людьмѝ є҆гѡ̀.

ѕ҃. Чтⷭ҇на̀ пред̾ гдⷭ҇емъ сме́рть прпⷣбныхъ є҆гѡ̀.

з҃. Ѽ, гдⷭ҇и, а҆́зъ ра́бъ тво́й, а҆́зъ ра́бъ тво́й и҆ сы́нъ рабы́ни твоеѧ̀: растерза́лъ є҆сѝ ᲂу҆́зы моѧ̑.

и҃. Тебѣ̀ пожрꙋ̀ же́ртвꙋ хвалы̀, и҆ во и҆́мѧ гдⷭ҇не призовꙋ̀.

ѳ҃. Моли̑твы моѧ̑ гдⷭ҇еви возда́мъ пред̾ всѣ́ми людьмѝ є҆гѡ̀,

і҃. Во дво́рѣхъ до́мꙋ гдⷭ҇нѧ, посредѣ̀ тебє̀, і҆ерⷭ҇ли́ме.

А҆ллилꙋ́їа, рѕ҃і.

а҃. Хвали́те гдⷭ҇а, всѝ ꙗ҆зы́цы, похвали́те є҆го̀, всѝ лю́дїе:

в҃. Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.

А҆ллилꙋ́їа, рз҃і.

а҃. И҆сповѣ́дайтесѧ гдⷭ҇еви, ꙗ҆́кѡ бл҃гъ, ꙗ҆́кѡ въ вѣ́къ млⷭ҇ть є҆гѡ̀.

в҃. Да рече́тъ ᲂу҆́бѡ до́мъ і҆и҃левъ: ꙗ҆́кѡ бл҃гъ, ꙗ҆́кѡ въ вѣ́къ млⷭ҇ть є҆гѡ̀.

г҃. Да рече́тъ ᲂу҆́бѡ до́мъ а҆арѡ́нь: ꙗ҆́кѡ бл҃гъ, ꙗ҆́кѡ въ вѣ́къ млⷭ҇ть є҆гѡ̀.

д҃. Да рекꙋ́тъ ᲂу҆́бѡ всѝ боѧ́щїисѧ гдⷭ҇а: ꙗ҆́кѡ бл҃гъ, ꙗ҆́кѡ въ вѣ́къ млⷭ҇ть є҆гѡ̀.

є҃. Ѿ ско́рби призва́хъ гдⷭ҇а, и҆ ᲂу҆слы́ша мѧ̀ въ простра́нство.

ѕ҃. Гдⷭ҇ь мнѣ̀ помо́щникъ, и҆ не ᲂу҆бою́сѧ: что̀ сотвори́тъ мнѣ̀ человѣ́къ;

з҃. Гдⷭ҇ь мнѣ̀ помо́щникъ, и҆ а҆́зъ воззрю̀ на врагѝ моѧ̑.

и҃. Бл҃го є҆́сть надѣ́ѧтисѧ на гдⷭ҇а, не́жели надѣ́ѧтисѧ на человѣ́ка:

ѳ҃. Бл҃го є҆́сть ᲂу҆пова́ти на гдⷭ҇а, не́жели ᲂу҆пова́ти на кнѧ̑зи.

і҃. Всѝ ꙗ҆зы́цы ѡ҆быдо́ша мѧ̀, и҆ и҆́менемъ гдⷭ҇нимъ противлѧ́хсѧ и҆̀мъ:

а҃і. Ѡ҆быше́дше ѡ҆быдо́ша мѧ̀, и҆ и҆́менемъ гдⷭ҇нимъ противлѧ́хсѧ и҆̀мъ:

в҃і. Ѡ҆быдо́ша мѧ̀ ꙗ҆́кѡ пче́лы со́тъ, и҆ разгорѣ́шасѧ ꙗ҆́кѡ ѻ҆́гнь въ те́рнїи: и҆ и҆́менемъ гдⷭ҇нимъ противлѧ́хсѧ и҆̀мъ.

г҃і. Ѿринове́нъ преврати́хсѧ па́сти, и҆ гдⷭ҇ь прїѧ́тъ мѧ̀.

д҃і. Крѣ́пость моѧ̀ и҆ пѣ́нїе моѐ гдⷭ҇ь, и҆ бы́сть мѝ во сп҃се́нїе.

є҃і. Гла́съ ра́дости и҆ сп҃се́нїѧ въ селе́нїихъ првⷣныхъ: десни́ца гдⷭ҇нѧ сотворѝ си́лꙋ.

ѕ҃і. Десни́ца гдⷭ҇нѧ вознесе́ мѧ, десни́ца гдⷭ҇нѧ сотворѝ си́лꙋ.

з҃і. Не ᲂу҆мрꙋ̀, но жи́въ бꙋ́дꙋ и҆ повѣ́мъ дѣла̀ гдⷭ҇нѧ.

и҃і. Наказꙋ́ѧ наказа́ мѧ гдⷭ҇ь, сме́рти же не предаде́ мѧ.

ѳ҃і. Ѿве́рзите мнѣ̀ врата̀ пра́вды: вше́дъ въ нѧ̀, и҆сповѣ́мсѧ гдⷭ҇еви.

к҃. Сїѧ̑ врата̀ гдⷭ҇нѧ: првⷣнїи вни́дꙋтъ въ нѧ̀.

к҃а. И҆сповѣ́мсѧ тебѣ̀, ꙗ҆́кѡ ᲂу҆слы́шалъ мѧ̀ є҆сѝ и҆ бы́лъ є҆сѝ мнѣ̀ во сп҃се́нїе.

к҃в. Ка́мень, є҆го́же небрего́ша зи́ждꙋщїи, се́й бы́сть во главꙋ̀ ᲂу҆́гла:

к҃г. Ѿ гдⷭ҇а бы́сть се́й, и҆ є҆́сть ди́венъ во ѻ҆чесѣ́хъ на́шихъ.

к҃д. Се́й де́нь, є҆го́же сотворѝ гдⷭ҇ь, возра́дꙋемсѧ и҆ возвесели́мсѧ въ ѻ҆́нь.

к҃є. Ѽ, гдⷭ҇и, сп҃си́ же, ѽ, гдⷭ҇и, поспѣши́ же.

к҃ѕ. Бл҃гослове́нъ грѧды́й во и҆́мѧ гдⷭ҇не: бл҃гослови́хомъ вы̀ и҆з̾ до́мꙋ гдⷭ҇нѧ.

к҃з. Бг҃ъ гдⷭ҇ь, и҆ ꙗ҆ви́сѧ на́мъ: соста́вите пра́здникъ во ᲂу҆чаща́ющихъ до рѡ́гъ ѻ҆лтаре́выхъ.

к҃и. Бг҃ъ мо́й є҆сѝ ты̀, и҆ и҆сповѣ́мсѧ тебѣ̀: бг҃ъ мо́й є҆сѝ ты̀, и҆ вознесꙋ́ тѧ: и҆сповѣ́мсѧ тебѣ̀, ꙗ҆́кѡ ᲂу҆слы́шалъ мѧ̀ є҆сѝ и҆ бы́лъ є҆сѝ мнѣ̀ во сп҃се́нїе.

к҃ѳ. И҆сповѣ́дайтесѧ гдⷭ҇еви, ꙗ҆́кѡ бл҃гъ, ꙗ҆́кѡ въ вѣ́къ млⷭ҇ть є҆гѡ̀.

Сла́ва:

По ѕ҃і-й каѳі́смѣ, трист҃о́е.

Та́же тропарѝ, гла́съ а҃:

И҆́нъ мі́ръ тебѐ дꙋшѐ ѡ҆жида́етъ, и҆ сꙋдїѧ̀ хо́щетъ твоѧ̑ ѡ҆бличи́ти та̑йнаѧ и҆ лю̑таѧ. не пребꙋ́ди ᲂу҆́бѡ въ здѣ́шнихъ, но предварѝ вопїю́щи сꙋдїѝ: бж҃е, ѡ҆чи́сти мѧ̀, и҆ сп҃си́ мѧ.

Сла́ва: Ꙗ҆́кѡ прегрѣше́ньми мно́гими, и҆ ꙗ҆́звами безмѣ́рными ѡ҆блежи́мь є҆́смь сп҃се, согрѣша́ѧй молю̀ твоѐ бл҃гоꙋтро́бїе хрⷭ҇тѐ: врачꙋ̀ недꙋ́гꙋющихъ посѣтѝ, и҆ и҆сцѣлѝ, и҆ сп҃си́ мѧ.

И҆ ны́нѣ: Дꙋшѐ моѧ̀, что̀ неради́вѡ живе́ши лѣнѧ́щисѧ; что̀ не пече́шисѧ ѡ҆ ѕлы́хъ, и҆̀хже содѣ́ѧла є҆сѝ въ житїѝ; потщи́сѧ и҆спра́витисѧ, пре́жде да́же две́рь не заключи́тъ тебѣ̀ гдⷭ҇ь. бцⷣѣ притецы̀, припадѝ и҆ возопі́й: ᲂу҆пова́нїе ненадѣ́емыхъ, сп҃си́ мѧ, мно́гѡ къ тебѣ̀ прегрѣши́вша, влⷣчце пречⷭ҇таѧ.

Гдⷭ҇и поми́лꙋй, м҃. и҆ мл҃тва:

Гдⷭ҇и ст҃ы́й въ вы́шнихъ живы́й, и҆ всеви́дѧщимъ твои́мъ ѻ҆́комъ призира́ѧй на всю̀ тва́рь, тебѣ̀ приклонѧ́емъ вы́ю дꙋшѝ и҆ тѣлесѐ, и҆ тебѣ̀ мо́лимсѧ ст҃ы́й ст҃ы́хъ: прострѝ рꙋ́кꙋ твою̀ неви́димꙋю ѿ ст҃а́гѡ жили́ща твоегѡ̀, и҆ бл҃гословѝ всѧ̑ ны̀, и҆ простѝ на́мъ всѧ́кое согрѣше́нїе, во́льное же и҆ нево́льное, сло́вомъ, и҆лѝ дѣ́ломъ. да́рꙋй на́мъ гдⷭ҇и ᲂу҆миле́нїе, да́рꙋй сле́зы дꙋхѡ́вныѧ ѿ дꙋшѝ, во ѡ҆чище́нїе мно́гихъ на́шихъ грѣхѡ́въ: да́рꙋй ве́лїю твою̀ млⷭ҇ть на мі́ръ тво́й, и҆ на ны̀ недостѡ́йныѧ рабы̑ твоѧ̑: ꙗ҆́кѡ бл҃гослове́нно и҆ препросла́вленно є҆́сть и҆́мѧ твоѐ, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

А҆ллилꙋ́їа, ри҃і.

а҃. Бл҃же́ни непоро́чнїи ꙾въ пꙋ́ть꙾ ⁴⁹, ходѧ́щїи въ зако́нѣ гдⷭ҇ни.

в҃. Бл҃же́ни и҆спыта́ющїи свидѣ̑нїѧ є҆гѡ̀, всѣ́мъ срⷣцемъ взы́щꙋтъ є҆го̀.

г҃. Не дѣ́лающїи бо беззако́нїѧ въ пꙋте́хъ є҆гѡ̀ ходи́ша.

д҃. Ты̀ заповѣ́далъ є҆сѝ за́пѡвѣди твоѧ̑ сохрани́ти ѕѣлѡ̀:

є҃. Дабы̀ и҆спра́вилисѧ пꙋтїѐ моѝ, сохрани́ти ѡ҆правда̑нїѧ твоѧ̑.

ѕ҃. Тогда̀ не постыжꙋ́сѧ, внегда̀ призрѣ́ти мѝ на всѧ̑ за́пѡвѣди твоѧ̑.

з҃. И҆сповѣ́мсѧ тебѣ̀ въ пра́вости се́рдца, внегда̀ наꙋчи́ти ми сѧ сꙋдьба́мъ пра́вды твоеѧ̀.

и҃. Ѡ҆правда̑нїѧ твоѧ̑ сохраню̀: не ѡ҆ста́ви менѐ до ѕѣла̀.

ѳ҃. Въ чесо́мъ и҆спра́витъ ю҆нѣ́йшїй пꙋ́ть сво́й; внегда̀ сохрани́ти словеса̀ твоѧ̑.

і҃. Всѣ́мъ се́рдцемъ мои́мъ взыска́хъ тебѐ: не ѿри́ни менѐ ѿ за́повѣдїй твои́хъ.

а҃і. Въ се́рдцы мое́мъ скры́хъ словеса̀ твоѧ̑, ꙗ҆́кѡ да не согрѣшꙋ̀ тебѣ̀.

в҃і. Бл҃гослове́нъ є҆сѝ, гдⷭ҇и: наꙋчи́ мѧ ѡ҆правда́нїємъ твои̑мъ.

г҃і. Оу҆стна́ма мои́ма возвѣсти́хъ всѧ̑ сꙋдьбы̑ ᲂу҆́стъ твои́хъ.

д҃і. На пꙋтѝ свидѣ́нїй твои́хъ наслади́хсѧ, ꙗ҆́кѡ ѡ҆ всѧ́комъ бога́тствѣ.

є҃і. Въ за́повѣдехъ твои́хъ поглꙋмлю́сѧ, и҆ ᲂу҆разꙋмѣ́ю пꙋти̑ твоѧ̑.

ѕ҃і. Во ѡ҆правда́нїихъ твои́хъ поꙋчꙋ́сѧ: не забꙋ́дꙋ слове́съ твои́хъ.

з҃і. Возда́ждь рабꙋ̀ твоемꙋ̀: живи́ мѧ, и҆ сохраню̀ словеса̀ твоѧ̑.

и҃і. Ѿкры́й ѻ҆́чи моѝ, и҆ ᲂу҆разꙋмѣ́ю чꙋдеса̀ ѿ зако́на твоегѡ̀.

ѳ҃і. Пришле́цъ а҆́зъ є҆́смь на землѝ: не скры́й ѿ менѐ за́пѡвѣди твоѧ̑.

к҃. Возлюбѝ дꙋша̀ моѧ̀ возжела́ти сꙋдьбы̑ твоѧ̑ на всѧ́кое вре́мѧ.

к҃а. Запрети́лъ є҆сѝ гѡ́рдымъ: про́клѧти ᲂу҆клонѧ́ющїисѧ ѿ за́повѣдїй твои́хъ.

к҃в. Ѿимѝ ѿ менѐ поно́съ поноше́нїе и҆ ᲂу҆ничиже́нїе, ꙗ҆́кѡ свидѣ́нїй твои́хъ взыска́хъ.

к҃г. И҆́бо сѣдо́ша кнѧ̑зи и҆ на мѧ̀ клевета́хꙋ, ра́бъ же тво́й глꙋмлѧ́шесѧ во ѡ҆правда́нїихъ твои́хъ:

к҃д. И҆́бо свидѣ̑нїѧ твоѧ̑ поꙋче́нїе моѐ є҆́сть, и҆ совѣ́ти моѝ ѡ҆правда̑нїѧ твоѧ̑.

к҃є. Прильпѐ землѝ дꙋша̀ моѧ̀: живи́ мѧ по словесѝ твоемꙋ̀.

к҃ѕ. Пꙋти̑ моѧ̑ возвѣсти́хъ, и҆ ᲂу҆слы́шалъ мѧ̀ є҆сѝ: наꙋчи́ мѧ ѡ҆правда́нїємъ твои̑мъ.

к҃з. Пꙋ́ть ѡ҆правда́нїй твои́хъ вразꙋми́ ми, и҆ поглꙋмлю́сѧ въ чꙋдесѣ́хъ твои́хъ.

к҃и. Воздрема̀ дꙋша̀ моѧ̀ ѿ ᲂу҆ны́нїѧ: ᲂу҆тверди́ мѧ въ словесѣ́хъ твои́хъ.

к҃ѳ. Пꙋ́ть непра́вды ѿста́ви ѿ менѐ и҆ зако́номъ твои́мъ поми́лꙋй мѧ̀.

л҃. Пꙋ́ть и҆́стины и҆зво́лихъ и҆ сꙋдьбы̑ твоѧ̑ не забы́хъ.

л҃а. Прилѣпи́хсѧ свидѣ́нїємъ твои̑мъ, гдⷭ҇и, не посрамѝ менѐ.

л҃в. Пꙋ́ть за́повѣдїй твои́хъ теко́хъ, є҆гда̀ разшири́лъ є҆сѝ се́рдце моѐ.

л҃г. Законоположѝ мнѣ̀, гдⷭ҇и, пꙋ́ть ѡ҆правда́нїй твои́хъ, и҆ взыщꙋ̀ и҆̀ вы́нꙋ:

л҃д. Вразꙋми́ мѧ, и҆ и҆спыта́ю зако́нъ тво́й и҆ сохраню̀ и҆̀ всѣ́мъ се́рдцемъ мои́мъ.

л҃є. Наста́ви мѧ̀ на стезю̀ за́повѣдїй твои́хъ, ꙗ҆́кѡ тꙋ́ю восхотѣ́хъ.

л҃ѕ. Приклонѝ се́рдце моѐ во свидѣ̑нїѧ твоѧ̑, а҆ не въ лихои́мство.

л҃з. Ѿвратѝ ѻ҆́чи моѝ є҆́же не ви́дѣти сꙋеты̀: въ пꙋтѝ твое́мъ живи́ мѧ.

л҃и. Поста́ви рабꙋ̀ твоемꙋ̀ сло́во твоѐ въ стра́хъ тво́й.

л҃ѳ. Ѿимѝ поноше́нїе моѐ, є҆́же непщева́хъ: ꙗ҆́кѡ сꙋдьбы̑ твоѧ̑ бл҃ги.

м҃. Сѐ, возжела́хъ за́пѡвѣди твоѧ̑: въ пра́вдѣ твое́й живи́ мѧ.

м҃а. И҆ да прїи́детъ на мѧ̀ млⷭ҇ть твоѧ̀, гдⷭ҇и, сп҃се́нїе твоѐ по словесѝ твоемꙋ̀:

м҃в. И҆ ѿвѣща́ю поноша́ющымъ мѝ сло́во, ꙗ҆́кѡ ᲂу҆пова́хъ на словеса̀ твоѧ̑.

м҃г. И҆ не ѿимѝ ѿ ᲂу҆́стъ мои́хъ словесѐ и҆́стинна до ѕѣла̀, ꙗ҆́кѡ на сꙋдьбы̑ твоѧ̑ ᲂу҆пова́хъ:

м҃д. И҆ сохраню̀ зако́нъ тво́й вы́нꙋ, въ вѣ́къ и҆ въ вѣ́къ вѣ́ка.

м҃є. И҆ хожда́хъ въ широтѣ̀, ꙗ҆́кѡ за́пѡвѣди твоѧ̑ взыска́хъ:

м҃ѕ. И҆ глаго́лахъ ѡ҆ свидѣ́нїихъ твои́хъ пред̾ царѝ и҆ не стыдѧ́хсѧ:

м҃з. И҆ поꙋча́хсѧ въ за́повѣдехъ твои́хъ, ꙗ҆̀же возлюби́хъ ѕѣлѡ̀:

м҃и. И҆ воздвиго́хъ рꙋ́цѣ моѝ къ за́повѣдемъ твои̑мъ, ꙗ҆̀же возлюби́хъ, и҆ глꙋмлѧ́хсѧ во ѡ҆правда́нїихъ твои́хъ.

м҃ѳ. Помѧнѝ словеса̀ твоѧ̑ рабꙋ̀ твоемꙋ̀, и҆́хже ᲂу҆пова́нїе да́лъ мѝ є҆сѝ.

н҃. То́ мѧ ᲂу҆тѣ́ши во смире́нїи мое́мъ, ꙗ҆́кѡ сло́во твоѐ живи́ мѧ.

н҃а. Го́рдїи законопрестꙋпова́хꙋ до ѕѣла̀: ѿ зако́на же твоегѡ̀ не ᲂу҆клони́хсѧ.

н҃в. Помѧнꙋ́хъ сꙋдьбы̑ твоѧ̑ ѿ вѣ́ка, гдⷭ҇и, и҆ ᲂу҆тѣ́шихсѧ.

н҃г. Печа́ль прїѧ́тъ мѧ̀ ѿ грѣ̑шникъ, ѡ҆ставлѧ́ющихъ зако́нъ тво́й.

н҃д. Пѣ̑та бѧ́хꙋ мнѣ̀ ѡ҆правда̑нїѧ твоѧ̑ на мѣ́стѣ прише́льствїѧ моегѡ̀.

н҃є. Помѧнꙋ́хъ въ нощѝ и҆́мѧ твоѐ, гдⷭ҇и, и҆ сохрани́хъ зако́нъ тво́й.

н҃ѕ. Се́й бы́сть мнѣ̀, ꙗ҆́кѡ ѡ҆правда́нїй твои́хъ взыска́хъ.

н҃з. Ча́сть моѧ̀ є҆сѝ, гдⷭ҇и: рѣ́хъ сохрани́ти зако́нъ тво́й.

н҃и. Помоли́хсѧ лицꙋ̀ твоемꙋ̀ всѣ́мъ се́рдцемъ мои́мъ: поми́лꙋй мѧ̀ по словесѝ твоемꙋ̀.

н҃ѳ. Помы́слихъ пꙋти̑ твоѧ̑ и҆ возврати́хъ но́зѣ моѝ во свидѣ̑нїѧ твоѧ̑.

ѯ҃. Оу҆гото́вихсѧ и҆ не смꙋти́хсѧ сохрани́ти за́пѡвѣди твоѧ̑.

ѯ҃а. Оу҆́жѧ грѣ̑шникъ ѡ҆бѧза́шасѧ мнѣ̀, и҆ зако́на твоегѡ̀ не забы́хъ.

ѯ҃в. Полꙋ́нощи воста́хъ и҆сповѣ́датисѧ тебѣ̀ ѡ҆ сꙋдьба́хъ пра́вды твоеѧ̀.

ѯ҃г. Прича́стникъ а҆́зъ є҆́смь всѣ̑мъ боѧ́щымсѧ тебє̀ и҆ хранѧ́щымъ за́пѡвѣди твоѧ̑.

ѯ҃д. Млⷭ҇ти твоеѧ̀, гдⷭ҇и, и҆спо́лнь землѧ̀: ѡ҆правда́нїємъ твои̑мъ наꙋчи́ мѧ.

ѯ҃є. Бл҃гость сотвори́лъ є҆сѝ съ рабо́мъ твои́мъ, гдⷭ҇и, по словесѝ твоемꙋ̀:

ѯ҃ѕ. Бл҃гости и҆ наказа́нїю и҆ ра́зꙋмꙋ наꙋчи́ мѧ, ꙗ҆́кѡ за́повѣдемъ твои̑мъ вѣ́ровахъ.

ѯ҃з. Пре́жде да́же не смири́ти ми сѧ, а҆́зъ прегрѣши́хъ: сегѡ̀ ра́ди сло́во твоѐ сохрани́хъ.

ѯ҃и. Бл҃гъ є҆сѝ ты̀, гдⷭ҇и: и҆ бл҃гостїю твое́ю наꙋчи́ мѧ ѡ҆правда́нїємъ твои̑мъ.

ѯ҃ѳ. Оу҆мно́жисѧ на мѧ̀ непра́вда го́рдыхъ: а҆́зъ же всѣ́мъ се́рдцемъ мои́мъ и҆спыта́ю за́пѡвѣди твоѧ̑.

ѻ҃. Оу҆сыри́сѧ ꙗ҆́кѡ млеко̀ се́рдце и҆́хъ: а҆́зъ же зако́нꙋ твоемꙋ̀ поꙋчи́хсѧ.

ѻ҃а. Бл҃го мнѣ̀, ꙗ҆́кѡ смири́лъ мѧ̀ є҆сѝ, ꙗ҆́кѡ да наꙋчꙋ́сѧ ѡ҆правда́нїємъ твои̑мъ.

ѻ҃в. Бл҃гъ мнѣ̀ зако́нъ ᲂу҆́стъ твои́хъ па́че ты́сѧщъ зла́та и҆ сребра̀.

Сла́ва:

ѻ҃г. Рꙋ́цѣ твоѝ сотвори́стѣ мѧ̀ и҆ созда́стѣ мѧ̀: вразꙋми́ мѧ, и҆ наꙋчꙋ́сѧ за́повѣдемъ твои̑мъ.

ѻ҃д. Боѧ́щїисѧ тебє̀ ᲂу҆́зрѧтъ мѧ̀ и҆ возвеселѧ́тсѧ, ꙗ҆́кѡ на словеса̀ твоѧ̑ ᲂу҆пова́хъ.

ѻ҃є. Разꙋмѣ́хъ, гдⷭ҇и, ꙗ҆́кѡ пра́вда сꙋдьбы̑ твоѧ̑, и҆ вои́стиннꙋ смири́лъ мѧ̀ є҆сѝ.

ѻ҃ѕ. Бꙋ́ди же млⷭ҇ть твоѧ̀, да ᲂу҆тѣ́шитъ мѧ̀, по словесѝ твоемꙋ̀ рабꙋ̀ твоемꙋ̀:

ѻ҃з. Да прїи́дꙋтъ мнѣ̀ щедрѡ́ты твоѧ̑, и҆ жи́въ бꙋ́дꙋ, ꙗ҆́кѡ зако́нъ тво́й поꙋче́нїе моѐ є҆́сть.

ѻ҃и. Да постыдѧ́тсѧ го́рдїи, ꙗ҆́кѡ непра́веднѡ беззако́нноваша на мѧ̀: а҆́зъ же ꙾поглꙋмлю́сѧ꙾ ⁵⁰ въ за́повѣдехъ твои́хъ.

ѻ҃ѳ. Да ѡ҆братѧ́тъ мѧ̀ боѧ́щїисѧ тебє̀ и҆ вѣ́дѧщїи свидѣ̑нїѧ твоѧ̑.

п҃. Бꙋ́ди се́рдце моѐ непоро́чно во ѡ҆правда́нїихъ твои́хъ, ꙗ҆́кѡ да не постыжꙋ́сѧ.

п҃а. И҆счеза́етъ во сп҃се́нїе твоѐ дꙋша̀ моѧ̀, на словеса̀ твоѧ̑ ᲂу҆пова́хъ:

п҃в. И҆счезо́ша ѻ҆́чи моѝ въ сло́во твоѐ, глаго́люще: когда̀ ᲂу҆тѣ́шиши мѧ̀;

п҃г. Занѐ бы́хъ ꙗ҆́кѡ мѣ́хъ на сла́нѣ: ѡ҆правда́нїй твои́хъ не забы́хъ.

п҃д. Коли́кѡ є҆́сть дні́й раба̀ твоегѡ̀; когда̀ сотвори́ши мѝ ѿ гонѧ́щихъ мѧ̀ сꙋ́дъ;

п҃є. Повѣ́даша мнѣ̀ законопрестꙋ̑пницы глꙋмлє́нїѧ, но не ꙗ҆́кѡ зако́нъ тво́й, гдⷭ҇и.

п҃ѕ. Всѧ̑ за́пѡвѣди твоѧ̑ и҆́стина: непра́веднѡ погна́ша мѧ̀, помози́ ми.

п҃з. Вма́лѣ не сконча́ша менѐ на землѝ: а҆́зъ же не ѡ҆ста́вихъ за́повѣдїй твои́хъ.

п҃и. По млⷭ҇ти твое́й живи́ мѧ, и҆ сохраню̀ свидѣ̑нїѧ ᲂу҆́стъ твои́хъ.

п҃ѳ. Во вѣ́къ, гдⷭ҇и, сло́во твоѐ пребыва́етъ на нб҃сѝ.

ч҃. Въ ро́дъ и҆ ро́дъ и҆́стина твоѧ̀: ѡ҆снова́лъ є҆сѝ зе́млю, и҆ пребыва́етъ.

ч҃а. Оу҆чине́нїемъ твои́мъ пребыва́етъ де́нь: ꙗ҆́кѡ всѧ́чєскаѧ рабѡ́тна тебѣ̀.

ч҃в. Ꙗ҆́кѡ а҆́ще бы не зако́нъ тво́й поꙋче́нїе моѐ бы́лъ, тогда̀ ᲂу҆́бѡ поги́блъ бы́хъ во смире́нїи мое́мъ:

ч҃г. Во вѣ́къ не забꙋ́дꙋ ѡ҆правда́нїй твои́хъ, ꙗ҆́кѡ въ ни́хъ ѡ҆живи́лъ мѧ̀ є҆сѝ.

[Среда̀.]

ч҃д. Тво́й є҆́смь а҆́зъ, сп҃си́ мѧ: ꙗ҆́кѡ ѡ҆правда́нїй твои́хъ взыска́хъ.

ч҃є. Менѐ жда́ша грѣ̑шницы погꙋби́ти мѧ̀: свидѣ̑нїѧ твоѧ̑ разꙋмѣ́хъ.

ч҃ѕ. Всѧ́кїѧ кончи́ны ви́дѣхъ коне́цъ: широка̀ за́повѣдь твоѧ̀ ѕѣлѡ̀.

ч҃з. Ко́ль возлюби́хъ зако́нъ тво́й, гдⷭ҇и: ве́сь де́нь поꙋче́нїе моѐ є҆́сть.

ч҃и. Па́че вра̑гъ мои́хъ ᲂу҆мꙋдри́лъ мѧ̀ є҆сѝ за́повѣдїю твое́ю, ꙗ҆́кѡ въ вѣ́къ моѧ̀ є҆́сть.

ч҃ѳ. Па́че всѣ́хъ ᲂу҆ча́щихъ мѧ̀ разꙋмѣ́хъ, ꙗ҆́кѡ свидѣ̑нїѧ твоѧ̑ поꙋче́нїе моѐ є҆́сть.

р҃. Па́че ста́рєцъ разꙋмѣ́хъ, ꙗ҆́кѡ за́пѡвѣди твоѧ̑ взыска́хъ.

р҃а. Ѿ всѧ́кагѡ пꙋтѝ лꙋка́ва возбрани́хъ нога́мъ мои̑мъ, ꙗ҆́кѡ да сохраню̀ словеса̀ твоѧ̑:

р҃в. Ѿ сꙋде́бъ твои́хъ не ᲂу҆клони́хсѧ, ꙗ҆́кѡ ты̀ законоположи́лъ мѝ є҆сѝ.

р҃г. Ко́ль сладка̑ горта́ни моемꙋ̀ словеса̀ твоѧ̑: па́че ме́да ᲂу҆стѡ́мъ мои̑мъ.

р҃д. Ѿ за́повѣдїй твои́хъ разꙋмѣ́хъ: сегѡ̀ ра́ди возненави́дѣхъ всѧ́къ пꙋ́ть непра́вды.

р҃є. Свѣти́льникъ нога́ма мои́ма зако́нъ тво́й, и҆ свѣ́тъ стезѧ́мъ мои̑мъ.

р҃ѕ. Клѧ́хсѧ и҆ поста́вихъ сохрани́ти сꙋдьбы̑ пра́вды твоеѧ̀.

р҃з. Смири́хсѧ до ѕѣла̀: гдⷭ҇и, живи́ мѧ по словесѝ твоемꙋ̀.

р҃и. Вѡ́льнаѧ ᲂу҆́стъ мои́хъ бл҃говоли́ же, гдⷭ҇и, и҆ сꙋдьба́мъ твои̑мъ наꙋчи́ мѧ.

р҃ѳ. Дꙋша̀ моѧ̀ въ рꙋкꙋ̀ ꙾твоє́ю꙾ ⁵¹ вы́нꙋ, и҆ зако́на твоегѡ̀ не забы́хъ.

р҃і. Положи́ша грѣ̑шницы сѣ́ть мнѣ̀: и҆ ѿ за́повѣдїй твои́хъ не заблꙋди́хъ.

ра҃і. Наслѣ́довахъ свидѣ̑нїѧ твоѧ̑ во вѣ́къ, ꙗ҆́кѡ ра́дованїе се́рдца моегѡ̀ сꙋ́ть:

рв҃і. Приклони́хъ се́рдце моѐ сотвори́ти ѡ҆правда̑нїѧ твоѧ̑ въ вѣ́къ за воздаѧ́нїе.

рг҃і. Законопрестꙋ̑пныѧ возненави́дѣхъ, зако́нъ же тво́й возлюби́хъ.

рд҃і. Помо́щникъ мо́й и҆ застꙋ́пникъ мо́й є҆сѝ ты̀: на словеса̀ твоѧ̑ ᲂу҆пова́хъ.

рє҃і. Оу҆клони́тесѧ ѿ менѐ, лꙋка́внꙋющїи, и҆ и҆спыта́ю за́пѡвѣди бг҃а моегѡ̀.

рѕ҃і. Застꙋпи́ мѧ по словесѝ твоемꙋ̀, и҆ жи́въ бꙋ́дꙋ: и҆ не посрамѝ менѐ ѿ ча́ѧнїѧ моегѡ̀:

рз҃і. Помози́ ми, и҆ сп҃сꙋ́сѧ, и҆ поꙋчꙋ́сѧ во ѡ҆правда́нїихъ твои́хъ вы́нꙋ.

ри҃і. Оу҆ничижи́лъ є҆сѝ всѧ̑ ѿстꙋпа́ющыѧ ѿ ѡ҆правда́нїй твои́хъ: ꙗ҆́кѡ непра́ведно помышле́нїе и҆́хъ.

рѳ҃і. Престꙋпа́ющыѧ непщева́хъ всѧ̑ грѣ̑шныѧ землѝ: сегѡ̀ ра́ди возлюби́хъ свидѣ̑нїѧ твоѧ̑.

р҃к. Пригвоздѝ стра́хꙋ твоемꙋ̀ плѡ́ти моѧ̑: ѿ сꙋде́бъ бо твои́хъ ᲂу҆боѧ́хсѧ.

рк҃а. Сотвори́хъ сꙋ́дъ и҆ пра́вдꙋ: не преда́ждь менѐ ѡ҆би́дѧщымъ мѧ̀.

рк҃в. Воспрїимѝ раба̀ твоего̀ во бл҃го, да не ѡ҆клевета́ютъ менѐ го́рдїи.

рк҃г. Ѻ҆́чи моѝ и҆счезо́стѣ во сп҃се́нїе твоѐ и҆ въ сло́во пра́вды твоеѧ̀:

рк҃д. Сотворѝ съ рабо́мъ твои́мъ по млⷭ҇ти твое́й, и҆ ѡ҆правда́нїємъ твои̑мъ наꙋчи́ мѧ.

рк҃є. Ра́бъ тво́й є҆́смь а҆́зъ: вразꙋми́ мѧ, и҆ ᲂу҆вѣ́мъ свидѣ̑нїѧ твоѧ̑.

рк҃ѕ. Вре́мѧ сотвори́ти гдⷭ҇еви: разори́ша зако́нъ тво́й.

рк҃з. Сегѡ̀ ра́ди возлюби́хъ за́пѡвѣди твоѧ̑ па́че зла́та и҆ топа́зїа.

рк҃и. Сегѡ̀ ра́ди ко всѣ̑мъ за́повѣдемъ твои̑мъ направлѧ́хсѧ, всѧ́къ пꙋ́ть непра́вды возненави́дѣхъ.

рк҃ѳ. Ди̑вна свидѣ̑нїѧ твоѧ̑: сегѡ̀ ра́ди и҆спыта̀ ѧ҆̀ дꙋша̀ моѧ̀.

р҃л. Ꙗ҆вле́нїе слове́съ твои́хъ просвѣща́етъ и҆ вразꙋмлѧ́етъ младе́нцы.

рл҃а. Оу҆ста̀ моѧ̑ ѿверзо́хъ и҆ привлеко́хъ дꙋ́хъ, ꙗ҆́кѡ за́повѣдїй твои́хъ жела́хъ.

Сла́ва:

рл҃в. При́зри на мѧ̀ и҆ поми́лꙋй мѧ̀, по сꙋдꙋ̀ лю́бѧщихъ и҆́мѧ твоѐ.

рл҃г. Стѡпы̀ моѧ̑ напра́ви по словесѝ твоемꙋ̀, и҆ да не ѡ҆блада́етъ мно́ю всѧ́кое беззако́нїе:

рл҃д. И҆зба́ви мѧ̀ ѿ клеветы̀ человѣ́ческїѧ, и҆ сохраню̀ за́пѡвѣди твоѧ̑.

рл҃є. Лицѐ твоѐ просвѣтѝ на раба̀ твоего̀ и҆ наꙋчи́ мѧ ѡ҆правда́нїємъ твои̑мъ.

рл҃ѕ. И҆схѡ́дища водна̑ѧ и҆зведо́стѣ ѻ҆́чи моѝ, поне́же не сохрани́хъ зако́на твоегѡ̀.

рл҃з. Првⷣнъ є҆сѝ, гдⷭ҇и, и҆ пра́ви сꙋдѝ твоѝ:

рл҃и. Заповѣ́далъ є҆сѝ пра́вдꙋ свидѣ̑нїѧ твоѧ̑, и҆ и҆́стинꙋ ѕѣлѡ̀.

рл҃ѳ. И҆ста́ѧла мѧ̀ є҆́сть ре́вность твоѧ̀: ꙗ҆́кѡ забы́ша словеса̀ твоѧ̑ вразѝ моѝ.

р҃м. Разжже́но сло́во твоѐ ѕѣлѡ̀, и҆ ра́бъ тво́й возлюбѝ є҆̀.

рм҃а. Ю҆нѣ́йшїй а҆́зъ є҆́смь и҆ ᲂу҆ничиже́нъ: ѡ҆правда́нїй твои́хъ не забы́хъ.

рм҃в. Пра́вда твоѧ̀ пра́вда во вѣ́къ, и҆ зако́нъ тво́й и҆́стина.

рм҃г. Скѡ́рби и҆ нꙋ́жди ѡ҆брѣто́ша мѧ̀: за́пѡвѣди твоѧ̑ поꙋче́нїе моѐ.

рм҃д. Пра́вда свидѣ̑нїѧ твоѧ̑ въ вѣ́къ: вразꙋми́ мѧ, и҆ жи́въ бꙋ́дꙋ.

рм҃є. Воззва́хъ всѣ́мъ се́рдцемъ мои́мъ, ᲂу҆слы́ши мѧ̀, гдⷭ҇и: ѡ҆правда̑нїѧ твоѧ̑ взыщꙋ̀.

рм҃ѕ. Воззва́хъ тѝ, сп҃си́ мѧ, и҆ сохраню̀ свидѣ̑нїѧ твоѧ̑.

рм҃з. Предвари́хъ въ безго́дїи и҆ воззва́хъ: на словеса̀ твоѧ̑ ᲂу҆пова́хъ.

рм҃и. Предвари́стѣ ѻ҆́чи моѝ ко ᲂу҆́трꙋ, поꙋчи́тисѧ словесє́мъ твои̑мъ.

рм҃ѳ. Гла́съ мо́й ᲂу҆слы́ши, гдⷭ҇и, по млⷭ҇ти твое́й: по сꙋдьбѣ̀ твое́й живи́ мѧ.

р҃н. Прибли́жишасѧ гонѧ́щїи мѧ̀ беззако́нїемъ: ѿ зако́на же твоегѡ̀ ᲂу҆дали́шасѧ.

рн҃а. Бли́з̾ є҆сѝ ты̀, гдⷭ҇и, и҆ всѝ пꙋтїѐ твоѝ и҆́стина.

рн҃в. И҆спе́рва позна́хъ ѿ свидѣ́нїй твои́хъ, ꙗ҆́кѡ въ вѣ́къ ѡ҆снова́лъ ѧ҆̀ є҆сѝ.

рн҃г. Ви́ждь смире́нїе моѐ и҆ и҆зми́ мѧ: ꙗ҆́кѡ зако́на твоегѡ̀ не забы́хъ.

рн҃д. Сꙋдѝ сꙋ́дъ мо́й и҆ и҆зба́ви мѧ̀: словесѐ ра́ди твоегѡ̀ живи́ мѧ.

рн҃є. Дале́че ѿ грѣ̑шникъ сп҃се́нїе, ꙗ҆́кѡ ѡ҆правда́нїй твои́хъ не взыска́ша.

рн҃ѕ. Щедрѡ́ты твоѧ̑ мнѡ́ги, гдⷭ҇и: по сꙋдьбѣ̀ твое́й живи́ мѧ.

рн҃з. Мно́зи и҆згонѧ́щїи мѧ̀ и҆ стꙋжа́ющїи мѝ: ѿ свидѣ́нїй твои́хъ не ᲂу҆клони́хсѧ.

рн҃и. Ви́дѣхъ неразꙋмѣва́ющыѧ и҆ и҆ста́ѧхъ: ꙗ҆́кѡ слове́съ твои́хъ не сохрани́ша.

рн҃ѳ. Ви́ждь, ꙗ҆́кѡ за́пѡвѣди твоѧ̑ возлюби́хъ: гдⷭ҇и, по млⷭ҇ти твое́й живи́ мѧ.

р҃ѯ. Нача́ло слове́съ твои́хъ и҆́стина, и҆ во вѣ́къ всѧ̑ сꙋдьбы̑ пра́вды твоеѧ̀.

рѯ҃а. Кнѧ̑зи погна́ша мѧ̀ тꙋ́не: и҆ ѿ слове́съ твои́хъ ᲂу҆боѧ́сѧ се́рдце моѐ.

рѯ҃в. Возра́дꙋюсѧ а҆́зъ ѡ҆ словесѣ́хъ твои́хъ, ꙗ҆́кѡ ѡ҆брѣта́ѧй коры́сть мно́гꙋ.

рѯ҃г. Непра́вдꙋ возненави́дѣхъ и҆ ѡ҆мерзи́хъ: зако́нъ же тво́й возлюби́хъ.

рѯ҃д. Седмери́цею дне́мъ хвали́хъ тѧ̀ ѡ҆ сꙋдьба́хъ пра́вды твоеѧ̀.

рѯ҃є. Ми́ръ мно́гъ лю́бѧщымъ зако́нъ тво́й, и҆ нѣ́сть и҆̀мъ собла́зна.

рѯ҃ѕ. Ча́ѧхъ сп҃се́нїѧ твоегѡ̀, гдⷭ҇и, и҆ за́пѡвѣди твоѧ̑ возлюби́хъ.

рѯ҃з. Сохранѝ дꙋша̀ моѧ̀ свидѣ̑нїѧ твоѧ̑ и҆ возлюбѝ ѧ҆̀ ѕѣлѡ̀.

рѯ҃и. Сохрани́хъ за́пѡвѣди твоѧ̑ и҆ свидѣ̑нїѧ твоѧ̑, ꙗ҆́кѡ всѝ пꙋтїѐ моѝ пред̾ тобо́ю, гдⷭ҇и.

рѯ҃ѳ. Да прибли́житсѧ моле́нїе моѐ пред̾ тѧ̀, гдⷭ҇и: по словесѝ твоемꙋ̀ вразꙋми́ мѧ.

р҃ѻ. Да вни́детъ проше́нїе моѐ пред̾ тѧ̀: гдⷭ҇и, по словесѝ твоемꙋ̀ и҆зба́ви мѧ̀.

рѻ҃а. Ѿры́гнꙋтъ ᲂу҆стнѣ̀ моѝ пѣ́нїе, є҆гда̀ наꙋчи́ши мѧ̀ ѡ҆правда́нїємъ твои̑мъ.

рѻ҃в. Провѣща́етъ ѧ҆зы́къ мо́й словеса̀ твоѧ̑, ꙗ҆́кѡ всѧ̑ за́пѡвѣди твоѧ̑ пра́вда.

рѻ҃г. Да бꙋ́детъ рꙋка̀ твоѧ̀ є҆́же сп҃сти́ мѧ, ꙗ҆́кѡ за́пѡвѣди твоѧ̑ и҆зво́лихъ.

рѻ҃д. Возжела́хъ сп҃се́нїе твоѐ, гдⷭ҇и, и҆ зако́нъ тво́й поꙋче́нїе моѐ є҆́сть.

рѻ҃є. Жива̀ бꙋ́детъ дꙋша̀ моѧ̀ и҆ восхва́литъ тѧ̀: и҆ сꙋдьбы̑ твоѧ̑ помо́гꙋтъ мнѣ̀.

рѻ҃ѕ. Заблꙋди́хъ ꙗ҆́кѡ ѻ҆вча̀ поги́бшее: взыщѝ раба̀ твоего̀, ꙗ҆́кѡ за́повѣдїй твои́хъ не забы́хъ.

Сла́ва:

По з҃і-й каѳі́смѣ, трист҃о́е.

Та́же тропарѝ, гла́съ в҃:

Согрѣши́хъ къ тебѣ̀ сп҃се, ꙗ҆́кѡ блꙋ́дный сы́нъ, прїими́ мѧ ѻ҆́ч҃е ка́ющагосѧ, и҆ поми́лꙋй мѧ̀ бж҃е.

Сла́ва: Зовꙋ̀ къ тебѣ̀ хрⷭ҇тѐ сп҃се, мытаре́вымъ гла́сомъ: ѡ҆чи́сти мѧ̀ ꙗ҆́коже ѻ҆́наго, и҆ поми́лꙋй мѧ̀ бж҃е.

И҆ ны́нѣ: Бцⷣе, не пре́зри мѧ̀, тре́бꙋюща застꙋпле́нїѧ твоегѡ̀: на тѧ́ бо ᲂу҆пова̀ дꙋша̀ моѧ̀, поми́лꙋй мѧ̀.

Гдⷭ҇и поми́лꙋй, м҃. и҆ мл҃тва:

Влⷣко гдⷭ҇и вседержи́телю и҆ тво́рче всѣ́хъ, щедро́тъ ѻ҆ц҃ъ, и҆ млⷭ҇ти бг҃ъ, ѿ землѝ созда́вый человѣ́ка, и҆ показа́вый є҆го̀ по ѡ҆́бразꙋ твоемꙋ̀ и҆ по подо́бїю, да и҆ тѣ́мъ просла́витсѧ великолѣ́пое и҆́мѧ твоѐ на землѝ, и҆ и҆сто́ргнена ᲂу҆́бѡ престꙋпле́нїемъ твои́хъ за́повѣдей, па́ки на лꙋ́чшее возсозда́вый є҆го̀ во хрⷭ҇тѣ̀ твое́мъ, и҆ возведы́й на нб҃са̀: бл҃годарю́ тѧ, ꙗ҆́кѡ ᲂу҆мно́жилъ є҆сѝ на мнѣ̀ вели́чїе твоѐ, и҆ не пре́далъ мѧ̀ є҆сѝ врагѡ́мъ мои̑мъ въ коне́цъ, и҆сто́ргнꙋти мѧ̀ и҆́щꙋщымъ въ про́пасть а҆́довꙋ: нижѐ ѡ҆ста́вилъ мѧ̀ є҆сѝ поги́бнꙋти со беззако́ньми мои́ми. ны́нѣ ᲂу҆́бѡ, многомлⷭ҇тиве и҆ любобл҃же гдⷭ҇и, не хотѧ́й сме́рти грѣ́шнагѡ, но ѡ҆браще́нїѧ ѡ҆жида́ѧй, и҆ прїе́млѧй, и҆́же низве́ржєнныѧ и҆справлѧ́ѧй, сокрꙋшє́нныѧ и҆сцѣлѧ́ѧй, ѡ҆братѝ и҆ менѐ къ покаѧ́нїю, и҆ низве́рженнаго и҆спра́ви, и҆ сокрꙋше́ннаго и҆сцѣлѝ: помѧнѝ твоѧ̑ щедрѡ́ты, и҆ є҆́же ѿ вѣ́ка твою̀ непостижи́мꙋю бл҃гость, и҆ моѧ̑ безмѣ̑рнаѧ забꙋ́ди беззакѡ́нїѧ, ꙗ҆̀же дѣ́ломъ и҆ сло́вомъ и҆ мы́слїю соверши́хъ, разрѣшѝ ѡ҆слѣпле́нїе се́рдца моегѡ̀, и҆ да́ждь мѝ сле́зы ᲂу҆миле́нїѧ на ѡ҆чище́нїе скве́рны мы́сли моеѧ̀. ᲂу҆слы́ши гдⷭ҇и, вонмѝ чл҃вѣколю́бче, ѡ҆чи́сти бл҃гоꙋтро́бне, и҆ ѿ мꙋчи́тельства во мнѣ̀ ца́рствꙋющихъ страсте́й, ѻ҆каѧ́ннꙋю мою̀ дꙋ́шꙋ свободѝ: и҆ не ктомꙋ̀ да содержи́тъ мѧ̀ грѣ́хъ, нижѐ да возмо́жетъ на мѧ̀ бори́тель де́мѡнъ, нижѐ къ своемꙋ̀ хотѣ́нїю да веде́тъ мѧ̀, но держа́вною твое́ю рꙋко́ю, є҆гѡ̀ влады́чества и҆схи́тивый мѧ̀, ты̀ црⷭ҇твꙋй во мнѣ̀, бл҃гі́й и҆ чл҃вѣколюби́вый гдⷭ҇и, и҆ всего̀ твоего̀ бы́ти, и҆ жи́ти мнѣ̀ про́чее по твое́й бл҃говолѝ во́ли. и҆ пода́ждь мѝ неизрече́нною бл҃гостїю, се́рдца ѡ҆чище́нїе, ᲂу҆́стъ хране́нїе, правотꙋ̀ дѣѧ́нїй, мꙋдрова́нїе смире́нное, ми́ръ помыслѡ́въ, тишинꙋ̀ дꙋше́вныхъ мои́хъ си́лъ, ра́дость дꙋхо́внꙋю, любо́вь и҆́стиннꙋю, долготерпѣ́нїе, бл҃гость, кро́тость, вѣ́рꙋ нелицемѣ́рнꙋ, воздержа́нїе ѡ҆бдержа́тельное, и҆ всѣ́хъ мѧ̀ бл҃ги́хъ плодѡ́въ и҆спо́лни, дарова́нїемъ ст҃а́гѡ твоегѡ̀ дх҃а. и҆ не возведѝ менѐ въ преполове́нїе дні́й мои́хъ, нижѐ неиспра́вленꙋ и҆ негото́вꙋ дꙋ́шꙋ мою̀ восхи́тиши: но соверши́ мѧ твои́мъ соверше́нствомъ, и҆ та́кѡ мѧ̀ настоѧ́щагѡ житїѧ̀ и҆зведѝ, ꙗ҆́кѡ да невозбра́ннѡ проше́дъ нача̑ла и҆ вла̑сти тьмы̀, твое́ю бл҃года́тїю ᲂу҆зрю̀ и҆ а҆́зъ непристꙋ́пныѧ твоеѧ̀ сла́вы добро́тꙋ неизрече́ннꙋю, со всѣ́ми ст҃ы́ми твои́ми: въ ни́хже ѡ҆ст҃и́сѧ, и҆ просла́висѧ всечⷭ҇тно́е и҆ великолѣ́пое и҆́мѧ твоѐ, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Пѣ́снь степе́ней, рѳ҃і.

а҃. Ко гдⷭ҇ꙋ, внегда̀ скорбѣ́ти мѝ, воззва́хъ, и҆ ᲂу҆слы́ша мѧ̀.

в҃. Гдⷭ҇и, и҆зба́ви дꙋ́шꙋ мою̀ ѿ ᲂу҆сте́нъ непра́ведныхъ и҆ ѿ ѧ҆зы́ка льсти́ва.

г҃. Что̀ да́стсѧ тебѣ̀, и҆лѝ что̀ приложи́тсѧ тебѣ̀ къ ѧ҆зы́кꙋ льсти́вꙋ;

д҃. Стрѣ́лы си́льнагѡ и҆з̾ѡщрє́ны, со ᲂу҆́гльми пꙋсты́нными.

є҃. Оу҆вы̀ мнѣ̀, ꙗ҆́кѡ прише́льствїе моѐ продолжи́сѧ, всели́хсѧ съ селє́нїи кида́рскими:

ѕ҃. Мно́гѡ прише́льствова дꙋша̀ моѧ̀: съ ненави́дѧщими ми́ра бѣ́хъ ми́ренъ:

з҃. Є҆гда̀ глаго́лахъ и҆̀мъ, борѧ́хꙋ мѧ̀ тꙋ́не.

Пѣ́снь степе́ней, р҃к.

а҃. Возведо́хъ ѻ҆́чи моѝ въ го́ры, ѿню́дꙋже прїи́детъ по́мощь моѧ̀.

в҃. По́мощь моѧ̀ ѿ гдⷭ҇а, сотво́ршагѡ не́бо и҆ зе́млю.

г҃. Не да́ждь во смѧте́нїе ногѝ твоеѧ̀, нижѐ воздре́млетъ хранѧ́й тѧ̀:

д҃. Сѐ, не воздре́млетъ, нижѐ ᲂу҆́снетъ хранѧ́й і҆и҃лѧ.

є҃. Гдⷭ҇ь сохрани́тъ тѧ̀, гдⷭ҇ь покро́въ тво́й на рꙋ́кꙋ деснꙋ́ю твою̀.

ѕ҃. Во днѝ со́лнце не ѡ҆жже́тъ тебѐ, нижѐ лꙋна̀ но́щїю.

з҃. Гдⷭ҇ь сохрани́тъ тѧ̀ ѿ всѧ́кагѡ ѕла̀, сохрани́тъ дꙋ́шꙋ твою̀ гдⷭ҇ь:

и҃. Гдⷭ҇ь сохрани́тъ вхожде́нїе твоѐ и҆ и҆схожде́нїе твоѐ, ѿ ны́нѣ и҆ до вѣ́ка.

Пѣ́снь степе́ней, рк҃а.

а҃. Возвесели́хсѧ ѡ҆ ре́кшихъ мнѣ̀: въ до́мъ гдⷭ҇ень по́йдемъ.

в҃. Стоѧ́ще бѧ́хꙋ но́ги на́шѧ во дво́рѣхъ твои́хъ, і҆ерⷭ҇ли́ме.

г҃. І҆ерⷭ҇ли́мъ зи́ждемый ꙗ҆́кѡ гра́дъ, є҆мꙋ́же прича́стїе є҆гѡ̀ вкꙋ́пѣ.

д҃. Та́мѡ бо взыдо́ша кѡлѣ́на, кѡлѣ́на гдⷭ҇нѧ, свидѣ́нїе і҆и҃лево, и҆сповѣ́датисѧ и҆́мени гдⷭ҇ню:

є҃. Ꙗ҆́кѡ та́мѡ сѣдо́ша престо́ли на сꙋ́дъ, престо́ли въ домꙋ̀ дв҃довѣ.

ѕ҃. Вопроси́те же ꙗ҆̀же ѡ҆ ми́рѣ і҆ерⷭ҇ли́ма: и҆ ѻ҆би́лїе лю́бѧщымъ тѧ̀.

з҃. Бꙋ́ди же ми́ръ въ си́лѣ твое́й, и҆ ѻ҆би́лїе въ столпостѣна́хъ твои́хъ.

и҃. Ра́ди бра́тїй мои́хъ и҆ бли́жнихъ мои́хъ глаго́лахъ ᲂу҆́бѡ ми́ръ ѡ҆ тебѣ̀.

ѳ҃. До́мꙋ ра́ди гдⷭ҇а бг҃а на́шегѡ взыска́хъ бл҃га̑ѧ тебѣ̀.

Пѣ́снь степе́ней, рк҃в.

а҃. Къ тебѣ̀ возведо́хъ ѻ҆́чи моѝ, живꙋ́щемꙋ на нб҃сѝ.

в҃. Сѐ, ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀: та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.

г҃. Поми́лꙋй на́съ, гдⷭ҇и, поми́лꙋй на́съ, ꙗ҆́кѡ помно́гꙋ и҆спо́лнихомсѧ ᲂу҆ничиже́нїѧ:

д҃. Наипа́че напо́лнисѧ дꙋша̀ на́ша поноше́нїѧ гобзꙋ́ющихъ и҆ ᲂу҆ничиже́нїѧ го́рдыхъ.

Пѣ́снь степе́ней, рк҃г.

а҃. Ꙗ҆́кѡ а҆́ще не гдⷭ҇ь бы бы́лъ въ на́съ, да рече́тъ ᲂу҆́бѡ і҆и҃ль:

в҃. Ꙗ҆́кѡ а҆́ще не гдⷭ҇ь бы бы́лъ въ на́съ, внегда̀ воста́ти человѣ́кѡмъ на ны̀, ᲂу҆̀бо живы́хъ поже́рли бы́ша на́съ:

г҃. Внегда̀ прогнѣ́ватисѧ ꙗ҆́рости и҆́хъ на ны̀, ᲂу҆̀бо вода̀ потопи́ла бы на́съ.

д҃. Пото́къ пре́йде дꙋша̀ на́ша:

є҃. Оу҆̀бо пре́йде дꙋша̀ на́ша во́дꙋ непостоѧ́ннꙋю.

ѕ҃. Бл҃гослове́нъ гдⷭ҇ь, и҆́же не дадѐ на́съ въ лови́твꙋ зꙋбѡ́мъ и҆́хъ.

з҃. Дꙋша̀ на́ша ꙗ҆́кѡ пти́ца и҆зба́висѧ ѿ сѣ́ти ловѧ́щихъ: сѣ́ть сокрꙋши́сѧ, и҆ мы̀ и҆зба́влени бы́хомъ.

и҃. По́мощь на́ша во и҆́мѧ гдⷭ҇а, сотво́ршагѡ не́бо и҆ зе́млю.

Сла́ва:

Пѣ́снь степе́ней, рк҃д.

а҃. Надѣ́ющїисѧ на гдⷭ҇а, ꙗ҆́кѡ гора̀ сїѡ́нъ: не подви́житсѧ въ вѣ́къ живы́й во і҆ерⷭ҇ли́мѣ.

в҃. Го́ры ѡ҆́крестъ є҆гѡ̀, и҆ гдⷭ҇ь ѡ҆́крестъ люде́й свои́хъ, ѿ ны́нѣ и҆ до вѣ́ка.

г҃. Ꙗ҆́кѡ не ѡ҆ста́витъ гдⷭ҇ь жезла̀ грѣ́шныхъ на жре́бїй првⷣныхъ, ꙗ҆́кѡ да не про́стрꙋтъ првⷣнїи въ беззакѡ́нїѧ рꙋ́къ свои́хъ.

д҃. Оу҆бл҃жѝ, гдⷭ҇и, бл҃гі̑ѧ и҆ пра̑выѧ срⷣцемъ.

є҃. Оу҆клонѧ́ющыѧсѧ же въ развращє́нїѧ ѿведе́тъ гдⷭ҇ь съ дѣ́лающими беззако́нїе: ми́ръ на і҆и҃лѧ.

Пѣ́снь степе́ней, рк҃є.

а҃. Внегда̀ возврати́ти гдⷭ҇ꙋ плѣ́нъ сїѡ́нь, бы́хомъ ꙗ҆́кѡ ᲂу҆тѣ́шени.

в҃. Тогда̀ и҆спо́лнишасѧ ра́дости ᲂу҆ста̀ на̑ша, и҆ ѧ҆зы́къ на́шъ весе́лїѧ: тогда̀ рекꙋ́тъ во ꙗ҆зы́цѣхъ: возвели́чилъ є҆́сть гдⷭ҇ь сотвори́ти съ ни́ми.

г҃. Возвели́чилъ є҆́сть гдⷭ҇ь сотвори́ти съ на́ми: бы́хомъ веселѧ́щесѧ.

д҃. Возвратѝ, гдⷭ҇и, плѣне́нїе на́ше, ꙗ҆́кѡ пото́ки ю҆́гомъ.

є҃. Сѣ́ющїи слеза́ми, ра́достїю по́жнꙋтъ.

ѕ҃. Ходѧ́щїи хожда́хꙋ и҆ пла́кахꙋсѧ, мета́юще сѣ́мена своѧ̑: грѧдꙋ́ще же прїи́дꙋтъ ра́достїю, взе́млюще рꙋкоѧ̑ти своѧ̑.

Пѣ́снь степе́ней, рк҃ѕ.

а҃. А҆́ще не гдⷭ҇ь сози́ждетъ до́мъ, всꙋ́е трꙋди́шасѧ зи́ждꙋщїи: а҆́ще не гдⷭ҇ь сохрани́тъ гра́дъ, всꙋ́е бдѣ̀ стрегі́й.

в҃. Всꙋ́е ва́мъ є҆́сть ᲂу҆́треневати: воста́нете по сѣдѣ́нїи ꙗ҆дꙋ́щїи хлѣ́бъ болѣ́зни, є҆гда̀ да́стъ возлю́блєннымъ свои̑мъ со́нъ.

г҃. Сѐ, достоѧ́нїе гдⷭ҇не сы́нове, мзда̀ плода̀ чре́внѧгѡ.

д҃. Ꙗ҆́кѡ стрѣ́лы въ рꙋцѣ̀ си́льнагѡ, та́кѡ сы́нове ѿтрѧсе́нныхъ.

є҃. Бл҃же́нъ, и҆́же и҆спо́лнитъ жела́нїе своѐ ѿ ни́хъ: не постыдѧ́тсѧ, є҆гда̀ глаго́лютъ врагѡ́мъ свои̑мъ во вратѣ́хъ.

Пѣ́снь степе́ней, рк҃з.

а҃. Бл҃же́ни всѝ боѧ́щїисѧ гдⷭ҇а, ходѧ́щїи въ пꙋте́хъ є҆гѡ̀:

в҃. Трꙋды̀ ꙾плодѡ́въ꙾ ⁵² твои́хъ снѣ́си: бл҃же́нъ є҆сѝ, и҆ добро̀ тебѣ̀ бꙋ́детъ.

г҃. Жена̀ твоѧ̀ ꙗ҆́кѡ лоза̀ плодови́та въ страна́хъ до́мꙋ твоегѡ̀:

д҃. Сы́нове твоѝ ꙗ҆́кѡ новосаждє́нїѧ ма̑сличнаѧ ѡ҆́крестъ трапе́зы твоеѧ̀.

є҃. Сѐ, та́кѡ бл҃гослови́тсѧ человѣ́къ боѧ́йсѧ гдⷭ҇а.

ѕ҃. Бл҃гослови́тъ тѧ̀ гдⷭ҇ь ѿ сїѡ́на, и҆ ᲂу҆́зриши бл҃га̑ѧ і҆ерⷭ҇ли́ма всѧ̑ дни̑ живота̀ твоегѡ̀,

з҃. И҆ ᲂу҆́зриши сы́ны сынѡ́въ твои́хъ: ми́ръ на і҆и҃лѧ.

Пѣ́снь степе́ней рк҃и.

а҃. Мно́жицею бра́шасѧ со мно́ю ѿ ю҆́ности моеѧ̀, да рече́тъ ᲂу҆́бѡ і҆и҃ль:

в҃. Мно́жицею бра́шасѧ со мно́ю ѿ ю҆́ности моеѧ̀, и҆́бо не премого́ша мѧ̀.

г҃. На хребтѣ̀ мое́мъ дѣ́лаша грѣ̑шницы, продолжи́ша беззако́нїе своѐ.

д҃. Гдⷭ҇ь првⷣнъ ссѣчѐ вы̑ѧ грѣ́шникѡвъ.

є҃. Да постыдѧ́тсѧ и҆ возвратѧ́тсѧ вспѧ́ть всѝ ненави́дѧщїи сїѡ́на:

ѕ҃. Да бꙋ́дꙋтъ ꙗ҆́кѡ трава̀ ꙾на здѣ́хъ꙾ ⁵³, ꙗ҆́же пре́жде восторже́нїѧ и҆́зсше:

з҃. Є҆́юже не и҆спо́лни рꙋкѝ своеѧ̀ жнѧ́й, и҆ нѣ́дра своегѡ̀ рꙋкоѧ̑ти собира́ѧй:

и҃. И҆ не рѣ́ша мимоходѧ́щїи: бл҃гослове́нїе гдⷭ҇не на вы̀, бл҃гослови́хомъ вы̀ во и҆́мѧ гдⷭ҇не.

Сла́ва:

Пѣ́снь степе́ней, рк҃ѳ.

а҃. И҆з̾ глꙋбины̀ воззва́хъ къ тебѣ̀, гдⷭ҇и: гдⷭ҇и, ᲂу҆слы́ши гла́съ мо́й.

в҃. Да бꙋ́дꙋтъ ᲂу҆́ши твоѝ вне́млющѣ гла́сꙋ моле́нїѧ моегѡ̀.

г҃. А҆́ще беззакѡ́нїѧ на́зриши, гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебє̀ ѡ҆чище́нїе є҆́сть.

д҃. И҆́мене ра́ди твоегѡ̀ потерпѣ́хъ тѧ̀, гдⷭ҇и, потерпѣ̀ дꙋша̀ моѧ̀ въ сло́во твоѐ: ᲂу҆пова̀ дꙋша̀ моѧ̀ на гдⷭ҇а.

є҃. Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ да ᲂу҆пова́етъ і҆и҃ль на гдⷭ҇а:

ѕ҃. Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе: и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.

Пѣ́снь степе́ней, р҃л.

а҃. Гдⷭ҇и, не вознесе́сѧ се́рдце моѐ, нижѐ вознесо́стѣсѧ ѻ҆́чи моѝ: нижѐ ходи́хъ въ вели́кихъ, нижѐ въ ди́вныхъ па́че менѐ.

в҃. А҆́ще не смиреномꙋ́дрствовахъ, но вознесо́хъ дꙋ́шꙋ мою̀, ꙗ҆́кѡ ѿдое́ное на ма́терь свою̀, та́кѡ возда́си на дꙋ́шꙋ мою̀.

г҃. Да ᲂу҆пова́етъ і҆и҃ль на гдⷭ҇а ѿ ны́нѣ и҆ до вѣ́ка.

Пѣ́снь степе́ней, рл҃а.

а҃. Помѧнѝ, гдⷭ҇и, дв҃да и҆ всю̀ кро́тость є҆гѡ̀:

в҃. Ꙗ҆́кѡ клѧ́тсѧ гдⷭ҇еви, ѡ҆бѣща́сѧ бг҃ꙋ і҆а́кѡвлю:

г҃. А҆́ще вни́дꙋ въ селе́нїе до́мꙋ моегѡ̀, и҆лѝ взы́дꙋ на ѻ҆́дръ посте́ли моеѧ̀:

д҃. А҆́ще да́мъ со́нъ ѻ҆чи́ма мои́ма, и҆ вѣ́ждома мои́ма дрема́нїе, и҆ поко́й скранїа́ма мои́ма:

є҃. До́ндеже ѡ҆брѧ́щꙋ мѣ́сто гдⷭ҇еви, селе́нїе бг҃ꙋ і҆а́кѡвлю.

ѕ҃. Сѐ, слы́шахомъ ѧ҆̀ во є҆ѵфра́ѳѣ, ѡ҆брѣто́хомъ ѧ҆̀ въ полѧ́хъ дꙋбра́вы:

з҃. Вни́демъ въ селє́нїѧ є҆гѡ̀, поклони́мсѧ на мѣ́сто, и҆дѣ́же стоѧ́стѣ но́зѣ є҆гѡ̀.

и҃. Воскрⷭ҇нѝ, гдⷭ҇и, въ поко́й тво́й, ты̀ и҆ кївѡ́тъ ст҃ы́ни твоеѧ̀.

ѳ҃. Сщ҃е́нницы твоѝ ѡ҆блекꙋ́тсѧ пра́вдою, и҆ прпⷣбнїи твоѝ возра́дꙋютсѧ.

і҃. Дв҃да ра́ди раба̀ твоегѡ̀, не ѿвратѝ лицѐ пома́заннагѡ твоегѡ̀.

а҃і. Клѧ́тсѧ гдⷭ҇ь дв҃дꙋ и҆́стиною, и҆ не ѿве́ржетсѧ є҆ѧ̀: ѿ плода̀ чре́ва твоегѡ̀ посаждꙋ̀ на престо́лѣ твое́мъ.

в҃і. А҆́ще сохранѧ́тъ сы́нове твоѝ завѣ́тъ мо́й и҆ свидѣ̑нїѧ моѧ̑ сїѧ̑, и҆̀мже наꙋчꙋ̀ ѧ҆̀, и҆ сы́нове и҆́хъ до вѣ́ка сѧ́дꙋтъ на престо́лѣ твое́мъ.

г҃і. Ꙗ҆́кѡ и҆збра̀ гдⷭ҇ь сїѡ́на, и҆зво́ли и҆̀ въ жили́ще себѣ̀.

д҃і. Се́й поко́й мо́й во вѣ́къ вѣ́ка, здѣ̀ вселю́сѧ, ꙗ҆́кѡ и҆зво́лихъ и҆̀.

є҃і. Лови́твꙋ є҆гѡ̀ бл҃гословлѧ́ѧй бл҃гословлю̀, ни́щыѧ є҆гѡ̀ насы́щꙋ хлѣ́бы:

ѕ҃і. Сщ҃е́нники є҆гѡ̀ ѡ҆блекꙋ̀ во сп҃се́нїе, и҆ прпⷣбнїи є҆гѡ̀ ра́достїю возра́дꙋютсѧ.

з҃і. Та́мѡ возращꙋ̀ ро́гъ дв҃дови, ᲂу҆гото́вахъ свѣти́льникъ пома́занномꙋ моемꙋ̀.

и҃і. Врагѝ є҆гѡ̀ ѡ҆блекꙋ̀ стꙋдо́мъ, на не́мъ же процвѣте́тъ ст҃ы́нѧ моѧ̀.

Пѣ́снь степе́ней, рл҃в.

а҃. Сѐ, что̀ добро̀, и҆лѝ что̀ красно̀, но є҆́же жи́ти бра́тїи вкꙋ́пѣ;

в҃. Ꙗ҆́кѡ мѵ́ро на главѣ̀, сходѧ́щее на брадꙋ̀, брадꙋ̀ а҆арѡ́ню, сходѧ́щее на ѻ҆ме́ты ѻ҆де́жды є҆гѡ̀:

г҃. Ꙗ҆́кѡ роса̀ а҆ермѡ́нскаѧ сходѧ́щаѧ на го́ры сїѡ̑нскїѧ: ꙗ҆́кѡ та́мѡ заповѣ́да гдⷭ҇ь бл҃гослове́нїе и҆ живо́тъ до вѣ́ка.

Пѣ́снь степе́ней, рл҃г.

а҃. Сѐ, ны́нѣ бл҃гослови́те гдⷭ҇а, всѝ рабѝ гдⷭ҇ни, стоѧ́щїи въ хра́мѣ гдⷭ҇ни, во дво́рѣхъ до́мꙋ бг҃а на́шегѡ.

в҃. Въ но́щехъ воздѣжи́те рꙋ́ки ва́шѧ во ст҃а̑ѧ и҆ бл҃гослови́те гдⷭ҇а.

г҃. Бл҃гослови́тъ тѧ̀ гдⷭ҇ь ѿ сїѡ́на, сотвори́вый не́бо и҆ зе́млю.

Сла́ва:

По и҃і-й каѳі́смѣ, трист҃о́е.

Та́же тропарѝ, гла́съ в҃:

Пре́жде да́же не ѡ҆сꙋ́диши мѧ̀, гдⷭ҇и мо́й гдⷭ҇и, да́ждь мѝ ѡ҆браще́нїе, и҆ и҆справле́нїе мно́гихъ мои́хъ грѣхѡ́въ: да́ждь мѝ ᲂу҆миле́нїе дꙋхо́вное, ꙗ҆́кѡ да возопїю̀ къ тебѣ̀: бл҃гоꙋтро́бне, чл҃вѣколю́бче бж҃е мо́й, сп҃си́ мѧ.

Сла́ва: Несмы́слєннымъ скотѡ́мъ ᲂу҆подо́бивыйсѧ а҆́зъ блꙋ́дный, приложи́хсѧ и҆̀мъ: ѡ҆браще́нїе мѝ да́рꙋй хрⷭ҇тѐ, ꙗ҆́кѡ да прїимꙋ̀ ᲂу҆ тебѐ ве́лїю млⷭ҇ть.

И҆ ны́нѣ: Не ѿвратѝ влⷣчце, лица̀ твоегѡ̀ ѿ менѐ молѧ́щагѡсѧ тебѣ̀: но ꙗ҆́кѡ бл҃гоꙋтро́бнаѧ мт҃и ще́драгѡ бг҃а, потщи́сѧ пре́жде конца̀ ѡ҆браще́нїе мнѣ̀ дарова́ти, ꙗ҆́кѡ да спа́ссѧ тобо́ю, воспою́ тѧ ꙗ҆́кѡ сп҃се́нїе и҆ ᲂу҆пова́нїе моѐ непосра́мленное гпⷭ҇жѐ моѧ̀.

Гдⷭ҇и поми́лꙋй, м҃. и҆ мл҃тва:

Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши мѧ̀. влⷣко гдⷭ҇и і҆и҃се хрⷭ҇тѐ, сн҃е бг҃а жива́гѡ, поми́лꙋй мѧ̀ грѣ́шнаго, ни́щаго, ѡ҆бнаже́ннаго, лѣни́ваго, неради́ваго, прекосло́внаго, ѻ҆каѧ́ннаго, блꙋдника̀, прелюбодѣ́ѧ, малакі́ѧ, мꙋжело́жника, скве́рнаго, блꙋ́днаго, неблагода́рнаго, неми́лостиваго, жесто́каго, пїѧ́ницꙋ, сожже́ннаго со́вѣстїю, безли́чнаго, бездерзнове́ннаго, без̾ѿвѣ́тнаго, недосто́йнаго твоегѡ̀ чл҃вѣколю́бїѧ, и҆ досто́йна всѧ́кагѡ мꙋче́нїѧ, и҆ гее́нны, и҆ мꙋ́ки: и҆ не ра́ди мно́жества толи́кихъ мои́хъ согрѣше́нїй, мно́жествꙋ подложи́ши, и҆зба́вителю, мꙋ́къ, но поми́лꙋй мѧ̀, ꙗ҆́кѡ не́мощенъ є҆́смь, и҆ дꙋше́ю и҆ пло́тїю, и҆ ра́зꙋмомъ и҆ помышле́нїемъ: и҆ и҆́миже вѣ́си сꙋдьба́ми, сп҃си́ мѧ недосто́йнаго раба̀ твоего̀, мл҃твами пречⷭ҇тыѧ влⷣчцы на́шеѧ бцⷣы, и҆ всѣ́хъ ст҃ы́хъ, ѿ вѣ́ка тебѣ̀ бл҃гоꙋго́ждшихъ: ꙗ҆́кѡ бл҃гослове́нъ є҆сѝ во вѣ́ки вѣкѡ́въ, а҆ми́нь.

А҆ллилꙋ́їа, рл҃д.

а҃. Хвали́те и҆́мѧ гдⷭ҇не, хвали́те, рабѝ гдⷭ҇а,

в҃. Стоѧ́щїи во хра́мѣ гдⷭ҇ни, во дво́рѣхъ до́мꙋ бг҃а на́шегѡ.

г҃. Хвали́те гдⷭ҇а, ꙗ҆́кѡ бла́гъ гдⷭ҇ь: по́йте и҆́мени є҆гѡ̀, ꙗ҆́кѡ добро̀:

д҃. Ꙗ҆́кѡ і҆а́кѡва и҆збра̀ себѣ̀ гдⷭ҇ь, і҆и҃лѧ въ достоѧ́нїе себѣ̀:

є҃. Ꙗ҆́кѡ а҆́зъ позна́хъ, ꙗ҆́кѡ ве́лїй гдⷭ҇ь, и҆ гдⷭ҇ь на́шъ над̾ всѣ́ми бо́ги:

ѕ҃. Всѧ̑, є҆ли̑ка восхотѣ̀ гдⷭ҇ь, сотворѝ на нб҃сѝ и҆ на землѝ, въ морѧ́хъ и҆ во всѣ́хъ бе́зднахъ.

з҃. Возводѧ̀ ѻ҆́блаки ѿ послѣ́днихъ землѝ, мѡ́лнїи въ до́ждь сотворѝ, и҆зводѧ́й вѣ́тры ѿ сокро́вищъ свои́хъ.

и҃. И҆́же поразѝ пе́рвенцы є҆гѵ́пєтскїѧ ѿ человѣ́ка до скота̀:

ѳ҃. Посла̀ зна́мєнїѧ и҆ чꙋдеса̀ посредѣ̀ тебє̀, є҆гѵ́пте, на фараѡ́на и҆ на всѧ̑ рабы̑ є҆гѡ̀.

і҃. И҆́же поразѝ ꙗ҆зы́ки мнѡ́ги и҆ и҆збѝ царѝ крѣ́пки:

а҃і. Сиѡ́на царѧ̀ а҆морре́йска и҆ ѡ҆́га царѧ̀ васа́нска, и҆ всѧ̑ ца̑рствїѧ ханаа̑нска:

в҃і. И҆ дадѐ зе́млю и҆́хъ достоѧ́нїе, достоѧ́нїе і҆и҃лю лю́демъ свои̑мъ.

г҃і. Гдⷭ҇и, и҆́мѧ твоѐ въ вѣ́къ, и҆ па́мѧть твоѧ̀ въ ро́дъ и҆ ро́дъ:

д҃і. Ꙗ҆́кѡ сꙋди́ти и҆́мать гдⷭ҇ь лю́демъ свои̑мъ, и҆ ѡ҆ рабѣ́хъ свои́хъ ᲂу҆мо́литсѧ.

є҃і. І҆́дѡли ꙗ҆зы̑къ сребро̀ и҆ зла́то, дѣла̀ рꙋ́къ человѣ́ческихъ:

ѕ҃і. Оу҆ста̀ и҆́мꙋтъ, и҆ не возглаго́лютъ: ѻ҆́чи и҆́мꙋтъ, и҆ не ᲂу҆́зрѧтъ:

з҃і. Оу҆́ши и҆́мꙋтъ, и҆ не ᲂу҆слы́шатъ: ниже́ бо є҆́сть дꙋ́хъ во ᲂу҆стѣ́хъ и҆́хъ.

и҃і. Подо́бни и҆̀мъ да бꙋ́дꙋтъ творѧ́щїи ѧ҆̀ и҆ всѝ надѣ́ющїисѧ на нѧ̀.

ѳ҃і. До́ме і҆и҃левъ, бл҃гослови́те гдⷭ҇а: до́ме а҆арѡ́нь, бл҃гослови́те гдⷭ҇а: до́ме леѵі́инъ, бл҃гослови́те гдⷭ҇а:

к҃. Боѧ́щїисѧ гдⷭ҇а, бл҃гослови́те гдⷭ҇а.

к҃а. Бл҃гослове́нъ гдⷭ҇ь ѿ сїѡ́на, живы́й во і҆ерⷭ҇ли́мѣ.

А҆ллилꙋ́їа, рл҃є.

а҃. И҆сповѣ́дайтесѧ гдⷭ҇еви, ꙗ҆́кѡ бл҃гъ: ꙗ҆́кѡ въ вѣ́къ млⷭ҇ть є҆гѡ̀.

в҃. И҆сповѣ́дайтесѧ бг҃ꙋ богѡ́въ: ꙗ҆́кѡ въ вѣ́къ млⷭ҇ть є҆гѡ̀.

г҃. И҆сповѣ́дайтесѧ гдⷭ҇еви господе́й: ꙗ҆́кѡ въ вѣ́къ млⷭ҇ть є҆гѡ̀.

д҃. Сотво́ршемꙋ чꙋдеса̀ вє́лїѧ є҆ди́номꙋ: ꙗ҆́кѡ въ вѣ́къ млⷭ҇ть є҆гѡ̀.

є҃. Сотво́ршемꙋ небеса̀ ра́зꙋмомъ: ꙗ҆́кѡ въ вѣ́къ млⷭ҇ть є҆гѡ̀.

ѕ҃. Оу҆тверди́вшемꙋ зе́млю на вода́хъ: ꙗ҆́кѡ въ вѣ́къ млⷭ҇ть є҆гѡ̀.

з҃. Сотво́ршемꙋ свѣти̑ла вє́лїѧ є҆ди́номꙋ: ꙗ҆́кѡ въ вѣ́къ млⷭ҇ть є҆гѡ̀:

и҃. Со́лнце во ѻ҆́бласть днѐ: ꙗ҆́кѡ въ вѣ́къ млⷭ҇ть є҆гѡ̀:

ѳ҃. Лꙋнꙋ̀ и҆ ѕвѣ́зды во ѻ҆́бласть но́щи: ꙗ҆́кѡ въ вѣ́къ млⷭ҇ть є҆гѡ̀.

і҃. Порази́вшемꙋ є҆гѵ́пта съ пе́рвенцы є҆гѡ̀: ꙗ҆́кѡ въ вѣ́къ млⷭ҇ть є҆гѡ̀:

а҃і. И҆ и҆зве́дшемꙋ і҆и҃лѧ ѿ среды̀ и҆́хъ: ꙗ҆́кѡ въ вѣ́къ млⷭ҇ть є҆гѡ̀:

в҃і. Рꙋко́ю крѣ́пкою и҆ мы́шцею высо́кою: ꙗ҆́кѡ въ вѣ́къ млⷭ҇ть є҆гѡ̀.

г҃і. Раздѣ́льшемꙋ чермно́е мо́ре въ раздѣлє́нїѧ: ꙗ҆́кѡ въ вѣ́къ млⷭ҇ть є҆гѡ̀:

д҃і. И҆ прове́дшемꙋ і҆и҃лѧ посредѣ̀ є҆гѡ̀: ꙗ҆́кѡ въ вѣ́къ млⷭ҇ть є҆гѡ̀:

є҃і. И҆ и҆стрѧ́сшемꙋ фараѡ́на и҆ си́лꙋ є҆гѡ̀ въ мо́ре чермно́е: ꙗ҆́кѡ въ вѣ́къ млⷭ҇ть є҆гѡ̀.

ѕ҃і. Прове́дшемꙋ лю́ди своѧ̑ въ пꙋсты́ни: ꙗ҆́кѡ въ вѣ́къ млⷭ҇ть є҆гѡ̀.

з҃і. Порази́вшемꙋ царѝ вє́лїѧ: ꙗ҆́кѡ въ вѣ́къ млⷭ҇ть є҆гѡ̀.

и҃і. И҆ ᲂу҆би́вшемꙋ царѝ крѣ̑пкїѧ: ꙗ҆́кѡ въ вѣ́къ млⷭ҇ть є҆гѡ̀:

ѳ҃і. Сиѡ́на царѧ̀ а҆морре́йска: ꙗ҆́кѡ въ вѣ́къ млⷭ҇ть є҆гѡ̀:

к҃. И҆ ѡ҆́га царѧ̀ васа́нска: ꙗ҆́кѡ въ вѣ́къ млⷭ҇ть є҆гѡ̀.

к҃а. И҆ да́вшемꙋ зе́млю и҆́хъ достоѧ́нїе: ꙗ҆́кѡ въ вѣ́къ млⷭ҇ть є҆гѡ̀:

к҃в. Достоѧ́нїе і҆и҃лю рабꙋ̀ своемꙋ̀: ꙗ҆́кѡ въ вѣ́къ млⷭ҇ть є҆гѡ̀.

к҃г. Ꙗ҆́кѡ во смире́нїи на́шемъ помѧнꙋ́ ны гдⷭ҇ь: ꙗ҆́кѡ въ вѣ́къ млⷭ҇ть є҆гѡ̀.

к҃д. И҆ и҆зба́вилъ ны̀ є҆́сть ѿ врагѡ́въ на́шихъ: ꙗ҆́кѡ въ вѣ́къ млⷭ҇ть є҆гѡ̀:

к҃є. Даѧ́й пи́щꙋ всѧ́кой пло́ти: ꙗ҆́кѡ въ вѣ́къ млⷭ҇ть є҆гѡ̀.

к҃ѕ. И҆сповѣ́дайтесѧ бг҃ꙋ нбⷭ҇номꙋ: ꙗ҆́кѡ въ вѣ́къ млⷭ҇ть є҆гѡ̀.

Дв҃дꙋ і҆еремі́емъ, рл҃ѕ.

а҃. На рѣка́хъ вавѷлѡ́нскихъ, та́мѡ сѣдо́хомъ и҆ пла́кахомъ, внегда̀ помѧнꙋ́ти на́мъ сїѡ́на:

в҃. На ве́рбїихъ посредѣ̀ є҆гѡ̀ ѡ҆бѣ́сихомъ ѻ҆рга́ны на́шѧ.

г҃. Ꙗ҆́кѡ та́мѡ вопроси́ша ны̀ плѣ́ншїи на́съ ѡ҆ словесѣ́хъ пѣ́сней, и҆ ве́дшїи на́съ ѡ҆ пѣ́нїи: воспо́йте на́мъ ѿ пѣ́сней сїѡ́нскихъ.

д҃. Ка́кѡ воспое́мъ пѣ́снь гдⷭ҇ню на землѝ чꙋжде́й;

є҃. А҆́ще забꙋ́дꙋ тебѐ, і҆ерⷭ҇ли́ме, забве́на бꙋ́ди десни́ца моѧ̀.

ѕ҃. Прильпнѝ ѧ҆зы́къ мо́й горта́ни моемꙋ̀, а҆́ще не помѧнꙋ̀ тебє̀, а҆́ще не предложꙋ̀ і҆ерⷭ҇ли́ма, ꙗ҆́кѡ въ нача́лѣ весе́лїѧ моегѡ̀.

з҃. Помѧнѝ, гдⷭ҇и, сы́ны є҆дѡ̑мскїѧ въ де́нь і҆ерⷭ҇ли́мль глаго́лющыѧ: и҆стоща́йте, и҆стоща́йте до ѡ҆снова́нїй є҆гѡ̀.

и҃. Дщѝ вавѷлѡ́нѧ ѡ҆каѧ́ннаѧ, бл҃же́нъ, и҆́же возда́стъ тебѣ̀ воздаѧ́нїе твоѐ, є҆́же воздала̀ є҆сѝ на́мъ:

ѳ҃. Бл҃же́нъ, и҆́же и҆́метъ и҆ разбїе́тъ младе́нцы твоѧ̑ ѡ҆ ка́мень.

Сла́ва:

Ѱало́мъ дв҃дꙋ, а҆гге́а и҆ заха́рїи, рл҃з.

а҃. И҆сповѣ́мсѧ тебѣ̀, гдⷭ҇и, всѣ́мъ се́рдцемъ мои́мъ, и҆ пред̾ а҆́гг҃лы воспою̀ тебѣ̀, ꙗ҆́кѡ ᲂу҆слы́шалъ є҆сѝ всѧ̑ глаго́лы ᲂу҆́стъ мои́хъ:

в҃. Поклоню́сѧ ко хра́мꙋ ст҃о́мꙋ твоемꙋ̀ и҆ и҆сповѣ́мсѧ и҆́мени твоемꙋ̀ ѡ҆ млⷭ҇ти твое́й и҆ и҆́стинѣ твое́й, ꙗ҆́кѡ возвели́чилъ є҆сѝ над̾ всѣ́мъ и҆́мѧ твоѐ ст҃о́е.

г҃. Во́ньже а҆́ще де́нь призовꙋ́ тѧ, ско́рѡ ᲂу҆слы́ши мѧ̀: ᲂу҆мно́жиши мѧ̀ въ дꙋшѝ мое́й си́лою твое́ю.

д҃. Да и҆сповѣ́дѧтсѧ тебѣ̀, гдⷭ҇и, всѝ ца́рїе зе́мстїи, ꙗ҆́кѡ ᲂу҆слы́шаша всѧ̑ глаго́лы ᲂу҆́стъ твои́хъ:

є҃. И҆ да воспою́тъ въ пꙋте́хъ гдⷭ҇нихъ, ꙗ҆́кѡ ве́лїѧ сла́ва гдⷭ҇нѧ:

ѕ҃. Ꙗ҆́кѡ высо́къ гдⷭ҇ь, и҆ смирє́нныѧ призира́етъ, и҆ высѡ́каѧ и҆здале́ча вѣ́сть.

з҃. А҆́ще пойдꙋ̀ посредѣ̀ ско́рби, живи́ши мѧ̀: на гнѣ́въ вра̑гъ мои́хъ просте́рлъ є҆сѝ рꙋ́кꙋ твою̀, и҆ сп҃се́ мѧ десни́ца твоѧ̀.

и҃. Гдⷭ҇ь возда́стъ за мѧ̀: гдⷭ҇и, млⷭ҇ть твоѧ̀ во вѣ́къ: дѣ́лъ рꙋкꙋ̀ твоє́ю не пре́зри.

Въ коне́цъ дв҃дꙋ, ѱало́мъ заха́рїинъ, въ разсѣ́ѧнїи, рл҃и.

а҃. Гдⷭ҇и, и҆скꙋси́лъ мѧ̀ є҆сѝ и҆ позна́лъ мѧ̀ є҆сѝ: ты̀ позна́лъ є҆сѝ сѣда́нїе моѐ и҆ воста́нїе моѐ.

в҃. Ты̀ разꙋмѣ́лъ є҆сѝ помышлє́нїѧ моѧ̑ и҆здале́ча:

г҃. Стезю̀ мою̀ и҆ ᲂу҆́же моѐ ты̀ є҆сѝ и҆зслѣ́довалъ и҆ всѧ̑ пꙋти̑ моѧ̑ прови́дѣлъ є҆сѝ.

д҃. Ꙗ҆́кѡ нѣ́сть льстѝ въ ѧ҆зы́цѣ мое́мъ: сѐ, гдⷭ҇и, ты̀ позна́лъ є҆сѝ

є҃. Всѧ̑ послѣ̑днѧѧ и҆ дрє́внѧѧ: ты̀ созда́лъ є҆сѝ мѧ̀ и҆ положи́лъ є҆сѝ на мнѣ̀ рꙋ́кꙋ твою̀.

ѕ҃. Оу҆диви́сѧ ра́зꙋмъ тво́й ѿ менѐ, ᲂу҆тверди́сѧ, не возмогꙋ̀ къ немꙋ̀.

з҃. Ка́мѡ пойдꙋ̀ ѿ дх҃а твоегѡ̀; и҆ ѿ лица̀ твоегѡ̀ ка́мѡ бѣжꙋ̀;

и҃. А҆́ще взы́дꙋ на нб҃о, ты̀ та́мѡ є҆сѝ: а҆́ще сни́дꙋ во а҆́дъ, та́мѡ є҆сѝ.

ѳ҃. А҆́ще возмꙋ̀ крилѣ̑ моѝ ра́нѡ и҆ вселю́сѧ въ послѣ́днихъ мо́рѧ,

і҃. И҆ та́мѡ бо рꙋка̀ твоѧ̀ наста́витъ мѧ̀, и҆ ᲂу҆держи́тъ мѧ̀ десни́ца твоѧ̀.

а҃і. И҆ рѣ́хъ: є҆да̀ тма̀ попере́тъ мѧ̀; и҆ но́щь просвѣще́нїе въ сла́дости мое́й.

в҃і. Ꙗ҆́кѡ тма̀ не помрачи́тсѧ ѿ тебє̀, и҆ но́щь ꙗ҆́кѡ де́нь просвѣти́тсѧ: ꙗ҆́кѡ тма̀ є҆ѧ̀, та́кѡ и҆ свѣ́тъ є҆ѧ̀.

г҃і. Ꙗ҆́кѡ ты̀ ꙾созда́лъ꙾ ⁵⁴ є҆сѝ ᲂу҆трѡ́бы моѧ̑, воспрїѧ́лъ мѧ̀ є҆сѝ и҆з̾ чре́ва ма́тере моеѧ̀.

д҃і. И҆сповѣ́мсѧ тебѣ̀, ꙗ҆́кѡ стра́шнѡ ᲂу҆диви́лсѧ є҆сѝ: чꙋ̑дна дѣла̀ твоѧ̑, и҆ дꙋша̀ моѧ̀ зна́етъ ѕѣлѡ̀.

є҃і. Не ᲂу҆таи́сѧ ко́сть моѧ̀ ѿ тебє̀, ю҆́же сотвори́лъ є҆сѝ въ та́йнѣ, и҆ соста́въ мо́й въ преиспо́днихъ землѝ.

ѕ҃і. Несодѣ́ланное моѐ ви́дѣстѣ ѻ҆́чи твоѝ, и҆ въ кни́зѣ твое́й всѝ напи́шꙋтсѧ: во дне́хъ сози́ждꙋтсѧ, и҆ никто́же въ ни́хъ.

з҃і. Мнѣ́ же ѕѣлѡ̀ че́стни бы́ша дрꙋ́зи твоѝ, бж҃е, ѕѣлѡ̀ ᲂу҆тверди́шасѧ влады́чєствїѧ и҆́хъ:

и҃і. И҆зочтꙋ̀ и҆̀хъ, и҆ па́че песка̀ ᲂу҆мно́жатсѧ: воста́хъ, и҆ є҆щѐ є҆́смь съ тобо́ю.

ѳ҃і. А҆́ще и҆збїе́ши грѣ́шники, бж҃е: мꙋ́жїе крове́й, ᲂу҆клони́тесѧ ѿ менѐ.

к҃. Ꙗ҆́кѡ ревни́ви є҆стѐ въ помышле́нїихъ, прїи́мꙋтъ въ сꙋетꙋ̀ гра́ды твоѧ̑.

к҃а. Не ненави́дѧщыѧ ли тѧ̀, гдⷭ҇и, возненави́дѣхъ, и҆ ѡ҆ вразѣ́хъ твои́хъ и҆ста́ѧхъ;

к҃в. Соверше́нною не́навистїю возненави́дѣхъ ѧ҆̀: во врагѝ бы́ша мѝ.

к҃г. И҆скꙋси́ мѧ, бж҃е, и҆ ᲂу҆вѣ́ждь се́рдце моѐ: и҆стѧжи́ мѧ и҆ разꙋмѣ́й стєзѝ моѧ̑:

к҃д. И҆ ви́ждь, а҆́ще пꙋ́ть беззако́нїѧ во мнѣ̀, и҆ наста́ви мѧ̀ на пꙋ́ть вѣ́ченъ.

Въ коне́цъ, ѱало́мъ дв҃дꙋ, рл҃ѳ.

а҃. И҆зми́ мѧ, гдⷭ҇и, ѿ человѣ́ка лꙋка́ва, ѿ мꙋ́жа непра́ведна и҆зба́ви мѧ̀:

в҃. И҆̀же помы́слиша непра́вдꙋ въ се́рдцы, ве́сь де́нь ѡ҆полча́хꙋ бра̑ни:

г҃. И҆з̾ѡстри́ша ѧ҆зы́къ сво́й ꙗ҆́кѡ ѕмїи́нъ: ꙗ҆́дъ а҆́спїдовъ под̾ ᲂу҆стна́ми и҆́хъ.

д҃. Сохрани́ мѧ, гдⷭ҇и, и҆з̾ рꙋкѝ грѣ́шничи, ѿ человѣ̑къ непра́ведныхъ и҆зми́ мѧ, и҆̀же помы́слиша запѧ́ти стѡпы̀ моѧ̑.

є҃. Скры́ша го́рдїи сѣ́ть мнѣ̀ и҆ ᲂу҆́жы, препѧ́ша сѣ́ть нога́ма мои́ма:

ѕ҃. При стезѝ собла́зны положи́ша мѝ.

з҃. Рѣ́хъ гдⷭ҇еви: бг҃ъ мо́й є҆сѝ ты̀, внꙋшѝ, гдⷭ҇и, гла́съ моле́нїѧ моегѡ̀.

и҃. Гдⷭ҇и, гдⷭ҇и, си́ло сп҃се́нїѧ моегѡ̀, ѡ҆сѣни́лъ є҆сѝ над̾ главо́ю мое́ю въ де́нь бра́ни.

ѳ҃. Не преда́ждь менѐ, гдⷭ҇и, ѿ жела́нїѧ моегѡ̀ грѣ́шникꙋ: помы́слиша на мѧ̀, не ѡ҆ста́ви менѐ, да не когда̀ вознесꙋ́тсѧ.

і҃. Глава̀ ѡ҆крꙋже́нїѧ и҆́хъ, трꙋ́дъ ᲂу҆сте́нъ и҆́хъ покры́етъ ѧ҆̀.

а҃і. Падꙋ́тъ на ни́хъ ᲂу҆́глїѧ ѻ҆́гнєннаѧ, низложи́ши ѧ҆̀ во страсте́хъ, и҆ не постоѧ́тъ.

в҃і. Мꙋ́жъ ѧ҆зы́ченъ не и҆спра́витсѧ на землѝ: мꙋ́жа непра́ведна ѕла̑ѧ ᲂу҆ловѧ́тъ во и҆стлѣ́нїе.

г҃і. Позна́хъ, ꙗ҆́кѡ сотвори́тъ гдⷭ҇ь сꙋ́дъ ни́щымъ и҆ ме́сть ᲂу҆бѡ́гимъ.

д҃і. Ѻ҆ба́че првⷣнїи и҆сповѣ́дѧтсѧ и҆́мени твоемꙋ̀, и҆ вселѧ́тсѧ пра́вїи съ лице́мъ твои́мъ.

Сла́ва:

Ѱало́мъ дв҃дꙋ, р҃м.

а҃. Гдⷭ҇и, воззва́хъ къ тебѣ̀, ᲂу҆слы́ши мѧ̀: вонмѝ гла́сꙋ моле́нїѧ моегѡ̀, внегда̀ воззва́ти мѝ къ тебѣ̀.

в҃. Да и҆спра́витсѧ моли́тва моѧ̀ ꙗ҆́кѡ кади́ло пред̾ тобо́ю: воздѣѧ́нїе рꙋкꙋ̀ моє́ю, же́ртва вече́рнѧѧ.

г҃. Положѝ, гдⷭ҇и, хране́нїе ᲂу҆стѡ́мъ мои̑мъ и҆ две́рь ѡ҆гражде́нїѧ ѡ҆ ᲂу҆стна́хъ мои́хъ.

д҃. Не ᲂу҆клонѝ се́рдце моѐ въ словеса̀ лꙋка́вствїѧ, непщева́ти вины̀ ѡ҆ грѣсѣ́хъ съ человѣ́ки дѣ́лающими беззако́нїе: и҆ не сочтꙋ́сѧ со и҆збра́нными и҆́хъ.

є҃. Нака́жетъ мѧ̀ првⷣникъ ми́лостїю и҆ ѡ҆бличи́тъ мѧ̀, є҆ле́й же грѣ́шнагѡ да не нама́ститъ главы̀ моеѧ̀: ꙗ҆́кѡ є҆щѐ и҆ моли́тва моѧ̀ во бл҃говоле́нїихъ и҆́хъ.

ѕ҃. Пожє́рты бы́ша при ка́мени сꙋдїи̑ и҆́хъ: ᲂу҆слы́шатсѧ глаго́ли моѝ, ꙗ҆́кѡ ꙾возмого́ша꙾ ⁵⁵.

з҃. Ꙗ҆́кѡ то́лща землѝ просѣ́десѧ на землѝ, расточи́шасѧ кѡ́сти и҆́хъ при а҆́дѣ.

и҃. Ꙗ҆́кѡ къ тебѣ̀, гдⷭ҇и, гдⷭ҇и, ѻ҆́чи моѝ: на тѧ̀ ᲂу҆пова́хъ, не ѿимѝ дꙋ́шꙋ мою̀:

ѳ҃. Сохрани́ мѧ ѿ сѣ́ти, ю҆́же соста́виша мѝ, и҆ ѿ собла̑знъ дѣ́лающихъ беззако́нїе.

і҃. Падꙋ́тъ во мре́жꙋ свою̀ грѣ̑шницы: є҆ди́нъ є҆́смь а҆́зъ, до́ндеже прейдꙋ̀.

а҃. Ра́зꙋма дв҃дꙋ, внегда̀ бы́ти є҆мꙋ̀ въ верте́пѣ молѧ́щемꙋсѧ, рм҃а.

в҃. Гла́сомъ мои́мъ ко гдⷭ҇ꙋ воззва́хъ, гла́сомъ мои́мъ ко гдⷭ҇ꙋ помоли́хсѧ.

г҃. Пролїю̀ пред̾ ни́мъ моле́нїе моѐ, печа́ль мою̀ пред̾ ни́мъ возвѣщꙋ̀.

д҃. Внегда̀ и҆счеза́ти ѿ менѐ дꙋ́хꙋ моемꙋ̀, и҆ ты̀ позна́лъ є҆сѝ стєзѝ моѧ̑: на пꙋтѝ се́мъ, по немꙋ́же хожда́хъ, скры́ша сѣ́ть мнѣ̀.

є҃. Сматрѧ́хъ ѡ҆деснꙋ́ю и҆ возглѧ́дахъ, и҆ не бѣ̀ зна́ѧй менѐ: поги́бе бѣ́гство ѿ менѐ, и҆ нѣ́сть взыска́ѧй дꙋ́шꙋ мою̀.

ѕ҃. Воззва́хъ къ тебѣ̀, гдⷭ҇и, рѣ́хъ: ты̀ є҆сѝ ᲂу҆пова́нїе моѐ, ча́сть моѧ̀ є҆сѝ на землѝ живы́хъ.

з҃. Вонмѝ моле́нїю моемꙋ̀, ꙗ҆́кѡ смири́хсѧ ѕѣлѡ̀: и҆зба́ви мѧ̀ ѿ гонѧ́щихъ мѧ̀, ꙗ҆́кѡ ᲂу҆крѣпи́шасѧ па́че менѐ.

и҃. И҆зведѝ и҆з̾ темни́цы дꙋ́шꙋ мою̀, и҆сповѣ́датисѧ и҆́мени твоемꙋ̀: менѐ ждꙋ́тъ првⷣницы, до́ндеже возда́си мнѣ̀.

Ѱало́мъ дв҃дꙋ, є҆гда̀ гонѧ́ше є҆го̀ а҆вессалѡ́мъ сы́нъ є҆гѡ̀, рм҃в.

а҃. Гдⷭ҇и, ᲂу҆слы́ши моли́твꙋ мою̀, внꙋшѝ моле́нїе моѐ во и҆́стинѣ твое́й, ᲂу҆слы́ши мѧ̀ въ пра́вдѣ твое́й:

в҃. И҆ не вни́ди въ сꙋ́дъ съ рабо́мъ твои́мъ, ꙗ҆́кѡ не ѡ҆правди́тсѧ пред̾ тобо́ю всѧ́къ живы́й.

г҃. Ꙗ҆́кѡ погна̀ вра́гъ дꙋ́шꙋ мою̀: смири́лъ є҆́сть въ зе́млю живо́тъ мо́й: посади́лъ мѧ̀ є҆́сть въ те́мныхъ, ꙗ҆́кѡ мє́ртвыѧ вѣ́ка.

д҃. И҆ ᲂу҆ны̀ во мнѣ̀ дꙋ́хъ мо́й, во мнѣ̀ смѧте́сѧ се́рдце моѐ.

є҃. Помѧнꙋ́хъ дни̑ дрє́внїѧ, поꙋчи́хсѧ во всѣ́хъ дѣ́лѣхъ твои́хъ, въ творе́нїихъ рꙋкꙋ̀ твоє́ю поꙋча́хсѧ.

ѕ҃. Воздѣ́хъ къ тебѣ̀ рꙋ́цѣ моѝ: дꙋша̀ моѧ̀ ꙗ҆́кѡ землѧ̀ безво́днаѧ тебѣ̀.

з҃. Ско́рѡ ᲂу҆слы́ши мѧ̀, гдⷭ҇и, и҆счезѐ дꙋ́хъ мо́й: не ѿвратѝ лица̀ твоегѡ̀ ѿ менѐ, и҆ ᲂу҆подо́блюсѧ низходѧ́щымъ въ ро́въ.

и҃. Слы́шанꙋ сотворѝ мнѣ̀ заꙋ́тра млⷭ҇ть твою̀, ꙗ҆́кѡ на тѧ̀ ᲂу҆пова́хъ: скажѝ мнѣ̀, гдⷭ҇и, пꙋ́ть, во́ньже пойдꙋ̀, ꙗ҆́кѡ къ тебѣ̀ взѧ́хъ дꙋ́шꙋ мою̀.

ѳ҃. И҆зми́ мѧ ѿ вра̑гъ мои́хъ, гдⷭ҇и, къ тебѣ̀ прибѣго́хъ.

і҃. Наꙋчи́ мѧ твори́ти во́лю твою̀, ꙗ҆́кѡ ты̀ є҆сѝ бг҃ъ мо́й: дх҃ъ тво́й бл҃гі́й наста́витъ мѧ̀ на зе́млю пра́вꙋ.

а҃і. И҆́мене твоегѡ̀ ра́ди, гдⷭ҇и, живи́ши мѧ̀ пра́вдою твое́ю: и҆зведе́ши ѿ печа́ли дꙋ́шꙋ мою̀:

в҃і. И҆ млⷭ҇тїю твое́ю потреби́ши врагѝ моѧ̑ и҆ погꙋби́ши всѧ̑ стꙋжа́ющыѧ дꙋшѝ мое́й: ꙗ҆́кѡ а҆́зъ ра́бъ тво́й є҆́смь.

Сла́ва:

По ѳ҃і-й каѳі́смѣ, трист҃о́е.

Та́же тропарѝ, гла́съ з҃:

Бл҃годарѧ̀ сла́влю тѧ̀, бж҃е мо́й, ꙗ҆́кѡ всѣ̑мъ да́лъ є҆сѝ грѣ́шникѡмъ покаѧ́нїе: сп҃се, не посрамѝ менѐ, є҆гда̀ прїи́деши сꙋди́ти мі́рꙋ всемꙋ̀, сра̑мнаѧ дѣла̀ сотво́ршагѡ.

Сла́ва: Безмѣ̑рнаѧ тебѣ̀ прегрѣши́въ, и҆ безмѣ́рныхъ мꙋче́нїй ѡ҆жида́ю: бж҃е мо́й, ᲂу҆ще́дривъ сп҃си́ мѧ.

И҆ ны́нѣ: Ко мно́жествꙋ млⷭ҇ти твоеѧ̀ ны́нѣ прибѣга́ю, разрѣшѝ вери̑ги бцⷣе, согрѣше́нїй мои́хъ.

Гдⷭ҇и поми́лꙋй, м҃. и҆ мл҃тва:

Влⷣко хрⷭ҇тѐ бж҃е, и҆́же стрⷭ҇тьмѝ твои́ми стра̑сти моѧ̑ и҆сцѣли́вый, и҆ ꙗ҆́звами твои́ми ꙗ҆́звы моѧ̑ ᲂу҆врачева́вый: да́рꙋй мнѣ̀ мно́гѡ тебѣ̀ прегрѣши́вшемꙋ сле́зы ᲂу҆миле́нїѧ. срастворѝ моемꙋ̀ тѣ́лꙋ ѿ ѡ҆бонѧ́нїѧ животворѧ́щагѡ тѣ́ла твоегѡ̀, и҆ насладѝ дꙋ́шꙋ мою̀ твое́ю чⷭ҇тно́ю кро́вїю ѿ го́рести, є҆́юже мѧ̀ сопроти́вникъ напоѝ, возвы́си мо́й ᲂу҆́мъ къ тебѣ̀, до́лꙋ привле́кшїйсѧ, и҆ возведѝ ѿ про́пасти поги́бели: ꙗ҆́кѡ не и҆́мамъ покаѧ́нїѧ, не и҆́мамъ ᲂу҆миле́нїѧ, не и҆́мамъ слезы̀ ᲂу҆тѣ́шительныѧ, возводѧ́щїѧ ча̑да ко своемꙋ̀ наслѣ́дїю. ѡ҆мрачи́хсѧ ᲂу҆мо́мъ въ жите́йскихъ страсте́хъ, не могꙋ̀ воззрѣ́ти къ тебѣ̀ въ болѣ́зни, не могꙋ̀ согрѣ́тисѧ слеза́ми, ꙗ҆́же къ тебѣ̀ любвѐ: но влⷣко гдⷭ҇и і҆и҃се хрⷭ҇тѐ, сокро́вище бл҃ги́хъ, да́рꙋй мнѣ̀ покаѧ́нїе всецѣ́лое, и҆ се́рдце люботрꙋ́дное, во взыска́нїе твоѐ, да́рꙋй мнѣ̀ бл҃года́ть твою̀, и҆ ѡ҆бновѝ во мнѣ̀ зра́ки твоегѡ̀ ѡ҆́браза. ѡ҆ста́вихъ тѧ̀, не ѡ҆ста́ви менѐ, и҆зы́ди на взыска́нїе моѐ. возведѝ къ па́жити твое́й, и҆ сопричти́ мѧ ѻ҆вца́мъ и҆збра́ннагѡ твоегѡ̀ ста́да: воспита́й мѧ̀ съ ни́ми ѿ ѕла́ка бж҃е́ственныхъ твои́хъ та́инствъ, мл҃твами пречⷭ҇тыѧ твоеѧ̀ мт҃ре, и҆ всѣ́хъ ст҃ы́хъ твои́хъ, а҆ми́нь.

Ѱало́мъ дв҃дꙋ, къ голїа́ѳꙋ, рм҃г.

а҃. Бл҃гослове́нъ гдⷭ҇ь бг҃ъ мо́й, наꙋча́ѧй рꙋ́цѣ моѝ на ѡ҆полче́нїе, пе́рсты моѧ̑ на бра́нь.

в҃. Млⷭ҇ть моѧ̀ и҆ прибѣ́жище моѐ, застꙋ́пникъ мо́й и҆ и҆зба́витель мо́й, защи́титель мо́й, и҆ на него̀ ᲂу҆пова́хъ: повинꙋ́ѧй лю́ди моѧ̑ под̾ мѧ̀.

г҃. Гдⷭ҇и, что̀ є҆́сть человѣ́къ, ꙗ҆́кѡ позна́лсѧ є҆сѝ є҆мꙋ̀; и҆лѝ сы́нъ человѣ́чь, ꙗ҆́кѡ вмѣнѧ́еши є҆гѡ̀;

д҃. Человѣ́къ сꙋетѣ̀ ᲂу҆подо́бисѧ: дні́е є҆гѡ̀ ꙗ҆́кѡ сѣ́нь прехо́дѧтъ.

є҃. Гдⷭ҇и, преклонѝ нб҃са̀, и҆ сни́ди: косни́сѧ гора́мъ, и҆ воздымѧ́тсѧ:

ѕ҃. Блеснѝ мо́лнїю, и҆ разжене́ши ѧ҆̀: послѝ стрѣ́лы твоѧ̑, и҆ смѧте́ши ѧ҆̀.

з҃. Послѝ рꙋ́кꙋ твою̀ съ высоты̀, и҆зми́ мѧ и҆ и҆зба́ви мѧ̀ ѿ во́дъ мно́гихъ, и҆з̾ рꙋкѝ сынѡ́въ чꙋжди́хъ,

и҃. И҆́хже ᲂу҆ста̀ глаго́лаша сꙋетꙋ̀, и҆ десни́ца и҆́хъ десни́ца непра́вды.

ѳ҃. Бж҃е, пѣ́снь но́вꙋ воспою̀ тебѣ̀, во ѱалти́ри десѧтострꙋ́ннѣмъ пою̀ тебѣ̀:

і҃. Даю́щемꙋ сп҃се́нїе царє́мъ, и҆збавлѧ́ющемꙋ дв҃да раба̀ своего̀ ѿ меча̀ лю́та.

а҃і. И҆зба́ви мѧ̀ и҆ и҆зми́ мѧ и҆з̾ рꙋкѝ сынѡ́въ чꙋжди́хъ, и҆́хже ᲂу҆ста̀ глаго́лаша сꙋетꙋ̀, и҆ десни́ца и҆́хъ десни́ца непра́вды:

в҃і. И҆́хже сы́нове и҆́хъ ꙗ҆́кѡ новосаждє́нїѧ водрꙋжє́наѧ въ ю҆́ности свое́й, дщє́ри и҆́хъ ᲂу҆до́брєны, преꙋкра́шєны ꙗ҆́кѡ подо́бїе хра́ма:

г҃і. Храни̑лища и҆́хъ и҆спо́лнєна, ѿрыга̑ющаѧ ѿ сегѡ̀ въ сїѐ: ѻ҆́вцы и҆́хъ многоплѡ́дны, мно́жащыѧсѧ во и҆схо́дищихъ свои́хъ: воло́ве и҆́хъ то́лсти:

д҃і. Нѣ́сть паде́нїѧ ѡ҆пло́тꙋ, нижѐ прохо́да, нижѐ во́плѧ въ сто́гнахъ и҆́хъ.

є҃і. Оу҆бл҃жи́ша лю́ди, и҆̀мже сїѧ̑ сꙋ́ть: бл҃же́ни лю́дїе, и҆̀мже гдⷭ҇ь бг҃ъ и҆́хъ.

Хвала̀ дв҃дꙋ, рм҃д.

а҃. Вознесꙋ́ тѧ, бж҃е мо́й, цр҃ю̀ мо́й, и҆ бл҃гословлю̀ и҆́мѧ твоѐ въ вѣ́къ и҆ въ вѣ́къ вѣ́ка.

в҃. На всѧ́къ де́нь бл҃гословлю́ тѧ, и҆ восхвалю̀ и҆́мѧ твоѐ въ вѣ́къ и҆ въ вѣ́къ вѣ́ка.

г҃. Ве́лїй гдⷭ҇ь и҆ хва́ленъ ѕѣлѡ̀, и҆ вели́чїю є҆гѡ̀ нѣ́сть конца̀.

д҃. Ро́дъ и҆ ро́дъ восхва́лѧтъ дѣла̀ твоѧ̑ и҆ си́лꙋ твою̀ возвѣстѧ́тъ:

є҃. Великолѣ́пїе сла́вы ст҃ы́ни твоеѧ̀ возглаго́лютъ и҆ чꙋдеса̀ твоѧ̑ повѣ́дѧтъ:

ѕ҃. И҆ си́лꙋ стра́шныхъ твои́хъ рекꙋ́тъ и҆ вели́чїе твоѐ повѣ́дѧтъ:

з҃. Па́мѧть мно́жества бл҃гости твоеѧ̀ ѿры́гнꙋтъ и҆ пра́вдою твое́ю возра́дꙋютсѧ.

и҃. Ще́дръ и҆ млⷭ҇тивъ гдⷭ҇ь, долготерпѣли́въ и҆ многомлⷭ҇тивъ.

ѳ҃. Бл҃гъ гдⷭ҇ь всѧ́чєскимъ, и҆ щедрѡ́ты є҆гѡ̀ на всѣ́хъ дѣ́лѣхъ є҆гѡ̀.

і҃. Да и҆сповѣ́дѧтсѧ тебѣ̀, гдⷭ҇и, всѧ̑ дѣла̀ твоѧ̑, и҆ прпⷣбнїи твоѝ да бл҃гословѧ́тъ тѧ̀:

а҃і. Сла́вꙋ црⷭ҇твїѧ твоегѡ̀ рекꙋ́тъ и҆ си́лꙋ твою̀ возглаго́лютъ,

в҃і. Сказа́ти сыновѡ́мъ человѣ́чєскимъ си́лꙋ твою̀ и҆ сла́вꙋ великолѣ́пїѧ црⷭ҇твїѧ твоегѡ̀.

г҃і. Црⷭ҇тво твоѐ црⷭ҇тво всѣ́хъ вѣкѡ́въ, и҆ влⷣчество твоѐ во всѧ́комъ ро́дѣ и҆ ро́дѣ. Вѣ́ренъ гдⷭ҇ь во всѣ́хъ словесѣ́хъ свои́хъ и҆ прпⷣбенъ во всѣ́хъ дѣ́лѣхъ свои́хъ.

д҃і. Оу҆твержда́етъ гдⷭ҇ь всѧ̑ низпа́дающыѧ и҆ возставлѧ́етъ всѧ̑ низве́ржєнныѧ.

є҃і. Ѻ҆́чи всѣ́хъ на тѧ̀ ᲂу҆пова́ютъ, и҆ ты̀ дае́ши и҆̀мъ пи́щꙋ во бл҃говре́менїи:

ѕ҃і. Ѿверза́еши ты̀ рꙋ́кꙋ твою̀ и҆ и҆сполнѧ́еши всѧ́кое живо́тно бл҃говоле́нїѧ.

з҃і. Првⷣнъ гдⷭ҇ь во всѣ́хъ пꙋте́хъ свои́хъ и҆ прпⷣбенъ во всѣ́хъ дѣ́лѣхъ свои́хъ.

и҃і. Бли́з̾ гдⷭ҇ь всѣ̑мъ призыва́ющымъ є҆го̀, всѣ̑мъ призыва́ющымъ є҆го̀ во и҆́стинѣ:

ѳ҃і. Во́лю боѧ́щихсѧ є҆гѡ̀ сотвори́тъ, и҆ моли́твꙋ и҆́хъ ᲂу҆слы́шитъ, и҆ сп҃се́тъ ѧ҆̀.

к҃. Храни́тъ гдⷭ҇ь всѧ̑ лю́бѧщыѧ є҆го̀, и҆ всѧ̑ грѣ́шники потреби́тъ.

к҃а. Хвалꙋ̀ гдⷭ҇ню возглаго́лютъ ᲂу҆ста̀ моѧ̑: и҆ да бл҃гослови́тъ всѧ́ка пло́ть и҆́мѧ ст҃о́е є҆гѡ̀ въ вѣ́къ и҆ въ вѣ́къ вѣ́ка.

Сла́ва:

А҆ллилꙋ́їа, а҆гге́а и҆ заха́рїи, рм҃є.

а҃. Хвалѝ, дꙋшѐ моѧ̀, гдⷭ҇а:

в҃. Восхвалю̀ гдⷭ҇а въ животѣ̀ мое́мъ, пою̀ бг҃ꙋ моемꙋ̀, до́ндеже є҆́смь.

г҃. Не надѣ́йтесѧ на кнѧ̑зи, на сы́ны человѣ́чєскїѧ, въ ни́хже нѣ́сть сп҃се́нїѧ.

д҃. И҆зы́детъ дꙋ́хъ є҆гѡ̀, и҆ возврати́тсѧ въ зе́млю свою̀: въ то́й де́нь поги́бнꙋтъ всѧ̑ помышлє́нїѧ є҆гѡ̀.

є҃. Бл҃же́нъ, є҆мꙋ́же бг҃ъ і҆а́кѡвль помо́щникъ є҆гѡ̀, ᲂу҆пова́нїе є҆гѡ̀ на гдⷭ҇а бг҃а своего̀,

ѕ҃. Сотво́ршаго не́бо и҆ зе́млю, мо́ре, и҆ всѧ̑, ꙗ҆̀же въ ни́хъ: хранѧ́щаго и҆́стинꙋ въ вѣ́къ,

з҃. Творѧ́щаго сꙋ́дъ ѡ҆би̑димымъ, даю́щаго пи́щꙋ а҆́лчꙋщымъ. Гдⷭ҇ь рѣши́тъ ѡ҆кова̑нныѧ:

и҃. Гдⷭ҇ь ᲂу҆мꙋдрѧ́етъ слѣпцы̀: гдⷭ҇ь возво́дитъ низве́ржєнныѧ: гдⷭ҇ь лю́битъ првⷣники.

ѳ҃. Гдⷭ҇ь храни́тъ прише́льцы, си́ра и҆ вдовꙋ̀ прїи́метъ, и҆ пꙋ́ть грѣ́шныхъ погꙋби́тъ.

і҃. Воцр҃и́тсѧ гдⷭ҇ь во вѣ́къ, бг҃ъ тво́й, сїѡ́не, въ ро́дъ и҆ ро́дъ.

А҆ллилꙋ́їа, рм҃ѕ.

а҃. Хвали́те гдⷭ҇а, ꙗ҆́кѡ бл҃гъ ѱало́мъ: бг҃ови на́шемꙋ да ᲂу҆слади́тсѧ хвале́нїе.

в҃. Зи́ждай і҆ерⷭ҇ли́ма гдⷭ҇ь: разсѣ̑ѧнїѧ і҆и҃лєва собере́тъ:

г҃. И҆сцѣлѧ́ѧй сокрꙋшє́нныѧ се́рдцемъ и҆ ѡ҆бѧзꙋ́ѧй сокрꙋшє́нїѧ и҆́хъ:

д҃. И҆счита́ѧй мно́жество ѕвѣ́здъ, и҆ всѣ̑мъ и҆̀мъ и҆мена̀ нарица́ѧй.

є҃. Ве́лїй гдⷭ҇ь на́шъ, и҆ ве́лїѧ крѣ́пость є҆гѡ̀, и҆ ра́зꙋма є҆гѡ̀ нѣ́сть числа̀.

ѕ҃. Прїе́млѧй крѡ́ткїѧ гдⷭ҇ь, смирѧ́ѧй же грѣ́шники до землѝ.

з҃. Начни́те гдⷭ҇еви во и҆сповѣ́данїи, по́йте бг҃ови на́шемꙋ въ гꙋ́слехъ:

и҃. Ѡ҆дѣва́ющемꙋ не́бо ѻ҆́блаки, ᲂу҆готовлѧ́ющемꙋ землѝ до́ждь: прозѧба́ющемꙋ на гора́хъ травꙋ̀ и҆ ѕла́къ на слꙋ́жбꙋ человѣ́кѡмъ:

ѳ҃. Даю́щемꙋ скотѡ́мъ пи́щꙋ и҆́хъ, и҆ птенцє́мъ вра́нѡвымъ призыва́ющымъ є҆го̀.

і҃. Не въ си́лѣ ко́нстѣй восхо́щетъ, нижѐ въ лы́стѣхъ мꙋ́жескихъ бл҃говоли́тъ:

а҃і. Бл҃говоли́тъ гдⷭ҇ь въ боѧ́щихсѧ є҆гѡ̀ и҆ во ᲂу҆пова́ющихъ на млⷭ҇ть є҆гѡ̀.

А҆ллилꙋ́їа, а҆гге́а и҆ заха́рїи, рм҃з.

а҃. Похвалѝ, і҆ерⷭ҇ли́ме, гдⷭ҇а, хвалѝ бг҃а твоего̀, сїѡ́не:

в҃. Ꙗ҆́кѡ ᲂу҆крѣпѝ верєѝ вра́тъ твои́хъ, блгⷭ҇вѝ сы́ны твоѧ̑ въ тебѣ̀.

г҃. Полага́ѧй предѣ́лы твоѧ̑ ми́ръ, и҆ тꙋ́ка пшени́чна насыща́ѧй тѧ̀:

д҃. Посыла́ѧй сло́во своѐ землѝ, до ско́рости тече́тъ сло́во є҆гѡ̀,

є҃. Даю́щагѡ снѣ́гъ сво́й ꙗ҆́кѡ во́лнꙋ, мглꙋ̀ ꙗ҆́кѡ пе́пелъ посыпа́ющагѡ,

ѕ҃. Мета́ющагѡ го́лоть сво́й ꙗ҆́кѡ хлѣ́бы: проти́вꙋ лица̀ мра́за є҆гѡ̀ кто̀ постои́тъ;

з҃. По́слетъ сло́во своѐ, и҆ и҆ста́етъ ѧ҆̀: дхне́тъ дꙋ́хъ є҆гѡ̀, и҆ потекꙋ́тъ во́ды.

и҃. Возвѣща́ѧй сло́во своѐ і҆а́кѡвꙋ, ѡ҆правда̑нїѧ и҆ сꙋдьбы̑ своѧ̑ і҆и҃леви:

ѳ҃. Не сотворѝ та́кѡ всѧ́комꙋ ꙗ҆зы́кꙋ, и҆ сꙋдьбы̑ своѧ̑ не ꙗ҆вѝ и҆̀мъ.

Сла́ва:

А҆ллилꙋ́їа, а҆гге́а и҆ заха́рїи, рм҃и.

а҃. Хвали́те гдⷭ҇а съ нб҃съ, хвали́те є҆го̀ въ вы́шнихъ.

в҃. Хвали́те є҆го̀ всѝ а҆́гг҃ли є҆гѡ̀: хвали́те є҆го̀, всѧ̑ си̑лы є҆гѡ̀.

г҃. Хвали́те є҆го̀, со́лнце и҆ лꙋна̀: хвали́те є҆го̀ всѧ̑ ѕвѣ́зды и҆ свѣ́тъ.

д҃. Хвали́те є҆го̀, нб҃са̀ нб҃съ и҆ вода̀, ꙗ҆́же превы́ше небе́съ.

є҃. Да восхва́лѧтъ и҆́мѧ гдⷭ҇не: ꙗ҆́кѡ то́й речѐ, и҆ бы́ша: то́й повелѣ̀, и҆ созда́шасѧ.

ѕ҃. Поста́ви ѧ҆̀ въ вѣ́къ и҆ въ вѣ́къ вѣ́ка: повелѣ́нїе положѝ, и҆ не ми́мѡ и҆́детъ.

з҃. Хвали́те гдⷭ҇а ѿ землѝ, ѕмі́евє и҆ всѧ̑ бє́здны:

и҃. Ѻ҆́гнь, гра́дъ, снѣ́гъ, го́лоть, дꙋ́хъ бꙋ́ренъ, творѧ̑щаѧ сло́во є҆гѡ̀:

ѳ҃. Го́ры и҆ всѝ хо́лми, древа̀ плодонѡ́сна и҆ всѝ ке́дри:

і҃. Ѕвѣ́рїе и҆ всѝ ско́ти, га́ди и҆ пти̑цы перна̑ты:

а҃і. Ца́рїе зе́мстїи и҆ всѝ лю́дїе, кнѧ̑зи и҆ всѝ сꙋдїи̑ зе́мстїи:

в҃і. Ю҆́нѡши и҆ дѣ̑вы, ста́рцы съ ю҆́нотами.

г҃і. Да восхва́лѧтъ и҆́мѧ гдⷭ҇не: ꙗ҆́кѡ вознесе́сѧ и҆́мѧ тогѡ̀ є҆ди́нагѡ, и҆сповѣ́данїе є҆гѡ̀ на землѝ и҆ на нб҃сѝ.

д҃і. И҆ вознесе́тъ ро́гъ люде́й свои́хъ: пѣ́снь всѣ̑мъ прпⷣбнымъ є҆гѡ̀, сыновѡ́мъ і҆и҃лєвымъ, лю́демъ приближа́ющымсѧ є҆мꙋ̀.

А҆ллилꙋ́їа, рм҃ѳ.

а҃. Воспо́йте гдⷭ҇еви пѣ́снь но́вꙋ: хвале́нїе є҆гѡ̀ въ цр҃кви прпⷣбныхъ.

в҃. Да возвесели́тсѧ і҆и҃ль ѡ҆ сотво́ршемъ є҆го̀, и҆ сы́нове сїѡ́ни возра́дꙋютсѧ ѡ҆ цр҃ѝ свое́мъ.

г҃. Да восхва́лѧтъ и҆́мѧ є҆гѡ̀ въ ли́цѣ, въ тѷмпа́нѣ и҆ ѱалти́ри да пою́тъ є҆мꙋ̀.

д҃. Ꙗ҆́кѡ бл҃говоли́тъ гдⷭ҇ь въ лю́дехъ свои́хъ, и҆ вознесе́тъ крѡ́ткїѧ во сп҃се́нїе.

є҃. Восхва́лѧтсѧ прпⷣбнїи во сла́вѣ и҆ возра́дꙋютсѧ на ло́жахъ свои́хъ.

ѕ҃. Возношє́нїѧ бж҃їѧ въ горта́ни и҆́хъ, и҆ мечѝ ѻ҆бою́дꙋ ѻ҆стры̀ въ рꙋка́хъ и҆́хъ:

з҃. Сотвори́ти ѿмще́нїе во ꙗ҆зы́цѣхъ, ѡ҆бличє́нїѧ въ лю́дехъ:

и҃. Свѧза́ти царѝ и҆́хъ пꙋ́ты, и҆ сла̑вныѧ и҆́хъ рꙋчны́ми ѻ҆кѡ́вы желѣ́зными:

ѳ҃. Сотвори́ти въ ни́хъ сꙋ́дъ напи́санъ. Сла́ва сїѧ̀ бꙋ́детъ всѣ̑мъ прпⷣбнымъ є҆гѡ̀.

А҆ллилꙋ́їа, р҃н.

а҃. Хвали́те бг҃а во ст҃ы́хъ є҆гѡ̀, хвали́те є҆го̀ во ᲂу҆тверже́нїи си́лы є҆гѡ̀:

в҃. Хвали́те є҆го̀ ꙾на си́лахъ꙾ ⁵⁶ є҆гѡ̀, хвали́те є҆го̀ по мно́жествꙋ вели́чествїѧ є҆гѡ̀:

г҃. Хвали́те є҆го̀ во гла́сѣ трꙋ́бнѣмъ, хвали́те є҆го̀ во ѱалти́ри и҆ гꙋ́слехъ:

д҃. Хвали́те є҆го̀ въ тѷмпа́нѣ и҆ ли́цѣ, хвали́те є҆го̀ во стрꙋ́нахъ и҆ ѻ҆рга́нѣ:

є҃. Хвали́те є҆го̀ въ кѷмва́лѣхъ доброгла́сныхъ, хвали́те є҆го̀ въ кѷмва́лѣхъ восклица́нїѧ.

ѕ҃. Всѧ́кое дыха́нїе да хва́литъ гдⷭ҇а.

Сла́ва, и҆ ны́нѣ: а҆ллилꙋ́їа.

Се́й ѱало́мъ ѻ҆со́бь пи́санъ, дв҃довъ, и҆ внѣ̀ числа̀ р҃н ѱалмѡ́въ, внегда̀ є҆динобо́рствоваше на голїа́ѳа.

Ма́лъ бѣ́хъ въ бра́тїи мое́й и҆ ю҆́ншїй въ домꙋ̀ ѻ҆тца̀ моегѡ̀: пасо́хъ ѻ҆́вцы ѻ҆тца̀ моегѡ̀. Рꙋ́цѣ моѝ сотвори́стѣ ѻ҆рга́нъ, и҆ пе́рсты моѝ соста́виша ѱалти́рь. И҆ кто̀ возвѣсти́тъ гдⷭ҇еви моемꙋ̀; Са́мъ гдⷭ҇ь, са́мъ ᲂу҆слы́шитъ: са́мъ посла̀ а҆́гг҃ла своего̀, и҆ взѧ́тъ мѧ̀ ѿ ѻ҆ве́цъ ѻ҆тца̀ моегѡ̀, и҆ пома́за мѧ̀ є҆ле́емъ пома́занїѧ своегѡ̀. Бра́тїѧ моѧ̑ добрѝ и҆ вели́цы: и҆ не бл҃говолѝ въ ни́хъ гдⷭ҇ь. И҆зыдо́хъ въ срѣ́тенїе и҆ноплеме́нникꙋ, и҆ проклѧ́тъ мѧ̀ і҆́дѡлы свои́ми. А҆́зъ же и҆сто́ргнꙋвъ ме́чь ѿ негѡ̀, ѡ҆безгла́вихъ є҆го̀ и҆ ѿѧ́хъ поноше́нїе ѿ сынѡ́въ і҆и҃левыхъ.

По к҃-й каѳі́смѣ, трист҃о́е.

Та́же тропарѝ, гла́съ и҃:

И҆сполне́нїе всѣ́хъ бл҃ги́хъ ты̀ є҆сѝ хрⷭ҇тѐ мо́й, и҆спо́лни ра́дости и҆ весе́лїѧ дꙋ́шꙋ мою̀, и҆ сп҃си́ мѧ, ꙗ҆́кѡ є҆ди́нъ многомлⷭ҇тивъ.

Сла́ва: А҆́ще и҆ согрѣши́хъ, хрⷭ҇тѐ сп҃се мо́й, пред̾ тобо́ю, и҆но́гѡ бг҃а ра́звѣ тебѐ не вѣ́мъ: дерза́ю же на твоѐ бл҃гоꙋтро́бїе: ѡ҆браща́ющагосѧ прїими́ мѧ бл҃гоꙋтро́бне ѻ҆́ч҃е, и҆ сн҃е є҆диноро́дне, и҆ дш҃е ст҃ы́й, ꙗ҆́кѡ блꙋ́днаго сы́на, и҆ сп҃си́ мѧ.

И҆ ны́нѣ: И҆но́гѡ прибѣ́жища, и҆ те́плагѡ предста́тельства, ра́звѣ тебѐ не вѣ́мъ: ꙗ҆́кѡ дерзнове́нїе и҆мꙋ́щи ко и҆з̾ тебѐ рожде́нномꙋ, влⷣчце помозѝ, и҆ сп҃си́ мѧ раба̀ твоего̀.

Гдⷭ҇и поми́лꙋй, м҃. и҆ мл҃тва:

Гдⷭ҇и і҆и҃се хрⷭ҇тѐ бж҃е мо́й, поми́лꙋй мѧ̀ грѣ́шнаго, и҆ прости́ ми недосто́йномꙋ рабꙋ̀ твоемꙋ̀, є҆ли̑ка тѝ согрѣши́хъ чрез̾ всѐ живота̀ моегѡ̀ вре́мѧ, и҆ да́же до дне́сь, и҆ а҆́ще что̀ ꙗ҆́кѡ человѣ́къ согрѣши́хъ, вѡ́льнаѧ моѧ̑ прегрѣшє́нїѧ и҆ невѡ́льнаѧ, дѣ́ломъ и҆ сло́вомъ, ꙗ҆̀же ᲂу҆мо́мъ и҆ мы́слїю, ꙗ҆̀же ѿ совосхище́нїѧ и҆ невнима́нїѧ, и҆ мно́гїѧ моеѧ̀ лѣ́ности и҆ небреже́нїѧ. А҆́ще же и҆́менемъ твои́мъ клѧ́хсѧ, а҆́ще же лжеклѧ́хсѧ, и҆лѝ хꙋ́лихъ мы́слїю, и҆лѝ кого̀ ᲂу҆кори́хъ, и҆лѝ ѡ҆клевета́хъ, и҆лѝ ѡ҆печа́лихъ, и҆лѝ въ нѣ́чесомъ прогнѣ́вахъ, и҆лѝ ѡ҆крадо́хъ, и҆лѝ блꙋ́дствовахъ, и҆лѝ солга́хъ, и҆лѝ та́йнѡ ꙗ҆до́хъ: и҆лѝ дрꙋ́гъ дости́же ко мнѣ̀, и҆ презрѣ́хъ є҆го̀, и҆лѝ бра́та ѡ҆скорби́хъ и҆ преѡгорчи́хъ: и҆лѝ стоѧ́щꙋ мѝ на моли́твѣ и҆ ѱалмопѣ́нїи ᲂу҆́мъ мо́й лꙋка́вый на лꙋка̑ваѧ ѡ҆бхожда́ше: и҆лѝ па́че лѣ́пагѡ наслади́хсѧ, и҆лѝ безꙋ́мнѡ смѣѧ́хсѧ, и҆лѝ кощꙋ́ннѡ глаго́лахъ, и҆лѝ тщесла́вихсѧ, и҆лѝ горди́хсѧ, и҆лѝ добро́тꙋ сꙋ́етнꙋю ви́дѣхъ, и҆ ѿ неѧ̀ прельсти́хсѧ, и҆лѝ нелѣ̑паѧ мнѣ̀ поглꙋми́хсѧ: а҆́ще въ чесо́мъ ѡ҆ мл҃твѣ мое́й не ради́хъ: и҆лѝ за́повѣдей дꙋхо́внагѡ моегѡ̀ ѻ҆тца̀ не сохрани́хъ, и҆лѝ праздносло́вихъ, и҆лѝ и҆́но что̀ лꙋка́вое сотвори́хъ: сїѧ̑ бо всѧ̑ и҆ вѧ́щшаѧ си́хъ содѣ́ѧхъ, и҆̀хже нижѐ по́мню: поми́лꙋй гдⷭ҇и, и҆ прости́ ми всѧ̑, да въ ми́рѣ ᲂу҆снꙋ̀ и҆ почі́ю, поѧ̀, и҆ бл҃гословѧ̀, и҆ сла́вѧ тѧ̀, со безнача́льнымъ твои́мъ ѻ҆ц҃е́мъ, и҆ съ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

По соверше́нїи же нѣ́коликихъ каѳі́смъ, и҆лѝ всегѡ̀ ѱалти́рѧ, и҆ пѣ́сней:

Досто́йно є҆́сть: и҆лѝ, Ѡ҆ тебѣ̀ ра́дꙋетсѧ: Трист҃о́е. И҆ по Ѻ҆́ч҃е на́шъ:

Тропарѝ, гла́съ ѕ҃:

Поми́лꙋй на́съ гдⷭ҇и, поми́лꙋй на́съ, всѧ́кагѡ бо ѿвѣ́та недоꙋмѣ́юще, сїю́ ти мл҃твꙋ ꙗ҆́кѡ влⷣцѣ грѣ́шнїи прино́симъ: поми́лꙋй на́съ.

Сла́ва: Чⷭ҇тно́е прⷪ҇ро́ка твоегѡ̀ гдⷭ҇и торжество̀, нб҃о цр҃ковь показа̀, съ человѣ́ки ликꙋ́ютъ а҆́гг҃ли. тогѡ̀ мл҃твами хрⷭ҇тѐ бж҃е, въ ми́рѣ ᲂу҆пра́ви живо́тъ на́шъ, да пое́мъ тѝ: а҆ллилꙋ́їа.

И҆ ны́нѣ: Мнѡ́гаѧ мно́жєства мои́хъ, бцⷣе, прегрѣше́нїй: къ тебѣ̀ прибѣго́хъ чⷭ҇таѧ, сп҃се́нїѧ тре́бꙋѧ. посѣтѝ немощствꙋ́ющꙋю мою̀ дꙋ́шꙋ, и҆ молѝ сн҃а твоего̀ и҆ бг҃а на́шего, да́ти мѝ ѡ҆ставле́нїе, ꙗ҆̀же содѣ́ѧхъ лю́тыхъ, є҆ди́на бл҃гослове́ннаѧ.

Та́же, Гдⷭ҇и поми́лꙋй, м҃.

И҆ покло́нѡвъ, є҆ли́кѡ мо́щно, съ мл҃твою: Гдⷭ҇и и҆ влⷣко живота̀ моегѡ̀:

Посе́мъ глаго́ли мл҃твꙋ сїю̀ со внима́нїемъ:

Многомлⷭ҇тиве и҆ премлⷭ҇тиве гдⷭ҇и, и҆ всегѡ̀ добра̀ да́телю чл҃вѣколю́бче, и҆ всеѧ̀ вселе́нныѧ цр҃ю̀ многоимени́тый, влⷣко и҆ гдⷭ҇и, ни́щъ и҆ ᲂу҆бо́гъ є҆́смь а҆́зъ, дерза́ю призыва́ти чꙋ́дное и҆ стра́шное и҆ ст҃о́е и҆́мѧ твоѐ, є҆гѡ́же всѧ̀ тва́рь нбⷭ҇ныхъ си́лъ стра́хомъ трепе́щꙋтъ: ни́зꙋ на землѝ неизрече́ннагѡ твоегѡ̀ чл҃вѣколю́бїѧ смотре́нїе ᲂу҆диви́лъ є҆сѝ, посла́нїемъ возлю́бленнагѡ твоегѡ̀ ѻ҆́трока. є҆го́же ѿ безнача́льныхъ нѣ́дръ твоеѧ̀ ѻ҆ч҃ескїѧ сла́вы, неразлꙋ́чнымъ бж҃ество́мъ ѿры́гнꙋлъ є҆сѝ, да человѣ́ки со а҆́гг҃лы во є҆ди́нъ соста́въ ᲂу҆стро́итъ. Помѧнѝ, гдⷭ҇и, моегѡ̀ ᲂу҆ны́нїѧ смире́нїе: ка́лъ сы́й и҆ пе́рсть, тебѐ неизглаго́ланнаго свѣ́та призыва́ю, не́мощїю пло́ти ѡ҆бложе́нъ, ю҆́же млⷭ҇тивнѣ сло́во твоѐ понесѐ, и҆ сме́ртїю свое́ю ѿ рабо́ты вра́жїѧ свободи́лъ є҆́сть дꙋ́шы на́шѧ, да ѻ҆́бщники всѧ̑, и҆̀же вѣ́рою ꙗ҆ре́мъ рабо́ты твоеѧ̀ на сѧ̀ взе́мшыѧ, сла́вы твоеѧ̀ сподо́битъ и҆̀хъ, ѿ неѧ́же сатана̀ льсти́вый ѿпадѐ. Поми́лꙋй мѧ̀ ѡ҆мраче́ннаго грѣхо́вными по́мыслы, возведѝ ᲂу҆́мъ мо́й ᲂу҆да́вленный те́рнїемъ лѣ́ности, и҆ лѧди́ною непоко́рства: ᲂу҆твердѝ се́рдце моѐ по тебѣ̀ горѣ́ти, ѻ҆чи́ма мои́ма и҆сто́чникъ сле́зъ послѝ, и҆ на коне́цъ и҆схо́да дꙋшѝ моеѧ̀, сотвори́ мѧ безпоро́чна твоего̀ ᲂу҆го́дника, наставлѧ́ѧ мѧ̀ къ тебѣ̀ подвиза́тисѧ ᲂу҆се́рднѡ. Помѧнѝ гдⷭ҇и, роди́тели моѧ̑ млⷭ҇рдїемъ твои́мъ, и҆ всѧ̑ бли̑жнїѧ моѧ̑, и҆ бра́тїю, и҆ дрꙋ́ги, и҆ сосѣ́ды, и҆ всѧ̑ правосла̑вныѧ хрⷭ҇тїа́ны, и҆ сп҃си́ мѧ мл҃твами всѣ́хъ ст҃ы́хъ: и҆ прїимѝ въ че́сть сїѧ̑ ѱалмы̀ и҆ мл҃твы, ꙗ҆̀же глаго́лахъ пред̾ тобо́ю за сѧ̀, и҆ не ме́рзко тѝ бꙋ́ди съ воздыха́нїемъ моле́нїе сїѐ, ꙗ҆́кѡ млⷭ҇тивъ сы́й и҆ чл҃вѣколю́бецъ, и҆ тебѐ безнача́льнаго ѻ҆ц҃а̀ сла́вимъ, со є҆диноро́днымъ твои́мъ сн҃омъ, и҆ со ст҃ы́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Посе́мъ, Чⷭ҇тнѣ́йшꙋю херꙋві̑мъ: Сла́ва: и҆ ны́нѣ: Гдⷭ҇и поми́лꙋй, три́жды. Бл҃гословѝ. А҆́ще і҆ере́й, конча́етъ сщ҃е́ннически. А҆́ще ли просты́й, конча́етъ си́це:

Гдⷭ҇и і҆и҃се хрⷭ҇тѐ сн҃е бж҃їй, мл҃твъ ра́ди пречⷭ҇тыѧ твоеѧ̀ мт҃ре, си́лою чⷭ҇тна́гѡ и҆ животворѧ́щагѡ крⷭ҇та̀, и҆ ст҃ы́хъ нбⷭ҇ныхъ си́лъ безпло́тныхъ, и҆ прпⷣбныхъ и҆ бг҃оно́сныхъ ѻ҆тє́цъ на́шихъ, и҆ ст҃а́гѡ прⷪ҇ро́ка дв҃да, и҆ всѣ́хъ ст҃ы́хъ, поми́лꙋй и҆ сп҃си́ мѧ грѣ́шнаго, ꙗ҆́кѡ бл҃гъ и҆ чл҃вѣколю́бецъ.

Оу҆ста́въ ст҃ы́хъ ѻ҆тє́цъ,

бг҃омъ пре́данный всѣ̑мъ хотѧ́щымъ пѣ́ти ѱалти́рь, въ молча́нїи живꙋ́щымъ мона́хѡмъ, и҆ всѣ̑мъ бг҃обоѧ̑знивымъ правосла̑внымъ хрⷭ҇тїа́нѡмъ.

Бг҃оно́снїи, и҆ прпⷣбнїи, и҆ пребл҃же́ннїи ѻ҆тцы̀ на́ши, всемꙋ̀ мі́рꙋ свѣти̑ла, землені́и а҆́гг҃ли, нбⷭ҇нїи человѣ́цы, и҆спе́рва ѿ ст҃а́гѡ дх҃а преда̑нїѧ и҆́ночествовати навы́кше, и҆ бл҃года́тїю бж҃їею ѿню́дъ просвѣще́ни бы́ша, хрⷭ҇та̀ всели́вше въ прекра̑сныѧ и҆́хъ дꙋ́шы, чи́стагѡ ра́ди житїѧ̀ и҆́хъ, и҆ побѣ́дꙋ показа́ша на дїа́вола, а҆́ще и҆ мно́гими ѿ негѡ̀ и҆скꙋше́нїи разжиза́еми: но ѡ҆долѣ́вше є҆го̀, ꙗ҆снѣ́е зла́та и҆скꙋше́на сїѧ́ютъ, и҆ па́че снѣ́га ᲂу҆бѣли́шасѧ, и҆ невеще́ствєнна зла́та кри́ла впери́вше мы́слєннаѧ, на нб҃са̀ возлетѣ́ша, ꙗ҆́кѡ нб҃опа́рнїи ѻ҆рлѝ, на́мъ ѡ҆ста́виша ᲂу҆ста́въ, бг҃омъ пре́даннагѡ пѣ́нїѧ и҆́хъ, и҆ ᲂу҆милє́нныѧ мл҃твы, и҆́миже бг҃а млⷭ҇тива себѣ̀ сотвори́ша. ѻ҆́ви бо и҆́хъ часы̀ съ междоча́сїемъ поѧ́хꙋ, соста́вивше и҆збра̑нныѧ ѱалмы̀, съ тропарѝ и҆ съ мл҃твами, и҆ нареко́ша сїѧ̑ часосло́вецъ: Дрꙋзі́и є҆ди́нъ ѱалти́рь поѧ́хꙋ: и҆ні́и же, подви́жнѣйшїи сꙋ́ще, по всѧ́кой каѳі́смѣ, трист҃о́е съ покло́ны, и҆ съ тропарѝ покаѧ́нны, и҆ съ мл҃твами ѱалти́рь поѧ́хꙋ.

Ѿ недѣ́ли а҆нтїпа́схи, ꙗ҆́же є҆́сть ѳѡмина̀, и҆ до ѿда́нїѧ воздви́женїѧ чⷭ҇тна́гѡ и҆ животворѧ́щагѡ крⷭ҇та̀ гдⷭ҇нѧ, начина́емъ стїхологиса́ти ѱалти́рь си́це:

Въ сꙋббѡ́тꙋ свѣ́тлыѧ недѣ́ли ве́чера, глаго́лемъ а҃-ю каѳі́смꙋ, Бл҃же́нъ мꙋ́жъ:

Въ недѣ́лю на ᲂу҆́трени, каѳі́сма в҃-ѧ, г҃-ѧ, а҆ з҃і-ю каѳі́смꙋ въ сїю̀ недѣ́лю не глаго́лемъ, зане́же пое́тсѧ полѷеле́й.

Въ про́чыѧ же воскрⷭ҇ныѧ дни̑, є҆гда̀ не пое́тсѧ полѷеле́й, на ᲂу҆́трени глаго́лемъ каѳі́смꙋ з҃і-ю съ тропарѝ є҆ѧ̀.

[зрѝ] А҆́ще же прилꙋчи́тсѧ въ недѣ́лю пра́здникъ гдⷭ҇скїй, и҆лѝ бцⷣы, и҆лѝ пра́зднꙋемагѡ ст҃а́гѡ, по двꙋ̀ каѳі́смахъ полѷеле́й, и҆ по велича́нїи не пѣ́вше Сла́ва, и҆ ны́нѣ, и҆ А҆ллилꙋ́їа, пое́мъ тропарѝ: А҆́гг҃льскїй собо́ръ: и҆ по є҆ктенїѝ сѣда́льны пра́здника, и҆лѝ ст҃а́гѡ.

Въ недѣ́лю ве́чера, во ве́сь го́дъ никогда́же глаго́летсѧ ѱалти́рь.

А҆́ще ли же прилꙋчи́тсѧ празднество̀, тогда̀ пое́мъ, Бл҃же́нъ мꙋ́жъ: а҃-й а҆нтїфѡ́нъ.

Въ понедѣ́льникъ на ᲂу҆́трени, каѳі́сма д҃-ѧ, є҃-ѧ. На вече́рни, каѳі́сма ѕ҃-ѧ.

Во вто́рникъ на ᲂу҆́трени, каѳі́сма з҃-ѧ, и҃-ѧ. На вече́рни, каѳі́сма ѳ҃-ѧ.

Въ сре́дꙋ на ᲂу҆́трени, каѳі́сма і҃-ѧ, а҃і-ѧ. На вече́рни, каѳі́сма в҃і-ѧ.

Въ четверто́къ на ᲂу҆́трени, каѳі́сма г҃і-ѧ, д҃і-ѧ. На Вече́рни, каѳі́сма є҃і-ѧ.

Въ пѧто́къ на ᲂу҆́трени, каѳі́сма ѳ҃і-ѧ, к҃-ѧ. На вече́рни, каѳі́сма и҃і-ѧ.

Въ сꙋббѡ́тꙋ на ᲂу҆́трени, каѳі́сма ѕ҃і-ѧ, з҃і-ѧ.

На полꙋ́нощницѣ же въ понедѣ́льникъ, во вто́рникъ, въ сре́дꙋ, въ четверто́къ, въ пѧто́къ, во ве́сь го́дъ глаго́лемъ каѳі́смꙋ з҃і-ю: Бл҃же́ни непоро́чнїи: Въ сꙋббѡ́тꙋ же на полꙋ́нощницѣ всегда̀ глаго́лемъ каѳі́смꙋ ѳ҃- ю: Тебѣ̀ подоба́етъ:

По ѿда́нїи же воздви́женїѧ чⷭ҇тна́гѡ крⷭ҇та̀, ѿ к҃в-гѡ днѐ мцⷭ҇а септе́мврїа, до к҃-гѡ днѐ мцⷭ҇а деке́мврїа, начина́емъ ѱалти́рь глаго́лати си́це:

Въ сꙋббѡ́тꙋ на вече́рни, каѳі́сма а҃-ѧ, Бл҃же́нъ мꙋ́жъ:

Въ недѣ́лю на ᲂу҆́трени, каѳі́сма в҃-ѧ, г҃-ѧ: прилага́емъ же и҆ полѷеле́й, си́рѣчь многомлⷭ҇тиво, ѱало́мъ рл҃д: Хвали́те и҆́мѧ гдⷭ҇не: и҆ рл҃є: И҆сповѣ́дайтесѧ гдⷭ҇еви: И҆ а҆́бїе тропарѝ: А҆́гг҃льскїй собо́ръ: и҆ ѵ҆пакоѝ гла́са.

А҆́ще же бꙋ́детъ гдⷭ҇скїй пра́здникъ, и҆лѝ бцⷣы, и҆лѝ нѣ́кїй ст҃ы́й пра́зднꙋемый въ недѣ́лю, тогда̀ по ѱалмѣ́хъ: Хвали́те и҆́мѧ гдⷭ҇не: и҆ И҆сповѣ́дайтесѧ гдⷭ҇еви: пра́здникꙋ велича́нїе, и҆ ѱало́мъ и҆збра́нный, и҆ тропарѝ, А҆́гг҃льскїй собо́ръ: и҆ сѣда́льны пра́здника.

Въ понедѣ́льникъ по воздви́женїи, на ᲂу҆́трени, каѳі́сма д҃-ѧ, є҃-ѧ, ѕ҃-ѧ: а҆ на вече́рни во всю̀ седми́цꙋ глаго́лемъ каѳі́смꙋ и҃і-ю.

Во вто́рникъ на ᲂу҆́трени, каѳі́сма з҃-ѧ, и҃-ѧ, ѳ҃-ѧ.

Въ сре́дꙋ на ᲂу҆́трени, каѳі́сма і҃-ѧ, а҃і-ѧ, в҃і-ѧ.

Въ четверто́къ, на ᲂу҆́трени, каѳі́сма г҃і-ѧ, д҃і-ѧ, є҃і-ѧ.

Въ пѧто́къ, на ᲂу҆́трени, каѳі́сма ѳ҃і-ѧ, к҃-ѧ.

Въ сꙋббѡ́тꙋ, на ᲂу҆́трени, каѳі́сма ѕ҃і-ѧ, з҃і-ѧ.

Є҆гда́ же прилꙋчи́тсѧ въ тѣ̀ дни̑ празднество̀, въ ни́хже глаго́летсѧ на ᲂу҆́трени по г҃ каѳі́смы, и҆ тогда̀ глаго́лемъ на ᲂу҆́трени двѣ̀ каѳі́смы, а҆ г҃-ю рѧдовꙋ́ю на вече́рни. Ꙗ҆́кѡ во все́мъ ѻ҆́бщемъ ᲂу҆ста́вѣ, ѿ к҃в-гѡ днѐ септе́мврїа мцⷭ҇а, повелѣва́етъ начина́ти на ᲂу҆́трени каѳі́смы трѝ: здѣ́ же ѿ недѣ́ли, ꙗ҆́же по воздви́женїи, є҆́же и҆ мни́тъ мѝ сѧ, и҆ поприлѣ́жнѣе ꙗ҆́кѡ да ѿ недѣ́ли нача́ло взе́млетъ ѱалти́рь. А҆́ще ли ᲂу҆́бѡ пре́жде к҃-гѡ и҆лѝ по к҃-мъ днѝ бꙋ́детъ недѣ́лѧ: всѧ́кѡ и҆ всегда̀ ѿ понедѣ́льника начина́емъ трѝ каѳі́смы.

Ѿ к҃-гѡ же днѐ деке́мврїа мцⷭ҇а, до д҃і-гѡ і҆аннꙋа́рїа мцⷭ҇а, до́ндеже ѿда́стсѧ пра́здникъ ст҃а́гѡ бг҃оѧвле́нїѧ.

Стїхологисꙋ́емъ па́ки ѱалти́рь, ꙗ҆́коже и҆ въ недѣ́лю а҆нтїпа́схи, ꙗ҆́же є҆́сть ѳѡмина̀, по двѣ̀ каѳі́смы на ᲂу҆́трени: а҆ на вече́рни г҃-ю рѧдовꙋ́ю.

Ѿ пѧ́тагѡ же на́десѧть днѐ і҆аннꙋа́рїа мцⷭ҇а, до сꙋббѡ́ты, ꙗ҆́же є҆́сть пред̾ недѣ́лею ѡ҆ блꙋ́дномъ сы́нѣ, стїхологисꙋ́емъ па́ки на ᲂу҆́трени, по г҃ каѳі́смы, а҆ на вече́рни и҃і-ю каѳі́смꙋ: Ко гдⷭ҇ꙋ внегда̀ скорбѣ́ти мѝ:

Въ двѣ́ же недѣ̑ли, въ мѧсопꙋ́стнꙋю и҆ сы́рнꙋю, стїхологисꙋ́емъ на ᲂу҆́трени по двѣ̀ каѳі́смы, а҆ на вече́рни г҃-ю рѧдовꙋ́ю, ма́лагѡ ра́ди поко́ѧ бра́тїи.

Въ недѣ́лю же блꙋ́днагѡ, и҆ въ мѧсопꙋ́стнꙋю, и҆ въ сы́рнꙋю, на ᲂу҆́трени, по ѱалмѣ́хъ, Хвали́те и҆́мѧ гдⷭ҇не: и҆ И҆сповѣ́дайтесѧ гдⷭ҇еви: припѣва́емъ и҆ тре́тїй ѱало́мъ рл҃ѕ: На рѣка́хъ вавѷлѡ́нскихъ, со а҆ллилꙋ́їею кра́сною. Та́же тропарѝ: А҆́гг҃льскїй собо́ръ: и҆ ѵ҆пакоѝ гла́са.

Подоба́етъ вѣ́дати, ꙗ҆́кѡ ѿ сеѧ̀ сы́рныѧ недѣ́ли да́же до воздви́женїѧ чⷭ҇тна́гѡ крⷭ҇та̀ ᲂу҆пражднѧ́етсѧ полѷеле́й, пое́тсѧ же то́кмѡ во бдѣ́нїихъ влⷣчнихъ пра́здникѡвъ.

По ѿда́нїи же воздви́женїѧ чⷭ҇тна́гѡ и҆ животворѧ́щагѡ крⷭ҇та̀ гдⷭ҇нѧ, и҆ до недѣ́ли сыропꙋ́стныѧ, кромѣ̀ предпра́зднства, и҆ попра́зднства ржⷭ҇тва̀ хрⷭ҇то́ва и҆ бг҃оѧвле́нїѧ, въ собо́рнѣй вели́цѣй цр҃кви, и҆ въ про́чїихъ собо́рныхъ цр҃квахъ, въ воскрⷭ҇ныѧ дни̑ на ᲂу҆́трени пое́тсѧ полѷеле́й, ꙗ҆́коже и҆ въ вели́кихъ пречⷭ҇тны́хъ ѻ҆би́телехъ.

[зрѝ] Оу҆ста́въ ѡ҆ ѱалти́ри, ка́кѡ до́лжно є҆́сть глаго́лати во ст҃ы́й вели́кїй по́стъ:

Въ недѣ́лю а҃-ю, в҃-ю, г҃-ю, д҃-ю, ѕ҃-ю, ꙗ҆́кѡ да прочтꙋ́тсѧ всѧ̑ каѳі̑смы по своемꙋ̀ вре́мени, а҆ не ѡ҆ста́нетсѧ ни є҆ди́на каѳі́сма. Въ сꙋббѡ́тꙋ на вече́рни, каѳі́сма а҃-ѧ, Бл҃же́нъ мꙋ́жъ: Въ недѣ́лю на ᲂу҆́трени, каѳі́сма в҃-ѧ, г҃-ѧ, з҃і-ѧ. Въ понедѣ́льникъ на ᲂу҆́трени, каѳі́сма д҃-ѧ, є҃-ѧ, ѕ҃-ѧ. На а҃-мъ часѣ̀ каѳі́смы нѣ́сть. На часѣ́хъ каѳі́сма з҃-ѧ, и҃-ѧ, ѳ҃-ѧ. На вече́рни по всѧ̑ дни̑ въ си́хъ пѧтѝ дне́хъ глаго́летсѧ каѳі́сма и҃і-ѧ: Ко гдⷭ҇ꙋ внегда̀ скорбѣ́ти мѝ:

Во вто́рникъ на ᲂу҆́трени, каѳі́сма і҃-ѧ, а҃і-ѧ, в҃і-ѧ. На а҃-мъ часѣ̀ каѳі́сма г҃і-ѧ. На часѣ́хъ каѳі́сма д҃і- ѧ, є҃і-ѧ, ѕ҃і-ѧ.

Въ сре́дꙋ на ᲂу҆́трени, каѳі́сма ѳ҃і-ѧ, к҃-ѧ, а҃-ѧ. На а҃- мъ часѣ̀, каѳі́сма в҃-ѧ. На часѣ́хъ, каѳі́сма г҃-ѧ, д҃-ѧ, є҃-ѧ.

Въ четверто́къ на ᲂу҆́трени, каѳі́сма ѕ҃-ѧ, з҃-ѧ, и҃-ѧ. На а҃-мъ часѣ̀ каѳі́сма ѳ҃-ѧ. На часѣ́хъ, каѳі́сма і҃-ѧ, а҃і-ѧ, в҃і-ѧ.

Въ пѧто́къ на ᲂу҆́трени, каѳі́сма г҃і-ѧ, д҃і-ѧ, є҃і-ѧ. На а҃-мъ часѣ̀ нѣ́сть каѳі́смы. На часѣ́хъ, каѳі́сма ѳ҃і-ѧ, к҃-ѧ. На ѳ҃-мъ часѣ̀ нѣ́сть каѳі́смы.

Въ сꙋббѡ́тꙋ на ᲂу҆́трени, каѳі́сма ѕ҃і-ѧ, з҃і-ѧ.

И҆ та́кѡ и҆спо́лнитсѧ ᲂу҆ста́въ ѱалти́ри.

[зрѝ] Оу҆ка́зъ ѡ҆ каѳі́смахъ пѧ́тыѧ недѣ́ли ст҃а́гѡ вели́кагѡ поста̀, ка́кѡ глаго́лати.

Въ сꙋббѡ́тꙋ на вече́рни, каѳі́сма а҃-ѧ. Въ недѣ́лю на ᲂу҆́трени, каѳі́сма в҃-ѧ, г҃-ѧ, з҃і-ѧ, а҆ на вече́рни каѳі́смы нѣ́сть.

Въ понедѣ́льникъ на ᲂу҆́трени, каѳі́сма д҃-ѧ, є҃-ѧ, ѕ҃-ѧ. На а҃-мъ часѣ̀ каѳі́смы нѣ́сть. На часѣ́хъ, каѳі́сма з҃- ѧ, и҃-ѧ, ѳ҃-ѧ. На вече́рни каѳі́сма і҃-ѧ.

Во вто́рникъ на ᲂу҆́трени, каѳі́сма а҃і-ѧ, в҃і-ѧ, г҃і-ѧ. На пе́рвомъ часѣ̀ каѳі́сма д҃і-ѧ. На часѣ́хъ, каѳі́сма є҃і-ѧ, ѕ҃і-ѧ, и҃і-ѧ. На вече́рни, каѳі́сма ѳ҃і-ѧ.

Въ сре́дꙋ на ᲂу҆́трени, каѳі́сма к҃-ѧ, а҃-ѧ, в҃-ѧ. На а҃-мъ часѣ̀ каѳі́сма г҃-ѧ. На часѣ́хъ, каѳі́сма д҃-ѧ, є҃-ѧ, ѕ҃- ѧ. На вече́рни каѳі́сма з҃-ѧ.

Въ четверто́къ на ᲂу҆́трени, каѳі́сма и҃-ѧ. На а҃-мъ часѣ̀ каѳі́смы нѣ́сть. На часѣ́хъ, каѳі́сма ѳ҃-ѧ, і҃-ѧ, а҃і-ѧ. На вече́рни каѳі́сма в҃і-ѧ.

Въ пѧто́къ на ᲂу҆́трени, каѳі́сма г҃і-ѧ, д҃і-ѧ, є҃і-ѧ. На пе́рвомъ часѣ̀ каѳі́смы нѣ́сть. На часѣ́хъ, каѳі́сма ѳ҃і-ѧ, к҃-ѧ. На ѳ҃-мъ часѣ̀ каѳі́смы нѣ́сть. На вече́рни каѳі́сма и҃і-ѧ.

И҆ та́кѡ и҆спо́лнитсѧ ᲂу҆ста́въ ѱалти́ри.

Подоба́етъ вѣ́дати, ка́кѡ глаго́лати ѱалти́рь во ст҃ꙋ́ю вели́кꙋю седми́цꙋ стрⷭ҇тны́ѧ недѣ́ли.

И҆звѣ́стно же да бꙋ́детъ, ꙗ҆́кѡ во ст҃ꙋ́ю вели́кꙋю седми́цꙋ сїю̀, є҆ди́ною соверша́емъ ѱалти́рь въ цр҃кви.

Стїхологисꙋ́етъ же сѧ си́це:

Въ сꙋббѡ́тꙋ ла́заревꙋ на вече́рни, каѳі́сма а҃-ѧ.

Въ недѣ́лю цвѣтнꙋ́ю на ᲂу҆́трени, каѳі́сма в҃-ѧ, г҃-ѧ.

Въ понедѣ́льникъ на ᲂу҆́трени, каѳі́сма д҃-ѧ, є҃-ѧ, ѕ҃-ѧ. На пе́рвомъ часѣ̀ каѳі́смы нѣ́сть. На часѣ́хъ, каѳі́сма з҃-ѧ, и҃-ѧ. На ѳ҃-мъ часѣ̀ каѳі́смы нѣ́сть. На вече́рни каѳі́сма и҃і-ѧ.

Во вто́рникъ на ᲂу҆́трени, каѳі́сма ѳ҃-ѧ, і҃-ѧ, а҃і-ѧ. На пе́рвомъ часѣ̀ каѳі́смы нѣ́сть. На часѣ́хъ, каѳі́сма в҃і-ѧ, г҃і-ѧ. На ѳ҃-мъ часѣ̀ каѳі́смы нѣ́сть. На вече́рни каѳі́сма и҃і-ѧ.

Въ сре́дꙋ вели́кꙋю на ᲂу҆́трени каѳі́сма д҃і-ѧ, є҃і-ѧ, ѕ҃і-ѧ. На пе́рвомъ часѣ̀ каѳі́смы нѣ́сть. На часѣ́хъ, каѳі́сма ѳ҃і-ѧ, к҃-ѧ. Въ тꙋ́же сре́дꙋ на вече́рни каѳі́сма и҃і-ѧ, без̾ покло́новъ.

И҆ та́кѡ ѿлага́етсѧ ѱалти́рь и҆ до сꙋббѡ́ты ѳѡмины̀. То́кмѡ пое́мъ въ сꙋббѡ́тꙋ вели́кꙋю на ᲂу҆́трени каѳі́смꙋ з҃і-ю, съ припѣ́вы, на трѝ статїи̑.

И҆зше́дшей ᲂу҆́бѡ дꙋшѝ ѿ тѣ́ла, а҆́бїе і҆ере́й начина́етъ:

Бл҃гослове́нъ бг҃ъ на́шъ: Трист҃о́е. И҆ по Ѻ҆́ч҃е на́шъ: Ꙗ҆́кѡ твоѐ є҆́сть црⷭ҇тво:

Посе́мъ съ предстоѧ́щими пое́тъ, и҆лѝ чте́тъ, тропарѝ сїѧ̑:

Со дꙋ́хи првⷣныхъ сконча́вшихсѧ, дꙋ́шꙋ раба̀ твоегѡ̀ сп҃се ᲂу҆поко́й, сохранѧ́ѧ ю҆̀ во бл҃же́ннѣй жи́зни, ꙗ҆́же ᲂу҆ тебѐ чл҃вѣколю́бче.

Въ поко́ищи твое́мъ гдⷭ҇и, и҆дѣ́же всѝ ст҃і́и твоѝ ᲂу҆покоева́ютсѧ, ᲂу҆поко́й и҆ дꙋ́шꙋ раба̀ твоегѡ̀, ꙗ҆́кѡ є҆ди́нъ є҆сѝ чл҃вѣколю́бецъ.

Сла́ва: Ты̀ є҆сѝ бг҃ъ соше́дый во а҆́дъ, и҆ ᲂу҆́зы ѡ҆кова́нныхъ разрѣши́вый, са́мъ и҆ дꙋ́шꙋ раба̀ твоегѡ̀ ᲂу҆поко́й.

И҆ ны́нѣ: Є҆ди́на чⷭ҇таѧ и҆ непоро́чнаѧ дв҃о, бг҃а без̾ сѣ́мене ро́ждшаѧ, молѝ сп҃сти́сѧ дꙋшѝ є҆гѡ̀.

По си́хъ же і҆ере́й глаго́летъ є҆ктенїю̀ сїю̀:

Поми́лꙋй на́съ бж҃е, по вели́цѣй млⷭ҇ти твое́й, мо́лимъ ти сѧ, ᲂу҆слы́ши и҆ поми́лꙋй.

Гдⷭ҇и поми́лꙋй, три́жды.

Є҆щѐ мо́лимсѧ ѡ҆ ᲂу҆покое́нїи дꙋшѝ ᲂу҆со́пшагѡ раба̀ бж҃їѧ [и҆́мⷬ҇къ,] и҆ ѡ҆ є҆́же прости́тисѧ є҆мꙋ̀ всѧ́комꙋ прегрѣше́нїю во́льномꙋ же и҆ нево́льномꙋ.

Гдⷭ҇и поми́лꙋй, три́жды.

Ꙗ҆́кѡ да гдⷭ҇ь бг҃ъ ᲂу҆чини́тъ дꙋ́шꙋ є҆гѡ̀, и҆дѣ́же пра́веднїи ᲂу҆покоева́ютсѧ.

Гдⷭ҇и поми́лꙋй, три́жды.

Млⷭ҇ти бж҃їѧ, црⷭ҇тва нбⷭ҇нагѡ, и҆ ѡ҆ставле́нїѧ грѣхѡ́въ є҆гѡ̀, ᲂу҆ хрⷭ҇та̀ безсме́ртнагѡ цр҃ѧ̀ и҆ бг҃а на́шегѡ про́симъ.

Пода́й гдⷭ҇и.

І҆ере́й: дⷭ҇ꙋ помо́лимсѧ. Кли́рїцы: Гдⷭ҇и поми́лꙋй.

І҆ере́й:

Бж҃е дꙋхѡ́въ, и҆ всѧ́кїѧ пло́ти, сме́рть попра́вый, и҆ дїа́вола ᲂу҆праздни́вый, и҆ живо́тъ мі́рꙋ твоемꙋ̀ дарова́вый, са́мъ гдⷭ҇и поко́й дꙋ́шꙋ ᲂу҆со́пшагѡ раба̀ твоегѡ̀ [и҆́мⷬ҇къ,] въ мѣ́стѣ свѣ́тлѣ, въ мѣ́стѣ ѕла́чнѣ, въ мѣ́стѣ поко́йнѣ, ѿню́дꙋже ѿбѣжѐ болѣ́знь, печа́ль и҆ воздыха́нїе: всѧ́кое согрѣше́нїе содѣ́ѧнное и҆́мъ, сло́вомъ, и҆лѝ дѣ́ломъ, и҆лѝ помышле́нїемъ, ꙗ҆́кѡ бл҃гі́й чл҃вѣколю́бецъ бг҃ъ простѝ: ꙗ҆́кѡ нѣ́сть человѣ́къ, и҆́же жи́въ бꙋ́детъ, и҆ не согрѣши́тъ. ты́ бо є҆ди́нъ кромѣ̀ грѣха̀, пра́вда твоѧ̀, пра́вда во вѣ́ки, и҆ сло́во твоѐ и҆́стина.

Возгла́съ: Ꙗ҆́кѡ ты̀ є҆сѝ воскрⷭ҇нїе, и҆ живо́тъ, и҆ поко́й ᲂу҆со́пшагѡ раба̀ твоегѡ̀ [и҆́мⷬ҇къ,] хрⷭ҇тѐ бж҃е на́шъ: и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.

Кли́рїцы: А҆ми́нь.

Сконча́въ же сїѧ̑ чте́тъ ѱало́мъ ч҃: Живы́й въ по́мощи:

И҆ а҆́бїе пое́тъ, и҆лѝ глаго́летъ канѡ́нъ се́й за преста́вльшагосѧ.

Гла́съ и҃.

Пѣ́снь а҃.

І҆рмо́съ: Во́дꙋ проше́дъ ꙗ҆́кѡ сꙋ́шꙋ:

Сті́хъ: Поко́й гдⷭ҇и дꙋ́шꙋ ᲂу҆со́пшагѡ раба̀ твоегѡ̀.

Ѿве́рзъ ᲂу҆ста̀ моѧ̑ сп҃се, сло́во мѝ пода́ждь, моли́тисѧ млⷭ҇рде, ѡ҆ ны́нѣ преста́вленномъ, да поко́иши дꙋ́шꙋ є҆гѡ̀ влⷣко.

Ме́ртвъ бы́въ пло́тїю сп҃се, и҆ во гро́бѣ положе́нъ съ ме́ртвыми, дꙋ́шꙋ раба̀ твоегѡ̀ поко́й въ мѣ́стѣ ѕла́чнѣ, ꙗ҆́кѡ млⷭ҇рдъ.

Сла́ва: Моле́бный гла́съ мо́й ᲂу҆слы́ши бж҃е трїѷпоста́сне, и҆ ᲂу҆чинѝ дꙋ́шꙋ преста́вленнагѡ въ нѣ́дрѣхъ а҆враа́млихъ, и҆зба́вителю.

И҆ ны́нѣ: Ты̀ пречⷭ҇таѧ бцⷣе, є҆го́же без̾ и҆скꙋ́са мꙋ́жеска заче́нши родила̀ є҆сѝ, молѝ сн҃а твоего̀, пода́ти поко́й рабꙋ̀ твоемꙋ̀ преста́вленномꙋ.

Пѣ́снь г҃.

І҆рмо́съ: Нбⷭ҇нагѡ крꙋ́га верхотво́рче гдⷭ҇и:

Въ мѣ́стѣ ѕла́чнѣ, въ мѣ́стѣ поко́йнѣ, и҆дѣ́же ли́цы ст҃ы́хъ веселѧ́тсѧ, дꙋ́шꙋ раба̀ твоегѡ̀ преста́вленнагѡ поко́й хрⷭ҇тѐ, є҆ди́не млⷭ҇тиве.

И҆дѣ́же ли́цы ст҃ы́хъ, та́мѡ вчинѝ влⷣко, послꙋжи́вшаго тебѣ̀ всѣ́мъ се́рдцемъ, и҆ воздви́гшаго и҆́го твоѐ на ра́мо своѐ, ꙗ҆́кѡ є҆ди́нъ влⷣка живота̀ и҆ сме́рти.

Сла́ва: Нбⷭ҇ный ѻ҆́ч҃е вседержи́телю, и҆ сн҃е є҆диноро́дный, и҆ дш҃е ст҃ы́й и҆схо́дный, пре́зри ᲂу҆ме́ршагѡ согрѣшє́нїѧ, и҆ въ цр҃кви пе́рвенєцъ вселѝ є҆го̀ сла́вити тѧ̀, со всѣ́ми ᲂу҆го́ждшими тебѣ̀.

И҆ ны́нѣ: Ꙗ҆́кѡ мт҃и ст҃а́ѧ прест҃а́гѡ бг҃а влⷣчце всѧ́ческихъ, мр҃і́е бцⷣе, со всѣ́ми ст҃ы́ми сего̀ молѝ, дꙋ́шꙋ поко́ити раба̀ твоегѡ̀ въ нбⷭ҇ныхъ селе́нїихъ.

Пѣ́снь д҃.

І҆рмо́съ: Оу҆слы́шахъ гдⷭ҇и.

Соше́дый въ преиспѡ́днѧѧ хрⷭ҇тѐ, совоздви́глъ є҆сѝ ᲂу҆ме́ршыѧ всѧ̑, и҆ преста́вльшагосѧ ѿ на́съ поко́й сп҃се, ꙗ҆́кѡ ще́дръ.

Никто́же без̾ грѣха̀ є҆́сть, то́кмѡ ты̀ є҆ди́нъ влⷣко: сегѡ̀ ра́ди преста́вленномꙋ и҆ грѣхѝ ѡ҆ста́ви, и҆ въ ра́й того̀ вселѝ.

Сла́ва: Оу҆слы́ши трⷪ҇це ст҃а́ѧ, гла́сы молє́бныѧ, приноси̑мыѧ тебѣ̀ въ цр҃кви ѡ҆ ᲂу҆со́пшемъ, и҆ бг҃онача́льнымъ твои́мъ свѣ́томъ ѡ҆зарѝ дꙋ́шꙋ, ѡ҆мраче́ннꙋю сꙋ́етными приверже́нїи.

И҆ ны́нѣ: Родила̀ є҆сѝ пречⷭ҇таѧ, без̾ мꙋ́жеска сѣ́мене, бг҃а соверше́нна, и҆ чл҃вѣ́ка соверше́нна, взе́млющаго грѣхѝ на́шѧ дв҃о: того̀ молѝ гпⷭ҇жѐ, преста́вльшемꙋсѧ рабꙋ̀ твоемꙋ̀ пода́ти поко́й.

Пѣ́снь є҃.

І҆рмо́съ: Просвѣтѝ на́съ повелѣ́нїи твои́ми гдⷭ҇и: ,

И҆мы́й живота̀ и҆ сме́рти вла́сть, преста́вленнаго ѿ на́съ поко́й хрⷭ҇тѐ бж҃е: ты́ бо є҆сѝ всѣ́хъ сп҃се, поко́й и҆ живо́тъ.

На тѧ̀ сп҃се наде́ждꙋ возло́жъ, ᲂу҆ме́рый ѿи́де ѿ на́съ: ты́ же гдⷭ҇и ᲂу҆ще́дри є҆го̀, ꙗ҆́кѡ бг҃ъ многомлⷭ҇тивъ.

Сла́ва: Просвѣтѝ на́съ трист҃е, воспѣва́емый влⷣко, молѧ́щихсѧ тебѣ̀, ми́ръ нбⷭ҇ный прїѧ́ти, и҆ въ ми́рныхъ се́лѣхъ дꙋ́шꙋ вчинѝ, ѿше́дшꙋю ѿ вре́менныхъ, въ наде́ждѣ безконе́чныѧ жи́зни.

И҆ ны́нѣ: Шꙋ́ѧгѡ стоѧ́нїѧ пречⷭ҇таѧ, и҆зба́вити преста́вленнаго, ᲂу҆молѝ сн҃а твоего̀ дв҃о гпⷭ҇жѐ ꙗ҆́кѡ сп҃са и҆ бг҃а на́шегѡ мт҃и сꙋ́щаѧ.

Пѣ́снь ѕ҃.

І҆рмо́съ: Мл҃твꙋ пролїю̀ ко гдⷭ҇ꙋ:

А҆́да и҆спрове́ргъ влⷣко, воскр҃си́лъ є҆сѝ ᲂу҆ме́ршыѧ ѿ вѣ́ка: и҆ ны́нѣ преста́вленнаго ѿ на́съ въ нѣ́дро а҆враа́мле ты̀ бж҃е вселѝ: прегрѣшє́нїѧ всѧ̑ ѿпꙋсти́въ, ꙗ҆́кѡ млⷭ҇рдъ.

За́повѣдь, ю҆́же мѝ да́лъ є҆сѝ бж҃е, престꙋпи́хъ и҆ сме́ртенъ бы́хъ: но ты̀ бж҃е, соше́дый во гро́бъ, и҆ дꙋ́шы ꙗ҆̀же ѿ вѣ́ка воскр҃си́вый, не возста́ви менѐ влⷣко на мꙋче́нїе, но на поко́й, преста́вленный вопїе́тъ тебѣ̀ на́ми, многомлⷭ҇тиве.

Сла́ва: Мо́лимъ тѧ̀ безнача́льне ѻ҆́ч҃е, и҆ сн҃е, и҆ дш҃е ст҃ы́й, ѕло́бою дꙋшеѕло́бнагѡ мі́ра ѡ҆ѕло́бленнꙋю и҆ къ тебѣ̀ зижди́телю преше́дшꙋю дꙋ́шꙋ, во а҆́дово дно̀ не ѿри́ни бж҃е сп҃се мо́й.

И҆ ны́нѣ: Съ нб҃сѐ хрⷭ҇то́съ бг҃ъ на́шъ, ꙗ҆́кѡ до́ждь на рꙋно̀, пречⷭ҇таѧ, сни́де на тѧ̀, напаѧ́ѧ ве́сь мі́ръ, и҆ и҆зсꙋша́ѧ всѧ̑ безбѡ́жныѧ пото́ки, наводнѧ́ѧй всю̀ зе́млю ра́зꙋмомъ свои́мъ, приснодв҃о. того̀ молѝ да́ти поко́й преста́вленномꙋ рабꙋ̀ твоемꙋ̀.

Конда́къ, гла́съ и҃:

Со ст҃ы́ми ᲂу҆поко́й хрⷭ҇тѐ, дꙋ́шꙋ раба̀ твоегѡ̀, и҆дѣ́же нѣ́сть болѣ́знь, ни печа́ль, ни воздыха́нїе, но жи́знь безконе́чнаѧ.

І҆́косъ: Са́мъ є҆ди́нъ є҆сѝ безсме́ртный, сотвори́вый и҆ созда́вый человѣ́ка: земні́и ᲂу҆́бѡ ѿ землѝ созда́хомсѧ, и҆ въ зе́млю тꙋ́южде по́йдемъ, ꙗ҆́коже повелѣ́лъ є҆сѝ, созда́вый мѧ̀, и҆ рекі́й мѝ: ꙗ҆́кѡ землѧ̀ є҆сѝ, и҆ въ зе́млю ѿи́деши, а҆́може всѝ человѣ́цы по́йдемъ, надгро́бное рыда́нїе творѧ́ще пѣ́снь: а҆ллилꙋ́їа. [Три́жды.]

Пѣ́снь з҃.

І҆рмо́съ: Ѿ і҆ꙋде́и доше́дше:

Влⷣко хрⷭ҇тѐ бж҃е, є҆гда̀ хо́щеши сꙋди́ти мі́рꙋ, пощадѝ дꙋ́шꙋ раба̀ твоегѡ̀, є҆го́же ѿ на́съ прїѧ́лъ є҆сѝ, вопїю́щаго: ѻ҆тє́цъ на́шихъ бж҃е, бл҃гослове́нъ є҆сѝ.

Въ пи́щи ра́йстѣй, и҆дѣ́же првⷣныхъ дꙋ́шы веселѧ́тсѧ послꙋжи́вшихъ тебѣ̀, причтѝ съ ни́ми хрⷭ҇тѐ, дꙋ́шꙋ раба̀ твоегѡ̀, воспѣ́вшагѡ: ѻ҆тє́цъ на́шихъ бж҃е, бл҃гослове́нъ є҆сѝ.

Сла́ва: І҆ꙋдє́йскїѧ трѝ ѻ҆́троки сп҃сы́й во ѻ҆гнѝ, въ трїе́хъ ли́цѣхъ воспѣ́тый, и҆зба́ви ѻ҆гнѧ̀ вѣ́чнагѡ ᲂу҆со́пшаго, воспѣ́вшаго тѝ вѣ́рнѡ: ѻ҆тє́цъ на́шихъ бж҃е, бл҃гослове́нъ є҆сѝ.

И҆ ны́нѣ: И҆са́їа тѧ̀ же́злъ наречѐ чⷭ҇таѧ: данїи́лъ же го́рꙋ несѣко́мꙋю: і҆езекі́иль же две́рь, и҆з̾ неѧ́же про́йде хрⷭ҇то́съ: мы́ же тѧ̀ и҆́стиннꙋю бцⷣꙋ и҆менꙋ́юще велича́емъ.

Пѣ́снь и҃.

І҆рмо́съ: Седмери́цею пе́щь:

Сконча́въ тече́нїе, и҆ къ тебѣ̀ прибѣго́хъ гдⷭ҇и, преста́вленный вопїе́тъ ны́нѣ: прегрѣшє́нїѧ ѡ҆ста́ви хрⷭ҇тѐ бж҃е, и҆ не ѡ҆сꙋдѝ менѐ, є҆гда̀ хо́щеши сꙋди́ти всѣ̑мъ. вѣ́рнѡ бо тебѣ̀ взыва́хъ: всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те є҆го̀ во вѣ́ки.

Поне́сшагѡ влⷣко и҆́го твоѐ на ра́мѣ свое́мъ, и҆ бре́мѧ твоѐ ле́гкое, а҆́ще и҆ не всегда̀, ѻ҆ба́че въ мѣ́стѣ прпⷣбныхъ твои́хъ вселѝ дꙋ́шꙋ є҆гѡ̀, воспѣ́вшагѡ тебѣ̀ хрⷭ҇тѐ сп҃се: ѻ҆́троцы бл҃гослови́те, сщ҃е́нницы воспо́йте, лю́дїе превозноси́те є҆го̀ во вѣ́ки.

Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.

Безнача́льнаѧ трⷪ҇це ст҃а́ѧ, бж҃е ѻ҆́ч҃е, и҆ сн҃е, и҆ дш҃е ст҃ы́й, въ ли́цѣ ст҃ы́хъ причтѝ дꙋ́шꙋ преста́вленнагѡ раба̀ твоегѡ̀, и҆ ѻ҆гнѧ̀ вѣ́чнагѡ и҆зба́ви, да тѧ̀ хва́литъ воспѣва́ѧ во вѣ́ки: ѻ҆́троцы бл҃гослови́те, сщ҃е́нницы воспо́йте, лю́дїе превозноси́те є҆го̀ во вѣ́ки.

И҆ ны́нѣ: Тѧ̀ дв҃о проро́честїи ли́цы прореко́ша: прозрѧ́ще бо тѧ̀ прозорли́выма ѻ҆чи́ма, ѻ҆́въ ᲂу҆́бѡ же́злъ наречѐ тѧ̀, и҆́нъ же две́рь восто́чнꙋю, ѻ҆́въ же го́рꙋ человѣ́ки несѣко́мꙋю. мы́ же и҆сповѣ́дꙋемъ тѧ̀ вои́стиннꙋ бцⷣꙋ, бг҃а всѧ́ческихъ ро́ждшꙋю: є҆го́же молѝ, ᲂу҆поко́ити преста́вленнаго во вѣ́ки всѧ̑.

Пѣ́снь ѳ҃.

І҆рмо́съ: Оу҆жасе́сѧ ѡ҆ се́мъ нб҃о:

І҆и҃се бж҃е мо́й сп҃се, а҆да́мле ты̀ взѧ́лъ є҆сѝ престꙋпле́нїе, и҆ сме́рти вкꙋси́лъ є҆сѝ, да человѣ́ки ѿ неѧ̀ свободи́ши млⷭ҇рде. тѣ́мже мо́лимъ тѧ̀ млⷭ҇тиве: преста́вленнаго поко́й, ꙗ҆́кѡ бл҃гъ, во дво́рѣхъ ст҃ы́хъ твои́хъ, ꙗ҆́кѡ є҆ди́нъ всебл҃гі́й и҆ млⷭ҇рдый.

Нѣ́сть никто́же млⷭ҇рде, и҆́же не согрѣшѝ въ человѣ́цѣхъ, то́кмѡ ты̀ є҆ди́нъ і҆и҃се хрⷭ҇тѐ, взе́млѧй грѣхѝ всегѡ̀ мі́ра. тѣ́мже ѡ҆чи́стивъ раба̀ твоего̀ ѿ прегрѣше́нїй, вчинѝ во ст҃ы́хъ твои́хъ дво́рѣхъ: ты́ бо живо́тъ є҆сѝ и҆ поко́й, и҆ свѣ́тъ, и҆ весе́лїе всѣ́хъ тебѣ̀ бл҃гоꙋгоди́вшихъ.

Сла́ва: Оу҆диви́сѧ всѐ є҆стество̀ человѣ́ческое, ка́кѡ безнача́льнагѡ ѻ҆ц҃а̀ сн҃ъ, сы́й є҆диноро́дный, пло́ть ѿ дв҃ы дѣ́йствомъ ст҃а́гѡ дх҃а прїѧ́лъ є҆сѝ, и҆ пострада́лъ є҆сѝ ꙗ҆́кѡ человѣ́къ, да ᲂу҆ме́ршыѧ ѡ҆живи́ши: тѣ́мъ и҆ преста́вленнаго ны́нѣ ѿ на́съ, прилѣ́жнѡ мо́лимъ тѧ̀, во странѣ̀ живы́хъ, ꙗ҆́кѡ бл҃гъ вселѝ.

И҆ ны́нѣ: Невѣ́стꙋ тѧ̀ нарица́емъ пречⷭ҇таѧ, ѻ҆ц҃а̀ неви́димагѡ, и҆ мт҃рь сн҃а, и҆з̾ тебѐ дх҃омъ ст҃ы́мъ воплоще́ннагѡ: и҆ моле́бницꙋ тѧ̀ ѡ҆ ᲂу҆со́пшемъ рабѣ̀ твое́мъ предлага́емъ: тебе́ бо помо́щницꙋ и҆́мамы земні́и, и҆ любо́вїю пою́ще тѧ̀ велича́емъ.

Та́же: Досто́йно є҆́сть: Трист҃о́е. По Ѻ҆́ч҃е на́шъ:

Тропа́рь, гла́съ ѕ҃:

Є҆ди́нъ є҆стество́мъ сы́й животво́рецъ хрⷭ҇тѐ, и҆ бл҃гости вои́стиннꙋ неизслѣ́димаѧ пꙋчи́но, ны́нѣ преста́вльшагосѧ раба̀ твоего̀, црⷭ҇твїѧ твоегѡ̀ сподо́би: ты́ бо є҆ди́нъ є҆сѝ и҆мѣ́ѧй мно́жество щедро́тъ, и҆ безсме́ртїе.

Сла́ва, и҆ ны́нѣ, бг҃оро́диченъ:

И҆сто́чникъ живота̀ ро́ждшаѧ влⷣчце, и҆зба́вителѧ мі́рꙋ і҆и҃са гдⷭ҇а, того̀ прилѣ́жнѡ молѝ, безконе́чнагѡ живота̀ преста́вльшагосѧ ны́нѣ раба̀ твоего̀ сподо́бити: ты́ бо хрⷭ҇тїа́нъ є҆ди́на є҆сѝ и҆звѣ́стнѣйшаѧ помо́щница.

Та́же: Гдⷭ҇и поми́лꙋй, в҃і.

И҆ мл҃твꙋ сїю̀:

Помѧнѝ гдⷭ҇и бж҃е на́шъ, въ вѣ́рѣ и҆ наде́жди живота̀ вѣ́чнагѡ, преста́вльшагосѧ раба̀ твоего̀, бра́та на́шего [и҆́мⷬ҇къ,] и҆ ꙗ҆́кѡ бл҃гъ и҆ чл҃вѣколю́бецъ, ѿпꙋща́ѧй грѣхѝ, и҆ потреблѧ́ѧй непра̑вды, ѡ҆сла́би, ѡ҆ста́ви, и҆ простѝ всѧ̑ вѡ́льнаѧ є҆гѡ̀ согрѣшє́нїѧ и҆ невѡ́льнаѧ: и҆зба́ви є҆го̀ вѣ́чныѧ мꙋ́ки, и҆ ѻ҆гнѧ̀ гее́нскагѡ, и҆ да́рꙋй є҆мꙋ̀ прича́стїе и҆ наслажде́нїе вѣ́чныхъ твои́хъ бл҃ги́хъ, ᲂу҆гото́ванныхъ лю́бѧщымъ тѧ̀. а҆́ще бо и҆ согрѣшѝ, но не ѿстꙋпѝ ѿ тебѐ, и҆ несꙋмнѣ́ннѡ во ѻ҆ц҃а̀, и҆ сн҃а, и҆ ст҃а́го дх҃а, бг҃а тѧ̀ въ трⷪ҇цѣ сла́вимаго вѣ́рова, и҆ є҆ди́ницꙋ въ трⷪ҇цѣ, и҆ трⷪ҇цꙋ во є҆ди́нствѣ, правосла́внѡ да́же до послѣ́днѧгѡ своегѡ̀ и҆здыха́нїѧ и҆сповѣ́да. тѣ́мже млⷭ҇тивъ томꙋ̀ бꙋ́ди, и҆ вѣ́рꙋ, ꙗ҆́же въ тѧ̀, вмѣ́стѡ дѣ́лъ вмѣнѝ, и҆ со ст҃ы́ми твои́ми ꙗ҆́кѡ ще́дръ ᲂу҆поко́й: нѣ́сть бо человѣ́ка, и҆́же поживе́тъ и҆ не согрѣши́тъ: но ты̀ є҆ди́нъ є҆сѝ кромѣ̀ всѧ́кагѡ грѣха̀, и҆ пра́вда твоѧ̀, пра́вда во вѣ́ки: и҆ ты̀ є҆сѝ є҆ди́нъ бг҃ъ млⷭ҇ти и҆ щедро́тъ, и҆ чл҃вѣколю́бїѧ: и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.

Кли́рїцы: А҆ми́нь. І҆ере́й: Премꙋ́дрость. Кли́рїцы: Чⷭ҇тнѣ́йшꙋю херꙋві̑мъ: І҆ере́й: Сла́ва тебѣ̀ хрⷭ҇тѐ бж҃е, ᲂу҆пова́нїе на́ше, сла́ва тебѣ̀. Кли́рїцы: Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ.

І҆ере́й твори́тъ ѿпꙋ́стъ се́й:

Воскр҃сы́й и҆з̾ ме́ртвыхъ хрⷭ҇то́съ и҆́стинный бг҃ъ на́шъ, мл҃твами пречⷭ҇тыѧ своеѧ̀ мт҃ре, ст҃ы́хъ сла́вныхъ и҆ всехва́льныхъ а҆пⷭ҇лъ, прпⷣбныхъ и҆ бг҃оно́сныхъ ѻ҆тє́цъ на́шихъ, и҆ всѣ́хъ ст҃ы́хъ, дꙋ́шꙋ ѿ на́съ преста́вльшагѡсѧ раба̀ своегѡ̀ въ селе́нїихъ првⷣныхъ ᲂу҆чини́тъ, и҆ въ нѣ́дрѣхъ а҆враа́ма ᲂу҆поко́итъ, и҆ съ првⷣными причте́тъ и҆ на́съ поми́лꙋетъ, ꙗ҆́кѡ бл҃гъ и҆ чл҃вѣколю́бецъ.

Кли́рїцы: А҆ми́нь.

І҆ере́й же глаго́летъ: Во бл҃же́нномъ ᲂу҆спе́нїи, вѣ́чный поко́й пода́ждь гдⷭ҇и, ᲂу҆́спшемꙋ рабꙋ̀ твоемꙋ̀ [и҆́мⷬ҇къ] и҆ сотворѝ є҆мꙋ̀ вѣ́чнꙋю па́мѧть.

Ѿпѣ́вше же три́жды: Вѣ́чнаѧ па́мѧть. И҆ ѿхо́дѧтъ во своѧ̑ си.

На Гдⷭ҇и воззва́хъ, стїхи̑ры ᲂу҆мили́тельны, гла́съ ѕ҃.

Подо́бенъ: Всю̀ ѿложи́вше:

І҆и҃се сладча́йшїй, дꙋшѝ моеѧ̀ ᲂу҆тѣше́нїе, і҆и҃се мо́й, ѡ҆чище́нїе ᲂу҆ма̀ моегѡ̀, влⷣко многомлⷭ҇тиве, і҆и҃се сп҃си́ мѧ. і҆и҃се сп҃се мо́й, і҆и҃се мо́й всеси́льне, не ѡ҆ста́ви менѐ. сп҃се і҆и҃се поми́лꙋй мѧ̀, и҆ и҆зба́ви мꙋ́ки всѧ́кїѧ і҆и҃се, и҆ сподо́би мѧ̀ сп҃са́емыхъ ча́сти і҆и҃се мо́й, и҆ ли́кꙋ и҆збра́нныхъ твои́хъ сопричти́ мѧ, і҆и҃се чл҃вѣколю́бче.

І҆и҃се сладча́йшїй, а҆пⷭ҇лѡвъ сла́во, і҆и҃се мо́й, похвало̀ мч҃нкѡвъ, влⷣко всеси́льне. і҆и҃се сп҃си́ мѧ, і҆и҃се сп҃се мо́й, і҆и҃се мо́й краснѣ́йшїй, къ тебѣ̀ притека́ющаго. сп҃се і҆и҃се поми́лꙋй мѧ̀, мл҃твами ро́ждшїѧ тѧ̀, всѣ́хъ і҆и҃се ст҃ы́хъ твои́хъ, прⷪ҇рѡ́къ же всѣ́хъ, сп҃се мо́й і҆и҃се, и҆ сла́дости ра́йскїѧ сподо́би, і҆и҃се чл҃вѣколю́бче.

І҆и҃се сладча́йшїй, мона́шествꙋющихъ сла́во, і҆и҃се долготерпѣли́ве, по́стникѡвъ наслажде́нїе и҆ ᲂу҆краше́нїе, і҆и҃се сп҃си́ мѧ, і҆и҃се сп҃се мо́й, і҆и҃се мо́й пребл҃гі́й, рꙋкѝ и҆схити́ мѧ сп҃се і҆и҃се ѕмі́евы, и҆ сегѡ̀ сѣ́тей ны́нѣ сп҃се і҆и҃се свободѝ. ѿ ро́ва преиспо́днѣйшагѡ сп҃се мо́й і҆и҃се возведѝ, и҆ десны̑мъ мѧ̀ сопричтѝ і҆и҃се ѻ҆вца́мъ.

Сла́ва, и҆ ны́нѣ, гла́съ в҃:

І҆и҃са сла́дкаго ро́ждшаѧ бг҃ороди́тельнице, і҆и҃са всеще́драго бг҃а и҆ чл҃вѣколюби́ваго, і҆и҃са є҆ди́наго бл҃гоꙋтро́бнаго, того̀ ᲂу҆молѝ влⷣчце мі́ра, всенепоро́чнаѧ, ᲂу҆ще́дрити менѐ ѻ҆каѧ́ннаго, и҆ шꙋ́ихъ ча́сти и҆зба́вити мѧ̀, и҆ сподо́бити десна́гѡ предстоѧ́нїѧ, є҆гда̀ сѧ́детъ сꙋди́ти мі́рꙋ, ꙗ҆́коже є҆́сть пи́сано.

На стїхо́внѣ стїхи̑ры, гла́съ ѕ҃:

Сп҃се мо́й і҆и҃се, блꙋ́днаго сп҃сы́й, сп҃се мо́й і҆и҃се прїе́мый блꙋдни́цꙋ, и҆ менѐ ны́нѣ поми́лꙋй, і҆и҃се многомлⷭ҇тиве, сп҃сѝ и҆ ᲂу҆ще́дри ѽ і҆и҃се бл҃года́телю, ꙗ҆́кѡ манассі́ю милосе́рде і҆и҃се мо́й, ꙗ҆́кѡ є҆ди́нъ чл҃вѣколю́бецъ.

Ни є҆ди́нꙋ же на землѝ за́повѣдь твою̀ сотвори́хъ, ка́кѡ ꙗ҆влю́сѧ тебѣ̀ сѣдѧ́щемꙋ на прⷭ҇то́лѣ, и҆ сло́во возда́мъ, и҆ сꙋ́дъ сотворю̀ ѡ҆ всѣ́хъ, ꙗ҆̀же въ вѣ́дѣнїи и҆ невѣ́дѣнїи ко́еждо содѣ́ѧхъ, хрⷭ҇тѐ мо́й і҆и҃се; тѣ́мже зовꙋ́ ти: твои́хъ слꙋ́гъ мл҃твами і҆и҃се, сп҃си́ мѧ грѣ́шнаго.

Кто́ мѧ не пла́четсѧ престꙋпи́вшагѡ за́повѣдь твою̀ і҆и҃се; невоздержа́нїемъ во а҆́дъ всели́хсѧ і҆и҃се, вмѣ́стѡ раѧ̀, снѣ́дїю сла́дкихъ видѣ́нїемъ сме́рть и҆схода́таихъ, и҆ твоеѧ̀ і҆и҃се сп҃се мо́й сла́вы и҆ жи́зни чꙋ́ждь ꙗ҆ви́хсѧ: но прїимѝ менѐ ка́ющасѧ, ꙗ҆́кѡ млⷭ҇тивый чл҃вѣколю́бецъ і҆и҃се мо́й, вели́кїѧ ра́ди млⷭ҇ти твоеѧ̀.

Сла́ва, и҆ ны́нѣ, бг҃оро́диченъ:

Чи́стаѧ є҆ди́на і҆и҃са ро́ждшаѧ, дꙋше́вныхъ прегрѣше́нїй и҆зба́ви мѧ̀ дв҃о, и҆ сп҃си́ мѧ ᲂу҆мерщвле́ннаго, молю́сѧ: ты́ бо наде́жда є҆сѝ ненаде́жныхъ, и҆ мі́рꙋ помо́щница. и҆́маши є҆́же мощѝ ѻ҆трокови́це ꙗ҆́кѡ мт҃и гдⷭ҇нѧ, не пре́зри моле́нїе моѐ, нижѐ ѡ҆ста́ви всечⷭ҇таѧ влⷣчце: но ꙗ҆́кѡ чл҃вѣколюби́ваѧ сп҃си́ мѧ.

Та́же тропарѝ, гла́съ ѕ҃:

Поми́лꙋй на́съ гдⷭ҇и, поми́лꙋй на́съ, всѧ́кагѡ бо ѿвѣ́та недоꙋмѣ́юще, сїю̀ тѝ мл҃твꙋ ꙗ҆́кѡ влⷣцѣ грѣ́шнїи прино́симъ: поми́лꙋй на́съ.

Сла́ва: Гдⷭ҇и, поми́лꙋй на́съ, на тѧ́ бо ᲂу҆пова́хомъ, не прогнѣ́вайсѧ на ны̀ ѕѣлѡ̀, нижѐ помѧнѝ беззако́нїй на́шихъ: но при́зри и҆ ны́нѣ ꙗ҆́кѡ бл҃гоꙋтро́бенъ, и҆ и҆зба́ви ны̀ ѿ вра̑гъ на́шихъ: ты́ бо є҆сѝ бг҃ъ на́шъ, и҆ мы̀ лю́дїе твоѝ, всѝ дѣла̀ рꙋкꙋ̀ твоє́ю, и҆ и҆́мѧ твоѐ призыва́емъ.

И҆ ны́нѣ: Млⷭ҇рдїѧ двє́ри ѿве́рзи на́мъ бл҃гослове́ннаѧ бцⷣе, надѣ́ющїисѧ на тѧ̀ да не поги́бнемъ, но да и҆зба́вимсѧ тобо́ю ѿ бѣ́дъ: ты́ бо є҆сѝ сп҃се́нїе ро́да хрⷭ҇тїа́нскагѡ.

Канѡ́нъ ᲂу҆мили́тельный

ко гдⷭ҇ꙋ на́шемꙋ і҆и҃сꙋ хрⷭ҇тꙋ̀.

Гла́съ в҃. Пѣ́снь а҃.

І҆рмо́съ: Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть: препросла́вленный гдⷭ҇ь, сла́внѡ бо просла́висѧ.

І҆и҃се сладча́йшїй хрⷭ҇тѐ, і҆и҃се долготерпѣли́ве, дꙋшѝ моеѧ̀ ꙗ҆́звы и҆сцѣлѝ і҆и҃се, и҆ ᲂу҆сладѝ се́рдце моѐ многомлⷭ҇тиве молю́сѧ, і҆и҃се сп҃се мо́й, да велича́ю тѧ̀ сп҃са́емый.

І҆и҃се сладча́йшїй хрⷭ҇тѐ, і҆и҃се ѿве́рзи покаѧ́нїѧ мѝ две́рь, чл҃вѣколю́бче і҆и҃се, и҆ прїими́ мѧ тебѣ̀ припа́дающа, и҆ те́плѣ просѧ́ща, і҆и҃се сп҃се мо́й, согрѣше́нїй проще́нїѧ.

І҆и҃се сладча́йшїй хрⷭ҇тѐ, і҆и҃се и҆схити́ мѧ и҆з̾ рꙋкѝ льсти́вагѡ велїа́ра, і҆и҃се, и҆ сотворѝ десна́го предстоѧ́телѧ сла́вы твоеѧ̀, і҆и҃се сп҃се мо́й, ча́сти шꙋ́їѧ мѧ̀ и҆збавлѧ́ѧй.

Бг҃оро́диченъ: І҆и҃са ро́ждшаѧ бг҃а, влⷣчце, молѝ ѡ҆ непотре́бныхъ рабѣ́хъ пречⷭ҇таѧ, ꙗ҆́кѡ да мꙋ́ки мл҃твами твои́ми и҆зба́вимсѧ нескве́рнаѧ, ѡ҆скверне́ннїи, сла́вы присносꙋ́щныѧ наслажда́ющесѧ.

Пѣ́снь г҃.

І҆рмо́съ: На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑. возвесели́ бо сѧ дꙋ́хъ мо́й, внегда̀ пѣ́ти: нѣ́сть ст҃ъ ꙗ҆́коже бг҃ъ на́шъ, и҆ нѣ́сть првⷣнъ па́че тебѐ гдⷭ҇и.

Оу҆слы́ши чл҃вѣколю́бче і҆и҃се мо́й раба̀ твоего̀, вопїю́ща во ᲂу҆миле́нїи: и҆ и҆зба́ви мѧ̀ і҆и҃се ѡ҆сꙋжде́нїѧ и҆ мꙋ́ки, є҆ди́не долготерпѣли́ве, і҆и҃се сладча́йшїй многомлⷭ҇тиве.

Под̾имѝ раба̀ твоего̀ і҆и҃се мо́й, припа́дающа со слеза́ми, і҆и҃се мо́й, и҆ сп҃сѝ і҆и҃се мо́й ка́ющагосѧ мѧ̀, и҆ гее́нны влⷣко и҆зба́ви, і҆и҃се сладча́йшїй многомлⷭ҇тиве.

Вре́мѧ і҆и҃се мо́й, є҆́же да́лъ мѝ є҆сѝ во стра́сти и҆жди́хъ і҆и҃се мо́й. тѣ́мже і҆и҃се мо́й, не ѿве́ржи мѧ̀, но воззовѝ, молю́сѧ, влⷣко, і҆и҃се сладча́йшїй, и҆ сп҃сѝ.

Бг҃оро́диченъ: Дв҃о ро́ждшаѧ і҆и҃са моего̀, молѝ и҆зба́вити мѧ̀ гее́нны, є҆ди́но предста́тельство ѡ҆скорблѧ́емыхъ бг҃обл҃года́тнаѧ, и҆ сподо́би мѧ̀ жи́зни всенепоро́чнаѧ нестарѣ́ющїѧсѧ.

Сѣда́ленъ, гла́съ а҃. Подо́бенъ: ро́бъ тво́й:

Сп҃се мо́й і҆и҃се, блꙋ́днаго сп҃сы́й, сп҃се мо́й і҆и҃се, прїе́мый блꙋдни́цꙋ и҆ менѐ ны́нѣ поми́лꙋй, і҆и҃се многомлⷭ҇тиве: сп҃сѝ, ᲂу҆ще́дри, ѽ і҆и҃се бл҃годѣ́телю, ꙗ҆́коже бл҃гоꙋтро́бне манассі́ю і҆и҃се мо́й, ꙗ҆́кѡ є҆ди́нъ чл҃вѣколю́бецъ.

Пѣ́снь д҃.

І҆рмо́съ: Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ гдⷭ҇и вопло́щьсѧ, и҆ сп҃слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й гдⷭ҇и.

И҆сцѣлѝ і҆и҃се мо́й дꙋшѝ моеѧ̀ ꙗ҆́звы, і҆и҃се мо́й молю́сѧ, и҆ рꙋки́ мѧ и҆схитѝ, і҆и҃се мо́й бл҃гоꙋтро́бне, дꙋшетлѣ́ннагѡ велїа́ра, и҆ сп҃сѝ.

Согрѣши́хъ, і҆и҃се мо́й сладча́йшїй бл҃гоꙋтро́бне: і҆и҃се мо́й, сп҃си́ мѧ прибѣга́ющаго къ покро́вꙋ твоемꙋ̀, і҆и҃се долготерпѣли́ве, и҆ црⷭ҇твїѧ твоегѡ́ мѧ сподо́би.

Никто́же согрѣшѝ і҆и҃се мо́й, ꙗ҆́коже согрѣши́хъ а҆́зъ ѻ҆каѧ́нный: но припа́даю молѧ́сѧ, і҆и҃се мо́й сп҃си́ мѧ, и҆ жи́зни і҆и҃се мо́й наслѣ́дїе мѝ да́рꙋй.

Бг҃оро́диченъ: Всепѣ́таѧ, і҆и҃са ро́ждшаѧ гдⷭ҇а, того̀ молѝ и҆зба́вити мꙋ́ки всѧ̑ пою́щыѧ тѧ̀ и҆ бцⷣꙋ вои́стиннꙋ и҆менꙋ́ющыѧ.

Пѣ́снь є҃.

І҆рмо́съ: Просвѣще́нїе во тьмѣ̀ лежа́щихъ, сп҃се́нїе ѿча́ѧнныхъ хрⷭ҇тѐ сп҃се мо́й, къ тебѣ̀ ᲂу҆́тренюю цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо ра́звѣ тебѐ бг҃а не зна́ю.

Ты̀ просвѣще́нїе і҆и҃се мо́й ᲂу҆ма̀ моегѡ̀. ты̀ сп҃се́нїе ѿча́ѧнныѧ дꙋшѝ моеѧ̀ сп҃се. ты̀ і҆и҃се мо́й мꙋ́ки и҆зба́ви и҆ гее́нны мѧ̀ зовꙋ́ща: сп҃сѝ і҆и҃се мо́й хрⷭ҇тѐ мѧ̀ ѻ҆каѧ́ннаго.

Всеконе́чнѡ і҆и҃се мо́й, къ стра́сти безче́стїѧ низве́рженъ ны́нѣ зовꙋ̀: ты̀ і҆и҃се мо́й, по́мощи мѝ рꙋ́кꙋ низпосла́въ, и҆сто́ргни зовꙋ́ща: сп҃сѝ і҆и҃се мо́й хрⷭ҇те́ мѧ ѻ҆каѧ́ннаго.

Ѡ҆скверне́нъ ᲂу҆́мъ і҆и҃се мо́й ѡ҆бносѧ̀, взыва́ю тѝ: ѡ҆чи́сти мѧ̀ ѿ скве́рны прегрѣше́нїй, и҆ и҆зба́ви мѧ̀ во глꙋбины̑ ѕло́бы ѿ невѣ́дѣнїѧ низпопо́лзшагосѧ, сп҃се і҆и҃се мо́й, и҆ сп҃си́ мѧ, молю́сѧ.

Бг҃оро́диченъ: І҆и҃са ро́ждшаѧ ѻ҆трокови́це бг҃ороди́тельнице, того̀ ᲂу҆молѝ сп҃стѝ всѧ̑ правосла̑вныѧ, мона́хи и҆ мїрскі̑ѧ, и҆ гее́нны и҆зба́вити зовꙋ́щыѧ: ра́звѣ тебѐ предста́тельства тве́рдагѡ на зна́емъ.

Пѣ́снь ѕ҃.

І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю млⷭ҇рдїѧ твоегѡ̀ призыва́ю бе́зднꙋ: ѿ тлѝ бж҃е мѧ̀ возведѝ.

І҆и҃се мо́й хрⷭ҇тѐ многомлⷭ҇тиве, и҆сповѣ́дающасѧ прїими́ мѧ влⷣко, ѽ і҆и҃се, и҆ сп҃си́ мѧ, и҆ ѿ тлѝ і҆и҃се, мѧ̀ и҆схитѝ.

І҆и҃се мо́й, никто́же бы́сть и҆́нъ блꙋдни́къ, ꙗ҆́коже а҆́зъ стра́стный, ѽ і҆и҃се чл҃вѣколю́бче: но ты̀ і҆и҃се мѧ̀ сп҃сѝ.

І҆и҃се мо́й, блꙋдни́цꙋ и҆ блꙋ́днаго, и҆ манассі́ю и҆ мытарѧ̀ преидо́хъ, ѽ і҆и҃се мо́й, страстьмѝ, и҆ разбо́йника і҆и҃се, и҆ нїнеѵі́тѧны.

Бг҃оро́диченъ: І҆и҃са хрⷭ҇та̀ моего̀ ро́ждшаѧ пречⷭ҇таѧ дв҃о, є҆ди́на нескве́рнаѧ, ѡ҆скверне́на сꙋ́ща мѧ̀, мл҃твъ твои́хъ ѵ҆ссѡ́помъ ны́нѣ ѡ҆чи́сти.

Конда́къ а҃, гла́съ и҃:

Возбра́нный воево́до и҆ гдⷭ҇и, а҆́да побѣди́телю, ꙗ҆́кѡ и҆зба́вльсѧ ѿ вѣ́чныѧ сме́рти, похва̑льнаѧ, восписꙋ́ю тѝ, созда́нїе и҆ ра́бъ тво́й: но ꙗ҆́кѡ и҆мѣ́ѧй млⷭ҇рдїе неизрече́нное, ѿ всѧ́кихъ мѧ̀ бѣ́дъ свободѝ, зовꙋ́ща: і҆и҃се сн҃е бж҃їй, поми́лꙋй мѧ̀.

І҆́косъ а҃: А҆́гг҃лѡвъ тво́рче, и҆ гдⷭ҇и си́лъ, ѿве́рзи мѝ недоꙋмѣ́нный ᲂу҆́мъ и҆ ѧ҆зы́къ, на похвалꙋ̀ пречⷭ҇тагѡ твоегѡ̀ и҆́мене, ꙗ҆́коже глꙋхо́мꙋ и҆ гꙋгни́вомꙋ дре́вле слꙋ́хъ и҆ ѧ҆зы́къ ѿве́рзлъ є҆сѝ, и҆ глаго́лаше зовы́й такова̑ѧ: І҆и҃се пречꙋ́дный, а҆́гг҃лѡвъ ᲂу҆дивле́нїе: і҆и҃се преси́льный, прароди́телей и҆збавле́нїе. І҆и҃се пресла́дкїй, патрїа́рхѡвъ велича́нїе: і҆и҃се пресла́вный, царе́й ᲂу҆крѣпле́нїе. І҆и҃се прелюби́мый, прⷪ҇ро́кѡвъ и҆сполне́нїе: і҆и҃се преди́вный, мч҃нкѡвъ крѣ́посте. І҆и҃се прети́хїй, мона́хѡвъ ра́досте: і҆и҃се премлⷭ҇тивый, пресвѵ́терѡвъ сла́досте. І҆и҃се премлⷭ҇рдый, по́стникѡвъ воздержа́нїе: і҆и҃се пресла́достный, прпⷣбныхъ ра́дованїе. І҆и҃се пречⷭ҇тны́й, дѣ́вственныхъ цѣломꙋ́дрїе: і҆и҃се предвѣ́чный, грѣ́шникѡвъ сп҃се́нїе. І҆и҃се сн҃е бж҃їй, поми́лꙋй мѧ̀.

Конда́къ в҃: Ви́дѧ вдови́цꙋ ѕѣ́льнѣ пла́чꙋщꙋ гдⷭ҇и, ꙗ҆́коже бо тогда̀ ᲂу҆млⷭ҇рдивсѧ, сы́на є҆ѧ̀ на погребе́нїе несо́ма воскр҃си́лъ є҆сѝ: си́це и҆ ѡ҆ мнѣ̀ ᲂу҆млⷭ҇рдисѧ, чл҃вѣколю́бче, и҆ грѣхмѝ ᲂу҆мерщвле́ннꙋю мою̀ дꙋ́шꙋ воскр҃сѝ, зовꙋ́щꙋ: А҆ллилꙋ́їа.

І҆́косъ в҃: Ра́зꙋмъ неꙋразꙋмѣ́нный разꙋмѣ́ти фїлі́ппъ и҆щѧ̀, гдⷭ҇и покажѝ на́мъ ѻ҆ц҃а̀, глаго́лаше. ты́ же къ немꙋ̀: толи́кое вре́мѧ сы́й со мно́ю, не позна́лъ ли є҆сѝ, ꙗ҆́кѡ ѻ҆ц҃ъ во мнѣ̀, и҆ а҆́зъ во ѻ҆ц҃ѣ̀ є҆́смь; тѣ́мже неизслѣ́дованне, со стра́хомъ зовꙋ́ ти: І҆и҃се, бж҃е предвѣ́чный: і҆и҃се, цр҃ю̀ преси́льный. І҆и҃се, влⷣко долготерпѣли́вый: і҆и҃се, сп҃се премлⷭ҇тивый. І҆и҃се, храни́телю мо́й пребл҃гі́й: і҆и҃се, ѡ҆чи́сти грѣхѝ моѧ̑. І҆и҃се, ѿимѝ беззакѡ́нїѧ моѧ̑: і҆и҃се, ѿпꙋстѝ непра̑вды моѧ̑. І҆и҃се, наде́ждо моѧ̀, не ѡ҆ста́ви менѐ: і҆и҃се помо́щниче мо́й, не ѿри́ни менѐ. І҆и҃се, созда́телю мо́й, не забꙋ́ди менѐ: і҆и҃се, па́стырю мо́й; не погꙋбѝ менѐ. І҆и҃се сн҃е бж҃їи, поми́лꙋй мѧ̀.

Конда́къ г҃: Си́лою свы́ше а҆пⷭ҇лы ѡ҆блекі́й і҆и҃се, во і҆ерⷭ҇ли́мѣ сѣдѧ́щыѧ, ѡ҆блецы̀ и҆ менѐ ѡ҆бнаже́ннаго ѿ всѧ́кагѡ бл҃готворе́нїѧ, теплото́ю дх҃а ст҃а́гѡ твоегѡ̀, и҆ да́ждь мѝ съ любо́вїю пѣ́ти тебѣ̀: А҆ллилꙋ́їа.

І҆́косъ г҃: И҆мѣ́ѧй бога́тство млⷭ҇рдїѧ, мытарѝ и҆ грѣ́шники, и҆ невѣ̑рныѧ призва́лъ є҆сѝ і҆и҃се: не пре́зри и҆ менѐ ны́нѣ, подо́бнаго и҆̀мъ, но ꙗ҆́кѡ многоцѣ́нное мѵ́ро, прїимѝ пѣ́снь сїю̀: І҆и҃се, си́ло непобѣди́маѧ: і҆и҃се, млⷭ҇те безконе́чнаѧ. І҆и҃се, красото̀ пресвѣ́тлаѧ: і҆и҃се, любы̀ неизрече́ннаѧ. І҆и҃се, сн҃е бг҃а жива́гѡ: і҆и҃се, поми́лꙋй мѧ̀ грѣ́шнаго. І҆и҃се, ᲂу҆слы́ши мѧ̀ въ беззако́нїихъ зача́таго: і҆и҃се, ѡ҆чи́сти мѧ̀ во грѣсѣ́хъ рожде́ннаго. І҆и҃се, наꙋчи́ мѧ непотре́бнаго: і҆и҃се, ѡ҆свѣти́ мѧ те́мнаго. І҆и҃се, ѡ҆чи́сти мѧ̀ скве́рнаго: і҆и҃се, возведи́ мѧ блꙋ́днаго. І҆и҃се сн҃е бж҃їй, поми́лꙋй мѧ̀.

Конда́къ д҃: Бꙋ́рю внꙋ́трь и҆мѣ́ѧй помышле́нїй сꙋмни́тельныхъ, пе́тръ ᲂу҆топа́ше: ᲂу҆зрѣ́въ же во пло́ти тѧ̀ сꙋ́ща і҆и҃се, и҆ по вода́мъ ходѧ́ща, позна́ тѧ бг҃а и҆́стиннаго, и҆ рꙋ́кꙋ сп҃се́нїѧ полꙋчи́въ, речѐ: А҆ллилꙋ́їа.

І҆́косъ д҃: Слы́ша слѣпы́й, гдⷭ҇и, мимоходѧ́ща тѧ̀ пꙋте́мъ, вопїѧ́ше: і҆и҃се сн҃е дв҃довъ, поми́лꙋй мѧ̀: и҆ призва́въ ѿве́рзлъ є҆сѝ ѻ҆́чи є҆гѡ̀. просвѣтѝ ᲂу҆́бѡ млⷭ҇тїю твое́ю ѻ҆́чи мы́слєнныѧ се́рдца, и҆ менѐ вопїю́ща тѝ, и҆ глаго́люща: І҆и҃се, вы́шнихъ созда́телю: і҆и҃се, ни́жнихъ и҆скꙋпи́телю. І҆и҃се, преиспо́днихъ потреби́телю: і҆и҃се, всеѧ̀ тва́ри ᲂу҆краси́телю. І҆и҃се, дꙋшѝ моеѧ̀ ᲂу҆тѣ́шителю: і҆и҃се, ᲂу҆ма̀ моегѡ̀ просвѣти́телю. І҆и҃се, се́рдца моегѡ̀ весе́лїе: і҆и҃се, тѣ́ла моегѡ̀ здра́вїе. І҆и҃се сп҃се мо́й, сп҃си́ мѧ: і҆и҃се, свѣ́те мо́й просвѣти́ мѧ. І҆и҃се, мꙋ́ки всѧ́кїѧ и҆зба́ви мѧ̀: і҆и҃се, сп҃си́ мѧ недосто́йнаго. І҆и҃се сн҃е бж҃їй, поми́лꙋй мѧ̀.

Конда́къ є҃: Бг҃ото́чною кро́вїю, ꙗ҆́коже и҆скꙋпи́лъ є҆сѝ на́съ дре́вле ѿ зако́нныѧ клѧ́твы і҆и҃се, си́це и҆змѝ на́съ ѿ сѣ́ти, є҆́юже ѕмі́й запѧ́тъ ны̀ страстьмѝ плотски́ми, и҆ блꙋ́днымъ наважде́нїемъ, и҆ ѕлы́мъ ᲂу҆ны́нїемъ, вопїю́щыѧ тѝ: А҆ллилꙋ́їа.

І҆́косъ є҃: Ви́дѣвше ѻ҆́троцы є҆вре́йстїи во ѡ҆́бразѣ человѣ́честѣмъ созда́вшаго рꙋко́ю человѣ́ка, и҆ влⷣкꙋ разꙋмѣ́вше є҆го̀, потща́шасѧ вѣ́твьми ᲂу҆годи́ти є҆мꙋ̀ ѡ҆са́нна вопїю́ще, мы́ же пѣ́снь прино́симъ тѝ глаго́люще: І҆и҃се, бж҃е и҆́стинный: і҆и҃се, сн҃е дв҃довъ. І҆и҃се, цр҃ю̀ пресла́вный: і҆и҃се, а҆́гнче непоро́чный. І҆и҃се, па́стырю преди́вный: і҆и҃се, храни́телю во мла́дости мое́й. І҆и҃се, корми́телю во ю҆́ности мое́й: і҆и҃се, похвало̀ въ ста́рости мое́й. І҆и҃се, наде́ждо въ сме́рти мое́й: і҆и҃се, животѐ по сме́рти мое́й. І҆и҃се, ᲂу҆тѣше́нїе моѐ на сꙋдѣ̀ твое́мъ: і҆и҃се, жела́нїе моѐ, не посрамѝ менѐ тогда̀. І҆и҃се сн҃е бж҃їй, поми́лꙋй мѧ̀.

Конда́къ ѕ҃: Проповѣ̑дникъ бг҃оно́сныхъ вѣща́нїе и҆ глаго́лы и҆сполнѧ́ѧ і҆и҃се, на землѝ ꙗ҆́вльсѧ, и҆ съ человѣ́ки невмѣсти́мый пожи́лъ є҆сѝ, и҆ болѣ̑зни на́шѧ под̾ѧ́лъ є҆сѝ. ѿню́дꙋже ра́нами твои́ми мы̀ и҆сцѣлѣ́вше, пѣ́ти навыко́хомъ: А҆ллилꙋ́їа.

І҆́косъ ѕ҃: Возсїѧ̀ вселе́ннѣй просвѣще́нїе и҆́стины твоеѧ̀, и҆ ѿгна́сѧ ле́сть бѣсо́вскаѧ: і҆́дѡли бо, сп҃се на́шъ, не терпѧ́ще твоеѧ̀ крѣ́пости, падо́ша. мы́ же сп҃се́нїе полꙋчи́вше, вопїе́мъ тѝ: І҆и҃се, и҆́стино, ле́сть ѿгонѧ́щаѧ: і҆и҃се, свѣ́те превы́шшїй всѣ́хъ свѣ́тлостей. І҆и҃се цр҃ю̀, премога́ѧй всѣ́хъ крѣ́пости: і҆и҃се бж҃е, пребыва́ѧй въ млⷭ҇ти. І҆и҃се, хлѣ́бе живо́тный, насы́ти мѧ̀ а҆́лчꙋщаго: і҆и҃се, и҆сто́чниче ра́зꙋма, напо́й мѧ̀ жа́ждꙋщаго. І҆и҃се, ѻ҆де́ждо весе́лїѧ, ѡ҆дѣ́й мѧ̀ тлѣ́ннаго: і҆и҃се, покро́ве ра́дости, покры́й мѧ̀ недосто́йнаго. І҆и҃се, пода́телю просѧ́щымъ, да́ждь мѝ пла́чь за грѣхѝ моѧ̑: і҆и҃се, ѡ҆брѣ́тенїе и҆́щꙋщихъ ѡ҆брѧ́щи дꙋ́шꙋ мою̀. І҆и҃се, ѿве́рзителю толкꙋ́щымъ, ѿве́рзи се́рдце моѐ ѻ҆каѧ́нное: і҆и҃се, и҆скꙋпи́телю грѣ́шныхъ, ѡ҆чи́сти беззакѡ́нїѧ моѧ̑. І҆и҃се сн҃е бж҃їй, поми́лꙋй мѧ̀.

Конда́къ з҃: Хотѧ̀ сокрове́ннꙋю та́йнꙋ ѿ вѣ́ка ѿкры́ти, ꙗ҆́кѡ ѻ҆вча̀ на заколе́нїе веде́нъ бы́лъ є҆сѝ і҆и҃се, и҆ ꙗ҆́кѡ а҆́гнецъ прѧ́мѡ стригꙋ́щаго є҆го̀ безгла́сенъ, и҆ ꙗ҆́кѡ бг҃ъ и҆з̾ ме́ртвыхъ воскрⷭ҇лъ є҆сѝ, и҆ со сла́вою на нб҃са̀ возне́слсѧ є҆сѝ, и҆ на́съ совоздви́глъ є҆сѝ, зовꙋ́щихъ: А҆ллилꙋ́їа.

І҆́косъ з҃: Ди́внꙋю показа̀ тва́рь, ꙗ҆вле́йсѧ творе́цъ на́мъ, без̾ сѣ́мене ѿ дв҃ы воплоти́сѧ, и҆з̾ гро́ба печа̑ти не рꙋши́въ воскр҃се, и҆ ко а҆пⷭ҇лѡмъ две́ремъ затворє́ннымъ съ пло́тїю вни́де. тѣ́мже чꙋдѧ́щесѧ, воспои́мъ: І҆и҃се, сло́ве неѡбыме́нный: і҆и҃се, сло́ве несоглѧда́емый. І҆и҃се, си́ло непостижи́маѧ: і҆и҃се, мꙋ́дросте недомы́слимаѧ. І҆и҃се, бж҃ество̀ неѡпи́санное: і҆и҃се, гдⷭ҇ьство неисче́тное. І҆и҃се, ца́рство непобѣди́мое: і҆и҃се, влады́чество безконе́чное. І҆и҃се, крѣ́посте высоча́йшаѧ, і҆и҃се, вла́сте вѣ́чнаѧ. І҆и҃се, тво́рче мо́й, ᲂу҆ще́дри мѧ̀: і҆и҃се сп҃се мо́й, сп҃си́ мѧ. І҆и҃се сн҃е бж҃їй, поми́лꙋй мѧ̀.

Конда́къ и҃: Стра́ннѡ бг҃а вочл҃вѣ́чшасѧ ви́дѧще, ᲂу҆страни́мсѧ сꙋ́етнагѡ мі́ра, и҆ ᲂу҆́мъ на бж҃е́ствєннаѧ возложи́мъ: сегѡ́ бо ра́ди бг҃ъ на зе́млю сни́де, да на́съ на нб҃са̀ возведе́тъ, вопїю́щихъ є҆мꙋ̀: А҆ллилꙋ́їа.

І҆́косъ и҃: Ве́сь бѣ̀ въ ни́жнихъ, и҆ вы́шнихъ ника́коже ѿстꙋпѝ неисче́тный: є҆гда̀ во́лею на́съ ра́ди пострада̀, и҆ сме́ртїю свое́ю на́шꙋ сме́рть ᲂу҆мертвѝ, и҆ воскрⷭ҇нїемъ живо́тъ дарова̀, пою́щымъ: І҆и҃се, сла́досте серде́чнаѧ: і҆и҃се, крѣ́посте тѣле́снаѧ. І҆и҃се, свѣ́тлосте дꙋше́внаѧ: і҆и҃се, быстрото̀ ᲂу҆́мнаѧ. І҆и҃се, ра́досте со́вѣстнаѧ: і҆и҃се, наде́ждо и҆звѣ́стнаѧ. І҆и҃се, па́мѧте предвѣ́чнаѧ: і҆и҃се, похвало̀ высо́каѧ. І҆и҃се, сла́во моѧ̀ превознесе́ннаѧ: і҆и҃се, жела́нїе моѐ, не ѿри́ни менѐ. І҆и҃се, па́стырю мо́й, взыщѝ менѐ: і҆и҃се, сп҃се мо́й, сп҃сѝ менѐ. І҆и҃се сн҃е бж҃їй, поми́лꙋй мѧ̀.

Конда́къ ѳ҃: Всѐ є҆стество̀ а҆́гг҃льское, безпреста́ни сла́витъ прест҃о́е и҆́мѧ твоѐ і҆и҃се на нб҃сѝ, ст҃ъ, ст҃ъ, ст҃ъ, вопїю́ще: мы́ же грѣ́шнїи на землѝ бре́нными ᲂу҆стна́ми вопїе́мъ: А҆ллилꙋ́їа.

І҆́косъ ѳ҃: Вѣті̑ѧ многовѣща̑нныѧ, ꙗ҆́коже ры̑бы безгла̑сныѧ ви́димъ ѡ҆ тебѣ̀ і҆и҃се сп҃се на́шъ: недоꙋмѣ́ютъ бо глаго́лати, ка́кѡ бг҃ъ непрело́жный, и҆ человѣ́къ соверше́нный пребыва́еши; мы́ же та́инствꙋ дивѧ́щесѧ, вопїе́мъ вѣ́рнѡ: І҆и҃се, бж҃е предвѣ́чный: і҆и҃се, цр҃ю̀ ца́рствꙋющихъ. І҆и҃се, влⷣко владѣ́ющихъ: і҆и҃се, сꙋдїѐ живы́хъ и҆ ме́ртвыхъ. І҆и҃се, наде́ждо ненаде́жныхъ: і҆и҃се, ᲂу҆тѣше́нїе пла́чꙋщихъ. І҆и҃се, сла́во ни́щихъ: і҆и҃се, не ѡ҆сꙋди́ мѧ по дѣлѡ́мъ мои̑мъ. І҆и҃се, ѡ҆чи́сти мѧ̀ по млⷭ҇ти твое́й: і҆и҃се, ѿженѝ ѿ менѐ ᲂу҆ны́нїе. І҆и҃се, просвѣтѝ моѧ̑ мы̑сли сердє́чныѧ: і҆и҃се, да́ждь мѝ па́мѧть сме́ртнꙋю. І҆и҃се сн҃е бж҃їй, поми́лꙋй мѧ̀.

Конда́къ і҃: Сп҃стѝ хотѧ̀ мі́ръ восто́че восто́кѡмъ, къ те́мномꙋ за́падꙋ є҆стествꙋ̀ на́шемꙋ прише́дъ, смири́лсѧ є҆сѝ до сме́рти. тѣ́мже превознесе́сѧ и҆́мѧ твоѐ, па́че всѧ́кагѡ и҆́мене, и҆ ѿ всѣ́хъ колѣ́нъ небе́сныхъ и҆ земны́хъ слы́шиши: А҆ллилꙋ́їа.

І҆́косъ і҃: Цр҃ю̀ превѣ́чный, ᲂу҆тѣ́шителю хрⷭ҇тѐ и҆́стинный, ѡ҆чи́сти ны̀ ѿ всѧ́кїѧ скве́рны, ꙗ҆́коже ѡ҆чи́стилъ є҆сѝ де́сѧть прокаже́нныхъ, и҆ и҆сцѣлѝ ны̀, ꙗ҆́коже и҆сцѣли́лъ є҆сѝ сребролюби́вꙋю дꙋ́шꙋ закхе́а мытарѧ̀, да вопїе́мъ тѝ во ᲂу҆миле́нїи, зовꙋ́ще: І҆и҃се, сокро́вище нетлѣ́нное: і҆и҃се, бога́тство неистощи́мое. І҆и҃се, пи́ще крѣ́пкаѧ: і҆и҃се, питїѐ неисчерпа́емое. І҆и҃се, ни́щихъ ѡ҆дѣѧ́нїе: і҆и҃се, вдѡ́въ застꙋпле́нїе. І҆и҃се, си́рыхъ защи́тниче: і҆и҃се, трꙋжда́ющихсѧ по́моще. І҆и҃се, стра́нныхъ наста́вниче: і҆и҃се, пла́вающихъ ко́рмчїй. І҆и҃се, бꙋ́рныхъ ѡ҆ти́шїе: і҆и҃се бж҃е, воздви́гни мѧ̀ па́дшаго. І҆и҃се сн҃е бж҃їй, поми́лꙋй мѧ̀.

Конда́къ а҃і: Пѣ́нїе всеꙋмиле́нное приношꙋ́ ти недосто́йный, вопїю́ ти ꙗ҆́кѡ ханане́а: і҆и҃се поми́лꙋй мѧ̀. не дще́рь бо, но пло́ть и҆́мамъ страстьмѝ лю́тѣ бѣсѧ́щꙋюсѧ, и҆ ꙗ҆́ростїю пали́мꙋю, и҆ и҆сцѣле́нїѧ да́ждь вопїю́щꙋ тѝ: А҆ллилꙋ́їа.

І҆́косъ а҃і: Свѣтопода́тельна свѣти́льника сꙋ́щымъ во тьмѣ̀ неразꙋ́мїѧ, пре́жде гонѧ́й тѧ̀ па́ѵелъ, бг҃оразꙋ́мнагѡ гла́са си́лꙋ внꙋшѝ, и҆ дꙋше́внꙋю быстротꙋ̀ ᲂу҆ѧснѝ: си́це и҆ менѐ тє́мныѧ зѣ̑ницы дꙋшє́вныѧ просвѣтѝ, зовꙋ́ща: І҆и҃се, цр҃ю̀ мо́й прекрѣ́пкїй: і҆и҃се, бж҃е мо́й преси́льный. І҆и҃се, гдⷭ҇и мо́й пребезсме́ртный. і҆и҃се, созда́телю мо́й пресла́вный. І҆и҃се, наста́вниче мо́й предо́брый: і҆и҃се, па́стырю мо́й преще́дрый. І҆и҃се, влⷣко мо́й премлⷭ҇тивый: і҆и҃се, сп҃се мо́й премлⷭ҇рдый. І҆и҃се просвѣтѝ моѧ̑ чꙋ̑вствїѧ потемнє́ннаѧ страстьмѝ: і҆и҃се, и҆сцѣлѝ моѐ тѣ́ло ѡ҆стрꙋпле́нное грѣхмѝ. І҆и҃се, ѡ҆чи́сти мо́й ᲂу҆́мъ ѿ по́мыслѡвъ сꙋ́етныхъ: і҆и҃се, сохранѝ се́рдце моѐ ѿ по́хотей лꙋка́выхъ. І҆и҃се сн҃е бж҃їй, поми́лꙋй мѧ̀.

Конда́къ в҃і: Бл҃года́ть пода́ждь мѝ всѣ́хъ долгѡ́въ рѣши́телю, і҆и҃се, и҆ прїими́ мѧ ка́ющасѧ, ꙗ҆́коже прїѧ́лъ є҆сѝ петра̀ ѿве́ргшагосѧ тебѐ, и҆ призови́ мѧ ᲂу҆ныва́ющаго, ꙗ҆́коже дре́вле па́ѵла гонѧ́ща тѧ̀, и҆ ᲂу҆слы́ши мѧ̀ вопїю́ща тѝ: А҆ллилꙋ́їа.

І҆́косъ в҃і: Пою́ще твоѐ вочл҃вѣ́ченїе, восхвалѧ́емъ тѧ̀ всѝ, и҆ вѣ́рꙋемъ со ѳѡмо́ю, ꙗ҆́кѡ гдⷭ҇ь и҆ бг҃ъ є҆сѝ сѣдѧ́й со ѻ҆ц҃е́мъ, и҆ хотѧ́й сꙋди́ти живы̑мъ и҆ мє́ртвымъ. тогда̀ ᲂу҆́бѡ сподо́би мѧ̀ десна́гѡ стоѧ́нїѧ вопїю́щаго: І҆и҃се, цр҃ю̀ предвѣ́чный, поми́лꙋй мѧ̀: і҆и҃се, цвѣ́те бл҃гово́нный, ѡ҆бл҃гоꙋха́й мѧ̀. І҆и҃се, теплото̀ люби́маѧ, ѡ҆грѣ́й мѧ̀: і҆и҃се, хра́ме предвѣ́чный, покры́й мѧ̀. І҆и҃се, ѻ҆де́ждо свѣ́тлаѧ, ᲂу҆краси́ мѧ: і҆и҃се, би́сере чⷭ҇тны́й, ѡ҆сїѧ́й мѧ̀. І҆и҃се, ка́меню драгі́й, просвѣтѝ мѧ̀: і҆и҃се, сл҃нце пра́вды, ѡ҆свѣти́ мѧ. І҆и҃се, свѣ́те ст҃ы́й, ѡ҆блиста́й мѧ̀: і҆и҃се, болѣ́зни дꙋше́вныѧ и҆ тѣле́сныѧ и҆зба́ви мѧ̀. І҆и҃се, и҆з̾ рꙋкѝ сопроти́вныѧ и҆зми́ мѧ: і҆и҃се, ѻ҆гнѧ̀ неꙋгаси́магѡ, и҆ про́чихъ вѣ́чныхъ мꙋ́къ свободи́ мѧ. І҆и҃се сн҃е бж҃їй, поми́лꙋй мѧ̀.

Конда́къ г҃і: ѽ пресла́дкїй и҆ всеще́дрый і҆и҃се! прїимѝ ны́нѣ ма́лое моле́нїе сїѐ на́ше, ꙗ҆́коже прїѧ́лъ є҆сѝ вдови́цы двѣ̀ лє́птѣ: и҆ сохранѝ достоѧ́нїе твоѐ ѿ вра̑гъ ви́димыхъ и҆ неви́димыхъ, ѿ наше́ствїѧ и҆ноплемє́нникъ, ѿ недꙋ́га и҆ гла́да, ѿ всѧ́кїѧ ско́рби, и҆ смертоно́сныѧ ра́ны, и҆ грѧдꙋ́щїѧ и҆змѝ мꙋ́ки всѣ́хъ, вопїю́щихъ тѝ: А҆ллилꙋ́їа.

Се́й конда́къ глаго́ли три́жды.

И҆ па́ки чте́тсѧ а҃-й і҆́косъ: А҆́гг҃лѡвъ тво́рче:

И҆ па́ки конда́къ пе́рвый: Возбра́нный воево́до:

Пѣ́снь з҃.

І҆рмо́съ: Ѡ҆́бразꙋ злато́мꙋ на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ: посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.

Хрⷭ҇тѐ і҆и҃се, никто́же согрѣшѝ на землѝ ѿ вѣ́ка, ѽ і҆и҃се мо́й, ꙗ҆́коже согрѣши́хъ а҆́зъ ѻ҆каѧ́нный и҆ блꙋ́дный. тѣ́мже і҆и҃се мо́й, вопїю́ ти: пою́ща мѧ̀ ᲂу҆ще́дри, бл҃гослове́нъ є҆сѝ бж҃е ѻ҆тє́цъ на́шихъ.

Хрⷭ҇тѐ і҆и҃се, ко стра́хꙋ твоемꙋ̀ вопїю̀, пригвозди́ мѧ, ѽ і҆и҃се мо́й, и҆ ѡ҆кормѝ ны́нѣ ко приста́нищꙋ бл҃гоѡти́шномꙋ, ꙗ҆́кѡ да, і҆и҃се мо́й ще́дре, пою́ ти сп҃са́емый: бл҃гослове́нъ є҆сѝ бж҃е ѻ҆тє́цъ на́шихъ.

Хрⷭ҇тѐ і҆и҃се, тьма́ми ѡ҆бѣща́хъ тебѣ̀ стра́стный, ѽ і҆и҃се мо́й, покаѧ́нїе, но солга́хъ ѻ҆каѧ́нный. тѣ́мже і҆и҃се мо́й вопїю́ ти: нечꙋ́вственнѣ пребыва́ющꙋю дꙋ́шꙋ мою̀ просвѣтѝ хрⷭ҇тѐ, ѻ҆тцє́въ бж҃е бл҃гослове́нъ є҆сѝ.

Бг҃оро́диченъ: Хрⷭ҇та̀ і҆и҃са ро́ждшаѧ стра́ннѡ, и҆ па́че є҆стества̀, того̀ молѝ всенепоро́чнаѧ, ꙗ҆̀же чрез̾ є҆стество̀ моѧ̑ прегрѣшє́нїѧ всѧ̑ прости́ти мѝ ѻ҆трокови́це, да зовꙋ̀ сп҃са́емь: бл҃гослове́на є҆сѝ бг҃а пло́тїю ро́ждшаѧ.

Пѣ́снь и҃.

І҆рмо́съ: Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте дѣла̀ ꙗ҆́кѡ гдⷭ҇а, и҆ превозноси́те во всѧ̑ вѣ́ки.

Тѧ̀ і҆и҃се мо́й молю̀, ꙗ҆́коже блꙋдни́цꙋ і҆и҃се мо́й и҆зба́вилъ є҆сѝ мно́гихъ согрѣше́нїй: та́кѡ и҆ менѐ і҆и҃се хрⷭ҇тѐ мо́й и҆зба́ви, и҆ ѡ҆чи́сти ѡ҆скверне́ннꙋю дꙋ́шꙋ мою̀, і҆и҃се мо́й.

Преклони́всѧ і҆и҃се, безслове́сными сластьмѝ, безслове́сенъ ꙗ҆ви́хсѧ, и҆ скотѡ́мъ вои́стиннꙋ, ѽ і҆и҃се мо́й, стра́стнѡ ѻ҆каѧ́нный ᲂу҆подо́бихсѧ сп҃се. тѣ́мже і҆и҃се безслове́сїѧ мѧ̀ и҆зба́ви.

Впа́дъ, ѽ і҆и҃се, въ дꙋшетлѣ̑нныѧ разбо́йники, ѡ҆бнажи́хсѧ ѻ҆де́жды, і҆и҃се мо́й, бг҃отка́нныѧ ны́нѣ, и҆ лежꙋ̀ ра́нами ᲂу҆ѧ́звленъ: є҆ле́й, хрⷭ҇тѐ мо́й, возле́й на мѧ̀ и҆ вїно̀.

Бг҃оро́диченъ: І҆и҃са моего̀ и҆ бг҃а носи́вшаѧ хрⷭ҇та̀ несказа́ннѡ, бцⷣе мр҃і́е, того̀ молѝ при́снѡ ѿ бѣ́дъ сп҃сти́сѧ рабѡ́мъ твои̑мъ, и҆ пѣвцє́мъ твои̑мъ, неискꙋсомꙋ́жнаѧ дв҃о.

Пѣ́снь ѳ҃.

І҆рмо́съ: Ѿ бг҃а бг҃а сло́ва, неизрече́нною мꙋ́дростїю, прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи є҆диномꙋ́дреннѡ пѣ́сньми велича́емъ.

Манассі́ю і҆и҃се мо́й, мытарѧ̀, блꙋдни́цꙋ, блꙋ́днаго ще́дре і҆и҃се, и҆ разбо́йника преидо́хъ і҆и҃се мо́й, въ дѣ́лѣхъ стꙋ́дныхъ и҆ безмѣ́стныхъ і҆и҃се: но ты̀ і҆и҃се мо́й, предвари́въ мѧ̀ сп҃сѝ.

Ѿ а҆да́ма і҆и҃се мо́й согрѣши́вшыѧ всѧ̑, пре́жде зако́на и҆ въ зако́нѣ і҆и҃се, и҆ по зако́нѣ ѻ҆каѧ́нный, и҆ бл҃года́ти, і҆и҃се мо́й, побѣди́хъ страстьмѝ ѻ҆каѧ́ннѡ: но ты̀ і҆и҃се мо́й, сꙋдьба́ми твои́ми сп҃си́ мѧ.

Да не ѿлꙋче́нъ бꙋ́дꙋ і҆и҃се мо́й неизрече́нныѧ твоеѧ̀ сла́вы, да не ᲂу҆лꙋчꙋ̀ ча́сти і҆и҃се шꙋ́їѧ, сладча́йшїй і҆и҃се: но ты́ мѧ дєсны́мъ ѻ҆вца́мъ твои̑мъ, хрⷭ҇тѐ і҆и҃се мо́й, сочета́въ ᲂу҆поко́й, ꙗ҆́кѡ бл҃гоꙋтро́бенъ.

Бг҃оро́диченъ: І҆и҃са бцⷣе, є҆го́же носи́ла є҆сѝ, є҆ди́на неискꙋсомꙋ́жнаѧ дв҃о мр҃і́е, того̀ чⷭ҇таѧ ᲂу҆ми́лостиви, ꙗ҆́кѡ сн҃а твоего̀ и҆ зижди́телѧ, и҆зба́вити притека́ющыѧ къ тебѣ̀ и҆скꙋше́нїй и҆ бѣ́дъ, и҆ ѻ҆гнѧ̀ бꙋ́дꙋщагѡ.

Свѣти́ленъ: І҆и҃се, премꙋ́дрости и҆ смы́сла пода́телю, ни́щымъ корми́телю, си̑рымъ застꙋ́пниче, болѧ́щымъ врачꙋ̀, и҆сцѣлѝ и҆ просвѣтѝ моѐ се́рдце і҆и҃се, стрꙋ́пы грѣхо́вными и҆ страсте́й тле́ю покрове́нное і҆и҃се, и҆ сп҃си́ мѧ.

Бг҃оро́диченъ: Сїѧ́нїемъ дв҃о и҆з̾ тебѐ возсїѧ́вшагѡ свѣ́та, ᲂу҆́мъ мо́й ѡ҆зарѝ, се́рдце просвѣтѝ, тьмꙋ̀ грѣхо́внꙋю ѿгонѧ́ющи, и҆ мглꙋ̀ лѣ́ности моеѧ̀ потреблѧ́ющи.

На хвали́техъ стїхи̑ры, гла́съ д҃:

Ди́вное и҆́мѧ твоѐ і҆и҃се сп҃се на́шъ, а҆́гг҃ли пою́тъ на нб҃сѝ, и҆ мы̀ грѣ́шнїи на землѝ бре́нными ᲂу҆стна́ми воспѣва́емъ, є҆гѡ́же ра́ди поми́лꙋй на́съ.

Превели́кое и҆́мѧ твоѐ, сп҃се, на нб҃сѝ ѡ҆деснꙋ́ю ѻ҆ц҃а̀ сѣдѧ́щꙋ тѝ, почита́етсѧ: на земли́ же неизрече́нное твоѐ воплоще́нїе сла́витсѧ: во а҆́дѣ же соше́ствїе бѣ́сы ᲂу҆страша́етъ: ѿ ни́хже и҆ на́съ и҆зба́ви хрⷭ҇тѐ бж҃е, и҆ сп҃сѝ на́съ.

А҆ввакꙋ́мъ, ꙗ҆́кѡ въ гада́нїи разꙋмѣ́въ чꙋ̑днаѧ дѣла̀ твоѧ̑, со стра́хомъ ᲂу҆диви́сѧ, и҆ прибли́жившымсѧ лѣ́тѡмъ позна́лсѧ є҆сѝ блꙋдни́цами и҆ разбо́йниками і҆и҃се: а҆́зъ же ѻ҆каѧ́нный въ небреже́нїи пребыва́ю. но да́ждь мѝ понѐ ѿны́нѣ ра́зꙋмъ, и҆ стра́хъ тво́й млⷭ҇рде, и҆ ве́лїю млⷭ҇ть.

Сла́ва, и҆ ны́нѣ: И҆зба́вительнице крѣ́пкаѧ на тѧ̀ надѣ́ющымсѧ, къ ти́хомꙋ приста́нищꙋ бж҃е́ственнагѡ хотѣ́нїѧ наста́ви мѧ̀ бцⷣе, мт҃рнимъ твои́мъ дерзнове́нїемъ, є҆́же и҆́маши къ сн҃ꙋ твоемꙋ̀ бг҃оневѣ́сто.

Въ ве́черъ, на Гдⷭ҇и воззва́хъ, стїхи̑ры, гла́съ ѕ҃.

Подо́бенъ: Всю̀ ѿложи́вше:

Є҆гда̀ хо́щеши прїитѝ, сꙋ́дъ пра́ведный сотвори́ти, сꙋдїѐ пра́веднѣйшїй, на прⷭ҇то́лѣ сла́вы твоеѧ̀ сѣдѧ́й, рѣка̀ ѻ҆́гненнаѧ пред̾ твоѐ сꙋди́лище ᲂу҆жаса́ющаѧ влече́тъ всѣ́хъ, предстоѧ́щымъ тебѣ̀ нбⷭ҇нымъ си́ламъ, человѣ́кѡмъ же сꙋди̑мымъ стра́хомъ, ꙗ҆́коже ко́ждо содѣ́ла: тогда̀ на́съ пощадѝ, и҆ ча́сти хрⷭ҇тѐ сподо́би сп҃са́емыхъ, ꙗ҆́кѡ бл҃гоꙋтро́бенъ, вѣ́рою мо́лимъ тѧ̀.

Кто̀ ѡ҆ мнѣ̀ не пла́четъ, престꙋпи́вшемъ за́повѣдь вы́шнѧгѡ; невоздержа́нїѧ ра́ди во а҆́дъ всели́хсѧ вмѣ́стѡ раѧ̀, снѣ́ди сла́дкїѧ видѣ́нїемъ сме́рть и҆схода́таихъ, и҆ стра́ненъ є҆ѧ̀ ра́ди бж҃їѧ сла́вы и҆ жи́зни ꙗ҆ви́хсѧ: но прїими́ мѧ ка́ющагосѧ гдⷭ҇и, ꙗ҆́кѡ млⷭ҇тивъ и҆ чл҃вѣколю́бецъ, вели́кїѧ ра́ди твоеѧ̀ млⷭ҇ти.

Ви́ждь мою̀ ско́рбь и҆ болѣ́знь, и҆ прегрѣше́нїй безмѣ́рное мно́жество, дꙋши́ же моеѧ̀ ѡ҆ѕлобле́нїе, и҆ ᲂу҆́мное прельще́нїе. вонмѝ гла́сꙋ ѿча́ѧннагѡ и҆ ѡ҆сꙋжде́ннагѡ, и҆ да́ждь мѝ гдⷭ҇и, дꙋ́хъ сокрꙋше́нный, смире́нное се́рдце, и҆сто́чникъ сле́зъ, и҆ мно́гихъ мои́хъ согрѣше́нїй проще́нїе, вели́кїѧ ра́ди твоеѧ̀ млⷭ҇ти.

[И҆ въ мине́и ст҃а́гѡ, г҃. ]

Сла́ва: Бж҃е, хотѧ́й всѣ̑мъ человѣ́кѡмъ сп҃сти́сѧ, вонмѝ мл҃твѣ мое́й, и҆ да не ѿри́неши сле́зъ мои́хъ ꙗ҆́кѡ сꙋ́етныхъ: кто́ бо прїи́де къ тебѣ̀ пла́чѧ, и҆ не а҆́бїе сп҃се́нъ бы́сть; кто́ же возопѝ те́плѣ, и҆ не а҆́бїе ᲂу҆слы́шанъ; но, ѽ влⷣко, ско́ръ ѡ҆брѣта́ешисѧ во сп҃се́нїе всѣ́хъ молѧ́щихсѧ тебѣ̀, ꙗ҆́кѡ въ млⷭ҇ти непобѣди́мый.

И҆ ны́нѣ, бг҃оро́диченъ: Чл҃вѣколю́бїѧ твоегѡ̀ пꙋчи́нꙋ, бл҃гоꙋтро́бїѧ глꙋбинꙋ̀, и҆ бл҃гости щедро́ты неизчє́тныѧ, покажѝ пречⷭ҇таѧ дв҃о на мнѣ̀ ѻ҆каѧ́ннѣмъ: ᲂу҆толѝ па́жить грѣхо́внꙋю, цѣломꙋ́дрїе пода́вши, и҆ соблюдѝ съ дꙋше́ю и҆ тѣ́ло моѐ нескве́рно.

На стїхо́внѣ стїхи̑ры, гла́съ ѕ҃:

Въ стра́шное прише́ствїе твоѐ хрⷭ҇тѐ, да не ᲂу҆слы́шимъ, не вѣ́мъ ва́съ: ᲂу҆пова́нїе бо на тѧ̀ сп҃се возложи́хомъ, а҆́ще и҆ твоѧ̑ повелѣ̑нїѧ не сохрани́хомъ, небреже́нїѧ ра́ди на́шегѡ: но пощадѝ дꙋ́шы на́шѧ, мо́лимсѧ.

Сті́хъ: Къ тебѣ̀ возведо́хъ ѻ҆́чи моѝ:

Покаѧ́нїѧ не стѧжа́хъ, нижѐ па́ки сле́зъ: сегѡ̀ ра́ди молю́ тѧ хрⷭ҇тѐ бж҃е, пре́жде конца̀ ѡ҆брати́ти мѧ̀, и҆ да́ти мѝ ᲂу҆миле́нїе, ꙗ҆́кѡ да и҆зба́влюсѧ ѿ мꙋ́ки.

Сті́хъ: Поми́лꙋй на́съ гдⷭ҇и, поми́лꙋй на́съ:

Мч҃нцы твоѝ гдⷭ҇и, не ѿверго́шасѧ тебѐ, ни ѿстꙋпи́ша ѿ за́повѣдей твои́хъ: тѣ́хъ мл҃твами поми́лꙋй на́съ.

Сла́ва, и҆ ны́нѣ, бг҃оро́диченъ:

Никто́же притека́ѧй къ тебѣ̀, посра́мленъ ѿ тебѐ и҆схо́дитъ пречⷭ҇таѧ бцⷣе дв҃о, но про́ситъ бл҃года́ти, и҆ прїе́млетъ дарова́нїе къ поле́зномꙋ проше́нїю.

Во вто́рникъ ве́чера, и҆лѝ въ четверто́къ, глаго́ли крⷭ҇тобг҃оро́диченъ:

На дре́вѣ живо́тъ на́шъ зрѧ́щи всенепоро́чнаѧ бцⷣа ви́сѧщъ, мт҃рски рыда́ющи вопїѧ́ше: сн҃е мо́й и҆ бж҃е мо́й, сп҃сѝ любо́вїю пою́щыѧ тѧ̀.

Та́же: Ны́нѣ ѿпꙋща́еши: И҆ прѡ́чаѧ.

На ᲂу҆́трени,

по а҃-й каѳі́смѣ сѣда́ленъ, гла́съ є҃:

Сꙋдїѝ сѣдѧ́щꙋ, и҆ а҆́гг҃лѡмъ стоѧ́щымъ, трꙋбѣ̀ гласѧ́щей, пла́мени горѧ́щꙋ, что̀ сотвори́ши дꙋшѐ моѧ̀, ведо́ма на сꙋ́дъ; тогда́ бо лю̑таѧ твоѧ̑ предста́нꙋтъ, и҆ та̑йнаѧ ѡ҆блича́тсѧ согрѣшє́нїѧ. тѣ́мже пре́жде конца̀ возопі́й сꙋдїѝ: бж҃е, ѡ҆чи́сти мѧ̀, и҆ сп҃си́ мѧ. Два́жды.

Сла́ва, и҆ ны́нѣ, бг҃оро́диченъ:

Мы́сленный вїногра́де, и҆зрасти́вшїй на́мъ гро́здъ бж҃е́ственный, ѿ негѡ́же напоѧ́емсѧ вїно́мъ нетлѣ́нїѧ, и҆сточѝ мое́й дꙋшѝ ᲂу҆миле́нїе, во́дꙋ ѡ҆чище́нїѧ, твои́ми мл҃твами.

Крⷭ҇тобг҃оро́диченъ: Вознесе́на на дре́во ꙗ҆́кѡ ви́дѣ ро́ждшаѧ тѧ̀ сп҃се, болѣ́зней кромѣ̀, рыда́ше съ пла́чемъ, и҆ взыва́ше: ᲂу҆вы̀ мнѣ̀ сладча́йшїй сн҃е! ᲂу҆ѧзвлѧ́юсѧ дꙋше́ю, на крⷭ҇тѣ̀ зрѧ́щи тѧ̀ пригвожде́нна посредѣ̀ двою̀ ѕлодѣ̑ю, сꙋдо́мъ ѕлодѣ́йственнымъ.

По в҃-й каѳі́смѣ, сѣда́ленъ, гла́съ в҃:

Помышлѧ́ю де́нь стра́шный, и҆ пла́чꙋсѧ дѣѧ́нїй мои́хъ лꙋка́выхъ: ка́кѡ ѿвѣща́ю безсме́ртномꙋ цр҃ю̀; и҆лѝ ко́имъ дерзнове́нїемъ воззрю̀ на сꙋдїю̀ блꙋ́дный а҆́зъ; бл҃гоꙋтро́бный ѻ҆́ч҃е, сн҃е є҆диноро́дный, дш҃е ст҃ы́й, поми́лꙋй мѧ̀. Два́жды.

Сла́ва, и҆ ны́нѣ, бг҃оро́диченъ:

Ско́рый тво́й покро́въ, и҆ по́мощь и҆ млⷭ҇ть покажѝ на рабы̑ твоѧ̑, и҆ во́лны чⷭ҇таѧ, ᲂу҆кротѝ сꙋ́етныхъ помыслѡ́въ, и҆ па́дшꙋю мою̀ дꙋ́шꙋ возста́ви бцⷣе: вѣ́мъ бо, вѣ́мъ дв҃о, ꙗ҆́кѡ мо́жеши, є҆ли̑ка и҆ хо́щеши.

Крⷭ҇тобг҃оро́диченъ: Крⷭ҇то́мъ сн҃а твоегѡ̀ бг҃обл҃года́тнаѧ, і҆́дѡльскаѧ пре́лесть всѧ̀ ᲂу҆праздни́сѧ, и҆ де́мѡнскаѧ крѣ́пость попра́сѧ: сегѡ̀ ра́ди вѣ́рнїи по до́лгꙋ тѧ̀ при́снѡ пое́мъ и҆ бл҃гослови́мъ, и҆ бцⷣꙋ вои́стиннꙋ и҆сповѣ́дающе, тѧ̀ велича́емъ.

Канѡ́нъ ко гдⷭ҇ꙋ на́шемꙋ і҆и҃сꙋ хрⷭ҇тꙋ̀, гла́съ ѕ҃.

Пѣ́снь а҃.

І҆рмо́съ: Помо́щникъ и҆ покрови́тель, бы́сть мнѣ̀ во сп҃се́нїе, се́й мо́й бг҃ъ, и҆ просла́влю є҆го̀, бг҃ъ ѻ҆тца̀ моегѡ̀, и҆ вознесꙋ̀ є҆го̀: сла́внѡ бо просла́висѧ.

Є҆гда̀ прїи́деши бж҃е во тьма́хъ и҆ ты́сѧщахъ а҆́гг҃льскихъ нбⷭ҇ныхъ нача̑лъ, и҆ менѐ на ѻ҆́блацѣхъ ѻ҆каѧ́ннаго сподо́би срѣ́сти тѧ̀ хрⷭ҇тѐ.

Не вни́ди со мно́ю въ сꙋ́дъ, носѧ́й моѧ̑ дѣѧ̑нїѧ, словеса̀ и҆зыскꙋ́ѧй, и҆ и҆справлѧ́ѧй стремлє́нїѧ: но щедро́тами твои́ми презира́ѧ моѧ̑ лю̑таѧ, сп҃си́ мѧ всеси́льне.

Оу҆жаса́етъ мѧ̀, и҆ страши́тъ ѻ҆́гнь негаси́мый гее́нскїй, че́рвь го́рькїй, скре́жетъ зꙋбѡ́въ: но ѡ҆сла́би мѝ, ѡ҆ста́ви, и҆ стоѧ́нїю мѧ̀ хрⷭ҇тѐ и҆збра́нныхъ твои́хъ соꙋчинѝ.

Бг҃оро́диченъ: Преклоне́нъ мно́жествомъ и҆скꙋше́нїй, и҆ лю́тыми дѣѧ́нїи, вы́ю дꙋше́внꙋю и҆ тѣле́снꙋю приклонѧ́ю тебѣ̀, чⷭ҇таѧ, и҆ вопїю́ ти прилѣ́жнѡ: ты́ мѧ и҆спра́ви.

Пѣ́снь г҃.

І҆рмо́съ: Оу҆твердѝ гдⷭ҇и, на ка́мени за́повѣдей твои́хъ, подви́гшеесѧ се́рдце моѐ, ꙗ҆́кѡ є҆ди́нъ ст҃ъ є҆сѝ и҆ гдⷭ҇ь.

дⷭ҇ь грѧде́тъ, и҆ кто̀ стерпи́тъ стра́хъ є҆гѡ̀; кто̀ ꙗ҆ви́тсѧ лицꙋ̀ є҆гѡ̀; но гото́ва бꙋ́ди, ѽ дꙋшѐ моѧ̀, къ срѣ́тенїю.

Нестерпи́мый, гдⷭ҇и, гнѣ́въ, ка́кѡ стерплю̀ сꙋда̀ твоегѡ̀, преслꙋ́шавъ твоѐ повелѣ́нїе; но пощадѝ, пощади́ мѧ въ ча́съ сꙋда̀.

Поми́лꙋй гдⷭ҇и, поми́лꙋй мѧ̀, вопїю́ ти, є҆гда̀ прїи́деши со а҆́гг҃лы твои́ми, ѿда́ти всѣ̑мъ по достоѧ́нїю дѣѧ́нїй.

Бг҃оро́диченъ: Две́рь бл҃года́тнаѧ, ѿве́рзшаѧ вѣ̑рнымъ двє́ри нбⷭ҇ныѧ, покаѧ́нїѧ двє́ри свѣтоза̑рныѧ ѿве́рзи мѝ влⷣчце, и҆ вра́тъ сме́ртныхъ свободѝ.

Сѣда́ленъ, гла́съ ѕ҃:

Во ю҆до́ли пла́ча, въ мѣ́стѣ є҆́же положи́лъ є҆сѝ, є҆гда̀ сѧ́деши млⷭ҇тиве сотвори́ти пра́ведный сꙋ́дъ, не ѡ҆б̾ѧвѝ моѧ̑ та̑йнаѧ, нижѐ посрамѝ менѐ пред̾ а҆́гг҃лы: но пощади́ мѧ бж҃е, и҆ поми́лꙋй мѧ̀.

Бг҃оро́диченъ: Оу҆пова́нїе мі́ра бл҃га́ѧ бцⷣе дв҃о, твоѐ и҆ є҆ди́ное стра́шное предста́тельство молю̀, ᲂу҆милосе́рдисѧ на ᲂу҆добоѡбстоѧ́тєльныѧ лю́ди: ᲂу҆молѝ млⷭ҇тиваго бг҃а, и҆зба́витисѧ дꙋша́мъ на́шымъ ѿ всѧ́кагѡ преще́нїѧ, є҆ди́на бл҃гослове́ннаѧ.

Пѣ́снь д҃.

І҆рмо́съ: Оу҆слы́ша прⷪ҇ро́къ прише́ствїе твоѐ гдⷭ҇и, и҆ ᲂу҆боѧ́сѧ, ꙗ҆́кѡ хо́щеши ѿ дв҃ы роди́тисѧ, и҆ человѣ́кѡмъ ꙗ҆ви́тисѧ, и҆ глаго́лаше: ᲂу҆слы́шахъ слꙋ́хъ тво́й, и҆ ᲂу҆боѧ́хсѧ, сла́ва си́лѣ твое́й гдⷭ҇и.

Наста̀ де́нь, ᲂу҆жѐ при две́рехъ сꙋ́дъ: дꙋшѐ бо́дрствꙋй, и҆дѣ́же ца́рїе вкꙋ́пѣ и҆ кнѧ́зи, бога́тїи и҆ ᲂу҆бо́зїи собира́ютсѧ, и҆ воспрїи́метъ по достоѧ́нїю содѣ́ѧнныхъ ѿ человѣ̑къ кі́йждо.

Неꙋмы́тный сꙋ́дъ тво́й, неꙋтае́нное твоѐ сꙋди́ще хитросло́вїѧ: не виті́й хꙋдо́жество кра́дꙋщее, не свидѣ́телей непщева́нїе ѿража́ющее пра́ведное, въ тебѣ́ бо бз҃ѣ всѣ́хъ сокровє́ннаѧ предстоѧ́тъ.

Да не прїидꙋ̀ въ зе́млю пла́ча, да не ви́ждꙋ мѣ́сто тьмы̀, хрⷭ҇тѐ мо́й сло́ве: нижѐ свѧ́занъ бꙋ́дꙋ рꙋка́ми и҆ нога́ми, внѣ̀ черто́га твоегѡ̀ и҆зве́рженный, ѻ҆де́ждꙋ нетлѣ́нїѧ ѡ҆скверне́ннꙋю и҆мѣ́ѧ всеѻкаѧ́нный.

Бг҃оро́диченъ: Крѣ́посте моѧ̀ пречⷭ҇таѧ, прибѣ́жище, неѡбори́маѧ стѣно̀, и҆ къ бг҃ꙋ мл҃твенница сꙋ́щаѧ, вѣ́чнꙋющагѡ пла́мене и҆ гее́нны свободи́ мѧ.

Пѣ́снь є҃.

І҆рмо́съ: Ѿ но́щи ᲂу҆́тренююща, чл҃вѣколю́бче, просвѣтѝ молю́сѧ, и҆ наста́ви и҆ менѐ на повелѣ̑нїѧ твоѧ̑, и҆ наꙋчи́ мѧ сп҃се, твори́ти во́лю твою̀.

Тре́петъ неисповѣди́мый и҆ стра́хъ та́мѡ, прїи́детъ бо гдⷭ҇ь, и҆ дѣ́ло съ ни́мъ коегѡ́ждо ѿ человѣ̑къ: и҆ кто̀ ѿсю́дꙋ ᲂу҆́бѡ себѐ не воспла́четъ;

Пощадѝ, пощадѝ гдⷭ҇и, созда́нїе твоѐ, согрѣши́хъ, ѡ҆сла́би мѝ, ꙗ҆́кѡ є҆стество́мъ чи́стый са́мъ є҆сѝ є҆ди́нъ: и҆ и҆́ный ра́звѣ тебѐ никто́же є҆́сть внѣ̀ скве́рны.

Ни сле́зъ, нижѐ покаѧ́нїѧ и҆́мамъ, нижѐ ᲂу҆миле́нїѧ: са́мъ мѝ сїѧ̑ сп҃се, ꙗ҆́кѡ бг҃ъ да́рꙋй.

Бг҃оро́диченъ: Ѡ҆скверне́нъ по́мыслы, и҆ ѡ҆калѧ́нъ мно́гими паде́ньми, мт҃и бж҃їѧ, тѧ̀ молю̀: є҆ди́на нескве́рнаѧ, ᲂу҆ще́дри и҆ сп҃си́ мѧ хода́тайствомъ твои́мъ.

Пѣ́снь ѕ҃.

І҆рмо́съ: Возопи́хъ всѣ́мъ се́рдцемъ мои́мъ къ ще́дромꙋ бг҃ꙋ, и҆ ᲂу҆слы́ша мѧ̀ ѿ а҆́да преиспо́днѧгѡ, и҆ возведѐ ѿ тлѝ живо́тъ мо́й.

Во стра́шнѣмъ хрⷭ҇тѐ прише́ствїи твое́мъ, є҆гда̀ ꙗ҆ви́шисѧ съ нб҃сѐ, и҆ поста́вѧтсѧ престо́ли, и҆ кни̑ги разгнꙋ́тсѧ: пощадѝ, пощадѝ тогда̀ сп҃се, созда́нїе твоѐ.

Та́мѡ ничто́же помощѝ мо́жетъ, бг҃ꙋ сꙋ́щꙋ сꙋдїѝ, ни тща́нїе, ни кѡ́зни, ни сла́ва, ни дрꙋ́жба, ра́звѣ ѿ дѣ́лъ крѣ́пость твоѧ̀, ѽ дꙋшѐ моѧ̀.

Возмѝ твоѐ, да не ᲂу҆слы́шꙋ гдⷭ҇и, ѿсыла́емь ѿ тебѐ, нижѐ є҆́же пойдѝ во ѻ҆́гнь проклѧ́тыхъ: но возжелѣ́ннагѡ гла́са пра́ведныхъ.

Бг҃оро́диченъ: Ѡ҆чище́нїе и҆́мамы тѧ̀ всегда̀ ᲂу҆ бг҃а, пренепоро́чнаѧ: тѣ́мже и҆спросѝ и҆зба́вити всѣ́хъ пречⷭ҇таѧ, ꙗ҆̀же та́мѡ мꙋче́нїй стра́шныхъ, бцⷣꙋ вои́стиннꙋ и҆сповѣ́дающихъ тѧ̀.

Конда́къ, гла́съ а҃:

Є҆гда̀ прїи́деши бж҃е, на зе́млю со сла́вою, и҆ трепе́щꙋтъ всѧ́чєскаѧ, рѣка́ же ѻ҆́гненнаѧ пред̾ сꙋди́щемъ влече́тъ, кни̑ги разгиба́ютсѧ, и҆ та̑йнаѧ ꙗ҆влѧ́ютсѧ: тогда̀ и҆зба́ви мѧ̀ ѿ ѻ҆гнѧ̀ неꙋгаси́магѡ, и҆ сподо́би мѧ̀ ѡ҆деснꙋ́ю тебѐ ста́ти, сꙋдїѐ пра́веднѣйшїй.

І҆́косъ: Сꙋди́ще твоѐ стра́шное, и҆ сꙋ́дъ пра́веднѣйшїй, дѣла́ же моѧ̑ лю̑таѧ: но са́мъ млⷭ҇тиве предвари́въ сп҃си́ мѧ, и҆ мꙋ́ки свободѝ, и҆зба́ви же влⷣко ко́злищъ ча́сти, и҆ сподо́би ѡ҆деснꙋ́ю тебѐ ста́ти, сꙋдїѐ пра́веднѣйшїй.

Пѣ́снь з҃.

І҆рмо́съ: Согрѣши́хомъ, беззако́нновахомъ, непра́вдовахомъ пред̾ тобо́ю: нижѐ соблюдо́хомъ, нижѐ сотвори́хомъ, ꙗ҆́коже заповѣ́далъ є҆сѝ на́мъ: но не преда́ждь на́съ до конца̀, ѻ҆тцє́въ бж҃е.

дⷭ҇ь грѧде́тъ сꙋди́ти, кто̀ стерпи́тъ видѣ́нїе є҆гѡ̀; вострепещѝ дꙋшѐ ѻ҆каѧ́ннаѧ, вострепещѝ, и҆ ᲂу҆гото́ви и҆схо́дищꙋ дѣла̀ твоѧ̑: да млⷭ҇тива и҆ млⷭ҇рда ѡ҆брѧ́щеши є҆го̀, ѻ҆тцє́въ бг҃а бл҃гослове́нна.

Припа́даю тѝ, и҆ приношꙋ̀ тебѣ̀ ꙗ҆́коже сле́зы глаго́лы моѧ̑: согрѣши́хъ, ꙗ҆́коже не согрѣшѝ блꙋдни́ца, и҆ беззако́нновахъ, ꙗ҆́кѡ и҆́ный никто́же на землѝ. но ᲂу҆ще́дри влⷣко творе́нїе твоѐ, и҆ призови́ мѧ.

Две́рь твою̀ не затвори́ ми тогда̀, гдⷭ҇и, гдⷭ҇и, но ѿве́рзи мѝ ю҆̀ ка́ющемꙋсѧ, и҆ болѣ́зненнѡ къ тебѣ̀ ѿ се́рдца припа́дающꙋ бж҃е, и҆ поми́лꙋй мѧ̀.

Бг҃оро́диченъ: Є҆гда̀ въ нощѝ жени́хъ прїи́детъ сꙋди́ти землѝ, тогда̀ во срѣ́тенїе є҆гѡ̀ со свѣ́тлою свѣще́ю, бл҃говолѝ пречⷭ҇таѧ, и҆зы́ти мѝ, и҆ поклони́тисѧ тогѡ̀ прише́ствїю.

Пѣ́снь и҃.

І҆рмо́съ: Є҆го́же вѡ́инства нбⷭ҇наѧ сла́вѧтъ, и҆ трепе́щꙋтъ херꙋві́ми и҆ серафі́ми, всѧ́ко дыха́нїе и҆ тва́рь, по́йте, бл҃гослови́те и҆ превозноси́те во всѧ̑ вѣ́ки.

Стра́шнагѡ втора́гѡ твоегѡ̀ гдⷭ҇и прише́ствїѧ помышлѧ́ѧ срѣ́тенїе, трепе́щꙋ преще́нїѧ твоегѡ̀, бою́сѧ гнѣ́ва твоегѡ̀: ѿ сегѡ́ мѧ часа̀, зовꙋ̀, сп҃сѝ во вѣ́ки. Два́жды.

Всѣ́хъ сꙋдїѐ бж҃е мо́й и҆ гдⷭ҇и, да ᲂу҆слы́шꙋ тогда̀ гла́съ тво́й возжелѣ́нный: да ᲂу҆ви́жꙋ свѣ́тъ тво́й вели́кїй: да ᲂу҆зрю̀ селє́нїѧ твоѧ̑: да ᲂу҆зрю̀ сла́вꙋ твою̀, ра́дꙋѧсѧ во вѣ́ки.

Бг҃оро́диченъ: Въ де́нь сꙋда̀ ꙗ҆ви́сѧ влⷣчце, и҆ предста́ни мѝ мꙋ́ки и҆ ѻ҆гнѧ̀ свобожда́ющи, да сп҃се́нъ бы́въ тобо́ю, воспою̀ твою̀ неѡбори́мꙋю бл҃года́ть.

Пѣ́снь ѳ҃.

І҆рмо́съ: Безсѣ́меннагѡ зача́тїѧ ржⷭ҇тво̀ несказа́нное, мт҃ре безмꙋ́жныѧ нетлѣ́ненъ пло́дъ: бж҃їе бо рожде́нїе ѡ҆бновлѧ́етъ є҆стєства̀. тѣ́мже тѧ̀ всѝ ро́ди, ꙗ҆́кѡ бг҃оневѣ́стнꙋю мт҃рь, правосла́внѡ велича́емъ.

дⷭ҇ь грѧде́тъ грѣ̑шныѧ мꙋ́чити, пра́вєдныѧ же сп҃стѝ: воспла́чимсѧ, возрыда́имъ и҆ прїи́мемъ чꙋ́вство ѻ҆́нагѡ днѐ, во́ньже безвѣ̑стнаѧ и҆ та̑йнаѧ ѿкры́въ человѣ́кѡмъ, ѿда́стъ по достоѧ́нїю.

Данїи́лъ ᲂу҆боѧ́сѧ часа̀ и҆стѧза́нїѧ, а҆́зъ же ѻ҆каѧ́нный что̀ постраждꙋ̀ ѿ негѡ̀, грѧды́й гдⷭ҇и, стра́шнагѡ днѐ; но да́ждь мѝ пре́жде конца̀ бл҃гоꙋго́днѡ тебѣ̀ послꙋжи́ти, и҆ ᲂу҆лꙋчи́ти црⷭ҇твїе твоѐ.

Ѻ҆́гнь гото́витсѧ, че́рвь ᲂу҆строѧ́етсѧ: весе́лїе, сла́ва, ѡ҆слабле́нїе, свѣ́тъ невече́рнїй, ра́дость првⷣныхъ, и҆ кто̀ бл҃же́нный и҆збѣ́гнꙋти не восхо́щетъ мꙋче́нїѧ пе́рвыхъ, наслѣ́дивый втора̑ѧ;

Бг҃оро́диченъ: Страсте́й волне́нїе смꙋща́етъ мѧ̀, и҆ сластьмѝ погрꙋжа́етъ, дв҃о пренепоро́чнаѧ, ко́рмчїю хрⷭ҇та̀ ро́ждшаѧ, рꙋ́кꙋ мѝ по́мощи прострѝ и҆ сп҃си́ мѧ, є҆ди́на сп҃се́нїе вѣ́рою бл҃жа́щихъ тѧ̀.

Свѣти́ленъ. Подо́бенъ: Жєны̀ ᲂу҆слы́шите:

Є҆гда̀ престо́ли поста́вѧтсѧ, и҆ кни̑ги разве́рзꙋтсѧ, и҆ є҆гда̀ хо́щеши сꙋди́ти сꙋ́дъ человѣ́чєскимъ дѣѧ́нїємъ, не ѡ҆сꙋдѝ на́съ влⷣко, во ѻ҆́гнь гее́нскїй, ꙗ҆̀же ѿ пе́рсти созда́лъ є҆сѝ: но твоегѡ̀ црⷭ҇твїѧ на́съ сподо́би сп҃се.

Бг҃оро́диченъ: Є҆го́же ѿ твои́хъ крове́й родила̀ є҆сѝ чⷭ҇таѧ, соверше́нна человѣ́ка, и҆ бг҃а и҆́стинна и҆ гдⷭ҇а: ᲂу҆молѝ того̀ и҆зба́витисѧ на́мъ ѻ҆гнѧ̀ вѣ́чнꙋющагѡ.

На стїхо́внѣ стїхи̑ры, гла́съ ѕ҃:

На́га мѧ̀ ѡ҆брѣ́тъ добродѣ́телей вра́гъ, стрѣло́ю грѣхо́вною ᲂу҆ѧзвѝ: но ты̀ бж҃е, ꙗ҆́кѡ вра́чь дꙋ́шъ и҆ тѣле́съ, ꙗ҆́звы дꙋшѝ моеѧ̀ и҆сцѣлѝ, и҆ поми́лꙋй мѧ̀.

Сті́хъ: И҆спо́лнихомсѧ заꙋ́тра млⷭ҇ти твоеѧ̀ гдⷭ҇и.

Се́рдца моегѡ̀ стрꙋ́пы, ѿ мно́гихъ грѣхѡ́въ прозѧ́бшыѧ мѝ, и҆сцѣлѝ сп҃се, ꙗ҆́кѡ дꙋ́шъ и҆ тѣле́съ вра́чь, и҆ подаѧ̀ просѧ́щымъ прегрѣше́нїй проще́нїе, при́снѡ да́рꙋй мѝ сле́зы покаѧ́нїѧ, даѧ́ ми разрѣше́нїе долгѡ́въ гдⷭ҇и, и҆ поми́лꙋй мѧ̀.

Сті́хъ: И҆ бꙋ́ди свѣ́тлость гдⷭ҇а бг҃а на́шегѡ:

Гдⷭ҇и, а҆́ще не бы́хомъ ст҃ы̑ѧ твоѧ̑ и҆мѣ́ли мл҃твенники, и҆ бл҃госты́ню твою̀ ми́лꙋющꙋю на́съ: ка́кѡ смѣ́ли бы́хомъ сп҃се, пѣ́ти тѧ̀, є҆го́же славосло́вѧтъ непреста́ннѡ а҆́гг҃ли; сердцевѣ́дче, пощадѝ дꙋ́шы на́шѧ.

Сла́ва, и҆ ны́нѣ, бг҃оро́диченъ:

Мр҃і́е чⷭ҇таѧ, злата́ѧ кади́льнице, є҆ди́нагѡ ѿ неразлꙋ́чныѧ трⷪ҇цы прїѧ́телище сꙋ́щаѧ, на не́же ѻ҆ц҃ъ и҆зво́ли, сн҃ъ же дѣ́йствомъ всест҃а́гѡ дх҃а, всели́сѧ во чре́во твоѐ всеѡсщ҃е́нное: того̀ ᲂу҆́бѡ молѝ прилѣ́жнѡ: пода́ти на́мъ грѣхѡ́въ ѡ҆ставле́нїе въ де́нь сꙋ́дный.

Крⷭ҇тобг҃оро́диченъ. Подо́бенъ: Всю̀ ѿложи́вше:

А҆́гнца своего̀, а҆́гница нескве́рнаѧ дре́вле и҆ непоро́чнаѧ влⷣчца на дре́вѣ крⷭ҇тнѣмъ ꙗ҆́кѡ ᲂу҆зрѣ̀, ма́терски восклица́ше, и҆ дивѧ́щисѧ вопїѧ́ше: ча́до сладча́йшее, что̀ зрѣ́нїе сїѐ но́вое и҆ пресла́вное; ка́кѡ со́нмъ безблагода́тный, сꙋди́щꙋ пїла́товꙋ предадѐ тѧ̀, и҆ ѡ҆сꙋжда́ютъ на сме́рть живота̀ всѧ́ческихъ; но воспѣва́ю твоѐ неизрече́нное сло́ве, схожде́нїе.

Та́же: Бл҃го є҆́сть и҆сповѣ́датисѧ гдⷭ҇еви: И҆ трист҃о́е. По Ѻ҆́ч҃е на́шъ: тропа́рь, и҆ є҆ктенїа̀, и҆ ѿпꙋ́стъ.

Та́же: ча́съ а҃, ѱалмы̀ ѻ҆бы́чны, и҆ коне́чный ѿпꙋ́стъ.

Бл҃жє́нна, гла́съ ѕ҃:

Помѧни́ мѧ бж҃е сп҃се мо́й, є҆гда̀ прїи́деши во црⷭ҇твїи твое́мъ, и҆ сп҃си́ мѧ ꙗ҆́кѡ є҆ди́нъ чл҃вѣколю́бецъ.

Петро́въ пла́чь прїе́мый, прїимѝ и҆ моѐ хрⷭ҇тѐ покаѧ́нїе, и҆ да́рꙋй мѝ согрѣше́нїй проще́нїе.

Проповѣ́давый покаѧ́нїе человѣ́кѡмъ, гдⷭ҇нь крⷭ҇ти́телю и҆ прⷣте́че, молю́ тѧ, пока́ѧтисѧ мнѣ̀ ѿ дꙋшѝ сподо́би.

Треволнє́нїѧ под̾е́мше страсте́й ст҃і́и, сꙋ́щыѧ въ бꙋ́ри болѣ́зней при́снѡ и҆збавлѧ́ете, тѣ́мже бл҃жи́ми є҆стѐ.

Сла́ва: Прⷪ҇ро́ки прославлѧ́емый сп҃се мо́й въ трⷪ҇цѣ, про́стѡ и҆ несмѣ́снѡ, прⷣте́чи мл҃твами сп҃си́ мѧ.

И҆ ны́нѣ: Застꙋ́пнице крѣ́пкаѧ сꙋ́щымъ въ ско́рбехъ, застꙋпѝ ѿ жите́йскихъ страсте́й прило́га, и҆ сп҃си́ мѧ влⷣчце.

А҆по́столъ къ колосса́ємъ. зача́ло сн҃и:

Бра́тїе, ѡ҆блецы́тесѧ ᲂу҆́бѡ [ꙗ҆́коже и҆збра́ннїи бж҃їи, ст҃и и҆ возлю́бленни,] во ᲂу҆трѡ́бы щедро́тъ, бл҃гость, смиреномꙋ́дрїе, кро́тость и҆ долготерпѣ́нїе: Прїе́млюще дрꙋ́гъ дрꙋ́га, и҆ проща́юще себѣ̀, а҆́ще кто̀ на кого̀ и҆́мать порече́нїе: ꙗ҆́коже и҆ хрⷭ҇то́съ прости́лъ є҆́сть ва́мъ, та́кѡ и҆ вы̀. Над̾ всѣ́ми же си́ми стѧжи́те любо́вь, ꙗ҆́же є҆́сть соꙋ́зъ соверше́нства. И҆ ми́ръ бж҃їй да водворѧ́етсѧ въ сердца́хъ ва́шихъ, во́ньже и҆ зва́ни бы́сте во є҆ди́номъ тѣ́лѣ, и҆ бл҃года́рни быва́йте. Сло́во хрⷭ҇то́во да вселѧ́етсѧ въ ва́съ бога́тнѡ, во всѧ́кой премꙋ́дрости, ᲂу҆ча́ще и҆ вразꙋмлѧ́юще себѐ самѣ́хъ, во ѱалмѣ́хъ и҆ пѣ́нїихъ и҆ пѣ́снехъ дꙋхо́вныхъ, ѡ҆ бл҃года́ти пою́ще въ сердца́хъ ва́шихъ гдⷭ҇еви.

Є҆ѵⷢ҇лїе ѿ ма́рка, зача́ло л҃з.

Речѐ гдⷭ҇ь: и҆́же хо́щетъ по мнѣ̀ и҆тѝ, да ѿве́ржетсѧ себѐ, и҆ во́зметъ кре́стъ сво́й, и҆ по мнѣ̀ грѧде́тъ. И҆́же бо а҆́ще хо́щетъ дꙋ́шꙋ свою̀ сп҃стѝ, погꙋби́тъ ю҆̀: а҆ и҆́же погꙋби́тъ дꙋ́шꙋ свою̀ менѐ ра́ди и҆ є҆ѵⷢ҇лїа, то́й сп҃се́тъ ю҆̀. Ка́ѧ бо по́льза человѣ́кꙋ, а҆́ще прїѡбрѧ́щетъ мі́ръ ве́сь, и҆ ѿтщети́тъ дꙋ́шꙋ свою̀; И҆лѝ что̀ да́стъ человѣ́къ и҆змѣ́нꙋ на дꙋшѝ свое́й; И҆́же бо а҆́ще постыди́тсѧ менѐ, и҆ мои́хъ слове́съ въ ро́дѣ се́мъ прелюбодѣ́йнѣмъ и҆ грѣ́шнѣмъ, и҆ сн҃ъ чл҃вѣ́ческїй постыди́тсѧ є҆гѡ̀, є҆гда̀ прїи́детъ во сла́вѣ ѻ҆ц҃а̀ своегѡ̀ со а҆́гг҃лы ст҃ы́ми. И҆ глаго́лаше и҆̀мъ: а҆ми́нь глаго́лю ва́мъ, ꙗ҆́кѡ сꙋ́ть нѣ́цыи ѿ здѣ̀ стоѧ́щихъ, и҆̀же не и҆́мꙋтъ вкꙋси́ти сме́рти, до́ндеже ви́дѧтъ црⷭ҇твїе бж҃їе прише́дшее въ си́лѣ.

На Гдⷭ҇и воззва́хъ, стїхи̑ры, гла́съ ѕ҃.

Подо́бенъ: Всю̀ ѿложи́вше:

Совѣ́тъ превѣ́чный ѿкрыва́ѧ тебѣ̀ ѻ҆трокови́це, гаврїи́лъ предста̀, тебѐ лобза́ѧ и҆ вѣща́ѧ: ра́дꙋйсѧ, землѐ ненасѣ́ѧннаѧ. ра́дꙋйсѧ, кꙋпино̀ неѡпали́маѧ. ра́дꙋйсѧ, глꙋбино̀ неꙋдобозри́маѧ. ра́дꙋйсѧ, мо́сте къ нб҃сє́мъ преводѧ́й, и҆ лѣ́ствице высо́каѧ, ю҆́же і҆а́кѡвъ ви́дѣ. ра́дꙋйсѧ, бж҃е́ственнаѧ рꙋ́чко ма́нны. ра́дꙋйсѧ, разрѣше́нїе клѧ́твы. ра́дꙋйсѧ, а҆да́мово воззва́нїе, съ тобо́ю гдⷭ҇ь.

Ꙗ҆влѧ́еши ми сѧ ꙗ҆́кѡ человѣ́къ, глаго́летъ нетлѣ́ннаѧ ѻ҆трокови́ца ко а҆рхїстрати́гꙋ: и҆ ка́кѡ вѣща́еши глаго́лы па́че человѣ́ка; со мно́ю бо ре́клъ є҆сѝ бг҃ꙋ бы́ти, и҆ всели́тисѧ во ᲂу҆тро́бꙋ мою̀. и҆ ка́кѡ бꙋ́дꙋ, глаго́ли мѝ, село̀ простра́нное, и҆ мѣ́сто сщ҃е́нїѧ, херꙋві́мы превосходѧ́щагѡ; да не прельсти́ши менѐ ле́стїю, не позна́хъ бо сла́сти, бра́кꙋ є҆́смь неприча́стна: ка́кѡ ᲂу҆̀бо ѻ҆троча̀ рождꙋ̀;

Бг҃ъ и҆дѣ́же хо́щетъ, побѣжда́етсѧ є҆стества̀ чи́нъ, глаго́летъ безпло́тный: и҆ ꙗ҆̀же па́че человѣ́ка содѣва́ютсѧ, мои̑мъ вѣ́рꙋй и҆́стиннымъ глаго́лѡмъ, всест҃а́ѧ пренепоро́чнаѧ. ѻ҆на́ же возопѝ: бꙋ́ди мнѣ̀ ны́нѣ по глаго́лꙋ твоемꙋ̀, и҆ рождꙋ̀ безпло́тнаго, пло́ть ѿ менѐ заи́мствовавшаго, ꙗ҆́кѡ да возведе́тъ человѣ́ка, ꙗ҆́кѡ є҆ди́нъ си́ленъ, въ пе́рвое достоѧ́нїе, съ растворе́нїемъ.

Сла́ва, и҆ ны́нѣ, гла́съ в҃:

Є҆́же ѿ вѣ́ка та́инство ѿкрыва́етсѧ дне́сь, и҆ сн҃ъ бж҃їй, сн҃ъ чл҃вѣ́чь быва́етъ: да хꙋ́ждшее воспрїи́мъ, пода́стъ мѝ лꙋ́чшее. солга́сѧ дре́вле а҆да́мъ, и҆ бг҃ъ вожделѣ́въ [бы́ти], не бы́сть, чл҃вѣ́къ быва́етъ бг҃ъ, да бг҃а а҆да́ма содѣ́лаетъ. да весели́тсѧ тва́рь, да ликовствꙋ́етъ є҆стество̀, ꙗ҆́кѡ а҆рха́гг҃лъ дв҃ѣ со стра́хомъ предстои́тъ, и҆ є҆́же ра́дꙋйсѧ, прино́ситъ печа́ли сопроти́вное. за милосе́рдїе млⷭ҇ти вочеловѣ́чивыйсѧ бж҃е на́шъ, сла́ва тебѣ̀.

На стїхо́внѣ стїхи̑ры, гла́съ а҃.

Подо́бенъ: Нбⷭ҇ныхъ чинѡ́въ:

Съ нбⷭ҇ныхъ крꙋгѡ́въ слетѣ́въ гаврїи́лъ въ назаре́тъ, прїи́де къ дв҃ѣ мр҃і́и, вопїѧ̀ є҆́й: ра́дꙋйсѧ, зачне́ши сн҃а, а҆да́ма дре́внѣйшаго творца̀ вѣкѡ́въ и҆ и҆зба́вителѧ вопїю́щихъ тебѣ̀: ра́дꙋйсѧ, чⷭ҇таѧ.

Сті́хъ: Слы́ши дщѝ и҆ ви́ждь, и҆ приклонѝ ᲂу҆́хо твоѐ.

Гаврїи́лъ дв҃ѣ бл҃говѣ́стїе съ нб҃сѐ прине́съ, вопїѧ́ше: ра́дꙋйсѧ, зачне́ши во чре́вѣ твое́мъ тобо́ю вмѣсти́маго, невмѣсти́маго же всѣ́ми: и҆ рожда́ющаѧ ꙗ҆ви́шисѧ, ѿ ѻ҆ц҃а̀ пре́жде денни́цы возсїѧ́вшагѡ.

Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи.

Соприсносꙋ́щное сло́во пребезнача́льнагѡ ѻ҆ц҃а̀, не разлꙋчи́всѧ го́рнихъ, ны́нѣ предста̀ дѡ́льнимъ, ра́ди кра́йнѧгѡ бл҃гоꙋтро́бїѧ, млⷭ҇ть прїе́мъ, є҆́же на ны̀ поползнове́нїѧ и҆ а҆да́мовꙋ нищетꙋ̀ воспрїе́мъ, воѡбрази́сѧ въ чꙋжде́е.

Сті́хъ: Всѧ̀ землѧ̀ да покло́нитсѧ тебѣ̀, и҆ пое́тъ тебѣ̀.

Ѿ ѻ҆ц҃а̀ присносꙋ́щнѡ, и҆ ѿ мт҃ре вре́меннѡ, ꙗ҆ви́выйсѧ мі́рови, пресꙋ́щественное сло́во, ѡ҆́бразъ раба̀ прїе́млетъ, и҆ быва́етъ пло́ть, не ѿстꙋ́пль бж҃ества̀: и҆ а҆да́ма назида́етъ во чре́вѣ безсѣ́меннѡ заче́ншїѧ є҆го̀.

Сла́ва, и҆ ны́нѣ, гла́съ в҃:

Бл҃говѣствꙋ́етъ гаврїи́лъ бл҃года́тнѣй дне́сь: ра́дꙋйсѧ, неневѣ́стнаѧ мт҃и, и҆ неискꙋсобра́чнаѧ. не ᲂу҆дивлѧ́йсѧ стра́нномꙋ моемꙋ̀ зра́кꙋ, ни ᲂу҆жаса́йсѧ, а҆рха́гг҃лъ бо є҆́смь. ѕмі́й прельстѝ є҆́ѵꙋ и҆ногда̀: ны́нѣ же бл҃говѣствꙋ́ю тебѣ̀ ра́дость, и҆ пребꙋ́деши нетлѣ́нна, и҆ роди́ши гдⷭ҇а пречⷭ҇таѧ.

Та́же тропа́рь, гла́съ и҃:

Повелѣ́нное та́йнѡ прїе́мъ въ ра́зꙋмѣ, въ кро́вѣ і҆ѡ́сифовѣ тща́нїемъ предста̀ безпло́тный, глаго́лѧ неискꙋсобра́чнѣй: приклони́вый схожде́нїемъ нб҃са̀, вмѣща́етсѧ неизмѣ́ннѡ ве́сь въ тѧ̀. є҆го́же и҆ ви́дѧ въ ложесна́хъ твои́хъ прїе́мша ра́бїй зра́къ, ᲂу҆жаса́юсѧ зва́ти тебѣ̀: ра́дꙋйсѧ невѣ́сто неневѣ́стнаѧ.

Канѡ́нъ бл҃года́ренъ прест҃ѣ́й бцⷣѣ,

є҆гѡ́же краегране́сїе сицево̀: Ра́дости прїѧ́телище, тебѣ̀ подоба́етъ ра́доватисѧ є҆ди́нѣй. Творе́нїе і҆ѡ́сифово, гла́съ д҃.

Пѣ́снь а҃.

І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.

Хрⷭ҇то́вꙋ кни́гꙋ ѡ҆дꙋшевле́ннꙋю, запечатлѣ́ннꙋю тѧ̀ дх҃омъ, вели́кїй а҆рха́гг҃лъ чⷭ҇таѧ, зрѧ̀ возглаша́ше тѝ: ра́дꙋйсѧ, ра́дости прїѧ́телище, є҆́юже прама́тернѧѧ клѧ́тва разрѣши́тсѧ.

А҆да́мово и҆справле́нїе, ра́дꙋйсѧ дв҃о бг҃оневѣ́сто, а҆́дово ᲂу҆мерщвле́нїе ра́дꙋйсѧ всенепоро́чнаѧ, пала́то всѣ́хъ цр҃ѧ̀: ра́дꙋйсѧ, прⷭ҇то́ле ѻ҆́гненный вседержи́телѧ.

Цвѣ́те неꙋвѧда́емый, ра́дꙋйсѧ є҆ди́на прозѧ́бшаѧ ꙗ҆́блоко бл҃гово́нное. ра́дꙋйсѧ ро́ждшаѧ бл҃гоꙋха́нїе є҆ди́нагѡ цр҃ѧ̀. ра́дꙋйсѧ неискꙋсобра́чнаѧ, мі́рови сп҃се́нїе.

Чистоты̀ сокро́вище, ра́дꙋйсѧ, є҆́юже ѿ паде́нїѧ на́шегѡ воста́хомъ. ра́дꙋйсѧ, сладкоꙋха́нный крі́не влⷣчце, вѣ́рныхъ бл҃гоꙋха́ѧй, кади́ло бл҃гово́нное, и҆ мѵ́ро многоцѣ́нное.

Пѣ́снь г҃.

І҆рмо́съ: Твоѧ̑ пѣсносло́вцы бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дх҃о́внѡ ᲂу҆твердѝ, въ бж҃е́ственнѣй твое́й сла́вѣ вѣнцє́въ сла́вы сподо́би.

КГла́съ прозѧ́бшаѧ бж҃е́ственный, ꙗ҆́кѡ ни́ва неѡра́ннаѧ ꙗ҆́вѣ, ра́дꙋйсѧ ѡ҆дꙋшевле́ннаѧ трапе́зо, хлѣ́бъ живо́тный вмѣ́щшаѧ. ра́дꙋйсѧ, живѡ́тныѧ воды̀ и҆сто́чниче неистоща́емый влⷣчце.

Ю҆́нице ю҆нца̀ ро́ждшаѧ непоро́чнаго, ра́дꙋйсѧ вѣ̑рнымъ. ра́дꙋйсѧ а҆́гнице, ро́ждшаѧ бж҃їѧго а҆́гнца, взе́млющаго мі́ра всегѡ̀ прегрѣшє́нїѧ. ра́дꙋйсѧ те́плое ѡ҆чисти́лище.

Оу҆́тро свѣтлѣ́йшее, ра́дꙋйсѧ є҆ди́на сл҃нца носѧ́щаѧ хрⷭ҇та̀ свѣ́та жили́ще. ра́дꙋйсѧ, тьмꙋ̀ разрꙋши́вшаѧ, и҆ мра̑чныѧ бѣ́сы ѿню́дъ ѿгна́вшаѧ.

Ра́дꙋйсѧ, две́ре є҆ди́на, є҆́юже сло́во про́йде є҆ди́но, верєѝ и҆ врата̀ а҆́дѡва, влⷣчце, ржⷭ҇тво́мъ твои́мъ сокрꙋши́вшаѧ. ра́дꙋйсѧ бж҃е́ственный вхо́де сп҃са́емыхъ, бг҃оневѣ́сто.

Пѣ́снь д҃.

І҆рмо́съ: Сѣдѧ́й въ сла́вѣ, на прⷭ҇то́лѣ бж҃ества̀, во ѻ҆́блацѣ ле́гцѣ, прїи́де і҆и҃съ пребж҃е́ственный, нетлѣ́нною дла́нїю, и҆ сп҃сѐ зовꙋ́щыѧ: сла́ва хрⷭ҇тѐ си́лѣ твое́й.

Во гла́сѣхъ пѣ́нїй, дв҃о тебѣ̀ вопїе́мъ всепѣ́таѧ: ра́дꙋйсѧ, тꙋ́чнаѧ горо̀ и҆ ᲂу҆сыре́ннаѧ дх҃омъ. ра́дꙋйсѧ свѣ́щниче, и҆ ста́мно ма́ннꙋ носѧ́щаѧ, ᲂу҆слажда́ющаѧ всѣ́хъ бл҃гочести́выхъ чꙋ̑вства.

Ѡ҆чисти́лище мі́рꙋ, ра́дꙋйсѧ, пречⷭ҇таѧ влⷣчце. ра́дꙋйсѧ лѣ́ствице, ѿ землѝ всѣ́хъ возвы́сившаѧ бл҃года́тїю. ра́дꙋйсѧ мо́сте, вои́стиннꙋ преводѧ́й всѣ́хъ ѿ сме́рти къ животꙋ̀ пою́щихъ тѧ̀.

Нб҃съ превы́шшаѧ, ра́дꙋйсѧ, землѝ ѡ҆снова́нїе, въ твои́хъ ложесна́хъ пречⷭ҇таѧ, нетрꙋ́днѡ носи́вшаѧ. ра́дꙋйсѧ червлени́це, багрѧни́цꙋ бж҃е́ственнꙋю ѡ҆мочи́вшаѧ, ѿ крове́й твои́хъ, цр҃е́ви си́ламъ.

Законода́вца ро́ждшаѧ и҆́стиннаго, ра́дꙋйсѧ влⷣчце, беззакѡ́нїѧ всѣ́хъ тꙋ́не ѡ҆чища́ющаго. недовѣ́домаѧ глꙋбино̀, высото̀ неизрече́ннаѧ, браконеискꙋ́снаѧ, є҆́юже мы̀ ѡ҆божи́хомсѧ.

Тѧ̀ и҆спле́тшꙋю мі́рови нерꙋкоплете́нный вѣне́цъ пѣсносло́вимъ, ра́дꙋйсѧ, тебѣ̀ дв҃о зовꙋ́ще: храни́лище всѣ́хъ и҆ ѡ҆гражде́нїе, и҆ ᲂу҆твержде́нїе, и҆ сщ҃е́нное прибѣ́жище.

Пѣ́снь є҃.

І҆рмо́съ: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

Пꙋ́ть ро́ждшаѧ жи́зни, ра́дꙋйсѧ пренепоро́чнаѧ, ѿ пото́па грѣхо́внагѡ мі́ръ спа́сшаѧ: ра́дꙋйсѧ бг҃оневѣ́сто, слы́шанїе и҆ глаго́ланїе стра́шное: ра́дꙋйсѧ пребыва́нїе влⷣки тва́ри.

Крѣ́пость и҆ ᲂу҆твержде́нїе человѣ́кѡвъ, ра́дꙋйсѧ пречⷭ҇таѧ, мѣ́сто ѡ҆сщ҃е́нїѧ сла́вы, ᲂу҆мерщвле́нїе а҆́дово, черто́же всесвѣ́тлый. ра́дꙋйсѧ а҆́гг҃лѡвъ ра́досте: ра́дꙋйсѧ по́моще вѣ́рнѡ молѧ́щихсѧ тебѣ̀.

Ѻ҆гнеѡбра́знаѧ колесни́це сло́ва, ра́дꙋйсѧ влⷣчце, ѡ҆дꙋшевле́нный раю̀, дре́во посредѣ̀ и҆мꙋ́щи жи́зни гдⷭ҇а, є҆гѡ́же сла́дость ѡ҆животворѧ́етъ вѣ́рою причаща́ющихсѧ, и҆ тлѝ подклони́вшихсѧ.

Оу҆крѣплѧ́еми си́лою твое́ю, вѣ́рнѡ вопїе́мъ тѝ: ра́дꙋйсѧ, гра́де всѣ́хъ цр҃ѧ̀, пресла̑внаѧ и҆ достослы̑шаннаѧ ѡ҆ не́йже глагѡ́лана бы́ша ꙗ҆́вѣ, горо̀ несѣко́маѧ: ра́дꙋйсѧ глꙋбино̀ неизмѣ́римаѧ.

Простра́нное селе́нїе сло́ва, ра́дꙋйсѧ пречⷭ҇таѧ, сосꙋ́де, бж҃е́ственный би́серъ произве́дшаѧ. ра́дꙋйсѧ, всечꙋ́дное всѣ́хъ къ бг҃ꙋ примире́нїе, бл҃жа́щихъ тѧ̀ бцⷣе всегда̀.

Пѣ́снь ѕ҃.

І҆рмо́съ: Бж҃е́ственное сїѐ и҆ всечⷭ҇тно́е соверша́юще пра́зднество бг҃омꙋ́дрїи, бг҃омт҃ре, прїиди́те рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

Черто́же сло́ва нескве́рный, вина̀ всѣ́хъ ѡ҆боже́нїѧ, ра́дꙋйсѧ пречⷭ҇таѧ, прⷪ҇ро́кѡвъ ѡ҆глаше́нїе: ра́дꙋйсѧ, а҆пⷭ҇лѡвъ ᲂу҆добре́нїе.

Ѿ тебѐ роса̀ ᲂу҆ка́нꙋ, пла́мень многобо́жїѧ ᲂу҆гаси́вшаѧ. тѣ́мъ вопїе́мъ тѝ: ра́дꙋйсѧ, рꙋно̀ ѡ҆дꙋшевле́нное, є҆́же гедеѡ́нъ, дв҃о, предви́дѣ.

Сѐ тебѣ̀ [дв҃о] ра́дꙋйсѧ, зове́мъ: приста́нище на́мъ бꙋ́ди вла́ющымсѧ, и҆ ѡ҆ти́шїе въ пꙋчи́нѣ скорбе́й, и҆ собла́знѡвъ всѣ́хъ бори́телѧ.

Ра́дости вина̀, ѡ҆бл҃годатѝ на́шъ по́мыслъ, є҆́же зва́ти тебѣ̀: ра́дꙋйсѧ неѡпали́маѧ кꙋпино̀, ѻ҆́блаче всесвѣ́тлый, вѣ̑рныѧ непреста́ннѡ ѡ҆сѣнѧ́ющїй.

Посе́мъ кондакѝ и҆ і҆́косы прест҃ѣ́й бцⷣѣ. Гла́съ и҃.

Конда́къ а҃: Взбра́нной воево́дѣ побѣди́тєльнаѧ, ꙗ҆́кѡ и҆зба́вльшесѧ ѿ ѕлы́хъ, бл҃года́рствєннаѧ восписꙋ́емъ тѝ рабѝ твоѝ бцⷣе: но ꙗ҆́кѡ и҆мꙋ́щаѧ держа́вꙋ непобѣди́мꙋю, ѿ всѧ́кихъ на́съ бѣ́дъ свободѝ, да зове́мъ тѝ: Ра́дꙋйсѧ невѣ́сто неневѣ́стнаѧ.

І҆́косъ а҃: А҆́гг҃лъ предста́тель съ нб҃сѐ по́сланъ бы́сть, рещѝ бцⷣѣ: ра́дꙋйсѧ! и҆ со безпло́тнымъ гла́сомъ воплоща́ема тѧ̀ зрѧ̀ гдⷭ҇и, ᲂу҆жаса́шесѧ и҆ стоѧ́ше, зовы́й къ не́й такова̑ѧ: ра́дꙋйсѧ, є҆́юже ра́дость возсїѧ́етъ: ра́дꙋйсѧ, є҆́юже клѧ́тва и҆сче́знетъ. ра́дꙋйсѧ, па́дшагѡ а҆да́ма воззва́нїе: ра́дꙋйсѧ, сле́зъ є҆́ѵиныхъ и҆збавле́нїе. ра́дꙋйсѧ, высото̀ неꙋдобовосходи́маѧ человѣ́ческими по́мыслы: ра́дꙋйсѧ, глꙋбино̀ неꙋдобозри́маѧ и҆ а҆́гг҃льскима ѻ҆чи́ма. ра́дꙋйсѧ, ꙗ҆́кѡ є҆сѝ цр҃е́во сѣда́лище: ра́дꙋйсѧ, ꙗ҆́кѡ но́сиши носѧ́щаго всѧ̑. ра́дꙋйсѧ, ѕвѣздо̀ ꙗ҆влѧ́ющаѧ сл҃нце: ра́дꙋйсѧ, ᲂу҆тро́бо бж҃е́ственнагѡ воплоще́нїѧ. ра́дꙋйсѧ, є҆́юже ѡ҆бновлѧ́етсѧ тва́рь: ра́дꙋйсѧ, є҆́юже покланѧ́емсѧ творцꙋ̀. Ра́дꙋйсѧ невѣ́сто неневѣ́стнаѧ.

Конда́къ в҃: Ви́дѧщи ст҃а́ѧ себѐ въ чистотѣ̀, глаго́летъ гаврїи́лꙋ де́рзостнѡ: пресла́вное твоегѡ̀ гла́са неꙋдобопрїѧ́тельно дꙋшѝ мое́й ꙗ҆влѧ́етсѧ: безсѣ́меннагѡ бо зача́тїѧ ржⷭ҇тво̀ ка́кѡ глаго́леши, зовы́й: А҆ллилꙋ́їа.

І҆́косъ в҃: Ра́зꙋмъ недоразꙋмѣва́емый, разꙋмѣ́ти дв҃а и҆́щꙋщи, возопѝ къ слꙋжа́щемꙋ: и҆з̾ бокꙋ̀ чи̑стꙋ, сн҃ꙋ ка́кѡ є҆́сть роди́тисѧ мо́щно, рцы́ ми; къ не́йже ѻ҆́нъ речѐ со стра́хомъ, ѻ҆ба́че зовы́й си́це: ра́дꙋйсѧ, совѣ́та неизрече́ннагѡ таи́ннице: ра́дꙋйсѧ, молча́нїѧ просѧ́щихъ вѣ́ро. ра́дꙋйсѧ, чꙋде́съ хрⷭ҇то́выхъ нача́ло: ра́дꙋйсѧ, велѣ́нїй є҆гѡ̀ глави́зно. ра́дꙋйсѧ, лѣ́ствице нбⷭ҇наѧ, є҆́юже сни́де бг҃ъ: ра́дꙋйсѧ, мо́сте преводѧ́й сꙋ́щихъ ѿ землѝ на нб҃о. ра́дꙋйсѧ, а҆́гг҃лѡвъ многословꙋ́щее чꙋ́до: ра́дꙋйсѧ бѣсѡ́въ многоплаче́вный стрꙋ́пе. ра́дꙋйсѧ, свѣ́тъ неизрече́ннѡ роди́вшаѧ: ра́дꙋйсѧ, є҆́же ка́кѡ, ни є҆ди́нагоже наꙋчи́вшаѧ. ра́дꙋйсѧ, премꙋ́дрыхъ превосходѧ́щаѧ ра́зꙋмъ: ра́дꙋйсѧ, вѣ́рныхъ ѡ҆зарѧ́ющаѧ смы́слы. Ра́дꙋйсѧ невѣ́сто неневѣ́стнаѧ.

Конда́къ г҃: Си́ла вы́шнѧгѡ ѡ҆сѣнѝ тогда̀ къ зача́тїю браконеискꙋ́снꙋю, и҆ бл҃гоплѡ́днаѧ тоѧ̀ ложесна̀, ꙗ҆́кѡ село̀ показа̀ сла́дкое, всѣ̑мъ хотѧ́щымъ жа́ти сп҃се́нїе, внегда̀ пѣ́ти си́це: А҆ллилꙋ́їа.

І҆́косъ г҃: И҆мꙋ́щи бг҃опрїѧ́тнꙋю дв҃а ᲂу҆тро́бꙋ, востечѐ ко є҆лїсаве́ти: млⷣнцъ же ѻ҆́ноѧ а҆́бїе позна́въ сеѧ̀ цѣлова́нїе, ра́довашесѧ, и҆ и҆гра́ньми ꙗ҆́кѡ пѣ́сньми вопїѧ́ше къ бцⷣѣ: ра́дꙋйсѧ, ѻ҆́трасли неꙋвѧда́емыѧ розго̀: ра́дꙋйсѧ, плода̀ безсме́ртнагѡ стѧжа́нїе. ра́дꙋйсѧ, дѣ́лателѧ дѣ́лающаѧ чл҃вѣколю́бца: ра́дꙋйсѧ, сади́телѧ жи́зни на́шеѧ ро́ждшаѧ. ра́дꙋйсѧ, ни́во, растѧ́щаѧ гобзова́нїе щедро́тъ: ра́дꙋйсѧ, трапе́зо, носѧ́щаѧ ѻ҆би́лїе ѡ҆чище́нїй. ра́дꙋйсѧ, ꙗ҆́кѡ ра́й пи́щный процвѣта́еши: ра́дꙋйсѧ, ꙗ҆́кѡ приста́нище дꙋша́мъ гото́виши. ра́дꙋйсѧ, прїѧ́тное мл҃твы кади́ло: ра́дꙋйсѧ, всегѡ̀ мі́ра ѡ҆чище́нїе. ра́дꙋйсѧ, бж҃їе къ смє́ртнымъ бл҃говоле́нїе: ра́дꙋйсѧ, сме́ртныхъ къ бг҃ꙋ дерзнове́нїе. Ра́дꙋйсѧ невѣ́сто неневѣ́стнаѧ.

Конда́къ д҃: Бꙋ́рю внꙋ́трь и҆мѣ́ѧ помышле́нїй сꙋмни́тельныхъ, цѣломꙋ́дренный і҆ѡ́сифъ смѧте́сѧ, къ тебѣ̀ зрѧ̀ небра́чнѣй, и҆ бракоѡкра́дованнꙋю помышлѧ́ѧ, непоро́чнаѧ: ᲂу҆вѣ́дѣвъ же твоѐ зача́тїе ѿ дх҃а ст҃а, речѐ: А҆ллилꙋ́їа.

І҆́косъ д҃: Слы́шаша па́стырїе а҆́гг҃лѡвъ пою́щихъ плотско́е хрⷭ҇то́во прише́ствїе, и҆ те́кше ꙗ҆́кѡ къ па́стырю, ви́дѧтъ сего̀ ꙗ҆́кѡ а҆́гнца непоро́чна, во чре́вѣ мр҃і́инѣ ᲂу҆па́сшасѧ, ю҆́же пою́ще рѣ́ша: ра́дꙋйсѧ, а҆́гнца и҆ па́стырѧ мт҃и: ра́дꙋйсѧ, дво́ре слове́сныхъ ѻ҆ве́цъ. ра́дꙋйсѧ, неви́димыхъ врагѡ́въ мꙋче́нїе: ра́дꙋйсѧ, ра́йскихъ две́рей ѿверзе́нїе. ра́дꙋйсѧ, ꙗ҆́кѡ нбⷭ҇наѧ сра́дꙋютсѧ земны̑мъ: ра́дꙋйсѧ, ꙗ҆́кѡ зємна́ѧ сликовствꙋ́ютъ нбⷭ҇нымъ. ра́дꙋйсѧ, а҆пⷭ҇лѡвъ немѡ́лчнаѧ ᲂу҆ста̀: ра́дꙋйсѧ, страстоте́рпцєвъ непобѣди́маѧ де́рзосте. ра́дꙋйсѧ, тве́рдое вѣ́ры ᲂу҆твержде́нїе: ра́дꙋйсѧ, свѣ́тлое бл҃года́ти позна́нїе. ра́дꙋйсѧ, є҆́юже ѡ҆бнажи́сѧ а҆́дъ: ра́дꙋйсѧ, є҆́юже ѡ҆блеко́хомсѧ сла́вою. Ра́дꙋйсѧ невѣ́сто неневѣ́стнаѧ.

Конда́къ є҃: Бг҃оте́чнꙋю ѕвѣздꙋ̀ ᲂу҆зрѣ́вше волсвѝ, тоѧ̀ послѣ́доваша зарѝ: и҆ ꙗ҆́кѡ свѣти́льникъ держа́ще ю҆̀, то́ю и҆спыта́хꙋ крѣ́пкаго царѧ̀: и҆ дости́гше непостижи́маго, возра́довашасѧ є҆мꙋ̀ вопїю́ще: А҆ллилꙋ́їа.

І҆́косъ є҃: Ви́дѣша ѻ҆́троцы халде́йстїи на рꙋкꙋ̀ дв҃и́чꙋ, созда́вшаго рꙋка́ма человѣ́ки, и҆ влⷣкꙋ разꙋмѣва́юще є҆го̀, а҆́ще и҆ ра́бїй прїѧ́тъ зра́къ, потща́шасѧ дармѝ послꙋжи́ти є҆мꙋ̀, и҆ возопи́ти бл҃гослове́ннѣй: ра́дꙋйсѧ, ѕвѣзды̀ незаходи́мыѧ мт҃и: ра́дꙋйсѧ, зарѐ та́инственнагѡ днѐ. ра́дꙋйсѧ, пре́лести пе́щь ᲂу҆гаси́вшаѧ: ра́дꙋйсѧ, трⷪ҇цы таи́нники просвѣща́ющаѧ. ра́дꙋйсѧ, мꙋчи́телѧ безчеловѣ́чнаго и҆змета́ющаѧ ѿ нача́льства: ра́дꙋйсѧ, гдⷭ҇а чл҃вѣколю́бца показа́вшаѧ хрⷭ҇та̀. ра́дꙋйсѧ, ва́рварскагѡ и҆збавлѧ́ющаѧ слꙋже́нїѧ: ра́дꙋйсѧ, тимѣ́нїѧ и҆з̾има́ющаѧ дѣ́лъ. ра́дꙋйсѧ, ѻ҆гнѧ̀ поклоне́нїе ᲂу҆гаси́вшаѧ: ра́дꙋйсѧ, пла́мене страсте́й и҆змѣнѧ́ющаѧ. ра́дꙋйсѧ, вѣ́рныхъ наста́внице цѣломꙋ́дрїѧ: ра́дꙋйсѧ, всѣ́хъ родѡ́въ весе́лїе. Ра́дꙋйсѧ невѣ́сто неневѣ́стнаѧ.

Конда́къ ѕ҃: Проповѣ̑дницы бг҃оно́снїи бы́вше волсвѝ, возврати́шасѧ въ вавѷлѡ́нъ, сконча́вше твоѐ прⷪ҇ро́чество: и҆ проповѣ́давше тѧ̀ хрⷭ҇та̀ всѣ̑мъ, ѡ҆ста́виша и҆́рѡда ꙗ҆́кѡ бꙋесло́вѧща, не вѣ́дꙋща пѣ́ти: А҆ллилꙋ́їа.

І҆́косъ ѕ҃: Возсїѧ́вый во є҆гѵ́птѣ просвѣще́нїе и҆́стины, ѿгна́лъ є҆сѝ лжѝ тьмꙋ̀: і҆́дѡли бо є҆гѡ̀ сп҃се, не терпѧ́ще твоеѧ̀ крѣ́пости, падо́ша. си́хъ же и҆зба́вльшїисѧ вопїѧ́хꙋ къ бцⷣѣ: ра́дꙋйсѧ, и҆справле́нїе человѣ́кѡвъ: ра́дꙋйсѧ, низпаде́нїе бѣсѡ́въ. ра́дꙋйсѧ, пре́лести держа́вꙋ попра́вшаѧ: ра́дꙋйсѧ, і҆́дѡльскꙋю ле́сть ѡ҆бличи́вшаѧ. ра́дꙋйсѧ мо́ре, потопи́вшее фараѡ́на мы́сленнаго: ра́дꙋйсѧ, ка́меню, напои́вшїй жа́ждꙋщыѧ жи́зни. ра́дꙋйсѧ, ѻ҆́гненный сто́лпе, наставлѧ́ѧй сꙋ́щыѧ во тьмѣ̀: ра́дꙋйсѧ, покро́ве мі́рꙋ, ши́ршїй ѻ҆́блака. ра́дꙋйсѧ пи́ще, ма́нны прїе́мнице: ра́дꙋйсѧ, сла́дости ст҃ы́ѧ слꙋжи́тельнице. ра́дꙋйсѧ, землѐ ѡ҆бѣтова́нїѧ: ра́дꙋйсѧ, и҆з̾ неѧ́же тече́тъ ме́дъ и҆ млеко̀. Ра́дꙋйсѧ невѣ́сто неневѣ́стнаѧ.

Конда́къ з҃: Хотѧ́щꙋ сѷмеѡ́нꙋ ѿ ны́нѣшнѧгѡ вѣ́ка преста́витисѧ преле́стнагѡ, вда́лсѧ є҆сѝ ꙗ҆́кѡ млⷣнцъ томꙋ̀: но позна́лсѧ є҆сѝ є҆мꙋ̀ и҆ бг҃ъ соверше́нный. тѣ́мже ᲂу҆диви́сѧ твое́й неизрече́ннѣй премꙋ́дрости, зовы́й: А҆ллилꙋ́їа.

І҆́косъ з҃: Но́вꙋю показа̀ тва́рь ꙗ҆́вльсѧ зижди́тель, на́мъ И҆ ѿ негѡ̀ бы́вшымъ, и҆з̾ безсѣ́менныѧ прозѧ́бъ ᲂу҆тро́бы, и҆ сохрани́въ ю҆̀, ꙗ҆́коже бѣ̀, нетлѣ́ннꙋ. да чꙋ́до ви́дѧще воспои́мъ ю҆̀, вопїю́ще: ра́дꙋйсѧ, цвѣ́те нетлѣ́нїѧ: ра́дꙋйсѧ, вѣ́нче воздержа́нїѧ. ра́дꙋйсѧ, воскрⷭ҇нїѧ ѡ҆́бразъ ѡ҆блиста́ющаѧ: ра́дꙋйсѧ, а҆́гг҃льское житїѐ ꙗ҆влѧ́ющаѧ. ра́дꙋйсѧ дре́во свѣтлоплодови́тое, ѿ негѡ́же пита́ютсѧ вѣ́рнїи: ра́дꙋйсѧ дре́во бл҃госѣнноли́ственное, и҆́мже покрыва́ютсѧ мно́зи. ра́дꙋйсѧ, во чре́вѣ носѧ́щаѧ и҆зба́вителѧ плѣнє́ннымъ: ра́дꙋйсѧ, ро́ждшаѧ наста́вника заблꙋ́ждшымъ. ра́дꙋйсѧ, сꙋдїѝ првⷣнагѡ ᲂу҆моле́нїе: ра́дꙋйсѧ, мно́гихъ согрѣше́нїй проще́нїе. ра́дꙋйсѧ, ѻ҆де́ждо наги́хъ дерзнове́нїѧ: ра́дꙋйсѧ, любы̀ всѧ́кое жела́нїе побѣжда́ющаѧ. Ра́дꙋйсѧ невѣ́сто неневѣ́стнаѧ.

Конда́къ и҃: Стра́нное ржⷭ҇тво̀ ви́дѣвше, ᲂу҆страни́мсѧ мі́ра, ᲂу҆́мъ на нб҃са̀ прело́жше: сегѡ́ бо ра́ди высо́кїй бг҃ъ, на землѝ ꙗ҆ви́сѧ смире́нный человѣ́къ, хотѧ́й привлещѝ къ высотѣ̀, томꙋ̀ вопїю́щыѧ: А҆ллилꙋ́їа.

І҆́косъ и҃: Ве́сь бѣ̀ въ ни́жнихъ, и҆ вы́шнихъ ника́коже ѿстꙋпѝ неѡпи́санное сло́во: снизхожде́нїе бо бж҃е́ственное, не прехожде́нїе же мѣ́стное бы́сть, и҆ ржⷭ҇тво̀ ѿ дв҃ы бг҃опрїѧ́тныѧ, слы́шащїѧ сїѧ̑: ра́дꙋйсѧ, бг҃а невмѣсти́магѡ вмѣсти́лище: ра́дꙋйсѧ, честна́гѡ та́инства двє́ри. ра́дꙋйсѧ, невѣ́рныхъ сꙋмни́тельное слы́шанїе: ра́дꙋйсѧ, вѣ́рныхъ и҆звѣ́стнаѧ похвало̀. ра́дꙋйсѧ, колесни́це прест҃а́ѧ, сꙋ́щагѡ на херꙋві́мѣхъ: ра́дꙋйсѧ, селе́нїе пресла́вное, сꙋ́щагѡ на серафі́мѣхъ. ра́дꙋйсѧ, проти̑внаѧ въ то́жде собра́вшаѧ: ра́дꙋйсѧ, дв҃ство и҆ ржⷭ҇тво̀ сочета́вшаѧ. ра́дꙋйсѧ, є҆́юже разрѣши́сѧ престꙋпле́нїе: ра́дꙋйсѧ, є҆́юже ѿве́рзесѧ ра́й. ра́дꙋйсѧ, ключꙋ̀ црⷭ҇твїѧ хрⷭ҇то́ва: ра́дꙋйсѧ, наде́ждо бла̑гъ вѣ́чныхъ. Ра́дꙋйсѧ невѣ́сто неневѣ́стнаѧ.

Конда́къ ѳ҃: Всѧ́кое є҆стество̀ а҆́гг҃льское ᲂу҆диви́сѧ, вели́комꙋ твоегѡ̀ вочл҃вѣ́ченїѧ дѣ́лꙋ: непристꙋ́пнаго бо ꙗ҆́кѡ бг҃а, зрѧ́ше всѣ̑мъ пристꙋ́пнаго человѣ́ка, на́мъ ᲂу҆́бѡ спребыва́юща, слы́шаща же ѿ всѣ́хъ: А҆ллилꙋ́їа.

І҆́косъ ѳ҃: Вѣті̑ѧ многовѣща̑нныѧ, ꙗ҆́кѡ ры̑бы безгла̑сныѧ, ви́димъ ѡ҆ тебѣ̀ бцⷣе: недоꙋмѣва́ютъ бо глаго́лати, є҆́же ка́кѡ, и҆ дв҃а пребыва́еши, и҆ роди́ти возмогла̀ є҆сѝ; мы́ же та́инствꙋ дивѧ́щесѧ, вѣ́рнѡ вопїе́мъ: ра́дꙋйсѧ, премꙋ́дрости бж҃їѧ прїѧ́телище: ра́дꙋйсѧ, промышле́нїѧ є҆гѡ̀ сокро́вище. ра́дꙋйсѧ, любомꙋ̑дрыѧ немꙋ̑дрыѧ ꙗ҆влѧ́ющаѧ: ра́дꙋйсѧ, хитрословє́сныѧ безсловє́сныѧ ѡ҆блича́ющаѧ: ра́дꙋйсѧ, ꙗ҆́кѡ ѡ҆бꙋѧ́ша лю́тїи взыска́телє: ра́дꙋйсѧ, ꙗ҆́кѡ ᲂу҆вѧдо́ша баснотво́рцы. ра́дꙋйсѧ, а҆ѳїнє́йскаѧ плетє́нїѧ растерза́ющаѧ: ра́дꙋйсѧ, ры̑барскїѧ мрє́жи и҆сполнѧ́ющаѧ. ра́дꙋйсѧ, и҆з̾ глꙋбины̀ невѣ́дѣнїѧ и҆звлача́ющаѧ: ра́дꙋйсѧ, мнѡ́ги въ ра́зꙋмѣ просвѣща́ющаѧ. ра́дꙋйсѧ, кораблю̀ хотѧ́щихъ сп҃сти́сѧ: ра́дꙋйсѧ, приста́нище жите́йскихъ пла́ванїй. Ра́дꙋйсѧ невѣ́сто неневѣ́стнаѧ.

Конда́къ і҃: Сп҃стѝ хотѧ̀ мі́ръ, и҆́же всѣ́хъ ᲂу҆краси́тель, къ семꙋ̀ самоѡбѣтова́нъ прїи́де, и҆ па́стырь сы́й ꙗ҆́кѡ бг҃ъ, на́съ ра́ди ꙗ҆ви́сѧ по на́мъ человѣ́къ: подо́бнымъ бо подо́бное призва́въ, ꙗ҆́кѡ бг҃ъ слы́шитъ: А҆ллилꙋ́їа.

І҆́косъ і҃: Стѣна̀ є҆сѝ дѣ́вамъ бцⷣе дв҃о, и҆ всѣ̑мъ къ тебѣ̀ прибѣга́ющымъ: и҆́бо нб҃сѐ и҆ землѝ творе́цъ ᲂу҆стро́и тѧ̀ пречⷭ҇таѧ, все́льсѧ во ᲂу҆тро́бѣ твое́й, и҆ всѧ̑ приглаша́ти тебѣ̀ наꙋчи́въ: ра́дꙋйсѧ, сто́лпе дѣ́вства: ра́дꙋйсѧ, две́рь сп҃се́нїѧ: ра́дꙋйсѧ, нача́льнице мы́сленнагѡ назда́нїѧ: ра́дꙋйсѧ, пода́тельнице бж҃е́ственныѧ бл҃гости. ра́дꙋйсѧ, ты́ бо ѡ҆бнови́ла є҆сѝ зача̑тыѧ стꙋ́днѡ: ра́дꙋйсѧ, ты́ бо наказа́ла є҆сѝ ѡ҆кра́дєнныѧ ᲂу҆мо́мъ. ра́дꙋйсѧ, тли́телѧ смы́слѡвъ ᲂу҆пражнѧ́ющаѧ: ра́дꙋйсѧ, сѣ́ѧтелѧ чистоты̀ ро́ждшаѧ. ра́дꙋйсѧ, черто́же безсѣ́меннагѡ ᲂу҆невѣ́щенїѧ: ра́дꙋйсѧ, вѣ́рныхъ гдⷭ҇ви сочета́вшаѧ. ра́дꙋйсѧ, до́браѧ младопита́тельнице дѣ́вамъ: ра́дꙋйсѧ, невѣстокраси́тельнице дꙋ́шъ ст҃ы́хъ. Ра́дꙋйсѧ невѣ́сто неневѣ́стнаѧ.

Конда́къ а҃і: Пѣ́нїе всѧ́кое побѣжда́етсѧ, спростре́тисѧ тща́щеесѧ ко мно́жествꙋ мно́гихъ щедро́тъ твои́хъ: равночи̑сленныѧ бо песка̀ пѣ̑сни а҆́ще прино́симъ тѝ цр҃ю̀ ст҃ы́й, ничто́же соверша́емъ досто́йно, ꙗ҆̀же да́лъ є҆сѝ на́мъ тебѣ̀ вопїю́щымъ: А҆ллилꙋ́їа.

І҆́косъ а҃і: Свѣтопрїе́мнꙋю свѣщꙋ̀, сꙋ́щымъ во тьмѣ̀ ꙗ҆́вльшꙋюсѧ, зри́мъ ст҃ꙋ́ю дв҃ꙋ: невеще́ственный бо вжига́ющи ѻ҆́гнь, наставлѧ́етъ къ ра́зꙋмꙋ бж҃е́ственномꙋ всѧ̑, заре́ю ᲂу҆́мъ просвѣща́ющаѧ, зва́нїемъ же почита́емаѧ, си́ми. ра́дꙋйсѧ, лꙋчѐ ᲂу҆́мнагѡ сл҃нца: ра́дꙋйсѧ, свѣти́ло незаходи́магѡ свѣ́та. ра́дꙋйсѧ, мо́лнїе дꙋ́шы просвѣща́ющаѧ: ра́дꙋйсѧ, ꙗ҆́кѡ гро́мъ, врагѝ ᲂу҆страша́ющаѧ. ра́дꙋйсѧ, ꙗ҆́кѡ многосвѣ́тлое возсїѧва́еши просвѣще́нїе: ра́дꙋйсѧ, ꙗ҆́кѡ многотекꙋ́щꙋю и҆сточа́еши рѣкꙋ̀. ра́дꙋйсѧ, кꙋпѣ́ли живописꙋ́ющаѧ ѡ҆́бразъ: ра́дꙋйсѧ, грѣхо́внꙋю ѿе́млющаѧ скве́рнꙋ. ра́дꙋйсѧ, ба́не, ѡ҆мыва́ющаѧ со́вѣсть: ра́дꙋйсѧ ча́ше, че́рплющаѧ ра́дость. ра́дꙋйсѧ, ѡ҆бонѧ́нїе хрⷭ҇то́ва бл҃гоꙋха́нїѧ: ра́дꙋйсѧ, животѐ та́йнагѡ весе́лїѧ, ра́дꙋйсѧ невѣ́сто неневѣ́стнаѧ.

Конда́къ в҃і: Бл҃года́ть да́ти восхотѣ́въ долгѡ́въ дре́внихъ, всѣ́хъ долгѡ́въ рѣши́тель человѣ́кѡмъ, прїи́де собо́ю ко ѿше́дшымъ тогѡ̀ бл҃года́ти: и҆ раздра́въ рꙋкописа́нїе, слы́шитъ ѿ всѣ́хъ си́це: А҆ллилꙋ́їа.

І҆́косъ в҃і: Пою́ще твоѐ ржⷭ҇тво̀, хва́лимъ тѧ̀ всѝ, ꙗ҆́кѡ ѡ҆дꙋшевле́нный хра́мъ бцⷣе: во твое́й бо всели́всѧ ᲂу҆тро́бѣ, содержа́й всѧ̑ рꙋко́ю гдⷭ҇ь, ѡ҆свѧтѝ, просла́ви, наꙋчѝ вопи́ти тебѣ̀ всѣ́хъ: ра́дꙋйсѧ, селе́нїе бг҃а и҆ сло́ва: ра́дꙋйсѧ, ст҃а́ѧ ст҃ы́хъ бо́льшаѧ. ра́дꙋйсѧ, ковче́же позлаще́нный дх҃омъ: ра́дꙋйсѧ, сокро́вище живота̀ неистощи́мое. ра́дꙋйсѧ, честны́й вѣ́нче царе́й бл҃гочести́выхъ: ра́дꙋйсѧ, честна́ѧ похвало̀ і҆ере́євъ бл҃гоговѣ́йныхъ. ра́дꙋйсѧ, це́ркве непоколеби́мый сто́лпе: ра́дꙋйсѧ, ца́рствїѧ нерꙋши́маѧ стѣно̀. ра́дꙋйсѧ, є҆́юже воздви́жꙋтсѧ побѣ̑ды: ра́дꙋйсѧ, є҆́юже низпа́даютъ вразѝ. ра́дꙋйсѧ, тѣ́ла моегѡ̀ врачева́нїе: ра́дꙋйсѧ, дꙋшѝ моеѧ̀ сп҃се́нїе. Ра́дꙋйсѧ невѣ́сто неневѣ́стнаѧ.

Конда́къ г҃і: Ѽ всепѣ́таѧ мт҃и, ро́ждшаѧ всѣ́хъ ст҃ы́хъ ст҃ѣ́йшее сло́во, ны́нѣшнее прїе́мши приноше́нїе, ѿ всѧ́кїѧ и҆зба́ви напа́сти всѣ́хъ, и҆ бꙋ́дꙋщїѧ и҆змѝ мꙋ́ки, тебѣ̀ вопїю́щихъ: А҆ллилꙋ́їа.

Се́й конда́къ глаго́ли три́жды.

И҆ па́ки чте́тсѧ а҃-й і҆́косъ: А҆́гг҃лъ предста́тель: И҆ па́ки конда́къ: Взбра́нной воево́дѣ:

Пѣ́снь з҃.

І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше. ра́довахꙋсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.

Воспѣва́емъ тѧ̀ вопїю́ще: ра́дꙋйсѧ, колесни́це сл҃нца ᲂу҆́мнагѡ, лозо̀ и҆́стиннаѧ, гро́здъ зрѣ́лый воздѣ́лавшаѧ, вїно̀ и҆сточа́ющїй, дꙋ́шы веселѧ́щее вѣ́рою тѧ̀ сла́вѧщихъ.

Врача̀ всѣ́хъ человѣ̑къ ро́ждшаѧ, ра́дꙋйсѧ бг҃оневѣ́сто, же́зле та́йный, цвѣ́тъ неꙋвѧда́емый процвѣ́тшїй, ра́дꙋйсѧ влⷣчце, є҆́юже ра́дости наполнѧ́емсѧ, и҆ жи́знь наслѣ́дствꙋемъ.

Вѣті́йствꙋющїй не мо́жетъ ѧ҆зы́къ влⷣчце пѣсносло́вити тѧ̀, па́че бо серафі́мѡвъ возвы́силасѧ є҆сѝ, ро́ждши цр҃ѧ̀ хрⷭ҇та̀. є҆го́же молѝ гра́дꙋ семꙋ̀ и҆зба́витисѧ ѿ мно́гихъ и҆скꙋше́нїй.

Хва́лѧтъ тѧ̀ бл҃жа́ще концы̀, и҆ любо́вїю зовꙋ́тъ тебѣ̀: ра́дꙋйсѧ сви́тче, въ не́мже пе́рстомъ написа́сѧ ѻ҆́ч҃ее сло́во чⷭ҇таѧ. є҆го́же молѝ, въ кни̑ги живѡ́тныѧ, рабѡ́мъ твои̑мъ написа́тисѧ бцⷣе.

Мо́лимъ рабѝ твоѝ, и҆ приклонѧ́емъ колѣ́но се́рдца на́шегѡ: приклонѝ ᲂу҆́хо твоѐ чⷭ҇таѧ, и҆ сп҃сѝ скорбьмѝ погрꙋжа́ємыѧ при́снѡ, и҆ соблюдѝ ѿ всѧ́кагѡ вра́жїѧ плѣне́нїѧ тво́й гра́дъ бцⷣе.

Пѣ́снь и҃.

І҆рмо́съ: Ѻ҆́троки бл҃гочєсти́выѧ въ пещѝ ржⷭ҇тво̀ бг҃оро́дичо сп҃сло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀. гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Ложесны̀ сло́во прїѧ́ла є҆сѝ, всѧ̑ носѧ́щаго носи́ла є҆сѝ, млеко́мъ пита́ла є҆сѝ, ма́нїемъ пита́ющаго вселе́ннꙋю всю̀, чⷭ҇таѧ, є҆мꙋ́же пое́мъ: гдⷭ҇а по́йте дѣла̀, и҆ превозноси́те во всѧ̑ вѣ́ки.

Мѡѷсе́й ᲂу҆разꙋмѣ̀ въ кꙋпинѣ̀ вели́кое та́инство ржⷭ҇тва̀ твоегѡ̀: ѻ҆́троцы же проѡбрази́ша сїѐ ꙗ҆́вственнѣе посредѣ̀ ѻ҆гнѧ̀ стоѧ́ще, и҆ не ѡ҆палѧ́еми, нетлѣ́ннаѧ ст҃а́ѧ дв҃о. тѣ́мъ тѧ̀ почита́емъ во всѧ̑ вѣ́ки.

Пре́жде пре́лестїю ѡ҆бнажи́вшїисѧ въ ри́зꙋ нетлѣ́нїѧ ѡ҆блеко́хомсѧ ржⷭ҇тво́мъ твои́мъ: и҆ сѣдѧ́щїи во тьмѣ̀ прегрѣше́нїй, свѣ́тъ ви́дѣхомъ, свѣ́та жили́ще ѻ҆трокови́це. тѣ́мъ тѧ̀ пое́мъ во всѧ̑ вѣ́ки.

Ме́ртвїи тобо́ю ѡ҆живлѧ́ютсѧ, жи́знь бо ѵ҆поста́снꙋю родила̀ є҆сѝ, нѣмі́и пре́жде, благоглаго́ливи быва́ютъ, прокаже́ннїи ѡ҆чища́ютсѧ, недꙋ́зи ѿгонѧ́ютсѧ, дꙋхѡ́въ воздꙋ́шныхъ мно́жєства побѣжда́ютсѧ, дв҃о человѣ́кѡвъ сп҃се́нїе.

Мі́рꙋ ро́ждшаѧ сп҃се́нїе, и҆́мже ѿ землѝ на высотꙋ̀ взѧ́ти бы́хомъ, ра́дꙋйсѧ всебл҃гослове́ннаѧ, покро́ве и҆ держа́во, стѣно̀ и҆ ᲂу҆твержде́нїе, пою́щымъ чⷭ҇таѧ: гдⷭ҇а по́йте дѣла̀, и҆ превозноси́те во всѧ̑ вѣ́ки.

Пѣ́снь ѳ҃.

І҆рмо́съ: Всѧ́къ земноро́дный, да взыгра́етсѧ дꙋ́хомъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃омт҃ре, и҆ да вопїе́тъ: ра́дꙋйсѧ всебл҃же́ннаѧ, бцⷣе чⷭ҇таѧ приснодв҃о.

Да тебѣ̀ вѣ́рнїи, ра́дꙋйсѧ зове́мъ тобо́ю ра́дости прича̑стницы бы́вше присносꙋ́щныѧ, и҆зба́ви на́съ напа́стей, ва́рварскагѡ плѣне́нїѧ, и҆ всѧ́кїѧ и҆ны́ѧ ра́ны, за мно́жество ѻ҆трокови́це прегрѣше́нїй, находѧ́щїѧ человѣ́кѡмъ согрѣша́ющымъ.

Ꙗ҆ви́ласѧ є҆сѝ просвѣще́нїе на́ше и҆ ᲂу҆твержде́нїе. тѣ́мже вопїе́мъ тѝ: ра́дꙋйсѧ ѕвѣздо̀ незаходи́маѧ, вводѧ́щаѧ въ мі́ръ вели́кое сл҃нце. ра́дꙋйсѧ, є҆де́мъ ѿве́рзшаѧ заключе́нный чⷭ҇таѧ. ра́дꙋйсѧ сосꙋ́де, мѵ́ро неистощи́мое на тѧ̀ и҆злїѧ́нное прїе́мшїй.

Ста́немъ бл҃гоговѣ́йнѡ въ домꙋ̀ бг҃а на́шегѡ, и҆ возопїи́мъ: ра́дꙋйсѧ, мі́рꙋ влⷣчце. ра́дꙋйсѧ мр҃і́е, гпⷭ҇жѐ всѣ́хъ на́съ. ра́дꙋйсѧ, є҆ди́на непоро́чнаѧ въ жена́хъ и҆ до́браѧ. ра́дꙋйсѧ, сто́лпе ѻ҆́гненный, вводѧ́щїй въ вы́шнюю жи́знь человѣ́чество.

Голꙋби́це ми́лостиваго ро́ждшаѧ, ра́дꙋйсѧ приснодв҃о: преподо́бныхъ всѣ́хъ, ра́дꙋйсѧ похвало̀, страда́льцєвъ вѣнча́нїе. ра́дꙋйсѧ всѣ́хъ пра́ведныхъ бж҃е́ственное ᲂу҆добре́нїе, и҆ на́мъ вѣ̑рнымъ сп҃се́нїе.

Пощадѝ бж҃е наслѣ́дїе твоѐ, грѣхѝ на́шѧ всѧ̑ презрѣ́въ ны́нѣ, на сїѐ и҆мѣ́ѧ молѧ́щꙋю тѧ̀, на землѝ безсѣ́меннѡ тебѐ ро́ждшꙋю, вели́кїѧ ра́ди млⷭ҇ти восхотѣ́вшагѡ воѡбрази́тисѧ хрⷭ҇тѐ въ человѣ́чество.

Є҆ѯапостїла́рїй. Подо́бенъ: Жєны̀ ᲂу҆слы́шите:

И҆гра́йте ликовствꙋ́юще, съ весе́лїемъ воспо́йте, гаврїи́лъ дв҃ѣ ра́дость приносѧ́й предста̀, въ назаре́тѣ ны́нѣ гра́дѣ ра́дость бл҃говѣ́щенїѧ: ра́дꙋйсѧ чⷭ҇таѧ и҆ непоро́чнаѧ, мі́ра предста́тельство, ра́дꙋйсѧ нбⷭ҇ный прⷭ҇то́ле.

На хвали́техъ стїхи̑ры, гла́съ д҃.

Подо́бенъ: Ꙗ҆́кѡ до́блѧ:

Сокрове́нное та́инство, и҆ а҆́гг҃лѡмъ невѣ́домое, гаврїи́лъ ᲂу҆вѣрѧ́етъ а҆рха́гг҃лъ, и҆ къ тебѣ̀ ны́нѣ прїи́детъ є҆ди́нѣй нетлѣ́ннѣй и҆ до́брѣй голꙋби́цѣ, и҆ ро́да на́шегѡ воззва́нїю, и҆ возопїе́тъ тебѣ̀ прест҃а́ѧ, є҆́же ра́дꙋйсѧ: ᲂу҆гото́висѧ сло́вомъ, бг҃а сло́ва, твои́ми ложесна́ми прїѧ́ти.

Свѣтоно́снаѧ пала́та ᲂу҆гото́васѧ тебѣ̀ влⷣко, ᲂу҆тро́ба чⷭ҇таѧ бг҃оѻтрокови́цы: грѧдѝ къ се́й и҆ сни́ди, ᲂу҆ще́дри созда́нїе твоѐ, зави́стнѡ бра́нь прїи́мшее, и҆ рабо́тою ᲂу҆держа́нное льсти́вагѡ, и҆ добро́тꙋ пе́рвꙋю погꙋби́вшее, и҆ твоегѡ̀ сп҃си́тельнагѡ ча́ющее соше́ствїѧ.

Гаврїи́лъ а҆рха́гг҃лъ, къ тебѣ̀ всенепоро́чнаѧ, ꙗ҆вле́ннѡ прїи́детъ, и҆ возопїе́тъ тебѣ̀: ра́дꙋйсѧ клѧ́твы разрѣше́нїе, па́дшихъ воста́нїе. ра́дꙋйсѧ, є҆ди́на и҆збра́ннаѧ бг҃ꙋ бы́вшаѧ. ра́дꙋйсѧ, колесни́це сл҃нца сла́вы: прїимѝ безпло́тнаго, во ᲂу҆тро́бѣ твое́й всели́тисѧ хотѧ́щаго.

Сла́ва, и҆ ны́нѣ, гла́съ д҃:

Ѧ҆зы́ка, є҆гѡ́же не вѣ́дѧше, ᲂу҆слы́ша бцⷣа, глаго́лаше бо къ не́й а҆рха́гг҃лъ бл҃говѣ́щенїѧ глаго́лы: ѿню́дꙋже вѣ́рнѡ прїи́мши цѣлова́нїе, зача́тъ тѧ̀ превѣ́чнаго бг҃а. тѣ́мже и҆ мы̀ ра́дꙋющесѧ вопїе́мъ тѝ: и҆з̾ неѧ̀ воплоти́выйсѧ непрело́жнѡ бж҃е, ми́ръ мі́рови да́рꙋй, и҆ дꙋша́мъ на́шымъ ве́лїю млⷭ҇ть.

Творе́нїе ѳеостирі́кта мона́ха.

Бл҃гослови́вшꙋ сщ҃е́нникꙋ, начина́емъ ѱало́мъ:

Гдⷭ҇и, ᲂу҆слы́ши мл҃твꙋ мою̀:

Сла́ва, и҆ ны́нѣ, а҆ллилꙋ́їа.

Бг҃ъ гдⷭ҇ь, и҆ ꙗ҆ви́сѧ на́мъ: Со стїхѝ.

Та́же тропа́рь бцⷣѣ:

Къ бцⷣѣ прилѣ́жнѡ ны́нѣ притеце́мъ грѣ́шнїи и҆ смире́ннїи, и҆ припаде́мъ въ покаѧ́нїи зовꙋ́ще и҆з̾ глꙋбины̀ дꙋшѝ: влⷣчце помозѝ, на ны̀ милосе́рдовавши: потщи́сѧ, погиба́емъ ѿ мно́жества прегрѣше́нїй. не ѿвратѝ твоѧ̑ рабы̑ тщы̑, тѧ́ бо и҆ є҆ди́нꙋ наде́ждꙋ и҆́мамы. Два́жды.

Не ᲂу҆молчи́мъ никогда̀ бцⷣе, си̑лы твоѧ̑ глаго́лати недосто́йнїи: а҆́ще бо ты̀ не бы̀ предстоѧ́ла молѧ́щи, кто̀ бы на́съ и҆зба́вилъ ѿ толи́кихъ бѣ́дъ; кто́ же бы сохрани́лъ до ны́нѣ свобо́дны; не ѿстꙋ́пимъ влⷣчце ѿ тебѐ, твоѧ̑ бо рабы̑ сп҃са́еши при́снѡ ѿ всѧ́кихъ лю́тыхъ. Є҆ди́ножды.

Та́же ѱало́мъ н҃.

И҆ канѡ́нъ прест҃ы́ѧ бцⷣы, без̾ і҆рмосѡ́въ. Гла́съ и҃.

Пѣ́снь а҃.

І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.

Припѣ́въ: Прест҃а́ѧ бцⷣе, сп҃сѝ на́съ.

Мно́гими содержи́мь напа́стьми, къ тебѣ̀ прибѣга́ю сп҃се́нїѧ и҆скі́й: ѽ мт҃и сло́ва и҆ дв҃о, ѿ тѧ́жкихъ и҆ лю́тыхъ мѧ̀ сп҃сѝ!

Страсте́й мѧ̀ смꙋща́ютъ прило́зи, мно́гагѡ ᲂу҆ны́нїѧ и҆спо́лнити мою̀ дꙋ́шꙋ: ᲂу҆мирѝ ѻ҆трокови́це, тишино́ю сн҃а и҆ бг҃а твоегѡ̀ всенепоро́чнаѧ.

Сла́ва: Сп҃са ро́ждшꙋю тѧ̀ и҆ бг҃а, молю̀ дв҃о, и҆зба́витисѧ мѝ лю́тыхъ: къ тебѣ́ бо ны́нѣ прибѣга́ѧ, простира́ю и҆ дꙋ́шꙋ и҆ помышле́нїе.

И҆ ны́нѣ: Недꙋ́гꙋюща тѣ́ломъ и҆ дꙋше́ю, посѣще́нїѧ бж҃е́ственнаго, и҆ промышле́нїѧ ѿ тебѐ сподо́би є҆ди́на бг҃омт҃и, ꙗ҆́кѡ бл҃га́ѧ, бл҃га́гѡ же роди́тельнице.

Пѣ́снь г҃.

І҆рмо́съ: Нбⷭ҇нагѡ крꙋ́га верхотво́рче гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.

Предста́тельство и҆ покро́въ жи́зни моеѧ̀ полага́ю тѧ̀, бг҃ороди́тельнице дв҃о, ты́ мѧ ѡ҆кормѝ ко приста́нищꙋ твоемꙋ̀, бл҃ги́хъ вино́внаѧ, вѣ́рныхъ ᲂу҆твержде́нїе, є҆ди́на всепѣ́таѧ.

Молю̀ дв҃о, дꙋше́вное смꙋще́нїе, и҆ печа́ли моеѧ̀ бꙋ́рю разори́ти: ты́ бо бг҃оневѣ́стнаѧ, нача́льника тишины̀ хрⷭ҇та̀ родила̀ є҆сѝ, є҆ди́на пречⷭ҇таѧ.

Сла́ва: Бл҃годѣ́телѧ ро́ждши до́брыхъ вино́внаго, бл҃годѣѧ́нїѧ бога́тство всѣ̑мъ и҆сточѝ: всѧ̑ бо мо́жеши, ꙗ҆́кѡ си́льнаго въ крѣ́пости хрⷭ҇та̀ ро́ждши, бг҃обл҃же́ннаѧ.

И҆ ны́нѣ: Лю́тыми недꙋ́ги, и҆ болѣ́зненными страстьмѝ и҆стѧза́емꙋ, дв҃о, ты́ ми помозѝ. и҆сцѣле́нїй бо неѡскꙋ́дное тѧ̀ зна́ю сокро́вище пренепоро́чнаѧ, неиждива́емое.

Сїѐ глаго́ли по г҃-й, и҆ по ѕ҃-й пѣ́сни то́кмѡ.

Сп҃сѝ ѿ бѣ́дъ рабы̑ твоѧ̑ бцⷣе, ꙗ҆́кѡ всѝ по бз҃ѣ къ тебѣ̀ прибѣга́емъ, ꙗ҆́кѡ нерꙋши́мѣй стѣнѣ̀ и҆ предста́тельствꙋ.

При́зри бл҃госе́рдїемъ всепѣ́таѧ бцⷣе, на моѐ лю́тое тѣлесѐ ѡ҆ѕлобле́нїе, и҆ и҆сцѣлѝ дꙋшѝ моеѧ̀ болѣ́знь.

Та́же помина́етъ сщ҃е́нникъ, ѡ҆ ни́хже моле́бенъ быва́етъ, и҆ пое́мъ: Гдⷭ҇и поми́лꙋй, є҃і.

Сщ҃е́нникъ глаго́летъ: Ꙗ҆́кѡ млⷭ҇тивъ:

И҆ а҆́бїе глаго́лемъ тропа́рь, гла́съ в҃: Моле́нїе те́плое, и҆ стѣна̀ неѡбори́маѧ, млⷭ҇ти и҆сто́чниче, мі́рови прибѣ́жище, прилѣ́жнѡ вопїе́мъ тѝ: бцⷣе влⷣчце, предварѝ, и҆ ѿ бѣ́дъ и҆зба́ви на́съ, є҆ди́на вско́рѣ предста́тельствꙋющаѧ.

Пѣ́снь д҃.

І҆рмо́съ: Оу҆слы́шахъ гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.

Страсте́й мои́хъ смꙋще́нїе, ко́рмчїю ро́ждшаѧ гдⷭ҇а, и҆ бꙋ́рю ᲂу҆тишѝ мои́хъ прегрѣше́нїй, бг҃оневѣ́стнаѧ.

Млⷭ҇рдїѧ твоегѡ̀ бе́зднꙋ призыва́ющꙋ, пода́ждь мѝ, ꙗ҆́же бл҃госе́рдаго ро́ждшаѧ, и҆ сп҃са всѣ́хъ пою́щихъ тѧ̀.

Наслажда́ющесѧ пречⷭ҇таѧ, твои́хъ дарова́нїй, бл҃года́рственное воспѣва́емъ пѣ́нїе, вѣ́дꙋще тѧ̀ бг҃омт҃рь.

Сла́ва: На ѻ҆дрѣ̀ болѣ́зни моеѧ̀ и҆ не́мощи низлежа́щꙋ мѝ, ꙗ҆́кѡ бл҃голюби́ва помозѝ бцⷣе, є҆ди́на приснодв҃о.

И҆ ны́нѣ: Наде́ждꙋ и҆ ᲂу҆твержде́нїе, и҆ сп҃се́нїѧ стѣ́нꙋ недви́жимꙋ, и҆мꙋ́ще тѧ̀ всепѣ́таѧ, неꙋдо́бства всѧ́кагѡ и҆збавлѧ́емсѧ.

Пѣ́снь є҃.

І҆рмо́съ: Просвѣтѝ на́съ повелѣ́нїи твои́ми гдⷭ҇и, и҆ мы́шцею твое́ю высо́кою тво́й ми́ръ пода́ждь на́мъ, чл҃вѣколю́бче.

И҆спо́лни чⷭ҇таѧ, весе́лїѧ се́рдце моѐ, твою̀ нетлѣ́ннꙋю даю́щи ра́дость, весе́лїѧ ро́ждшаѧ вино́внаго.

И҆зба́ви на́съ ѿ бѣ́дъ, бцⷣе чⷭ҇таѧ, вѣ́чное ро́ждши и҆збавле́нїе, и҆ ми́ръ всѧ́къ ᲂу҆́мъ преимꙋ́щїй.

Сла́ва: Разрѣшѝ мглꙋ̀ прегрѣше́нїй мои́хъ, бг҃оневѣ́сто, просвѣще́нїемъ твоеѧ̀ свѣ́тлости, свѣ́тъ ро́ждшаѧ бж҃е́ственный и҆ превѣ́чный.

И҆ ны́нѣ: И҆сцѣлѝ чⷭ҇таѧ, дꙋшѝ моеѧ̀ неможе́нїе, посѣще́нїѧ твоегѡ̀ сподо́бльшаѧ, и҆ здра́вїе мл҃твами твои́ми пода́ждь мѝ.

Пѣ́снь ѕ҃.

І҆рмо́съ: Мл҃твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ ꙗ҆́кѡ і҆ѡ́на: ѿ тлѝ бж҃е, возведи́ мѧ.

Сме́рти и҆ тлѝ ꙗ҆́кѡ спа́слъ є҆́сть, са́мъ сѧ̀ и҆зда́въ сме́рти, тлѣ́нїемъ и҆ сме́ртїю моѐ є҆стество̀ ꙗ҆́то бы́вшее, дв҃о молѝ гдⷭ҇а и҆ сн҃а твоего̀, врагѡ́въ ѕлодѣ́йствїѧ мѧ̀ и҆зба́вити.

Предста́тельницꙋ тѧ̀ живота̀ вѣ́мъ, и҆ храни́тельницꙋ тве́рдꙋ дв҃о, и҆ напа́стей рѣша́щꙋ молвы̑, и҆ нало́ги бѣсѡ́въ ѿгонѧ́ющꙋ, и҆ молю́сѧ всегда̀, ѿ тлѝ страсте́й мои́хъ и҆зба́вити мѧ̀.

Сла́ва: Ꙗ҆́кѡ стѣ́нꙋ прибѣ́жища стѧжа́хомъ и҆ дꙋ́шъ всесоверше́нное сп҃се́нїе, и҆ простра́нство въ ско́рбехъ, ѻ҆трокови́це: и҆ просвѣще́нїемъ твои́мъ при́снѡ ра́дꙋемсѧ. ѽ влⷣчце, и҆ ны́нѣ на́съ ѿ страсте́й и҆ бѣ́дъ сп҃сѝ!

И҆ ны́нѣ: На ѻ҆дрѣ̀ ны́нѣ немощствꙋ́ѧй лежꙋ̀, и҆ нѣ́сть и҆сцѣле́нїѧ пло́ти мое́й: но бг҃а и҆ сп҃са мі́рꙋ, и҆ и҆зба́вителѧ недꙋ́гѡвъ ро́ждшаѧ, тебѣ̀ молю́сѧ бл҃го́й: ѿ тлѝ недꙋ̑гъ возста́ви мѧ̀.

Сщ҃е́нникъ помина́етъ, ꙗ҆́коже и҆з̾ѧви́сѧ.

И҆ по возгла́сѣ конда́къ, гла́съ ѕ҃:

Предста́тельство хрⷭ҇тїа́нъ непосты́дное, хода́тайство ко творцꙋ̀ непрело́жное, не пре́зри грѣ́шныхъ моле́нїй гла́сы, но предварѝ ꙗ҆́кѡ бл҃га́ѧ на по́мощь на́съ, вѣ́рнѡ зовꙋ́щихъ тѝ: ᲂу҆скорѝ на мл҃твꙋ, и҆ потщи́сѧ на ᲂу҆моле́нїе, предста́тельствꙋющи при́снѡ бцⷣе, чтꙋ́щихъ тѧ̀.

И҆ а҆́бїе прокі́менъ:

Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ.

Сті́хъ: Слы́ши дщѝ и҆ ви́ждь, и҆ приклонѝ ᲂу҆́хо твоѐ.

Сщ҃е́нникъ: И҆ ѡ҆ сподо́битисѧ на́мъ слы́шанїю ст҃а́гѡ є҆ѵⷢ҇лїа, гдⷭ҇а бг҃а мо́лимъ.

Премꙋ́дрость, про́сти, ᲂу҆слы́шимъ ст҃а́гѡ є҆ѵⷢ҇лїа. Ми́ръ всѣ̑мъ.

Ѿ лꙋкѝ ст҃а́гѡ є҆ѵⷢ҇лїа чте́нїе: [зача́ло д҃].

Во дни̑ ѻ҆́ны, воста́вши марїа́мъ, и҆́де въ гѡ́рнѧѧ со тща́нїемъ во гра́дъ і҆ꙋ́довъ. И҆ вни́де въ до́мъ заха́рїинъ, и҆ цѣлова̀ є҆лїсаве́тъ. И҆ бы́сть, ꙗ҆́кѡ ᲂу҆слы́ша є҆лїсаве́тъ цѣлова́нїе мр҃і́ино, взыгра́сѧ младе́нецъ во чре́вѣ є҆ѧ̀: и҆ и҆спо́лнисѧ дх҃а ст҃а є҆лїсаве́тъ. И҆ возопѝ гла́сомъ ве́лїимъ, и҆ речѐ: бл҃гослове́на ты̀ въ жена́хъ, и҆ бл҃гослове́нъ пло́дъ чре́ва твоегѡ̀. И҆ ѿкꙋ́дꙋ мнѣ̀ сїѐ, да прїи́де мт҃и гдⷭ҇а моегѡ̀ ко мнѣ̀; Се́ бо ꙗ҆́кѡ бы́сть гла́съ цѣлова́нїѧ твоегѡ̀ во ᲂу҆́шїю мое́ю, взыгра́сѧ младе́нецъ ра́дощами во чре́вѣ мое́мъ. И҆ бл҃же́нна вѣ́ровавшаѧ, ꙗ҆́кѡ бꙋ́детъ соверше́нїе глагѡ́ланнымъ є҆́й ѿ гдⷭ҇а. И҆ речѐ марїа́мъ: вели́читъ дꙋша̀ моѧ̀ гдⷭ҇а, и҆ возра́довасѧ дх҃ъ мо́й ѡ҆ бз҃ѣ сп҃сѣ мое́мъ. Ꙗ҆́кѡ призрѣ̀ на смире́нїе рабы̀ своеѧ̀: се́ бо ѿ ны́нѣ ᲂу҆бл҃жа́тъ мѧ̀ всѝ ро́ди. Ꙗ҆́кѡ сотворѝ мнѣ̀ вели́чїе си́льный, и҆ ст҃о и҆́мѧ є҆гѡ̀. Пребы́сть же марїа́мъ съ не́ю ꙗ҆́кѡ трѝ мцⷭ҇ы, и҆ возврати́сѧ въ до́мъ сво́й.

И҆ а҆́бїе, Сла́ва, гла́съ ѕ҃:

Мл҃твами бцⷣы, млⷭ҇тиве, ѡ҆чи́сти мно́жєства согрѣше́нїй на́шихъ.

И҆ ны́нѣ, то́йже.

Та́же: Поми́лꙋй мѧ̀, бж҃е, по вели́цѣй млⷭ҇ти твое́й, и҆ по мно́жествꙋ щедрѡ́тъ твои́хъ ѡ҆чи́сти беззако́нїе моѐ.

Гла́съ ѕ҃: Не ввѣ́ри мѧ̀ человѣ́ческомꙋ предста́тельствꙋ, прест҃а́ѧ влⷣчце, но прїимѝ моле́нїе раба̀ твоегѡ̀: ско́рбь бо ѡ҆бдержи́тъ мѧ̀, терпѣ́ти не могꙋ̀ де́мѡнскагѡ стрѣлѧ́нїѧ, покро́ва не и҆́мамъ, нижѐ гдѣ̀ прибѣ́гнꙋ ѻ҆каѧ́нный, всегда̀ побѣжда́емь, и҆ ᲂу҆тѣше́нїѧ не и҆́мамъ, ра́звѣ тебѐ влⷣчце мі́ра: ᲂу҆пова́нїе и҆ предста́тельство вѣ́рныхъ, не пре́зри моле́нїе моѐ, поле́зно сотворѝ.

Сщ҃е́нникъ: Сп҃сѝ, бж҃е, лю́ди твоѧ̑, и҆ бл҃гословѝ достоѧ́нїе твоѐ:

Гдⷭ҇и поми́лꙋй, в҃і:

Млⷭ҇тїю и҆ щедро́тами: И҆ прѡ́чаѧ.

Пѣ́снь з҃.

І҆рмо́съ: Ѿ і҆ꙋде́и доше́дше ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ.

На́ше сп҃се́нїе ꙗ҆́коже восхотѣ́лъ є҆сѝ, сп҃се, ᲂу҆стро́ити, во ᲂу҆тро́бꙋ дв҃ыѧ всели́лсѧ є҆сѝ, ю҆́же мі́рꙋ предста́тельницꙋ показа́лъ є҆сѝ: ѻ҆тє́цъ на́шихъ, бж҃е, бл҃гослове́нъ є҆сѝ.

Воли́телѧ ми́лости, є҆го́же родила̀ є҆сѝ мт҃и чⷭ҇таѧ, ᲂу҆молѝ и҆зба́витисѧ ѿ прегрѣше́нїй и҆ дꙋше́вныхъ скве́рнъ, вѣ́рою зовꙋ́щымъ: ѻ҆тє́цъ на́шихъ бж҃е, бл҃гослове́нъ є҆сѝ.

Сла́ва: Сокро́вище сп҃се́нїѧ и҆ и҆сто́чникъ нетлѣ́нїѧ тѧ̀ ро́ждшꙋю, и҆ сто́лпъ ᲂу҆твержде́нїѧ, и҆ две́рь покаѧ́нїѧ зовꙋ́щымъ показа́лъ є҆сѝ: ѻ҆тє́цъ на́шихъ бж҃е, бл҃гослове́нъ є҆сѝ.

И҆ ны́нѣ: Тѣлє́сныѧ сла́бѡсти и҆ дꙋшє́вныѧ недꙋ́ги, бг҃ороди́тельнице, любо́вїю пристꙋпа́ющихъ къ кро́вꙋ твоемꙋ̀, дв҃о, и҆сцѣли́ти сподо́би, сп҃са хрⷭ҇та̀ на́мъ ро́ждшаѧ.

Пѣ́снь и҃.

І҆рмо́съ: Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстїи, хвали́те и҆ превозноси́те во всѧ̑ вѣ́ки.

По́мощи ꙗ҆́же ѿ тебѐ тре́бꙋющыѧ, не пре́зри, дв҃о, пою́щыѧ и҆ превозносѧ́щыѧ тѧ̀ во вѣ́ки.

Неможе́нїе дꙋшѝ моеѧ̀ и҆сцѣлѧ́еши и҆ тѣлє́сныѧ болѣ̑зни, дв҃о, да тѧ̀ просла́влю, чⷭ҇таѧ, во вѣ́ки.

Сла́ва: И҆сцѣле́нїй бога́тство и҆злива́еши вѣ́рнѡ пою́щымъ тѧ̀, дв҃о, и҆ превозносѧ́щымъ неизрече́нное твоѐ ржⷭ҇тво̀.

И҆ ны́нѣ: Напа́стей ты̀ прило́ги ѿгонѧ́еши и҆ страсте́й нахо́ды дв҃о: тѣ́мже тѧ̀ пое́мъ во всѧ̑ вѣ́ки.

Пѣ́снь ѳ҃.

І҆рмо́съ: Вои́стиннꙋ бг҃оро́дицꙋ тѧ̀ и҆сповѣ́дꙋемъ, сп҃се́нїи тобо́ю, дв҃о чⷭ҇таѧ, съ безпло́тными ли́ки тѧ̀ велича́юще.

То́ка сле́зъ мои́хъ не ѿврати́сѧ, ꙗ҆́же ѿ всѧ́кагѡ лица̀ всѧ́кꙋ сле́зꙋ ѿе́мшаго, дв҃о, хрⷭ҇та̀ ро́ждшаѧ.

Ра́дости моѐ се́рдце и҆спо́лни, дв҃о, ꙗ҆́же ра́дости прїе́мшаѧ и҆сполне́нїе, грѣхо́внꙋю печа́ль потреблѧ́ющи.

Приста́нище и҆ предста́тельство тебѣ̀ прибѣга́ющихъ бꙋ́ди, дв҃о, и҆ стѣна̀ нерꙋши́маѧ, прибѣ́жище же и҆ покро́въ, и҆ весе́лїе.

Сла́ва: Свѣ́та твоегѡ̀ зарѧ́ми просвѣтѝ. дв҃о, мра́къ невѣ́дѣнїѧ ѿгонѧ́щи, бл҃говѣ́рнѡ бцⷣꙋ тѧ̀ и҆сповѣ́дающихъ.

И҆ ны́нѣ: На мѣ́стѣ ѡ҆ѕлобле́нїѧ не́мѡщи смири́вшагѡсѧ, дв҃о, и҆сцѣлѝ, и҆з̾ нездра́вїѧ во здра́вїе претворѧ́ющи.

И҆ а҆́бїе: Досто́йно є҆́сть ꙗ҆́кѡ вои́стиннꙋ:

И҆ кади́тъ сщ҃е́нникъ же́ртвенникъ и҆ лю́ди, и҆ мы̀ пое́мъ настоѧ́щыѧ бг҃оро́дичны:

Вы́шшꙋю нб҃съ и҆ чи́стшꙋю свѣ́тлостей со́лнечныхъ, и҆зба́вльшꙋю на́съ ѿ клѧ́твы, влⷣчцꙋ мі́ра пѣ́сньми почти́мъ.

Ѿ мно́гихъ мои́хъ грѣхѡ́въ немощствꙋ́етъ тѣ́ло, немощствꙋ́етъ и҆ дꙋша̀ моѧ̀: къ тебѣ̀ прибѣга́ю, бл҃года́тнѣй, наде́ждо ненаде́жныхъ, ты́ ми помозѝ.

Влⷣчце и҆ мт҃и и҆зба́вителѧ, прїимѝ моле́нїе недосто́йныхъ ра̑бъ твои́хъ, да хода́тайствꙋеши къ ро́ждшемꙋсѧ ѿ тебѐ: ѽ влⷣчце мі́ра, бꙋ́ди хода́таица!

Пое́мъ прилѣ́жнѡ тебѣ̀ пѣ́снь ны́нѣ всепѣ́той бцⷣѣ ра́достнѡ, со прⷣте́чею, и҆ всѣ́ми ст҃ы́ми, молѝ бцⷣе, є҆́же ᲂу҆ще́дрити ны̀.

Всѧ̑ а҆́гг҃лѡвъ вѡ́инства, прⷣте́че гдⷭ҇нь, а҆пⷭ҇лѡвъ двоенадесѧ́тице, ст҃і́и всѝ съ бцⷣею сотвори́те мл҃твꙋ, во є҆́же сп҃сти́сѧ на́мъ.

Всѧ̑ а҆́гг҃лѡвъ вѡ́инства, прⷣте́че гдⷭ҇нь, а҆пⷭ҇лѡвъ двоенадесѧ́тице, ст҃і́и всѝ съ бцⷣею сотвори́те мл҃твꙋ, во є҆́же сп҃сти́сѧ на́мъ.

Та́же, Трист҃о́е. Прест҃а́ѧ трⷪ҇це: Ѻ҆́ч҃е на́шъ: Сщ҃е́нникъ: Ꙗ҆́кѡ твоѐ є҆́сть црⷭ҇тво:

И҆ тропарѝ, гла́съ ѕ҃: Поми́лꙋй на́съ гдⷭ҇и, поми́лꙋй на́съ: Сла́ва: Гдⷭ҇и поми́лꙋй на́съ: И҆ ны́нѣ: Милосе́рдїѧ двє́ри: Сщ҃е́нникъ: Поми́лꙋй на́съ бж҃е, по вели́цѣй млⷭ҇ти:

Ли́къ: Гдⷭ҇и поми́лꙋй, три́жды.

Є҆щѐ мо́лимсѧ ѡ҆ млⷭ҇ти, жи́зни, ми́рѣ, здра́вїи, сп҃се́нїи, посѣще́нїи, проще́нїи, бл҃гопоспѣше́нїи, и҆ ѡ҆кормле́нїи раба̀ бж҃їѧ и҆́мⷬ҇къ, и҆ ѡ҆ є҆́же сохрани́тисѧ ст҃ѣ́й ѻ҆би́тели се́й: И҆ прѡ́чаѧ. И҆ ѿпꙋ́стъ.

Тропа́рь, гла́съ ѕ҃. А҆́гг҃ле бж҃їй, храни́телю мо́й ст҃ы́й, живо́тъ мо́й соблюдѝ во стра́сѣ хрⷭ҇та̀ бг҃а, ᲂу҆́мъ мо́й ᲂу҆твердѝ во и҆́стиннѣмъ пꙋтѝ, и҆ къ любвѝ го́рнѣй ᲂу҆ѧзвѝ дꙋ́шꙋ мою̀, да тобо́ю направлѧ́емь, полꙋчꙋ̀ ѿ хрⷭ҇та̀ бг҃а ве́лїю млⷭ҇ть.

Бг҃оро́диченъ: Ст҃а́ѧ влⷣчце, хрⷭ҇та̀ бг҃а на́шегѡ мт҃и, ꙗ҆́кѡ всѣ́хъ творца̀ недоꙋмѣ́ннѡ ро́ждшаѧ, молѝ бл҃гость є҆гѡ̀ всегда̀, со храни́телемъ мои́мъ а҆́гг҃ломъ, сп҃стѝ дꙋ́шꙋ мою̀ страстьмѝ ѡ҆держи́мꙋю, и҆ ѡ҆ставле́нїе грѣхѡ́въ дарова́ти мѝ.

Канѡ́нъ, гла́съ и҃.

Пѣ́снь а҃.

І҆рмо́съ: Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.

І҆и҃сꙋ: Пѣ́снь воспѣ́ти, и҆ восхвали́ти сп҃се, твоего̀ раба̀ досто́йнѡ сподо́би, безпло́тномꙋ а҆́гг҃лꙋ, наста́вникꙋ и҆ храни́телю моемꙋ̀.

Є҆ди́нъ а҆́зъ въ неразꙋ́мїи и҆ въ лѣ́ности ны́нѣ лежꙋ̀, наста́вниче мо́й и҆ храни́телю, не ѡ҆ста́ви менѐ погиба́юща.

Сла́ва: Оу҆́мъ мо́й твое́ю мл҃твою напра́ви, твори́ти мѝ бж҃їѧ повелѣ̑нїѧ, да полꙋчꙋ̀ ѿ бг҃а ѿда́нїе грѣхѡ́въ, и҆ ненави́дѣти мѝ ѕлы́хъ, наста́ви мѧ̀, молю́сѧ тѝ.

И҆ ны́нѣ: Моли́сѧ дв҃це ѡ҆ мнѣ̀ рабѣ̀ твое́мъ ко бл҃года́телю, со храни́телемъ мои́мъ а҆́гг҃ломъ, и҆ наста́ви мѧ̀ твори́ти за́пѡвѣди сн҃а твоегѡ̀, и҆ творца̀ моегѡ̀.

Пѣ́снь г҃.

І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀ гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.

Всѐ помышле́нїе моѐ, и҆ дꙋ́шꙋ мою̀ къ тебѣ̀ возложи́хъ храни́телю мо́й, ты̀ ѿ всѧ́кїѧ мѧ̀ напа́сти вра́жїѧ и҆зба́ви.

Вра́гъ попира́етъ мѧ̀ и҆ ѡ҆ѕлоблѧ́етъ, и҆ поꙋча́етъ всегда̀ твори́ти своѧ̑ хотѣ̑нїѧ: но ты̀, наста́вниче мо́й, не ѡ҆ста́ви менѐ погиба́юща.

Сла́ва: Пѣ́ти пѣ́снь со бл҃годаре́нїемъ и҆ ᲂу҆се́рдїемъ творцꙋ̀ и҆ бг҃ꙋ да́ждь мѝ, и҆ тебѣ̀ бл҃го́мꙋ а҆́гг҃лꙋ храни́телю моемꙋ̀, и҆зба́вителю мо́й, и҆зми́ мѧ ѿ вра̑гъ ѡ҆ѕлоблѧ́ющихъ мѧ̀.

И҆ ны́нѣ: И҆сцѣлѝ, пречⷭ҇таѧ, моѧ̑ многонедꙋ̑жныѧ стрꙋ́пы, ꙗ҆̀же въ дꙋшѝ: проженѝ врагѝ, и҆̀же при́снѡ бо́рютсѧ со мно́ю.

Сѣда́ленъ, гла́съ в҃. Подо́бенъ: Вы́шнихъ и҆щѧ̀:

Ѿ любвѐ дꙋше́вныѧ вопїю́ ти, храни́телю моеѧ̀ дꙋшѝ, всест҃ы́й мо́й а҆́гг҃ле: покры́й мѧ̀ и҆ соблюдѝ ѿ лꙋка́вагѡ ловле́нїѧ всегда̀, и҆ къ жи́зни наста́ви нбⷭ҇нѣй, вразꙋмлѧ́ѧ, и҆ просвѣща́ѧ и҆ ᲂу҆крѣплѧ́ѧ мѧ̀.

Сла́ва, и҆ ны́нѣ, бг҃оро́диченъ:

Бцⷣе безневѣ́стнаѧ пречⷭ҇таѧ, ꙗ҆́же без̾ сѣ́мене ро́ждши всѣ́хъ влⷣкꙋ, того̀ со а҆́гг҃ломъ храни́телемъ мои́мъ молѝ, и҆зба́вити ми сѧ всѧ́кагѡ недоꙋмѣ́нїѧ, и҆ да́ти ᲂу҆миле́нїе и҆ свѣ́тъ дꙋшѝ мое́й, и҆ согрѣше́нїємъ ѡ҆чище́нїе, ꙗ҆́же є҆ди́на вско́рѣ застꙋпа́ющи.

Пѣ́снь д҃.

І҆рмо́съ: Оу҆слы́шахъ гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.

Молѝ чл҃вѣколю́бца бг҃а, ты̀ храни́телю мо́й, и҆ не ѡ҆ста́ви менѐ: но при́снѡ въ ми́рѣ житїѐ моѐ соблюдѝ, и҆ пода́ждь мѝ сп҃се́нїе неѡбори́мое.

Ꙗ҆́кѡ застꙋ́пника и҆ храни́телѧ животꙋ̀ моемꙋ̀ прїе́мъ тѧ̀ ѿ бг҃а а҆́гг҃ле, молю́ тѧ ст҃ы́й: ѿ всѧ́кихъ мѧ̀ бѣ́дъ свободѝ.

Сла́ва: Мою̀ скве́рность твое́ю ст҃ы́нею ѡ҆чи́сти храни́телю мо́й, и҆ ѿ ча́сти шꙋ́їѧ да ѿлꙋче́нъ бꙋ́дꙋ мл҃твами твои́ми, и҆ прича́стникъ сла́вы ꙗ҆влю́сѧ.

И҆ ны́нѣ: Недоꙋмѣ́нїе предлежи́тъ мѝ ѿ ѡ҆быше́дшихъ мѧ̀ ѕѡ́лъ пречⷭ҇таѧ: но и҆зба́ви мѧ̀ ѿ ни́хъ ско́рѡ, къ тебѣ́ бо є҆ди́нѣй прибѣго́хъ.

Пѣ́снь є҃.

І҆рмо́съ: Оу҆́тренююще вопїе́мъ тѝ гдⷭ҇и, сп҃си́ ны: ты́ бо є҆сѝ бг҃ъ на́шъ, ра́звѣ тебѐ и҆но́гѡ не вѣ́мы.

Ꙗ҆́кѡ и҆мѣ́ѧ дерзнове́нїе къ бг҃ꙋ, храни́телю мо́й ст҃ы́й, сего̀ ᲂу҆молѝ ѿ ѡ҆скорблѧ́ющихъ мѧ̀ ѕѡ́лъ и҆зба́вити.

Свѣ́те свѣ́тлый, свѣ́тлѡ просвѣтѝ дꙋ́шꙋ мою̀, наста́вниче мо́й и҆ храни́телю, ѿ бг҃а да́нный мѝ а҆́гг҃ле.

Сла́ва: Спѧ́ща мѧ̀ ѕлѣ̀ тѧгото́ю грѣхо́вною ꙗ҆́кѡ бдѧ́ща сохранѝ, а҆́гг҃ле бж҃їй, и҆ возста́ви мѧ̀ на славосло́вїе моле́нїемъ твои́мъ.

И҆ ны́нѣ: Мр҃і́е, госпожѐ бцⷣе безневѣ́стнаѧ, наде́ждо вѣ́рныхъ, вра̑жїѧ возношє́нїѧ низложѝ, пою́щыѧ же тѧ̀ возвеселѝ.

Пѣ́снь ѕ҃.

І҆рмо́съ: Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ ꙗ҆́кѡ ри́зою, многомлⷭ҇тиве хрⷭ҇тѐ бж҃е на́шъ.

Всѧ́кихъ мѧ̀ напа́стей свободѝ, и҆ ѿ печа́лей сп҃сѝ, молю́сѧ тѝ ст҃ы́й а҆́гг҃ле, да́нный мѝ ѿ бг҃а, храни́телю мо́й до́брый.

Ѡ҆свѣтѝ ᲂу҆́мъ мо́й, бл҃же, и҆ просвѣти́ мѧ, молю́сѧ тѝ ст҃ы́й а҆́гг҃ле, и҆ мы́слити мѝ полє́знаѧ всегда̀ наста́ви мѧ̀.

Сла́ва: Оу҆ста́ви се́рдце моѐ ѿ настоѧ́щагѡ мѧте́жа, и҆ бдѣ́ти ᲂу҆крѣпи́ мѧ во бл҃ги́хъ, храни́телю мо́й, и҆ наста́ви мѧ̀ чꙋ́днѡ къ тишинѣ̀ живо́тнѣй.

И҆ ны́нѣ: Сло́во бж҃їе въ тѧ̀ всели́сѧ бцⷣе, и҆ человѣ́кѡмъ тѧ̀ показа̀ нбⷭ҇нꙋю лѣ́ствицꙋ: тобо́ю бо къ на́мъ вы́шнїй соше́лъ є҆́сть.

Конда́къ гла́съ д҃:

Ꙗ҆ви́сѧ мнѣ̀ млⷭ҇рдъ ст҃ы́й а҆́гг҃ле гдⷭ҇ень, храни́телю мо́й, и҆ не ѿлꙋча́йсѧ ѿ менѐ скве́рнагѡ: но просвѣти́ мѧ свѣ́томъ неприкоснове́ннымъ, и҆ сотвори́ мѧ досто́йна црⷭ҇твїѧ нбⷭ҇нагѡ.

І҆́косъ: Оу҆ничиже́ннꙋю дꙋ́шꙋ мою̀ мно́гими собла́зны, ты̀, ст҃ы́й предста́телю, неизрече́нныѧ сла́вы нбⷭ҇ныѧ сподо́би, и҆ пѣвє́цъ съ ли̑ки безпло́тныхъ си́лъ бж҃їихъ. поми́лꙋй мѧ̀ и҆ сохранѝ, и҆ по́мыслы до́брыми дꙋ́шꙋ мою̀ просвѣтѝ, да твое́ю сла́вою а҆́гг҃ле мо́й ѡ҆богащꙋ́сѧ, и҆ низложѝ ѕломы́слѧщыѧ мнѣ̀ врагѝ и҆ сотвори́ мѧ досто́йна црⷭ҇твїѧ нбⷭ҇нагѡ.

Пѣ́снь з҃.

І҆рмо́съ: Ѿ і҆ꙋде́и доше́дше ѻ҆́троцы, въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е бл҃гослове́нъ є҆сѝ.

Млⷭ҇тивъ бꙋ́ди мѝ, и҆ ᲂу҆молѝ бг҃а гдⷭ҇ень а҆́гг҃ле: и҆мѣ́ю бо тѧ̀ застꙋ́пника во все́мъ животѣ̀ мое́мъ, наста́вника же и҆ храни́телѧ, ѿ бг҃а дарова́ннаго мѝ во вѣ́ки.

Не ѡ҆ста́ви въ пꙋ́ть ше́ствꙋющїѧ дꙋшѝ моеѧ̀ ѻ҆каѧ́нныѧ ᲂу҆би́ти разбо́йникѡмъ, ст҃ы́й а҆́гг҃ле, ꙗ҆́же тѝ ѿ бг҃а предана̀ бы́сть непоро́чнѣ: но наста́ви ю҆̀ на пꙋ́ть покаѧ́нїѧ.

Сла́ва: Всю̀ посра́мленꙋ дꙋ́шꙋ мою̀ привождꙋ̀ ѿ лꙋка́выхъ мѝ пѡ́мыслъ и҆ дѣ́лъ: но предварѝ наста́вниче мо́й, и҆ и҆сцѣле́нїе мѝ пода́ждь бл҃ги́ми по́мыслы, ᲂу҆клонѧ́тисѧ всегда̀ на пра̑выѧ стєзѝ.

И҆ ны́нѣ: Премꙋ́дрости и҆спо́лни всѣ́хъ и҆ крѣ́пости бж҃е́ственныѧ, ѵ҆поста́снаѧ премꙋ́дросте вы́шнѧгѡ, бцⷣы ра́ди вѣ́рою вопїю́щихъ: ѻ҆тє́цъ на́шихъ бж҃е бл҃гослове́нъ є҆сѝ.

Пѣ́снь и҃.

І҆рмо́съ: Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстїи, хвали́те и҆ превозноси́те во всѧ̑ вѣ́ки.

Ѿ бг҃а по́сланный, ᲂу҆твердѝ живо́тъ мо́й раба̀ твоегѡ̀, пребл҃гі́й а҆́гг҃ле, и҆ не ѡ҆ста́ви менѐ во вѣ́ки.

А҆́гг҃ла тѧ̀ сꙋ́ща бл҃га, дꙋшѝ моеѧ̀ наста́вника и҆ храни́телѧ пребл҃же́нне воспѣва́ю во вѣ́ки.

Сла́ва: Бꙋ́ди мѝ покро́въ и҆ забра́ло, въ де́нь и҆спыта́нїѧ всѣ́хъ человѣ̑къ, во́ньже ѻ҆гне́мъ и҆скꙋша́ютсѧ дѣла̀ бл҃га̑ѧ же и҆ ѕла̑ѧ.

И҆ ны́нѣ: Бꙋ́ди мѝ помо́щница и҆ тишина̀ бцⷣе приснодв҃о, рабꙋ̀ твоемꙋ̀, и҆ не ѡ҆ста́ви менѐ лише́на бы́ти твоегѡ̀ влады́чества.

Пѣ́снь ѳ҃.

І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ сп҃се́ннїи тобо́ю дв҃о чⷭ҇таѧ, съ безпло́тными ли̑ки тѧ̀ велича́юще.

І҆и҃сꙋ: Поми́лꙋй мѧ̀ є҆ди́не сп҃се мо́й, ꙗ҆́кѡ млⷭ҇тивъ є҆сѝ и҆ млⷭ҇рдъ, и҆ првⷣныхъ ликѡ́въ сотвори́ мѧ прича́стника.

Мы́слити мѝ при́снѡ и҆ твори́ти гдⷭ҇ень а҆́гг҃ле, бл҃га̑ѧ и҆ полє́знаѧ да́рꙋй, ꙗ҆́кѡ си́льна ꙗ҆вѝ въ не́мощи и҆ непоро́чна.

Сла́ва: Ꙗ҆́кѡ и҆мѣ́ѧ дерзнове́нїе къ цр҃ю̀ нбⷭ҇номꙋ, того̀ молѝ, съ про́чими безпло́тными, поми́ловати мѧ̀ ѻ҆каѧ́ннаго.

И҆ ны́нѣ: Мно́го дерзнове́нїе и҆мꙋ́щи дв҃о, къ вопло́щшемꙋсѧ и҆з̾ тебѐ, преложи́ мѧ ѿ ᲂу҆́зъ, и҆ разрѣше́нїе мѝ пода́ждь и҆ сп҃се́нїе мл҃твами твои́ми.

Та́же, мл҃тва а҆́гг҃лꙋ:

А҆́гг҃ле хрⷭ҇то́въ ст҃ы́й, къ тебѣ̀ припа́даѧ молю́сѧ, храни́телю мо́й ст҃ы́й, прида́нный мнѣ̀ на соблюде́нїе дꙋшѝ и҆ тѣ́лꙋ моемꙋ̀ грѣ́шномꙋ, ѿ ст҃а́гѡ кр҃ще́нїѧ. а҆́зъ же свое́ю лѣ́ностїю, и҆ свои́мъ ѕлы́мъ ѻ҆бы́чаемъ, прогнѣ́вахъ твою̀ пречⷭ҇тꙋю свѣ́тлость, и҆ ѿгна́хъ тѧ̀ ѿ себѐ всѣ́ми стꙋ́дными дѣ́лы: лжа́ми, клевета́ми, за́вистїю, ѡ҆сꙋжде́нїемъ, непоко́рствомъ, братоненавидѣ́нїемъ и҆ ѕлопомнѣ́нїемъ, сребролю́бїемъ, прелюбодѣѧ́нїемъ, ꙗ҆́ростїю, скꙋ́постїю, ѡ҆б̾ѧде́нїемъ без̾ сы́тости, многоглаго́ланїемъ, ѕлы́ми по́мыслы и҆ лꙋка́выми, и҆ го́рдымъ ѻ҆бы́чаемъ, и҆мы́й самохотѣ́нїе на всѧ́кое плотско́е вожделѣ́нїе. ѽ ѕло́е моѐ произволе́нїе, є҆гѡ́же и҆ ско́ти безслове́снїи не творѧ́тъ! да ка́кѡ возмо́жеши воззрѣ́ти на мѧ̀, и҆лѝ пристꙋпи́ти ко мнѣ̀; кото́рыма ѻ҆чи́ма а҆́гг҃ле хрⷭ҇то́въ, воззри́ши на мѧ̀, ѡ҆пле́тшасѧ ѕлѣ̀ во гнꙋ́сныхъ дѣ́лѣхъ; да ка́кѡ ᲂу҆жѐ возмогꙋ̀ ѿпꙋще́нїѧ проси́ти, гѡ́рькимъ и҆ ѕлы̑мъ мои̑мъ и҆ лꙋка̑вымъ дѣѧ́нїємъ, въ нѧ́же впа́даю по всѧ̑ дни̑ и҆ нѡ́щи, и҆ на всѧ́къ ча́съ; Но молю́сѧ тѝ припа́даѧ, храни́телю мо́й ст҃ы́й, ᲂу҆млⷭ҇рдисѧ на мѧ̀ грѣ́шнаго и҆ недосто́йнаго раба̀ твоего̀, и҆́мⷬ҇къ, бꙋ́ди мѝ помо́щникъ и҆ застꙋ́пникъ на ѕла́го моего̀ сопроти́вника, ст҃ы́ми твои́ми мл҃твами, и҆ црⷭ҇твїѧ бж҃їѧ прича́стника мѧ̀ сотворѝ, со всѣ́ми ст҃ы́ми, во вѣ́ки, а҆ми́нь.

творе́нїе і҆ѡа́нна мона́ха черноно́жнагѡ, носѧ̀ краестро́чїе сїѐ: А҆́гг҃ла пою́ тѧ храни́телѧ моего̀. Пѣ́снь мона́ха і҆ѡа́нна.

Канѡ́нъ Гла́съ и҃.

Пѣ́снь а҃.

І҆рмо́съ: Во́дꙋ проше́дъ ꙗ҆́кѡ сꙋ́шꙋ:

Неꙋсыпа́емаго храни́телѧ дꙋшѝ моеѧ̀, и҆ предста́телѧ живота̀ моегѡ̀, и҆ наста́вника ѿ бг҃а, є҆го́же полꙋчи́хъ, пою́ тѧ а҆́гг҃ле бж҃їй бг҃а вседержи́телѧ.

Хотѧ́й всѣ̑мъ чл҃вѣ́кѡмъ спасти́сѧ, ст҃ы̑ѧ а҆́гг҃лы наста́вники и҆ свѣтоводи́тели приста́вилъ є҆сѝ сло́ве чл҃вѣ́кѡмъ, рꙋково́дствꙋющыѧ на́съ къ стра́хꙋ твоемꙋ̀.

Но́щїю содержи́ма мра́чною, и҆ те́мнымъ мра́комъ покрыва́емаго страсте́й, свѣ́томъ покаѧ́нїѧ ѡ҆зари́ мѧ наста́вниче и҆ предста́телю, и҆ храни́телю мо́й.

Сла́ва: Стꙋ́дныхъ помышле́нїй во мнѣ̀ то́читъ наводне́нїе ти́нное и҆ мра́чное, ѿ бг҃а разлꙋча́ющее ᲂу҆́мъ мо́й, є҆́же и҆зсꙋшѝ, ѽ застꙋ́пниче мо́й!

И҆ ны́нѣ: Тишина̀ ты̀ влⷣчце, и҆ приста́нище ѡ҆бꙋрева́емыхъ въ пꙋчи́нѣ грѣхо́внѣй: тѣ́мже къ твоемꙋ̀ притека́ю приста́нищꙋ, волнꙋ́емь бꙋ́рею разли́чныхъ страсте́й.

Пѣ́снь г҃.

І҆рмо́съ: Нбⷭ҇нагѡ крꙋ́га:

Землена́гѡ и҆ бре́ннагѡ и҆ пе́рстнагѡ смѣше́нїѧ и҆мѣ́ю бытїѐ, тѣ́мже землѝ пригвозди́хсѧ: но, ѽ предста́телю мо́й, и҆ наста́вниче мо́й, и҆ и҆зба́вителю, ѡ҆братѝ жела́нїе моѐ къ нбⷭ҇нымъ.

Въ нощѝ и҆ во днѝ лꙋка́выми дѣ́лы мои́ми преѡгорчева́ю, и҆ ѡ҆скорблѧ́ю и҆ раздража́ю тѧ̀, и҆ не хотѧ́ща ѿдале́ча стоѧ́ти побо́рника моего̀, понꙋжда́ю тѧ̀.

Печа́ли и҆ ᲂу҆ны́нїѧ пови́нный быва́ю, ꙗ҆́кѡ непокаѧ́ненъ пребыва́ѧй и҆ неиспра́вленъ: тѣ́мже мнѣ̀ да́рꙋй пока́ѧтисѧ и҆́стиннѡ, и҆ радостотвори́ти тѧ̀ храни́телѧ моего̀.

Сла́ва: Зрѧ̀ неви́димое лицѐ бг҃а на нб҃сѣ́хъ сѣдѧ́щагѡ, и҆ призира́юща на зе́млю ᲂу҆́мнѡ, и҆ трѧсти́сѧ є҆́й творѧ́ща, молѝ спасти́сѧ мнѣ̀ ст҃ы́й а҆́гг҃ле.

И҆ ны́нѣ: Оу҆́мъ и҆ смы́слъ и҆ сло́во, да́ръ бж҃їй прїѧ́хъ, ꙗ҆́кѡ да позна́въ влⷣкꙋ, дѣ́лы почтꙋ̀ до́брыми: а҆́зъ же страстьмѝ да́ръ ѡ҆безче́стивъ, сп҃сꙋ досади́хъ, влⷣчце спаси́ мѧ.

Сѣда́ленъ, гла́съ д҃. Подо́бенъ: Вознесы́йсѧ на крⷭ҇тъ:

Дꙋшѝ моеѧ̀ храни́тель и҆ тѣлесѐ, и҆збра́нный мѝ ѿ бг҃а бж҃е́ственный а҆́гг҃ле, бг҃оподража́тельнѡ пре́зри всест҃ы́й всѧ̑ прегрѣшє́нїѧ ѻ҆каѧ́нныѧ дꙋшѝ моеѧ̀, и҆зба́ви льсти́вагѡ мѧ̀ разли́чныхъ сѣте́й, и҆ ѻ҆́бщаго ᲂу҆млⷭ҇тиви бг҃а, да на сꙋдѣ̀ пода́стъ мѝ ѡ҆ставле́нїе.

Пѣ́снь д҃.

І҆рмо́съ: Ты̀ моѧ̀ крѣ́пость:

Не помышлѧ́ѧй стра́шное сꙋди́ще, въ не́мже и҆́мамъ сп҃сꙋ предста́ти, и҆ да́ти сло́во ѡ҆ всѧ́комъ дѣ́лѣ же и҆ сло́вѣ, нижѐ сме́рти безвѣ́стное во ᲂу҆́мъ ѿню́дъ прїе́млю: неиспра́вленъ є҆́смь, наста́вниче мо́й, не ѡ҆ста́ви менѐ.

Прилѣ́жнѡ всѧ́кꙋю ѕло́бꙋ соверши́хъ и҆з̾ мла́да, и҆ не преста́хъ тѧ̀ застꙋ́пника моего̀ преѡгорчева́ти беззако́нными словесы̀ и҆ дѣѧ́ньми: но не ѡ҆ѕло́бисѧ, но пождѝ є҆щѐ, вразꙋмлѧ́ѧ, и҆ просвѣща́ѧ, и҆ ᲂу҆твержда́ѧ мѧ̀.

Сло́ва бж҃їѧ долготерпѣ́нїе подража́ѧй, прише́дша ꙗ҆́кѡ да въ покаѧ́нїе призове́тъ всѧ̑ грѣ̑шныѧ, и҆ ѡ҆жида́юща самово́льное и҆справле́нїе, и҆ не понꙋжда́юща: и҆ ты̀ наста́вниче мо́й, на мнѣ̀ долготерпѣли́внѡ пребꙋ́ди.

Сла́ва: Дале́че ѿ бг҃а грѣ́хъ мѧ̀ ѿри́нꙋ, неключи́маго раба̀ и҆ недосто́йнаго, но влⷣка мо́й і҆и҃съ воспрїѧ́тъ мѧ̀ бл҃гоꙋтро́бнѡ и҆ приꙋсво́и: а҆́зъ же толи́кꙋю ѿмета́ѧй є҆гѡ̀ бл҃года́ть, є҆щѐ ѡ҆скорблѧ́ю и҆ тѧ̀ бж҃їй а҆́гг҃ле.

И҆ ны́нѣ: Ꙗ҆́кѡ вои́стиннꙋ гдⷭ҇ь воцр҃и́сѧ, црⷭ҇твїемъ неѿпа́дающимъ, и҆ ѡ҆блече́сѧ ѱало́мски, и҆з̾ тебѐ бг҃ома́ти, въ краснѣ́йшее бл҃голѣ́пїе, пло́ть ст҃ꙋ́ю, є҆́юже сме́рть прїѧ́тъ, и҆ низложѝ є҆ѧ̀ ца́рство.

Пѣ́снь є҃.

І҆рмо́съ: Вскꙋ́ю мѧ̀ ѿри́нꙋлъ є҆сѝ:

Тѧ̀ храни́телѧ стѧжа́въ, спребы́телѧ, собесѣ́дника, ст҃ы́й а҆́гг҃ле, соблюда́юща, спꙋ́тствꙋюща, спребыва́юща, и҆ сп҃си́тєльнаѧ предлага́юща прⷭ҇нѡ мнѣ̀, ко́е проще́нїе прїимꙋ̀ неразꙋ́менъ сы́й;

Мно́зѣмъ дерзнове́нїемъ прⷭ҇то́лꙋ предстоѧ̀ вседержи́телѧ, и҆ сликовствꙋ́ѧ ᲂу҆ цр҃ѧ̀ тва́ри, мно́гихъ ѕѡ́лъ мои́хъ пода́ти мѝ проще́нїе, защи́тителю мо́й помоли́сѧ.

Мꙋ̑ки прови́дѧ и҆ мꙋчє́нїѧ ѡ҆жида̑ющаѧ мѧ̀, и҆ ѡ҆жесточе́нїе. моѐ и҆ безꙋ́мїе и҆ ѡ҆слѣпле́нїе, ми́лꙋѧ стене́ши, и҆ сѣ́тꙋеши, и҆ дрѧ́хлꙋеши, посꙋпле́нїѧ и҆спо́лненъ, и҆зба́вителю мо́й.

Сла́ва: Нижѐ ко є҆ди́номꙋ часꙋ̀, но нижѐ чертѣ̀, и҆лѝ и҆ сеѧ̀ кра́тши ѡ҆ста́вихъ тѧ̀, бл҃годѣ́телѧ моего̀ и҆ храни́телѧ, ѡ҆ мнѣ̀ пора́доватисѧ и҆ возвесели́тисѧ и҆ взыгра́ти, грѣхмѝ при́снѡ срастлѣва́емый.

И҆ ны́нѣ: Но́вый млⷣнцъ ꙗ҆ви́сѧ недомы́сленный ѿ тебѐ пренепоро́чнаѧ, ста́виломъ дꙋбра̑вы, и҆ го́ры мѣ́риломъ ра́зꙋма поста́вивый: ли́къ ѕвѣзда́мъ и҆счита́ѧй, и҆ ка̑пли росы̀, и҆ вѣ́трѡвъ дыха́нїе преложи́вый.

Пѣ́снь ѕ҃.

І҆рмо́съ: Моли́твꙋ пролїю̀ ко гдⷭ҇ꙋ:

Сохранѧ́ѧй и҆ ѡ҆полча́ѧйсѧ ѻ҆́крестъ менѐ, и҆ стремлє́нїѧ возбранѧ́ѧй де́монѡвъ, и҆ тѣ́хъ ѕвѣрови̑днаѧ нахождє́нїѧ ꙗ҆̀же на мѧ̀ ѿрѣ́ѧй всегда̀, не преста́й храни́телю мо́й: тѧ́ бо и҆́мамъ те́пла застꙋ́пника.

Пречⷭ҇тно́е и҆ бл҃гоꙋха́нное сы́й мѵ́ро, не гнꙋша́йсѧ моеѧ̀ смра́дности, не ѿстꙋпѝ ѿ менѐ да́же до конца̀, но неѿстꙋ́пенъ бꙋ́ди мнѣ̀ храни́тель при́снѡ: и҆ со́лнце бо мѣста̀ сквє́рнаѧ преходѧ̀, не ѡ҆сквернѧ́етсѧ.

Ка̑пли слезотѡ́чныѧ и҆сточи́ти, покрыва́ющаго вода́ми сло́вомъ своѧ̑ высѡ́каѧ превы́спрєннѧѧ, бл҃года́ть мнѣ̀ да́ти ᲂу҆молѝ предста́телю мо́й, ꙗ҆́кѡ да тѣ́ми ѡ҆чи́ститсѧ се́рдце моѐ, и҆ ᲂу҆́зритъ бг҃а.

Невеще́ственнѣ ꙗ҆́кѡ чи́стъ и҆ невеще́ственъ, предстоѧ̀ чи́стомꙋ и҆ невеще́ственномꙋ, и҆ къ томꙋ̀ стѧжа́въ бога́тое дерзнове́нїе и҆ присвое́нїе, того̀ молѝ прилѣ́жнѡ, дꙋ́шꙋ мою̀ спасе́нꙋ дарова́ти мѝ.

Сла́ва: Да покры́етъ сра́мъ и҆ стꙋ́дъ, стꙋ̑днаѧ и҆ смра̑днаѧ и҆ мра̑чнаѧ ли́ца вра̑жїѧ, є҆гда̀ смире́ннаѧ моѧ̀ дꙋша̀ ѿ тѣ́ла распрѧга́етсѧ: тꙋ́юже да покры́ютъ, наста́вниче мо́й, свѣ̑тлаѧ твоѧ̑ и҆ пресщ҃є́ннаѧ кри́ла.

И҆ ны́нѣ: Ст҃ы́хъ ст҃ѣ́йшаѧ а҆́гг҃лъ, херꙋві̑мъ и҆ серафі̑мъ превы́шшаѧ, землере́тный мо́й ᲂу҆́мъ земна́гѡ и҆ ве́щнагѡ жела́нїѧ превы́шши покажѝ, ѿ землѝ къ нбⷭ҇нѣй любвѝ возвы́сивши.

Конда́къ, гла́съ в҃. Подо́бенъ: Вы́шнихъ и҆щѧ̀:

Бж҃їй слꙋжи́телю, и҆ храни́телю мо́й преизрѧ́дне, грѣ́шномꙋ при́снѡ мнѣ̀ спребыва́й, ѕлодѣ́йствїѧ мѧ̀ всѧ́кагѡ де́мѡнѡвъ и҆збавлѧ́ѧй, и҆ къ бж҃є́ственнымъ стезѧ́мъ наставлѧ́ѧй, жи́знь хода́тайствꙋѧй нетлѣ́ннꙋю.

Пѣ́снь з҃.

І҆рмо́съ: Ѿ і҆ꙋде́и доше́дше:

Тмы̑ ѻ҆́крестъ напа́дающихъ на мѧ̀ разбѡ́йникъ неви́димыхъ, и҆́щꙋщихъ дꙋ́шꙋ мою̀ и҆сто́ргнꙋти и҆ восхи́тити, ѻ҆́гненнымъ мече́мъ твои́мъ ѿгонѧ́ѧ держа́внѡ, не ѡ҆скꙋдѣва́й помо́щниче мо́й.

Є҆гда̀ хо́щетъ мѝ сꙋди́ти сꙋдїѧ̀ и҆ бг҃ъ мо́й, и҆ ѡ҆сꙋди́ти мѧ̀ ѡ҆сꙋжде́ннаго ѿ со́вѣсти, пре́жде ѻ҆́нагѡ сꙋда̀ не забꙋ́ди раба̀ твоегѡ̀, рꙋководи́телю мо́й.

Вещество̀ и҆мѣ́ѧ мт҃рь, и҆ бре́нїе ѻ҆ц҃а̀, и҆ пра́ѻц҃а пе́рсть, и҆ си́хъ сро́дствомъ въ зе́млю весьма̀ зрю̀: но да́ждь мѝ, предста́телю мо́й, и҆ горѣ̀ воззрѣ́ти когда̀ къ нбⷭ҇ной добро́тѣ.

Ꙗ҆́кѡ красе́нъ сы́й добро́тою, и҆ сла́дкїй и҆ весе́лый сл҃нцезра́чный ᲂу҆́мъ, свѣ́тлѡ предста́ни мѝ, ѡ҆скла́бленнымъ лице́мъ и҆ ра́достнымъ воззрѣ́нїемъ, є҆гда̀ и҆́мамъ ѿ землѝ взѧ́тисѧ, наста́вниче мо́й.

Сла́ва: Бл҃гоꙋтро́бїѧ ра́ди ми́лости, и҆ мно́жества ра́ди мно́гагѡ человѣколю́бїѧ, твои́хъ кри́лъ кро́вомъ, храни́телю мо́й, покры́й мѧ̀ и҆сходѧ́ща ѿ тѣ́ла, є҆́же не ви́дѣти мє́рзскаѧ ли́ца де́мѡнскаѧ.

И҆ ны́нѣ: Нбⷭ҇наѧ врата̀, сп҃си́тельнаѧ две́рь, лѣ́ствице ᲂу҆́мнаѧ, є҆́юже бг҃ъ сни́де, и҆ чл҃вѣ́къ взы́де: нбⷭ҇нагѡ црⷭ҇твїѧ щедро́тами твои́ми чⷭ҇таѧ, сподо́би мѧ̀ раба̀ твоего̀.

Пѣ́снь и҃.

І҆рмо́съ: Седмери́цею пе́щь:

По бз҃ѣ тѧ̀ прїѧ́хъ ѿ бг҃а застꙋ́пника и҆ рꙋководи́телѧ, и҆ помо́щника, и҆ побо́рника, прест҃ы́й а҆́гг҃ле. тѣ́мже не преста́й молю́сѧ, и҆ пѣ́стꙋнствꙋѧй, и҆ наказꙋ́ѧй, и҆ ᲂу҆ча́й лѣ̑паѧ мнѣ̀ дѣ́ѧти, и҆ просвѣти́ти ᲂу҆́мъ мо́й, до́ндеже мѧ̀ предста́виши хрⷭ҇тꙋ̀ спасе́на.

Є҆гда̀ поста́вѧтсѧ прⷭ҇то́ли, и҆ кни̑ги разгнꙋ́тсѧ, и҆ ве́тхїй де́ньми сѧ́детъ, и҆ сꙋ́дѧтсѧ чл҃вѣ́цы, и҆ а҆́гг҃ли предста́нꙋтъ, и҆ землѧ̀ восколе́блетсѧ, и҆ всѧ̑ ᲂу҆жа́снꙋтсѧ и҆ вострепе́щꙋтъ: тогда̀ твоѐ чл҃вѣколю́бїе на мнѣ̀ покажѝ, и҆ и҆зба́ви мѧ̀ гее́нны, хрⷭ҇та̀ ᲂу҆молѧ́ѧй.

Ны́нѣ ꙗ҆́кѡ пче́лы со́тъ, неви́димѡ ѡ҆крꙋжа́ютъ мѧ̀ бг҃оме́рзцыи гꙋби́телїе де́мѡни, ꙗ҆́кѡ хи́щницы пти̑цы, ꙗ҆́кѡ лꙋка́выѧ лиси̑цы, и҆ ꙗ҆́кѡ сыроѧ́дцы пти́цъ плотоѧ́дныхъ ѻ҆́крестъ менѐ лета́ютъ: покры́й мѧ̀ храни́телю мо́й, ꙗ҆́коже покрыва́етъ ѻ҆ре́лъ птенцы̀ своѧ̑.

Ѿ ѻ҆́чїю сле́зы непреста́ннѡ текꙋ́щыѧ, неѡскꙋ́днѡ то́ки да́ждь мѝ, всего́ мѧ ѡ҆мыва́ющыѧ, ѿ верхꙋ̀ и҆ до ногꙋ̀: ꙗ҆́кѡ па́че снѣ́га ᲂу҆бѣле́нꙋ ри́зꙋ ѡ҆бле́къ покаѧ́нїемъ, въ черто́гъ бж҃їй вни́дꙋ, тѧ̀ почита́ѧй защи́тителѧ моего̀.

Хрⷭ҇то́въ хра́мъ сꙋ́щее се́рдце моѐ, страстьмѝ свине́й ᲂу҆́мныхъ житїѐ соверши́хъ: но ᲂу҆крѣпи́ мѧ, помо́щниче дꙋшѝ моеѧ̀, ѡ҆чи́стити сїѐ, покади́ти, ѡ҆кропи́ти а҆рѡма́ты и҆ мѵ́ры моли́твъ и҆ чистоты̀, да па́ки бꙋ́детъ хра́мъ хрⷭ҇то́въ бл҃гоꙋха́ненъ.

Сла́ва:

Наста́вниче и҆ храни́телю мо́й, и҆ предста́телю и҆ и҆зба́вителю мо́й, ѿча́ѧнныѧ моеѧ̀ дꙋшѝ блюсти́телю, є҆гда̀ трꙋ́бный стра́шный гла́съ и҆́мать мѧ̀ ѿ землѝ воскреси́ти на сꙋ́дъ, близ̾ менѐ ста́ни тогда̀, ти́хъ и҆ ра́достенъ, наде́ждею спасе́нїѧ ѿе́млѧй мо́й стра́хъ.

И҆ ны́нѣ: Премно́жествомъ бл҃гости тꙋ́не мѧ̀ поми́лꙋй, бл҃гоꙋтро́бїѧ и҆сто́чникъ ро́ждшаѧ: млⷭ҇ти бо досто́йное не и҆́мамъ что̀ принестѝ тебѣ̀: бл҃ги́хъ бо мои́хъ ника́коже тре́бꙋеши, ꙗ҆́кѡ бл҃года́телѧ и҆ сп҃са мі́рꙋ неизрече́ннѡ заче́нши бл҃года́тнаѧ.

Пѣ́снь ѳ҃.

І҆рмо́съ: Оу҆страши́сѧ всѧ́къ:

Да ᲂу҆́зрю тѧ̀ ѡ҆деснꙋ́ю ѻ҆каѧ́нныѧ моеѧ̀ дꙋшѝ предстоѧ́ща, свѣ́тла и҆ ти́ха, застꙋ́пника и҆ предста́телѧ моего̀, внегда̀ и҆счеза́ти ѿ менѐ нꙋ́жднѡ дꙋ́хꙋ моемꙋ̀, и҆ и҆́щꙋщыѧ мѧ̀ поѧ́ти, гѡ́рькїѧ врагѝ ѿгонѧ́юща.

Ꙗ҆́кѡ ст҃ы́й бж҃їй слꙋжи́тель, и҆ творѧ́й є҆гѡ̀ бж҃е́ствєннаѧ хотѣ̑нїѧ, мно́гимъ ѡ҆богаща́ешисѧ къ немꙋ̀ дерзнове́нїемъ ст҃ы́й а҆́гг҃ле. тѣ́мже те́плѣ ѡ҆ мнѣ̀ того̀ ᲂу҆молѝ, ꙗ҆́кѡ да спасе́нъ тобо́ю, воспѣва́ю предста́тельство и҆ покро́въ тво́й.

Ве́сь живо́тъ мо́й во мно́зѣ прете́къ сꙋетѣ̀, къ концꙋ̀ прибли́жихсѧ, и҆ молю̀ тѧ̀ храни́телѧ моего̀: бꙋ́ди мѝ защи́титель, и҆ побо́рникъ непобори́мь, є҆гда̀ прехождꙋ̀ мыта̑рства лю́тагѡ мїроде́ржца.

Оу҆ма̀ моегѡ̀ погрѣшє́нїѧ, заблꙋждє́нїѧ, плѣнє́нїѧ, лю́тѡсти, и҆ стꙋдомы̑слїѧ нечи́стыхъ и҆ скве́рныхъ помышле́нїй, ѡ҆браща́ѧй въ дѡ́брыѧ мы̑сли, не преста́й предста́телю мо́й, во блага̑ѧ помышлє́нїѧ, ᲂу҆миле́нїѧ разжє́нныѧ роди́тели.

Побѣдѝ мои́хъ ѕлы́хъ, і҆и҃се є҆диноро́дный пребл҃гі́й, бл҃гоꙋтро́бїемъ твои́мъ безмѣ́рїе и҆ премно́жество, твоегѡ̀ невеще́ственнагѡ слꙋжи́телѧ бж҃е́ственными мл҃твами: є҆го́же мѝ приста́вилъ є҆сѝ и҆з̾ младе́нства, ꙗ҆́кѡ чл҃вѣколю́бецъ, храни́телѧ.

Сла́ва: Всю̀ мою̀ по бз҃ѣ спасе́нїѧ наде́ждꙋ возложи́хъ на тѧ̀ храни́телѧ моего̀, и҆ попечи́телѧ, и҆ застꙋ́пника, ѻ҆́бщꙋю моли́твꙋ къ бг҃ꙋ ѡ҆ мнѣ̀ сотворѝ, смоле́бники прїи́мъ а҆́гг҃лѡвъ ли́ки, и҆ застꙋ́пники.

И҆ ны́нѣ: Возвы́си ро́гъ бл҃гочести́выхъ, и҆ низложѝ ва́рварѡвъ шата̑нїѧ бг҃ороди́тельнице, неѡбори́мо спаса́ющи сїѐ ста́до твоѐ, въ не́мже вели́кое твоѐ и҆́мѧ и҆ многосла́вное вѣ́рнѡ велича́етсѧ и҆ сла́витсѧ.

Стїхи̑ры подо́бны, томꙋ́жде, во гла́съ в҃:

Подо́бенъ: До́ме є҆ѵфра́ѳовъ:

Ѽ а҆́гг҃ле бж҃їй, предстоѧ́й непосре́дственнѡ ст҃ѣ́й трⷪ҇цѣ, не преста́й моли́ти ѡ҆ мнѣ̀ рабѣ̀ твое́мъ.

Ꙗ҆́кѡ прїѧ́лъ є҆сѝ крѣ́пость храни́ти дꙋ́шꙋ мою̀ ѿ бг҃а, не преста́й кро́вомъ твои́хъ кри́лъ покрыва́ти ю҆̀ всегда̀. бл҃года́ть і҆и҃сꙋ, да́вшемꙋ мнѣ́ тѧ, вели́каго храни́телѧ дꙋшѝ моеѧ̀, и҆ ѻ҆рꙋ́жїе на врагѝ моѧ̑, а҆́гг҃ле бг҃оче́стный.

Сподо́би и҆ менѐ полꙋчи́ти ца́рствїе бг҃а вы́шнѧгѡ, да съ тобо́ю взыва́ю пѣ́снь трист҃ꙋ́ю.

Сла́ва: Свѣ́тъ вторы́й ты̀ є҆сѝ по бз҃ѣ храни́телю мо́й, не преста́й предста́тельствовати, ви́дѣти и҆ мнѣ̀ свѣ́тъ трисвѣ́тлагѡ бж҃ества̀.

И҆ ны́нѣ, бг҃оро́диченъ: А҆́гг҃лѡвъ и҆ чл҃вѣ́кѡвъ влⷣчце бцⷣе, не преста́й моли́ти дв҃о сн҃а твоего̀ ѡ҆ мнѣ̀ рабѣ̀ твое́мъ.

Мл҃тва томꙋ́же храни́телю чл҃вѣ́ческїѧ жи́зни а҆́гг҃лꙋ:

Ст҃ы́й а҆́гг҃ле, предстоѧ́й ѻ҆каѧ́нной мое́й дꙋшѝ, и҆ стра́стной мое́й жи́зни, не ѡ҆ста́ви менѐ грѣ́шнаго, нижѐ ѿстꙋпѝ ѿ менѐ за невоздержа́нїе моѐ: не да́ждь мѣ́ста лꙋка́вомꙋ де́мѡнꙋ ѡ҆блада́ти мно́ю наси́льствомъ сме́ртнагѡ сегѡ̀ тѣлесѐ: ᲂу҆крѣпѝ бѣ́дствꙋющꙋю и҆ хꙋдꙋ́ю мою̀ рꙋ́кꙋ, и҆ наста́ви мѧ̀ на пꙋ́ть спасе́нїѧ: є҆́й ст҃ы́й а҆́гг҃ле бж҃їй, храни́телю и҆ покрови́телю ѻ҆каѧ́нныѧ моеѧ̀ дꙋшѝ и҆ тѣ́ла, всѧ̑ мнѣ̀ простѝ, є҆ли́кими тѧ̀ ѡ҆скорби́хъ, во всѧ̑ дни̑ живота̀ моегѡ̀, и҆ а҆́ще что̀ согрѣши́хъ во дне́шнїй де́нь, покры́й мѧ̀ въ настоѧ́щꙋю но́щь, и҆ сохрани́ мѧ ѿ всѧ́кагѡ и҆скꙋше́нїѧ проти́внагѡ, да ни въ ко́емъ грѣсѣ̀ прогнѣ́ваю бг҃а, и҆ моли́сѧ за мѧ̀ ко гдⷭ҇ꙋ, да ᲂу҆тверди́тъ мѧ̀ въ стра́сѣ свое́мъ, и҆ досто́йна пока́жетъ мѧ̀ раба̀ своеѧ̀ бл҃гости, а҆ми́нь.

Гла́съ а҃.

Подо́бенъ: Всехва́льнїи мч҃нцы:

Безпло́тнїи а҆́гг҃ли, бж҃їю престо́лꙋ предстоѧ́щїи, и҆ ѿѻнꙋ́дными свѣтлостьмѝ ѡ҆блистава́еми, и҆ свѣтоли́тїи вѣ́чнѡ сїѧ́юще, и҆ свѣ́ти быва́юще вторі́и: хрⷭ҇тꙋ̀ моли́тесѧ, дарова́ти дꙋша́мъ на́шымъ ми́ръ, и҆ ве́лїю млⷭ҇ть.

Безсме́ртнїи а҆́гг҃ли, живо́тъ вои́стиннꙋ неги́блемый ѿ пе́рвагѡ прїе́мше живота̀ всебога́тїи, присносꙋ́щныѧ сла́вы, и҆ честні́и зри́телїе премꙋ́дрости вѣ́чныѧ бы́сте, свѣ́та и҆сполнѧ́еми, и҆ свѣщѝ соѡбраща́еми, прили́чнѡ показꙋ́еми.

А҆рха́гг҃ли, а҆́гг҃ли, нача̑ла, прⷭ҇то́ли, гдⷭ҇ьствїѧ, серафі́ми шестокрила́тїи, и҆ многоѻчи́тїи херꙋві́ми, бж҃е́ственнїи премꙋ́дрости ѻ҆рга́ни, си̑лы, вла̑сти бж҃е́ственнѣйшїи: хрⷭ҇тꙋ̀ моли́тесѧ, дарова́ти дꙋша́мъ на́шымъ ми́ръ, и҆ ве́лїю млⷭ҇ть.

Сла́ва, и҆ ны́нѣ, бг҃оро́диченъ:

Чи́стое бж҃їе жили́ще бы́вши чⷭ҇таѧ, съ безпло́тными моли́сѧ, чи́стѣ соверши́ти мѝ пꙋ́ть жите́йскїй ꙗ҆́кѡ да не предвари́тъ ве́черъ сме́ртный негото́ва, и҆ ѿсле́тъ мѧ̀ въ пла́мень ѻ҆́гненный мꙋ́читисѧ. но ты́ мѧ ѿ сегѡ̀ и҆схитѝ.

Тропа́рь, гла́съ д҃:

Нбⷭ҇ныхъ во́инствъ а҆рхїстрати́зи, мо́лимъ ва́съ при́снѡ мы̀ недосто́йнїи, да ва́шими мл҃твами ѡ҆градитѐ на́съ кро́вомъ кри́лъ невеще́ственныѧ ва́шеѧ сла́вы, сохранѧ́юще ны̀ припа́дающыѧ прилѣ́жнѡ, и҆ вопїю́щыѧ: ѿ бѣ́дъ и҆зба́вите ны̀, ꙗ҆́кѡ чинонача́льницы вы́шнихъ си́лъ.

Канѡ́нъ, гла́съ и҃, є҆гѡ́же краегране́сїе сицево̀: Да торжествꙋ́емъ бг҃омꙋ́дрїи похвалꙋ̀ собо́рꙋ безпло́тныхъ. І҆ѡ́сифово творе́нїе.

Пѣ́снь а҃.

І҆рмо́съ: Пѣ́снь возсле́мъ лю́дїе чꙋ́дномꙋ бг҃ꙋ на́шемꙋ, свободи́вшемꙋ і҆и҃лѧ ѿ рабо́ты, пѣ́снь побѣ́днꙋю пою́ще, и҆ вопїю́ще: пои́мъ тебѣ̀ є҆ди́номꙋ влⷣцѣ.

Припѣ́въ: Ст҃і́и а҆рха́гг҃ли и҆ а҆́гг҃ли моли́те бг҃а ѡ҆ на́съ.

Всѝ воспои́мъ лю́дїе, всѧ̑ направлѧ́ющꙋю невеще́ствєнныѧ ли́ки вы́шнѧгѡ чинонача́лїѧ, трⷪ҇цꙋ несозда́ннꙋю, пою́ще: ст҃ъ, ст҃ъ, ст҃ъ є҆сѝ бж҃е вседержи́телю.

Положи́лъ є҆сѝ тва́рємъ нача́токъ, сꙋщество̀ безпло́тное, тво́рче а҆́гг҃лѡвъ, пречⷭ҇тый тво́й прⷭ҇то́лъ ѡ҆крꙋжа́ющѧ, зва́ти тѝ: ст҃ъ, ст҃ъ, ст҃ъ є҆сѝ бж҃е вседержи́телю.

Ра́дꙋйсѧ гаврїи́ле, бж҃їѧ воплоще́нїѧ возвѣсти́телю, мїхаи́ле же, чинѡ́въ невеще́ственныхъ предста́телю, непреста́ннѡ зовꙋ́ще: ст҃ъ, ст҃ъ, ст҃ъ є҆сѝ бж҃е вседержи́телю.

Бг҃оро́диченъ: Трепе́щꙋ та́инства хрⷭ҇тѐ, твоегѡ̀ схожде́нїѧ, ꙗ҆́кѡ и҆́же є҆стество́мъ бг҃ъ, прїѧ́лъ є҆сѝ ѿ дв҃ы роди́тисѧ ꙗ҆́кѡ человѣ́къ, да сп҃се́ши мі́ръ ѿ рабо́ты сопроти́внагѡ.

Пѣ́снь г҃.

І҆рмо́съ: Стра́хъ тво́й гдⷭ҇и, всадѝ въ сердца̀ ра̑бъ твои́хъ, и҆ бꙋ́ди на́мъ ᲂу҆твержде́нїе, тѧ̀ во и҆́стинѣ призыва́ющихъ.

Крѣ́постїю ᲂу҆ста́вилъ є҆сѝ безсме́ртне си̑льныѧ, соверша́ющыѧ прест҃о́е твоѐ хотѣ́нїе, тебѣ̀ въ вы́шнихъ всегда̀ предстоѧ́щыѧ.

Хода́таи твоегѡ̀ вочл҃вѣ́ченїѧ, и҆ честна́гѡ воста́нїѧ, а҆́гг҃льскїѧ чинонача́льники хрⷭ҇тѐ, за ны̀ прїимѝ молѧ́щыѧсѧ.

А҆́гг҃лы приста́вилъ є҆сѝ храни́тели человѣ́кѡмъ, ꙗ҆́кѡ бл҃гоꙋтро́бенъ, слꙋжи́тели же показа́лъ є҆сѝ хрⷭ҇тѐ сп҃се́нїѧ, твои̑мъ ᲂу҆го́дникѡмъ.

Бг҃оро́диченъ: Неизрече́ннѡ ро́ждши бг҃оневѣ́сто сп҃са и҆ гдⷭ҇а, и҆зба́вльшаго на́съ ѿ тлѝ, тѧ̀ вои́стиннꙋ призыва́ющихъ.

Сѣда́ленъ, гла́съ и҃.

Подо́бенъ: Повелѣ́нное:

Нбⷭ҇ныхъ нача́льниче, и҆ первостоѧ́телю высокопресто́льныхъ, и҆ стра́шныхъ бж҃е́ственныѧ сла́вы, мїхаи́ле а҆рхїстрати́же, а҆́гг҃лѡмъ чинонача́льниче, со всѣ́ми безпло́тными, є҆мꙋ́же слꙋ́жиши влⷣцѣ, ѡ҆ все́мъ мі́рѣ непреста́ннѡ моли́сѧ, и҆ и҆спросѝ ѡ҆ставле́нїе грѣхѡ́въ, и҆ млⷭ҇ть и҆ бл҃года́ть ѡ҆брѣстѝ въ де́нь сꙋ́дный.

Сла́ва, и҆ ны́нѣ, бг҃оро́диченъ:

Въ пꙋчи́нꙋ лю́тѣ впа́дъ ᲂу҆ны́нїѧ, ѿ мно́жества лꙋка́выхъ и҆ беззако́нныхъ мѝ дѣ́лъ, прїидо́хъ въ недоꙋмѣ́нїе, и҆ ѿча́ѧнїемъ ны́нѣ ѡ҆держꙋ́сѧ. влⷣчце бцⷣе, ты́ мѧ сп҃сѝ, ты́ ми помозѝ: грѣ́шныхъ бо ты̀ є҆сѝ ѡ҆чище́нїе, и҆ чистота̀ сп҃си́тельнаѧ.

Крⷭ҇тобг҃оро́диченъ: Ѿ чи́стыхъ крове́й твои́хъ вопло́щшасѧ, и҆ па́че ᲂу҆ма̀ и҆з̾ тебѐ чⷭ҇таѧ ро́ждшагосѧ, на дре́вѣ ви́сѧща посредѣ̀ ѕлодѣ̑ю зрѧ́щи, ᲂу҆тро́бою болѣ́зновала є҆сѝ, и҆ мт҃рски пла́чꙋщи вопїѧ́ла є҆сѝ: ᲂу҆вы̀ мнѣ̀ ча́до моѐ, что̀ є҆́сть бж҃е́ственное и҆ неизрече́нное смотре́нїе твоѐ, и҆́мже ѡ҆животвори́лъ є҆сѝ созда́нїе твоѐ; пою̀ твоѐ млⷭ҇рдїе.

Пѣ́снь д҃.

І҆рмо́съ: Всѣ́лъ є҆сѝ на ко́ни, а҆пⷭ҇лы твоѧ̑ гдⷭ҇и, и҆ прїѧ́лъ є҆сѝ рꙋка́ма твои́ма ᲂу҆зды̑ и҆́хъ, и҆ сп҃се́нїе бы́сть ѣ҆жде́нїе твоѐ, вѣ́рнѡ пою́щымъ: сла́ва си́лѣ твое́й гдⷭ҇и.

Всѣ́лъ є҆сѝ на а҆́гг҃лы, ꙗ҆́коже на ко́ни чл҃вѣколю́бче, и҆ прїѧ́тъ рꙋко́ю твое́ю вожда̀ и҆́хъ, и҆ сп҃се́нїе бы́сть ѣ҆жде́нїе твоѐ, вѣ́рнѡ тѝ вопїю́щымъ: сла́ва си́лѣ твое́й гдⷭ҇и.

Покрыва́етъ а҆́гг҃лы добродѣ́тель твоѧ̀ безсме́ртне, и҆ зємны́ѧ и҆сполнѧ́етъ концы̀ твоегѡ̀ сла́внагѡ безнача́льне, бж҃е́ственнагѡ хвале́нїѧ, съ ни́миже тебѣ̀ вопїе́мъ: сла́ва си́лѣ твое́й гдⷭ҇и.

И҆зше́лъ є҆сѝ ще́дре, на сп҃се́нїе лю́демъ твои̑мъ хрⷭ҇тѐ, созыва́еши же дрꙋ́ги си̑лы твоѧ̑: и҆ весе́лїе бы́сть во сп҃се́нїи твое́мъ безвє́щнымъ, вопїю́щымъ: сла́ва си́лѣ твое́й гдⷭ҇и.

Бг҃оро́диченъ: Дв҃а и҆ мт҃и па́че є҆стества̀ ꙗ҆ви́ласѧ є҆сѝ пречⷭ҇таѧ, ꙗ҆́кѡ бг҃а того́же и҆ человѣ́ка хрⷭ҇та̀ родила̀ є҆сѝ, ѿ а҆́гг҃лъ хвали́маго, люде́й твои́хъ печа́ль преложѝ на ра́дость, мл҃твами твои́ми.

Пѣ́снь є҃.

І҆рмо́съ: Ѿ но́щи невѣ́дѣнїѧ бг҃овѣ́дѣнїемъ просвѣти́вый концы̀, просвѣти́ мѧ ᲂу҆́тромъ чл҃вѣколю́бїѧ твоегѡ̀, гдⷭ҇и.

Невозвра́тнымъ жела́нїемъ всегда̀ къ высотѣ̀ хрⷭ҇тѐ носи́ми, кра́йнее всѣ́хъ жела́нїе, а҆́гг҃льскїѧ си̑лы непреста́ннѡ сла́вѧтъ.

Ты̀ разꙋ̑мныѧ по сꙋществꙋ̀, нетлѣ̑нныѧ бл҃года́тїю твое́ю хрⷭ҇тѐ, поста́вилъ є҆сѝ пѣвцы̀ твоемꙋ̀ вели́чествїю, а҆́гг҃лы твоѧ̑ по ѡ҆́бразꙋ содѣ́лавъ непостижи́ме.

Ты̀ непреклѡ́нны на гѡ́ршаѧ, къ тебѣ̀ приближе́нїемъ хрⷭ҇тѐ, сохрани́лъ є҆сѝ твоѧ̑ слꙋги̑: и҆сто́чникъ бо бл҃гости ты̀ є҆сѝ бл҃готворѧ̀ досто́йнѡ тѝ слꙋжа́щымъ.

Бг҃оро́диченъ: Оу҆мерщвле́ннꙋю мою̀ дꙋ́шꙋ страстьмѝ ме́рзкими, всенепоро́чнаѧ ѡ҆живѝ, животꙋ̀ храни́телѧ ро́ждши, и҆ къ стезѣ̀ вѣ́чнѣй и҆ бл҃же́нномꙋ житїю̀ ᲂу҆стремѝ.

Пѣ́снь ѕ҃.

І҆рмо́съ: І҆ѡ́нꙋ въ ки́тѣ гдⷭ҇и, є҆ди́наго всели́лъ є҆сѝ: мене́ же свѧ́заннаго мре́жами вра́жїими, ꙗ҆́кѡ ѿ тлѝ ѻ҆́наго, сп҃сѝ.

Бг҃олѣ́пнѡ ѿ несꙋщества̀ гдⷭ҇и, сло́вомъ приве́лъ є҆сѝ сꙋщества̀ нбⷭ҇ныхъ, безсме́ртне, во́инствъ, свѣтови́дны си́хъ содѣ́ловаѧ.

Слꙋжи́телїе честні́и бж҃їѧ хвале́нїѧ бы́сте безпло́тнїи, гра́ждане нбⷭ҇нїи, и҆ бж҃е́ственнаѧ вои́стиннꙋ ски́нїѧ, творцꙋ̀ досто́йнѡ слꙋжа́ще.

Бг҃оро́диченъ: Всепѣ́таѧ, свѣ́та поро́ждши, всѣ̑мъ свѣ́тъ даю́щаго, тьмꙋ̀ мои́хъ прегрѣше́нїй чⷭ҇таѧ, ѿженѝ мт҃рними твои́ми къ немꙋ̀ мл҃твами.

Конда́къ, гла́съ в҃:

А҆рхїстрати́зи бж҃їи, слꙋжи́телїе бж҃е́ственныѧ сла́вы, а҆́гг҃лѡвъ нача̑льницы, и҆ человѣ́кѡвъ наста̑вницы, поле́зное на́мъ проси́те и҆ ве́лїю млⷭ҇ть, ꙗ҆́кѡ безпло́тныхъ а҆рхїстрати́зи.

І҆́косъ: Ре́клъ є҆сѝ чл҃вѣколю́бче, въ писа́нїихъ твои́хъ, мно́жествꙋ ра́доватисѧ а҆́гг҃лъ ѡ҆ человѣ́цѣ є҆ди́номъ ка́ющемсѧ, безсме́ртне: тѣ́мъ и҆ мы̀ въ беззако́нїихъ сꙋ́ще, безгрѣ́шне є҆ди́не сердцевѣ́дче, тѧ̀ моли́ти всегда̀ дерза́емъ ꙗ҆́кѡ бл҃гоꙋтро́бнаго, ᲂу҆ще́дрити на́съ, и҆ посла́ти недостѡ́йнымъ ᲂу҆миле́нїе влⷣко, и҆ пода́ти на́мъ проще́нїе грѣхѡ́въ: ѡ҆ всѣ́хъ бо на́съ мо́лѧтсѧ тебѣ̀, ꙗ҆́кѡ безпло́тныхъ а҆рхїстрати́зи.

Пѣ́снь з҃.

І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ гдⷭ҇и бж҃е во вѣ́ки.

Свѣ́ты ꙗ҆ви́лъ є҆сѝ ще́дре, а҆́гг҃лъ твои́хъ невеще́ственное сꙋщество̀ неизрече́ннагѡ свѣ́та и҆сполнѧ́емы, непреста́ннѡ зовꙋ́щыѧ: бл҃гослове́нъ є҆сѝ гдⷭ҇и бж҃е во вѣ́ки.

Є҆мꙋ́же предстоѧ́тъ непреста́ннѡ слꙋжа́ще тьмы̑ а҆́гг҃льскїѧ, лица́ же зрѣ́ти не терпѧ́тъ бж҃ества̀, бл҃гослове́нъ є҆сѝ зовꙋ́ще, бж҃е во вѣ́ки.

Сло́вомъ твои́мъ ѵ҆поста́снымъ гдⷭ҇и, а҆́гг҃льское є҆стество̀ содѣ́лалъ є҆сѝ, ѡ҆ст҃и́въ же бж҃е́ственнымъ дх҃омъ, трⷪ҇цꙋ бг҃осло́вити наꙋчи́лъ є҆сѝ бж҃е во вѣ́ки.

Трⷪ҇ченъ: Трѝ ᲂу҆́бѡ зрѧ́ще сꙋ́щыѧ ѵ҆поста̑си, неѡпи́санное сла́вимъ сꙋщество̀, ѻ҆ц҃а̀ и҆ сло́ва со дх҃омъ, вопїю́ще: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.

Пѣ́снь и҃.

І҆рмо́съ: На горѣ̀ ст҃ѣ́й просла́вльшасѧ, и҆ въ кꙋпинѣ̀ ѻ҆гне́мъ приснодв҃ы мѡѷсе́ови та́йнꙋ ꙗ҆́вльшаго, гдⷭ҇а по́йте, и҆ превозноси́те во всѧ̑ вѣ́ки.

А҆́гг҃льскомꙋ поревнꙋ́емъ житїю̀, и҆ ра́зꙋмъ впери́мъ къ высотѣ̀, и҆ съ ни́ми невеще́ственнѡ воспое́мъ гдⷭ҇а, и҆ превозно́симъ во вѣ́ки.

Лико́вствєнницы ли́ка нбⷭ҇нагѡ, и҆̀же прⷭ҇то́лъ ѡ҆бстоѧ́ще сла́вы, ѡ҆ бз҃ѣ всегда̀ ѡ҆браща́еми а҆́гг҃ли, пою́тъ и҆ славосло́вѧтъ во всѧ̑ вѣ́ки.

Невеще́ственна ѻ҆гнѧ̀ творѧ́щей пла́мы, на высотѣ̀ непреста́ннѡ слꙋжа́щихъ, и҆ а҆́гг҃лы дꙋ́хи ꙗ҆влѧ́ющей, трⷪ҇цѣ покланѧ́емсѧ, и҆ славосло́вимъ во всѧ̑ вѣ́ки.

Бг҃оро́диченъ: И҆́же во ᲂу҆тро́бꙋ все́льшасѧ дв҃ы, и҆ ѿ сеѧ̀ стра́ннѡ и҆ вы́ше сло́ва, дре́внѧго а҆да́ма назда́вша, гдⷭ҇а пое́мъ и҆ славосло́вимъ во вѣ́ки.

Пѣ́снь ѳ҃.

І҆рмо́съ: Оу҆ста́вы прешла̀ є҆сѝ є҆стества̀, содѣ́телѧ заче́нши и҆ гдⷭ҇а, и҆ две́рь сп҃се́нїѧ мі́рови была̀ є҆сѝ. тѣ́мъ тѧ̀ бцⷣе непреста́ннѡ велича́емъ.

Тѧ̀ неизрече́ннѡ совокꙋпи́вшаго нбⷭ҇нымъ хрⷭ҇тѐ земна̑ѧ, и҆ є҆ди́нꙋ цр҃ковь соверши́вша а҆́гг҃лѡмъ и҆ человѣ́кѡмъ, непреста́ннѡ велича́емъ.

А҆́гг҃ли и҆ а҆рха́гг҃ли, прⷭ҇то́ли, вла̑сти же и҆ гдⷭ҇ьствїѧ, нача̑ла и҆ си̑лы, и҆ херꙋві́ми, и҆ серафі́ми, съ бцⷣею ѡ҆ мі́рѣ моли́тесѧ.

Трⷪ҇ченъ: Тѧ̀ трⷪ҇це сла́вимъ, ѿ небытїѧ̀ всѧ̑ сотвори́вшꙋю, и҆ чи́ны а҆́гг҃льскїѧ ᲂу҆краси́вшꙋю, и҆ бж҃е́ственными зарѧ́ми просвѣти́вшꙋю концы̀.

Бг҃оро́диченъ: Ра́дꙋйсѧ ст҃а́ѧ бг҃оневѣ́сто, ра́дꙋйсѧ, свѣ́тъ мі́рови ро́ждши вѣ̑рнымъ, ра́дꙋйсѧ стѣно̀ и҆ покро́ве всѣ́хъ на́съ: бг҃а ꙗ҆́кѡ бл҃года́телѧ, за ны̀ непреста́ннѡ молѝ.

Гла́съ в҃. Подо́бенъ: Є҆гда̀ ѿ дре́ва:

Проповѣ́дниче хрⷭ҇то́въ и҆ крⷭ҇ти́телю, а҆́гг҃ле, а҆пⷭ҇ле, мч҃нче, прⷪ҇ро́че, прⷣте́че, свѣ́щниче, дрꙋ́же бли́жнїй, прⷪ҇ро́кѡвъ печа́ть, въ рожде́нныхъ пречестнѣ́йшїй, хода́таю ве́тхїѧ и҆ но́выѧ бл҃года́ти, свѣ́тлый сло́ва гла́се, твои́ми сщ҃е́нными хода́тайствы мл҃твєннаѧ творє́нїѧ къ бг҃ꙋ бл҃гоꙋтро́бномꙋ и҆спра́ви.

Сѐ а҆́гнецъ бж҃їй, и҆́же грѣхѝ мі́ра взе́млѧй: возопи́лъ є҆сѝ прⷣте́че бл҃же́нне, внегда̀ ви́дѣ хрⷭ҇та̀, на землѝ ходѧ́ща. того̀ ᲂу҆́бѡ молѝ, грѣхѡ́въ ѡ҆ставле́нїе дарова́ти тебѐ почита́ющымъ: и҆́маши бо къ немꙋ̀ ве́лїе вои́стиннꙋ дерзнове́нїе крⷭ҇ти́телю, ꙗ҆́кѡ хода́тай зако́на и҆ бл҃года́ти.

Потщи́сѧ и҆ и҆зми́ мѧ ѿ и҆скꙋше́нїй, сла́вный гдⷭ҇ень прⷪ҇ро́че, молю́ ти сѧ. всꙋ́е бо подвиго́шасѧ на мѧ̀ борю́щїи мѧ̀ го́рцыи бѣ́сове, и҆́щꙋщїи похи́тити дꙋ́шꙋ раба̀ твоегѡ̀ ѻ҆каѧ́ннꙋю, ꙗ҆́коже пти́цꙋ, не ѡ҆ста́ви мѧ̀ до конца̀: да разꙋмѣ́ютъ же па́че всебл҃же́нне, ꙗ҆́кѡ ты́ ми є҆сѝ прибѣ́жище.

Сла́ва, и҆ ны́нѣ, бг҃оро́диченъ:

Ꙗ҆́коже сро́дствомъ є҆сте́ственнымъ, и҆ мл҃твеннымъ согла́сїемъ, є҆ди́но вы̀ сꙋ́ще, мт҃и всѣ́хъ цр҃ѧ̀, и҆ бж҃е́ственный прⷣте́че: мольбꙋ̀ сотвори́те вкꙋ́пѣ ѡ҆ рабѣ̀, ѕѣлѡ̀ прогнѣ́вавшемъ бл҃гомлⷭ҇тивнаго, ꙗ҆́кѡ да ᲂу҆ще́дритъ и҆ сп҃се́тъ, ва́шими прекло́ньсѧ хода́тайствы, и҆ ѻ҆́гненнагѡ родства̀ и҆змѣни́тъ мѧ̀.

Тропа́рь, гла́съ в҃.

Па́мѧть првⷣнагѡ съ похвала́ми, тебѣ́ же довлѣ́етъ свидѣ́тельство гдⷭ҇не, прⷣте́че: показа́лъ бо сѧ є҆сѝ вои́стиннꙋ и҆ прⷪ҇ро́кѡвъ чⷭ҇тнѣ́йшїй, ꙗ҆́кѡ и҆ въ стрꙋѧ́хъ крⷭ҇ти́ти сподо́билсѧ є҆сѝ проповѣ́даннаго. тѣ́мже за и҆́стинꙋ пострада́въ ра́дꙋѧсѧ, бл҃говѣсти́лъ є҆сѝ и҆ сꙋ́щымъ во а҆́дѣ, бг҃а ꙗ҆́вльшагосѧ пло́тїю, взе́млющаго грѣ́хъ мі́ра, и҆ подаю́щаго на́мъ ве́лїю млⷭ҇ть.

Канѡ́нъ прⷣте́чи і҆ѡа́ннꙋ, є҆гѡ́же краестро́чїе: Крⷭ҇ти́телю, сїю̀ мл҃твꙋ прїимѝ. Творе́нїе і҆ѡ́сифово. Гла́съ в҃.

Пѣ́снь а҃.

І҆рмо́съ: Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла: вопло́щшеесѧ же сло́во всеѕло́бный грѣ́хъ потреби́ло є҆́сть, препросла́вленный гдⷭ҇ь, сла́внѡ бо просла́висѧ.

Припѣ́въ: Ст҃ы́й вели́кїй і҆ѡа́нне прⷣте́че гдⷭ҇ень, молѝ бг҃а ѡ҆ на́съ.

Крⷭ҇ти́телю и҆ прⷣте́че хрⷭ҇то́въ, погрꙋжа́емый всегда̀ сластьмѝ тѣле́сными ᲂу҆́мъ мо́й ᲂу҆пра́ви, и҆ во́лны страсте́й ᲂу҆кротѝ, ꙗ҆́кѡ да въ тишинѣ̀ бж҃е́ственнѣй бы́въ пѣсносло́влю тѧ̀.

Недоꙋмѣ́ннымъ просвѣти́всѧ просвѣще́нїемъ, ꙗ҆́кѡ многосвѣ́тлаѧ ѕвѣзда̀, мы́сленномꙋ восто́кꙋ предте́клъ є҆сѝ: и҆́мже ѡ҆зари́тисѧ се́рдцꙋ моемꙋ̀, крⷭ҇ти́телю молѝ, ѡ҆мраче́нномꙋ всѣ́ми бѣсо́вскими преложе́нїи.

Въ рѣцѣ̀ бе́зднꙋ и҆ногда̀ всемꙋ́дре погрꙋзи́лъ є҆сѝ, пото́пъ содѣва́ющꙋю бл҃года́тїю, всегѡ̀ престꙋпле́нїѧ: но молю́сѧ, пото́ки бл҃же́нне мои́хъ прегрѣше́нїй и҆зсꙋшѝ, бж҃е́ственнымъ хода́тайствомъ твои́мъ.

Бг҃оро́диченъ: Чⷭ҇тыѧ дв҃ы бг҃а воплоти́вшїѧ сро́дникъ бы́лъ є҆сѝ бл҃же́нне прⷣте́че, съ не́юже тѧ̀ чти́мъ и҆ мо́лимъ, и҆̀же въ бж҃е́ственнѣмъ хра́мѣ твое́мъ ны́нѣ живꙋ́ще, хра́мы и҆ на́съ сотворѝ дх҃а ст҃а́гѡ.

Пѣ́снь г҃.

І҆рмо́съ: На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́ бо сѧ дꙋ́хъ мо́й, внегда̀ пѣ́ти: нѣ́сть ст҃ъ, ꙗ҆́коже бг҃ъ на́шъ, и҆ нѣ́сть првⷣнъ, па́че тебѐ гдⷭ҇и.

И҆сцѣлѝ стрꙋ́пы дꙋшѝ моеѧ̀, ᲂу҆́мъ мо́й ѡ҆мраче́нный небреже́нїемъ, ѡ҆зарѝ бж҃е́ственнымъ твои́мъ хода́тайствомъ гдⷭ҇ень прⷣте́че: и҆ всѧ́кагѡ и҆зба́ви мѧ̀ сопроти́внагѡ ѡ҆бстоѧ́нїѧ, молю́сѧ.

Непло́дствїе разрѣши́лъ є҆сѝ ро́ждшїѧ, роди́всѧ бж҃їимъ промышле́нїемъ премꙋ́дре прⷪ҇ро́че: непло́дное ᲂу҆́бѡ се́рдце моѐ плодоно́сно ны́нѣ содѣ́лай гдⷭ҇ень прⷣте́че хода́тайствомъ твои́мъ, добродѣ́телей приноси́ти прозѧбє́нїѧ.

И҆́же любо́вїю твое́ю созида́ющаго бж҃е́ственный до́мъ, вы́шнѧгѡ житїѧ̀ ᲂу҆лꙋчи́ти молѝ, вѣ́рою хра́мꙋ твоемꙋ̀ слꙋжа́щыѧ, хра́мы дх҃а бж҃е́ственнагѡ сотворѝ, крⷭ҇ти́телю и҆ прⷣте́че, хода́тайствы твои́ми.

Бг҃оро́диченъ: Веселѧ́шесѧ прⷣте́ча въ ложесна́хъ носи́мь мт҃рнихъ, и҆ покланѧ́шесѧ гдⷭ҇ꙋ носи́мꙋ въ ложесна́хъ твои́хъ бг҃обл҃года́тнаѧ, є҆го́же молѝ ѿ всѧ́кїѧ ско́рби и҆зба́вити мѧ̀.

Сѣда́ленъ, гла́съ в҃. Подо́бенъ: Бл҃гоꙋтро́бїѧ сꙋ́щи: Бл҃гоꙋтро́бїѧ ра́ди млⷭ҇ти бл҃же, сп҃стѝ твоѐ созда́нїе хрⷭ҇тѐ прише́лъ є҆сѝ, прекло́нь нб҃са̀ схожде́нїемъ твои́мъ. тѣ́мже, стра́шное смотре́нїе твоѐ пою́ще, вопїе́мъ тѝ: мольба́ми прⷣте́чи твоегѡ̀, ѡ҆чище́нїе грѣхѡ́въ пода́ждь на́мъ, ꙗ҆́кѡ є҆ди́нъ бл҃гоꙋтро́бенъ.

Сла́ва, и҆ ны́нѣ, бг҃оро́диченъ:

Предста́тельнице те́плаѧ хрⷭ҇тїа́нѡмъ, сн҃ꙋ твоемꙋ̀ моли́сѧ при́снѡ бцⷣе, всѧ́кагѡ ѕлодѣ́йства и҆ ѡ҆горче́нїѧ и҆зба́вити на́съ борца̀, и҆ да́ти на́мъ проще́нїе, въ ни́хже согрѣши́хомъ, за млⷭ҇рдїе щедро́тъ, твои́ми мл҃твами мт҃и дв҃о.

Пѣ́снь д҃.

І҆рмо́съ: Прише́лъ є҆сѝ ѿ дв҃ы не хода́тай, ни а҆́гг҃лъ, но са́мъ гдⷭ҇и вопло́щьсѧ, и҆ спа́слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й гдⷭ҇и.

Прекло́ньшемꙋ нб҃са̀, и҆ человѣ́кѡмъ бесѣ́довавшꙋ, главꙋ̀ преклони́лъ є҆сѝ, десни́цею твое́ю пребога́те: є҆́юже мѧ̀ соблюдѝ, во смире́нїи сохранѧ́ѧ се́рдце моѐ.

Пꙋсты́нѧ тебѐ граждани́на непрохо́днаѧ и҆мѧ́ше, бл҃же́нне прⷣте́че. тѣ́мже вопїю́ ти: пꙋ́стꙋ всѧ́кагѡ бж҃е́ственнагѡ дѣѧ́нїѧ бы́вшꙋ, дꙋ́шꙋ мою̀ снабдѝ.

Зако́нъ бж҃е́ственный ᲂу҆правлѧ́ѧ, беззако́ннѡ закла́нъ бы́лъ є҆сѝ. тѣ́мже молю́сѧ тебѣ̀, беззако́ннꙋюща мѧ̀ всегда̀, и҆ прельща́ема бѣсо́вскими прельще́ньми и҆спра́ви.

Созда́въ са́мъ себѐ хра́мъ влⷣцѣ цр҃ю̀, къ бж҃е́ствєннымъ селе́нїємъ ны́нѣ преше́лъ є҆сѝ прⷣте́че: и҆́хже полꙋчи́ти молѝ тебѣ̀ прест҃ы́й до́мъ воздви́гшаго.

Бг҃оро́диченъ: При́зри на мѧ̀ недꙋ́гꙋющаго всенепоро́чнаѧ, и҆ разрѣшѝ стра̑сти моѧ̑ лю̑тыѧ, и҆ неꙋдо́бь и҆сцѣ̑льныѧ: ꙗ҆́кѡ да велича́ю тѧ̀, возвели́чившꙋю всѐ человѣ́чество.

Пѣ́снь є҃.

І҆рмо́съ: Просвѣще́нїе во тьмѣ̀ лежа́щихъ, сп҃се́нїе ѿча́ѧнныхъ, хрⷭ҇тѐ сп҃се мо́й, къ тебѣ̀ ᲂу҆́тренюю цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо ра́звѣ тебѐ бг҃а не зна́ю.

Въ тече́нїихъ і҆ѻрда́нскихъ, стрꙋю̀ нетлѣ́нїѧ прⷣте́че, крⷭ҇ти́въ хрⷭ҇та̀, молѝ и҆стека̑нїѧ страсте́й мои́хъ и҆зсꙋши́ти, и҆ пото́ки сла́дѡстныѧ наслѣ́довати, и҆ првⷣныхъ кра́снагѡ ра́дованїѧ.

Оу҆жѐ рыда́ю и҆ содрога́юсѧ, стра́хомъ и҆ недоꙋмѣ́нїемъ всегда̀ содержи́мь є҆́смь, помышлѧ́ѧ моѧ̑ содѣ̑ѧннаѧ, и҆ бꙋ́дꙋщїй сꙋ́дъ ᲂу҆жа́сный. бл҃гоꙋтро́бне гдⷭ҇и, пощади́ мѧ, твоегѡ̀ крⷭ҇ти́телѧ мольба́ми.

Законополага́ѧй лю́демъ сп҃се́нїе въ раска́ѧнїи, прⷣте́че, прегрѣше́нїй бы́вшее, посредѣ̀ зако́на и҆ бл҃года́ти ста́лъ є҆сѝ. сегѡ̀ ра́ди мо́лимъ тѧ̀, ѡ҆бразмѝ покаѧ́нїѧ на́съ просвѣтѝ.

Да́ждь мѝ вре́мѧ покаѧ́нїѧ, ᲂу҆ны́ннѡ преше́дшее, всѐ и҆жди́вшемꙋ, бл҃годѣ́телю, и҆мѣ́ѧ на сїѐ молѧ́щаго тѧ̀, сло́ве, і҆ѡа́нна вели́каго прⷣте́чꙋ, и҆ покаѧ́нїю всемі́рнаго проповѣ́дника.

Бг҃оро́диченъ: Навѣ́ты и҆ ловлє́нїи льсти́вагѡ ᲂу҆мертви́хсѧ, влⷣчце всенепоро́чнаѧ ѡ҆живи́ мѧ, ꙗ҆́же ро́ждшаѧ живо́тъ всѣ́хъ бцⷣе ѵ҆поста́сный, да тѧ̀ пою̀ бл҃гоче́стнѡ всенепоро́чнꙋю.

Пѣ́снь ѕ҃.

І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю млⷭ҇рдїѧ твоегѡ̀ призыва́ю бе́зднꙋ: ѿ тлѝ бж҃е мѧ̀ возведѝ.

Гла́съ сло́ва проповѣ́давый, всѣ́хъ гла́сы воспрїе́мъ, просѝ грѣхѡ́въ проще́нїе дарова́ти, и҆̀же вѣ́рою пою́щымъ тѧ̀.

Сокрꙋше́нїе дꙋшѝ моеѧ̀ и҆сцѣлѝ, и҆ грѣхѡ́въ бре́мѧ разрѣшѝ, и҆ па́че наде́жди сп҃си́ мѧ, мл҃твами твои́ми бл҃же́нне прⷣте́че.

І҆и҃са, є҆го́же рꙋко́ю твое́ю крⷭ҇ти́лъ є҆сѝ прⷣте́че, молѝ, рꙋки́ мѧ и҆зба́вити грѣха̀, взима́юща къ немꙋ̀ рꙋ́цѣ при́снѡ всесла́вне.

Бг҃оро́диченъ: Дрема́нїемъ лѣ́ностнымъ ѡ҆держи́мь є҆́смь, со́нъ грѣхо́вный тѧготи́тъ се́рдце моѐ: твои́мъ пречⷭ҇таѧ, бдѣ́ннымъ хода́тайствомъ воздви́гни и҆ сп҃си́ мѧ.

Конда́къ, гла́съ г҃.

Подо́бенъ: Дв҃а дне́сь:

Пре́жде непло́ды дне́сь хрⷭ҇то́ва прⷣте́чꙋ ражда́етъ, и҆ то́й є҆́сть и҆сполне́нїе всѧ́кагѡ проро́чества: є҆го́же бо прⷪ҇ро́цы проповѣ́даша, на сего̀ во і҆ѻрда́нѣ рꙋ́кꙋ положи́въ, ꙗ҆ви́сѧ бж҃їѧ сло́ва прⷪ҇ро́къ и҆ проповѣ́дникъ, вкꙋ́пѣ и҆ прⷣте́ча.

І҆́косъ: Восхва́лимъ ны́нѣ гдⷭ҇нѧ прⷣте́чꙋ, є҆го́же сщ҃е́нникꙋ є҆лїсаве́тъ родѝ, и҆з̾ ложе́снъ непло́дныхъ, но не без̾ сѣ́мене: хрⷭ҇то́съ бо є҆ди́нъ вмѣсти́лище про́йде непроходи́мо без̾ сѣ́мене. і҆ѡа́нна непло́ды родѝ, без̾ мꙋ́жа же сего̀ не родѝ: і҆и҃са же, ѡ҆сѣне́нїемъ ѻ҆ц҃а̀ и҆ дх҃а бж҃їѧ, дв҃а родѝ чⷭ҇таѧ. но безсѣ́менномꙋ ꙗ҆ви́сѧ ѿ непло́дове прⷪ҇ро́къ и҆ проповѣ́дникъ, вкꙋ́пѣ и҆ прⷣте́ча.

Пѣ́снь з҃.

І҆рмо́съ: Бг҃опроти́вное велѣ́нїе беззако́ннꙋющагѡ мꙋчи́телѧ, высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ.

И҆з̾ ко́рене сѣки́рою твоегѡ̀ покаѧ́нїѧ и҆сто́ргъ ꙗ҆́звы стра́стнагѡ се́рдца моегѡ̀, всадѝ прⷣте́че бж҃е́ственное безстра́стїе, и҆ стра́хъ чⷭ҇тѣ́йшїй бж҃їй, всѧ́кїѧ ѕло́бы ѿчꙋжда́ющїй мѧ̀.

Во стрꙋѧ́хъ і҆ѻрда́нскихъ ꙗ҆́кѡ крⷭ҇ти́лъ є҆сѝ покрыва́ющаго вода́ми превы́спрєннѧѧ гдⷭ҇а, того̀ молѝ, во́дꙋ дарова́ти бж҃е́ственнагѡ ᲂу҆миле́нїѧ при́снѡ ѻ҆чи́ма мои́ма, сла́вный прⷣте́че.

И҆́же мі́рꙋ взе́млющаго грѣ́хъ, а҆́гнца бж҃їѧ прⷣте́че проповѣ́давъ, того̀ молѝ ѿ ко́злищъ ча́сти ꙗ҆ви́ти мѧ̀ чꙋ́жда, и҆ десны̑мъ є҆гѡ̀ ѻ҆вца́мъ и҆ менѐ сочета́ти, сла́вне.

Бг҃оро́диченъ: Непло́днаѧ ᲂу҆тро́ба носѧ́ше тѧ̀ дв҃о, во чре́вѣ носи́вшꙋю сло́во воплоще́нно: є҆го́же бж҃е́ственными взыгра́нїи, вели́кїй прⷣте́ча, непло́дныѧ всест҃ы́й пло́дъ, позна̀ ра́дꙋѧсѧ, и҆ поклони́сѧ.

Пѣ́снь и҃.

І҆рмо́съ: Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ: вѣ̑рныѧ же ѡ҆роша́ющаѧ, пою́щыѧ: бл҃гослови́те всѧ̑ дѣла̀ гдⷭ҇нѧ гдⷭ҇а.

Да́ждь десни́цꙋ мнѣ̀ на землѝ лежа́щемꙋ, прⷣте́че, и҆́же десни́цꙋ просте́ръ, и҆ ѡ҆мы́лъ є҆сѝ вода́ми нескве́рнаго: и҆ и҆зба́ви мѧ̀ скве́рны тѣле́сныѧ, всего́ мѧ ѡ҆чища́ѧ покаѧ́нїемъ, и҆ сп҃си́ мѧ.

И҆мꙋ́щи дꙋшѐ вре́мѧ пока́ѧтисѧ, лѣ́ности тѧжча́йшїй со́нъ ѿтрѧсѝ, и҆ спѣ́шнѡ побдѝ, вопїю́щи влⷣцѣ твоемꙋ̀: млⷭ҇рде, ᲂу҆ще́дри мѧ̀ крⷭ҇ти́телѧ твоегѡ̀ мольба́ми.

Пото́цы страсте́й, и҆ во́ды ѕло́бы до дꙋшѝ моеѧ̀ внидо́ша: бл҃же́нне прⷣте́че, потщи́сѧ ско́рѡ и҆з̾ѧ́ти мѧ̀, и҆́же рѣчны́ми стрꙋѧ́ми и҆змы́въ безстра́стїѧ тиша́йшꙋю пꙋчи́нꙋ.

Оу҆вы̀ мнѣ̀, мнѡ́га ѕла̑ сотво́ршемꙋ! ᲂу҆вы̀ мнѣ̀ є҆ди́номꙋ, прогнѣ́вавшемꙋ бг҃а пребл҃га́го! крⷭ҇ти́телю хрⷭ҇то́въ помозѝ мѝ, и҆ пода́ждь прегрѣше́нїй мои́хъ разрѣше́нїе, и҆ долгѡ́въ мои́хъ ѿсѣче́нїе, хода́тайствы твои́ми.

Бг҃оро́диченъ: Вы́шнѧго бг҃а пло́тїю ро́ждшаѧ, ѿ гно́ѧ мѧ̀ возста́ви страсте́й ѡ҆скорблѧ́ющихъ мѧ̀: и҆ лю́тѣ всего̀ ѡ҆бнища́вша, бж҃е́ственными ѡ҆богатѝ пречⷭ҇таѧ, добродѣ́тельми, ꙗ҆́кѡ да воспою́ тѧ сп҃са́емь.

Пѣ́снь ѳ҃.

І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щьсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.

Ка́ла мѧ̀ и҆зба́ви грѣхо́внагѡ гдⷭ҇и, безгрѣ́шне є҆ди́не и҆ многомлⷭ҇тиве, крⷭ҇ти́телѧ мольба́ми, и҆́же тебѐ проповѣ́да всемꙋ̀ мі́рꙋ а҆́гнца бж҃їѧ, взе́млющаго человѣ́кѡвъ грѣхѝ.

Ꙗ҆́кѡ ши́покъ бл҃гово́ненъ, ꙗ҆́кѡ бл҃гоꙋха́нный кѷпарі́съ, ꙗ҆́кѡ неꙋвѧда́емый крі́нъ, ꙗ҆́кѡ мѵ́ро че́стно и҆мѣ́ѧй тѧ̀ гдⷭ҇ень прⷣте́че, мои́хъ дѣ́лъ ѕлосмра́дїѧ и҆збавлѧ́юсѧ мл҃твами твои́ми, притека́ѧ къ покро́вꙋ твоемꙋ̀.

Непло́дствовати мѧ̀ непло́дными дѣ́лы всебл҃же́нне сотворѝ, добродѣ́телей бл҃гопло́дїе при́снѡ приносѧ́ща, ча́до мѧ̀ гдⷭ҇не творѧ̀, и҆ прича́стника бж҃е́ственномꙋ црⷭ҇твїю, и҆ ст҃ы́хъ собо́рꙋ кꙋпножи́телѧ.

На́мъ лю́бѧщымъ тѧ̀, и҆ любо́вїю почита́ющымъ, и҆ въ бж҃е́ственнѣмъ хра́мѣ твое́мъ ликꙋ́ющымъ, да́ждь съ нб҃сѐ разрѣше́нїе лю́тыхъ, прⷣте́че гдⷭ҇ень, и҆ житїѧ̀ и҆справле́нїе, и҆ прегрѣше́нїй и҆збавле́нїе.

Бг҃оро́диченъ: Носи́мꙋ во ᲂу҆тро́бѣ бг҃омт҃рни, и҆́же всѧ̑ носѧ́щемꙋ ма́нїемъ, поклони́лсѧ є҆сѝ прⷪ҇ро́че: съ не́юже молѝ смире́ннѣй сп҃сти́сѧ дꙋшѝ мое́й, во мнѡ́гаѧ впа́дающей по всѧ̑ дни̑ согрѣшє́нїѧ.

Гла́съ в҃.

Подо́бенъ: Є҆гда̀ ѿ дре́ва:

Всѣ̑мъ предста́тельствꙋеши бл҃га́ѧ, прибѣга́ющымъ съ вѣ́рою въ держа́вный тво́й покро́въ: и҆но́гѡ бо не и҆́мамы грѣ́шнїи къ бг҃ꙋ въ бѣ́дахъ и҆ ско́рбехъ при́снѡ и҆збавле́нїѧ, ѡ҆бремене́ни грѣхѝ мно́гими, мт҃и бг҃а вы́шнѧгѡ. тѣ́мже тѝ припа́даемъ, и҆зба́ви ѿ всѧ́кагѡ ѡ҆бстоѧ́нїѧ рабы̑ твоѧ̑.

Всѣ́хъ скорбѧ́щихъ ра́досте, и҆ ѡ҆би́димыхъ застꙋ́пнице, и҆ а҆́лчꙋщихъ пита́тельнице, стра́нныхъ ᲂу҆тѣше́нїе, ѡ҆бꙋрева́емыхъ приста́нище, больны́хъ посѣще́нїе, немощны́хъ покро́въ и҆ застꙋ́пнице, же́злъ ста́рости, мт҃и бг҃а вы́шнѧгѡ, ты̀ є҆сѝ пречⷭ҇таѧ: потщи́сѧ мо́лимсѧ сп҃сти́сѧ рабѡ́мъ твои̑мъ.

Ра́дꙋйсѧ пречⷭ҇таѧ дв҃о. ра́дꙋйсѧ чⷭ҇тны́й ски́птре цр҃ѧ̀ хрⷭ҇та̀. ра́дꙋйсѧ прозѧ́бшаѧ гро́здъ та́йный. ра́дꙋйсѧ две́ре нбⷭ҇наѧ, и҆ неѡпали́маѧ кꙋпино̀. ра́дꙋйсѧ всемі́рный свѣ́те. ра́дꙋйсѧ всѣ́хъ ра́досте. ра́дꙋйсѧ вѣ́рныхъ сп҃се́нїе. ра́дꙋйсѧ застꙋ́пнице всѣ́хъ хрⷭ҇тїа́нъ, и҆ прибѣ́жище влⷣчце.

Сла́ва, и҆ ны́нѣ, гла́съ и҃:

Ра́дꙋйсѧ вселе́нныѧ похвало̀. ра́дꙋйсѧ хра́ме гдⷭ҇ень. ра́дꙋйсѧ горо̀ прїѡсѣне́ннаѧ. ра́дꙋйсѧ всѣ́хъ прибѣ́жище. ра́дꙋйсѧ свѣ́щниче златы́й. ра́дꙋйсѧ сла́во правосла́вныхъ чⷭ҇тна́ѧ. ра́дꙋйсѧ мр҃і́е, мт҃и хрⷭ҇та̀ бг҃а. ра́дꙋйсѧ раю̀. ра́дꙋйсѧ бж҃е́ственнаѧ трапе́зо. ра́дꙋйсѧ сѣ́не. ра́дꙋйсѧ рꙋ́чко всезлата́ѧ. ра́дꙋйсѧ всѣ́хъ ᲂу҆пова́нїе.

Тропа́рь, гла́съ д҃:

Къ бцⷣѣ прилѣ́жнѡ ны́нѣ притеце́мъ, грѣ́шнїи и҆ смире́ннїи, и҆ припаде́мъ, въ покаѧ́нїи зовꙋ́ще и҆з̾ глꙋбины̀ дꙋшѝ: влⷣчце помозѝ, на ны̀ милосе́довавши. потщи́сѧ погиба́емъ ѿ мно́жества прегрѣше́нїй: не ѿвратѝ твоѧ̑ рабы̑ тщы̀, тѧ́ бо и҆ є҆ди́нꙋ наде́ждꙋ и҆́мамы.

Дрꙋгі́й. Сла́ва, и҆ ны́нѣ:

Не ᲂу҆молчи́мъ никогда̀ бцⷣе, си̑лы твоѧ̑ глаго́лати недосто́йнїи. а҆́ще бо ты̀ не бы̀ предстоѧ́ла молѧ́щи, кто́ бы на́съ и҆зба́вилъ ѿ толи́кихъ бѣ́дъ; кто́ же бы сохрани́лъ до ны́нѣ свобо́дны; не ѿстꙋ́пимъ влⷣчце ѿ тебѐ: твоѧ̑ бо рабы̑ сп҃са́еши при́снѡ ѿ всѧ́кихъ лю́тыхъ.

Канѡ́нъ моле́бный прест҃ѣ́й бцⷣѣ

Творе́нїе сщ҃енномона́ха і҆гна́тїѧ. Гла́съ д҃.

Пѣ́снь а҃.

І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.

Ра́достнѡ чⷭ҇таѧ, ны́нѣ наста́вшее хвале́нїе приноша́ю ра́дꙋѧсѧ, и҆ ти́химъ гла́сомъ ѻ҆диги́трїе вопїю́ ти: ра́дꙋйсѧ, и҆ и҆спо́лни мѧ̀ ра́зꙋма, пѣ́ти начина́юща.

Хрⷭ҇та̀ роди́вшаѧ, ра́дость на́мъ вѣ́чнꙋю, ѽ ра́дꙋйсѧ всепѣ́таѧ, правосла́вныхъ наде́ждо, ѻ҆диги́трїе всепѣ́таѧ дв҃и́це! ра́дости и҆спо́лни мѧ̀ мі́рови жела́нныѧ.

Сла́ва: Ликꙋ́ютъ всѝ человѣ́цы, и҆ а҆́гг҃ли всегда̀ согла́снѡ вопїю́ще на нб҃сѝ и҆ на землѝ, ѻ҆диги́трїе: ра́дꙋйсѧ, дв҃и́це, ра́дости бо ржⷭ҇тво́мъ твои́мъ всѧ́чєскаѧ и҆спо́лнила є҆сѝ.

И҆ ны́нѣ: Ра́дость ѻ҆диги́трїе, со стра́хомъ тѝ вопїю́щихъ ра́дости сподо́би, мт҃и сꙋ́щїѧ ра́дости, и҆збавлѧ́ющи скорбе́й всѧ́ческихъ, и҆ всѣ́хъ поми́лꙋй къ тебѣ̀ прибѣга́ющихъ.

Пѣ́снь г҃:

І҆рмо́съ: Твоѧ̑ пѣсносло́вцы бцⷣе, живы́й и҆ незави́стный и҆сто́чниче, ли́къ себѣ̀ совкꙋ́пльшыѧ дх҃о́внѡ ᲂу҆твердѝ, въ бж҃е́ственнѣй твое́й сла́вѣ, вѣнцє́въ сла́вы сподо́би.

Хрⷭ҇та̀ вы́шнѧгѡ цр҃ѧ̀, ѽ ра́дꙋйсѧ непоколеби́маѧ чⷭ҇таѧ, и҆ ѡ҆дꙋшевле́ннаѧ пала́то! ра́дꙋйсѧ, ѻ҆диги́трїе, ра́дꙋйсѧ, тобо́ю нерꙋши́мъ на́шъ гра́дъ сохранѧ́етсѧ.

Вмѣсти́ти є҆го́же не возмо́же тва́рь, во ᲂу҆тро́бꙋ неискꙋсобра́чнꙋю, ѻ҆диги́трїе дв҃и́це, тѣле́снѡ вмѣсти́ла є҆сѝ. тѣ́мже тѝ ра́дꙋйсѧ пое́мъ, по до́лгꙋ велича́юще.

Сла́ва: Ра́дость многопѣ́таѧ мі́рови, ра́достнѡ тѝ пою́ще при́снѡ, вѣ́чнꙋющїѧ чⷭ҇таѧ ра́дости сподоблѧ́емсѧ, твои́ми мт҃рними мл҃твами, къ ро́ждшемꙋсѧ и҆з̾ тебѐ, ѻ҆диги́трїе.

И҆ ны́нѣ: Златꙋ́ю тѧ̀ ста́мнꙋ, и҆ свѣ́щникъ, и҆ же́злъ, и҆ трапе́зꙋ чⷭ҇таѧ, призыва́емъ ѻ҆диги́трїе, и҆ гла́съ, є҆́же ра́дꙋйсѧ, тебѣ̀ при́снѡ приноша́емъ, съ си́ми же и҆мены̀.

Сѣда́ленъ, гла́съ в҃:

Моле́нїе те́плое, и҆ стѣна̀ неѡбори́маѧ, млⷭ҇ти и҆сто́чниче, мі́рови прибѣ́жище, прилѣ́жнѡ вопїе́мъ тѝ: бцⷣе влⷣчце предварѝ, и҆ ѿ бѣ́дъ и҆зба́ви на́съ, є҆ди́на вско́рѣ предста́тельствꙋющаѧ.

Пѣ́снь д҃.

І҆рмо́съ: Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ, прїи́де і҆и҃съ пребжⷭ҇твенный, нетлѣ́нною дла́нїю, и҆ сп҃сѐ зовꙋ́щїѧ: сла́ва си́лѣ твое́й.

Ра́дꙋйсѧ, чꙋ́до чꙋде́съ, ѻ҆диги́трїе влⷣчце, ра́дꙋйсѧ всѣ́хъ ра́досте, градѡ́въ и҆ ве́сей непобѣди́мое хрⷭ҇тїа́нское въ бѣда́хъ храни́лище, и҆ предгра́дїе, и҆ на врагѝ побѣжде́нїе.

Ра́дꙋйсѧ, ра́дꙋйсѧ люде́й правосла́вныхъ похвало̀, и҆ хрⷭ҇толюби́выхъ во́инствъ покро́въ пребыва́еши всѣ́хъ цр҃и́це. ра́дꙋйсѧ ѻ҆диги́трїе, прибѣ́жище всѣ́хъ на́съ и҆ ᲂу҆твержде́нїе.

Сла́ва: Ра́дꙋйсѧ всѣ́хъ ско́рое въ бѣда́хъ и҆збавле́нїе. ра́дꙋйсѧ гото́вое всѣ́хъ скорбѧ́щихъ ᲂу҆тѣше́нїе. ра́дꙋйсѧ ѻ҆диги́трїе всебл҃гослове́ннаѧ, всѣ́хъ немощны́хъ и҆сцѣли́тельнице.

И҆ ны́нѣ: Ра́дꙋйсѧ, є҆ѧ́же вели̑чїѧ всѧ̀ тва́рь сла́вити ᲂу҆́бѡ спѣши́тъ по достоѧ́нїю,не не возмога́етъ, ѻ҆диги́трїе, и҆ сегѡ̀ ра́ди зове́тъ тѝ: ра́дꙋйсѧ влⷣчце бг҃овмѣсти́мое жили́ще.

Пѣ́снь є҃.

І҆рмо́съ: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

Бл҃госты́ни бе́здно и҆ щедро́тъ є҆сѝ, ра́дꙋйсѧ ѻ҆диги́трїе дв҃и́це. ра́дꙋйсѧ всѣ̑мъ ра́дость творѧ́щи вѣ̑рнымъ, ѽ ра́дꙋйсѧ, сꙋ́щихъ въ бѣ́дахъ и҆ скорбѧ́щихъ пребы́страѧ застꙋ́пнице!

Ра́дости ѿ и҆сполне́нїѧ, вели̑чїѧ чꙋде́съ твои́хъ зрѧ́ще, и҆сполнѧ́емсѧ всѝ не зрѧ́щїи, слы́шаще же вѣ́рнїи. тѣ́мже ра́дꙋйсѧ, тебѣ̀ при́снѡ всю́дꙋ и҆ всѝ ѻ҆диги́трїе пое́мъ.

Сла́ва: Хрⷭ҇та̀ бг҃а на́шегѡ, ѽ ра́дꙋйсѧ ѻ҆диги́трїе, жили́ще и҆ сла́вы є҆гѡ̀! Ѽ ра́дꙋйсѧ пала́то преꙋкраше́ннаѧ, ра́дꙋйсѧ гра́де ѡ҆дꙋшевле́нный, при́снѡ ца́рствꙋющїй.

И҆ ны́нѣ: Ра́дость неѡскꙋ́днꙋю тѧ̀ разсмотрѧ́юще, ꙗ҆́кѡ мо́ре ѻ҆трокови́це, ѻ҆диги́трїе дв҃и́це, ра́дꙋющесѧ всѝ, ра́дꙋйсѧ, вопїе́мъ тѝ, и҆ пою́ще, бж҃е́ственныхъ дарѡ́въ неви́димѡ при́снѡ ѿ тебѐ ѡ҆жида́юще.

Пѣ́снь ѕ҃.

І҆рмо́съ: Бжⷭ҇твенное сїѐ и҆ всечⷭ҇тно́е соверша́юще пра́зднество бг҃омꙋ́дрїи, бг҃омт҃ре, прїиди́те рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

Хрⷭ҇та̀ чⷭ҇таѧ прїе́млющи, гла́съ є҆́же ра́дꙋйсѧ ѻ҆диги́трїе дв҃и́це слы́шала є҆сѝ, є҆го́же неизрече́ннѡ ро́ждши, ра́дꙋйсѧ, ѿ всѣ́хъ слы́шиши всегда̀.

Ра́дости всѧ̑ и҆спо́лнила є҆сѝ, вы̑шнїѧ и҆ ни̑жнїѧ ты̀ совокꙋпи́ла є҆сѝ ѻ҆диги́трїе, тѣ́мже ра́достнѡ и҆ согла́снѡ ны́нѣ, нб҃о и҆ землѧ̀ зове́тъ тѝ.

Сла́ва: Вдѡ́въ, ѽ ра́дꙋйсѧ всепѣ́таѧ, и҆ всѣ́хъ си́рыхъ ѻ҆диги́трїе ᲂу҆тѣше́нїе! ра́дꙋйсѧ, всѣ̑мъ и҆сточа́ющи ни́щымъ бога́тство неистощи́мое.

И҆ ны́нѣ: Зла́та всѧ́кагѡ блиста́ема, и҆ ᲂу҆́тра со́лнечнагѡ свѣтлѣ́йши, жили́ще хрⷭ҇то́во, ра́дꙋйсѧ ѻ҆диги́трїе, ра́дꙋйсѧ дв҃и́це, ра́дꙋйсѧ невѣ́сто неневѣ́стнаѧ.

Конда́къ, гла́съ ѕ҃.

Не и҆́мамы и҆ны́ѧ по́мощи, не и҆́мамы и҆ны́ѧ наде́жды, ра́звѣ тебѐ влⷣчце, ты̀ на́мъ помозѝ, на тебѐ надѣ́емсѧ, и҆ тобо́ю хва́лимсѧ: твои́ бо є҆смы̀ рабѝ, да не постыди́мсѧ.

Дрꙋгі́й конда́къ, гла́съ то́йже.

Предста́тельство хрⷭ҇тїа́нъ непосты́дное, хода́тайство ко творцꙋ̀ непрело́жное, не пре́зри грѣ́шныхъ моле́нїй гла́сы, но предварѝ ꙗ҆́кѡ бл҃га́ѧ на по́мощь на́съ, вѣ́рнѡ зовꙋ́щихъ тѝ: ᲂу҆скорѝ на мл҃твꙋ и҆ потщи́сѧ на ᲂу҆моле́нїе, предста́тельствꙋющи при́снѡ бцⷣе чтꙋ́щихъ тѧ̀.

І҆́косъ: Прострѝ дла̑ни твоѧ̑, и҆́мже всѣ́хъ влⷣкꙋ ꙗ҆́кѡ младе́нца прїѧ́ла є҆сѝ, за мно́жество бл҃гости, не ѡ҆ста́ви на́съ всегда̀ надѣ́ющихсѧ на тѧ̀. бо́дренною твое́ю мл҃твою, и҆ неизче́тною просты́нею ᲂу҆ще́дри на́съ, и҆ пода́ждь дꙋша́мъ на́шимъ млⷭ҇рдїе твоѐ, во вѣ́ки и҆сточа́ющи: тебе́ бо и҆́мамы грѣ́шнїи застꙋ́пницꙋ, ѿ находѧ́щихъ на ны̀ бѣ́дъ и҆ ѕѡ́лъ. но ꙗ҆́кѡ и҆мꙋ́щи млⷭ҇рдїѧ щедрѡ́ты, ᲂу҆скорѝ на мл҃твꙋ, и҆ потщи́сѧ на ᲂу҆моле́нїе, предста́тельствꙋющи при́снѡ бцⷣе чтꙋ́щихъ тѧ̀.

Стїхи́ра, гла́съ ѕ҃:

Не ввѣ́ри мѧ̀ человѣ́ческомꙋ предста́тельствꙋ, прест҃а́ѧ влⷣчце, но прїимѝ моле́нїе раба̀ твоегѡ̀: ско́рбь бо ѡ҆бдержи́тъ мѧ̀, терпѣ́ти не могꙋ̀ де́мѡнскагѡ стрѣлѧ́нїѧ, покро́ва не и҆́мамъ, нижѐ гдѣ̀ прибѣ́гнꙋ ѻ҆каѧ́нный, всегда̀ побѣжда́емъ, и҆ ᲂу҆тѣше́нїѧ не и҆́мамъ, ра́звѣ тебѐ, влⷣчце мі́ра, ᲂу҆пова́нїе и҆ предста́тельство вѣ́рныхъ, не пре́зри моле́нїе моѐ, поле́зно сотворѝ.

Пѣ́снь з҃.

І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ.

Ра́дꙋйсѧ, ра́дꙋйсѧ бцⷣе ѻ҆диги́трїе, всѣ́хъ и҆ всегда̀ наставлѧ́ющи вѣ́рныхъ, ше́ствовати ко всѧ́комꙋ пꙋтѝ сп҃си́тельномꙋ. ра́дꙋйсѧ влⷣчце, тобо́ю бо при́снѡ и҆збавлѧ́емсѧ настоѧ́щїѧ ва́рварскїѧ бѣды̀.

Ра́дꙋйсѧ, ра́дꙋйсѧ ѻ҆диги́трїе, бдѧ́щи и҆ молѧ́щисѧ ѡ҆ на́съ къ бг҃ꙋ, и҆ всѧ́кїѧ ѕло́бы хода́тайствомъ твои́мъ, всѧ́ческихъ скорбе́й бг҃ороди́тельнице, всѣ́хъ люде́й и҆збавлѧ́ющи.

Сла́ва: Ра́дꙋйсѧ, ра́дꙋйсѧ прест҃а́ѧ ѻ҆диги́трїе, ꙗ҆́же прошє́нїѧ на̑ша къ по́льзѣ на́мъ и҆сполнѧ́ющи, и҆ хотѧ́щи всѣ̑мъ при́снѡ всегда̀ любодрꙋ́жное бл҃го́е є҆ди́нство, спѣ́шное же во и҆зѧ́щныхъ.

И҆ ны́нѣ: Ра́дꙋйсѧ, ра́дꙋйсѧ кораблє́мъ ѻ҆диги́трїе, нꙋ́жднѡ пла́вающымъ, и҆збавлѧ́ющи вѣ́рныхъ и҆ всѣ̑мъ и҆збавле́нїе ѿ всѧ́кїѧ ско́рби, и҆ недꙋ́ги пестрѡ́тныѧ и҆ ме́длєнныѧ разрѣша́ющи вско́рѣ.

Пѣ́снь и҃.

І҆рмо́съ: Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо сп҃сло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Ра́дꙋйсѧ всебл҃гослове́ннаѧ мр҃і́е, и҆з̾ тебе́ бо всебл҃гослове́нный бг҃ъ ѡ҆дѣ́ѧвсѧ соединѝ своемꙋ̀ бжⷭ҇твꙋ̀,неизрече́ннымъ соедине́нїемъ дв҃о ѻ҆диги́трїе. ра́дꙋйсѧ бл҃года́тнаѧ, ра́досте всегѡ̀ мі́ра.

Ра́дꙋйсѧ лꙋка́выхъ дꙋхѡ́въ прогони́тельнице, ра́дꙋйсѧ бцⷣе ѻ҆диги́трїе. ра́дꙋйсѧ, ꙗ҆́кѡ тебѐ нбⷭ҇наѧ неви̑димаѧ вѡ́инства славосло́вѧтъ всегда̀, и҆ велича́ютъ ꙗ҆́кѡ мт҃рь бж҃їю бы́вшꙋю. ра́дꙋйсѧ, ꙗ҆́же ни̑жнѧѧ сочета́вши съ вы́шними.

Сла́ва: Ра́дꙋйсѧ, всѧ̑ нбⷭ҇ныѧ си̑лы без̾ разсꙋжде́нїѧ превосходѧ́щаѧ. ра́дꙋѧсѧ ѻ҆диги́трїе. ра́дꙋйсѧ всѧ́кїѧ тва́ри, бг҃а ро́ждшаѧ гдⷭ҇ьствꙋющи, є҆́й влⷣчце всепѣ́таѧ, ра́дꙋйсѧ, ꙗ҆́кѡ пребыва́еши дв҃ою чⷭ҇таѧ и҆ по ржⷭ҇твѣ̀.

И҆ ны́нѣ: Ра́дꙋйсѧ же́нъ всѣ́хъ сла́во, хра́ме преѡсщ҃е́нный бг҃а на́шего. ра́дꙋйсѧ, ѻ҆диги́трїе, ра́дꙋйсѧ дꙋшесп҃си́тельнаѧ все́й вселе́ннѣй. ра́дꙋйсѧ покрыва́ющїй ѻ҆́блаче, нб҃съ ши́ршаѧ. Ра́дꙋйсѧ мѷрополо́жнице бж҃е́ственнагѡ мѵ́ра полна̀.

Пѣ́снь ѳ҃.

І҆рмо́съ: Всѧ́къ земноро́дный да взыгра́етсѧ дх҃омъ просвѣща́емъ, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее торжество̀ бг҃омт҃ре, и҆ да вопїе́тъ: ра́дꙋйсѧ всебл҃же́ннаѧ, бцⷣе чⷭ҇таѧ приснодв҃о.

Ра́дꙋйсѧ свѣщѐ, свѣ́тъ невече́рнїй поне́сшаѧ, и҆ въ рождествѣ̀ твое́мъ многобо́жїѧ тьмꙋ̀ разрꙋши́вшаѧ, и҆ а҆́довы про́пасти и҆зба́вльшаѧ лю́ди. ра́дꙋйсѧ ѻ҆диги́трїе бцⷣе, добро́тъ всѣ́хъ предхода́таице.

Ра́дꙋйсѧ землѐ, и҆з̾ неѧ́же кГла́съ прозѧ́бшїй нбⷭ҇ный вѣ̑рнымъ, и҆ мі́ръ ве́сь дꙋшегꙋби́тельнагѡ гла́да и҆зба́ви, разꙋ́мнаѧ и҆ ѡ҆дꙋшевле́ннаѧ. Ѽ ра́дꙋйсѧ вїногра́дъ, ꙗ҆́же гро́здъ живо́тный ро́ждшаѧ, бцⷣе чⷭ҇таѧ ѻ҆диги́трїе.

Сла́ва: Ра́дꙋйсѧ та́йныхъ цвѣтѡ́въ прекра́сный сꙋ́щїй раю̀. ра́дꙋйсѧ мт҃и дв҃о, неви́димыхъ ра́зꙋмъ, чистото́ю страннолѣ́пнѡ побѣ́ждши бг҃ороди́тельнице. ра́дꙋйсѧ ѻ҆трокови́це. ра́дꙋйсѧ ѻ҆диги́трїе, всемі́рное чꙋ́до и҆ слы́шанїе.

И҆ ны́нѣ: Лѣ́то живота̀ на́шегѡ, про́чее сохранѝ неврежде́нно: поможе́нїемъ твои́мъ дв҃о ѻ҆трокови́це, и҆ сподо́би коне́цъ бл҃гі́й полꙋчи́ти на́мъ воспѣва́ющымъ тѧ̀ и҆ взыва́ющымъ: ра́дꙋйсѧ всеблаже́ннаѧ бцⷣе чⷭ҇таѧ, ѻ҆диги́трїе.

Мл҃тва прест҃ѣ́й гпⷭ҇жѣ̀ бцⷣѣ.

Прест҃а́ѧ влⷣчце моѧ̀ бцⷣе, ст҃ы́ми и҆ всеси́льными мольба́ми, ѿженѝ ѿ менѐ смире́ннагѡ и҆ ѡ҆каѧ́ннагѡ раба̀ твоегѡ̀ ᲂу҆ны́нїе, забве́нїе, неразꙋ́мїе, нерадѣ́нїе, и҆ всѧ̑ сквє́рнаѧ, лꙋка̑ваѧ, и҆ хꙋ̑льнаѧ помышлє́нїѧ, ѿ ѻ҆каѧ́ннагѡ моегѡ̀ се́рдца, и҆ ѿ помраче́ннагѡ ᲂу҆ма̀ моегѡ̀. И҆ погасѝ пла́мень страсте́й мои́хъ, ꙗ҆́кѡ ни́щь є҆́смь и҆ ѻ҆каѧ́ненъ. и҆ и҆зба́ви мѧ̀ ѿ мно́гихъ и҆ лю́тыхъ воспомина́нїй, и҆ предпрїѧ́тїй: и҆ ѿ всѣ́хъ дѣ́йствъ ѕлы́хъ свободи́ мѧ. Ꙗ҆́кѡ бл҃гослове́нна є҆сѝ ѿ всѣ́хъ родѡ́въ, и҆ сла́витсѧ пречⷭ҇тно́е и҆́мѧ твоѐ, во вѣ́ки вѣкѡ́въ, а҆ми́нь.

Гла́съ д҃.

Подо́бенъ: Ꙗ҆́кѡ до́блѧ:

Крѣпча́йшимъ мꙋдрова́нїемъ во́инствовавше сла́внїи, на лꙋка́ваго врага̀ ѡ҆полчи́стесѧ, всеѻрꙋ́жїемъ ѡ҆гра́ждшесѧ дꙋхо́внымъ до́бльственнѣ, и҆ всю̀ крѣ́пость бѣсо́вскꙋю погꙋби́вше, восхи́тисте дꙋ́шы человѣ́чєскїѧ, ꙗ҆́коже коры̑сти. сегѡ̀ ра́ди во вѣ́ки ва́съ почита́емъ а҆пⷭ҇ли.

Крⷭ҇тоѡбра́знѡ распросте́рши мре́жꙋ вѣ́ры, двоенадесѧ́тица бж҃е́ственныхъ а҆пⷭ҇лъ твои́хъ, всѧ̑ ꙗ҆зы́ки ᲂу҆лови́ла є҆́сть, къ твоемꙋ̀ позна́нїю хрⷭ҇тѐ, и҆ мо́рѧ сла́ное страсте́й и҆зсꙋшѝ. сегѡ̀ ра́ди тѧ̀ молю̀: и҆з̾ глꙋбины̀ прегрѣше́нїй воззови́ мѧ, тѣ́хъ всебл҃гопрїѧ́тными мольба́ми.

Двоенадесѧ́тица бг҃оизбра́ннаѧ, а҆пⷭ҇льскаѧ, и҆ всечⷭ҇тна́ѧ, да восхва́литсѧ дне́сь, бж҃е́ственными пѣ́сньми, пе́тръ, и҆ па́ѵелъ, і҆а́кѡвъ, лꙋка̀, і҆ѡа́ннъ же, и҆ матѳе́й, и҆ ѳѡма̀: ма́ркъ, сі́мѡнъ, и҆ фїлі́ппъ: и҆ пресла́вный ны́нѣ а҆ндре́й съ матѳі́емъ, и҆ бж҃е́ственнымъ и҆ премꙋ́дрымъ варѳоломе́емъ, и҆ съ про́чими седми́десѧтьми.

И҆́ны стїхи̑ры ст҃о́мꙋ нїкола́ю, гла́съ то́йже:

Мѵ́ромъ бж҃е́ственнымъ тѧ̀ пома́за бж҃е́ственнаѧ бл҃года́ть дх҃о́внаѧ, мѵ́рѧнѡмъ первопресто́льна, и҆ мѵ́ромъ ѡ҆бл҃гоꙋха́вша, добродѣ́тельми сщ҃е́ннѣйшими мі́ра концы̀: сладкоды́шꙋщими твои́ми мл҃твами, ѕлосмра̑дныѧ прогонѧ́юща стра̑сти всегда̀. сегѡ̀ ра́ди тѧ̀ вѣ́рнѡ сла́вимъ, и҆ па́мѧть твою̀ всест҃ꙋ́ю соверша́емъ нїко́лае.

Ꙗ҆́кѡ ѡ҆сїѧ́телѧ тѧ̀ незаходи́маго, и҆ ꙗ҆́кѡ свѣти́льника всемі́рна, на тве́рди возсїѧ́вша цр҃ко́внѣй нїко́лае, и҆ мі́ръ просвѣти́вша, и҆ бѣ́дъ лю́тыхъ мглꙋ̀ ѿгонѧ́юща, и҆ ѿе́млюща печа́лей зи́мꙋ, и҆ тишинꙋ̀ содѣ́лавшаго глꙋбо́кꙋю, по до́лгꙋ ᲂу҆бл҃жа́емъ.

И҆ сы́й и҆ ꙗ҆влѧ́ѧйсѧ въ со́нїихъ нїко́лае, и҆̀же непра́веднѡ и҆мꙋ́щыѧ ᲂу҆мре́ти сп҃слъ є҆сѝ, ꙗ҆́кѡ сострада́тель, ꙗ҆́кѡ бл҃голюби́вый, ꙗ҆́кѡ и҆зба́витель теплѣ́йшїй, ꙗ҆́кѡ предста́тель и҆́стинный вѣ́рныхъ, и҆ просѧ́щихъ твоегѡ̀ застꙋпле́нїѧ, сщ҃е́ннѣйшїй ѻ҆́тче, а҆́гг҃лѡвъ сограждани́не, прпⷣбныхъ и҆ прⷪ҇ро́кѡвъ равностоѧ́телю.

Сла́ва, и҆ ны́нѣ, бг҃оро́диченъ:

И҆скꙋше́нїѧ всѧ́кагѡ, и҆ ловле́нїѧ льсти́вагѡ, и҆зба́ви мѧ̀ всенепоро́чнаѧ, и҆ страсте́й стремлє́нїѧ ѡ҆бꙋзда́й, молю́сѧ: и҆ ᲂу҆ма̀ моегѡ̀ мглꙋ̀ и҆ ѡ҆мраче́нїе ѿженѝ,ᲂу҆пра́ви ко приста́нищꙋ бж҃е́ственныхъ за́повѣдей сн҃а твоегѡ̀ бг҃омт҃и, ꙗ҆́кѡ да непреста́ннѡ почита́ю тѧ̀.

Тропа́рь а҆пⷭ҇лѡмъ, гла́съ г҃:

А҆пⷭ҇ли ст҃і́и, моли́те млⷭ҇тиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ.

Тропа́рь нїкола́ю, гла́съ д҃:

Пра́вило вѣ́ры и҆ ѡ҆́бразъ кро́тости, воздержа́нїѧ ᲂу҆чи́телѧ ꙗ҆ви́ тѧ ста́дꙋ твоемꙋ̀ ꙗ҆́же веще́й и҆́стина. сегѡ̀ ра́ди стѧжа́лъ є҆сѝ смире́нїемъ высѡ́каѧ, нището́ю бога̑таѧ. ѻ҆́тче сщ҃еннонача́льниче нїко́лае, молѝ хрⷭ҇та̀ бг҃а, сп҃сти́сѧ дꙋша́мъ на́шымъ.

Канѡ́нъ ст҃ы̑мъ а҆пⷭ҇лѡмъ.

Творе́нїе ѳеофа́ново, гла́съ д҃.

Пѣ́снь а҃.

І҆рмо́съ: Мо́рѧ чермнꙋ́ю пꙋчи́нꙋ, невла́жными стопа́ми дре́внїй пѣшеше́ствовавъ і҆и҃ль, крⷭ҇тоѡбра́зныма мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.

Бж҃е́ственнїи ᲂу҆тѣ́шителѧ ѻ҆рга́ни, возглаша́ющїи сего̀ бж҃е́ственными всегда̀ вдохнове́ньми, воспѣ́ша пѣ́снь на́мъ, ꙗ҆́кѡ вои́стиннꙋ сп҃си́тельнꙋю, бл҃госла́внїи хрⷭ҇тѡ́вы а҆пⷭ҇ли.

На ѻ҆дрѣ̀ лѣ́ности слежа̀, и҆ въ сме́рти грѣхо́внѣй недꙋ́гомъ дꙋше́внымъ лю́тѣ и҆ста́емь, посѣще́нїѧ мѧ̀ сла́внїи хрⷭ҇тѡ́вы самови́дцы сподо́бите.

И҆̀же сло́вомъ безслове́сїе разрѣши́вше ꙗ҆зы́кѡвъ а҆пⷭ҇ли, ѿ безслове́сныхъ дѣѧ́нїй лю́тѣ ѡ҆мраче́нное се́рдце моѐ, ᲂу҆тѣ́шителѧ бл҃года́тїю просвѣти́те а҆пⷭ҇ли.

Бг҃оро́диченъ: Дв҃а по ржⷭ҇твѣ̀ нетлѣ́нна пребыла̀ є҆сѝ, на́съ ра́ди ꙗ҆́вльшагосѧ на землѝ, па́че сло́ва ро́ждшаѧ: є҆го́же прилѣ́жнѡ молѝ, просвѣти́ти дꙋ́шы на́шѧ.

Дрꙋгі́й канѡ́нъ ст҃о́мꙋ и҆ вели́комꙋ чꙋдотво́рцꙋ нїкола́ю.

Творе́нїе ѳеофа́ново, гла́съ в҃.

Пѣ́снь а҃.

І҆рмо́съ: Во глꙋбинѣ̀ постла̀ и҆ногда̀, фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть, препросла́вленный гдⷭ҇ь, сла́внѡ бо просла́висѧ.

Вѣнцено́сецъ прⷭ҇то́лꙋ хрⷭ҇то́вꙋ, премꙋ́дре нїко́лае, предстоѧ̀ со а҆́гг҃льскими чи́нми, просвѣще́нїе мѝ да́рꙋй, ѡ҆зарѧ́ющее дꙋшѝ моеѧ̀ ѡ҆мраче́нїе: ꙗ҆́кѡ да восхвалю̀ ра́дꙋѧсѧ, твою̀ пребл҃же́нне па́мѧть. [Два́жды.]

Прославлѧ́ѧй всѧ̑ гдⷭ҇ь, и҆̀же того̀ сла́вѧщыѧ, тѧ̀ вѣ̑рнымъ прибѣ́жище да́лъ є҆́сть, напа́стей и҆збавлѧ́юща, притека́ющыѧ къ твоемꙋ̀ кро́вꙋ нїко́лае, и҆ призыва́ющыѧ тѧ̀ вѣ́рою и҆ любо́вїю пресла́вне.

Бг҃оро́диченъ: И҆зравни́тисѧ жела́нїе мѝ вло́жь ѕмі́й вселꙋка́вый содѣ́телю, ꙗ҆́кѡ плѣ́нника восхи́ти: тобо́ю же пречⷭ҇таѧ при́званъ бы́хъ, ѡ҆божи́всѧ и҆́стиннѡ: ты́ бо бг҃омт҃и, менѐ ѡ҆божи́вшаго родила̀ є҆сѝ.

Пѣ́снь г҃.

І҆рмо́съ: Весели́тсѧ ѡ҆ тебѣ̀ цр҃ковь твоѧ̀ хрⷭ҇тѐ, зовꙋ́щи: ты̀ моѧ̀ крѣ́пость гдⷭ҇и, и҆ прибѣ́жище, и҆ ᲂу҆твержде́нїе.

Гра́дъ тво́й бж҃е, слове́сныхъ рѣ́къ твои́хъ течє́нїѧ ᲂу҆чєни́къ, влⷣко, сщ҃е́ннѡ возвеселѧ́ютъ.

Гра́ждане нбⷭ҇нїи, сослꙋжє́бницы мы́слєннымъ чинѡ́мъ, всесла́внїи а҆пⷭ҇ли, всѧ́кїѧ на́съ ско́рби и҆зба́вите.

Оу҆тверди́вый хрⷭ҇тѐ, словє́сныѧ твоѧ̑ нб҃са̀, ᲂу҆тверди́ мѧ тѣ́хъ мл҃твами на ка́мени твои́хъ хотѣ́нїй, ꙗ҆́кѡ бл҃гоꙋтро́бенъ.

Бг҃оро́диченъ: Ꙗ҆́кѡ мт҃и тѧ̀ мо́литъ, съ ли́комъ ᲂу҆чєни́къ гдⷭ҇и, ꙗ҆́же тебѐ чи́стѡ роди́вшаѧ: да́рꙋй на́мъ млⷭ҇ти твоѧ̑.

И҆́нъ.

І҆рмо́съ: Процвѣла̀ є҆́сть пꙋсты́нѧ, ꙗ҆́кѡ крі́нъ, гдⷭ҇и, ꙗ҆зы́ческаѧ неплодѧ́щаѧ це́рковь, прише́ствїемъ твои́мъ, въ не́й же ᲂу҆тверди́сѧ моѐ се́рдце.

Нїко́лае бл҃же́нне, влⷣки при́сный ᲂу҆чени́къ ты̀ бы́въ, сп҃са́еши къ тебѣ̀ притека́ющыѧ ѿ лю́тыхъ бѣ́дъ, и҆ сме́рти го́рькїѧ. [Два́жды.]

Ѡ҆чи́сти рабы̑ твоѧ̑ и҆ грѣхѡ́въ ѡ҆ставле́нїе ꙗ҆́кѡ бл҃гъ да́рꙋй, нїкола́а твоегѡ̀ ᲂу҆го́дника и҆̀же къ тебѣ̀ хода́тайствы, многомлⷭ҇тиве.

Бг҃оро́диченъ: Оу҆ста́ви смꙋще́нїе страсте́й мои́хъ влⷣчце, и҆ жи́знь ѡ҆кормѝ прест҃а́ѧ, бг҃а ро́ждшаѧ: въ не́мже ᲂу҆тверди́сѧ се́рдце моѐ.

Конда́къ нїкола́ю, гла́съ г҃.

Подо́бенъ: Дв҃а дне́сь:

Въ мѵ́рѣхъ ст҃е свѧщеннодѣ́йствитель показа́лсѧ є҆сѝ: хрⷭ҇то́во бо прпⷣбне є҆ѵⷢ҇лїе и҆спо́лнивъ, положи́лъ є҆сѝ дꙋ́шꙋ твою̀ ѡ҆ лю́дехъ твои́хъ, и҆ сп҃слъ є҆сѝ непови̑нныѧ ѿ сме́рти. сегѡ̀ ра́ди ѡ҆ст҃и́лсѧ є҆сѝ, ꙗ҆́кѡ вели́кїй таи́нникъ бж҃їѧ бл҃года́ти.

І҆́косъ: Воспои́мъ ны́нѣ ст҃и́телѧ пѣ́сньми, мѵ̑рскимъ лю́демъ па́стырѧ и҆ ᲂу҆чи́телѧ, да мл҃твами є҆гѡ̀ просвѣти́мсѧ: се́ бо ꙗ҆ви́сѧ ве́сь чи́стъ, нетлѣ́ненъ дꙋ́хомъ, хрⷭ҇то́ви приносѧ̀ же́ртвꙋ непоро́чнꙋ, чи́стꙋ, бг҃ови бл҃гопрїѧ́тнꙋ, ꙗ҆́кѡ ст҃и́тель ѡ҆чище́нъ и҆ дꙋше́ю и҆ тѣ́ломъ. тѣ́мже є҆́сть вои́стиннꙋ цр҃кви предста́тель, и҆ побо́рникъ сеѧ̀, ꙗ҆́кѡ вели́кїй таи́нникъ бж҃їѧ бл҃года́ти.

Сѣда́ленъ а҆пⷭ҇лѡмъ, гла́съ д҃:

Свѣти̑ла въ концѣ́хъ, ᲂу҆ч҃нкѝ твоѧ̑ хрⷭ҇тѐ ꙗ҆ви́лъ є҆сѝ, сїѧ́ющыѧ дꙋша́мъ сꙋ́щымъ во тьмѣ̀, ра́зꙋмъ тво́й влⷣко: и҆ ле́сть і҆́дѡльскꙋю тѣ́хъ ра́ди ѡ҆мрачи́въ, ᲂу҆че́ньми бл҃гоче́стїѧ просвѣти́лъ є҆сѝ мі́ръ. тѣ́хъ мольба́ми сп҃сѝ дꙋ́шы на́шѧ.

Дрꙋгі́й сѣда́ленъ нїкола́ю, гла́съ и҃.

Подо́бенъ: Премꙋ́дрости:

Возше́дъ на высотꙋ̀ добродѣ́телей, бж҃е́ственными ѿтꙋ́дꙋ ѻ҆́тче ѡ҆зари́лсѧ є҆сѝ сїѧ́нїи чꙋде́съ, пресвѣ́телъ вои́стиннꙋ ꙗ҆ви́всѧ мі́рови па́стырь, и҆ въ напа́стехъ сы́й предста́тель непобѣди́мь. тѣ́мже пресла́внѡ врага̀ побѣ́ждь, лжꙋ̀ ѿгна́лъ є҆сѝ, и҆ человѣ́ки сп҃слъ є҆сѝ ѿ сме́рти нїко́лае. молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю ст҃ꙋ́ю па́мѧть твою̀.

Сла́ва, и҆ ны́нѣ, бг҃оро́диченъ:

Прибѣ́жище сꙋ́щымъ въ лю́тыхъ, премѣне́нїе къ бг҃ꙋ согрѣша́ющымъ, пречⷭ҇таѧ влⷣчце, сп҃сѝ на́съ ѿ всѧ́кагѡ ѡ҆бстоѧ́нїѧ, и҆ ѡ҆ѕлобле́нїѧ человѣ́ческагѡ, и҆ стра́шнагѡ мꙋче́нїѧ, и҆ страсте́й безче́стїѧ, несꙋмнѣ́нною вѣ́рою тѧ̀ при́снѡ призыва́ющихъ, дв҃о всепѣ́таѧ.

Пѣ́снь д҃.

І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й гдⷭ҇и.

Наве́лъ є҆сѝ на мо́ре ко́ни твоѧ̑ и҆збра̑нныѧ, чл҃вѣколю́бче, ѕловѣ́рїѧ во́ды возмꙋща́ющыѧ, и҆ всѣ̑мъ ра́зꙋмъ тво́й и҆́стинный возвѣща́ющыѧ.

Ѕвѣ́зды просвѣти́вше бл҃гоче́стїемъ мы́сленнꙋю тве́рдь цр҃ко́внꙋю, сла́внїи а҆пⷭ҇ли, ѿ но́щи невѣ́дѣнїѧ и҆ прегрѣше́нїй и҆зба́вите мѧ̀.

Ꙗ҆́вльшесѧ ꙗ҆́коже стрѣ́лы и҆з̾ѡщре́ни а҆пⷭ҇ли, вра̑жїѧ разжжє́нныѧ стрѣ́лы ѕло́бы моеѧ̀ ны́нѣ ᲂу҆гаси́те и҆ помышле́нїе моѐ ᲂу҆тверди́те.

Бг҃оро́диченъ: Дꙋ́шꙋ мою̀ ѡ҆горче́ннꙋю ꙗ҆́домъ, сопроти́внагѡ ᲂу҆грызе́нїемъ, дѣ́йственнымъ врачева́нїемъ и҆сцѣлѝ, мл҃твами хрⷭ҇тѐ, ро́ждшїѧ тѧ̀, и҆ сщ҃е́нныхъ а҆пⷭ҇лъ твои́хъ.

И҆́нъ.

І҆рмо́съ: Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ гдⷭ҇и вопло́щьсѧ, и҆ сп҃слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й гдⷭ҇и.

Прибли́живсѧ чи́стѣ зарѧ́мъ дꙋхѡ́внымъ, свѣтоно́сецъ бы́лъ є҆сѝ, мі́ра просвѣща́ѧй концы̀, всѣ̑мъ предстоѧ̀, и҆ всѧ̑ сп҃са́ѧ вѣ́рою къ тебѣ̀ притека́ющыѧ.

И҆збавлѧ́ѧй ѿ сме́рти, ꙗ҆́коже ꙗ҆ви́лсѧ є҆сѝ пе́рвѣе нїко́лае, ю҆́ношы прпⷣбне, та́кѡ и҆ ны́нѣ мѧ̀ сп҃сѝ ѿ всѧ́кагѡ ѡ҆бстоѧ́нїѧ и҆ напа́стей и҆ бѣ́дъ всебл҃же́нне.

Ѡ҆блиста́лъ є҆сѝ добродѣ́телей сїѧ́нїемъ всебога́те, подража́тель преизрѧ́денъ своемꙋ̀ влⷣцѣ бы́въ: сп҃са́еши же призыва́емь, и҆̀же бл҃гоговѣ́нїемъ и҆ любо́вїю тѧ̀ сла́вѧщыѧ.

Бг҃оро́диченъ: На́йде на тѧ̀ влⷣка и҆ гдⷭ҇ь воплоща́емь, и҆ сп҃са́ѧй ꙗ҆́кѡ бл҃гоꙋтро́бенъ всего́ мѧ человѣ́ка, тѣ́мже зовꙋ́ ти: ра́дꙋйсѧ бцⷣе всенепоро́чнаѧ.

Пѣ́снь є҃.

І҆рмо́съ: Ты̀ гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆з̾ мра́чна невѣ́дѣнїѧ, вѣ́рою воспѣва́ющыѧ тѧ̀.

Лѡ́зы живѡ́тныѧ, процвѣта́ющѧ гро́здїе, напои́ша всѣ́хъ вїна̀ мы́сленнагѡ весе́лїѧ, сла́внїи а҆пⷭ҇ли.

Къ свѣ́тꙋ за́повѣдей бж҃їихъ наста́вите, а҆пⷭ҇ли, и҆̀же во тьмѣ̀ дꙋше́внагѡ ᲂу҆ны́нїѧ, безꙋ́мнѡ пребыва́ющыѧ.

И҆зба́вите на́съ дꙋше́вныхъ прегрѣше́нїй и҆ сꙋда̀ бꙋ́дꙋщагѡ, и҆ тлѝ, и҆ бѣ́дъ, а҆пⷭ҇ли бл҃же́ннїи.

Бг҃оро́диченъ: Сп҃си́ мѧ бж҃е ꙗ҆́кѡ чл҃вѣколю́бецъ, сп҃си́ мѧ мольба́ми неизрече́ннѡ тебѐ роди́вшїѧ, и҆ всѣ́хъ бж҃е́ственныхъ а҆пⷭ҇лъ твои́хъ.

И҆́нъ.

І҆рмо́съ: Просвѣще́нїе во тьмѣ̀ лежа́щихъ, сп҃се́нїе ѿча́ѧнныхъ, хрⷭ҇тѐ сп҃се мо́й, къ тебѣ̀ ᲂу҆́тренюю цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо ра́звѣ тебѐ бг҃а не зна́ю.

Бг҃олѣ́пнымъ житїе́мъ пребл҃же́нне просвѣща́емь, ѡ҆сꙋждє́нныѧ непра́веднымъ и҆зрече́нїемъ ᲂу҆мре́ти, предста́въ, и҆зба́вилъ є҆сѝ, влⷣцѣ хрⷭ҇тꙋ̀ зовꙋ́щыѧ: и҆но́гѡ ра́звѣ тебѐ бг҃а не зна́емъ. Два́жды.

На нб҃сѣ́хъ присносꙋ́щнꙋю сла́вꙋ ны́нѣ зрѧ̀, и҆ неизглаго́ланныѧ и҆ бж҃е́ственныѧ зарѝ, пресвѣ́тлыми наслажда́ѧсѧ сїѧ́нїи, покры́й мѧ̀ предста́тельствомъ твои́мъ прпⷣбне, ᲂу҆го́дниче хрⷭ҇то́въ всечⷭ҇тне.

Бг҃оро́диченъ: Да тво́й взы́щеши ѡ҆́бразъ погребе́нный страстьмѝ сп҃се, нбⷭ҇ныхъ ᲂу҆таи́всѧ си́лъ, вопло́щьсѧ ѿ дв҃ы, ꙗ҆ви́лсѧ є҆сѝ тебѣ̀ зовꙋ́щымъ: и҆но́гѡ ра́звѣ тебѐ бг҃а не зна́емъ.

Пѣ́снь ѕ҃.

І҆рмо́съ: Пожрꙋ́ ти со гла́сомъ хвале́нїѧ гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди млⷭ҇ти ѿ ре́бръ твои́хъ и҆сте́кшею кро́вїю.

Па́стырѧ до́брагѡ бг҃оизбра̑ннаѧ ѻ҆вча́та, разсѣ̑ѧннаѧ по мі́рꙋ, волкѡ́въ всѧ́ко ѕвѣ́рство во ѻ҆́вчꙋю кро́тость вѣ́рою преложи́ша.

Бж҃е́ственнагѡ раѧ̀ древеса̀ доброплѡ́днаѧ, преѻкаѧ́нныѧ дꙋшѝ моеѧ̀ всенепло́дство во бл҃гопло́дїе добродѣ́тельнагѡ нра́ва преведи́те а҆пⷭ҇ли.

Оу҆ѧ́звенъ бы́хъ сласте́й ѻ҆рꙋ́жїемъ, и҆ ᲂу҆мро́хъ: и҆̀же ѿ хрⷭ҇та̀ прїе́мше сла́внїи бл҃года́ть воскреша́ти мє́ртвыѧ, ᲂу҆мерщвле́ннꙋю ѻ҆каѧ́ннꙋю мою̀ дꙋ́шꙋ ѡ҆живи́те.

Бг҃оро́диченъ: Оу҆толѝ дꙋшѝ моеѧ̀ свирѣ́пꙋю бꙋ́рю, бж҃е всѣ́хъ ще́дрый, мольба́ми ро́ждшїѧ тѧ̀ бцⷣы, а҆пⷭ҇лъ же и҆ мч҃нкъ твои́хъ.

И҆́нъ.

І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ бж҃е мѧ̀ возведѝ.

И҆́же побѣ́ды нїко́лае вѣне́цъ, на твое́мъ версѣ̀ досто́йнѡ положи́сѧ: ꙗ҆́кѡ побѣди́тель ᲂу҆́бѡ и҆зрѧ́денъ, тѧ̀ призыва́ющыѧ сп҃сѝ. Два́жды.

Оу҆мерщвле́на мѧ̀ бл҃же́нне прегрѣшє́нїи, и҆ стра́стными треволне́нїи погрꙋжа́ема, ꙗ҆́вльсѧ сп҃сѝ, направлѧ́ѧ къ приста́нищꙋ бж҃е́ственныѧ во́ли.

Бг҃оро́диченъ: На тѧ̀ ᲂу҆пова́нїе возложи́хъ, мт҃и приснодв҃о, сп҃се́нїѧ моегѡ̀: и҆ тѧ̀ предста́тельницꙋ положи́хъ живота̀, тве́рдꙋ и҆ непоколеби́мꙋ.

Конда́къ, гла́съ в҃:

Твє́рдыѧ и҆ бг҃овѣща̑нныѧ проповѣ́датели, ве́рхъ ᲂу҆чени̑къ твои́хъ гдⷭ҇и, прїѧ́лъ є҆сѝ въ наслажде́нїе бл҃ги́хъ твои́хъ и҆ поко́й: болѣ̑зни бо ѻ҆́нѣхъ и҆ сме́рть прїѧ́лъ є҆сѝ, па́че всѧ́кагѡ всепло́дїѧ, є҆ди́не свѣ́дый сердє́чнаѧ.

І҆́косъ: Оу҆ѧсни́ ми ѧ҆зы́къ сп҃се мо́й, разшири́въ мѝ ᲂу҆ста̀ и҆ и҆спо́лнивъ ѧ҆̀, ᲂу҆милѝ се́рдце моѐ, да ꙗ҆̀же глаго́лю, послѣ́дꙋю, и҆ ꙗ҆̀же ᲂу҆чꙋ̀, сотворю̀ пе́рвѣе: всѧ́къ бо творѧ̀ и҆ ᲂу҆чѧ̀, речѐ, се́й вели́къ є҆́сть. а҆́ще бо глаго́лѧ не творю̀, ꙗ҆́кѡ мѣ́дь звѣнѧ́щаѧ вмѣню́сѧ. тѣ́мже глаго́лати мѝ подѡ́бнаѧ, и҆ твори́ти полє́знаѧ наꙋчѝ, є҆ди́не свѣ́дый сердє́чнаѧ.

Пѣ́снь з҃.

І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю бл҃гоче́стїѧ па́че, не́жели пла́менемъ ѡ҆палѧ́еми взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.

Крѣ́постїю всест҃ы́ѧ про́повѣди, неле́стнїи а҆пⷭ҇ли хрⷭ҇тѡ́вы, пре́лести зи́мꙋ разрꙋши́сте, и҆ просвѣти́сте бг҃оразꙋ́мїемъ вѣ́рныхъ мꙋдрова́нїе.

Мѵ́ро бл҃гоꙋха́нное и҆сточа́юще всегда̀ бж҃е́ственнїи ᲂу҆ч҃нцы̀, мѵ́ра ᲂу҆́мнагѡ бл҃гово́нїѧ притека́ющихъ къ ва́мъ и҆спо́лните, и҆ ѕлосмра̑дныѧ стра̑сти ѿжени́те.

Растлѣ́вшаго мѧ̀ плотски́ми безмѣ́стїи, сло́ва нетлѣ́ннагѡ сла́внїи ᲂу҆ч҃нцы̀, сп҃си́те мѧ̀ пою́ща: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.

Бг҃оро́диченъ: Ли́къ а҆́гг҃льскїй, ли́къ мч҃нкъ и҆ а҆пⷭ҇лъ твои́хъ, сло́ве, мо́лѧтъ всегда̀ мно́гое бл҃гоꙋтро́бїѧ твоегѡ̀ чл҃вѣколю́бче: всѣ́хъ ᲂу҆ще́дри бцⷣею, ꙗ҆́кѡ бл҃гоꙋтро́бенъ.

И҆́нъ.

І҆рмо́съ: Ѡ҆́бразꙋ злато́мꙋ на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ: посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.

Во ѻ҆́строе и҆скꙋше́нїе впадо́хъ лю́тѣ подстрѣка́емь, и҆ ко вратѡ́мъ а҆́да прибли́жихсѧ, печа́льми ᲂу҆дарѧ́емь, сп҃си́ мѧ мл҃твами твои́ми бл҃же́нне, и҆ возста́ви пою́ща, бл҃гослове́нъ бг҃ъ ѻ҆тє́цъ на́шихъ.

Незаходи́магѡ свѣ́та невеще́ственными мо́лнїѧми ѡ҆блиста́емь, сꙋ́щыѧ во тьмѣ̀ скорбе́й ѡ҆ѕло́блєнныѧ и҆схитѝ, и҆ къ просвѣще́нїю весе́лїѧ наста́ви пою́щыѧ: бл҃гослове́нъ бг҃ъ ѻ҆тє́цъ на́шихъ.

Бг҃оро́диченъ: Молѝ хрⷭ҇та̀, сн҃а твоего̀ и҆ бг҃а, бг҃ороди́тельнице, прода̑ннымъ лю́тыми прегрѣше́ньми и҆ лестьмѝ ѕмїи́ными, кро́вїю є҆гѡ̀ чⷭ҇тно́ю и҆зба́витисѧ пою́щымъ: бл҃гослове́нъ є҆сѝ бж҃е ѻ҆тє́цъ на́шихъ.

Пѣ́снь и҃.

І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, бл҃гоче́стїѧ рачи́тели ѻ҆́троцы взыва́юще: бл҃гослови́те всѧ̑ дѣла̀ гдⷭ҇нѧ гдⷭ҇а.

Оу҆ста̀ ѻ҆гнедохновє́ннаѧ хрⷭ҇тѡ́ва, ꙗ҆̀же бездвє́рнаѧ ᲂу҆ста̀ загради́вше, и҆ сп҃си́тельное проповѣ́данїе повсю́дꙋ разсѣ́ѧвше, ѿ ᲂу҆́стъ во́лка мы́сленнагѡ и҆зба́висте вопїю́щыѧ: всѧ̑ дѣла̀ гдⷭ҇а по́йте, и҆ превозноси́те є҆го̀ во всѧ̑ вѣ́ки.

Вострꙋби́те ѻ҆́крестъ моеѧ̀ ᲂу҆мерщвле́нныѧ дꙋшѝ, бл҃гогла́снїи трꙋбы̑ хрⷭ҇тѡ́вы, а҆пⷭ҇ли сла́внїи: и҆ ѿ гро́ба ѿча́ѧнїѧ и҆ ᲂу҆ны́нїѧ лю́тагѡ сїю̀ воздви́гните, во є҆́же пѣ́ти: всѧ̑ дѣла̀ гдⷭ҇а по́йте, и҆ превозноси́те є҆го̀ во всѧ̑ вѣ́ки.

Менѐ, зако́ны твоѧ̑ хрⷭ҇тѐ попра́вшаго, ᲂу҆ма̀ развраще́нїемъ: менѐ влⷣко блꙋ́днаго, во глꙋбинꙋ̀ попо́лзшасѧ, и҆ ѻ҆бы́чаю лꙋка́вомꙋ при́снѡ рабо́тающа, не пре́зри ᲂу҆ч҃нкѡ́въ твои́хъ мольба́ми.

Бг҃оро́диченъ: Мр҃і́е, гпⷭ҇жѐ всѧ́ческихъ, ѡ҆блада́ема мѧ̀ ѿ ѕмі́ѧ, и҆ согрѣша́юща всегда̀, свободѝ мл҃твами твои́ми, и҆ порабо́ти хрⷭ҇тꙋ̀ въ житїѝ чи́стѣ, воспѣва́ти: всѧ̑ дѣла̀ гдⷭ҇а по́йте, и҆ превозноси́те є҆го̀ во всѧ̑ вѣ́ки.

И҆́нъ.

І҆рмо́съ: Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте дѣла̀ ꙗ҆́кѡ гдⷭ҇а, и҆ превозноси́те во всѧ̑ вѣ́ки.

Ꙗ҆́кѡ бл҃гъ и҆ млⷭ҇рдъ, и҆̀же во глꙋбинѣ̀ напа́стей ѡ҆держи̑мыѧ свободѝ бл҃же́нне, содержа́щихъ лю́тыхъ [нїко́лае] разрѣше́нїе подаѧ̀ мл҃твами твои́ми, ꙗ҆̀же ко сп҃сꙋ хрⷭ҇тꙋ̀, сщ҃еннотаи́нниче. Два́жды.

Таи́нникъ и҆́же па́че ᲂу҆ма̀, ст҃ы́хъ слꙋжи́тель, и҆ нбⷭ҇ныхъ сы́й бг҃омꙋ́дре, а҆рхїере́й же вѣ́ренъ: прегрѣше́нїй ѡ҆ставле́нїѧ просѝ ѿ сп҃са на́шегѡ, сщ҃енноѧвле́нне.

Бг҃оро́диченъ: И҆знемога́етъ мо́й ны́нѣ ᲂу҆́мъ, во глꙋбины̑ впа́дъ безче́стїѧ, ꙗ҆́кѡ ѿвсю́дꙋ разли́чными ѡ҆б̾ѧ́тъ є҆́смь ѕлы́ми: но ты̀ дв҃о и҆сцѣлѝ, безстра́стїѧ свѣ́томъ ѡ҆дѣва́ющи.

Пѣ́снь ѳ҃.

І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебѐ дв҃о, краеꙋго́льный ѿсѣче́сѧ: хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀ бцⷣе велича́емъ.

Ка́менїе и҆збра́нное, положе́ннагѡ во главꙋ̀ ᲂу҆́гла ка́мене, созда́сте всѣ́хъ вѣ́рныхъ сердца̀, ка́менемъ вѣ́ры вра̑жїѧ созда̑нїѧ а҆пⷭ҇ли разве́ргшїи.

Рѣши́ти и҆ вѧза́ти ѿ хрⷭ҇та̀ прїе́мше вла́сть, разрѣши́те ѕѡ́лъ мои́хъ соꙋ́зъ, и҆ къ любвѝ бж҃їей привѧжи́те, и҆ црⷭ҇твїѧ прича́стника бж҃е́ственнагѡ содѣ́лайте а҆пⷭ҇ли.

Бж҃е́ственнїи влⷣки ѻ҆́блацы, и҆зсо́хшее моѐ се́рдце всѧ́кимъ лꙋка́вымъ дѣѧ́нїемъ, бж҃е́ственными тꙋ́чами ны́нѣ напо́йте, и҆ плодоно́сно покажи́те, а҆пⷭ҇ли бг҃обл҃же́ннїи.

Бг҃оро́диченъ: Со ст҃ы́ми а҆́гг҃лы, съ бж҃е́ственными а҆пⷭ҇лы, съ сла́вными мч҃нки, твоего̀ молѝ сн҃а и҆ гдⷭ҇а бг҃ороди́тельнице пречⷭ҇таѧ, ѿ бѣ́дъ и҆зба́вити дꙋ́шы на́шѧ.

И҆́нъ.

І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щьсѧ ѿ дв҃ы на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.

Свѣща́ми бл҃года́ти бг҃омꙋ́дре просвѣща́емь, и҆ свѣти́льникъ бл҃гоче́стїѧ ꙗ҆́вѣ бы́въ, сꙋ́щыѧ въ напа́стехъ сп҃са́еши, и҆ и҆̀же во глꙋбинѣ̀ морстѣ́й и҆збавлѧ́еши, и҆ пита́еши а҆́лчꙋщыѧ пресла́внѡ всебл҃же́нне. Два́жды.

Ꙗ҆́кѡ въ раѝ пи́щи ны́нѣ водворѧ́емь, и҆ неизрече́ннꙋю сла́вꙋ ꙗ҆́снѡ зрѧ̀, ѿ нбⷭ҇ныхъ крꙋ̑гъ пѣвцы̀ твоѧ̑ назира́еши, ѿ страсте́й и҆збавлѧ́ѧ, бг҃оно́се всебл҃же́нне.

Бг҃оро́диченъ: Премꙋ́рость и҆ си́лꙋ и҆ сло́во ѵ҆поста́сное ѻ҆́ч҃ее, бг҃омт҃и чⷭ҇таѧ, родила̀ є҆сѝ ѿ твои́хъ пречⷭ҇тыхъ крове́й, сво́й хра́мъ прїи́мшꙋю, и҆ семꙋ̀ по соедине́нїю соедини́вшꙋюсѧ нераздѣ́льнѡ.

Гла́съ а҃.

Подо́бенъ: Прехва́льнїи мч҃нцы:

На крⷭ҇тѣ̀ пречⷭ҇тѣи рꙋ́цѣ твоѝ просте́рлъ є҆сѝ хрⷭ҇тѐ, ѿ тебѐ дале́че бы́вшыѧ призыва́ѧ, и҆ бли́зꙋ тебѐ ᲂу҆строѧ́ѧ. тѣ́мже молю́ ти сѧ: плѣне́на мѧ̀ бы́вша страстьмѝ соберѝ и҆ покаѧ́нїе мѝ да́рꙋй, всѧ́кꙋ скве́рнꙋ страстнꙋ́ю ѡ҆чища́ющее.

Дла̑ни пречⷭ҇тыѧ твоѧ̑ хрⷭ҇тѐ, на дре́вѣ возне́съ, и҆ твоѧ̑ пе́рсты ѡ҆кровави́лъ є҆сѝ: хотѧ̀ и҆зба́вити бж҃е́ственныхъ рꙋ́къ твои́хъ дѣ́ло, чл҃вѣколю́бче, а҆да́ма, и҆́же престꙋпле́нїемъ держи́ма во ца́рствїихъ сме́ртныхъ: є҆го́же воздви́глъ є҆сѝ вла́стїю твое́ю всеси́льне.

Претерпѣ́лъ є҆сѝ пострада́ти на́съ ра́ди сп҃се, и҆́же є҆стество́мъ непрело́женъ, и҆ безстра́стный бж҃ество́мъ распина́ешисѧ безнача́льне, со ѕлодѣ́и ты̀ безгрѣ́шне: и҆ со́лнце не терпѧ́щи дерзнове́нїѧ, помрачи́сѧ, и҆ землѧ̀ всѧ̀ трѧса́шесѧ, творца́ тѧ мі́рꙋ позна́вши.

Сла́ва, и҆ ны́нѣ, крⷭ҇тобг҃оро́диченъ:

Недꙋ́гꙋющꙋю лю́тѣ дꙋ́шꙋ мою̀ страстьмѝ лꙋка́выми, всепѣ́таѧ и҆сцѣлѝ, ꙗ҆́же врача̀ и҆ сп҃са всѣ̑мъ хрⷭ҇та̀ ро́ждшаѧ, всѧ́кꙋ болѣ́знь и҆сцѣлѧ́ющаго, ᲂу҆ѧзви́вшихсѧ дїа́вольскимъ ѡ҆ѕлобле́нїемъ, и҆ сме́рти на́съ и҆збавлѧ́ющаго.

Тропа́рь чⷭ҇тно́мꙋ крⷭ҇тꙋ̀, гла́съ а҃:

Сп҃сѝ гдⷭ҇и лю́ди твоѧ̑, и҆ бл҃гословѝ достоѧ́нїе твоѐ, побѣ̑ды на сопроти́вныѧ да́рꙋѧ, и҆ твоѐ сохранѧ́ѧ крⷭ҇то́мъ твои́мъ жи́тельство.

Канѡ́нъ чⷭ҇тно́мꙋ и҆ животворѧ́щемꙋ крⷭ҇тꙋ̀.

Творе́нїе григо́рїа сїнаи́та. Гла́съ д҃.

Пѣ́снь а҃.

І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.

Запѣ́въ: Сла́ва, гдⷭ҇и, крⷭ҇тꙋ̀ твоемꙋ̀ чⷭ҇тно́мꙋ.

Крⷭ҇те всеси́льне, а҆пⷭ҇лѡвъ похвала̀, прпⷣбныхъ ᲂу҆твержде́нїе, и҆ вѣ́рныхъ зна́менїе, і҆ера́рхѡвъ и҆ мч҃нкѡвъ сла́ва, побѣ́да и҆ ᲂу҆твержде́нїе всѣ́хъ хва́лѧщихъ тѧ̀.

Крⷭ҇те всечⷭ҇тны́й, четвероконе́чнаѧ си́ла, а҆пⷭ҇лѡвъ бл҃голѣ́пїе, и҆ мч҃нкѡвъ крѣ́пость, немощны́хъ здра́вїе показа́лсѧ є҆сѝ, ме́ртвыхъ воскрⷭ҇нїе, па́дающихъ воздви́женїе.

Крⷭ҇те, ты́ ми си́ла бꙋ́ди, крѣ́пость и҆ держа́ва, и҆зба́витель и҆ предра́тникъ на борю́щыѧ мѧ̀, щи́тъ и҆ храни́тель, побѣ́да и҆ ᲂу҆твержде́нїе моѐ, при́снѡ соблюда́ѧ мѧ̀ и҆ покрыва́ѧ.

Бг҃оро́диченъ: На крⷭ҇тѣ̀ всенепоро́чнаѧ твоего̀ сн҃а ꙗ҆́кѡ ᲂу҆зрѣ́ла є҆сѝ, ѻ҆рꙋ́жїе ско́рбное ᲂу҆тро́бꙋ твою̀ растерза̀, и҆ восклица́ла є҆сѝ рыда́ющи въ болѣ́зни: но а҆́бїе просла́вила є҆сѝ крⷭ҇та̀ си́лꙋ.

Пѣ́снь г҃.

І҆рмо́съ: Твоѧ̑ пѣсносло́вцы бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дх҃о́внѡ ᲂу҆твердѝ, въ бж҃е́ственнѣй твое́й сла́вѣ вѣнцє́въ сла́вы сподо́би.

Крⷭ҇те, прпⷣбныхъ ѻ҆рꙋ́жїе, ѻ҆бою́дный ме́чь хрⷭ҇то́въ, вѣ́рныхъ ᲂу҆добре́нїе, болѧ́щихъ и҆сцѣле́нїе и҆ застꙋпле́нїе, и҆ воздви́женїе ᲂу҆ме́ршихъ всечⷭ҇тне.

Крⷭ҇те, ѡ҆снова́нїе бл҃гоче́стїѧ, бѣсѡ́мъ показа́лсѧ є҆сѝ гꙋби́тель, цр҃квамъ бл҃голѣ́пїе, нечести̑вымъ поги́бель, врагѡ́мъ посрамле́нїе въ де́нь сꙋ́дный.

Крⷭ҇те живоно́сный, ты́ ми бꙋ́ди крѣ́пость, и҆ побѣ́да, и҆ щи́тъ, и҆ стѣна̀ нера́тꙋема, бѣсѡ́мъ ѿгна́нїе, и҆ помыслѡ́мъ погаше́нїе, и҆ ᲂу҆ма̀ моегѡ̀ сохране́нїе.

Бг҃оро́диченъ: Распѧ́тїе поно́сное, дв҃о влⷣчце, тво́й сн҃ъ претерпѣ́лъ є҆́сть, и҆ сме́рть неподо́бнꙋю: но возне́ссѧ, низве́рже проти̑вныѧ вра̑жїѧ си̑лы, ꙗ҆́кѡ безсме́ртенъ.

Сѣда́ленъ, гла́съ и҃.

Подо́бенъ: Повелѣ́нное та́йнѡ:

Проѡбража́ше та́йнѡ дре́вле і҆исꙋ́съ наѵи́нъ креста̀ ѡ҆́бразъ: є҆гда̀ рꙋ́цѣ прострѐ крестови́днѡ сп҃се мо́й, и҆ ста̀ со́лнце, до́ндеже врагѝ низложѝ противостоѧ́щыѧ тѝ бг҃ꙋ: ны́нѣ же за́йде, на крⷭ҇тѣ̀ тѧ̀ зрѧ̀, до́ндеже держа́вꙋ сме́ртнꙋю разрꙋши́въ, ве́сь мі́ръ совоздви́глъ є҆сѝ.

Пѣ́снь д҃.

І҆рмо́съ: Сѣдѧ́й въ сла́вѣ, на прⷭ҇то́лѣ бж҃ества̀, во ѻ҆́блацѣ ле́гцѣ, прїи́де і҆и҃съ пребж҃е́ственный, нетлѣ́нною дла́нїю, и҆ сп҃сѐ зовꙋ́щыѧ: сла́ва хрⷭ҇тѐ, си́лѣ твое́й.

Четвероконе́чный сы́й мі́ръ, и҆ ꙗ҆́кѡ триѻбою́дный ме́чь, нача̑ла тьмы̀ сѣче́ши, на́ми воѡбража́емь, крⷭ҇те ѻ҆рꙋ́жїе вели́кое хрⷭ҇то́во, и҆ непобѣди́мое побѣди́тельство всеси́льное.

Твоѧ̀ высота̀ живоно́сне крⷭ҇те, воздꙋ́шнаго кнѧ́зѧ бїе́тъ, и҆ глꙋбина̀, всеѧ̀ бе́здны закала́етъ ѕмі́ѧ: широтꙋ̀ па́ки воѡбража́етъ, низлага́ѧ мїрска́го кнѧ́зѧ крѣ́постїю твое́ю.

Возне́ссѧ сопривле́клъ є҆сѝ па́дшыѧ, воздви́глъ є҆сѝ є҆стество̀ земно́е, прⷭ҇то́лꙋ бж҃їю спросла́вилсѧ є҆сѝ крⷭ҇те высото̀ вели́каѧ, мїрскі́й мо́сте, дꙋ́шꙋ мою̀ ѿ страсте́й глꙋбины̀ вознесѝ вско́рѣ.

Бг҃оро́диченъ: Крⷭ҇тоѡбра́знѡ пречⷭ҇таѧ ѻ҆трокови́це бцⷣе, дла̑ни твоѝ распросте́рши, ко и҆́же на крⷭ҇тѣ̀ воздви́женномꙋ, и҆ моли̑твы дв҃о ны́нѣ принесѝ, за всѣ́хъ вѣ́рнѡ молѧ́щихсѧ тебѣ̀.

Пѣ́снь є҃.

І҆рмо́съ: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

Крⷭ҇те, нбⷭ҇наѧ лѣ́ствице ст҃ы́ни, степе́нємъ наста́вниче, хрⷭ҇то́ва высота̀ и҆ сла́ва є҆сѝ, бж҃їи ѡ҆́бразъ назна́менателенъ мі́рꙋ, неви́димомꙋ же и҆ ви́димомꙋ є҆диночⷭ҇тне.

Крⷭ҇те, ѡ҆́бразе неиспи́санный си́лою, ѡ҆сщ҃е́нїе вода́мъ, ѡ҆чище́нїе воздꙋ́хꙋ, ѡ҆сщ҃е́нїе и҆ просвѣще́нїе всѧ́комꙋ, мꙋ́жества зна́менїе, и҆ хрⷭ҇то́въ ски́птръ непрело́жный проти̑вныѧ въ зе́млю попира́ѧ.

Крⷭ҇те всеси́льне, ѕлочести̑выѧ низложѝ врагѝ, ненави́дѧщыѧ и҆ хꙋ́лѧщыѧ тѧ̀ безꙋ́мнѡ, ꙗ҆зы́ки попалѝ, и҆ ᲂу҆гасѝ шата̑нїѧ и҆́хъ. ѽ крⷭ҇те всест҃ы́й и҆ хрⷭ҇тоно́сный, сохранѝ на́съ держа́вою твое́ю.

Бг҃оро́диченъ: Всѣ́хъ цр҃и́це влⷣчце, ски́птромъ ржⷭ҇тва̀ твоегѡ̀ разрꙋшѝ, дв҃и́це, воста́нїе хꙋ́лѧщихъ крⷭ҇тнꙋю си́лꙋ. да́ждь крѣ́пость и҆ ѡ҆чище́нїе, побѣ́дꙋ и҆ по́мощь вѣ́рномꙋ і҆мпера́торꙋ на́шемꙋ.

Пѣ́снь ѕ҃.

І҆рмо́съ: Бж҃е́ственное сїѐ и҆ всечⷭ҇тно́е, соверша́юще пра́зднество, бг҃омꙋ́дрїи бг҃омт҃ре, прїиди́те рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

Крⷭ҇тъ всѣ́хъ воскрⷭ҇нїе, крⷭ҇тъ па́дшихъ и҆справле́нїе, страсте́й ᲂу҆мерщвле́нїе, и҆ пло́ти пригвожде́нїе, крⷭ҇тъ дꙋша́мъ сла́ва, и҆ свѣ́тъ вѣ́чный.

Крⷭ҇тъ врагѡ́въ гꙋби́тель, крⷭ҇тъ ѕлочести́выхъ ꙗ҆́зва и҆ плѣне́нїе, и҆ вѣ́рныхъ держа́ва, бл҃гочести́выхъ храни́тель, и҆ бѣсѡ́въ ѿгони́тель.

Крⷭ҇тъ страсте́й па́гꙋба, крⷭ҇тъ помыслѡ́въ ѿгна́нїе, крⷭ҇тъ сокрꙋше́нїе ꙗ҆зы́ческо и҆скꙋси́тельно, и҆ дꙋховѡ́мъ показа́сѧ лови́тельство.

Крⷭ҇тъ воздви́жетсѧ, и҆ па́даютъ дꙋхѡ́въ воздꙋ́шныхъ чи́нове: крⷭ҇тъ снисхо́дитъ, и҆ нечести́вїи всѝ ᲂу҆жаса́ютсѧ, ꙗ҆́кѡ мо́лнїю ви́дѧще крⷭ҇тнꙋю си́лꙋ.

Конда́къ, гла́съ д҃. Самоподо́бенъ:

Вознесы́йсѧ на крⷭ҇тъ во́лею, тезоимени́томꙋ твоемꙋ̀ но́вомꙋ жи́тельствꙋ щедрѡ́ты твоѧ̑ да́рꙋй хрⷭ҇тѐ бж҃е: возвеселѝ на́съ си́лою твое́ю, побѣ̑ды даѧ̀ на́мъ на сопоста́ты, посо́бїе и҆мꙋ́щꙋ твоѐ, ѻ҆рꙋ́жїе ми́ра, непобѣди́мꙋю побѣ́дꙋ.

І҆́косъ: И҆́же до тре́тїѧгѡ небесѐ восхище́нъ бы́сть въ ра́й, и҆ глаго́лы слы́шавъ неизречє́нныѧ и҆ бж҃е́ствєнныѧ, и҆́хже не лѣ́ть ѧ҆зы́ки [человѣ́ческими] глаго́лати, что̀ гала́тѡмъ пи́шетъ, ꙗ҆́кѡ рачи́телїе писа́нїй прочто́сте и҆ позна́сте: мнѣ̀, глаго́летъ, хвали́тисѧ да не бꙋ́детъ, то́кмѡ во є҆ди́номъ крⷭ҇тѣ̀ гдⷭ҇ни, на не́мже страда́въ ᲂу҆бѝ стра̑сти. того̀ ᲂу҆́бѡ и҆ мы̀ и҆звѣ́стнѡ держи́мъ крⷭ҇тъ гдⷭ҇ень, хвалꙋ̀ всѝ: є҆́сть бо на́мъ сп҃си́тельное сїѐ дре́во, ѻ҆рꙋ́жїе ми́ра, непобѣди́маѧ побѣ́да.

Пѣ́снь з҃.

І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ.

Нераздѣ́льнꙋю трⷪ҇цꙋ и҆ неслїѧ́ннꙋ, є҆стество̀ є҆ди́нствомъ бг҃осло́вимъ, ѻ҆ц҃а̀ нерожде́нна, и҆ рожде́нна сн҃а, и҆ ст҃а́го и҆сходи́тельнаго бж҃е́ственнаго дх҃а, пѣ́сньми пою́ще: бл҃гослове́нъ бг҃ъ ѻ҆тє́цъ на́шихъ.

Незаходи́тельными мо́лнїѧми твои́ми, трїѷпоста́сне, на́ши ѡ҆зарѝ ᲂу҆́мныѧ ѻ҆́чи, добро́тꙋ твою̀, трисвѣ́тне, пресꙋ́щественнꙋю зрѣ́ти, ꙗ҆́же человѣ́кѡмъ недовѣ́домаѧ, и҆ непристꙋ́пнаѧ а҆́гг҃лѡмъ.

Лꙋча́ми свѣ́та твоегѡ̀ па́дшꙋю мою̀ дꙋ́шꙋ возведѝ ѿ глꙋбины̀, бл҃гі́й бж҃е препѣ́тый и҆ всеси́льный, попо́лзшꙋюсѧ ѿ свѣ́та бл҃года́тнагѡ, и҆ во тьмꙋ̀ воглꙋ́бльшꙋюсѧ.

Бг҃оро́диченъ: Крⷭ҇тоѡбра́знѡ просте́рши рꙋ́цѣ чⷭ҇таѧ, къ распросте́ршемꙋ своѝ рꙋ́цѣ на дре́вѣ крⷭ҇тнѣмъ, и҆ возне́сшемꙋ є҆стество̀ на́ше, и҆ ᲂу҆мертви́вшемꙋ враждє́бныѧ полкѝ, молѧ́щи не преста́й.

Пѣ́снь и҃.

І҆рмо́съ: Ѻ҆́троки бл҃гочести̑выѧ въ пещѝ, ржⷭ҇тво̀ бг҃оро́дичо сп҃сло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Высота̀ хрⷭ҇то́выхъ стрⷭ҇те́й, и҆ лꙋ́къ и҆ ѻ҆рꙋ́жїе и҆ ме́чь, ѻ҆рꙋ́жїе непосты́дное, и҆ си́ла непобѣди́маѧ, хрⷭ҇то́во подно́жїе, и҆ побѣди́тельство на врагѝ, зна́менїе ца́рствїѧ, ски́птре вѣ́рныхъ, показа́лсѧ є҆сѝ крⷭ҇те побѣдоно́сне.

Воздви́глъ є҆сѝ на́ше па́дшее є҆стество̀, хрⷭ҇то́мъ распе́ншимсѧ, и҆ совозста́вилъ, высото̀ бж҃е́ственнаѧ, глꙋбино̀ неизглаго́ланнаѧ, хрⷭ҇то́во ты̀ є҆сѝ зна́менїе, крⷭ҇те пребога́те, и҆ широта̀ безмѣ́рнаѧ, и҆ зна́менїе непостижи́мыѧ трⷪ҇цы, жизноно́сче.

Оу҆стна́ми, дꙋше́ю же и҆ се́рдцемъ крⷭ҇тъ гдⷭ҇ень лобыза́юще, прїиди́те ны́нѣ вознесе́мъ всѝ и҆ возвели́чимъ, покланѧ́ющесѧ рце́мъ вкꙋ́пѣ пѣ́снь пречⷭ҇тꙋю, вопїю́ще: ра́дꙋйсѧ вели́кое бога́тство крⷭ҇те, цр҃ко́вное ᲂу҆краше́нїе.

Дре́во жи́зни и҆ сп҃се́нїѧ, дре́во безсме́ртїѧ, дре́во ра́зꙋма, дре́во трилюбе́зно, нетлѣ́нно и҆ неизнꙋрѧ́емо, крⷭ҇тъ трисоста́вный, чⷭ҇тно́е дре́во: трⷪ҇цы бо но́ситъ трїѷпоста́сныѧ ѡ҆́бразъ.

Пѣ́снь ѳ҃.

І҆рмо́съ: Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃омт҃ре, и҆ да вопїе́тъ: ра́дꙋйсѧ всебл҃же́ннаѧ, бцⷣе чⷭ҇таѧ приснодв҃о.

Кто̀ слы̑шана сотвори́тъ, ꙗ҆́коже пи́шетсѧ, дѣ̑йствїѧ твоѧ̑ мїролюбе́зный крⷭ҇те, си̑лы и҆ чꙋдеса̀, и҆ ᲂу҆ме́ршымъ воста́нїе; и҆ мі́ръ ве́сь совозне́слъ є҆сѝ, вознесы́йсѧ къ бг҃ꙋ многожела́емый.

Оу҆тверже́нїе вѣ̑рнымъ, крⷭ҇тъ требл҃же́нный, зна́менїе и҆ похвала̀, дре́во всеси́льное: крⷭ҇тъ хрⷭ҇то́въ вели́кїй и҆ соверше́нный, а҆пⷭ҇лѡмъ похвала̀, прпⷣбнымъ ᲂу҆тверже́нїе, и҆ мч҃нкѡмъ крѣ́пость и҆ держа́ва, побѣ́да и҆ похвала̀.

Ра́дꙋйсѧ крⷭ҇те, ѡ҆́бразе неѡпи́санный и҆ многоимени́тый, дре́во требога́тное, стра́шно же и҆ всебл҃же́нно. ра́дꙋйсѧ крⷭ҇те всест҃ы́й и҆ всеси́льный. ра́дꙋйсѧ храни́телю жи́зни на́шеѧ, гдⷭ҇ень крⷭ҇те многопѣ́тый.

Крⷭ҇те чⷭ҇тны́й, храни́тель дꙋшѝ и҆ тѣ́лꙋ бꙋ́ди мѝ, ѡ҆́бразомъ свои́мъ бѣ́сы низлага́ѧ, врагѝ ѿгонѧ́ѧ, стра̑сти ᲂу҆пражнѧ́ѧ, и҆ бл҃гослове́нїе да́рꙋѧ мѝ, и҆ жи́знь, и҆ си́лꙋ содѣ́йствїемъ ст҃а́гѡ дх҃а, и҆ чⷭ҇тны́ми пречⷭ҇тыѧ мольба́ми.

Гла́съ ѕ҃.

Подо́бенъ: Всю̀ ѿложи́вше:

Дꙋхо́внїи вѣті́и, ᲂу҆ч҃нцы̀ сп҃сѡвы, дх҃ꙋ ѻ҆рга́ни бы́вше вѣ́рою, разсѣ́ѧшасѧ въ концы̀ землѝ, чⷭ҇тно́е проповѣ́данїе правосла́внѣ сѣ́юще: ѿ ни́хже прозѧбо́ша бж҃е́ственнымъ земледѣ́лїемъ и҆ бл҃года́тїю мч҃нкъ вѡ́инства, стрⷭ҇ть чⷭ҇тнꙋ́ю ѡ҆бразꙋ́юща, многоѡбра́зными раздробле́нїй ра́нами и҆ ѻ҆гне́мъ, и҆ со дерзнове́нїемъ мо́лѧтсѧ ѡ҆ дꙋша́хъ на́шихъ.

Ѻ҆гне́мъ воспалѧ́еми гдⷭ҇ни любвѐ, ѻ҆гнѧ̀ презрѣ́ша, и҆ ꙗ҆́кѡ бж҃е́ственное ᲂу҆́глїе возжига́еми чⷭ҇тні́и мч҃нцы во хрⷭ҇тѣ̀, попали́ша хвра́стное ле́сти шата́нїе: ѕвѣре́й же загради́ша ᲂу҆ста̀, честны́мъ призыва́нїемъ, и҆ во главы̑ ᲂу҆сѣка́еми, посѣко́ша врага̀ всѧ̑ ѡ҆полчє́нїѧ, и҆ крове́й пролива́юще пото́ки терпѣли́внѡ, цр҃ковь напои́ша вѣ́рою просвѣща́емꙋ.

Со ѕвѣрьмѝ бра́вшесѧ, бїе́ми мече́мъ, ногтьмѝ растерза́еми, рꙋка́ми ѿе́млеми, и҆ мꙋ́чими тве́рдїи мч҃нцы, и҆ ѻ҆гне́мъ веще́ственнымъ неща́днѡ пали́ми, и҆ пробода́еми, и҆ соста́вы ссѣца́еми, претерпѣ́ша твердѣ́йше, ᲂу҆покое́нїе предви́дѣша бꙋ́дꙋщее, и҆ нетлѣ̑нныѧ вѣнцы̀, и҆ сла́вꙋ хрⷭ҇та̀: є҆мꙋ́же со дерзнове́нїемъ мо́лѧтсѧ ѡ҆ дꙋша́хъ на́шихъ.

Сла́ва, гла́съ ѕ҃: Мч҃нкъ бж҃е́ственный ли́че, цр҃кве ѡ҆снова́нїе, бл҃говѣ́стїѧ сконча́нїе, вы̀ дѣ́ломъ сп҃сѡва глагѡ́ланїѧ и҆спо́лнисте: ва́ми бо врата̀ а҆́дѡва на цр҃ковь ѿве́рзшаѧсѧ заключи́шасѧ, кро́ве ва́шеѧ ли́тїе, і҆́дѡльскїѧ жє́ртвы и҆зсꙋшѝ, закла́нїе ва́ше породѝ цр҃ко́вное и҆сполне́нїе: безпло́тныхъ ᲂу҆диви́сте, бг҃ꙋ вѣнцено́сцы предстоитѐ. є҆го́же непреста́ннѡ моли́те ѡ҆ дꙋша́хъ на́шихъ.

И҆ ны́нѣ, бг҃оро́диченъ.

Тропа́рь всѣ̑мъ ст҃ы̑мъ, гла́съ д҃:

И҆̀же во все́мъ мі́рѣ мч҃нкъ твои́хъ, ꙗ҆́кѡ багрѧни́цею и҆ вѵ́ссомъ, кровьмѝ цр҃ковь твоѧ̀ ᲂу҆краси́вшисѧ, тѣ́ми вопїе́тъ тѝ, хрⷭ҇тѐ бж҃е: лю́демъ твои̑мъ щедрѡ́ты твоѧ̑ низпослѝ, ми́ръ жи́тельствꙋ твоемꙋ̀ да́рꙋй, и҆ дꙋша́мъ на́шымъ ве́лїю млⷭ҇ть.

Канѡ́нъ пое́мый къ нбⷭ҇нымъ си́ламъ, и҆ ко всѣ̑мъ ст҃ы̑мъ моле́бный. Творе́нїе господи́на і҆ѡ́сифа, є҆гѡ́же краестро́чїе по а҆лфави́тꙋ. Гла́съ и҃.

Пѣ́снь а҃.

І҆рмо́съ: Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѡбра́знѡ порази́въ, и҆ раздѣли́въ мо́ре: і҆и҃лѧ же бѣглеца̀, пѣшехо́дца сп҃сѐ, пѣ́снь бг҃ови воспѣва́юща.

Безнача́льне сло́ве, сщ҃е́нными моле́ньми, херꙋві́мѡвъ, серафі́мѡвъ, власте́й, прⷭ҇то́лѡвъ и҆ бж҃е́ственныхъ си́лъ, а҆́гг҃лѡвъ, а҆рха́гг҃лѡвъ же, нача̑лъ, гдⷭ҇ьствъ, твоѧ̑ млⷭ҇ти бога̑тыѧ да́рꙋй на́мъ, ꙗ҆́кѡ чл҃вѣколю́бецъ.

Помози́ ми гдⷭ҇ень прⷣте́че, хрⷭ҇та̀ молѧ̀, прⷪ҇ро́кѡвъ собо́ръ, а҆пⷭ҇лѡвъ собра́нїе, мч҃нкѡвъ вѡ́инства, всѣ́хъ влⷣкꙋ ᲂу҆моли́те сп҃сти́ мѧ, прегрѣше́ньми мно́гими содержи́маго.

Жєны̀ бж҃е́ствєнныѧ, до́брѣ страда́льчествовавшыѧ, и҆ по́стничествовавшыѧ, і҆ера́рхѡвъ собо́ръ, прпⷣбнїи и҆ првⷣнїи, чⷭ҇тні́и сщ҃енномч҃нцы, бла̑гъ вѣ́чныхъ полꙋчи́ти ᲂу҆моли́те, вѣ́рою ва́съ бл҃жа́щымъ.

Бг҃оро́диченъ: Порабоще́нный сластьмѝ тѣле́сными ᲂу҆́мъ мо́й, влⷣчце и҆ бл҃га́ѧ є҆ди́на, ве́сь свободѝ, и҆ раба̀ и҆́стиннѣйшаго, бл҃ги́ми дѣ́лы, твоегѡ̀ сн҃а мѧ̀ покажѝ, ꙗ҆́кѡ да по до́лгꙋ сла́влю тѧ̀.

Пѣ́снь г҃.

І҆рмо́съ: Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀ хрⷭ҇тѐ за́повѣдей твои́хъ ᲂу҆твердѝ: ꙗ҆́кѡ нѣ́сть ст҃ъ, па́че тебѐ є҆ди́не чл҃вѣколю́бче.

Ѿ собла̑знъ вра́жїихъ, ѽ серафі́ми, и҆зба́вите мѧ̀, вла̑сти, херꙋві́ми, молю̀: гдⷭ҇ьства же, нача̑ла, и҆ прⷭ҇то́ли, и҆ а҆рха́гг҃ли, со а҆́гг҃лы всѣ́ми, и҆зба́вителѧ ᲂу҆моли́те.

Живота̀ добродѣ́тельнагѡ мнѣ̀ при́снѡ, прⷣте́че хрⷭ҇та̀ ᲂу҆молѝ: прⷪ҇ро́цы, и҆ мч҃нкѡвъ ли́цы, а҆пⷭ҇лѡвъ, сщ҃е́нныхъ і҆ера́рхѡвъ, прпⷣбныхъ же, и҆ сщ҃енномч҃нкѡвъ, сконча́вшихсѧ кро́вїю.

Є҆ѧ́же сподо́бистесѧ сла́досте, и҆ сла́вы непрее́мныѧ страда́льчествовавшыѧ жєны̀ мꙋ́жественнѡ, и҆ по́стничествовавшыѧ свѣ́тлѡ, и҆ врага̀ побѣди́вшыѧ: сеѧ̀ на́мъ бы́ти въ прича́стїи, ᲂу҆моли́те.

Бг҃оро́диченъ: Бг҃обл҃года́тнѣйшаѧ чⷭ҇таѧ, съ го́рними чи́нми, со всѣ́ми мꙋ́дрыми а҆пⷭ҇лы, и҆ мч҃нки сщ҃е́нными, и҆ прⷪ҇ро́ки, ᲂу҆молѝ, ꙗ҆́кѡ да коне́чное разрѣше́нїе грѣхѡ́въ прїи́мемъ.

Сѣда́ленъ, гла́съ и҃.

Подо́бенъ: Премꙋ́дрости сло́во:

Пра́ѻтєцъ, ѻ҆тє́цъ, патрїа̑рхъ, а҆пⷭ҇лъ, и҆ мч҃нкъ, прⷪ҇ро́кѡвъ, ст҃и́телей, и҆ прпⷣбныхъ твои́хъ, по́стникѡвъ и҆ првⷣныхъ же, и҆ всѧ́кагѡ и҆́мене пи́саннагѡ въ кни́зѣ жи́зни, ст҃ꙋ́ю па́мѧть соверша́юще хрⷭ҇тѐ бж҃е, всѣ́хъ подвиза́емъ на мл҃твꙋ молѧ́щесѧ, ᲂу҆мирѝ мі́ръ тво́й тѣ́ми ꙗ҆́кѡ чл҃вѣколю́бецъ, да всѝ вопїе́мъ тѝ: бж҃е прославлѧ́емый въ совѣ́тѣ ст҃ы́хъ твои́хъ, ты̀ є҆сѝ вои́стиннꙋ просла́вивый досто́йнѡ па́мѧть и҆́хъ.

Сла́ва, и҆ ны́нѣ, бг҃оро́диченъ:

Нбⷭ҇нꙋю две́рь и҆ ковче́гъ, прест҃ꙋ́ю го́рꙋ, свѣ́тлый ѻ҆́блакъ воспои́мъ, неѡпали́мꙋю кꙋпинꙋ̀, слове́сный ра́й, є҆́ѵы воззва́нїе, вселе́нныѧ всеѧ̀ вели́кое сокро́вище, ꙗ҆́кѡ сп҃се́нїе въ не́й содѣ́ласѧ мі́рови, и҆ ѡ҆ставле́нїе дре́внихъ согрѣше́нїй. сегѡ̀ ра́ди вопїе́мъ є҆́й: моли́сѧ сн҃ꙋ твоемꙋ̀ прегрѣше́нїй ѡ҆ставле́нїе дарова́ти бл҃гоче́стнѡ покланѧ́ющымсѧ всест҃о́мꙋ ржⷭ҇твꙋ̀ твоемꙋ̀.

Пѣ́снь д҃.

І҆рмо́съ: Ты̀ моѧ̀ крѣ́пость гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Ви́ждь хрⷭ҇тѐ, и҆ да не пре́зриши мѧ̀, молю́сѧ, грѣхѝ всѧ́кими содержи́маго: но мл҃твами сщ҃е́нныхъ, всѣ́хъ твои́хъ а҆́гг҃лѡвъ, съ мч҃нки, и҆ а҆пⷭ҇лы твои́ми, ᲂу҆ще́дри мѧ̀, сп҃сѝ, и҆ твоегѡ̀ црⷭ҇твїѧ наслѣ́дника мѧ̀ покажѝ, ꙗ҆́кѡ бл҃гоꙋтро́бенъ.

Проповѣ́дниче хрⷭ҇то́въ прⷣте́че, ᲂу҆га́сшїй моегѡ̀ се́рдца свѣти́льникъ ны́нѣ возжзѝ, свѣти́льникъ сл҃нца ᲂу҆́мнагѡ ᲂу҆жѐ бы́вый: и҆ съ прⷪ҇ро́ки молѝ, и҆ всѣ́ми ст҃ы́ми, въ те́пломъ покаѧ́нїи жи́знь прейти́ ми привре́меннꙋю.

Возсїѧ́й мѝ свѣ́тъ покаѧ́нїѧ чл҃вѣколю́бче, хода́тайствы въ преподо́бїи рабо́тавшихъ тебѣ̀ і҆и҃се, сщ҃е́нныхъ же́нъ, і҆ера́рхѡвъ, и҆ мч҃нкѡвъ твои́хъ, проповѣ́дникѡвъ, а҆пⷭ҇лѡвъ, и҆ сщ҃енномч҃нкѡвъ, и҆ полꙋчи́ти сп҃се́нїе сподо́би.

Бг҃оро́диченъ: Є҆ди́на бг҃а воплоти́вшагосѧ ро́ждшаѧ, всест҃а́ѧ, того̀ молѝ, въ де́нь стра́шный всѧ̑ ны̀ сп҃стѝ, и҆ мꙋ́ки и҆зба́вити, живота̀ вѣ́чнагѡ и҆ свѣ́та сподо́бити, и҆ съ си́ми до́брѣ слꙋжи́вшими.

Пѣ́снь є҃.

І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тьма̀ ѻ҆каѧ́ннаго; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Оу҆́мнїи тѧ̀ си̑лы ны́нѣ ᲂу҆молѧ́ютъ бл҃гоꙋтро́бне гдⷭ҇и, вла̑сти, прⷭ҇то́ли, серафі́ми, гдⷭ҇ьства же, а҆́гг҃ли со а҆рха́гг҃лы, и҆ нача̑ла: млⷭ҇тивъ бꙋ́ди лю́демъ твои̑мъ и҆ сп҃сѝ ꙗ҆́кѡ бл҃гоꙋтро́бенъ.

Странноѡбра́знѡ пожи́вый прⷣте́че бл҃же́нне, стра́нна мѧ̀ сотворѝ всѧ́кагѡ мꙋче́нїѧ, і҆и҃са ᲂу҆молѧ́ѧ чл҃вѣколю́бца, съ прⷪ҇ро́ки бж҃е́ственными, и҆ а҆пⷭ҇лы, і҆ера́рхи, и҆ мч҃нкѡвъ ст҃ы́ми во́инствы.

Твоѧ̑ і҆ера́рхи, и҆ сщ҃енномч҃нки просвѣти́вый гдⷭ҇и, и҆ чⷭ҇тны́хъ же́нъ страда́льчествовавшихъ, бж҃е́ственное сосло́вїе возвели́чивый, тѣ́хъ мл҃твами ᲂу҆ще́дри мѧ̀, вѣ́дый моѧ̑ безмѣ̑рнаѧ прегрѣшє́нїѧ.

Бг҃оро́диченъ: Всест҃а́ѧ дв҃о, сло́во всест҃о́е роди́вшаѧ, дꙋшѝ моеѧ̀ всѧ́кое ᲂу҆ны́нїе и҆ печа́ль ѿженѝ, и҆ бл҃гоꙋспѣ́й мо́й по́мыслъ бж҃е́ствєннаѧ дѣ́ѧти, да вѣ́рою и҆ любо́вїю сла́влю тѧ̀.

Пѣ́снь ѕ҃.

І҆рмо́съ: Ѡ҆чи́сти мѧ̀ сп҃се, мнѡ́га во беззакѡ́нїѧ моѧ̑, и҆ и҆з̾ глꙋбины̀ ѕѡ́лъ возведѝ молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е сп҃се́нїѧ моегѡ̀.

И҆зба́вити мѧ̀ та́мѡ лежа́щїѧ мꙋ́ки, моли́те херꙋві́ми, прⷭ҇то́ли, гдⷭ҇ьства, а҆́гг҃ли, а҆рха́гг҃ли, нача̑ла, и҆ си̑лы, влⷣкꙋ всеѧ̀ тва́ри.

Со а҆пⷭ҇льскими ли́ки, и҆ мч҃нкѡвъ во́инствы, прⷣте́че, проповѣ́дниче хрⷭ҇то́въ, ѡ҆брѣстѝ на́мъ млⷭ҇ть въ ча́съ сꙋда̀, і҆и҃са ᲂу҆молѝ чл҃вѣколю́бца бг҃а на́шего.

Страда́льчествовавшихъ тве́рдѡ же́нъ, ѳе́кла нача́льница, молѝ съ ни́ми, страсте́й ѡ҆мраче́нїѧ, и҆ и҆скꙋше́нїй многоѡбра́зныхъ и҆зба́витисѧ на́мъ.

Бг҃оро́диченъ: Пое́мъ тѧ̀ вѣ́рнїи, бг҃обл҃года́тнѣйшаѧ влⷣчце, препѣ́таго бо бг҃а пло́тїю родила̀ є҆сѝ: є҆го́же ᲂу҆молѝ нескве́рнаѧ, гра́дꙋ и҆ лю́дꙋ твоемꙋ̀ въ ми́рѣ спасти́сѧ.

Конда́къ, гла́съ и҃:

Ꙗ҆́кѡ нача́тки є҆стества̀, насади́телю тва́ри, вселе́ннаѧ прино́ситъ тѝ, гдⷭ҇и, бг҃онѡ́сныѧ мч҃нки. тѣ́хъ мл҃твами въ ми́рѣ глꙋбо́цѣ, цр҃ковь твою̀, жи́тельство твоѐ бцⷣею соблюдѝ, многомлⷭ҇тиве.

І҆́косъ: И҆̀же по все́й землѝ мꙋ́чившїисѧ, и҆ на нб҃са̀ пресели́вшїисѧ, и҆̀же стрⷭ҇ти хрⷭ҇то́вы подража́вшїи, и҆ стра̑сти на́шѧ ѿе́млющїи, здѣ̀ дне́сь собира́ютсѧ, перворожде́нныхъ показꙋ́юще цр҃ковь, ꙗ҆́кѡ го́рнїѧ ѡ҆́бразъ содержа́щꙋ, и҆ хрⷭ҇тꙋ̀ вопїю́щꙋ: бг҃ъ мо́й є҆сѝ ты̀, бцⷣею соблюди́ мѧ многомлⷭ҇тиве.

Пѣ́снь з҃.

І҆рмо́съ: Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ, ра́дованною ного́ю. ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.

Свѣ́та свѣ́ти вторі́и, пе́рвагѡ сꙋ́ще ст҃і́и а҆́гг҃ли, прича́стїемъ невеще́ственнымъ и҆ всебога́тымъ ᲂу҆ѧсни́стесѧ. тѣ́мже зовꙋ̀: ᲂу҆́мъ мо́й просвѣти́те, ѡ҆темне́нный при́снѡ житїѧ̀ страстьмѝ.

Ли́къ бл҃же́нный а҆пⷭ҇лѡвъ мо́литъ тѧ̀, съ бл҃же́ннымъ прⷣте́чею, стрⷭ҇тоте́рпцєвъ и҆ сщ҃е́нныхъ прⷪ҇ро́кѡвъ, і҆ера́рхѡвъ и҆ прпⷣбныхъ, чл҃вѣколю́бче, пре́зри всѣ́хъ на́съ согрѣшє́нїѧ, бл҃гослове́нъ є҆сѝ бж҃е ѻ҆тє́цъ на́шихъ.

Дꙋшѝ моеѧ̀ преложѝ хрⷭ҇тѐ, болѣ́знь, и҆ сїю̀ ᲂу҆ще́дри, сщ҃енномч҃нкѡвъ, і҆ера́рхѡвъ и҆ прпⷣбныхъ твои́хъ хода́тайствы: и҆ да не постыди́ши мѧ̀, є҆гда̀ и҆́мамъ твоемꙋ̀ прⷭ҇то́лꙋ предста́ти: бл҃гослове́нъ є҆сѝ бж҃е ѻ҆тє́цъ на́шихъ.

Бг҃оро́диченъ: Ꙗ҆́кѡ прⷭ҇то́лъ ѻ҆гнезра́чный, цр҃ѧ̀ но́сиши тва́ри: є҆го́же ᲂу҆молѝ дв҃о, со бл҃же́нными и҆ сщ҃е́нными жена́ми, црⷭ҇твїѧ є҆гѡ̀ сподо́бити мѧ̀, пѣсносло́вѧща вѣ́рнѡ предста́тельство твоѐ.

Пѣ́снь и҃.

І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею, сп҃се́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.

Ѽ херꙋві́ми ѻ҆гнезра́чнїи, серафі́ми многоѻчи́тїи, прⷭ҇то́ли, вла̑сти, и҆ нача̑ла, и҆ а҆́гг҃ли, и҆ всѝ а҆рха́гг҃ли, и҆ гдⷭ҇ьства сщ҃є́ннаѧ, со бл҃же́ннымъ моли́те прⷣте́чею, прⷪ҇ро́ки, а҆пⷭ҇лы, і҆ера́рхи, прпⷣбными, и҆ всѣ́ми пра́ведными, на́мъ поми́ловатисѧ.

Дади́те на́мъ по́мощь пе́тре, па́ѵле, і҆а́кѡве, и҆ варѳоломе́е, и҆ ѳѡмо̀, и҆ фїлі́ппе, а҆ндре́е, ма́рко съ лꙋко́ю, і҆ѡа́нне дрꙋ́же хрⷭ҇то́въ, сі́мѡне, и҆ і҆ꙋ́до всебл҃же́нне, и҆ преве́лїй матѳе́е, ѡ҆долѣва́ємымъ и҆скꙋше́ньми лестца̀, и҆ недоꙋмѣва́ємымъ.

Со́лнечныхъ свѣтлѣ́йшїй бы́вый сїѧ́нїй стефа́не, пе́рвый страда́льцєвъ, съ си́ми молѝ ѡ҆зари́тисѧ всѣ̑мъ на́мъ, и҆ грѣха̀ и҆збѣжа́ти всѧ́кагѡ мра́ка, вопїю́щымъ влⷣцѣ: сщ҃е́нницы бл҃гослови́те, лю́дїе превозноси́те во всѧ̑ вѣ́ки.

Бг҃оро́диченъ: Послѣ́довати мнѣ̀, всечⷭ҇таѧ, преподо́бнѣ пожи́вшымъ, жи́тельствомъ добродѣ́тельнымъ сотворѝ, врагѝ поража́ющи неща́днѡ мѧ̀ ѡ҆скорблѧ́ющыѧ, и҆ къ плотски̑мъ ползꙋ́щꙋ страсте́мъ непреста́ннѡ стꙋжа́ющыѧ, да ра́дꙋѧсѧ зовꙋ̀: лю́дїе превозноси́те хрⷭ҇та̀ во вѣ́ки.

Пѣ́снь ѳ҃.

І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее нб҃съ: тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.

Ѽ бж҃е́ственныѧ вла̑сти, и҆ херꙋві́ми, серафі́ми, гдⷭ҇ьства, а҆́гг҃ли, прⷭ҇то́ли, нача̑ла всѧ̑, и҆ си̑лы всесла̑вныѧ, и҆ сщ҃е́ннїи а҆рха́гг҃ли, мл҃твꙋ твори́те къ бг҃ꙋ, до́брѣ на́мъ пожи́ти, и҆ полꙋчи́ти сп҃се́нїе, и҆ ѿ лю́тыхъ и҆зба́витисѧ.

Со всѣ́ми прⷪ҇ро́ки, ꙗ҆́кѡ прⷪ҇ро́къ бы́вый преизѧ́щншїй прⷣте́че, бл҃ги́хъ всѣ́хъ сподо́би и҆ на́съ ѡ҆ѕло́бленныхъ страстьмѝ, и҆ и҆скꙋше́ньми лꙋка́вагѡ при́снѡ содержи́мыхъ, и҆ житїѧ̀ лестьмѝ, ꙗ҆́кѡ да ва́съ вѣ́рою почита́емъ.

Бж҃е́ственнаѧ а҆пⷭ҇лѡвъ всесла́внаѧ двоенадесѧ́тице, съ мч҃нки всѣ́ми, сщ҃еннодѣ́йственники, и҆ сщ҃енномч҃нки, сщ҃е́нными прⷪ҇ро́ки, и҆ бл҃же́нными: прпⷣбныѧ, првⷣныѧ, и҆ тве́рдѡ страда́льчествовавшыѧ жєны̀, ѡ҆ на́съ мл҃твꙋ чл҃вѣколю́бцꙋ сотвори́те.

Бг҃оро́диченъ: Бл҃голюби́ваѧ дв҃о, бл҃га́го молѝ сн҃а твоего̀ и҆ гдⷭ҇а, вы́нꙋ ѡ҆ѕло́бленнꙋю прило́гами дꙋшетли́телѧ ѕмі́ѧ, и҆ и҆знемо́гшꙋю мою̀ дꙋ́шꙋ и҆сцѣли́ти и҆ сп҃стѝ, и҆ всѧ́кими ᲂу҆бл҃жи́ти свѣтоно́сными восхожде́ньми.

Воспрѧнꙋ́въ без̾ лѣ́ности, и҆ и҆стрезви́всѧ, воста́въ ѿ сна̀, рцы̀ сїѐ:

Во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, а҆ми́нь.

Посе́мъ посто́й ма́лѡ молча̀, до́ндеже ᲂу҆тиша́тсѧ всѧ̑ чꙋ̑вствїѧ, и҆ тогда̀ сотворѝ трѝ покло́ны, глаго́лѧ:

Гдⷭ҇и і҆и҃се хрⷭ҇тѐ сн҃е бж҃їй, поми́лꙋй мѧ̀ грѣ́шнаго.

Та́же начнѝ си́це: Гдⷭ҇и і҆и҃се хрⷭ҇тѐ сн҃е бж҃їй, мл҃твъ ра́ди пречⷭ҇тыѧ твоеѧ̀ мт҃ре, и҆ всѣ́хъ ст҃ы́хъ, поми́лꙋй на́съ, а҆ми́нь.

Та́же: Сла́ва тебѣ̀ бж҃е на́шъ, сла́ва тебѣ̀. Цр҃ю̀ нбⷭ҇ный: Трист҃о́е. По Ѻ҆́ч҃е на́шъ: тропарѝ трⷪ҇чны:

Воста́вше ѿ сна̀: Та́же, Гдⷭ҇и поми́лꙋй, в҃і, И҆ мл҃твꙋ: Ѿ сна̀ воста́въ: Та́же, Прїиди́те, поклони́мсѧ: три́жды. ѱало́мъ н҃: Поми́лꙋй мѧ̀ бж҃е: и҆ Вѣ́рꙋю во є҆ди́наго бг҃а ѻ҆ц҃а̀:

Та́же, мл҃тва а҃, ст҃а́гѡ мака́рїа вели́кагѡ:

Бж҃е, ѡ҆чи́сти мѧ̀ грѣ́шнаго, ꙗ҆́кѡ николи́же сотвори́хъ бл҃го́е пред̾ тобо́ю, но и҆зба́ви мѧ̀ ѿ лꙋка́вагѡ, и҆ да бꙋ́детъ во мнѣ̀ во́лѧ твоѧ̀, да неѡсꙋжде́ннѡ ѿве́рзꙋ ᲂу҆ста̀ моѧ̑ недостѡ́йнаѧ, и҆ восхвалю̀ и҆́мѧ твоѐ ст҃о́е, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Мл҃тва в҃, тогѡ́жде ст҃а́гѡ:

Ѿ сна̀ воста́въ полꙋ́нощнꙋю пѣ́снь приношꙋ́ ти сп҃се, и҆ припа́даѧ вопїю́ ти: не да́ждь мѝ ᲂу҆снꙋ́ти во грѣхо́внѣй сме́рти, но ᲂу҆ще́дри мѧ̀ распны́йсѧ во́лею и҆ лежа́щаго мѧ̀ въ лѣ́ности ᲂу҆скори́въ возста́ви, и҆ сп҃си́ мѧ въ предстоѧ́нїи и҆ мл҃твѣ: и҆ по снѣ̀ нощнѣ́мъ возсїѧ́й мѝ де́нь безгрѣ́шенъ хрⷭ҇тѐ бж҃е, и҆ сп҃си́ мѧ.

Мл҃тва г҃, тогѡ́жде ст҃а́гѡ:

Къ тебѣ̀ влⷣко чл҃вѣколю́бче, ѿ сна̀ воста́въ прибѣга́ю, и҆ на дѣла̀ твоѧ̑ подвиза́юсѧ млⷭ҇рдїемъ твои́мъ, молю́сѧ тебѣ̀: помозѝ мнѣ̀ на всѧ́кое вре́мѧ, во всѧ́кой ве́щи, и҆ и҆зба́ви мѧ̀ ѿ всѧ́кїѧ мїрскі́ѧ ѕлы́ѧ ве́щи, и҆ дїа́вольскагѡ поспѣше́нїѧ, и҆ сп҃си́ мѧ, и҆ введѝ въ црⷭ҇тво твоѐ вѣ́чное. ты́ бо є҆сѝ мо́й сотвори́тель, и҆ всѧ́комꙋ бл҃гꙋ промы́сленникъ и҆ пода́тель, ѡ҆ тебѣ́ же всѐ ᲂу҆пова́нїе моѐ, и҆ тебѣ̀ сла́вꙋ возсыла́ю, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Мл҃тва д҃, тогѡ́жде ст҃а́гѡ мака́рїа:

Гдⷭ҇и, и҆́же мно́гою твое́ю бл҃гостїю и҆ вели́кими щедро́тами твои́ми, да́лъ є҆сѝ мнѣ̀ рабꙋ̀ твоемꙋ̀ мимоше́дшее вре́мѧ но́щи сеѧ̀ без̾ напа́сти прейтѝ ѿ всѧ́кагѡ ѕла̀ проти́вна: ты̀ са́мъ влⷣко всѧ́ческихъ тво́рче, сподо́би мѧ̀ и҆́стиннымъ твои́мъ свѣ́томъ, и҆ просвѣще́ннымъ се́рдцемъ твори́ти во́лю твою̀, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Мл҃тва є҃:

Гдⷭ҇и вседержи́телю, бж҃е си́лъ, и҆ всѧ́кїѧ пло́ти, въ вы́шнихъ живы́й, и҆ на смирє́нныѧ призира́ѧй, сердца́ же и҆ ᲂу҆трѡ́бы и҆спытꙋ́ѧй, и҆ сокровє́ннаѧ человѣ́кѡвъ ꙗ҆́вѣ предвѣ́дый, безнача́льный и҆ присносꙋ́щный свѣ́те, ᲂу҆ негѡ́же нѣ́сть премѣне́нїѧ, и҆лѝ преложе́нїѧ ѡ҆сѣне́нїе: са́мъ безсме́ртный цр҃ю̀, прїимѝ молє́нїѧ на̑ша, ꙗ҆̀же въ настоѧ́щее вре́мѧ, на мно́жество твои́хъ щедро́тъ дерза́юще, ѿ скве́рныхъ къ тебѣ̀ ᲂу҆сте́нъ твори́мъ, и҆ ѡ҆ста́ви на́мъ прегрѣшє́нїѧ на̑ша, ꙗ҆̀же дѣ́ломъ, и҆ сло́вомъ, и҆ мы́слїю, вѣ́дѣнїемъ, и҆лѝ невѣ́дѣнїемъ согрѣшє́ннаѧ на́ми, и҆ ѡ҆чи́сти ны̀ ѿ всѧ́кїѧ скве́рны пло́ти и҆ дꙋ́ха. и҆ да́рꙋй на́мъ бо́дреннымъ се́рдцемъ, и҆ тре́звенною мы́слїю, всю̀ настоѧ́щагѡ житїѧ̀ но́щь прейтѝ, ѡ҆жида́ющымъ прише́ствїѧ свѣ́тлагѡ и҆ ꙗ҆вле́ннагѡ днѐ, є҆диноро́днагѡ твоегѡ̀ сн҃а, гдⷭ҇а и҆ бг҃а и҆ сп҃са на́шегѡ і҆и҃са хрⷭ҇та̀: во́ньже со сла́вою сꙋдїѧ̀ всѣ́хъ прїи́детъ, комꙋ́ждо ѿда́ти по дѣлѡ́мъ є҆гѡ̀, да не па́дше и҆ ѡ҆блѣни́вшесѧ, но бо́дрствꙋюще, и҆ воздви́жени въ дѣ́ланїе, ѡ҆брѧ́щемсѧ гото́ви, въ ра́дость и҆ бж҃е́ственный черто́гъ сла́вы є҆гѡ̀ совни́демъ, и҆дѣ́же пра́зднꙋющихъ гла́съ непреста́нный, и҆ неизрече́ннаѧ сла́дость зрѧ́щихъ твоегѡ̀ лица̀ добро́тꙋ неизрече́ннꙋю: ты́ бо є҆сѝ и҆́стинный свѣ́тъ, просвѣща́ѧй и҆ ѡ҆сщ҃а́ѧй всѧ́чєскаѧ, и҆ тѧ̀ пое́тъ всѧ̀ тва́рь во вѣ́ки вѣкѡ́въ, а҆ми́нь.

Мл҃тва ѕ҃:

Тѧ̀ бл҃гослови́мъ вы́шнїй бж҃е, и҆ гдⷭ҇и млⷭ҇ти, творѧ́щаго при́снѡ съ на́ми вели̑каѧ же и҆ неизслѣ́дѡваннаѧ, сла̑внаѧ же и҆ ᲂу҆жа̑снаѧ, и҆́хже нѣ́сть числа̀, пода́вшаго на́мъ со́нъ во ᲂу҆покое́нїе не́мощи на́шеѧ, и҆ ѡ҆слабле́нїе трꙋдѡ́въ многотрꙋ́дныѧ пло́ти. бл҃годари́мъ тѧ̀, ꙗ҆́кѡ не погꙋби́лъ є҆сѝ на́съ со беззако́ньми на́шими, но чл҃вѣколю́бствовалъ є҆сѝ ѻ҆бы́чнѡ, и҆ въ неча́ѧнїи лежа́щыѧ ны̀ воздви́глъ є҆сѝ, во є҆́же славосло́вити держа́вꙋ твою̀. тѣ́мже мо́лимъ безмѣ́рнꙋю твою̀ бл҃гость, просвѣтѝ на́шѧ мы̑сли, ѻ҆чеса̀ и҆ ᲂу҆́мъ на́шъ ѿ тѧ́жкагѡ сна̀ лѣ́ности возста́ви: ѿве́рзи на̑ша ᲂу҆ста̀, и҆ и҆спо́лни ѧ҆̀ твоегѡ̀ хвале́нїѧ, ꙗ҆́кѡ да возмо́жемъ непоколе́блемѡ пѣ́ти же и҆ и҆сповѣ́датисѧ тебѣ̀ во всѣ́хъ и҆ ѿ всѣ́хъ сла́вимомꙋ бг҃ꙋ, безнача́льномꙋ ѻ҆ц҃ꙋ̀, со є҆диноро́днымъ твои́мъ сн҃омъ, и҆ всест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Пѣ́снь полꙋ́нощнаѧ, ко прест҃ѣ́й бцⷣѣ.

Мл҃тва з҃:

Воспѣва́ю бл҃года́ть твою̀ влⷣчце, молю́ тѧ, ᲂу҆́мъ мо́й ѡ҆бл҃годатѝ. Стꙋпа́ти пра́вѡ мѧ̀ наста́ви, пꙋтю̀ хрⷭ҇то́выхъ за́повѣдей. Бдѣ́ти къ пѣ́сни ᲂу҆крѣпѝ, ᲂу҆ны́нїѧ со́нъ ѿгонѧ́ющи. Свѧ́зана плени́цами грѣхопаде́нїй, мольба́ми твои́ми разрѣшѝ бг҃оневѣ́сто. Въ нощѝ мѧ̀ и҆ во днѝ сохранѧ́й, борю́щихъ вра̑гъ и҆збавлѧ́ющи мѧ̀. Жизнода́телѧ бг҃а ро́ждшаѧ, ᲂу҆мерщвле́на мѧ̀ страстьмѝ ѡ҆живѝ. Ꙗ҆́же свѣ́тъ невече́рнїй ро́ждшаѧ, дꙋ́шꙋ мою̀ ѡ҆слѣ́пшꙋю просвѣтѝ. ѽ ди́внаѧ влⷣчнѧ пала́то! до́мъ дх҃а бж҃е́ственна менѐ сотворѝ. Врача̀ ро́ждшаѧ, ᲂу҆врачꙋ́й дꙋшѝ моеѧ̀ многолѣ̑тныѧ стра̑сти. Волнꙋ́ющасѧ жите́йскою бꙋ́рею, ко стези́ мѧ покаѧ́нїѧ напра́ви. И҆зба́ви мѧ̀ ѻ҆гнѧ̀ вѣ́чнꙋющагѡ, и҆ че́рвїѧ же ѕла́гѡ, и҆ та́ртара: Да мѧ̀ не ꙗ҆ви́ши бѣсѡ́мъ ра́дованїе, и҆́же мнѡ́гимъ грѣхѡ́мъ пови́нника. Но́ва сотворѝ мѧ̀ ѡ҆бетша́вшаго нечꙋ́вственными, пренепоро́чнаѧ, согрѣше́нїи. стра́нна мꙋ́ки всѧ́кїѧ покажи́ мѧ, и҆ всѣ́хъ влⷣкꙋ ᲂу҆молѝ. Нбⷭ҇наѧ мѝ ᲂу҆лꙋчи́ти весє́лїѧ, со всѣ́ми ст҃ы́ми сподо́би. Прест҃а́ѧ дв҃о, ᲂу҆слы́ши гла́съ непотре́бнагѡ раба̀ твоегѡ̀. Стрꙋю̀ дава́й мнѣ̀ слеза́мъ пречⷭ҇таѧ, дꙋшѝ моеѧ̀ скве́рнꙋ ѡ҆чища́ющи. Стена̑нїѧ ѿ се́рдца приношꙋ́ ти непреста́ннѡ, ᲂу҆се́рдствꙋй влⷣчце. Моле́бнꙋю слꙋ́жбꙋ мою̀ прїимѝ, и҆ бг҃ꙋ бл҃гоꙋтро́бномꙋ принесѝ. Превы́шшаѧ а҆́гг҃лъ, мїрска́гѡ мѧ̀ превы́шша сли́тїѧ сотворѝ. Свѣтоно́снаѧ сѣ́не нбⷭ҇наѧ, дх҃о́внꙋю бл҃года́ть во мнѣ̀ напра́ви. Рꙋ́цѣ воздѣ́ю и҆ ᲂу҆стнѣ̀ къ похвале́нїю, ѡ҆скверне́ны скве́рною всенепоро́чнаѧ. Дꙋшетлѣ́нныхъ мѧ̀ па́костей и҆зба́ви, хрⷭ҇та̀ прилѣ́жнѡ ᲂу҆молѧ́ющи: є҆мꙋ́же че́сть и҆ поклоне́нїе подоба́етъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Мл҃тва и҃, ко гдⷭ҇ꙋ на́шемꙋ і҆и҃сꙋ хрⷭ҇тꙋ̀:

Многомлⷭ҇тиве и҆ всемлⷭ҇тиве бж҃е мо́й, гдⷭ҇и і҆и҃се хрⷭ҇тѐ, мно́гїѧ ра́ди любвѐ сше́лъ и҆ воплоти́лсѧ є҆сѝ, ꙗ҆́кѡ да сп҃се́ши всѣ́хъ. И҆ па́ки сп҃се сп҃си́ мѧ по бл҃года́ти, молю́ тѧ. А҆́ще бо ѿ дѣ́лъ сп҃се́ши мѧ̀, нѣ́сть сѐ бл҃года́ть и҆ да́ръ, но до́лгъ па́че: є҆́й мно́гїй въ щедро́тахъ, и҆ неизрече́нный въ млⷭ҇ти. Вѣ́рꙋѧй бо въ мѧ̀, ре́клъ є҆сѝ, ѽ хрⷭ҇тѐ мо́й, жи́въ бꙋ́детъ и҆ не ᲂу҆́зритъ сме́рти во вѣ́ки. А҆́ще ᲂу҆́бѡ вѣ́ра ꙗ҆́же въ тѧ̀ сп҃са́етъ ѿча̑ѧнныѧ, сѐ вѣ́рꙋю, сп҃си́ мѧ, ꙗ҆́кѡ бг҃ъ мо́й є҆сѝ ты̀ и҆ созда́тель. Вѣ́ра же вмѣ́стѡ дѣ́лъ да вмѣни́тсѧ мнѣ̀, бж҃е мо́й, не взы́щеши дѣ́лъ ѿню́дъ ѡ҆правда́ющихъ мѧ̀. Но та̀ вѣ́ра моѧ̀ да довлѣ́етъ вмѣ́стѡ всѣ́хъ, та̀ да ѿвѣща́етъ, та̀ да ѡ҆правди́тъ мѧ̀, та̀ да пока́жетъ мѧ̀ прича́стника сла́вы твоеѧ̀ вѣ́чныѧ. Да не ᲂу҆́бѡ похи́титъ мѧ̀ сатана̀, и҆ похва́литсѧ, сло́ве, є҆́же ѿто́ргнꙋти мѧ̀ ѿ твоеѧ̀ рꙋкѝ и҆ ѡ҆гра́ды. Но и҆лѝ хощꙋ̀, сп҃сѝ мѧ̀, и҆лѝ не хощꙋ̀, хрⷭ҇тѐ сп҃се мо́й, предварѝ ско́рѡ, ско́рѡ, погибо́хъ: ты́ бо є҆сѝ бг҃ъ мо́й ѿ чре́ва ма́тере моеѧ̀. Сподо́би мѧ̀ гдⷭ҇и, ны́нѣ возлюби́ти тѧ̀, ꙗ҆́коже возлюби́хъ и҆ногда̀ то́й са́мый грѣ́хъ, и҆ па́ки порабо́тати тебѣ̀ без̾ лѣ́ности то́щнѡ, ꙗ҆́коже порабо́тахъ пре́жде сатанѣ̀ льсти́вомꙋ. Наипа́че же порабо́таю тебѣ̀ гдⷭ҇ꙋ и҆ бг҃ꙋ моемꙋ̀ і҆и҃сꙋ хрⷭ҇тꙋ̀, во всѧ̑ дни̑ живота̀ моегѡ̀, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Мл҃тва ѳ҃, храни́телю человѣ́ческїѧ жи́зни а҆́гг҃лꙋ.

Ст҃ы́й а҆́гг҃ле, предстоѧ́й ѻ҆каѧ́нной мое́й дꙋшѝ, и҆ стра́стной мое́й жи́зни, не ѡ҆ста́ви менѐ грѣ́шнагѡ, нижѐ ѿстꙋпѝ ѿ менѐ за невоздержа́нїе моѐ: не да́ждь мѣ́ста лꙋка́вомꙋ де́монꙋ ѡ҆блада́ти мно́ю, наси́льствомъ сме́ртнагѡ сегѡ̀ тѣлесѐ, ᲂу҆крѣпѝ бѣ́дствꙋющꙋю и҆ хꙋдꙋ́ю мою̀ рꙋ́кꙋ, и҆ наста́ви мѧ̀ на пꙋ́ть сп҃се́нїѧ. є҆́й ст҃ы́й а҆́гг҃ле бж҃їй, храни́телю и҆ покрови́телю ѻ҆каѧ́нныѧ моеѧ̀ дꙋшѝ и҆ тѣ́ла, всѧ̑ мнѣ̀ простѝ, є҆ли́кими тѧ̀ ѡ҆скорби́хъ во всѧ̑ дни̑ живота̀ моегѡ̀: и҆ а҆́ще что̀ согрѣши́хъ въ преше́дшꙋю но́щь сїю̀, покры́й мѧ̀ въ настоѧ́щїй де́нь, и҆ сохранѝ мѧ̀ ѿ всѧ́кагѡ и҆скꙋше́нїѧ проти́внагѡ, да ни въ ко́емъ грѣсѣ̀ прогнѣ́ваю бг҃а: и҆ моли́сѧ за мѧ̀ ко гдⷭ҇ꙋ, да ᲂу҆тверди́тъ мѧ̀ въ стра́сѣ свое́мъ, и҆ досто́йна пока́жетъ мѧ̀ раба̀ своеѧ̀ бл҃гости, а҆ми́нь.

Мл҃тва ᲂу҆́треннѧѧ коне́чнаѧ, ко прест҃ѣ́й бцⷣѣ:

Прест҃а́ѧ влⷣчце моѧ̀ бцⷣе, ст҃ы́ми твои́ми и҆ всеси́льными мольба́ми, ѿженѝ ѿ менѐ смире́ннагѡ и҆ ѻ҆каѧ́ннагѡ раба̀ твоегѡ̀ ᲂу҆ны́нїе, забве́нїе, неразꙋ́мїе, нерадѣ́нїе, и҆ всѧ̑ сквє́рнаѧ, лꙋка̑ваѧ и҆ хꙋ̑льнаѧ помышлє́нїѧ ѿ ѻ҆каѧ́ннагѡ моегѡ̀ се́рдца, и҆ ѿ помраче́ннагѡ ᲂу҆ма̀ моегѡ̀. И҆ погасѝ пла́мень страсте́й мои́хъ, ꙗ҆́кѡ ни́щъ є҆́смь и҆ ѻ҆каѧ́ненъ: и҆ и҆зба́ви мѧ̀ ѿ мно́гихъ и҆ лю́тыхъ воспомина́нїй, и҆ предпрїѧ́тїй, и҆ ѿ всѣ́хъ дѣ́йствъ ѕлы́хъ свободи́ мѧ. Ꙗ҆́кѡ бл҃гослове́на є҆сѝ ѿ всѣ́хъ родѡ́въ, и҆ сла́витсѧ пречⷭ҇тно́е и҆́мѧ твоѐ, во вѣ́ки вѣкѡ́въ, а҆ми́нь.

Та́же: Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ. И҆ ѿпꙋ́стъ.

Гдⷭ҇и і҆и҃се хрⷭ҇тѐ сн҃е бж҃їй, мл҃твъ ра́ди пречⷭ҇тыѧ твоеѧ̀ мт҃ре, прпⷣбныхъ и҆ бг҃оно́сныхъ ѻ҆тє́цъ на́шихъ, и҆ всѣ́хъ ст҃ы́хъ, сп҃си́ мѧ грѣ́шнаго.

Мл҃тва ѿ ѡ҆скверне́нїѧ.

Внегда̀ слꙋчи́читсѧ комꙋ̀ и҆скꙋси́тисѧ во снѣ̀ по дѣ́йствꙋ дїа́волю, воста́въ ѿ ло́жа твори́тъ сті́хъ, глаго́лѧ:

Мл҃твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ бж҃е на́шъ, поми́лꙋй на́съ, а҆ми́нь.

Глаго́летъ же мл҃твꙋ сїю̀ со ᲂу҆миле́нїемъ, и҆ сокрꙋше́ннымъ се́рдцемъ, ꙗ҆́кѡ ѡ҆сꙋ́жденникъ: потре́ба же тогда̀ и҆ слеза́мъ бы́ти.

Та́же глаго́летъ: Сла́ва тебѣ̀ бж҃е на́шъ, сла́ва тебѣ̀. Цр҃ю̀ нбⷭ҇ный: Трист҃о́е. По Ѻ҆́ч҃е на́шъ: Гдⷭ҇и поми́лꙋй, в҃і. Сла́ва, и҆ ны́нѣ: Прїиди́те, поклони́мсѧ: три́жды. И҆ ѱало́мъ н҃: Поми́лꙋй мѧ̀ бж҃е:

Та́же, мл҃тва ст҃а́гѡ вели́кагѡ васі́лїа:

Многомлⷭ҇тиве, нетлѣ́нне, нескве́рне, безгрѣ́шне гдⷭ҇и, ѡ҆чи́сти мѧ̀ непотре́бнаго раба̀ твоего̀ ѿ всѧ́кїѧ скве́рны плотскі́ѧ и҆ дꙋше́вныѧ, и҆ ѿ невнима́нїѧ и҆ ᲂу҆ны́нїѧ моегѡ̀ прибы́вшꙋю мѝ нечистотꙋ̀, со и҆нѣ́ми всѣ́ми беззако́ньми мои́ми: и҆ ꙗ҆ви́ мѧ нескве́рна влⷣко, за бл҃гость хрⷭ҇та̀ твоегѡ̀, и҆ ѡ҆ст҃и́ мѧ наше́ствїемъ прест҃а́гѡ твоегѡ̀ дх҃а: ꙗ҆́кѡ да возбнꙋ́въ ѿ мглы̀ нечи́стыхъ привидѣ́нїй дїа́вольскихъ, и҆ всѧ́кїѧ скве́рны, сподо́блюсѧ чи́стою со́вѣстїю ѿве́рсти сквє́рнаѧ моѧ̑ и҆ нечи̑стаѧ ᲂу҆ста̀, воспѣва́ти всест҃о́е и҆́мѧ твоѐ, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Чⷭ҇тнѣ́йшꙋю херꙋві̑мъ: Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ. И҆ ѿпꙋ́стъ.

Та́же сїѐ: Прїимѝ гдⷭ҇и мл҃твꙋ ѿ менѐ грѣ́шнагѡ, и҆ поми́лꙋй мѧ̀, ꙗ҆́кѡ бл҃гъ и҆ чл҃вѣколю́бецъ.

Нача́ло: Бл҃гослове́нъ бг҃ъ на́шъ: А҆́ще не і҆ере́й: Мл҃твами ст҃ы́хъ ѻ҆тє́цъ: Трист҃о́е. И҆ по Ѻ҆́ч҃е на́шъ: Тропарѝ сїѧ̑: Поми́лꙋй на́съ гдⷭ҇и, поми́лꙋй на́съ: Та́же, Гдⷭ҇и, поми́лꙋй, в҃і.

И҆ мл҃твы сїѧ̑ по рѧ́дꙋ, со внима́нїемъ и҆ ᲂу҆миле́нїемъ.

Мл҃тва а҃, ст҃а́гѡ мака́рїа вели́кагѡ, къ бг҃ꙋ ѻ҆ц҃ꙋ̀:

Бж҃е вѣ́чный, и҆ цр҃ю̀ всѧ́кагѡ созда́нїѧ, сподо́бивый мѧ̀ да́же въ ча́съ се́й доспѣ́ти, прости́ ми грѣхѝ, ꙗ҆̀же сотвори́хъ въ се́й де́нь, дѣ́ломъ, сло́вомъ и҆ помышле́нїемъ: и҆ ѡ҆чи́сти гдⷭ҇и смире́ннꙋю мою̀ дꙋ́шꙋ ѿ всѧ́кїѧ скве́рны пло́ти и҆ дꙋ́ха, и҆ да́ждь мѝ гдⷭ҇и, въ нощѝ се́й со́нъ прейтѝ въ ми́рѣ: да воста́въ ѿ смире́ннагѡ мѝ ло́жа, бл҃гоꙋгождꙋ̀ прест҃о́мꙋ и҆́мени твоемꙋ̀ во всѧ̑ дни̑ живота̀ моегѡ̀, и҆ поперꙋ̀ борю́щыѧ мѧ̀ врагѝ плотскі̑ѧ и҆ безплѡ́тныѧ: и҆ и҆зба́ви мѧ̀ гдⷭ҇и ѿ помышле́нїй сꙋ́етныхъ, ѡ҆сквернѧ́ющихъ мѧ̀ и҆ похоте́й лꙋка́выхъ. Ꙗ҆́кѡ твоѐ є҆́сть црⷭ҇тво, и҆ си́ла и҆ сла́ва, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Мл҃тва в҃, ко гдⷭ҇ꙋ на́шемꙋ і҆и҃сꙋ хрⷭ҇тꙋ̀, ст҃а́гѡ а҆нтїо́ха:

Вседержи́телю, сло́во ѻ҆́ч҃ее, са́мъ соверше́нъ сы́й і҆и҃се хрⷭ҇тѐ, мно́гагѡ ра́ди млⷭ҇рдїѧ твоегѡ̀, никогда́же ѿлꙋча́йсѧ менѐ раба̀ твоегѡ̀, но всегда̀ во мнѣ̀ почива́й: і҆и҃се, до́брый па́стырю твои́хъ ѻ҆ве́цъ, не преда́ждь менѐ крамолѣ̀ ѕмїи́нѣ, и҆ жела́нїю сатанинꙋ̀, не ѡ҆ста́ви менѐ, ꙗ҆́кѡ сѣ́мѧ тлѝ во мнѣ̀ є҆́сть. ты̀ ᲂу҆́бѡ гдⷭ҇и бж҃е покланѧ́емый, цр҃ю̀ ст҃ы́й і҆и҃се хрⷭ҇тѐ, спѧ́ща мѧ̀ сохранѝ немерца́ющимъ свѣ́томъ, дх҃омъ твои́мъ ст҃ы́мъ, и҆́мже ѡ҆ст҃и́лъ є҆сѝ твоѧ̑ ᲂу҆ч҃нкѝ. да́ждь гдⷭ҇и и҆ мнѣ̀ недосто́йномꙋ рабꙋ̀ твоемꙋ̀ сп҃се́нїѧ твоегѡ̀ на ло́жи мое́мъ: просвѣтѝ ᲂу҆́мъ мо́й свѣ́томъ ра́зꙋма ст҃а́гѡ є҆ѵⷢ҇лїа твоегѡ̀: дꙋ́шꙋ любо́вїю крⷭ҇та̀ твоегѡ̀: се́рдце чистото́ю словесѐ твоегѡ̀: тѣ́ло моѐ твое́ю стра́стїю безстра́стною: мы́сль мою̀ твои́мъ смире́нїемъ сохранѝ, и҆ воздви́гни мѧ̀ во вре́мѧ подо́бно на твоѐ славосло́вїе. Ꙗ҆́кѡ препросла́вленъ є҆сѝ со безнача́льнымъ твои́мъ ѻ҆ц҃е́мъ, и҆ прест҃ы́мъ дх҃омъ, во вѣ́ки, а҆ми́нь.

Мл҃тва г҃, ко прест҃о́мꙋ дх҃ꙋ:

Гдⷭ҇и, цр҃ю̀ нбⷭ҇ный, ᲂу҆тѣ́шителю, дш҃е и҆́стины, ᲂу҆млⷭ҇рдисѧ, и҆ поми́лꙋй мѧ̀ грѣ́шнаго раба̀ твоего̀, и҆ ѿпꙋсти́ ми недосто́йномꙋ, и҆ простѝ всѧ̑, є҆ли̑ка тѝ согрѣши́хъ дне́сь ꙗ҆́кѡ человѣ́къ, па́че же и҆ не ꙗ҆́кѡ человѣ́къ, но и҆ горѣ́е скота̀, вѡ́льныѧ моѧ̑ грѣхѝ и҆ невѡ́льныѧ, вѣ́дѡмыѧ и҆ невѣ́дѡмыѧ: ꙗ҆̀же ѿ ю҆́ности, и҆ ѿ наꙋ́ки ѕлы̀, и҆ ꙗ҆̀же сꙋ́ть ѿ на́гльства и҆ ᲂу҆ны́нїѧ. А҆́ще и҆́менемъ твои́мъ клѧ́хсѧ, и҆лѝ похꙋ́лихъ є҆̀ въ помышле́нїи мое́мъ: и҆лѝ кого̀ ᲂу҆кори́хъ, и҆лѝ ѡ҆клевета́хъ кого̀ гнѣ́вомъ мои́мъ, и҆лѝ ѡ҆печа́лихъ, и҆лѝ ѡ҆ че́мъ прогнѣ́вахсѧ: и҆лѝ солга́хъ, и҆лѝ безго́днѡ спа́хъ, и҆лѝ ни́щъ прїи́де ко мнѣ̀, и҆ презрѣ́хъ є҆го̀: и҆лѝ бра́та моего̀ ѡ҆печа́лихъ, и҆лѝ сва́дихъ, и҆лѝ кого̀ ѡ҆сꙋди́хъ: и҆лѝ развелича́хсѧ, и҆лѝ разгордѣ́хсѧ, и҆лѝ разгнѣ́вахсѧ: и҆лѝ стоѧ́щꙋ мѝ на мл҃твѣ, ᲂу҆́мъ мо́й ѡ҆ лꙋка́вствїи мі́ра сегѡ̀ подви́жесѧ, и҆лѝ развраще́нїе помы́слихъ: и҆лѝ ѡ҆б̾ѧдо́хсѧ, и҆лѝ ѡ҆пи́хсѧ, и҆лѝ без̾ ᲂу҆ма̀ смѣѧ́хсѧ: и҆лѝ лꙋка́вое помы́слихъ, и҆лѝ добро́тꙋ чꙋждꙋ́ю ви́дѣвъ, и҆ то́ю ᲂу҆ѧ́звенъ бы́хъ се́рдцемъ: и҆лѝ неподѡ́бнаѧ глаго́лахъ, и҆лѝ грѣхꙋ̀ бра́та моегѡ̀ посмѣѧ́хсѧ, моѧ̑ же сꙋ́ть безчи́слєннаѧ согрѣшє́нїѧ: и҆лѝ ѡ҆ мл҃твѣ неради́хъ, и҆лѝ и҆́но что̀ содѣ́ѧхъ лꙋка́вое, не по́мню, та̑ бо всѧ̑ и҆ бѡ́льша си́хъ содѣ́ѧхъ. поми́лꙋй мѧ̀ тво́рче мо́й влⷣко, ᲂу҆ны́лаго и҆ недосто́йнаго раба̀ твоего̀: и҆ ѡ҆ста́ви мѝ, и҆ ѿпꙋстѝ, и҆ прости́ мѧ ꙗ҆́кѡ бл҃гъ и҆ чл҃вѣколю́бецъ, да съ ми́ромъ лѧ́гꙋ, ᲂу҆снꙋ̀ и҆ почі́ю блꙋ́дный, грѣ́шный и҆ ѻ҆каѧ́нный а҆́зъ, и҆ поклоню́сѧ, и҆ воспою̀, и҆ просла́влю пречⷭ҇тно́е и҆́мѧ твоѐ, со ѻ҆ц҃е́мъ, и҆ є҆диноро́днымъ є҆гѡ̀ сн҃омъ, ны́нѣ и҆ при́снѡ, и҆ во вѣ́ки, а҆ми́нь.

Мл҃тва д҃, ст҃а́гѡ мака́рїа вели́кагѡ:

Что́ ти принесꙋ̀; и҆лѝ что́ ти возда́мъ, великодарови́тый безсме́ртный цр҃ю̀, ще́дре и҆ чл҃вѣколю́бче гдⷭ҇и; ꙗ҆́кѡ лѣнѧ́щасѧ менѐ на твоѐ ᲂу҆гожде́нїе, и҆ ничто́же бл҃го сотво́рша, приве́лъ є҆сѝ на коне́цъ мимоше́дшагѡ днѐ сегѡ̀, ѡ҆браще́нїе и҆ сп҃се́нїе дꙋшѝ мое́й стро́ѧ. млⷭ҇тивъ мѝ бꙋ́ди грѣ́шномꙋ, и҆ ѡ҆бнаже́нномꙋ всѧ́кагѡ дѣ́ла бл҃га, возста́ви па́дшꙋю мою̀ дꙋ́шꙋ, ѡ҆скверни́вшꙋюсѧ въ безмѣ́рныхъ согрѣше́нїихъ: и҆ ѿимѝ ѿ менѐ ве́сь по́мыслъ лꙋка́вый ви́димагѡ сегѡ̀ житїѧ̀, простѝ моѧ̑ согрѣшє́нїѧ є҆ди́не безгрѣ́шне, є҆́же тѝ согрѣши́хъ въ се́й де́нь вѣ́дѣнїемъ и҆ невѣ́дѣнїемъ, сло́вомъ, и҆ дѣ́ломъ, и҆ помышле́нїемъ, и҆ всѣ́ми мои́ми чꙋ́вствы. ты̀ са́мъ покрыва́ѧ, сохрани́ мѧ ѿ всѧ́кагѡ сопроти́внагѡ ѡ҆бстоѧ́нїѧ, бж҃е́ственною твое́ю вла́стїю, и҆ неизрече́ннымъ чл҃вѣколю́бїемъ, и҆ си́лою. ѡ҆чи́сти бж҃е, ѡ҆чи́сти мно́жество грѣхѡ́въ мои́хъ. бл҃говолѝ гдⷭ҇и, и҆зба́вити мѧ̀ ѿ сѣ́ти лꙋка́вагѡ, и҆ сп҃сѝ стра́стнꙋю мою̀ дꙋ́шꙋ, и҆ ѡ҆сѣни́ мѧ свѣ́томъ лица̀ твоегѡ̀, є҆гда̀ прїи́деши во сла́вѣ: и҆ неѡсꙋжде́нна ны́нѣ сно́мъ ᲂу҆снꙋ́ти сотворѝ, и҆ без̾ мечта́нїѧ, и҆ несмꙋще́нъ по́мыслъ раба̀ твоегѡ̀ соблюдѝ, и҆ всю̀ сатанинꙋ̀ дѣ́тель ѿженѝ ѿ менѐ: и҆ просвѣти́ ми разꙋ̑мныѧ ѻ҆́чи сердє́чныѧ, да не ᲂу҆снꙋ̀ въ сме́рть. и҆ посли́ ми а҆́гг҃ла ми́рна, храни́телѧ и҆ наста́вника дꙋшѝ и҆ тѣ́лꙋ моемꙋ̀, да и҆зба́витъ мѧ̀ ѿ вра̑гъ мои́хъ: да воста́въ со ѻ҆дра̀ моегѡ̀, принесꙋ́ ти бл҃года́рствєнныѧ мольбы̑. є҆́й гдⷭ҇и, ᲂу҆слы́ши мѧ̀ грѣ́шнаго и҆ ᲂу҆бо́гаго раба̀ твоего̀, и҆зволе́нїемъ и҆ со́вѣстїю: да́рꙋй мѝ воста́вшꙋ словесє́мъ твои̑мъ поꙋчи́тисѧ, и҆ ᲂу҆ны́нїе бѣсо́вское дале́че ѿ менѐ ѿгна́но бы́ти сотворѝ твои́ми а҆́гг҃лы: да бл҃гословлю̀ и҆́мѧ твоѐ ст҃о́е, и҆ просла́влю, и҆ сла́влю пречⷭ҇тꙋю бцⷣꙋ мр҃і́ю, ю҆́же да́лъ є҆сѝ на́мъ грѣ̑шнымъ застꙋпле́нїе, и҆ прїимѝ сїю̀ молѧ́щꙋюсѧ за ны̀. вѣ́мъ бо, ꙗ҆́кѡ подража́етъ твоѐ чл҃вѣколю́бїе, и҆ молѧ́щисѧ не престае́тъ. тоѧ̀ застꙋпле́нїемъ, и҆ чⷭ҇тна́гѡ крⷭ҇та̀ зна́менїемъ, и҆ всѣ́хъ ст҃ы́хъ твои́хъ ра́ди, ᲂу҆бо́гꙋю дꙋ́шꙋ мою̀ соблюдѝ і҆и҃се хрⷭ҇тѐ бж҃е на́шъ: ꙗ҆́кѡ ст҃ъ є҆сѝ, и҆ препросла́вленъ во вѣ́ки, а҆ми́нь.

Мл҃тва є҃:

Гдⷭ҇и бж҃е на́шъ, є҆́же согрѣши́хъ во днѝ се́мъ сло́вомъ, дѣ́ломъ и҆ помышле́нїемъ, ꙗ҆́кѡ бл҃гъ и҆ чл҃вѣколю́бецъ прости́ ми: ми́ренъ со́нъ и҆ безмѧте́женъ да́рꙋй мѝ: а҆́гг҃ла твоего̀ храни́телѧ послѝ покрыва́юща и҆ соблюда́юща мѧ̀ ѿ всѧ́кагѡ ѕла̀: ꙗ҆́кѡ ты̀ є҆сѝ храни́тель дꙋша́мъ и҆ тѣлесє́мъ на́шымъ, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Мл҃тва ѕ҃:

Гдⷭ҇и бж҃е на́шъ, въ него́же вѣ́ровахомъ, и҆ є҆гѡ́же и҆́мѧ па́че всѧ́кагѡ и҆́мене призыва́емъ, да́ждь на́мъ ко снꙋ̀ ѿходѧ́щымъ ѡ҆сла́бꙋ дꙋшѝ и҆ тѣ́лꙋ, и҆ соблюдѝ на́съ ѿ всѧ́кагѡ мечта́нїѧ, и҆ те́мныѧ сла́сти кромѣ̀: ᲂу҆ста́ви стремле́нїе страсте́й, ᲂу҆гасѝ разжжє́нїѧ воста́нїѧ тѣле́снагѡ. да́ждь на́мъ цѣломꙋ́дреннѣ пожи́ти дѣ́лы и҆ словесы̀: да добродѣ́тельное жи́тельство воспрїе́млюще, ѡ҆бѣтова́нныхъ не ѿпаде́мъ бл҃ги́хъ твои́хъ, ꙗ҆́кѡ бл҃гослове́нъ є҆сѝ во вѣ́ки, а҆ми́нь.

Мл҃тва з҃, ст҃а́гѡ і҆ѡа́нна златоꙋ́стагѡ.

Мл҃твы молє́бныѧ число́мъ два́десѧтимъ четы́ремъ часѡ́мъ, дневны̑мъ и҆ нощны̑мъ.

Дне́ви:

[а҃] Гдⷭ҇и, не лишѝ менѐ нбⷭ҇ныхъ твои́хъ бла̑гъ. [в҃] Гдⷭ҇и, и҆зба́ви мѧ̀ вѣ́чныхъ мꙋ́къ. [г҃] Гдⷭ҇и, ᲂу҆мо́мъ ли и҆лѝ помышле́нїемъ, сло́вомъ и҆лѝ дѣ́ломъ согрѣши́хъ, прости́ мѧ. [д҃] Гдⷭ҇и, и҆зба́ви мѧ̀ всѧ́кагѡ невѣ́дѣнїѧ и҆ забве́нїѧ, и҆ малодꙋ́шїѧ, и҆ ѡ҆камене́ннагѡ нечꙋ́вствїѧ. [є҃] Гдⷭ҇и, и҆зба́ви мѧ̀ ѿ всѧ́кагѡ и҆скꙋше́нїѧ. [ѕ҃] Гдⷭ҇и, просвѣтѝ моѐ се́рдце, є҆́же помрачѝ лꙋка́вое похотѣ́нїе. [з҃] Гдⷭ҇и, а҆́зъ ꙗ҆́кѡ человѣ́къ согрѣши́хъ, ты́ же ꙗ҆́кѡ бг҃ъ ще́дръ поми́лꙋй мѧ̀, ви́дѧ не́мощь дꙋшѝ моеѧ̀. [и҃] Гдⷭ҇и, послѝ бл҃года́ть твою̀ въ по́мощь мнѣ̀, да просла́влю и҆́мѧ твоѐ ст҃о́е. [ѳ҃] Гдⷭ҇и і҆и҃се хрⷭ҇тѐ, напиши́ мѧ раба̀ твоего̀ въ кни́зѣ живо́тнѣй, и҆ да́рꙋй мѝ коне́цъ бл҃гі́й. [і҃] Гдⷭ҇и, бж҃е мо́й, а҆́ще и҆ ничто́же бл҃го сотвори́хъ пред̾ тобо́ю, но да́ждь мѝ, по бл҃года́ти твое́й, положи́ти нача́ло бл҃го́е. [а҃і] Гдⷭ҇и, ѡ҆кропѝ въ се́рдцы мое́мъ ро́сꙋ бл҃года́ти твоеѧ̀. [в҃і] Гдⷭ҇и нб҃сѐ и҆ землѝ, помѧни́ мѧ грѣ́шнаго раба̀ твоего̀, стꙋ́днаго и҆ нечи́стаго, во црⷭ҇твїи твое́мъ, а҆ми́нь.

Но́щи:

[а҃] Гдⷭ҇и, въ покаѧ́нїи прїими́ мѧ. [в҃] Гдⷭ҇и, не ѡ҆ста́ви менѐ. [г҃] Гдⷭ҇и, не введѝ менѐ въ напа́сть. [д҃] Гдⷭ҇и, да́ждь мѝ мы́сль бл҃гꙋ. [є҃] Гдⷭ҇и, да́ждь мѝ сле́зы, и҆ па́мѧть сме́ртнꙋю, и҆ ᲂу҆миле́нїе. [ѕ҃] Гдⷭ҇и, да́ждь мѝ по́мыслъ и҆сповѣ́данїѧ грѣхѡ́въ мои́хъ. [з҃] Гдⷭ҇и, да́ждь мѝ смире́нїе, цѣломꙋ́дрїе и҆ послꙋша́нїе. [и҃] Гдⷭ҇и, да́ждь мѝ терпѣ́нїе, великодꙋ́шїе и҆ кро́тость. [ѳ҃] Гдⷭ҇и, вселѝ въ мѧ̀ ко́рень бл҃ги́хъ, стра́хъ тво́й въ се́рдце моѐ. [і҃] Гдⷭ҇и, сподо́би мѧ̀ люби́ти тѧ̀ ѿ всеѧ̀ дꙋшѝ моеѧ̀ и҆ помышле́нїѧ, и҆ твори́ти во все́мъ во́лю твою̀. [а҃і] Гдⷭ҇и, покры́й мѧ̀ ѿ человѣ̑къ нѣ́которыхъ, и҆ бѣсѡ́въ, и҆ страсте́й, и҆ ѿ всѧ́кїѧ и҆ны́ѧ неподо́бныѧ ве́щи. [в҃і] Гдⷭ҇и, вѣ́си, ꙗ҆́кѡ твори́ши, ꙗ҆́коже ты̀ во́лиши, да бꙋ́детъ во́лѧ твоѧ̀ и҆ во мнѣ̀ грѣ́шнѣмъ: ꙗ҆́кѡ бл҃гослове́нъ є҆сѝ во вѣ́ки, а҆ми́нь.

Мл҃тва и҃, ко гдⷭ҇ꙋ на́шемꙋ і҆и҃сꙋ хрⷭ҇тꙋ̀:

Гдⷭ҇и і҆и҃се хрⷭ҇тѐ сн҃е бж҃їй, ра́ди чⷭ҇тнѣ́йшїѧ мт҃ре твоеѧ̀, и҆ безпло́тныхъ твои́хъ а҆́гг҃лъ, прⷪ҇ро́ка же и҆ прⷣте́чи и҆ крⷭ҇ти́телѧ твоегѡ̀, бг҃оглаго́ливыхъ же а҆пⷭ҇лъ, свѣ́тлыхъ и҆ добропобѣ́дныхъ мч҃нкъ, прпⷣбныхъ и҆ бг҃оно́сныхъ ѻ҆тє́цъ, и҆ всѣ́хъ ст҃ы́хъ мл҃твами, и҆зба́ви мѧ̀ настоѧ́щагѡ ѡ҆бстоѧ́нїѧ бѣсо́вскагѡ. є҆́й гдⷭ҇и мо́й и҆ тво́рче, не хотѧ́й сме́рти грѣ́шнагѡ, но ꙗ҆́коже ѡ҆брати́тисѧ и҆ жи́вꙋ бы́ти є҆мꙋ̀, да́ждь и҆ мнѣ̀ ѡ҆браще́нїе ѻ҆каѧ́нномꙋ и҆ недосто́йномꙋ: и҆зми́ мѧ ѿ ᲂу҆́стъ па́гꙋбнагѡ ѕмі́ѧ, зїѧ́ющагѡ пожре́ти мѧ̀, и҆ свестѝ во а҆́дъ жи́ва. є҆́й гдⷭ҇и мо́й, ᲂу҆тѣше́нїе моѐ, и҆́же менѐ ра́ди ѻ҆каѧ́ннагѡ въ тлѣ́ннꙋю пло́ть ѡ҆болкі́йсѧ, и҆сто́ргни мѧ̀ ѿ ѻ҆каѧ́нства, и҆ ᲂу҆тѣше́нїе пода́ждь дꙋшѝ мое́й ѻ҆каѧ́ннѣй. всадѝ въ се́рдце моѐ твори́ти твоѧ̑ повелѣ̑нїѧ, и҆ ѡ҆ста́вити лꙋка̑ваѧ дѣѧ̑нїѧ, и҆ полꙋчи́ти бл҃жє́нства твоѧ̑: на тѧ́ бо гдⷭ҇и, ᲂу҆пова́хъ, сп҃си́ мѧ.

Мл҃тва ѳ҃:

Бл҃га́гѡ цр҃ѧ̀ бл҃га́ѧ мт҃и, пречⷭ҇таѧ и҆ бл҃гослове́ннаѧ бцⷣе мр҃і́е, млⷭ҇ть сн҃а твоегѡ̀ и҆ бг҃а на́шегѡ и҆зле́й на стра́стнꙋю мою̀ дꙋ́шꙋ, и҆ твои́ми мл҃твами наста́ви мѧ̀ на дѣѧ̑нїѧ бл҃га̑ѧ: да про́чее вре́мѧ живота̀ моегѡ̀ без̾ поро́ка прейдꙋ̀, и҆ тобо́ю ра́й да ѡ҆брѧ́щꙋ, бцⷣе дв҃о, є҆ди́на чⷭ҇таѧ и҆ бл҃гослове́ннаѧ.

Мл҃тва і҃, ко ст҃о́мꙋ а҆́гг҃лꙋ храни́телю:

А҆́гг҃ле хрⷭ҇то́въ, храни́телю мо́й ст҃ы́й, и҆ покрови́телю дꙋшѝ и҆ тѣ́ла моегѡ̀, всѧ̑ мѝ простѝ, є҆ли̑ка согрѣши́хъ во дне́шнїй де́нь, и҆ ѿ всѧ́кагѡ лꙋка́вствїѧ проти́внагѡ мѝ врага̀ и҆зба́ви мѧ̀, да ни въ ко́емъ же грѣсѣ̀ прогнѣ́ваю бг҃а моего̀: но молѝ за мѧ̀ грѣ́шнаго и҆ недосто́йнаго раба̀, ꙗ҆́кѡ да досто́йна мѧ̀ пока́жеши бл҃гости и҆ млⷭ҇ти всест҃ы́ѧ трⷪ҇цы, и҆ мт҃ре гдⷭ҇а моегѡ̀ і҆и҃са хрⷭ҇та̀, и҆ всѣ́хъ ст҃ы́хъ, а҆ми́нь.

Та́же, конда́къ бцⷣѣ:

Взбра́нной воево́дѣ побѣди́тєльнаѧ, ꙗ҆́кѡ и҆зба́вльшесѧ ѿ ѕлы́хъ, бл҃года́рствєннаѧ восписꙋ́емъ тѝ рабѝ твоѝ бцⷣе: но ꙗ҆́кѡ и҆мꙋ́щаѧ держа́вꙋ непобѣди́мꙋю, ѿ всѧ́кихъ на́съ бѣ́дъ свободѝ, да зове́мъ тѝ: ра́дꙋйсѧ невѣ́сто неневѣ́стнаѧ.

Та́же: Пресла́внаѧ приснодв҃о, мт҃и хрⷭ҇та̀ бг҃а, принесѝ на́шꙋ мл҃твꙋ сн҃ꙋ твоемꙋ̀ и҆ бг҃ꙋ на́шемꙋ, да сп҃се́тъ тобо́ю дꙋ́шы на́шѧ.

Всѐ ᲂу҆пова́нїе моѐ на тѧ̀ возлага́ю, мт҃и бж҃їѧ, сохрани́ мѧ под̾ кро́вомъ твои́мъ.

Бцⷣе дв҃о, не пре́зри менѐ грѣ́шнагѡ, тре́бꙋюща твоеѧ̀ по́мощи и҆ твоегѡ̀ застꙋпле́нїѧ: на тѧ́ бо ᲂу҆пова̀ дꙋша̀ моѧ̀, и҆ поми́лꙋй мѧ̀.

Та́же, мл҃тва ст҃а́гѡ і҆ѡанні́кїа:

Оу҆пова́нїе моѐ ѻ҆ц҃ъ, прибѣ́жище моѐ сн҃ъ, покро́въ мо́й дх҃ъ ст҃ы́й: трⷪ҇це ст҃а́ѧ, сла́ва тебѣ̀. Та́же, Досто́йно є҆́сть: Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ. И҆ ѿпꙋ́стъ.

Гдⷭ҇и і҆и҃се хрⷭ҇тѐ, сн҃е бж҃їй, мл҃твъ ра́ди пречⷭ҇тыѧ твоеѧ̀ мт҃ре, прпⷣбныхъ и҆ бг҃оно́сныхъ ѻ҆тє́цъ на́шихъ, и҆ всѣ́хъ ст҃ы́хъ, сп҃си́ мѧ грѣ́шнаго.

Мл҃тва ст҃а́гѡ і҆ѡа́нна дамаски́на, ю҆́же ᲂу҆казꙋ́ѧ на ѻ҆́дръ тво́й, глаго́ли:

Влⷣко чл҃вѣколю́бче, не ᲂу҆же́ ли мнѣ̀ ѻ҆́дръ се́й гро́бъ бꙋ́детъ; и҆лѝ є҆щѐ ѻ҆каѧ́ннꙋю мою̀ дꙋ́шꙋ просвѣти́ши дне́мъ; се́ ми гро́бъ предлежи́тъ, се́ ми сме́рть предстои́тъ. Сꙋда̀ твоегѡ̀ гдⷭ҇и, бою́сѧ, и҆ мꙋ́ки безконе́чныѧ, ѕло́е же творѧ̀ не престаю̀: тебѐ гдⷭ҇а бг҃а моего̀ всегда̀ прогнѣвлѧ́ю, и҆ пречⷭ҇тꙋю твою̀ мт҃рь, и҆ всѧ̑ нбⷭ҇ныѧ си̑лы, и҆ ст҃а́го а҆́гг҃ла храни́телѧ моего̀. Вѣ́мъ бо гдⷭ҇и, ꙗ҆́кѡ недосто́инъ є҆́смь чл҃вѣколю́бїѧ твоегѡ̀, но досто́инъ є҆́смь всѧ́кагѡ ѡ҆сꙋжде́нїѧ и҆ мꙋ́ки. Но гдⷭ҇и, и҆лѝ хощꙋ̀, и҆лѝ не хощꙋ̀, сп҃си́ мѧ. А҆́ще бо пра́ведника сп҃се́ши, ничто́же ве́лїе, и҆ а҆́ще чи́стаго поми́лꙋеши, ничто́же ди́вно: досто́йни бо сꙋ́ть млⷭ҇ти твоеѧ̀. Но на мнѣ̀ грѣ́шнѣмъ ᲂу҆дивѝ млⷭ҇ть твою̀: ѡ҆ се́мъ ꙗ҆вѝ чл҃вѣколю́бїе твоѐ, да не ѡ҆долѣ́етъ моѧ̀ ѕло́ба твое́й неизглаго́ланнѣй бл҃гости и҆ млⷭ҇рдїю: и҆ ꙗ҆́коже хо́щеши, ᲂу҆стро́й ѡ҆ мнѣ̀ ве́щь.

И҆ та́кѡ хотѧ́й возлещѝ на посте́лю, глаго́ли сїѐ:

Просвѣтѝ ѻ҆́чи моѝ хрⷭ҇тѐ бж҃е: да не когда̀ ᲂу҆снꙋ̀ въ сме́рть, да не когда̀ рече́тъ вра́гъ мо́й: ᲂу҆крѣпи́хсѧ на него̀.

Сла́ва: Застꙋ́пникъ дꙋшѝ моеѧ̀ бꙋ́ди бж҃е, ꙗ҆́кѡ посредѣ̀ хождꙋ̀ сѣте́й мно́гихъ: и҆зба́ви мѧ̀ ѿ ни́хъ, и҆ сп҃си́ мѧ бл҃же, ꙗ҆́кѡ чл҃вѣколю́бецъ.

И҆ ны́нѣ, бг҃оро́диченъ: Пресла́внꙋю бж҃їю мт҃рь, и҆ ст҃ы́хъ а҆́гг҃лъ ст҃ѣ́йшꙋю, немо́лчнѡ воспои́мъ се́рдцемъ и҆ ᲂу҆сты̀, бцⷣꙋ сїю̀ и҆сповѣ́дающе, ꙗ҆́кѡ вои́стиннꙋ ро́ждшꙋю на́мъ бг҃а воплоще́нна, и҆ молѧ́щꙋюсѧ непреста́ннѡ ѡ҆ дꙋша́хъ на́шихъ.

Та́же цѣлꙋ́й крⷭ҇тъ тво́й, и҆ прекрестѝ крⷭ҇то́мъ мѣ́сто твоѐ ѿ главы̀ и҆ до но́гъ. та́кожде и҆ ѿ всѣ́хъ стра́нъ, глаго́лѧ мл҃твꙋ чⷭ҇тно́мꙋ крⷭ҇тꙋ̀:

Да воскрⷭ҇нетъ бг҃ъ, и҆ расточа́тсѧ вразѝ є҆гѡ̀, и҆ да бѣжа́тъ ѿ лица̀ є҆гѡ̀ ненави́дѧщїи є҆го̀. Ꙗ҆́кѡ и҆счеза́етъ ды́мъ, да и҆сче́знꙋтъ, ꙗ҆́кѡ та́етъ во́скъ ѿ лица̀ ѻ҆гнѧ̀: та́кѡ да поги́бнꙋтъ бѣ́си ѿ лица̀ лю́бѧщихъ бг҃а и҆ зна́менающихсѧ крⷭ҇тнымъ зна́менїемъ, и҆ въ весе́лїи глаго́лющихъ: Ра́дꙋйсѧ пречⷭ҇тны́й и҆ животворѧ́щїй крⷭ҇те гдⷭ҇ень, прогонѧ́ѧй бѣ́сы си́лою на тебѣ̀ пропѧ́тагѡ гдⷭ҇а на́шегѡ і҆и҃са хрⷭ҇та̀, во а҆́дъ сше́дшагѡ, и҆ попра́вшагѡ си́лꙋ дїа́волю, и҆ дарова́вшагѡ на́мъ тебѐ крⷭ҇тъ сво́й чⷭ҇тны́й, на прогна́нїе всѧ́кагѡ сопоста́та. ѽ пречⷭ҇тны́й и҆ животворѧ́щїй крⷭ҇те гдⷭ҇ень, помога́й мѝ со ст҃о́ю гпⷭ҇же́ю дв҃ою бцⷣею, и҆ со всѣ́ми ст҃ы́ми во вѣ́ки, а҆ми́нь.

Пре́жде да́же не возлѧ́жеши на ѻ҆дрѣ̀ твое́мъ, сїѧ̑ всѧ̑ по́мысломъ и҆ па́мѧтїю твое́ю прейдѝ.

Пе́рвѣе ᲂу҆́бѡ: Бл҃годаре́нїе возда́ждь вседержи́телю бг҃ꙋ, ꙗ҆́кѡ дарова̀ тебѣ̀ де́нь мимоше́дшїй, бл҃года́тїю свое́ю, въ живы́хъ и҆ во здра́вїи пребы́ти.

Второ́е: Положѝ сло́во съ самѣ́мъ тобо́ю, и҆ и҆спыта́нїе сотворѝ со́вѣсти твоеѧ̀, преходѧ̀ и҆ подро́бнꙋ и҆зсчита́ѧ всѧ̑ часы̀ днєвны́ѧ, наче́нъ ѿ вре́мени, когда̀ воста́лъ є҆сѝ ѿ ѻ҆дра̀ твоегѡ̀, и҆ приводѧ̀ себѣ̀ на па́мѧть: ка́мѡ ходи́лъ є҆сѝ; что̀ твори́лъ є҆сѝ; комꙋ̀, и҆ что̀ собесѣ́довалъ є҆сѝ; и҆ всѧ̑ твоѧ̑ дѣѧ̑нїѧ, словеса̀ и҆ помышлє́нїѧ, ѿ ᲂу҆́тра да́же до ве́чера тобо́ю произнесє́ннаѧ, со всѧ́кимъ ѻ҆пасе́нїемъ и҆спыта́й, и҆ воспомина́й.

Тре́тїе: А҆́ще что̀ бл҃го́е въ се́й де́нь сотвори́лъ є҆сѝ, не ѿ себѐ сїѐ бы́ти, но ѿ сама́гѡ бг҃а всѧ̑ бл҃га̑ѧ на́мъ да́рꙋющагѡ непщꙋ́ѧ, томꙋ̀ сїѐ восписꙋ́й и҆ бл҃годарѝ: и҆ да тѧ̀ въ се́мъ бл҃го́мъ ᲂу҆тверди́тъ, и҆ прѡ́чаѧ соверши́ти посо́битъ и҆ да́рꙋетъ, моли́сѧ.

Четве́ртое: А҆́ще же что̀ лꙋка́вое содѣ́ѧлъ є҆сѝ, ѿ себѐ са́магѡ и҆ ѿ своеѧ̀ не́мощи, и҆лѝ лꙋка́вагѡ ѻ҆бы́чаѧ и҆ произволе́нїѧ сїѐ происходи́ти глаго́лѧ, ка́йсѧ, и҆ молѝ чл҃вѣколю́бца, да тебѣ̀ въ то́мъ проще́нїе дарова́ти и҆зво́литъ, со ѡ҆бѣща́нїемъ тве́рдымъ, ꙗ҆́кѡ сегѡ̀ про́чее ктомꙋ̀ ᲂу҆жѐ твори́ти не и҆́маши.

Пѧ́тое: Со слеза́ми творца̀ твоего̀ млⷭ҇тива творѝ, да настоѧ́щꙋю но́щь ти́хꙋ, безмѧте́жнꙋ, небла́зненнꙋ и҆ безгрѣ́шнꙋ да́рꙋетъ: де́нь же ᲂу҆́трешнїй, на славосло́вїе и҆́мене є҆гѡ̀ ст҃а́гѡ, цѣ́лѡ предвари́ти да́рꙋетъ.

Пристеже́нїе: А҆́ще ѡ҆брѧ́щеши возгла́вницꙋ мѧ́гкꙋ, ѡ҆ста́ви ю҆̀, а҆ ка́мень подложѝ хрⷭ҇та̀ ра́ди: а҆́ще тѝ зима̀ бꙋ́детъ спѧ́щꙋ, потерпѝ, глаго́лѧ, ꙗ҆́кѡ и҆ні́и ѿню́дъ не спѧ́тъ. [Патері́къ, сло́во д҃.]

Та́же прекрести́сѧ, и҆ съ мл҃твою заснѝ, помышлѧ́ѧ де́нь сꙋ́дный, ка́кѡ и҆́маши предста́ти бг҃ꙋ.

Мл҃твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ бж҃е на́шъ, поми́лꙋй на́съ. А҆ми́нь. Цр҃ю̀ нбⷭ҇ный: Трист҃о́е. Прест҃а́ѧ трⷪ҇це: Ѻ҆́ч҃е на́шъ: Гдⷭ҇и поми́лꙋй, в҃і. Прїиди́те, поклони́мсѧ: три́жды. И҆ ѱало́мъ н҃.

И҆ а҆́бїе канѡ́нъ, гла́съ в҃:

Пѣ́снь а҃.

І҆рмо́съ: Грѧди́те лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ, ꙗ҆́кѡ просла́висѧ.

Хлѣ́бъ живота̀ вѣ́чнꙋющагѡ да бꙋ́детъ мѝ тѣ́ло твоѐ ст҃о́е, бл҃гоꙋтро́бне гдⷭ҇и, и҆ чⷭ҇тна́ѧ кро́вь, и҆ недꙋ̑гъ многоѡбра́зныхъ и҆сцѣле́нїе.

Ѡ҆скверне́нъ дѣ́лы безмѣ́стными ѻ҆каѧ́нный, твоегѡ̀ пречⷭ҇тагѡ тѣ́ла, и҆ бж҃е́ственныѧ кро́ве недосто́инъ є҆́смь, хрⷭ҇тѐ, причаще́нїѧ, є҆гѡ́же мѧ̀ сподо́би.

Бг҃оро́диченъ: Землѐ бл҃га́ѧ, бл҃гослове́ннаѧ бг҃оневѣ́сто, кГла́съ прозѧ́бшаѧ неѡра́нный, и҆ сп҃си́тельный мі́рꙋ: сподо́би мѧ̀ се́й ꙗ҆дꙋ́ща сп҃сти́сѧ.

Пѣ́снь г҃.

І҆рмо́съ: На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́ бо сѧ дꙋ́хъ мо́й, внегда̀ пѣ́ти, нѣ́сть ст҃ъ ꙗ҆́коже бг҃ъ на́шъ, и҆ нѣ́сть пра́веденъ, па́че тебѐ гдⷭ҇и.

Слє́зныѧ мѝ пода́ждь хрⷭ҇тѐ ка̑пли, скве́рнꙋ се́рдца моегѡ̀ ѡ҆чища́ющыѧ: ꙗ҆́кѡ да бл҃го́ю со́вѣстїю ѡ҆чище́нъ, вѣ́рою прихождꙋ̀ и҆ стра́хомъ влⷣко, ко причаще́нїю бж҃е́ственныхъ дарѡ́въ твои́хъ.

Во ѡ҆ставле́нїе да бꙋ́детъ мѝ прегрѣше́нїй пречⷭ҇тое тѣ́ло твоѐ, и҆ бж҃е́ственнаѧ кро́вь, дх҃а же ст҃а́гѡ ѻ҆бще́нїе, и҆ въ жи́знь вѣ́чнꙋю, чл҃вѣколю́бче, и҆ страсте́й и҆ скорбе́й ѿчꙋжде́нїе.

Бг҃оро́диченъ: Хлѣ́ба живо́тнагѡ трапе́за прест҃а́ѧ, свы́ше млⷭ҇ти ра́ди сше́дшагѡ, и҆ мі́рови но́вый живо́тъ даю́щагѡ, и҆ менѐ ны́нѣ сподо́би недосто́йнаго, со стра́хомъ вкꙋси́ти сегѡ̀, и҆ жи́вꙋ бы́ти.

Пѣ́снь д҃.

І҆рмо́съ: Прише́лъ є҆сѝ ѿ дв҃ы не хода́тай, ни а҆́гг҃лъ, но са́мъ гдⷭ҇и вопло́щьсѧ, и҆ сп҃слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й гдⷭ҇и.

Восхотѣ́лъ є҆сѝ на́съ ра́ди вопло́щьсѧ многомлⷭ҇тиве, закла́нъ бы́ти ꙗ҆́кѡ ѻ҆вча̀, грѣ̑хъ ра́ди человѣ́ческихъ: тѣ́мже молю́ тѧ, и҆ моѧ̑ ѡ҆чи́сти согрѣшє́нїѧ.

И҆сцѣлѝ дꙋшѝ моеѧ̀ ꙗ҆́звы гдⷭ҇и, и҆ всего̀ ѡ҆ст҃ѝ: и҆ сподо́би влⷣко, ꙗ҆́кѡ да причащꙋ́сѧ та́йныѧ твоеѧ̀ бж҃е́ственныѧ ве́чери ѻ҆каѧ́нный.

Бг҃оро́диченъ: Оу҆ми́лостиви и҆ мнѣ̀ сꙋ́щаго ѿ ᲂу҆тро́бы твоеѧ̀ влⷣчце: и҆ соблюди́ мѧ нескве́рна раба̀ твоего̀, и҆ непоро́чна, ꙗ҆́кѡ да прїе́мь ᲂу҆́мнаго би́сера, ѡ҆сщ҃ꙋ́сѧ.

Пѣ́снь є҃.

І҆рмо́съ: Свѣ́та пода́телю и҆ вѣкѡ́въ тво́рче гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебѐ и҆но́гѡ бг҃а не зна́емъ.

Ꙗ҆́коже предре́клъ є҆сѝ хрⷭ҇тѐ, да бꙋ́детъ ᲂу҆́бѡ хꙋдо́мꙋ рабꙋ̀ твоемꙋ̀, и҆ во мнѣ̀ пребꙋ́ди ꙗ҆́коже ѡ҆бѣща́лсѧ є҆сѝ: се́ бо тѣ́ло твоѐ ꙗ҆́мъ бж҃е́ственное, и҆ пїю̀ кро́вь твою̀.

Сло́ве бж҃їй и҆ бж҃е, ᲂу҆́гль тѣ́ла твоегѡ̀ да бꙋ́детъ мнѣ̀ помраче́нномꙋ въ просвѣще́нїе, и҆ ѡ҆чище́нїе ѡ҆скверне́нной дꙋшѝ мое́й кро́вь твоѧ̀.

Бг҃оро́диченъ: Мр҃і́е мт҃и бж҃їѧ, бл҃гоꙋха́нїѧ чⷭ҇тно́е селе́нїе, твои́ми мл҃твами сосꙋ́дъ мѧ̀ и҆збра́нный содѣ́лай, ꙗ҆́кѡ да ѡ҆сщ҃е́нїй причащꙋ́сѧ сн҃а твоегѡ̀.

Пѣ́снь ѕ҃.

І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю млⷭ҇рдїѧ твоегѡ̀ призыва́ю бе́зднꙋ: ѿ тлѝ бж҃е мѧ̀ возведѝ.

Оу҆́мъ, дꙋ́шꙋ и҆ се́рдце ѡ҆ст҃ѝ сп҃се, и҆ тѣ́ло моѐ, и҆ сподо́би неѡсꙋжде́ннѡ влⷣко къ стра̑шнымъ та́йнамъ пристꙋпи́ти.

Да бы̀ ᲂу҆страни́лсѧ ѿ страсте́й, и҆ твоеѧ̀ бл҃года́ти и҆мѣ́лъ бы приложе́нїе, живота́ же ᲂу҆тверже́нїе, причаще́нїемъ ст҃ы́хъ хрⷭ҇тѐ та̑инъ твои́хъ.

Бг҃оро́диченъ: Бж҃їе бж҃е сло́во ст҃о́е, всего́ мѧ ѡ҆ст҃ѝ, ны́нѣ приходѧ́щаго къ бж҃е́ствєннымъ твои̑мъ та́йнамъ, ст҃ы́ѧ мт҃ре твоеѧ̀ мольба́ми.

Конда́къ, гла́съ в҃:

Хлѣ́бъ хрⷭ҇тѐ взѧ́ти не пре́зри мѧ̀ тѣ́ло твоѐ, и҆ бж҃е́ственнꙋю твою̀ кро́вь ны́нѣ, пречⷭ҇тыхъ влⷣко, и҆ стра́шныхъ твои́хъ та̑инъ причасти́тисѧ ѻ҆каѧ́ннаго: да не бꙋ́детъ мѝ въ сꙋ́дъ, да бꙋ́детъ же мѝ въ живо́тъ вѣ́чный и҆ безсме́ртный.

Пѣ́снь з҃.

І҆рмо́съ: Те́лꙋ злато́мꙋ премꙋ̑дрыѧ дѣ́ти не послꙋжи́ша, и҆ въ пла́мень са́ми поидо́ша, и҆ бо́ги и҆́хъ ѡ҆брꙋга́ша, средѝ пла́мене возопи́ша, и҆ ѡ҆росѝ ѧ҆̀ а҆́гг҃лъ: ᲂу҆слы́шасѧ ᲂу҆жѐ ᲂу҆́стъ ва́шихъ мл҃тва.

И҆сто́чникъ бл҃ги́хъ, причаще́нїе хрⷭ҇тѐ безсме́ртныхъ твои́хъ ны́нѣ та́инствъ, да бꙋ́детъ мѝ свѣ́тъ, и҆ живо́тъ, и҆ безстра́стїе, и҆ къ преспѣ́ѧнїю же и҆ ᲂу҆множе́нїю добродѣ́тели бж҃е́ственнѣйшїѧ хода́тайственно, є҆ди́не бл҃же, ꙗ҆́кѡ да сла́влю тѧ̀.

Да и҆зба́влюсѧ ѿ страсте́й, и҆ врагѡ́въ, и҆ нꙋ́жды, и҆ всѧ́кїѧ ско́рби, тре́петомъ и҆ любо́вїю, со бл҃гоговѣ́нїемъ чл҃вѣколю́бче пристꙋпа́ѧй ны́нѣ къ твои̑мъ безсмє́ртнымъ и҆ бж҃е́ствєннымъ та́йнамъ, и҆ пѣ́ти тебѣ̀ сподо́би: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.

Бг҃оро́диченъ: Сп҃са хрⷭ҇та̀ ро́ждшаѧ па́че ᲂу҆ма̀ бг҃обл҃года́тнаѧ: молю́ тѧ ны́нѣ ра́бъ тво́й, чⷭ҇тꙋю нечи́стый, хотѧ́щаго мѧ̀ ны́нѣ къ пречⷭ҇тымъ та́йнамъ пристꙋпи́ти, ѡ҆чи́сти всего̀ ѿ скве́рны пло́ти и҆ дꙋ́ха.

Пѣ́снь и҃.

І҆рмо́съ: Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте дѣла̀ ꙗ҆́кѡ гдⷭ҇а, и҆ превозноси́те во всѧ̑ вѣ́ки.

Нбⷭ҇ныхъ и҆ стра́шныхъ, ст҃ы́хъ твои́хъ хрⷭ҇тѐ, ны́нѣ та̑инъ, и҆ бж҃е́ственныѧ твоеѧ̀ и҆ та́йныѧ ве́чери, ѻ҆́бщника бы́ти и҆ менѐ сподо́би ѿча́ѧннаго, бж҃е сп҃се мо́й.

Под̾ твоѐ прибѣ́гъ бл҃гоꙋтро́бїе бл҃же, со стра́хомъ зовꙋ́ ти: во мнѣ̀ пребꙋ́ди сп҃се: и҆ а҆́зъ, ꙗ҆́коже ре́клъ є҆сѝ, къ тебѣ̀. се́ бо дерза́ѧ на млⷭ҇ть твою̀, ꙗ҆́мъ тѣ́ло твоѐ, и҆ пїю̀ кро́вь твою̀.

Трепе́щꙋ прїе́млѧ ѻ҆́гнь, да не ѡ҆палю́сѧ ꙗ҆́кѡ во́скъ, и҆ ꙗ҆́кѡ трава̀. ѽле стра́шнагѡ та́инства! ѽле бл҃гоꙋтро́бїѧ бж҃їѧ! ка́кѡ бж҃е́ственнагѡ тѣ́ла и҆ кро́ве бре́нїе причаща́юсѧ, и҆ нетлѣ́ненъ сотворѧ́юсѧ!

Пѣ́снь ѳ҃.

І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щьсѧ ѿ дв҃ы на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.

Хрⷭ҇то́съ є҆́сть, вкꙋси́те и҆ ви́дите: гдⷭ҇ь на́съ ра́ди, по на́мъ бо дре́вле бы́вый, є҆ди́ною себѐ прине́съ, ꙗ҆́кѡ приноше́нїе ѻ҆ц҃ꙋ̀ своемꙋ̀, при́снѡ закала́етсѧ, ѡ҆сщ҃а́ѧй причаща́ющыѧсѧ.

Дꙋше́ю и҆ тѣ́ломъ да ѡ҆сщ҃ꙋ́сѧ влⷣко, да просвѣщꙋ́сѧ, да сп҃сꙋ́сѧ, да бꙋ́дꙋ до́мъ тво́й, причаще́нїемъ сщ҃е́нныхъ та̑инъ, живꙋ́щаго тѧ̀ и҆мѣ́ѧ въ себѣ̀ со ѻ҆ц҃е́мъ и҆ дх҃омъ, бл҃годѣ́телю многомлⷭ҇тиве.

Ꙗ҆́коже ѻ҆́гнь да бꙋ́детъ мѝ, и҆ ꙗ҆́кѡ свѣ́тъ тѣ́ло твоѐ, и҆ кро́вь сп҃се мо́й пречⷭ҇тна́ѧ: ѡ҆палѧ́ѧ грѣхо́вное вещество̀, сжига́ѧ же страсте́й те́рнїе, и҆ всего́ мѧ просвѣща́ѧ, покланѧ́тисѧ бж҃ествꙋ̀ твоемꙋ̀.

Бг҃оро́диченъ: Бг҃ъ воплоти́сѧ ѿ чⷭ҇тыхъ крове́й твои́хъ, тѣ́мже всѧ́кїй ро́дъ пое́тъ тѧ̀ влⷣчце: ᲂу҆́мнаѧ же мно́жєства сла́вѧтъ, ꙗ҆́кѡ тобо́ю ꙗ҆́вѣ ᲂу҆зрѣ́ша всѣ́ми влⷣчествꙋющаго, ѡ҆сꙋществова́вшагосѧ человѣ́чествомъ.

И҆ а҆́бїе, досто́йно є҆́сть: Та́же, Трист҃о́е. по Ѻ҆́ч҃е на́шъ: Тропа́рь пра́здника. А҆́ще же нѝ, сїѧ̑, гла́съ ѕ҃: Поми́лꙋй на́съ гдⷭ҇и: Сла́ва: Гдⷭ҇и поми́лꙋй на́съ: И҆ ны́нѣ: Млⷭ҇рдїѧ двє́ри: Гдⷭ҇и поми́лꙋй, м҃.

И҆ мл҃тва:

Нескве́рнаѧ, небла́знаѧ, нетлѣ́ннаѧ, пречⷭ҇таѧ:

Воꙋ́трїи же

по ѻ҆бы́чномъ послѣ́дованїи часѡ́въ, хотѧ́й причасти́тисѧ твори́тъ сті́хъ.

Та́же: Цр҃ю̀ нбⷭ҇ный: Трист҃о́е. Прест҃а́ѧ трⷪ҇це: Ѻ҆́ч҃е на́шъ: Гдⷭ҇и поми́лꙋй, в҃і. Прїиди́те, поклони́мсѧ: три́жды. И҆ настоѧ́щыѧ ѱалмы̀.

Ѱало́мъ к҃в.

дⷭ҇ь пасе́тъ мѧ̀, и҆ ничто́же мѧ̀ лиши́тъ. На мѣ́стѣ ѕла́чнѣ, та́мѡ всели́ мѧ: на водѣ̀ поко́йнѣ воспита́ мѧ. Дꙋ́шꙋ мою̀ ѡ҆братѝ, наста́ви мѧ̀ на стєзѝ пра́вды и҆́мене ра́ди своегѡ̀. А҆́ще бо и҆ пойдꙋ̀ посредѣ̀ сѣ́ни сме́ртныѧ, не ᲂу҆бою́сѧ ѕла̀, ꙗ҆́кѡ ты̀ со мно́ю є҆сѝ: же́злъ тво́й и҆ па́лица твоѧ̀, та̑ мѧ̀ ᲂу҆тѣ́шиста. Оу҆гото́валъ є҆сѝ предо мно́ю трапе́зꙋ, сопроти́въ стꙋжа́ющымъ мнѣ̀: ᲂу҆ма́стилъ є҆сѝ є҆ле́емъ главꙋ̀ мою̀, и҆ ча́ша твоѧ̀ ᲂу҆поѧва́ющи мѧ̀ ꙗ҆́кѡ держа́вна. И҆ млⷭ҇ть твоѧ̀ пожене́тъ мѧ̀ всѧ̑ дни̑ живота̀ моегѡ̀: и҆ є҆́же всели́ти ми сѧ въ до́мъ гдⷭ҇ень въ долготꙋ̀ дні́й.

Ѱало́мъ к҃г.

дⷭ҇нѧ землѧ̀, и҆ и҆сполне́нїе є҆ѧ̀, вселе́ннаѧ и҆ всѝ живꙋ́щїи на не́й. То́й на морѧ́хъ ѡ҆снова́лъ ю҆̀ є҆́сть, и҆ на рѣка́хъ ᲂу҆гото́валъ ю҆̀ є҆́сть. Кто̀ взы́детъ на го́рꙋ гдⷭ҇ню; и҆лѝ кто̀ ста́нетъ на мѣ́стѣ ст҃ѣ́мъ є҆гѡ̀; Непови́ненъ рꙋка́ма и҆ чи́стъ се́рдцемъ, и҆́же не прїѧ́тъ всꙋ́е дꙋ́шꙋ свою̀, и҆ не клѧ́тсѧ ле́стїю и҆́скреннемꙋ своемꙋ̀. Се́й прїи́метъ бл҃гослове́нїе ѿ гдⷭ҇а, и҆ млⷭ҇тыню ѿ бг҃а сп҃са своегѡ̀. Се́й ро́дъ и҆́щꙋщихъ гдⷭ҇а, и҆́щꙋщихъ лицѐ бг҃а і҆а́кѡвлѧ. Возми́те врата̀ кнѧ́зи ва́шѧ, и҆ возми́тесѧ врата̀ вѣ̑чнаѧ, и҆ вни́детъ цр҃ь сла́вы. Кто̀ є҆́сть се́й цр҃ь сла́вы; гдⷭ҇ь крѣ́покъ и҆ си́ленъ, гдⷭ҇ь си́ленъ въ бра́ни. Возми́те врата̀ кнѧ́зи ва́шѧ, и҆ возми́тесѧ врата̀ вѣ̑чнаѧ, и҆ вни́детъ цр҃ь сла́вы. Кто̀ є҆́сть се́й цр҃ь сла́вы; гдⷭ҇ь си́лъ, то́й є҆́сть цр҃ь сла́вы.

Ѱало́мъ рє҃і.

Вѣ́ровахъ, тѣ́мже возглаго́лахъ, а҆́зъ же смири́хсѧ ѕѣлѡ̀. А҆́зъ же рѣ́хъ во и҆зстꙋпле́нїи мое́мъ: всѧ́къ человѣ́къ ло́жъ. Что̀ возда́мъ гдⷭ҇еви ѡ҆ всѣ́хъ, ꙗ҆̀же воздадѐ мѝ; Ча́шꙋ сп҃се́нїѧ прїимꙋ̀, и҆ и҆́мѧ гдⷭ҇не призовꙋ̀. Мл҃твы моѧ̑ гдⷭ҇еви возда́мъ пред̾ всѣ́ми людьмѝ є҆гѡ̀. Честна̀ пред̾ гдⷭ҇емъ сме́рть прпⷣбныхъ є҆гѡ̀. ѽ гдⷭ҇и, а҆́зъ ра́бъ тво́й, а҆́зъ ра́бъ тво́й, и҆ сы́нъ рабы́ни твоеѧ̀: растерза́лъ є҆сѝ ᲂу҆́зы моѧ̑. Тебѣ̀ пожрꙋ̀ же́ртвꙋ хвалы̀, и҆ во и҆́мѧ гдⷭ҇не призовꙋ̀. Мл҃твы моѧ̑ гдⷭ҇еви возда́мъ пред̾ всѣ́ми людьмѝ є҆гѡ̀: Во дво́рѣхъ до́мꙋ гдⷭ҇нѧ, посредѣ̀ тебѐ і҆ерⷭ҇ли́ме.

Сла́ва, и҆ ны́нѣ, а҆ллилꙋ́їа. Покло́ны г҃.

И҆ настоѧ́щыѧ тропарѝ, гла́съ и҃:

Беззакѡ́нїѧ моѧ̑ пре́зри гдⷭ҇и, ѿ дв҃ы рожде́йсѧ, и҆ се́рдце моѐ ѡ҆чи́сти, хра́мъ то̀ творѧ̀ пречⷭ҇томꙋ твоемꙋ̀ тѣ́лꙋ и҆ кро́ви: нижѐ ѿри́ни менѐ ѿ твоегѡ̀ лица̀, без̾ числа̀ и҆мѣ́ѧй ве́лїю млⷭ҇ть.

Сла́ва: Во прича́стїе ст҃ы́нь твои́хъ, ка́кѡ дерзнꙋ̀ недосто́йный; а҆́ще бо дерзнꙋ̀ къ тебѣ̀ пристꙋпи́ти съ досто́йными, хїтѡ́нъ мѧ̀ ѡ҆блича́етъ, ꙗ҆́кѡ нѣ́сть вече́рнїй, и҆ ѡ҆сꙋжде́нїе и҆схода́тайствꙋю многогрѣ́шной дꙋшѝ мое́й. ѡ҆чи́сти гдⷭ҇и скве́рнꙋ дꙋшѝ моеѧ̀ и҆ сп҃сѝ мѧ̀, ꙗ҆́кѡ чл҃вѣколю́бецъ.

И҆ ны́нѣ: Мнѡ́гаѧ мно́жєства мои́хъ, бцⷣе, прегрѣше́нїй, къ тебѣ̀ прибѣго́хъ чⷭ҇таѧ, сп҃се́нїѧ тре́бꙋѧ: посѣтѝ немощствꙋ́ющꙋю мою̀ дꙋ́шꙋ, и҆ молѝ сн҃а твоего̀ и҆ бг҃а на́шего да́ти мѝ ѡ҆ставле́нїе, ꙗ҆̀же содѣ́ѧхъ лю́тыхъ, є҆ди́на бл҃гослове́ннаѧ.

Во ст҃ꙋ́ю же и҆ вели́кꙋю м҃-цꙋ, глаго́ли:

Є҆гда̀ сла́внїи ᲂу҆ч҃нцы̀:

Та́же, Гдⷭ҇и поми́лꙋй, м҃. И҆ покло́ны, є҆ли́кѡ хо́щеши.

И҆ а҆́бїе настоѧ́щыѧ стїхѝ:

Хотѧ̀ ꙗ҆́сти человѣ́че, тѣ́ло влⷣчне,

Стра́хомъ пристꙋпѝ, да не ѡ҆пали́шисѧ: ѻ҆́гнь бо є҆́сть.

Бж҃е́ственнꙋю же пїѧ̀ кро́вь ко ѻ҆бще́нїю,

Пе́рвѣе примири́сѧ тѧ̀ ѡ҆печа́лившымъ.

Та́же дерза́ѧ та́инственное бра́шно ꙗ҆́ждь.

И҆ны̑ѧ стїхѝ:

Пре́жде прича́стїѧ стра́шныѧ же́ртвы,

Животворѧ́щагѡ тѣ́ла влⷣчнѧ,

Си́мъ помоли́сѧ ѡ҆́бразомъ со тре́петомъ.

Мл҃тва вели́кагѡ васі́лїа, а҃:

Влⷣко гдⷭ҇и і҆и҃се хрⷭ҇тѐ бж҃е на́шъ, и҆сто́чникъ жи́зни и҆ безсме́ртїѧ, всеѧ̀ тва́ри ви́димыѧ и҆ неви́димыѧ содѣ́телю, безнача́льнагѡ ѻ҆ц҃а̀ соприсносꙋ́щный сн҃е, и҆ собезнача́льный, премно́гїѧ ра́ди бл҃гости въ послѣ̑днїѧ дни̑ въ пло́ть ѡ҆болкі́йсѧ, и҆ распны́йсѧ, и҆ погребы́йсѧ за ны̀ неблагода̑рныѧ и҆ ѕлонра̑вныѧ, и҆ свое́ю кро́вїю ѡ҆бнови́вый растлѣ́вшее грѣхо́мъ є҆стество̀ на́ше: са́мъ безсме́ртный цр҃ю̀, прїимѝ и҆ моѐ грѣ́шнагѡ покаѧ́нїе, и҆ приклонѝ ᲂу҆́хо твоѐ мнѣ̀, и҆ ᲂу҆слы́ши глаго́лы моѧ̑. согрѣши́хъ бо, гдⷭ҇и, согрѣши́хъ на нб҃о и҆ пред̾ тобо́ю, и҆ нѣ́смь досто́инъ воззрѣ́ти на высотꙋ̀ сла́вы твоеѧ̀: прогнѣ́вахъ бо твою̀ бл҃гость, твоѧ̑ за́пѡвѣди престꙋпи́въ и҆ не послꙋ́шавъ твои́хъ повелѣ́нїй. Но ты̀ гдⷭ҇и, неѕло́бивъ сы́й долготерпѣли́въ же и҆ многомлⷭ҇тивъ, не преда́лъ є҆си́ мѧ поги́бнꙋти со беззако́ньми мои́ми, моегѡ̀ всѧ́чески ѡ҆жида́ѧ ѡ҆браще́нїѧ. Ты́ бо ре́клъ є҆сѝ чл҃вѣколю́бче прⷪ҇ро́комъ твои́мъ: ꙗ҆́кѡ хотѣ́нїемъ не хощꙋ̀ сме́рти грѣ́шника, но є҆́же ѡ҆брати́тисѧ и҆ жи́вꙋ бы́ти є҆мꙋ̀. Не хо́щеши бо влⷣко, созда́нїѧ твоє́ю рꙋкꙋ̀ погꙋби́ти, нижѐ бл҃говоли́ши ѡ҆ поги́бели человѣ́честѣй, но хо́щеши всѣ̑мъ сп҃сти́сѧ, и҆ въ ра́зꙋмъ и҆́стины прїитѝ. Тѣ́мже и҆ а҆́зъ, а҆́ще и҆ недосто́инъ є҆́смь нб҃сѐ и҆ землѝ, и҆ сеѧ̀ привре́менныѧ жи́зни, всего̀ себѐ повинꙋ́въ грѣхꙋ̀, и҆ сласте́мъ порабо́тивъ, и҆ тво́й ѡ҆скверни́въ ѡ҆́бразъ: но творе́нїе и҆ созда́нїе твоѐ бы́въ, не ѿчаѧва́ю своегѡ̀ сп҃се́нїѧ ѻ҆каѧ́нный, на твое́ же безмѣ́рное бл҃гоꙋтро́бїе дерза́ѧ прихождꙋ̀. Прїимѝ ᲂу҆̀бо и҆ менѐ чл҃вѣколю́бче гдⷭ҇и ꙗ҆́коже блꙋдни́цꙋ, ꙗ҆́кѡ разбо́йника, ꙗ҆́кѡ мытарѧ̀, и҆ ꙗ҆́кѡ блꙋ́днаго, и҆ возмѝ моѐ тѧ́жкое бре́мѧ грѣхѡ́въ, грѣ́хъ взе́млѧй мі́ра, и҆ не́мѡщи человѣ́чєскїѧ и҆сцѣлѧ́ѧй: трꙋжда́ющыѧсѧ и҆ ѡ҆бременє́нныѧ къ себѣ̀ призыва́ѧй и҆ ᲂу҆покоева́ѧй, не прише́дый призва́ти пра́вєдныѧ, но грѣ̑шныѧ на покаѧ́нїе, и҆ ѡ҆чи́сти мѧ̀ ѿ всѧ́кїѧ скве́рны пло́ти и҆ дꙋ́ха, и҆ наꙋчи́ мѧ соверша́ти ст҃ы́ню во стра́сѣ твое́мъ: ꙗ҆́кѡ да чи́стымъ свѣ́дѣнїемъ со́вѣсти моеѧ̀, ст҃ы́нь твои́хъ ча́сть прїе́млѧ, соединю́сѧ ст҃о́мꙋ тѣ́лꙋ твоемꙋ̀ и҆ кро́ви, и҆ и҆мѣ́ю тебѐ во мнѣ̀ живꙋ́ща и҆ пребыва́юща со ѻ҆ц҃е́мъ и҆ ст҃ы́мъ твои́мъ дх҃омъ. Є҆́й гдⷭ҇и і҆и҃се хрⷭ҇тѐ бж҃е мо́й, и҆ да не въ сꙋ́дъ мѝ бꙋ́детъ прича́стїе пречⷭ҇тыхъ, и҆ животворѧ́щихъ та̑инъ твои́хъ, нижѐ да не́мощенъ бꙋ́дꙋ дꙋше́ю же и҆ тѣ́ломъ, ѿ є҆́же недосто́йнѣ тѣ̑мъ причаща́тисѧ: но да́ждь мѝ да́же до коне́чнагѡ моегѡ̀ и҆здыха́нїѧ, неѡсꙋжде́ннѡ воспрїима́ти ча́сть ст҃ы́нь твои́хъ, въ дх҃а ст҃а́гѡ ѻ҆бще́нїе, въ напꙋ́тїе живота̀ вѣ́чнагѡ, и҆ во бл҃гопрїѧ́тенъ ѿвѣ́тъ на стра́шнѣмъ сꙋди́щи твое́мъ: ꙗ҆́кѡ да и҆ а҆́зъ со всѣ́ми и҆збра́нными твои́ми ѻ҆́бщникъ бꙋ́дꙋ нетлѣ́нныхъ твои́хъ бла̑гъ, ꙗ҆̀же ᲂу҆гото́валъ є҆сѝ лю́бѧщымъ тѧ̀ гдⷭ҇и, въ ни́хже препросла́вленъ є҆сѝ во вѣ́ки, а҆ми́нь.

Мл҃тва и҆на́ѧ, и҆́же во ст҃ы́хъ ѻ҆тца̀ на́шегѡ і҆ѡа́нна златоꙋ́стагѡ, в҃:

Гдⷭ҇и бж҃е мо́й, вѣ́мъ, ꙗ҆́кѡ нѣ́смь досто́инъ, нижѐ дово́ленъ, да под̾ кро́въ вни́деши хра́ма дꙋшѝ моеѧ̀: зане́же ве́сь пꙋ́стъ и҆ па́лсѧ є҆́сть, и҆ не и҆́маши во мнѣ̀ мѣ́ста досто́йна, є҆́же главꙋ̀ подклони́ти: но ꙗ҆́коже съ высоты̀ на́съ ра́ди смири́лъ є҆сѝ себѐ, смири́сѧ и҆ ны́нѣ смире́нїю моемꙋ̀: и҆ ꙗ҆́коже воспрїѧ́лъ є҆сѝ въ верте́пѣ и҆ въ ꙗ҆́слехъ безслове́сныхъ возлещѝ: си́це воспрїимѝ и҆ въ ꙗ҆́слехъ безслове́сныѧ моеѧ̀ дꙋшѝ, и҆ во ѡ҆скверне́нное моѐ тѣ́ло вни́ти. и҆ ꙗ҆́коже не не ᲂу҆досто́илъ є҆сѝ вни́ти, и҆ свечерѧ́ти со грѣ́шники въ домꙋ̀ сі́мѡна прокаже́ннагѡ: та́кѡ и҆зво́ли вни́ти и҆ въ до́мъ смире́нныѧ моеѧ̀ дꙋшѝ, прокаже́нныѧ и҆ грѣ́шныѧ. и҆ ꙗ҆́коже не ѿри́нꙋлъ є҆сѝ подо́бнꙋю мнѣ̀ блꙋдни́цꙋ, и҆ грѣ́шнꙋю, прише́дшꙋю и҆ прикоснꙋ́вшꙋюсѧ тебѣ̀: си́це ᲂу҆млⷭ҇рдисѧ и҆ ѡ҆ мнѣ̀ грѣ́шнѣмъ, приходѧ́щемъ и҆ прикаса́ющемъ ти сѧ. и҆ ꙗ҆́коже не возгнꙋша́лсѧ є҆сѝ скве́рныхъ є҆ѧ̀ ᲂу҆́стъ и҆ нечи́стыхъ, цѣлꙋ́ющихъ тѧ̀, нижѐ мои́хъ возгнꙋша́йсѧ скве́рншихъ ѻ҆́ныѧ ᲂу҆́стъ, и҆ нечи́стшихъ: нижѐ ме́рзкихъ мои́хъ и҆ нечи́стыхъ ᲂу҆сте́нъ, и҆ скве́рнагѡ и҆ нечи́стѣйшагѡ моегѡ̀ ѧ҆зы́ка. но да бꙋ́детъ мѝ ᲂу҆́гль прест҃а́гѡ твоегѡ̀ тѣ́ла, и҆ чⷭ҇тны́ѧ твоеѧ̀ кро́ве, во ѡ҆сщ҃е́нїе, и҆ просвѣще́нїе, и҆ здра́вїе смире́ннѣй мое́й дꙋшѝ и҆ тѣ́лꙋ, во ѡ҆блегче́нїе тѧ́жестей мно́гихъ мои́хъ согрѣше́нїй, въ соблюде́нїе ѿ всѧ́кагѡ дїа́вольскагѡ дѣ́йства, во ѿгна́нїе и҆ возбране́нїе ѕла́гѡ моегѡ̀ и҆ лꙋка́вагѡ ѻ҆бы́чаѧ: во ᲂу҆мерщвле́нїе страсте́й, въ снабдѣ́нїе за́повѣдей твои́хъ, въ приложе́нїе бж҃е́ственныѧ твоеѧ̀ бл҃года́ти, и҆ твоегѡ̀ црⷭ҇твїѧ присвое́нїе. не бо̀ ꙗ҆́кѡ презира́ѧй прихождꙋ̀ къ тебѣ̀ хрⷭ҇тѐ бж҃е, но ꙗ҆́кѡ дерза́ѧ на неизрече́ннꙋю твою̀ бл҃гость: и҆ да не на мно́зѣ ᲂу҆далѧ́ѧйсѧ ѻ҆бще́нїѧ твоегѡ̀, ѿ мы́сленнагѡ во́лка ѕвѣроꙋловле́нъ бꙋ́дꙋ. тѣ́мже молю́сѧ тебѣ̀, ꙗ҆́кѡ є҆ди́нъ сы́й ст҃ъ влⷣко, ѡ҆ст҃ѝ мою̀ дꙋ́шꙋ и҆ тѣ́ло, ᲂу҆́мъ и҆ се́рдце, чревеса̀ и҆ ᲂу҆трѡ́бы, и҆ всего́ мѧ ѡ҆бновѝ: и҆ вкоренѝ стра́хъ тво́й во ᲂу҆десѣ́хъ мои́хъ, и҆ ѡ҆сщ҃е́нїе твоѐ неѿе́млемо ѿ менѐ сотворѝ. и҆ бꙋ́ди мѝ помо́щникъ и҆ застꙋ́пникъ, ѡ҆кормлѧ́ѧ въ ми́рѣ живо́тъ мо́й, сподоблѧ́ѧ мѧ̀ и҆ ѡ҆деснꙋ́ю тебѐ предстоѧ́нїѧ со ст҃ы́ми твои́ми, мл҃твами и҆ моле́ньми пречⷭ҇тыѧ твоеѧ̀ мт҃ре, невеще́ственныхъ твои́хъ слꙋжи́телей, и҆ пречⷭ҇тыхъ си́лъ, и҆ всѣ́хъ ст҃ы́хъ ѿ вѣ́ка тебѐ бл҃гоꙋгоди́вшихъ, а҆ми́нь.

Мл҃тва и҆на́ѧ, сѷмеѡ́на метафра́ста, г҃:

Є҆ди́не чⷭ҇тый и҆ нетлѣ́нный гдⷭ҇и, за неизрече́ннꙋю млⷭ҇ть чл҃вѣколю́бїѧ, на́ше всѐ воспрїе́мый смѣше́нїе ѿ чⷭ҇тыхъ и҆ дѣ́вственныхъ крове́й, па́че є҆стества̀ ро́ждшїѧ тѧ̀ дх҃а бж҃е́ственнагѡ наше́ствїемъ, и҆ бл҃говоле́нїемъ ѻ҆ц҃а̀ присносꙋ́щнагѡ хрⷭ҇тѐ і҆и҃се, премꙋ́дросте бж҃їѧ, и҆ ми́ре и҆ си́ло: твои́мъ воспрїѧ́тїемъ животворѧ̑щаѧ, и҆ сп҃си́тєльнаѧ страда̑нїѧ воспрїе́мый, крⷭ҇тъ, гвѡ́здїѧ, копїѐ, сме́рть, ᲂу҆мертвѝ моѧ̑ дꙋшетлѣ̑нныѧ стра̑сти тѣлє́сныѧ. погребе́нїемъ твои́мъ а҆́дѡва плѣни́вый ца̑рствїѧ, погребѝ моѧ̑ бл҃ги́ми по́мыслы лꙋка̑ваѧ совѣ́тѡванїѧ, и҆ лꙋка́вствїѧ дꙋ́хи разорѝ. тридне́внымъ твои́мъ, и҆ живоно́снымъ воскрⷭ҇нїемъ па́дшаго пра́ѻтца возста́вивый, возста́ви мѧ̀ грѣхо́мъ попо́лзшагосѧ, ѡ҆́бразы мнѣ̀ покаѧ́нїѧ предлага́ѧ. пресла́внымъ твои́мъ вознесе́нїемъ, плотско́е ѡ҆божи́вый воспрїѧ́тїе, и҆ сїѐ десны́мъ ѻ҆ц҃а̀ сѣдѣ́нїемъ почты́й, сподо́би мѧ̀ прича́стїемъ ст҃ы́хъ твои́хъ та̑инъ деснꙋ́ю ча́сть сп҃са́емыхъ полꙋчи́ти. сни́тїемъ ᲂу҆тѣ́шителѧ твоегѡ̀ дх҃а, сосꙋ́ды чⷭ҇тны сщ҃є́нныѧ твоѧ̑ ᲂу҆ч҃нкѝ содѣ́лавый, прїѧ́телище и҆ менѐ покажѝ тогѡ̀ прише́ствїѧ. хотѧ́й па́ки прїитѝ сꙋди́ти вселе́ннѣй пра́вдою, бл҃говолѝ и҆ мнѣ̀ ᲂу҆срѣ́сти тѧ̀ на ѻ҆́блацѣхъ сꙋдїю̀, и҆ созда́телѧ моего̀, со всѣ́ми ст҃ы́ми твои́ми: да безконе́чнѡ славосло́влю и҆ воспѣва́ю тѧ̀, со безнача́льнымъ твои́мъ ѻ҆ц҃е́мъ, и҆ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Мл҃тва и҆на́ѧ, сѷмеѡ́на метафра́ста д҃:

Ꙗ҆́кѡ на стра́шнѣмъ твое́мъ, и҆ нелицепрїе́мнѣмъ предстоѧ́й сꙋди́лищи хрⷭ҇тѐ бж҃е, и҆ ѡ҆сꙋждє́нїѧ под̾е́млѧ, и҆ сло́во творѧ̀ ѡ҆ содѣ́ѧнныхъ мно́ю ѕлы́хъ: си́це дне́сь, пре́жде да́же не прїитѝ дне́ви ѡ҆сꙋжде́нїѧ моегѡ̀, ᲂу҆ ст҃а́гѡ твоегѡ̀ же́ртвенника предстоѧ̀ пред̾ тобо́ю, и҆ пред̾ стра́шными и҆ ст҃ы́ми а҆́гг҃лы твои́ми, преклоне́нъ ѿ своеѧ̀ со́вѣсти, приношꙋ̀ лꙋка̑ваѧ моѧ̑ и҆ беззакѡ́ннаѧ дѣѧ̑нїѧ, ꙗ҆влѧ́ѧй сїѧ̑ и҆ ѡ҆блича́ѧй. ви́ждь гдⷭ҇и смире́нїе моѐ, и҆ ѡ҆ста́ви всѧ̑ грѣхѝ моѧ̑. ви́ждь, ꙗ҆́кѡ ᲂу҆мно́жишасѧ па́че вла̑съ главы̀ моеѧ̀ беззакѡ́нїѧ моѧ̑. ко́е ᲂу҆́бѡ не содѣ́ѧхъ ѕло̀; кі́й грѣ́хъ не сотвори́хъ; ко́е ѕло̀ не воѡбрази́хъ въ дꙋшѝ мое́й; ᲂу҆же́ бо и҆ дѣ́лы содѣ́ѧхъ: блꙋ́дъ, прелюбодѣ́йство, го́рдость, киче́нїе, ᲂу҆коре́нїе, хꙋлꙋ̀, праздносло́вїе, смѣ́хъ неподо́бный, пїѧ́нство, гортанобѣ́сїе, ѡ҆б̾ѧде́нїе, не́нависть, за́висть, сребролю́бїе, любостѧжа́нїе, лихои́мство, самолю́бїе, славолю́бїе, хище́нїе, непра́вдꙋ, ѕлопрїѡбрѣ́тенїе, ре́вность, ѡ҆клевета́нїе, беззако́нїе: всѧ́кое моѐ чꙋ́вство, и҆ всѧ́кїй ᲂу҆́дъ ѡ҆скверни́хъ, растли́хъ, непотре́бенъ сотвори́хъ, дѣ́лателище бы́въ всѧ́чески дїа́воле. и҆ вѣ́мъ гдⷭ҇и, ꙗ҆́кѡ беззакѡ́нїѧ моѧ̑ превзыдо́ша главꙋ̀ мою̀: но безмѣ́рно є҆́сть мно́жество щедро́тъ твои́хъ, и҆ млⷭ҇ть неизрече́нна неѕло́бивыѧ твоеѧ̀ бл҃гости, и҆ нѣ́сть грѣ́хъ побѣжда́ющь чл҃вѣколю́бїе твоѐ. тѣ́мже, пречꙋ́дный цр҃ю̀, неѕло́биве гдⷭ҇и, ᲂу҆дивѝ и҆ на мнѣ̀ грѣ́шнѣмъ млⷭ҇ти твоѧ̑, покажѝ бл҃гости твоеѧ̀ си́лꙋ, и҆ ꙗ҆вѝ крѣ́пость бл҃гоꙋтро́бнагѡ млⷭ҇рдїѧ твоегѡ̀, и҆ ѡ҆браща́ющасѧ прїими́ мѧ грѣ́шнаго. Прїими́ мѧ, ꙗ҆́коже прїѧ́лъ є҆сѝ блꙋ́днаго, разбо́йника, блꙋдни́цꙋ: прїими́ мѧ пребезмѣ́рнѣ и҆ сло́вомъ и҆ дѣ́ломъ, и҆ по́хотїю безмѣ́стною, и҆ помышле́нїемъ безслове́снымъ согрѣши́вша тебѣ̀. и҆ ꙗ҆́коже во є҆динонадесѧ́тый ча́съ прише́дшихъ прїѧ́лъ є҆сѝ, ничто́же досто́йнѡ содѣ́лавшихъ, та́кѡ прїимѝ и҆ менѐ грѣ́шнаго: мно́гѡ бо согрѣши́хъ и҆ ѡ҆скверни́хсѧ, и҆ ѡ҆печа́лихъ дх҃а твоего̀ ст҃а́го, и҆ ѡ҆горчи́хъ чл҃вѣколю́бнꙋю ᲂу҆тро́бꙋ твою̀, и҆ дѣ́ломъ, и҆ сло́вомъ, и҆ помышле́нїемъ, въ нощѝ и҆ во днѝ, ꙗ҆вле́ннѣ же и҆ неѧвле́ннѣ, во́лею же и҆ нево́лею. и҆ вѣ́мъ, ꙗ҆́кѡ предста́виши грѣхѝ моѧ̑ предо мно́ю такѡвы̀, ꙗ҆кѡвы́ же мно́ю содѣ́ѧшасѧ, и҆ и҆стѧ́жеши сло́во со мно́ю, ѡ҆ и҆́хже ра́зꙋмомъ непроще́ннѡ согрѣши́хъ. Но гдⷭ҇и, гдⷭ҇и, да не пра́веднымъ сꙋдо́мъ твои́мъ, нижѐ ꙗ҆́ростїю твое́ю ѡ҆бличи́ши мѧ̀, нижѐ гнѣ́вомъ твои́мъ нака́жеши мѧ̀. поми́лꙋй мѧ̀ гдⷭ҇и, ꙗ҆́кѡ не то́кмѡ не́мощенъ є҆́смь, но и҆ твоѐ є҆́смь созда́нїе. Ты̀ ᲂу҆́бѡ гдⷭ҇и, ᲂу҆тверди́лъ є҆сѝ на мнѣ̀ стра́хъ тво́й: а҆́зъ же лꙋка́вое пред̾ тобо́ю сотвори́хъ. тебѣ̀ ᲂу҆́бѡ є҆ди́номꙋ согрѣши́хъ: но молю́ тѧ, не вни́ди въ сꙋ́дъ съ рабо́мъ твои́мъ: а҆́ще бо беззакѡ́нїѧ на́зриши гдⷭ҇и, гдⷭ҇и кто̀ постои́тъ; а҆́зъ бо є҆́смь пꙋчи́на грѣха̀, и҆ нѣ́смь досто́инъ, нижѐ дово́ленъ воззрѣ́ти, и҆ ви́дѣти на высотꙋ̀ нбⷭ҇нꙋю, ѿ мно́жества грѣхѡ́въ мои́хъ, и҆́хже нѣ́сть числа̀: всѧ́кое бо ѕлодѣѧ́нїе, и҆ кова́рство, и҆ ᲂу҆хищре́нїе сатанино̀, и҆ растлѣ̑нїѧ, и҆стица̑нїѧ, рꙋкоблꙋ̑дїѧ, дѣторастлѣ̑нїѧ, ѕлопомнѣ̑нїѧ, совѣ́тѡванїѧ ко грѣхꙋ̀, скокта̑нїѧ и҆ и҆ны̑ѧ тьмочи́слєнныѧ стра̑сти не ѡ҆скꙋдѣ́ша ѿ менѐ. кі́ими бо не растли́хсѧ грѣхѝ; кі́ими не содержа́хсѧ ѕлы́ми; всѧ́къ грѣ́хъ содѣ́ѧхъ, всѧ́кꙋю нечистотꙋ̀ вложи́хъ въ дꙋ́шꙋ мою̀: непотре́бенъ бы́хъ тебѣ̀ бг҃ꙋ моемꙋ̀, и҆ человѣ́кѡмъ. кто̀ возста́витъ мѧ̀ въ сицєва́ѧ ѕла̑ѧ, и҆ толи̑ка па́дшаго согрѣшє́нїѧ; Гдⷭ҇и бж҃е мо́й, на тѧ̀ ᲂу҆пова́хъ, а҆́ще є҆́сть мѝ сп҃се́нїѧ ᲂу҆пова́нїе, а҆́ще побѣжда́етъ чл҃вѣколю́бїе твоѐ мно́жєства беззако́нїй мои́хъ, бꙋ́ди мѝ сп҃си́тель, и҆ по щедро́тамъ твои̑мъ и҆ ми́лостемъ твои̑мъ, ѡ҆сла́би, ѡ҆ста́ви, прости́ ми всѧ̑, є҆ли̑ка тѝ согрѣши́хъ, ꙗ҆́кѡ мно́гихъ ѕѡ́лъ и҆спо́лнисѧ дꙋша̀ моѧ̀, и҆ нѣ́сть во мнѣ̀ сп҃се́нїѧ наде́жды. Поми́лꙋй мѧ̀ бж҃е, по вели́цѣй млⷭ҇ти твое́й, и҆ не возда́ждь мѝ по дѣлѡ́мъ мои̑мъ, и҆ не ѡ҆сꙋди́ мѧ по дѣѧ́нїємъ мои̑мъ: но ѡ҆братѝ, застꙋпѝ, и҆зба́ви дꙋ́шꙋ мою̀ ѿ совозраста́ющихъ є҆́й ѕѡ́лъ, и҆ лю́тыхъ воспрїѧ́тїй. Сп҃си́ мѧ ра́ди млⷭ҇ти твоеѧ̀: да и҆дѣ́же ᲂу҆мно́житсѧ грѣ́хъ, преиз̾ѡби́лꙋетъ бл҃года́ть твоѧ̀. и҆ восхвалю̀, и҆ просла́влю тѧ̀ всегда̀, всѧ̑ дни̑ живота̀ моегѡ̀. Ты́ бо є҆сѝ бг҃ъ ка́ющихсѧ, и҆ сп҃съ согрѣша́ющихъ, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ прест҃ы́мъ и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Бж҃е́ственнагѡ дамаски́на,

Влⷣко гдⷭ҇и і҆и҃се хрⷭ҇тѐ бж҃е на́шъ, є҆ди́не и҆мѣ́ѧй вла́сть человѣ́кѡмъ ѡ҆ставлѧ́ти грѣхѝ: ꙗ҆́кѡ бл҃гъ и҆ чл҃вѣколю́бецъ пре́зри моѧ̑ всѧ̑ въ вѣ́дѣнїи и҆ не въ вѣ́дѣнїи прегрѣшє́нїѧ. И҆ сподо́би мѧ̀ неѡсꙋжде́ннѡ причасти́тисѧ бж҃е́ственныхъ, и҆ пресла́вныхъ, и҆ пречⷭ҇тыхъ, и҆ животворѧ́щихъ твои́хъ та̑инъ: не въ тѧ́жесть, ни въ мꙋ́кꙋ, ни въ приложе́нїе грѣхѡ́въ, но во ѡ҆чище́нїе, и҆ ѡ҆сщ҃е́нїе, и҆ ѡ҆брꙋче́нїе бꙋ́дꙋщагѡ живота̀ и҆ црⷭ҇твїѧ, въ стѣ́нꙋ и҆ по́мощь, и҆ въ возраже́нїе сопроти́вныхъ, во и҆стребле́нїе мно́гихъ мои́хъ согрѣше́нїй. Ты́ бо є҆сѝ бг҃ъ млⷭ҇ти, и҆ щедро́тъ, и҆ чл҃вѣколю́бїѧ и҆ тебѣ̀ сла́вꙋ возсыла́емъ со ѻ҆ц҃е́мъ и҆ ст҃ы́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Вели́кагѡ васі́лїа:

Вѣ́мъ гдⷭ҇и, ꙗ҆́кѡ недосто́йнѣ причаща́юсѧ пречⷭ҇тагѡ твоегѡ̀ тѣ́ла, и҆ чⷭ҇тны́ѧ твоеѧ̀ кро́ве: и҆ пови́ненъ є҆́смь, и҆ сꙋ́дъ себѣ̀ ꙗ҆́мъ и҆ пїю̀, не разсꙋжда́ѧ тѣ́ла и҆ кро́ве тебѐ хрⷭ҇та̀ и҆ бг҃а моегѡ̀, но на щедрѡ́ты твоѧ̑ дерза́ѧ прихождꙋ̀ къ тебѣ̀ ре́кшемꙋ: ꙗ҆ды́й мою̀ пло́ть, и҆ пїѧ́й мою̀ кро́вь, во мнѣ̀ пребыва́етъ, и҆ а҆́зъ въ не́мъ. ᲂу҆млⷭ҇рдисѧ ᲂу҆̀бо гдⷭ҇и, и҆ не ѡ҆бличи́ мѧ грѣ́шнаго, но сотворѝ со мно́ю по млⷭ҇ти твое́й: и҆ да бꙋ́дꙋтъ мѝ ст҃а̑ѧ сїѧ̑ во и҆сцѣле́нїе, и҆ ѡ҆чище́нїе, и҆ просвѣще́нїе, и҆ сохране́нїе, и҆ сп҃се́нїе, и҆ во ѡ҆сщ҃е́нїе дꙋшѝ и҆ тѣ́ла, во ѿгна́нїе всѧ́кагѡ мечта́нїѧ, и҆ лꙋка́вагѡ дѣѧ́нїѧ, и҆ дѣ́йства дїа́вольскагѡ, мы́сленнѣ во ᲂу҆десѣ́хъ мои́хъ дѣ́йствꙋемагѡ, въ дерзнове́нїе и҆ любо́вь, ꙗ҆́же къ тебѣ̀: во и҆справле́нїе житїѧ̀ и҆ ᲂу҆твержде́нїе, въ возраще́нїе добродѣ́тели и҆ соверше́нства: во и҆сполне́нїе за́повѣдей, въ дх҃а ст҃а́гѡ ѻ҆бще́нїе, въ напꙋ́тїе живота̀ вѣ́чнагѡ, во ѿвѣ́тъ бл҃гопрїѧ́тенъ на стра́шнѣмъ сꙋди́щи твое́мъ, не въ сꙋ́дъ и҆лѝ во ѡ҆сꙋжде́нїе.

Мл҃тва и҆на́ѧ, ѡ҆ бж҃е́ственныхъ вопроше́нїй ст҃а́гѡ причаще́нїѧ, сѷмеѡ́на но́вагѡ бг҃осло́ва, з҃:

Ѿ скве́рныхъ ᲂу҆сте́нъ, ѿ ме́рзкаго се́рдца, Ѿ нечи́стагѡ ѧ҆зы́ка, ѿ дꙋшѝ ѡ҆скверне́ны, Прїимѝ моле́нїе хрⷭ҇тѐ мо́й, и҆ не пре́зри мои́хъ, Ни слове́съ, нижѐ ѡ҆бразѡ́въ, нижѐ безстꙋ́дїѧ. Да́ждь мѝ дерзнове́ннѡ глаго́лати, ꙗ҆̀же хощꙋ̀ хрⷭ҇тѐ мо́й. Па́че же и҆ наꙋчи́ мѧ, что́ ми подоба́етъ твори́ти и҆ глаго́лати. Согрѣши́хъ па́че блꙋдни́цы, ꙗ҆́же ᲂу҆вѣ́дѣ, гдѣ̀ ѡ҆бита́еши, Мѵ́ро кꙋпи́вши, прїи́де де́рзостнѣ пома́зати Твоѝ но́зѣ, бг҃а моегѡ̀, влⷣки, и҆ хрⷭ҇та̀ моегѡ̀. Ꙗ҆́коже ѻ҆́нꙋ не ѿри́нꙋлъ є҆сѝ прише́дшꙋю ѿ се́рдца, Нижѐ менѐ возгнꙋша́йсѧ сло́ве, твои́ же мѝ пода́ждь но́зѣ, И҆ держа́ти и҆ цѣлова́ти, и҆ стрꙋѧ́ми сле́зными, Ꙗ҆́кѡ многоцѣ́ннымъ мѵ́ромъ сїѧ̑ де́рзостнѡ пома́зати. Ѡ҆мы́й мѧ̀ слеза́ми мои́ми, ѡ҆чи́сти мѧ̀ и҆́ми, сло́ве, Ѡ҆ста́ви и҆ прегрѣшє́нїѧ моѧ̑, и҆ проще́нїе мѝ пода́ждь. Вѣ́си ѕѡ́лъ мно́жество, вѣ́си и҆ стрꙋ́пы моѧ̑: И҆ ꙗ҆́звы зри́ши моѧ̑: но и҆ вѣ́рꙋ вѣ́си, И҆ произволе́нїе зри́ши, и҆ воздыха́нїе слы́шиши. Не таи́тсѧ тебѐ бж҃е мо́й, тво́рче мо́й, и҆зба́вителю мо́й, Нижѐ ка́плѧ сле́знаѧ, нижѐ ка́пли ча́сть нѣ́каѧ. Несодѣ́ланное моѐ ви́дѣстѣ ѻ҆́чи твоѝ. Въ кни́зѣ же твое́й и҆ є҆щѐ несодѣ̑ѧннаѧ, Напи̑сана тебѣ̀ сꙋ́ть. ви́ждь смире́нїе моѐ, Ви́ждь трꙋ́дъ мо́й є҆ли́къ, и҆ грѣхѝ всѧ̑ Ѡ҆ста́ви мѝ бж҃е всѧ́ческихъ, да чи́стымъ се́рдцемъ, Притре́петною мы́слїю и҆ дꙋше́ю сокрꙋше́нною, Нескве́рныхъ твои́хъ причащꙋ́сѧ и҆ прест҃ы́хъ та̑инъ, И҆́миже ѡ҆живлѧ́етсѧ и҆ ѡ҆божа́етсѧ всѧ́къ ꙗ҆ды́й же и҆ пїѧ́й, Чи́стымъ се́рдцемъ. ты́ бо ре́клъ є҆сѝ влⷣко мо́й: Всѧ́къ ꙗ҆ды́й мою̀ пло́ть, и҆ пїѧ́й мою̀ кро́вь, Во мнѣ̀ ᲂу҆́бѡ се́й пребыва́етъ, въ не́мже и҆ а҆́зъ є҆́смь. И҆́стинно сло́во всѧ́ко влⷣки и҆ бг҃а моегѡ̀: Бж҃е́ственныхъ бо причаща́ѧйсѧ, и҆ бг҃отворѧ́щихъ бл҃года́тей, Не ᲂу҆́бѡ є҆́смь є҆ди́нъ, но съ тобо́ю хрⷭ҇тѐ мо́й, Свѣ́томъ трисо́лнечнымъ, просвѣща́ющимъ мі́ръ. Да ᲂу҆́бѡ не є҆ди́нъ пребꙋ́дꙋ кромѣ̀ тебѐ живода́вца, дыха́нїѧ моегѡ̀, живота̀ моегѡ̀, ра́дованїѧ моегѡ̀, Сп҃се́нїѧ мі́рꙋ: сегѡ̀ ра́ди къ тебѣ̀ пристꙋпи́хъ, Ꙗ҆́коже зри́ши, со слеза́ми, и҆ дꙋше́ю сокрꙋше́нною, И҆збавле́нїе мои́хъ прегрѣше́нїй прошꙋ̀ прїѧ́ти мѝ: И҆ твои́хъ живода́тельныхъ и҆ непоро́чныхъ та́инствъ причасти́тисѧ неѡсꙋжде́ннѡ, да пребꙋ́деши, ꙗ҆́коже ре́клъ є҆сѝ, Со мно́ю треѻкаѧ́ннымъ: да не кромѣ̀ ѡ҆брѣ́тъ мѧ̀ Твоеѧ̀ бл҃года́ти, преле́стникъ восхи́титъ мѧ̀ льсти́внѣ: И҆ прельсти́въ ѿведе́тъ бг҃отворѧ́щихъ твои́хъ слове́съ. Сегѡ̀ ра́ди къ тебѣ̀ припа́даю, и҆ те́плѣ вопїю́ ти: Ꙗ҆́коже блꙋ́днаго прїѧ́лъ є҆сѝ, и҆ блꙋдни́цꙋ прише́дшꙋю, Та́кѡ прїими́ мѧ блꙋ́днаго и҆ скве́рнаго ще́дре. Дꙋше́ю сокрꙋше́нною, ны́нѣ бо къ тебѣ̀ приходѧ̀, Вѣ́мъ сп҃се, ꙗ҆́кѡ и҆ны́й, ꙗ҆́коже а҆́зъ, не прегрѣшѝ тебѣ̀, Нижѐ содѣ́ѧ дѣѧ̑нїѧ, ꙗ҆̀же а҆́зъ содѣ́ѧхъ. Но сїѐ па́ки вѣ́мъ, ꙗ҆́кѡ ни вели́чество прегрѣше́нїй, Ни грѣхѡ́въ мно́жество превосхо́дитъ бг҃а моегѡ̀ Мно́гое долготерпѣ́нїе, и҆ чл҃вѣколю́бїе кра́йнее: Но млⷭ҇тїю состра́стїѧ те́плѣ ка́ющыѧсѧ, И҆ чи́стиши, и҆ свѣ́тлиши, и҆ свѣ́та твори́ши прича́стники, Ѻ҆́бщники бж҃ества̀ твоегѡ̀ содѣ́ловаѧй незави́стнѡ. И҆ стра́нное и҆ а҆́гг҃лѡмъ и҆ человѣ́чєскимъ мы́слемъ, Бесѣ́дꙋеши и҆̀мъ мно́гажды, ꙗ҆́коже дрꙋгѡ́мъ твои̑мъ и҆́стиннымъ. Сїѧ̑ де́рзостна творѧ́тъ мѧ̀, сїѧ̑ вперѧ́ютъ мѧ̀ хрⷭ҇тѐ мо́й. И҆ дерза́ѧ твои̑мъ бога̑тымъ къ на́мъ бл҃годѣѧ́нїємъ, Ра́дꙋѧсѧ вкꙋ́пѣ и҆ трепе́щѧ, ѻ҆гне́ви причаща́юсѧ, Трава̀ сы́й: и҆ стра́нно чꙋ́до! ѡ҆роша́емь неѡпа́льнѡ, Ꙗ҆́коже ᲂу҆́бѡ кꙋпина̀ дре́вле неѡпа́льнѣ горѧ́щи. Ны́нѣ бл҃года́рною мы́слїю, бл҃года́рнымъ же се́рдцемъ, Бл҃года́рными ᲂу҆десы̀ мои́ми, дꙋшѝ и҆ тѣ́ла моегѡ̀, Покланѧ́юсѧ и҆ велича́ю, и҆ славосло́влю тѧ̀ бж҃е мо́й, Ꙗ҆́кѡ бл҃гослове́на сꙋ́ща, ны́нѣ же и҆ во вѣ́ки.

Мл҃тва и҆на́ѧ златоꙋ́стагѡ, и҃:

Бж҃е, ѡ҆сла́би, ѡ҆ста́ви, прости́ ми согрѣшє́нїѧ моѧ̑, є҆ли̑ка тѝ согрѣши́хъ, а҆́ще сло́вомъ, а҆́ще дѣ́ломъ, а҆́ще помышле́нїемъ, во́лею, и҆лѝ нево́лею, ра́зꙋмомъ, и҆лѝ неразꙋ́мїемъ, всѧ̑ мѝ простѝ, ꙗ҆́кѡ бл҃гъ и҆ чл҃вѣколю́бецъ: и҆ мл҃твами пречⷭ҇тыѧ твоеѧ̀ мт҃ре, ᲂу҆́мныхъ твои́хъ слꙋжи́телей, и҆ ст҃ы́хъ си́лъ, и҆ всѣ́хъ ст҃ы́хъ ѿ вѣ́ка тебѣ̀ бл҃гоꙋгоди́вшихъ, неѡсꙋжде́ннѡ бл҃говолѝ прїѧ́ти мѝ ст҃о́е и҆ пречⷭ҇тое твоѐ тѣ́ло, и҆ чⷭ҇тнꙋ́ю кро́вь, во и҆сцѣле́нїе дꙋши́ же и҆ тѣ́ла, и҆ во ѡ҆чище́нїе лꙋка́выхъ мои́хъ помышле́нїй. ꙗ҆́кѡ твоѐ є҆́сть црⷭ҇тво, и҆ си́ла и҆ сла́ва, со ѻ҆ц҃е́мъ и҆ ст҃ы́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Тогѡ́жде, ѳ҃:

Нѣ́смь дово́ленъ, влⷣко гдⷭ҇и, да вни́деши под̾ кро́въ дꙋшѝ моеѧ̀: но поне́же хо́щеши ты̀ ꙗ҆́кѡ чл҃вѣколю́бецъ жи́ти во мнѣ̀, дерза́ѧ пристꙋпа́ю: повелѣва́еши, да ѿве́рзꙋ двє́ри, ꙗ҆̀же ты̀ є҆ди́нъ созда́лъ є҆сѝ, и҆ вни́деши со чл҃вѣколю́бїемъ ꙗ҆́коже є҆сѝ: вни́деши и҆ просвѣща́еши помраче́нный мо́й по́мыслъ. вѣ́рꙋю, ꙗ҆́кѡ сїѐ сотвори́ши: не бо̀ блꙋдни́цꙋ со слеза́ми прише́дшꙋю къ тебѣ̀ ѿгна́лъ є҆сѝ: нижѐ мытарѧ̀ ѿве́рглъ є҆сѝ пока́ѧвшасѧ: нижѐ разбо́йника позна́вша црⷭ҇тво твоѐ ѿгна́лъ є҆сѝ: нижѐ гони́телѧ пока́ѧвшасѧ ѡ҆ста́вилъ є҆сѝ є҆́же бѣ̀: но ѿ покаѧ́нїѧ тебѣ̀ прише́дшыѧ, всѧ̑ въ ли́цѣ твои́хъ дрꙋгѡ́въ вчини́лъ є҆сѝ, є҆ди́нъ сы́й бл҃гослове́нный всегда̀, ны́нѣ и҆ въ безконє́чныѧ вѣ́ки, а҆ми́нь.

Тогѡ́жде, і҃:

Гдⷭ҇и і҆и҃се хрⷭ҇тѐ бж҃е мо́й, ѡ҆сла́би, ѡ҆ста́ви, ѡ҆чи́сти, и҆ прости́ ми грѣ́шномꙋ, и҆ непотре́бномꙋ, и҆ недосто́йномꙋ рабꙋ̀ твоемꙋ̀ прегрѣшє́нїѧ, и҆ согрѣшє́нїѧ, и҆ грѣхопадє́нїѧ моѧ̑, є҆ли̑ка тѝ ѿ ю҆́ности моеѧ̀ да́же до настоѧ́щагѡ днѐ и҆ часа̀ согрѣши́хъ, а҆́ще въ ра́зꙋмѣ и҆ въ неразꙋ́мїи, а҆́ще въ словесѣ́хъ и҆лѝ дѣ́лѣхъ, и҆лѝ помышле́нїихъ и҆ мы́слехъ, и҆ начина́нїихъ, и҆ всѣ́хъ мои́хъ чꙋ́вствахъ. и҆ мл҃твами безсѣ́меннѡ ро́ждшїѧ тѧ̀, пречⷭ҇тыѧ и҆ приснодв҃ы мр҃і́и мт҃ре твоеѧ̀, є҆ди́ныѧ непосты́дныѧ наде́жды и҆ предста́тельства и҆ сп҃се́нїѧ моегѡ̀, сподо́би мѧ̀ неѡсꙋжде́ннѡ причасти́тисѧ пречⷭ҇тыхъ, безсме́ртныхъ, животворѧ́щихъ, и҆ стра́шныхъ твои́хъ та́инствъ, во ѡ҆ставле́нїе грѣхѡ́въ и҆ въ жи́знь вѣ́чнꙋю: во ѡ҆сщ҃е́нїе, и҆ просвѣще́нїе, крѣ́пость, и҆сцѣле́нїе, и҆ здра́вїе дꙋши́ же и҆ тѣ́ла, и҆ въ потребле́нїе и҆ всесоверше́нное погꙋбле́нїе лꙋка́выхъ мои́хъ помыслѡ́въ, и҆ помышле́нїй, и҆ предпрїѧ́тїй, и҆ нощны́хъ мечта́нїй, те́мныхъ и҆ лꙋка́выхъ дꙋхѡ́въ: ꙗ҆́кѡ твоѐ є҆́сть црⷭ҇тво, и҆ си́ла, и҆ сла́ва, и҆ че́сть и҆ поклоне́нїе, со ѻ҆ц҃е́мъ и҆ ст҃ы́мъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Мл҃тва и҆на́ѧ, і҆ѡа́нна дамаски́на, а҃і:

Пред̾ две́рьми хра́ма твоегѡ̀ предстою̀, и҆ лю́тыхъ помышле́нїй не ѿстꙋпа́ю: но ты̀ хрⷭ҇тѐ бж҃е, мытарѧ̀ ѡ҆правди́вый, и҆ ханане́ю поми́ловавый, и҆ разбо́йникꙋ раѧ̀ двє́ри ѿве́рзый, ѿве́рзи мѝ ᲂу҆трѡ́бы чл҃вѣколю́бїѧ твоегѡ̀, и҆ прїими́ мѧ приходѧ́ща и҆ прикаса́ющасѧ тебѣ̀, ꙗ҆́кѡ блꙋдни́цꙋ, и҆ кровоточи́вꙋю: ѻ҆́ва ᲂу҆́бѡ кра́ѧ ри́зы твоеѧ̀ коснꙋ́вшисѧ, ᲂу҆до́бь и҆сцѣле́нїе прїѧ́тъ: ѻ҆́ва же пречⷭ҇тѣи твоѝ но́зѣ ᲂу҆держа́вши, разрѣше́нїе грѣхѡ́въ понесѐ. а҆́зъ же ѻ҆каѧ́нный всѐ твоѐ тѣ́ло дерза́ѧ воспрїѧ́ти, да не ѡ҆пале́нъ бꙋ́дꙋ: но прїими́ мѧ ꙗ҆́коже ѻ҆́ныѧ, и҆ просвѣтѝ моѧ̑ дꙋшє́внаѧ чꙋ̑вства, попалѧ́ѧ моѧ̑ грѣхѡ́вныѧ вины̑: мл҃твами безсѣ́меннѡ ро́ждшїѧ тѧ̀, и҆ нбⷭ҇ныхъ си́лъ, ꙗ҆́кѡ бл҃гослове́нъ є҆сѝ во вѣ́ки вѣкѡ́въ, а҆ми́нь.

Мл҃тва и҆на́ѧ, златоꙋ́стагѡ, в҃і:

Вѣ́рꙋю гдⷭ҇и, и҆ и҆сповѣ́дꙋю, ꙗ҆́кѡ ты̀ є҆сѝ вои́стиннꙋ хрⷭ҇то́съ сн҃ъ бг҃а жива́гѡ, прише́дый въ мі́ръ грѣ̑шныѧ сп҃стѝ, ѿ ни́хже пе́рвый є҆́смь а҆́зъ. Є҆щѐ вѣ́рꙋю, ꙗ҆́кѡ сїѐ є҆́сть са́мое пречⷭ҇тое тѣ́ло твоѐ, и҆ сїѧ̀ са́маѧ є҆́сть чⷭ҇тна́ѧ кро́вь твоѧ̀. Молю́сѧ ᲂу҆́бѡ тебѣ̀: поми́лꙋй мѧ̀, и҆ прости́ ми прегрѣшє́нїѧ моѧ̑, вѡ́льнаѧ и҆ невѡ́льнаѧ, ꙗ҆̀же сло́вомъ, ꙗ҆̀же дѣ́ломъ, ꙗ҆̀же вѣ́дѣнїемъ и҆ невѣ́дѣнїемъ: и҆ сподо́би мѧ̀ неѡсꙋжде́ннѡ причасти́тисѧ пречⷭ҇тыхъ твои́хъ та́инствъ, во ѡ҆ставле́нїе грѣхѡ́въ и҆ въ жи́знь вѣ́чнꙋю, а҆ми́нь.

Приходѧ́й же причасти́тисѧ, глаго́ли въ себѣ̀ настоѧ́щыѧ стїхѝ метафра́ста:

Сѐ пристꙋпа́ю къ бж҃е́ственномꙋ причаще́нїю,

Содѣ́телю, да не ѡ҆пали́ши мѧ̀ прїѡбще́нїемъ:

Ѻ҆́гнь бо є҆сѝ недостѡ́йныѧ попалѧ́ѧй.

Но ᲂу҆́бѡ ѡ҆чи́сти мѧ̀ ѿ всѧ́кїѧ скве́рны.

Та́же па́ки глаго́ли:

Ве́чери твоеѧ̀ та́йныѧ дне́сь, сн҃е бж҃їй, прича́стника мѧ̀ прїимѝ: не бо̀ врагѡ́мъ твои̑мъ та́йнꙋ повѣ́мъ, ни лобза́нїѧ тѝ да́мъ ꙗ҆́кѡ і҆ꙋ́да, но ꙗ҆́кѡ разбо́йникъ и҆сповѣ́даю тѧ̀: помѧни́ мѧ гдⷭ҇и во црⷭ҇твїи твое́мъ.

Па́ки стїхѝ сїѧ̑:

Бг҃отворѧ́щꙋю кро́вь ᲂу҆жасни́сѧ человѣ́че зрѧ̀:

Ѻ҆́гнь бо є҆́сть недосто́йныѧ попалѧ́ѧй.

Бж҃е́ственное тѣ́ло и҆ ѡ҆божа́етъ мѧ̀, и҆ пита́етъ.

Ѡ҆божа́етъ дх҃ъ, ᲂу҆́мъ же пита́етъ стра́ннѡ.

Та́же тропарѝ:

Оу҆слади́лъ мѧ̀ є҆сѝ любо́вїю хрⷭ҇тѐ, и҆ и҆змѣни́лъ мѧ̀ є҆сѝ бж҃е́ственнымъ твои́мъ раче́нїемъ. но попалѝ ѻ҆гне́мъ невеще́ственнымъ грѣхѝ моѧ̑, и҆ насы́титисѧ є҆́же въ тебѣ̀ наслажде́нїѧ сподо́би: да ликꙋ́ѧ возвелича́ю бл҃же, два̀ пришє́ствїѧ твоѧ̑.

Во свѣ́тлостехъ ст҃ы́хъ твои́хъ, ка́кѡ вни́дꙋ недосто́йный; а҆́ще бо дерзнꙋ̀ совни́ти въ черто́гъ, ѻ҆де́жда мѧ̀ ѻ҆блича́етъ, ꙗ҆́кѡ нѣ́сть бра́чна, и҆ свѧ́занъ и҆зве́рженъ бꙋ́дꙋ ѿ а҆́гг҃лѡвъ: ѡ҆чи́сти гдⷭ҇и, скве́рнꙋ дꙋшѝ моеѧ̀, и҆ сп҃си́ мѧ, ꙗ҆́кѡ чл҃вѣколю́бецъ.

Та́же мл҃твꙋ:

Влⷣко чл҃вѣколю́бче гдⷭ҇и і҆и҃се хрⷭ҇тѐ бж҃е мо́й, да не въ сꙋ́дъ мѝ бꙋ́дꙋтъ ст҃а̑ѧ сїѧ̑, за є҆́же недосто́йнꙋ мѝ бы́ти: но во ѡ҆чище́нїе и҆ ѡ҆сщ҃е́нїе дꙋши́ же и҆ тѣ́ла, и҆ во ѡ҆брꙋче́нїе бꙋ́дꙋщїѧ жи́зни и҆ црⷭ҇твїѧ.

Мнѣ́ же є҆́же прилѣплѧ́тисѧ бг҃ꙋ, бл҃го є҆́сть, полага́ти во гдⷭ҇ѣ ᲂу҆пова́нїе сп҃се́нїѧ моегѡ̀.

И҆ па́ки: Ве́чери твоеѧ̀ та́йныѧ:

Воспо́й а҆́бїе, бл҃годарѝ вельмѝ,

И҆ сїѧ̑ те́плѣ ѿ дꙋ́ши бг҃ꙋ глаго́ли:

Сла́ва тебѣ̀ бж҃е. Сла́ва тебѣ̀ бж҃е. Сла́ва тебѣ̀ бж҃е.

Та́же бл҃года́рственнꙋю сїю̀ мл҃твꙋ:

Бл҃годарю́ тѧ гдⷭ҇и бж҃е, мо́й, ꙗ҆́кѡ не ѿри́нꙋлъ мѧ̀ є҆сѝ грѣ́шнаго, но ѻ҆́бщника мѧ̀ бы́ти ст҃ы́нь твои́хъ сподо́билъ є҆сѝ. бл҃годарю́ тѧ, ꙗ҆́кѡ менѐ недосто́йнаго причасти́тисѧ пречⷭ҇тыхъ твои́хъ и҆ нбⷭ҇ныхъ дарѡ́въ сподо́билъ є҆сѝ. но влⷣко чл҃вѣколю́бче, на́съ ра́ди ᲂу҆ме́рый же и҆ воскр҃сы́й, и҆ дарова́вый на́мъ стра̑шнаѧ сїѧ̑ и҆ животворѧ̑щаѧ та̑инства, во бл҃годѣѧ́нїе и҆ ѡ҆сщ҃е́нїе дꙋ́шъ и҆ тѣле́съ на́шихъ, да́ждь бы́ти си̑мъ и҆ мнѣ̀ во и҆сцѣле́нїе дꙋши́ же и҆ тѣ́ла, во ѿгна́нїе всѧ́кагѡ сопроти́внагѡ, въ просвѣще́нїе ѻ҆́чїю се́рдца моегѡ̀, въ ми́ръ дꙋше́вныхъ мои́хъ си́лъ, въ вѣ́рꙋ непосты́днꙋ, въ любо́вь нелицемѣ́рнꙋ, во и҆сполне́нїе премꙋ́дрости, въ соблюде́нїе за́повѣдей твои́хъ, въ приложе́нїе бж҃е́ственныѧ твоеѧ̀ бл҃года́ти, и҆ твоегѡ̀ црⷭ҇твїѧ присвое́нїе: да во ст҃ы́ни твое́й тѣ́ми сохранѧ́емь, твою̀ бл҃года́ть помина́ю всегда̀, и҆ не ктомꙋ̀ себѣ̀ живꙋ̀, но тебѣ̀ на́шемꙋ влⷣцѣ и҆ бл҃годѣ́телю. и҆ та́кѡ сегѡ̀ житїѧ̀ и҆зше́дъ ѡ҆ наде́ждѣ живота̀ вѣ́чнагѡ, въ присносꙋ́щный дости́гнꙋ поко́й, и҆дѣ́же пра́зднꙋющихъ гла́съ непреста́нный и҆ безконе́чнаѧ сла́дость зрѧ́щихъ твоегѡ̀ лица̀ добро́тꙋ неизрече́ннꙋю: ты́ бо є҆сѝ и҆́стинное жела́нїе, и҆ неизрече́нное весе́лїе лю́бѧщихъ тѧ̀, хрⷭ҇тѐ бж҃е на́шъ, и҆ тѧ̀ пое́тъ всѧ̀ тва́рь во вѣ́ки, а҆ми́нь.

Вели́кагѡ васі́лїа, в҃:

Влⷣко хрⷭ҇тѐ бж҃е, цр҃ю̀ вѣкѡ́въ и҆ содѣ́телю всѣ́хъ, бл҃годарю́ тѧ ѡ҆ всѣ́хъ, ꙗ҆̀же мѝ є҆сѝ по́далъ бл҃ги́хъ, и҆ ѡ҆ причаще́нїи пречⷭ҇тыхъ и҆ животворѧ́щихъ твои́хъ та́инствъ. молю̀ ᲂу҆́бѡ тѧ̀ бл҃же и҆ чл҃вѣколю́бче, сохрани́ мѧ под̾ кро́вомъ твои́мъ, и҆ въ сѣ́ни крилꙋ̑ твоє́ю, и҆ да́рꙋй мѝ чи́стою со́вѣстїю да́же до послѣ́днѧгѡ моегѡ̀ и҆здыха́нїѧ, досто́йнѡ причаща́тисѧ ст҃ы́нь твои́хъ во ѡ҆ставле́нїе грѣхѡ́въ, и҆ въ жи́знь вѣ́чнꙋю: ты́ бо є҆сѝ хлѣ́бъ живо́тный, и҆сто́чникъ ст҃ы́ни, пода́тель бл҃ги́хъ, и҆ тебѣ̀ сла́вꙋ возсыла́емъ со ѻ҆ц҃е́мъ и҆ ст҃ы́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Метафра́ста по стїхѡ́мъ, г҃:

Да́вый пи́щꙋ мнѣ̀ пло́ть твою̀ во́лею, Ѻ҆́гнь сы́й и҆ ѡ҆палѧ́ѧй недостѡ́йныѧ, да не ѡ҆пали́ши менѐ содѣ́телю мо́й: Па́че же пройдѝ во ᲂу҆́ды моѧ̑, Во всѧ̑ соста́вы, во ᲂу҆тро́бꙋ, въ се́рдце. Попалѝ те́рнїе всѣ́хъ мои́хъ прегрѣше́нїй. Дꙋ́шꙋ ѡ҆чи́сти, ѡ҆ст҃ѝ помышлє́нїѧ. Соста́вы ᲂу҆твердѝ съ костьмѝ вкꙋ́пѣ. Чꙋ́вствъ просвѣтѝ простꙋ́ю пѧтери́цꙋ. Всего́ мѧ спригвоздѝ стра́хꙋ твоемꙋ̀. При́снѡ покры́й, соблюди́ же, и҆ сохрани́ мѧ Ѿ всѧ́кагѡ дѣ́ла и҆ сло́ва дꙋшетлѣ́ннагѡ, Ѡ҆чи́сти и҆ ѡ҆мы́й, и҆ ᲂу҆красѝ мѧ̀, Оу҆добрѝ, вразꙋмѝ, и҆ просвѣти́ мѧ. Покажи́ мѧ твоѐ селе́нїе є҆ди́нагѡ дх҃а, И҆ не ктомꙋ̀ селе́нїе грѣха̀, да ꙗ҆́кѡ твоегѡ̀ до́мꙋ вхо́домъ причаще́нїѧ, Ꙗ҆́кѡ ѻ҆гнѧ̀ менѐ бѣжи́тъ всѧ́къ ѕлодѣ́й, всѧ́ка стра́сть. Мл҃твенники тебѣ̀ приношꙋ̀ всѧ̑ ст҃ы̑ѧ: Чинонача̑лїѧ же безпло́тныхъ, Прⷣте́чꙋ твоего̀, премꙋ̑дрыѧ а҆пⷭ҇лы, Къ си̑мъ же твою̀ нескве́рнꙋю чⷭ҇тꙋю мт҃рь. И҆́хже мольбы̑ бл҃гоꙋтро́бне прїимѝ хрⷭ҇тѐ мо́й, И҆ сы́номъ свѣ́та содѣ́лай твоего̀ слꙋжи́телѧ. Ты́ бо є҆сѝ ѡ҆сщ҃е́нїе, и҆ є҆ди́ный На́шихъ, бл҃же, дꙋ́шъ и҆ свѣ́тлость. И҆ тебѣ̀ лѣпоподо́бнѡ ꙗ҆́кѡ бг҃ꙋ и҆ влⷣцѣ сла́вꙋ всѝ возсыла́емъ на всѧ́къ де́нь.

Мл҃тва и҆на́ѧ:

Тѣ́ло твоѐ ст҃о́е гдⷭ҇и і҆и҃се хрⷭ҇тѐ бж҃е на́шъ, да бꙋ́детъ мѝ въ живо́тъ вѣ́чный, и҆ кро́вь твоѧ̀ чⷭ҇тна́ѧ во ѡ҆ставле́нїе грѣхѡ́въ: бꙋ́ди же мѝ бл҃годаре́нїе сїѐ въ ра́дость, здра́вїе и҆ весе́лїе: въ стра́шное же и҆ второ́е прише́ствїе твоѐ сподо́би мѧ̀ грѣ́шнаго ста́ти ѡ҆деснꙋ́ю сла́вы твоеѧ̀: мл҃твами пречⷭ҇тыѧ твоеѧ̀ мт҃ре, и҆ всѣ́хъ ст҃ы́хъ.

Мл҃тва и҆на́ѧ ко прест҃ѣ́й бцⷣѣ:

Прест҃а́ѧ влⷣчце бцⷣе, свѣ́те помраче́нныѧ моеѧ̀ дꙋшѝ, наде́ждо, покро́ве, прибѣ́жище, ᲂу҆тѣше́нїе, ра́дованїе моѐ, бл҃годарю́ тѧ ꙗ҆́кѡ сподо́била мѧ̀ є҆сѝ недосто́йнаго, прича́стника бы́ти пречⷭ҇тагѡ тѣ́ла и҆ чⷭ҇тны́ѧ кро́ве сн҃а твоегѡ̀. но ро́ждшаѧ и҆́стинный свѣ́тъ, просвѣтѝ моѧ̑ ᲂу҆́мныѧ ѻ҆́чи се́рдца: ꙗ҆́же и҆сто́чникъ безсме́ртїѧ ро́ждшаѧ, ѡ҆животвори́ мѧ ᲂу҆мерщвле́ннаго грѣхо́мъ: ꙗ҆́же млⷭ҇тивагѡ бг҃а любобл҃гоꙋтро́бнаѧ мт҃и, поми́лꙋй мѧ̀, и҆ да́ждь мѝ ᲂу҆миле́нїе, и҆ сокрꙋше́нїе въ се́рдцѣ мое́мъ, и҆ смире́нїе въ мы́слехъ мои́хъ, и҆ воззва́нїе въ плѣне́нїихъ помышле́нїй мои́хъ. и҆ сподо́би мѧ̀ до послѣ́днѧгѡ и҆здыха́нїѧ, неѡсꙋжде́ннѡ прїима́ти пречⷭ҇тыхъ та̑инъ ѡ҆сщ҃е́нїе, во и҆сцѣле́нїе дꙋши́ же и҆ тѣ́ла. и҆ пода́ждь мѝ сле́зы покаѧ́нїѧ, и҆ и҆сповѣ́данїѧ, во є҆́же пѣ́ти и҆ сла́вити тѧ̀ во всѧ̑ дни̑ живота̀ моегѡ̀: ꙗ҆́кѡ бл҃гослове́на, и҆ препросла́влена є҆сѝ во вѣ́ки, а҆ми́нь.